Niuertuuneq ilinnut qanoq akeqassava?

NUNAMI Amerikami kujallermiittumi præsidentip nulia unnerluussaasimavoq niuertarfiit isertortuusut ilaqutami pilersitaat aqqutigalugit dollarsinik hundredetusindilikkuutaanik ingerlatitseqqissimasutut. Indiami aningaasanik nioqquteqartarfimmi niuertoq 39-inik ukiulik tigusaavoq angerlarsimaffimminiillu pigissaangaartumit biiliminillu 29-usunit aallarunneqarluni, dollarsit 1,6 milliardit nalinginut kanngunartulioqataasimanini pissutigalugu. Filippinerit qeqertaasa ilaanni najugallit tusindilikkuutaat sakkunik assassorissanik inerteqqutaasunik sanaartorneq inuussutigaat. Oqaatigineqarpoq inuussutissarsiutitik iluanaarnartut pigiinnarniarlugit oqartussaasut akuliuteqqunagit isertortukkut akilertaraat.

Aap, niuertut silarsuaanni peqquserluttuliornerit atugaajartuinnarput. Amerlasuunullu atorfeerunnermik ataqqinassusiiagaanermillu, aammattaaq aningaasaataarunnermillu akeqartarpoq.

Illimmi? Niuertuuit? Niuertunngornissalluunniit eqqarsaatigaajuk? Ilinnut qanoq akeqassava? Akeqanngitsoornavianngilaq, tamannalu ajortuusariaqanngilaq. Silatusaarnerussaarli niuertunngortinnani niuertarfiutigeriikkamulluunniit tunngasunik aalajangiitinnani qanoq akeqarnissaanik naatsorsueqqaarnissaq. (Lúkarse 14:28) Naatsorsuutigisariaqakkat ilaat ungaluusaliami qupperneq 31-miittumi takuneqarsinnaapput.

Niuertuuneq pisariitsuunngilaq. Kristumiut anersaakkut ileqqussatigullu pisussaaffiit aamma eqqarsaatigisariaqarpaat. Imminut akilersinnaasumik niuertuusoqarsinnaava anersaakkullu oqimaaqatigiissaarineq pigiinnarlugu? Ileqqussat tungaatigut akuerineqarsinnaanngitsunut atatillugu aningaasartuutissaqarpa? Suut akuerineqarsinnaanersut aalajangerniarneranni suna iluaqutaasinnaava?

Aningaasat inissaviat

Niuernermi aningaasat pisariaqarput, soorunalumi neriuutigineqartarpoq ilaquttat inuussutigisinnaasaannik iluanaaruteqarnissaq. Aningaasalli tungaatigut anguniakkat sangutinneqariaannaasinnaapput. Piumatuuneq takkussinnaavoq. Aningaasat pineqaleraangata inuppassuit suut allat tamaasa tunulliutilersarpaat. Biibilimi Ussatit ilaannik allattoq, angut Agurimik atilik, oqimaaqatigiilluartumik isiginnittaaseqarnermik ersersitsivoq oqarami: „Piitsuunermik pisuunermilluunniit tuneqinanga, nerisassanik pisariaqakkannik tuniinnannga.“ (Ussatit 30:8) Inuussutissaqarniarnermi pisariaqartuinnaat naammaginissaata pingaaruteqarnera paasisimavaa — ’iluatsitserujussuarneq’ piumanngilaa.

’Inuunermili iluatsitsiffissarsuaq’ takkukkaangat piumatuunerup najoqqutassiat tamakkua puiortissinnaasarpai. Jehovap nalunaajaasuisa angalalluni nakkutilliisuata oqaluttuaraa nunami ineriartortitami taamaattoqarsimasoq. Niuerfik aningaasaliiffigineqarnissaminik pisariaqartitsisoq isumaqartitsisimavoq aningaasaliisut aningaasaatitik sukkasuumik marloriaatinngortissinnaagaat, immaqa qaammatialunnguit ingerlanerinnaanni. Pisariitsumik aningaasarsiornermik neqeroorutip taassuma amerlasuut aningaasaleeqataatippai. Angalalluni nakkutilliisoq nassuiaavoq: „Ilaat assut aningaasaliipallakkusupput. Apersornikippallaarput, nangaanatilli [aningaasaliissutissaminnik] taarsigassarsillutik.“

