Guutip isaani erlinnartuuvutit!
’Asanninnermik soraajuitsumik asavakkit, tamanna pillugu isumassuinermik qilusarpakkit.’ — JERIMIA 31:3.
1. Jesusip nalimini inuinnarnut isiginnittaasia farisiiarit taakkununnunga isiginnittaasiannit qanoq allaanerua?
TAMANNA isaasigut takusinnaavaat. Angut taanna, Jesus, upperisarsiornikkut siuttuisut inngilaq; isumassuisuuvoq. Inuit taakku nalligai ’paarinerlugaalutillu isumakkiigaammata savatut paarsisoqanngitsutut’. (Matîuse 9:36) Upperisarsiornikkut siuttui tassaasussaagaluarput paarsisut asannittut Guutimit asannittumit naakkinnittumillu aallartitaasut. Akerlianilli inuinnarnik nikaginnittuupput — allaat inuinnaat perloqqusaasutut isigalugit!a (Juánase 7:47-49; naleqqiuguk Hesekiel 34:4.) Nalunanngilaq taamatut isiginerluineq Biibilimut naapertuutinngitsoq Jehovap innuttaminik isiginnittaasianit allaanerulluinnartoq. Innuttani Israelikkut ima oqarfigisimavai: ’Asanninnermik soraajuitsumik asavassi.’ Jerimia 31:3, (nutsigaq pisoqaq).
2. Jobimik tuppallersaaniartuusaartut pingasut qanoq ilillutik Job qularunnaarsinniarsaraat Guutip isaani naleqanngitsuusoq?
2 Farisiiarilli Jehovap savaataanik asasaanik naleqanngitsutut misigilersitsiniaaqqaartooqqajanngillat. Jobimik pisimasoq eqqarsaatigeriaruk. Taanna Jehovamut naapertuilluartuullunilu assuarnaatsuusimavoq, „tuppallersaasulli“ pingasut kanngunartuliortuunerarpaat, tunussisuunerarlugu ajortoq toqusariaqaraluartorlu puiorneqarluinnarlunilu. Oqarfigaat Jobip naapertuilluassusia sunaluunniit Guutip pingaartinnavianngikkaa, nammineq inngiliniluunniit tatiginnginnamigit qilallu minguitsutut isiginnginnamiuk! — Job 1:8; 4:18; 15:15, 16; 18:17-19; 22:3.
3. Ullumikkut Satanip sutigut inuit isumaqalersinniartarpai naleqanngitsut asaneqarnissamullu qinngaqqunnarlutik?
3 Suli ullumikkut Satan ’qoqassiiniartarpoq’ inuit isumaqalersinniarlugit asaneqanngitsut naleqanngitsullu. (Evfisumiut 6:11) Inuit perruussusiat pingaarniassusiallu amerlasuutigut iluatsitaarniartarpaa. (2 Korintumiut 11:3) Aammali pisariuminartut imminut tatigissusiat aserussallugu nuannaraa. Tamanna ingammik ullumikkut ’ulluni kingullerni’ ajornakusoortuni pisarpoq. Ullumikkut inuppassuit ilaqutariinni ’asanniuitsuni’ peroriartorsimapput; inuppassuit kamajasuunik, namminissarsiortunik uteriitsunillu ulluinnarni inooqateqartariaqartarput. (2 Timûtiuse 3:1-5) Ukiuni makkunani pinerliineqarfioqisuni, allanik nagguilinnik uumissuiffioqisuni atornerluiffioqisunilu inuit taama ittut isumaqaqqajaasassagunarput naleqaratik asaneqarnissaminnullu qinngaqqunnarlutik. Angut ataaseq ima allassimavoq: „Asanninnermik misigiffeqanngilanga asannitseqarnangaluunniit. Upperiuminaatsittorujussuuara ilumut Guutip soqutigineraanga.“
4, 5. (a) Sooq inuttut naleqanngissutsimik isuma Biibilimut akerliua? (b) Suliniutivut suulluunniit naleqanngitsutut isumaqarfigigutsigik qanoq kingunipiloqarsinnaava?
4 Inuttut naleqanngissutsimik eqqarsaat sallusuissutip Guutip oqaasianiittup qiterisaanut, utertitsissummik ajoqersuummut, saassussinertut ippoq. (Juánase 3:16) Naassaanngitsumik inuusinnaalernissatsinnik periarfissiuunniarluta Guuti taama annertutigisumik akiliuteqarsimaguni — nammineq ernermi inuuneranik erlinnartumik — taava asasimassaqaatigut; Taassuma isaani assut naleqarsimassaagut!
