Silarsuaq peqquserluttuliortoqarfiunngitsoq neriorsuutigineqarpoq

PEQQUSERLUTTULIORNEQ innuttaaqatigiinni sumi tamaani nassaassaavoq. Pisortatigut, ilisimatussutsikkut, timersornikkut, upperisarsiornikkut niuernikkulluunniit peqquserluttuliorneq ingasatsikkaluttuinnarpoq.

Nunani amerlasuuni peqquserluttuliortoqarnermik tusarliussat nikallornartut nutaarsiassani saqqummersinneqartarput. Inuit innuttaaqatigiinni allat iluaqutissaannik suliassaqartinneqaraluartut namminneq iluaqutissaminnik akissarsillutik peqquserluttulisunngortinneqartutut ersersinneqartarput. Innuttaalluartumik taaneqartartut peqquserluttuliortarnerat atugaasorujussuuvoq. Nuimasut amerliartuinnartut suliffimminnut atatillugu ileqqulersuutitigut inatsisitigullu unioqqutitsisarput.

Europami aviisit ilaat naapertorlugu „’nuimasut peqquserluttuliornerat’ isumakuluutigineqaleriartuinnarpoq — tassa atorfilittat nuimasut, ministerit akuttunngitsumillu naalagaaffinni qullersaasut aatsaat isertortukkut akissarsillutik niuernerit pilersaarutillu pingaartut akuerisarpaat“. Nunami aalajangersimasumi „naak politiit ukiuni marlussunni misissuisimagaluartut ullullu tamaasa parnaarussaasoqartaraluartoq atorfillit peqquserluttuliortut iluarsivissaqanngitsut unitsinneqarsimanngillat“, tuluit aviisiat The Economist allappoq.

Peqquserluttuliornerujussuaq tamanna pissutigalugu inuppassuit ullumikkut tatigisaqarsinnaanatik misigisarput. Biibilimik allattutut Daviditut ima allassimasutut misigipput: „Sunaaffali tamarmik tunussisimapput, tamarmik aserorsimasuupput. Ajunngitsuliortoqanngillat ataasiinnarmilluunniit naami.“ — Tussiaat 14:3.

Peqquserluttuliornerujussuaq qanoq qisuariarfigineqarsinnaava? Ullutsinni inuit amerlanersaasa ilaginnartarpaat. Naalli ilaginnaannaraluarlugu ajoqutigisarparput. Qanoq?

Peqquserluttuliornerup sunnertarpaatigut

Atorfillit nuimasut nuimanngitsullu tamarmik peqquserluttuliornerat pissutigalugu inuunermi aningaasartuutit qaffakkiartorput, nioqqutissat pitsaassusiat milliartorpoq, suliffiit ikinnerulerput akissarsiallu appariartorlutik. Assersuutigalugu paareqqusanik peqquserlunnermi annaasat tillinnermit piiaanermillu annaasanit minnerpaamik quleriaammik amerlanerusarnerat missiliorneqarsimavoq. The New Encyclopædia Britannica-mi (1992-imeersumi) allassimavoq „USA-mi niuertarfiutilissuit akornanni pinerluttuliortarnermi annaasat ukiumut 200.000.000.000 $-nik naleqartut — tassa aaqqissugaasumik pinerluttuliortoqarnerani aningaasartuutit pingasoriaataat“. Allassimavortaaq naak sunniutigisartagai ingerlaannaq takuneqarsinnaanngikkaluartut, „taamaattoq sulisut, atuisartut avatangiisillu isumannaassusiannut sunniuteqartorujussuusartoq“.

Peqquserluttuliornerup kingunipiluisa kunngip Salomonip oqaaserisimasaanik eqqaasippaatigut: „Kingumut takuakka iluaatsuliornerit seqernup ataani pisartut. Takuakka qunutitaasut qiasut tuppallersarneqanngitsullu. Ikioriartorneqanngillat qunutitsisaat naalagaammata.“ — Nalunaajaasup oqaasii 4:1.

Imali paasisariaqarnerpa peqquserluttuliorneq pinngitsoorneqarsinnaanngitsutut isigisariaqaripput? Silarsuaq peqquserluttuliortoqarfiunngitsoq takorluuinerinnaava inornartoq? Qujanartumik taamaanngilaq! Biibilimi neriorsuutigineqarpoq naapertuilluannginneq inatsisaatsuussuserlu qanittukkut peerneqarumaartut.

Biibilimi ajoqersuutigineqartut

Biibilimi oqaluttuarineqarpoq peqquserluttuliorneq aallartissimasoq inngilip pissaanilissuup inuit siulliit Guutimut pikitsitsinermini ilageqqulluni salloqittarmagit. (1 Moses 3:1-6) Ajortuliortalersimanerat ajunngitsumik kinguneqanngivippoq. Akerlianik Adamip Evallu Jehova Guutimut ajortulioqqaarnerminnit peqquserlunnerup kingunipilui atugarliuutigilersimavaat. Timaat arriitsumik aserfallakkiartulerput naggataatigullu toqupput. (1 Moses 3:16-19) Taamanerniillu inuiaat oqaluttuarisaanerat peqquserluttuliornermik salloqittaanermillu assersuutissanik ulikkaarsimavoq. Peqquserluttuliortartui amerlanersaat ajortuliaminnit aniguilluartarput.

Pinerluttuliortut nalinginnaat assiginagit inuussutissarsiornermi siuttut naalagaaffimmilu atorfillit peqquserluttuliortut parnaarussaagajunngillat peqquserlullutillu pissarsiarisimasatik utertittariaqarnagit. Akissarsilluni peqquserluttuliorneq isertortukkut pisarmat nuimasut peqquserluttuliornerannik qulaajaanissaq ajornarsinnaasarpoq. Imali paasisariaqanngilaq silarsuaq peqquserluttuliortoqarfiunngitsoq takorluuinerinnaasoq inornartoq.

