Sanngiilliorneq, ajussuseq peqqissiminerluunniit?

AJORTULIORNEQ — Jehovap najoqqutassiaanik naapertuilluartunik unioqqutitsineq — kristumiut uumigisaraat. (Eprîarit 1:9) Ajoraluartumilli tamavitta ajortuliortoortarpugut. Tamavitta sanngiissutsit naammalluinnanngissuserlu kingornussarisimasavut akiugassaraavut. Amerlanertigulli ajortuliavut Jehovamut anngiiaatigisarutsigik ajortuliornaveersaarnissarpullu ilungersuutigisarutsigu ilerasuuteqarata taassumunnga qanillisinnaavugut. (Rûmamiut 7:21-24; 1 Juánase 1:8, 9; 2:1, 2) Jehova qutsavigaarput pilliut utertitsissutaasoq tunngavigalugu kiffartuuterput iluartoq akuerimmagu naak sanngiittaraluartugut.

Uinikkut sanngiinneq pissutigalugu ajortuliortup ajoqersukkap Jakobip eqqartugaatut isumassorneqarnissani pisariaqartittorujussuuaa: ’[Anersaakkut] napparsimasumik ilaqarussi ilagiit utoqqaanertaat qaaqquligit . . . Ajortuliaqaraluarunilu isumakkeerfigineqassavoq. Ajortissinnik anngiiarfigeqatigiigitsi qinullusilu, katsorsarneqaqqullusi.’ — Jâko 5:14-16.

Kristumiu tunniulluinnarsimasoq ingasattorujussuarmik ajortuliorpat inuttut Jehovamut anngiiarnissaannaa naammanngilaq. Utoqqaanertat iliuuseqartariaqarput, ilagiinni minguissuseq eqqissinerlu ulorianartorsiortinneqarmata. (Matîuse 18:15-17; 1 Korintumiut 5:9-11; 6:9, 10) Utoqqaanertat makku paasiniartariaqarpaat: Ajortuliortoq peqqissimiva? Suna ajortuliornermut pissutaava? Sanngiilliullatsiarnermik pissuteqarpa? Uerinermik pissuteqarpa? Tamakkuninnga naliliiniarneq oqitsuunngilaq immikkoortitsisinnaassuseqarluarnissarlu pisariaqarpoq.

Ajortuliorneq uerinermik pissuteqarpat, taava? Utoqqaanertat iliuusissaat ersarippoq. Korinthimi ilagiinni suliassaq ilungersornartoq iliuuseqarfigigamiuk apustili Paulus ima oqarsimavoq: ’Ajortoq taanna ilissinnit peersissiuk.’ (1 Korintumiut 5:13) Inuit ajortut ilagiinni kristumiuni inissaqanngillat.

Sanngiilliornermik, ajussutsimik peqqissiminermillu naliliiniarneq

Utoqqaanertat qanoq ilillutik paasisinnaavaat ajortuliorsimasoq peqqissiminersoq?a Tamanna oqitsuunngilaq. Assersuutigalugu eqqarsaatigeriaruk kunngi David. Taanna allasiorsimavoq tamatumalu kingunerisaanik toqutsisimalluni. Taamaakkaluartorli Jehovap inuuginnartippaa. (2 Samuel 11:2-24; 12:1-14) Taava Ananias Safiralu eqqarsaatigeriakkit. Taakku apustilinik uukapaatitseriaraluarput, ilumoortuusaarniarlutik tunisiumatuusuusaarput, uffa taamaannatik. Ajorami? Aap. Toqutsinertut allasiornertullu ajortigaa? Taamaanngikkaluarpoq. Taamaattorli Ananiasip Safirallu inuunertik tamatumunnga akiliutigisariaqarsimavaat. — apustilit suliait 5:1-11.