5 Guutimillu iluarisaanngitsutut, ilungersuutivut tamarmik naleqanngitsut, misigissalluni nikallornassaqaaq! (Naleqqiuguk Ussatit 24:10.) Isiginnittaatsimit nikallornartumit tamatumannga isigalugu allaat ajunngitsumik isumaqarluni kajumissaarinerit, Guutimut kiffartornermi periarfissaqarfitsigut annertusisitsinissamut uagutsinnik ikiuiniutaagaluartut, eqqartuussinertut inuit ilaannut nipeqarsinnaapput. Qanorluunniit suliaqaraluarunik naammanngitsutut misiginerannut tamanna annertusissutaaginnarsinnaavoq.
6. Imminut eqqarsaatiginerluttuarnermut suna akiuussutissaava pitsaanerpaaq?
6 Illit taamatut misigisaruit, isumatsassanngilatit. Amerlaqaagut ilaannikkooriarluta imminut isornartorsiorpallaalertartut. Eqqaamassavalli Guutip oqaasii allataapput ’iluarsiartuutissatsitut’ aammalu ’ippiliugarsuarnik aserorterutissatut’. (2 Timûtiuse 3:16; 2 Korintumiut 10:4) Apustili Johannes ima allassimavoq: ’Tamatumannga nalujunnaassaagut sallusuissummit pisugut, taavalu uummativut taassuma saani tuppallersarsinnaavavut, uummatitta pillagassaatikkaluarpatigut Guuti uummatitsinnit annerummat suullu tamaasa ilisimallugit.’ (1 Juánase 3:19, 20) Sutigut pingasutigut Jehovamut erlinnartuusugut Biibilip ajoqersuutaa misissoriartigu.
Jehovap nalilittut isigaatit
7. Kristumiut tamarmik Guutip isaani naleqarnerat pillugu Jesusip qanoq oqaluttuuppai?
7 Siullermik, Biibilip toqqaannartumik ajoqersuutigaa tamarluinnatta immikkut Guutip isaani naleqartugut. Jesus ima oqarsimavoq: ’Qupalorarsuit tallimat aningaasat minnertaannik marlunnik akeqartarinnginnerpat? Taakkualu ilaat ataaserluunniit Guutimi puiugaanngilaq. Ilissimi nutsasiluunniit tamarmik kisissimapput; erseqinasi, qupalorarsuppassuarnit pingaarneruvusi.’ (Lúkarse 12:6, 7) Taamanikkut qupaloraarsuit timmissani nerisassatut tuniniarneqartuni akikinnerpaajusimapput, taamaakkaluartorli Pinngortitsisiminnit puiorneqarsimanngillat. Taamaalilluni naleqqiussinermut nuannerluinnartumut tunngavissaqalerpoq: Inummut naleqarneroqisumut tunngatillugu Guutip annikitsualuit tamaasa nalunngilai. Tamatuma assigaa tamatta immikkut nutsavut kisinneqarsimasut!
8. Sooq piviusorsiornerua isumaqassalluni Jehovap nutsavut kisissinnaagai?
8 Nutsavut kisinneqarsimasut? Isumaqaruit Jesusip assersuusiaata ilaa tamanna piviusorsiunngitsuusoq, taava manna eqqarsaatigeriaruk: Guutip kiffani aalajaatsut ima eqqaamalluaqqissaartigai allaat toqumit makitissinnaallugit — annikitsualuit tamaasa ilanngullugit pinngorteqqissinnaallugit, timikkut sananeqaatsimikkut kingornuttagaat uatsinnit paasiuminaaqisut, eqqaamasaat misigisimasaallu tamaasa ilanngullugit pinngorteqqillugit. Tamatumunga naleqqiullugu nutsanik (agguaqatigiissillugit niaqqumi 100.000-iusartunik) kisitsineq ajornannginneerarsuussaaq! — Lúkarse 20:37, 38.
Jehovap sukkut erlinnartuutippaatigut?
9. (a) Inuttut pissutsit suut Jehovap nalilittut isigai? (b) Pissutsit taama ittut sooq taassumunnga erlinnartuusoraagit?