Marlulli aningaasaliitinnatik niuertarfimmik paasiniaaqqaarusupput. Suliffeqarfimmik takunnikkumanerat itigartinneqarpoq. Tamatumalu suliffeqarfiup tatiginassusianik qulalersippaat. Tamanna illersuutigaat, sapaatip-akunnialuimmi qaangiutiinnartut peqquserluttuliortut qulaajarneqarput inuillu tigusaallutik. Misissueqqaarsimanngitsunut tamanna qanoq akeqarpa? Soorunami aningaasaatitik annaavaat, immaqali aamma ikinngutit aningaasanik taarsigassarsiffigisimasatik maannakkulli taarsiiffigisinnajunnaakkatik, suna tamarmi suujunnaarmat. Aningasat pineqaraangata najoqqutassiap Ussatit 22:3-miittup malinnissaa silatusaarnerussaaq: „Silatuup perluk qanilliartortoq malugisarpaa qimarnguffissarsiortarlunilu, isumaatsorli soqutigittaalliuinnartarpoq tamannalu ajunaarutigisarlugu.“

Oqaatsitit eqqortikkit

Niuerneq iluatsinngitsoorpat qanoq iliortoqassava? Tussiaat 15:4-mi oqaatsiminik eqquutitsisoq naak nammineq iluaqutiginngikkaluarlugu nersualaarneqarpoq: „Nammineq ajunaarutigissagaluaruniulluunniit uppernarsaamminik aalajangiussiinnarpoq.“ Ajunngitsumik ingerlasoqartillugu oqaatsinik eqquutitsinissaq ajornanngitsuuvoq. Aningaasanilli annaasaqarnissaq apeqqutaaleraangat, assuarnaassuseq misilinneqartarpoq.

Assersuummik Biibilimeersumik Josvap nalaaneersumik takusaqariarta. Gibeonimiut peqqusersusaarlutik Israelikkut siulersuisui isumaqatigiissuteqarfigaat inuutiinnaqqullutik. Naalagaaffimmut Israelimik aarlerinartorsiortitsisinnaasutut isigineqartumut ilaapput. Peqqusersusaarnerat qulaajarneqarmat, israelikkut „Gibeonimiut toqussinnaanngilaat siulersortimik [Jehova] Israelikkut Guutiat naqqisigalugu uppernarsaallutik neriorsuiffigereersimammatigit.“ (Josva 9:18) Naak inuit taakkua akeqqat nunaanneeraluartut, siulersuisut pingaartissimavaat oqaatsimik eqquutitinnissaat. Kingusinnerusukkut pisimasut takutippaat Jehovap tamanna iluarigaa. — Josva 10:6-11.

Niuernikkut isumaqatigiissutigisat eqquutitinnissaat piareersimaffigaagit, aamma pissutsit ilimaginngisattut ingerlassagaluarpata?a Taamaaliornikkut Jehova oqaatsiminik eqquutitsiuaannartoq assigissavat. — Jesaja 55:11.

Unneqqarissuugit

Nalitsinni niuernerup silarsuaani unneqqarissuuneq tammariaannaavoq, tammavissimanngikkuni. Niuertut allat ilittut nioqquteqartut iluanaarneruniarlutik immaqa peqquserluttuliortarput. Immaqa ilumuunngitsunik ussassaaruteqartarput, nammineq sanaatik allat niuernermi ilisarnaataannik ilisarnaasertarpaat nioqqutissalluunniit pitsaannginnerusut pitsaalluartutut neqeroorutigisarpaat. Tamakku tamarmik peqquserluttuliornerupput. Taamaaliortartut ’guutiitsutut’ ipput, Asafip oqarnera naapertorlugu peqquserlunnikkut ’pisuunngoriartortittuartut’. — Tussiaat 73:12.

Kristumiutut niueriaatsit peqquserluttut atussavigit? Oqaatsinilluunniit Biibilimeersunit makkuninnga siulersortissavit: ’Iluaatsuliorfigisaqanngilagut, innarligaqanngilagut, peqqusersiorfigisaqanngilagut’; ’isertukkat kanngunartut asiginnarpavut peqqusersuutullu saqinata’; „Oqimaaluttat marluk assigiinngitsut [Jehovap] maajunnarai, oqimaalutaaviit peqquserluutit ajortuupput“? (2 Korintumiut 4:2; 7:2; Ussatit 20:23) Eqqaamajuk peqquserlunnermik aallarniisoq tassaammat Satan Diaavulu, ’sallunerit ataataat’, nammineerluni. — Juánase 8:44.

