Kingornussarput erlinnartoq anersaakkut ittoq

OQALUTTUARTOQ: PHILLIP F. SMITH

„Ikumatitaq Afrikap taarnerpaartaani qaamasussaq ikinneqarpoq.“ Jehovas Vidners Årbog for 1992-imi quppernermi 75-imi oqaatsit tamakku atuaratsigik nuannaaqaagut! 1931-mi aatatta, Frank W. Smithip qatanngut Joseph F. Rutherford, taamanikkut Napasuliaq Alapernaarsuiffiup Peqatigiiffianut præsidentiusoq, taama allaffigisimavaa. Nukkani ilagalugu oqaluussiartorluni angalasimanini pillugu allassimavoq.

’ÅRBOGIMI’ 1992-imeersumi ima allassimasoqarpoq: „Gray Smith angajualu Frank, pioneerit sapiitsut marluk Cape Townimeersut [Afrika-kujallermi], Afrika-kangillermut tuluit pigisaannut aallarsimapput nutaarsiassamik nuannersumik oqaluussinissamut periarfissat misissoriartorniarlugit. Biili, De Sotomik taaguutilik, illuusartaliorpaat, atuakkanillu karsinik 40-nik usileriarlugu umiarsuarmut ikiteriarlugu Mombasamut, Kenyami umiarsualiveqarfissuarmut, aallarlutik.“

Qatanngut Rutherford allaffigalugu aataap Mombasamiit Nairobimut, Kenyami illoqarfiit pingaarnersaannut, angalaneq ima allaatigaa: „Biilimik angalaneq taama annikilliornartigisoq aatsaat misigaarput. Kilometerit 580-it ingerlaviginiarlugit ullut sisamat naallugit ingerlasariaqarpugut . . . Kilometerit tamaasa nivaataq atorlugu aqqutaani maniinnersat manissarniartariaqartarpakka ivigarsuillu orpiillu killoriarlugit marullummut iliorartarlugit biilip assakaasui ingerlasinnaaqqullugit.“

Nairobimut apuukkamik Frank Grayilu ulluni 21-ni oqaluussipput atuakkallu Biibililersaarutit nassatatik agguaallugit. „Tusarparput,“ aataa allappoq, „oqaluussinerput pissutigalugu Nairobimiut akornanni upperisarsiornikkut uitsanneqangaalersimasoq.“ Tamatuma kingorna aataap angerlarnissani erinigiinnalersimavaa ernini Donovan marlunnik ukioqartoq nulianilu Phyllis aappassaanik naartusoq takoqqissallugit. Meerassaa tassaavoq ataatarput Frank. Aataa Mombasamit umiarsuarmut siullermut ilaalluni, angerlarpoq, sulili apuunnani malariamit toqulluni.

Aleqama, nukkama uangalu atuakkami ukiumoortumi oqaluttuaq atuartillugu ataatarput asanartoq eqqarsaatigaarput. 1991-imi maajimi, 1992 pillugu atuakkap ukiumoortup saqqummersinneqarnera qaammatialunnik sioqqullugu, uummatimigut suliarineqartilluni toquvoq. Naak ataatani takusimanngisaannaraluarlugu taassumatut Jehova asangaarsimavaa. Aataap nalusimanngitsuuguniuk ukiut 28-it kingorna, tassa 1959-imi, ernini Afrika-kangillermi kristumiutut oqaluussisartutut immisut kiffartussasoq, nuannaarutigissagaluaqaa!

Ataatama inuusuttuunera

Ataata 1931-mi juulip ulluisa 20-anni Cape Townimi inunngorpoq, tassa ataatami toquneranit qaammatit marluk qaangiuttut. Taassumunnga atsiunneqarpoq. Inuusuttuunerminit ataatap Jehovamut asanninnini takutittarpaa. Qulingiluaannarnik ikioqarluni Cape Townimi qimuttuitsoqarfissuarmi nalunaajaasarpoq atuaqatiminit mitaatigineqartaraluarluni. 11-nik ukioqarluni Jehovamut tunniulluinnarpoq kuisillunilu. Ilaannikkut ataata kisimiilluni aqqusinermik ilivitsumik nalunaajaaffissaminik akisussaaffilerneqartarpoq. 18-inik ukioqarluni Cape Townip avataani qatanngutit arnat utoqqalisut Napasuliaq Alapernaarsuiffik-mik atuaqqissaaqatigiinnerat aquttarpaa.