Sooq taakku eqqartuunneqarneri assigiinngillat? David uinikkut sanngiilliornini pissutigalugu ajortuliorujussuartoorpoq. Iliuuserisimasami ilungersornassusia paasileramiuk peqqissimilerpoq, Jehovallu isumakkeerfigaa — sukannersumilli perorsaatissippaa inoqutaani ajornartorsiuteqartuarneq atuutsillugu. Ananias Safiralu ajortuliorput namminneq iluanaarutissartik eqqarsaatigalugu ilagiit kristumiut salloqittaramikkik taamaalillutillu ’anersaamut illernartumut Guutimullu sallullutik’. Tamanna uummatikkut ajussutsimut ersiutaavoq. Taamaattumik sukannernerusumik eqqartuunneqarput.

Pisuni marlunni taakkunani tamani Jehova eqqartuussisuuvoq, eqqortumillu eqqartuussivoq uummatinik takunnissinnaagami. (Ussatit 17:3) Utoqqaanertat inuinnaasut taamaaliorsinnaanngillat. Qanorli ilillutik ajortuliaq ilungersornartoq sanngiissutsimik imaluunniit ajussutsimik pissuteqarnersoq paasiniarsinnaavaat?

Iluamik oqaatigalugu ajortuliat tamarmik ajortuupput, ajortuliortulli ilaannaat ajortuupput. Ajortuliat assigiit inummi ataatsimi sanngiilliornermik pissuteqarsinnaapput allamili ajussutsimik pissuteqarsinnaallutik. Ajortuliornerli ajortuliortup tungaanit sanngiissutsimik ajussutsimillu ilaqartarpoq. Aalajangiisuusut ilaat tassa ajortuliortup ajortuliornini qanoq isigineraa qanorlu iliuuseqarfigilersaarneraa. Peqqissimerpasippa? Tamanna paasisinnaassagunikku utoqqaanertat immikkoortitsisinnaassuseqartariaqarput. Qanoq ilillutik taamatut immikkoortitsisinnaassuseqalersinnaappat? Apustilip Paulusip Timoteus ima neriorsorsimavaa: ’Oqaatsikka eqqarsaatiginiakkit, Naalakkap tamanik siuneqartikkumaarmatit.’ (2 Timûtiuse 2:7) Utoqqaanertat maniguullutik Paulusip Biibilimillu allaqataasut allat isumassarsisitaallutik oqaasii ’eqqarsaatigiuartarunikkik’ ilagiinni ajortuliortut eqqortumik isummerfiginissaannut pisariaqartumik immikkoortitsisinnaassuseqalissapput. Taamaappallu aalajangigaat taakkua eqqarsaataannut pinnatik Jehovap eqqarsaataanut naapertuutissapput. — Ussatit 11:2; Matîuse 18:18.

Tamanna qanoq pisarpa? Ilaatigut Biibilip inunnik ajortunik allaatiginninnera misissortariaqarpaat paasiniarlugu allaatigisat pineqartut pissusiinut naapertuunnersut.

Akisussaaffimmik tigusineq peqqissiminerlu

Inuit ajortup aqqutaatigut ingerlalernissaminnik qinersisut siulliit tassa Adam Evalu. Naak naammalluinnartuugaluarlutik Jehovallu inatsisaanik tamakkiisumik ilisimasaqaraluarlutik Guutip kisimi oqartussaaneranut pikitsitsipput. Iliuuserisimasaminnik Jehovap eqqaasimmatik qisuariarnerat malugisariaqarpoq — Adamip Eva pisuutippaa, Evallu pulateriaarsuk pisuutippaa! (1 Moses 3:12, 13) Tamanna Davidip maniguulluinnassusianut naleqqiuteriassagit. Ajortuliaminik ajoqisunik eqqaasinneqarami allanik pisuutitsinani imminut akisussaatippoq isumakkeerfigineqarnissaminillu ilungersorluni qinulluni, ima oqarluni: „[Jehovamut] ajortuliorsimavunga!“ — 2 Samuel 12:13; Tussiaat 51:6, 11, 12.