Ilaat immaqa akerliliissapput niuernerup silarsuaani allatulli peqquserluttuliortoqanngippat iluatsitsisoqarsinnaannginnerarlugu. Tamatumuunali Kristumiup Jehovamut tatiginninnini takutissinnaavaa. pilliuteqartoqartariaqaraangat unneqqarissuuneq misilinneqartarpoq. Oqaraanni peqquserluttuliornani inuussutissarsiortoqarsinnaanngitsoq, assigiinnarpaa oqarluni Guutip asasini isumagineq ajorai. Jehovamut ilumoortumik uppertup nalunngilaa Guutip kiffani nunani tamani pissutsinilu tamani isumagisinnaagai. (Eprîarit 13:5) Ilumoorpoq peqquserluttuliortunit akissarsiakinnerusariaqarneq; tamannali pitsaanerunnginnerpa Guutimit iluarisaannginnermit?

Eqqaamajuk peqquserluttuuneq boomerangitut immat miloriussisiminut utertartoq. Niuertoq peqquserluttutut paasineqarpat, niueqatit pisiniallu nigorsimanialertarput. Immaqa ataasiarluni peqqusersiorfigisinnaavai, qularnanngitsumilli taamaalioqqissinnaanavianngilaq. Akerliusumik niuertoq uneqqarissoq allanit ataqqineqalersarpoq. Imatut isumaqalinnginnissaq eqqumaffigiuk: ’Allat tamarmik taamaaliorput, taava aamma uanga taamaaliorsinnaavunga.’ Biibilip unnersuussutaa imaappoq: „Amerlanerusut iliornerannut ajortumut maleruutiinnassanngilatit.“ — 2 Moses 23:2.

Kristumiuunngitsumik piginneqateqaraanni Biibilip najoqqutassiaanik malinnittuaannanngitsumik tamanna qanoq isigineqassava? Niuertarfimmi Biibilerpalunngitsunik iliortoqaraangat akisussaaffimmit qimaanissamut utoqqatsissutaasinnaava? Eqqaamajuk Adam Saulilu qanoq pineqarnersut. Ajortuliornaveersaarnatik, allanit tatineqarnertik nakkaannarfigaat avatangiisitillu pisuutillugit. Annertuumik akiliuteqartariaqarput. — 1 Moses 3:12, 17-19; 1 Samuel 15:20-26.

Uppeqatit niueqatiginerini ileqqorissuuneq

Kristumioqatinik niuernikkut isumaqatigiissuteqaraanni eqqarsaatigisassartaqarpa? Pruffiiti Jeremiap illoqarfimmi najogarisamini Anatotimi illuminit narsaat pisiarigamiuk, aningaasat tunniutiinnanngilai assammiinnarnagulu. Naagga, oqarpoq: „Pisiarineranullu uppernarsaat allappara naqissuserlugulu, ilisimannittussallu qaaqqullugit aningaasat uuttuummut uuttorpakka.“ (Jeremia 32:11) Allakkatigut isumaqatigiissuteqaraanni kingusinnerusukkut pissutsit allanngorneri pissutigalugit paatsuuisinnaanerit pinngitsoortinneqarsinnaapput.

Kristumioqatimit peqqusersiorfigineqarsorinarpat qanoq iliortoqassava? Eqqartuussisunut suliassanngortinneqassava? Biibilimi unnersuut ersarippoq. ’Ilarsi aapparminut pasilliuteqaruni qanoq ililluni iluaatsunut eqqartuussissutigeqqusinnaava iluartunullu pinnani?’ Paulus aperivoq. Taavami ajornartorsiut ingerlaannaq naammaginartumik aaqqinneqanngippat? Paulus nangippoq: ’Matumuunaluunniit kukkuvusi: ilassinnut saqitsaateqartarassi. Sooq iluarnerutinngilisiuk iluaatsuliorfigitillusi? Sooq iluarnerutinngilisiuk arsaartillusi?’ Eqqarsaatigiinnaruk kristumiut peqatigiiffiannut qanoq kanngunarsaataatigissasoq avataaniittut tusarunikku eqqartuussivimmi kristumiut imminnut akersuuttut. Taamaattoqartillugu aningaasanut asanninneq qatanngutinut asanninnermit annerulertarsimanngila? Pingaartinneqarnermilluunniit misigissuseq ajoquserneqarnerpa akiniaaniarsarisoqarlunilu? Taamaattoqarnerani Paulusip unnersuussutaa naapertorlugu annaasaqarneq pitsaaneruvoq eqqartuussisunut suliassanngortitsinermit. — 1 Korintumiunut 6:1, 7; Rûmamiut 12:17-21.