1954-imi Napasuliaq Alapernaarsuiffiup Peqatigiiffia nalunaarpoq ukiup tullia Europami ataatsimeersuarneqartassasoq inuiannit tamalaanit peqataaffigineqartussanik. Ataata Europaliarusukkaluaqaaq Cape Townimilli Europamut aallarnissani akissaqartinnagu. Taamaattumik aalajangerpoq Rhodesiami avannarlermi (maannakkut Zambia) kanngussassarsiorfinni qaammatit pingasut kemikeritut suliniarluni. Kanngussassarsiorfiit ungasissumi nunaannarmiipput.

Ataatap nalunngilaa Rhodesiami avannarlermi nalunaajaasut qernertumik amillit amerlaqisut. Apuukkami ujarpai paasillugulu sumi ataatsimiittartut. Naak tamaanimiut oqaasiinik oqalussinnaanngikkaluarluni ilagisalerpai aammalu Jehovap Nalunaajaasuisa Assaaffimmi Ilagiissaat-ni ataatsimiittalerluni. Assaaffinni Europamiut ammip qalipaataa tunngavigalugu assigiinngisitsisarput, tamannalu takutikkajuttarpaat Afrikamiut nikanarsaataasumik oqaluffigisarlugit. Ataatali tamatigut inussiarnertarpoq.

Qaammatit pingasut tamakkua naalerneranni sulisartup qernertup nalunaajaasuunngitsup ataata ornippaa aperalugulu: „Nalunngiliuk qanoq taaneqartartutit?“ Qungujulluni ima nangippoq: „Bwana [Mr.] Napasuliaq Alapernaarsuiffik-mik taasarpatsigit.“

1955-imi ataata periarfissaqalerpoq Europami ataatsimeersuarnerit „Naalagaaffik ajugaasoq“-mik qulequtallit peqataaffigissallugit. Tassani Mary Zahariou naapippaa, aappaaguanilu katillugu. Katereerlutik USA-mi Ohiomi Parmami najugaqalerput.

Afrika-kangillermut

USA-mi ataatsimeersuarnermi peqataasut kajumissaarneqarput oqaluussisartunik amerlanerusunik pisariaqartitsiffiusuni kiffartulernissaminnik. Angajoqqaavut aalajangerput Afrika-kangillermut nuunniarlutik. Napasuliaq Alapernaarsuiffiup Peqatigiiffiata siunnersuutaa malillugu iliorput. Aningaasat siumut uternissamullu billetinut naammattut toqqorpaat ataatap suliffissarsisinnaanngeriataarnissaanut sillimaniarlutik, tassami sulisinnaanermik akuersissummik allagartallit kisimik nunami tamatumani najugaqarsinnaapput.

1959-imi juulimi passimik visamillu pissarsereeramik akiuussutissanillu kapitereeramik ataata anaanalu umiarsuarmut ilaallutik New Yorkimiit Cape Town aqqusaarlugu Mombasamut aallarput. Angalanerat sapaatit-akunnerinik sisamanik sivisussuseqarpoq. Mombasami umiarsualivimmi anersaakkut qatanngutinit oqaluussisartunik amigaateqarfiusumut nuussimasunit tikilluaqquneqarput. Nairobimut tikikkamik ataatap allagarsiassai naammattoorpaat. Tassaana ataatap Entebbemi Ugandamiittumi Geologiimik Misissuinermut Immikkoortoqarfimmi kemikeritut suliffissarsiorluni qinnutaanut akissut. Ataata anaanalu qimuttuitsunut ilaallutik Kampalamut Ugandamiittumukarput. Tassani ataata oqaloqatigineqarpoq atorfinitsitaallunilu. Taamanikkut Entebbep Kampalallu eqqaanni ataasiinnarmik allamik nalunaajaasoqarpoq, tassa George Kadu.

Naalakkersuisunit ataata akilerneqarpoq tamaanimiut oqaasii, luganda, ilinniaqqullugit. Nuannaarpoq, tassami oqaatsit taakku ilinniarnissaat pilersaarutigereersimavaa oqaluussinermi angusaqarnerusinnaajumalluni. Kingusinnerusukkut ataata atuagassiaaqqap „nâlagauvfik pivdlugo nalunaerut nuánersoK mána“-p lugandamut nutserneqarneranut ikiuuppoq.

Ataatap sapiilluni allat nalunaajaaffigisarpai. Suliffimmini Europamiut allat tamaasa oqaluussiffigisarpai, aalajangersimasumillu Ugandamiunut oqaluussiartoqataasarluni. Allaat Ugandami eqqartuussinermut ministeriusoq nalunaajaaffigaa. Taassuma Naalagaaffik pillugu tusarliussaq tusarnaaginnarnagu aamma ataatakkut nereqatigiinnermut qaaqqusimavai.