Inunnik Pinngortitsisup, Jehova Guutip, peqquserluttuliortoqartarneranit anigusissavaatigut. Guutip tamatumunnga akuliunnissaa aaqqiissutissatuaavoq. Sooq? Inuiaat takussaanngitsumik akeraat, Satan Diaavulu, inunnik tammartitsiniartuaannarmat. Soorlu 1 Juánase 5:19-imi (NV) allassimasoq: „Ilisimavugut Guutimit pisugut, silarsuarli tamaat ajortup pissaaneqarfigigaa.“ Peqquserluttuliortoqartarnera — ikinnerpaat pillarneqarfigisartagaat — atugaajartuinnartoq allamik nassuiaatissaqarnerpa?

Inuit qanoq iliuuseqaraluarunilluunniit Satan inngilipiluilu ajugaaffigisinnaanngilaat. Aatsaat Guuti akuliuppat inuiaat naalattut ’Guutip qitornaasa kiffaanngissusiata naalannaataat’ pigilersinnaavaat. (Rûmamiut 8:21) Jehova neriorsuivoq Satan qanittukkut qilersorneqassasoq inuiannik tammartitsisinnaajunnaarsillugu. (sarĸúmersitat 20:3) Guutip silarsuassaani nutaami peqquserluttoqarfiunngitsumi inoorusukkutta silarsuarmi matumani peqquserluttuliorneq ingalassimasariaqarparput.

Inuit allanngorsinnaapput

Jesusip nalaani inuit ilaasa pissaanertik atornerlullugu inoqatitik qunutittarpaat. Assersuutigalugu ilanngaaserisut peqquserluttarnermikkut tusaamasaanerluttarput. Taamaapput naak Guutip inatsisaani ima allassimasoqartoq: „Peqquserluttuliortoq illersussanngilat akilersinnerluutinik akilersillutit, akilersinnerluutit tappissuugaluamik tappiillisitsisarmata pinngitsuutitassaagaluit pisuutitassanngortillugit.“ (2 Moses 23:8) Sakæusip, ilanngaaserisut qullersaata, miserratiginngilaa eqqunngitsumik unnerluussilluni aningaasanik akilersuisitsisimalluni. Innuttaaqatigiinnik isumaginninnermik allanngortitsiniarnani Jesusip inuit ataasiakkaarlugit kajumissaarsimavai peqqissimeqqullugit peqquserluttuliorsimanertillu taamaateqqullugu. (Matîuse 4:17) Tamatumalu kinguneratut ilanngaaserisut peqquserlunnerarneqartut soorlu Mattæusip Sakæusillu inooriaasertik allanngortippaat. — Matîuse 4:17; 9:9-13; Lúkarse 19:1-10.

Ullumikkut peqquserluttuliorsimasut aamma tamanna taamaatissinnaavaat ’inuttaaq Guuti assilillugu pinngortitaq’ atilerunikku. (Evfisumiut 4:24) Peqqusersuilluni akileraarutit akilissagaanni imaluunniit suliniutinut unneqqarippasinngitsunut peqataajunnaarniarneq immaqa unamminiarnartuusinnaavoq. Taamaattorli kinguneqarluassaaq.

Silarsuup matuma peqquserluttuliortarnera peqataaffiginagu allat iluaqutissaannik soqutigisaqartut ilumikkut eqqissisimaartarput. Eqqunngitsuliornerminni qulaarneqarnissartik ersissutigisariaqanngilaat. Akerlianilli ilerasuuteqannginneq nuannaarutigisinnaavaat. Pruffiiti Daniel Biibilimi eqqaaneqartoq malinniartarpaat. Allassimavoq naalagaanerit Danielip atorfimminik ingerlatitsinerani pasilliutissarsiortartut. „Pasilliutaasinnaasumilli isornartumilluunniit nassaarfigineq saperpaat, tatigisassaalluartuummat eqqunngitsuliornermik peqquserluttuliornermilluunniit nassaarfigisassaanani.“ — Daniel 6:5.

Jehovap neriorsuutaa

Jehova ima neriorsuisimavoq: „Ajortuliortoq hundrederiarluni pinerluttuliorsinnaasarpoq taamaakkaluartorli sivisuumik inuusarluni. Nalunngilarali Guutimik mianerinnittut pilluarlutik inuussasut guutiitsulli atugarliussaallutik. Taakku tarraannartut issapput Guuti mianerinnginnamikku.“ — Nalunaajaasup oqaasii 8:12, 13.

Peqquserluttuliorneq taassumalu malitsigisartagai nuanniitsut atorunnaarpata eqqissiallannassaqaaq! Silarsuaq peqquserluttuliortoqarfiunngitsoq inuuffigissallugu, ila pilluarnassusissaa! Tamanna ajornanngilaq. Biibilimi eqqartorneqarpoq ’inuuneq naassaanngitsoq Guutip sallusuitsup killeqanngitsumit unnersuutigisaa’ neriuutigisinnaagipput. (Títuse 1:2) Illit peqquserluttuliorneq uumigalugu naapertuilluarneq asagukku periarfissaqarluarputit Guutip silarsuassamik nutaamik peqquserluttuliortoqarfiunngitsumik neriorsuutaata piviusunngornissaa takussallugu. (wE 1/6 95)

[Qupp. 4-mi assiliartaq]

Naalakkersuisut niuertorsuillu akornanni peqquserluttuliortoqartarpoq

[Qupp. 5-mi assiliartaq]

Nunani amerlasuuni innuttaasut atorfikkaallu akornanni peqquserluttuliortoqartarpoq