Ilagiit iluanni akerleriinnerit soorunami Biibilimut naapertuuttumik suliarineqarsinnaapput. (Matîuse 5:37; 18:15-17) Kristumiut nakkutilliisut alloriarnernik peqqussutaasunik qatanngutit ikioraangamikkik, saqitsaattut pitsaasunik siunnersuuteqarfiginerisigut tapersersorsinnaavaat. Oqaloqatigiinnermi najoqqutassiat Biibilimeersut isumaqatigiissutiginissaat ajornanngissinnaavoq, kingornatigulli unnersuussutit malikkumaneqassappat taamaalilluni tigusimanerinik takutitsilluni? Guutimut kristumioqatitsinnullu asanninnerup taamaaliornissatsinnut kajumissississavaatigut.

Avaqqunneqarsinnaanngilaq niuertarfiuteqarneq akeqarmat. Neriunarporli akia naleqquttuussasoq. Aalajangiisariaqaleraanni ajornartorsiuleraanniluunniit, pitsaassaaq eqqaamassallugu inuunermi sorpassuit aningaasanit pingaarnerunerat. Aningaasat inissavimminniitinneratigut — oqaatsinik eqquutitsinikkut, unneqqarissuunikkut niuertuunermillu kristumiunut najoqqutassiat maleruarnerisigut — qulakkeerneqarsinnaavoq niuertarfiup pisariaqanngitsumik piffissaajaataannginnissaa aningaasaajaataannginnissaalu, aammattaaq ikinngutit, ilerasuuteqannginneq Jehovamullu ajunngitsumik attaveqarneq pigiinnarnissaat.

[Quppernerup ataani ilanngussaq]

[Qupp. 29-mi ungalusaq]

Niuertarfiuteqarnermi pilliutaasinnaasut

Piffissaq: Amerlanertigut namminersortuuneq aalajangersimasumik akissarsiortuunermit piffissaajarnarneruvoq. Pilersaarusiatit aserussavai anersaakkullu suliassanut piffissakinnerulersillutit? Isumalluarluniluunniit isigalugu, piffissat ima aaqqissuussinnaaviuk Guutip piumasaanik iliuuseqarnissannut piffissaqarnerulerlutit? Taamaassinnaappat ajunngissaqaaq. Mianersorilli, oqaannarneq naammassisaqarnermit ajornannginnerusarpoq.

Aningaasat: Aningaasanik iluanaaruteqassagaanni aningaasaateqartariaqarpoq. Niuertarfiutit qanoq annertutigisumik aningaasaliiffigisariaqarpa? Aningaasat pigaagit? Taarsigassarsisariaqarpilluunniit? Aningaasanik annaasaqarnissamut akissaqarpit? Niuernerilluunniit iluatsinngippat akiliisinnaajunnaassavit?

Ikinngutit: Suliffeqarfinni pisortat amerlasuut ulluinnarni aqutsinermi ajornartorsiuteqarnitik pissutigalugit ikinngutitik annaasarpaat. Ikinngutitaarnissamut periarfissaqarpoq, ikinngutigiinnermilli aseruinissaq suli ilimanarneruvoq. Ikinngutitimmi kristumiutut qatanngutaappata?

Ilerasuuteqannginneq: Nalitsinni niuernerup silarsuaani una isumaaneruvoq: „allap toqua allap iluaqutissarsiffigisarpaa,“ imaluunniit: „Sumik pissarsiffigissavara?“ Europami misissuinermi aperineqartut 70 procentii sinnerlugit isumaqarput ileqqorissuuneq niuernerup silarsuaani inissaqanngitsoq. Tupinnanngilaq peqquserlunneq niuerniutillu nalorninartut ulluinnarni atuutilersimammata. Maleruutiinnarusulersinnaavit?

Jehovamut attaveqarnerit: Qanoq iliornerit Guutip inatsisaanut najoqqutassiaanullu akerliusut tamarmik, naak niuernerup silarsuaani nalinginnaagaluartut, Pinngortitsisumut attaveqarnermut aseruutaassapput. Inuunermik naassaanngitsumik neriugisamik akeqarsinnaapput. Kristumiup ilumoortup akisugisariaqannginnerpaa, qanorluunniit aningaasat tungaatigut iluaqutigisinnaatigigaluaruniuk? (wE 1/5 95)

[Qupp. 29-mi assiliartat]

Kingusinnerusukkut paatsooqatigiissinnaanerit suup pinngitsoortissinnaavai? Assamminnerup allakkatigulluunniit isumaqatigiissuteqarnerup?