Aleqara Anthe 1960-imi inunngorpoq uangalu 1965-imi inunngorpunga. Tamatta Kampalami, illoqarfiit pingaarnersaanni, ilagiinni mikisuni alliartortunili anersaakkut qatanngutit qanittuararsuuavut. Entebbep eqqaani nalunaajaasuni uagut kisitta qaqortumik amiliugatta ilaannikkut quianartumik misigisaqartarpugut. Ilaanni ataatap ikinngutaasa ilaata Entebbe aqqusaarlugu ilimaginngisaminik akunnitsiariarami ataataga ujalersimavaa. Iluatsitsinngilarli, aatsaat ima aperigami iluatsitsilluni: „Aappariit Europamiut Jehovamut nalunaajaasuusut nalunngiligit?“ Ingerlaannaq ataatakkut illuannut ingerlanneqarpoq.

Aammalu artornartunik misigisaqartarpugut, ilaatigut sakkulersorluni pikitsitsinerit marluk. Piffissap ilaani naalakkersuisut sakkutuuisa naggueqatigiinnit aalajangersimasuneersut kikkulluunniit eqqarfigisarpaat. Ullukkut unnuakkullu eqqartuartarput. Aneqqusaannginneq ullaakkut nalunaaqutaq arfinerniit unnukkut arfinernut atuummat Entebbemi angajoqqaama angerlarsimaffianni ualikkut ataatsimiinneqartarpoq.

Kingusinnerusukkut aneqqusaannginneq atorunnaarmat ataatap Kampalamukaappaatigut Napasuliaq Alapernaarsuiffik-mik atuaqqissaaqatigiinnermut peqataajartorluta. Sakkutuut ilaata aallaasini tungitsinnut saatillugu biilerput unitseqquaa aperalutalu sumunnarnersugut. Taamani mikisuararsuuvunga aleqaralu tallimanik ukioqarpoq. Ataata eqqissisimasumik nassuiaammat sakkutuumullu Biibiliutivut takutillugit, ingerlaqquaatigut.

Ukiuni arfineq-pingasungajanni Ugandameereerluta 1967-imi angajoqqaavut aalajangerput USA-mut utertariaqartugut peqqiilliorneq ilaquttatsinnilu pisussaaffiit pissutigalugit. Ohiomi Canfieldimi ilagiinnut ilaalerpugut ataatalu tassani utoqqaanertatut kiffartulerpoq. Tassanilu angajoqqaama qatanngutit anersaakkut ittut asangaalerpaat soorluttaaq Kampalami ilagiinnguit asasimagitik.

Kristumiutut asannittumik perorsarneqarneq

1971-imi nukara David inunngorpoq. Angerlarsimaffimmi toqqissisimanermik asanninnermillu ulikkaartumi alliartorpugut, qularnanngitsumik angajoqqaatta imminnut asannittumik attaveqarnerannik pissuteqartumik.

Meeraalluta ataatap innaraangatta Biibilimit oqaluttuamik atuffattarpaatigut, qinusarluni taavalu, anaanap nalusaanik, sukkulaaminermik kuultiusamik puulimmik tunisarluta. Sumiikkaluaruttaluunniit ilaqutariittut Napasuliaq Alapernaarsuiffik atuaqqissaaqatigiissutigisarparput. Feeriartilluta ilaanni qaqqamiilluta, ilaanni sissami imarsuarmut saalluta, atuaqqissaaqatigiittarpugut. Ataata oqartarpoq tamakku tassaasut eqqaamasaasa pilluarnarnerpaat ilaat. Oqartarpoq ilaqutariittut atuaqqissaaqatigiinnerup nuannersuanik misigisaqarsimanngitsut nalligalugit.

Jehovamut asanninneq eqqarsaatigalugu ataatap maligassaalluarnermigut ajoqersortarpaatigut. Napasuliaq Alapernaarsuiffik-mik, Iteritsi!-mik imaluunniit Biibililersaarutinik allanik saqqummersoqaraangat ataatap pilereqaluni imarisaa misissortarpaa. Taassuma ilinniartippaatigut sallusuissut Biibilimeersoq pingaaruteqarpallaanngitsutut isigineqartussaanngitsoq kisianni erlinnartorujussuartut isigineqartussaasoq. Pigisatta erlinnarnersaasa ilaat tassaavoq ataatap Ny Verden-nutsigaataa qinerlerfissialik. Quppernerni tamani atuaqqissaarnermini allattugai nassaarineqarsinnaapput. Maannakkut allattukkat tamakku atuaraangatsigik soorlu tusaasinnaallugu ajoqersuillunilu unnersuussisoq.