9 Aappassaanik, Biibilimi paasitinneqarpugut Jehovap sutigut erlinnartuutikkaatigut. Pissutsivut ajunngitsut ilungersuutivullu nuannarai. Kunngip Davidip ernini Salomon ima oqarfigisimavaa: „[Jehovap] inuit uummataat tamaasa misissuiffigeqqissaartarpai eqqarsaativullu isertugaanerpaat ilisimallugit.“ (1 Israelikkut 28:9) Guutip silarsuarmi maani peqqarniiserfiusumi uumissuiffiusumilu uummatit misissortillugit uummatit millionilikkuutaat eqqissinermik, ilumoornermik naapertuilluarnermillu nuannarisaqartut nassaarigaangamigit nuannaartarsimassaqaaq! (Naleqqiuguk Juánase 1:47; 1 Pîtruse 3:4.) Guutip uummat imminut asanninnermik ulikkaartoq, imminik ilisarserusuttoq ilikkakkaminillu allanik aveqateqartoq naammattooraangagu qanoq pisoqartarpa? Malaki 3:16-imi Jehovap oqarfigaatigut nammineq pilluni allanik oqaloqatiginnittut tusarnaartarlugit allaallu ’Jehovap aqqanik ataqqinnittut Jehovamit eqqaaneqaatissaannik atuagaateqarluni’. Inuttut pissutsit taama ittut Jehovap naleqangaartutut isigai!
10, 11. (a) Pissutsiminnik ajunngitsunik Jehovap nalilittut isiginninnera ilaasa sooq upperiumanngeqqajaasarpaat? (b) Abiamik pisimasup qanoq ililluni takutippaa inuttut pissutsit ajunngitsut qanorluunniit annertussusillit Jehovap nalilittut isigigai?
10 Uummatilli imminut eqqartuuttup Guutip isaani naleqarnitsinnut uppernarsaatissaq taama ittoq immaqa assortorumassavaa. Immaqa ima oqarumassaaq: ’Kisiannimi allarpassuaqarpoq pissutsinik tamakkuninnga ersersitsisarnermikkut uannit maligassaalluarnerungaartunik. Jehovap taakkununnga naleqqiukkaangaminga pakatsisarsimassaqaaq!’ Jehova naleqqiussineq ajorpoq, aamma sukannersuunngilaq sukannersunilluunniit najoqqutassiortarani. (Galâsiamiut 6:4) Uummatinik sukumiilluinnartumik misissuisarpoq, pissutsillu ajunngitsut qanorluunniit annertussuseqartut tamaasa naleqartutut isigai.
11 Assersuutigalugu, kunngip ajortup Jeroboamip taassumalu kinguaavisa toqunneqarnissaat „annat“ piiarneqartarnerattut suujunnaarseqqugamigit Jehovap inassutigisimavaa ernerisa ilaat ataasiinnaq, Abia, ataqqinartumik iliverneqassasoq. Sooq? Tassaammat „[Jehovap] Israelikkut Guutiata . . . ajungitsorsiffigisimasatuaa“. (1 Kunngit 14:10, 13) Abia Jehovamik pallorfiginnittuusimagami aalajaatsoq? Taamaanngikkaluarpoq, ilaquttanimi ajortut tamaasa toqoqatigai. (5 Moses 24:16) Taamaakkaluartorli Abiap uummataani ’ajunngitsorsiani’ Jehovap nalilittut isigai tamannalu naapertorlugu iliuuseqarluni. Atuakkami Matthew Henry’s Commentary on the Whole Bible-mi ima allassimasoqarpoq: „’Ajunngitsortaqarsimappat’ nanineqassaaq: Guutip ajunngitsortat ujartarpai, takusarpai, qanorluunniit mikitigigaluarpata, nuannaraalu.“ Puiussanngilallu pissutsimik ajunngitsumik qanorluunniit mikitigigaluartumik Guutip nassaarfigigunisit taassumunnga kiffartorninni aalajaattuaannaruit alliartortissinnaagaa.
12, 13. (a) Tussiaat 139:3-mi qanoq ililluni takutinneqarpa suliniutivut Jehovap nalilittut isigigai? (b) Sooq oqartoqarsinnaava suliavut Jehovap sukuluiartarai?
