Upperisarsiorneq ilaaffigisat umiarsuaq qimattariaqanngisat?

UMIARSUAQ anorersuarsiorpoq. Inuttat, umiarsuarmik annaassiniarsuataaraluartut, ajornakusoortumik aalajangigassaqarput: umiarsuarmiiginnassanerlutik imaluunniit umiarsuaq qimassanerlugu inuunertillu annaallugu? Nalunngiliuk assersuut takorlooruminartoq tamanna teologiimut tunngasuni atorneqartartoq?

Teologit, ingammik katuullit, oqaluffeqarfitsik umiarsuarmut malissioqisumut assersuukkajuppaat. Oqartarput umiarsuaq tamanna, Jesusimik Peterimilluunniit aquttoqartoq, annaassissutissatuaasoq. Palasit ima ussateqarput: ’Oqaluffeqarfik qimanngisaannaruk. Oqaluffeqarfik siornatigut annertuunik ajornartorsiortareersimavoq, umiarsuaavorli oqaluttuarisaanerup anorersuinut tamanut akiuuttuarsimasoq.’ Ilaat oqartarput: ’Sooq oqaluffeqarfik qimassavarput? Allanik qinigassaqarpugut? Sooq najuinnassanngilarput immamullu manissumut pinissaanut ikiuulluta?’

Isummanut tamakkununnga assingusumik inuit upperisarsioqatigiinnit assigiinngitsuneersut ima eqqarsartarput: ’Nalunngilara uperisarsioqatigiit ilaaffigisakka amerlasuutigut kukkussuteqartut, neriuppungali allanngorumaartut. Oqaluffeqarfik ilaaffigisara qimakkusunngilara, ajornartorsiutinik aaqqiiniarnerani ikiorusunneruara.’ Isuma tamanna immaqa meeraanermit upperisamut tunniusimanermik imaluunniit „killuutigisoornissaanut“ siooranermit aallaaveqarpoq.

Teologi ilisimaneqarluartoq allaanerusumillu isumalik Hans Küng taamatut isumaqartunut ilaavoq. Taanna ima oqarpoq: „Oqaluffeqarfik qimaannassanerpara, ilaaqatigisimasakkalu anorersuarsiorneranni umiarsuullu putunerinik iluarsaassiniarneranni, immaqalu annanniarneranni, isumaminneertiinnarlugit?“ Oqaatsini ima ilavai: „Oqaluffeqarfiup iluani sunniuteqarluartumik sulinera taamaatikkusunngilara.“ Qinigassaq alla tassaassagaluarpoq „oqaluffeqarfimmit anineq nakkaassimanera, naleqarnerusunillu asanninneq, immaqaluunniit ilumoornerusumik kristumioorusunneq, pissutigalugit“. — Die Hoffnung bewahren.

Kisianni umiarsuarmiiginnartoqarsinnaava, oqaluffeqarfimmi ilaaffigisami, neriuutigalugu Guutip naakkinnissutsimini upperisarsiornerit tamaasa iluarsaaqqinnissaannut killeqanngitsumik piffissalissagai? Apeqqut tamanna ilungersornartuuvoq. Soorlu assersuummi ersertoq annanniummut qajannartumut pissipajuusaannarneq umiarsuarmi kiviartortumiiginnarnertulli navianartigaaq. Sunaluunniit akigalugu oqaluffeqarfimmiiginnarneq silatusaarnerua, iluani pissutsit qanoq ikkaluarpataluunniit? Ullumikkut upperisarsiornerit iluarsaaqqinnissamut sunik periarfissaqarpat? Guutip nammineq piumasami akerlianik taakkua iliornerat qanoq sivisutigisumik akuerissavaa?

[Qupp. 22-mi suminngaanneernera]

Chesnot/Sipa Press