Naggataa tikillugu aalajaatsoq

1991-imi maajip ulluisa 16-ianni oqaluussiartortilluni ataata uummalliulerpoq. Sapaatit-akunnialuit qaangiummata iluatsissorinaraluartumik uummammigut pilattarneqarpoq. Kisianni unnuakkut napparsimmavimmit sianerfigineqarpugut. Ataatagooq aanaarpoq nakorsallu ernummatigeqaat. Unnuaq tamanna aanaarnera unitsinniarlugu marloriarlugu pilattarneqaraluarpoq, iluatsinngitsumilli. Aanaarunnaarsimanngilaq.

Aqaguani ataata ajorsiartupallammat nakorsat anaanaga kingusinnerusukkullu nukara oqaloqatigaat kimigiiserfigalugit ataatap aalersortinnissaa akuereqqullugu. Ataatap nakorsat oqarfigisimagaluarpai qanorluunniit pisoqassagaluarpat aalersortinnissani akueriumanagu. Nassuiaassimavai Biibili tunngavigalugu sooq aalersortikkumanani aammulli taartaasut allat akuerisinnaallugit. — 3 Moses 17:13, 14; apustilit suliait 15:28, 29.

Nakorsat ilaat uagutsinnut akeqqersimaartuummata peruluttunut immikkoortortaqarfimmi pissutsit najummassimanaqaat. Ataatalu ajuleriartuinnarmat tamanna artornartorujussuuvoq. Jehova qinnuigaarput ikioqqulluta, siunnersuutillu atoriaannaasut tusarsimasavut maleruarniarpavut. Taamaattumik peruluttunut immikkoortortaqarfimmut iseraangatta torersunik atisaqartarpugut ataqqinnittumillu sulisunut pissuseqartarluta. Ataatap qanoq innera soqutigingaarlugu naleqquttunik aperisarpugut, napparsimmavimmilu sulisut ataatatsinnik isumaginnittut tamaasa qutsavigisarlugit.

Nakorsat napparsimasunillu paarsisut ilungersornivut maluginngitsoorsimanngilaat. Ullut ikittut ingerlaneranni pissutsit najummassimanartut allanngorput inussiarnerpasinnerusumut. Napparsimasunik paarsisut ataatamik isumaginnissimasut qanoq innera apeqqutigiuartarpaat, pigaartuunngikkaluaraangamilluunniit. Nakorsat ilaata uagutsinnut inussiarniitsumik pissuseqarsimagaluartup maanna inussiarnerluni anaana aperaa qanoq inneranik. Ilagiinni ilaaffigisatsinni uppeqatitta eqqarlittalu asannittumik annertoqqusersorpaatigut. Nerisassanik nassittarpaatsigut allaffigisarlutalu tuppallernaqisunik qinnuttarlutalu.

Ajoraluartumik ataata ajorunnaanngilaq. Pilattarneqaqqaarnermi ullut qulit kingorna toquvoq. Aliasuutigeqaarput. Ilaannikkut annaasaqarnermik misigineq artornartorujussuusarpoq. Qujanartumilli Guuti neriorsuivoq ’ullut tamaasa nammatatsinnik tigummissutissalluta’, tatigilluinnarnissaalu aatsaat taama ilikkartigaarput. — Tussiaat 68:20, NV.

Tamatta aalajangerpugut Jehova aalajaalluta kiffartuuttuarniarlugu periarfissaqarumalluta silarsuassami nutaami ataatap takoqqinnissaanut. — Mákorse 5:41, 42; Juánase 5:28; apustilit suliait 24:15. (wE 1/8 95)

[Qupp. 23-mi assiliartaq]

Frank Smith Cape Townimi anaanani, Phyllis, ilagalugu

[Qupp. 24-mi assiliartaq]

Ataata anaanalu katikkamik

[Qupp. 25-mi assiliartaq]

Entebbemi kuisittoqaqqaarmat Afrikamiut naalagaata ilaata naluttarfia qatanngutit atorpaat

[Qupp. 25-mi assiliartaq]

Tamaani ilassinneriaaseq

[Qupp. 26-mi assiliartaq]

Ataata anaanalu ataatap toqunerata siuninnguani