Utoqqaanertat ingasattumik ajortuliorsimanermik, ingammik inersimasut pineqaraangata, pisimasut marluk taakku eqqarsaatigisassagunikkik pitsaassaaq. Ajortuliortoq — Davidip ajortuliaminik paasinnilernermini iliorneratut — pisuunini ilumoorluni nassuerutigaa peqqissimillunilu Jehovamut ikioqqullunni isumakkeerfigeqqua, imaluunniit ajortuliani suunngitsutut isikkoqalersinniarsaraa, immaqaluunniit allamik pisuutitsiniarsaraluni? Inuup ajortuliorsimasup immaqa kissaatigaa suna ajortuliorsimanerminik kinguneqarsimanersoq nassuiassallugu, immaqalu pissutsinik, qanga pisimasunik qanittukkulluunniit pisimasunik, tikkuagassaqarpoq utoqqaanertat qanoq ilillutik ikiuinissamik aalajangerniarneranni ikiuutigisinnaasaannik. (Maleqqiuguk Hosea 4:14.) Ajortuliortulli akuerisariaqarpaa nammineq ajortuliortuugami namminerlu Jehovamut nassuertussaagami. Manna eqqaamasariaqarpoq: „[Jehovap] qanippai neriuutaarussimasut, annaattarpai sapiissuseerutitaasimasut.“ — Tussiaat 34:19.

Ajortumik ileqqoqarneq

Tussiaatini inuit ajortut amerlasuunik innersuussutigineqarput. Allassimaffiit tamakku ikiortigalugit utoqqaanertat aalajangerniartarsinnaavaat ilumut inuk ajortuunersoq imaluunniit sanngiilliornersoq. Assersuutigalugu eqqarsaatigisinnaavaat kunngip Davidip qinnutaa isumassarsiarititaasoq: „Nusullunga peeqinanga ajortuliortunut inupilunnullu tappullunga. Taakku iluasaarlutik tulliminnut oqaluttarput — uffa uummatertik ajussusermik ulikkaartoq.“ (Tussiaat 28:3) Malugiuk ajortuliortut inupilunnut ilanngullugit taaneqarmata. Inuk uinikkut sanngiilliornini pissutigalugu ajortuliortoortoq silattuaqileruni qularnanngitsumik ingerlaannaq ajunngitsumut saanniarsarissaaq. Iliuutsinilli ajortunik ileqqoqalersimaneq inuup uummammigut ajussusianut ersiutaasinnaavoq.

Davidip versimi tassani aamma ajussutsimut ilisarnaataasoq alla taavaa. Ananias Safiralu assigalugit inuit ajortut qanerminnit ajunngitsunik aniatitsisinnaapput ajortunilli uummatiminniititaqarlutik. Inuk ajortoq ilumoortuusaarniartuusinnaavoq — Jesusip nalaani farisiiarit assigalugit, taakku ’inuit takkuanni qaamikkut ilumoortuusaaraluarput, ilumikkulli ilumoortuusaarniarnernik iluaatsuliornernillu imalissuullutik’. (Matîuse 23:28; Lúkarse 11:39) Ilumoortuusaarneq Jehovap uumigaa. (Ussatit 6:16-19) Allaat naliliisartunik oqaloqateqarnermini ajortuliorsimasup ilumoortuusaarluni ajortuliani nassuerutiginngippagu, imaluunniit allanit ilisimaneqareersuinnaat nangaalluni nassuerutigippagit, tamakkiisumik nassuerumanani, tamanna ajortumik uummateqarneranut ersiutaasinnaavoq.