12 Jehovap aamma suliniutivut nalilittut isigai. Tussiaat 139:1-3-mi ima allassimavoq: „Jehova, illit misissuiffigisimavarma, nalunangalu. Nalunngilarma issiagaluaruma nikorfagaluarumaluunniit, ungasissumit allaat paasereertarpat qanoq piniartunga. Nalunngilat pisukkuma nalagumaluunniit, aqqutikkalu tamaasa nalunngilluinnarpatit.“ Tassa iliuutsivut tamaasa Jehovap nalunngilai. Nalunngiinnanngilaali. „Aqqutikka tamaasa nalunngilluinnarpatit“ nagguia naapertussagaanni aamma isumaqarsinnaavoq „aqqutikka tamaasa erlinnartuutitut katersorpatit“ imaluunniit „aqqutikka tamaasa pingaartippatit“. (Naleqqiuguk Matîuse 6:19, 20) Qanorli ililluni Jehovap taama naammalluinnanngitsigalutalu ajortiliutigisugut aqqutivut, imaluunniit iliuutsivut, tamaasa pingaartissinnaavai?
13 Soqutiginarpoq David allakkami pisunnini nalaniniluunniit Jehovap ’nalunngikkai’ hebriiarisut isumavia tassaammat „sukuluiarpaa“ imaluunniit „minguiarpaa“. Oqaatsinik ujarlerfissiat ilaanni ima nassuiarneqarpoq: „Isumaqarpoq . . . igitassartai tamaasa piiarpai, ajunngitsortai katersorlugit — naleqartut annaanniarlugit. Taava imaappoq Guutip David sukuluiarsimagaa . . . igitassartai tamaasa, imaluunniit naleqanngitsortai tamaasa, piiarlugit ajunngitsortaalu pingaarutilittaalu kisiisa naatsorsuutigalugit.“ Uummatip imminut eqqartuuttup iliuutsivut tamatuma akerlianik isigisarpai, qangali kukkussutigisimasatsinnik assuarisarluta naammassisimasavullu naleqanngitsutut isigisarlugit. Jehovalli ajortitsinnik isumakkeerfigisarpaatigut ajortuliavut ilumoorluta peqqissimissutigigutsigik taamaalioqqinnginnissarpullu ilungersuutigigutsigu. (Tussiaat 103:10-14; apustilit suliait 3:19) Sukuluiartarpaatigut suliavullu ajunngitsut eqqaamasarlugit. Tassami taassumunnga aalajaattuartilluta naassaanngitsussamut eqqaamajuassavai. Puiussagaluarunigit naapertuilluanngitsuliortutut isigissaaq, naapertuilluanngitsuliunngisaannarporli! — Eprîarit 6:10.
14. Suup takutippaa kristumiutut kiffartornermi suliniutivut Jehovap nalilittut isigigai?
14 Suliat ajunngitsut suut Guutip nalilittut isigai? Ernini Jesus Kristus ilaarlugu iliuutsivut tamaasa. (1 Pîtruse 2:21) Suliaq pingaaruteqartorujussuaq tassaavoq Guutip naalagaafia pillugu nutaarsiassamik nuannersumik siaruarterineq. Rûmamiut 10:15-imi ima allassimavoq: ’Eqqissinermik nalunaarummik ajunngitsumik oqaluutiginnittut isigaasa ila sakimminassusii.’ Isikkavut nalinnginnaasumik sakimminartutut isigineq ajorpavut, oqaatsilli Paulusip tassani atugaata assigaa oqaaseq nutsikkami Septuagintami Rebekka, Rakel Josefilu — tamarmik pinnersutsimikkut malugineqarsimasut — pillugit atorneqartoq. (1 Moses 26:7; 29:17; 39:6) Tassa Guutitsinnut, Jehovamut, kiffartornitsinni suliniutivut taassumunnga ’pinnersorujussuullutillu’ erlinnartorujussuupput. — Matîuse 24:14; 28:19, 20.
15, 16. Sooq nikallujuinnerput Jehovap nalilittut isigaa, qanorlu ilillutik Davidip Tussiaat 56:9-mi oqaasiisa tamanna uppernarsarpaat?