Makitalluni Jehovamik suusupaginninneq

Inuit ajortut ilisarnaataat allat Tussiaat 10-mi allattorsimapput. Tassani allassimavoq: „Guutiitsup makitanermit nikanartut malersorpai . . . [Jehova] perloqqullugulu asissorpaa.“ (Tussiaat 10:2, 3) Kristumiu tunniulluinnarsimasoq makitalluni Jehovamik ataqqinninngitsuliortoq qanoq isigissavarput? Soorunami pissuseq tamanna ajortuuvoq. Inuk sanngiilliornini pissutigalugu ajortuliortoq ajortuliani paasileruniuk imaluunniit ajortuliaminik eqqaasinneqaruni, peqqissimisarpoq iliiuutsimilu allanngortinnissaa sulissutigilertarlugu. (2 Korintumiut 7:10, 11) Akerlianilli inuk Jehovamik ataqqinninnginnini pissutigalugu ajortuliorpat taava suup ikiussavaa ajortulioqqeqattaannginnissaanut? Naak saamasumik unnersuunneqaraluarluni makitajuaannaruni taava qanoq ililluni maniguussuseq ilumoorluni peqqissiminissamut pisariaqartoq pigisinnaassavaa?

Tussiaammi tassani kingusinnerulaartukkut Davidip oqaasii eqqarsaatigeriakkit: „Soormi guutiitsup Guuti asissussavaa imminullu oqarfigaluni: ’Pillarumanavianngilaanga.’“ (Tussiaat 10:13) Inuup ajortup nalunngilaa ilagiinnut kristumiunut suna eqqortuusoq sunalu eqqunngitsuusoq, eqqarsarunili pillarneqarnaviarnani ajortuliornissaminut nangaanavianngilaq. Paasineqarnissaminut annilaanganartoqanngittuartillugu ajortumik iliortuartarpoq. Ajortuliani paasineqarpat David assiginagu perorsaatissinneqarnissani ingalassimaniassavaa. Inuk taama ittoq Jehovamik ataqqinninngilluinnartuuvoq. „Taanna Guutimik mianerinninnermik atorfissaqartitsinngilaq. . . . ajortumillu asiginnaanani.“ — Tussiaat 36:2, 5.

Allanik ajoqusiineq

Ajortuliorneq inummut ataasiinnaanngitsumut sunniuteqartarpoq. Allasiortoq Guutimut ajortuliorpoq; nuliani meeqqanilu aliasuutissippai; allasioqataalu katissimasuuppat aamma taassuma ilaqutai aliasuutissippai; ilagiillu tusaamaneqarnerat kanngunarsarpaa. Tamakku tamaasa qanoq isumaqarfigai? Qamuuna aliasungaarnermik peqqissiminermillu piviusumik ersersitsiva? Imaluunniit Tussiaat 94-imi allaatigineqartutut ippa? Tassani allassimavoq: „Pinerluttuliortut tamarmik pingaakujuutaannarnik oqalupput. Sequmisippaat innuttatit, [Jehova], qunutippaat innuttassarsiatit. Uillarnerit takornartallu inuartarisarpaat, iliarsuit toquttarpaat. ’[Jehovap] takunavianngilaa,’ taama oqartarput, ’Jaakup Guutiata takunavianngilaa.’“ — Tussiaat 94:4-7.

Ajortuliaq ilagiinni iliuuseqarfigineqartoq qularnanngitsumik tassaanavianngilaq inuartarinninneq imaluunniit toqutsineq. Anersaarli — nammineq iluaqutissaq anguniarlugu inoqatinik ajoquseeriaannaassuseq — immaqa utoqqaanertat ajortuliorsimanermik paasiniaanermi malugilissavaat. Taamatut pissuseqarneq aamma pingaakujunneruvoq, inuup ajortup ilisarnaataa. (Ussatit 21:4) Pissuseq tamanna kristumiup ilumoortup pissusiata akerlerluinnaraa, kristumiumi ilumoortoq qatanngutini pillugu imminut pilliutigeriaannaasarpoq. — Juánase 15:12, 13.

Guutip najoqqutassiaanik atuineq

Eqqartorneqareersutigut siunertaanngilaq maleruagassaliornissaq. Suulli Jehovap ajuissutut isiginerai pillugit tikkuussissutaapput. Ajortuliorsimasoq ajortuliarisimasaminut akisussaajumanngila? Pisumut ilungersornartumut tamatumunnga atatillugu unnersuussutit pitsaasut ajortuliortup manngertilluni sumiginnarpai? Isertortumik ilungersornartumik ajortuliortarpa? Eqqunngitsuliortoq Jehovap inatsisaanik ataqqinninnginnermik peqqarniitsumik ersersitsiva? Nammineq iluanaarutissani eqqarsaatigalugu eqqunngitsoq toqqortorpaa, immaqalu tamanna ilutigalugu allanut sunniiniapilulluni? (Jûtarse 4) Eqqunngitsoq paasineqarmat iliuutsini ajortut suli ajornerulersippai? Allanut Jehovallu aqqanut kanngunarsaatissiisimanini eqqunngitsuliortup soqutiginngilluinnarpaa? Pissusiami? Inussiarnersumik Biibili tunngavigalugu unnersuunneqareeraluarluni makitallunilu pingaakujuttuaannarpa? Eqqunngitsumik ilioqqinnaveersaarnissamik qamuuna kissaateqarnermik amigaateqarpa? Tamakku tamaasa, peqqissiminnginnermut ersarissumik takussutissaasut, utoqqaanertat nalorniunnaarunikkik aalajangiutissavaat ajortuliorneq uinikkut sanngiilliornermik pissuteqarani ajussutsimik pissuteqartoq.

Allaat inummik ajortulioriartaaseqarpasissumik iliuuseqarfiginnikkaangamik iluartumik ingerlanissaanik kajumissaarinertik utoqqaanertat ingerlatiinnartassavaat. (Eprîarit 3:12) Inuit ajortut peqqissimillutillu allanngorsinnaapput. Taamaanngippat Jehovap Israelikkut ima kajumissaarsimanavianngikkaluarpai: „Guutiitsup qimalliuk aqqutigisani, iluaatsuliortullu soraarulligit pilersaarutini, saallunilu [Jehovamut], nallittoqqulluni Guutitsinnut, taanna isumakkeerfiginnittuartarmat.“ (Jesaja 55:7) Immaqa allaat naggataarutaasumik paasiniaanerminni utoqqaanertat malugisinnaavaat eqqunngitsuliorsimasoq uummatimigut isummamigullu allanngorsimasoq.

Ilagiinnulli ilaasortaajunnaarsitsilernerminni allaat utoqqaanertat paarsisutut eqqunngitsuliorsimasoq kajumissaarumassavaat peqqissiminissaanik Jehovallu iluarisaanik iliuleqqinniarnissaanik. Korinthimi ’inuk ajortoq’ eqqaamajuk. Taanna qularnanngitsumik eqqortumik ingerlaqqilersimavoq, ilagiinnullu ilaasortanngoqqinnissaa kingorna Paulusip siunnersuutigisimavaa. (2 Korintumiut 2:7, 8) Aamma kunngi Manasse eqqaamajuk. Taanna ajortorujussuusimagaluarpoq, naggataatigulli peqqissimimmat peqqissiminera Jehovap akueraa. — 2 Kunngit 21:10-16; 2 Israelikkut 33:9, 13, 19.

Ajortuliaqarporli isumakkeerfigineqarsinnaanngitsumik — anersaamut illernartumut ajortuliorneq. (Eprîarit 10:26, 27) Jehovap kisimi aalajangertarpaa kina taamatut ajortuliorsimanersoq. Inuit tamatuminnga aalajangiinissaminnut pisinnaatitaanngillat. Utoqqaanertat akisussaaffiat tassa ilagiit minguitsuutissallugit peqqissimisullu ajunngitsumik ingerlaleqqinnissaannik ikiussallugit. Immikkoortitsisinnaassuseqarlutik maniguullutillu suliassartik tamanna suliarippassuk, aalajangiinitik Jehovap ilisimassusianut naapertuutitittarlugit, taava paarsinerata ilaa tamanna Jehovap pilluaqqussavaa.

[Quppernerup ataani ilanngussaq]

[Qupp. 29-mi assiliartaq]

Ananias Safiralu anersaamut illernartumut sallupput, tamannalu inuunerminnik annaasaqaatigaat.