15 Pissuseq alla Guutip naleqartutut isigisaa tassa nikallujuissuserput. (Matîuse 24:13) Eqqaamajuk Satanip Jehovamik tunussitinniarsarimmatit. Ullut tamaasa Jehovamut ilumoorfiginnittuarninni Satanip mitalliutaanut Jehova akissutissaqartittarpat. (Ussatit 27:11) Ilaannikkulli nikallujuinnissaq ajornakusoorsinnaasarpoq. Peqqiilliorneq, aningaasatigut ajornartorsiorneq, misigissutsikkut nanertisimaneq akornutissallu allat ullut qaangiussortut tamaasa misilinneqarfittut itsissinnaavaat. Ingammilli taamatut misilinneqarnerni nikallujuinneq Jehovap nalilerujussuartut isigaa. Taamaattuminguna Davidip Jehova qinnuigisimagaa qullini assersuutaasumik „imiisivinni“ toqqoqqullugit, ilumoorluni aperaluni: ’Allagaatinniinnginnerpat?’ (tugsiautit 56:9) Aap, Jehovap imminut ilumoorfiginninniarnitsinni qulliit naalliuutillu nikallujuilluta atortariaqakkavut ’katersortarpai’ eqqaamallugillu. Aamma taakku taassuma isaani erlinnartuupput.
16 Pissutsivut ajunngitsut suliniutivullu eqqarsaatigalugit erseqqissorujussuuvoq Jehovap tamatta immikkut naleqartutut isigisaminik nassaarfigisaraatigut! Satanip silarsuaata qanorluunniit pisimagaluarpatigut Jehovap naleqartutut ’inuiaallu erlinnartortaattut’ isigaatigut. — Haggai 2:7, NV.
Asanninnini ersersinniarlugu Jehova qanoq iliorsimasoq
17. Sooq Kristusip pilliutaata utertitsissutaasup qularunnaarsittariaqarpaatigut Jehovap Jesusillu tamatta inuttut ataasiakkaatut asagaatigut?
17 Pingajussaanik, Jehova uagutsinnut asanninnini ersersinniarlugu assut iliuuseqartarpoq. Kristusip pilliutaa utertitsissutaasoq Satanip sallulluni uagutsinnik naleqannginneraaneranut asaneqarnissamullu qinngaqqunnarneraaneranut akissutissaavoq kimittunerpaaq. Puiunngisaannassavarput Jesusip qisummi anniartitsivimmi annernangaartumik toqunera Jehovallu Ernermi asangaakkami toquneranik isiginninnermigut anniarnera uagutsinnut asannissusiannut uppernarsaataammata. Asanninnerlu tamanna tamavitsinnut ataasiakkaanut sammivoq. Taamatut Paulusip isigisimavaa, imami allassimavoq: ’Guuti Ernera uannik asannippoq imminillu tunniulluni pillunga.’ — Galâsiamiut 2:20.
18. Jehovap qanoq ililluni Kristusimut kajungersittarpaatigut?
18 Jehovap uagutsinnut asanninnini ersersissimavaa tamatta ataasiakkaarluta ikiorluta Kristusip pilliutaanik iluaqutiginnissinnaaqqulluta. Jesusip oqaasii Johannes 6:44-mi ima issuarneqarput: ’Uannut pisinnaasoqanngilaq Ataatap aallartitsisima kajungersinngippani.’ Oqaluussineq uagutsinnut ataasiakkaanut annguttoq anersaanilu illernartoq, naak piginnaanivut killeqaraluartut naammalluinnanngitsuugaluarlutalu ajoqersuutinik ilumoortunik paasinnillutalu atuisinnaanissatsinnut ikiortissatsitut tunniussani, ikiortigalugit Jehovap Ernerminut kajungersippaatigut inuunermillu naassaanngitsumik neriugisaqalersilluta. Taamaattumik Jehova Israelikkunnut oqaaserisimasamisut uagutsinnut ima oqarsinnaavoq: ’Asanninnermik soraajuitsumik asavakkit, tamanna pillugu isumassuinermik qilusarpakkit.’ — Jerimia 31:3.
19. Sooq qinusinnaanerup immikkut pisinnaatitaaffiusup qularunnaarsittariaqarpaatigut Jehovap tamatta immikkut asagaatigut?
19 Immaqa qinunikkut immikkut pisinnaatitaaffiusukkut Jehovap asanninnera annerpaamik malugisarparput. Taassuma kajumissaarpaatigut ’kipisuitsumik qinunissatsinnik’. (1 Tásalûníkamiut 5:17) Qinugaangatta tusartarpaatigut! Allaat ’qinnutinik tusartartutut’ taaneqarsimavoq. (Tussiaat 65:3) Tamanna allanut, Ernerminut allaat, suliassanngortissimanngilaa. Manna eqqarsaatigeriassagit: Tamanik Pinngortitsisup qinunikkut imminut palligunnissatinnik kajumissaarpaatigut, oqalunnissatsinnut ittoorata. Allaat qinnutigisatta Jehova arlaannik iliuuseqartissinnaavaa immaqa allatigut iliuuserinavianngisaraluanik. — Eprîarit 4:16; Jâko 5:16; takuuk Jesaja 38:1-16.
20. Sooq Guutip asanninnera pingaarnialernissamut namminissarsiulernissamulluunniit patsisiginiartussaanngilarput?
20 Kristumiup isumamigut aalajaatsup kialuunniit Guutip asanninneranut pingaartitsineranullu uppernarsaatissat taama ittut imminut pingaartippallaalernissaminut patsiginiartussaanngilai. Paulus ima allassimavoq: ’Saammaanneq uannut tunniussaq pissutigalugu nungullusi oqarfigaassi immissinnik isumassaq qaangerlugu isumaqarfigeqqunasi, kisianni immissinnik annerunianngitsumik upperneq Guutip kimulluunniit agguutigititaa missiliorlugu isumaqarfigeqqullusi.’ (Rûmamiut 12:3) Taamaattumik Ataatatta qilammiusup asanninnersuanik iluarusuutiginnitsilluta isumakkut peqqissuuniarta eqqaamallugulu Guutip saammaannera pisassarinngisarigaluaratsigu. — Naleqqiuguk Lúkarse 17:10.
21. Satanip salluliuutaa suna assortortuartariaqarparput, ilumoortorlu Guutimeersoq suna eqqarsaatigisariaqarparput?
21 Tamatta immikkut sapinngisarput tamaat iliorluta isumassarsiat Satanip silarsuatoqqami toqujartortumi matumani siuarsagai akiorniarniartigik. Tamakkununnga ilaavoq naleqannginnitsinnik asaneqarnissamullu qinngaqqunnarnitsinnik eqqarsaat. Pissutsit aaqqissuussaaneranni matumani isumaqalersinneqarsimaguit Guutimit asaneqarnisannut qinngaqqunnarlutit imaluunniit suliatit ajunngitsut taama annikitsigisut takusinnaanngikkai, imaluunniit ajortuliatit ima angitigimmata allaat ernerata toquata matussutississinnaanagit, taava sallumik paasitinneqarsimavutit. Salluliuutit taama ittut pineqarnissaattut pikkit, tassa maajugalugit assortorluinnakkit! Oqaatsit Rûmamiut 8:38, 39-mi allassimasut eqqarsaatitsinniitittuaannartigik: ’Nakimanaveerpunga toqulluunniit inuunerulluunniit, inngililluunniit naalagaanerilluunniit, maannakkut ittulluunniit piumaartussalluunniit, pissaanerilluunniit, qutsissulluunniit atsissulluunniit, suulluunniit pinngortitap allaasup avissaartinnaviassanngikkaatigut Guutip asannissusianit Kristus Jesusimi Naalakkatsinni.’ (wE 1/4 95)
[Quppernerup ataani ilanngussaq]
a Piitsut nikagalugit asissuerpaluttumik taasarsimavaat „‛am-ha·’aʹrets”-inik, tassa ’asimiukasinnik’. Ilisimasallit ilaat naapertussagaanni farisiiarit piitsut nalilinnik paarsiteqqusarsimanngilaat, nalunaajaataat uppereqqusarnagit, pulaartoreqqusarnagit, taakkununngaluunniit pulaaqqusisarnatik allaallu taakkunannga pisisaqqusinatik. Upperisarsiornikkut siuttut oqartarsimapput inummut taama ittumut panimminik katititsinerup assigigaa panini soriarsinnaajunnaarlugu uumasumut qilerlugu.
Qanoq akissavit?
□ Sooq Satanip isumaqalersinniarsaraatigut naleqanngitsugut asaneqarnissamullu qinngaqqunnartugut?
□ Jesusip qanoq oqaatigaa Jehovap isaani tamatta naleqartugut?
□ Qanoq ililluta nalunngissinnaavarput pissutsivut ajunngitsut Jehovap naleqartikkai?
□ Qanoq ililluta qularinngissinnaavarput ilungersorluta suliniutivut Jehovap ’katersorai’?
□ Jehovap tamatsinnut ataasiakkaanut asanninnini qanoq uppernarsarsimavaa?
[Qupp. 13-mi assiliartaq]
Jehovap aterminik eqqarsaatiginnittut tamaasa malugalugillu eqqaamavai