Angajoqqaat meeqqallu Guuti salliutissiuk!
„Guuti mianeruuk inatsisaalu maleruarlugit.“ — NALUNAAJAASUP OQAASII 12:13.
1. Mianerinninneq qanoq ittoq angajoqqaat meeqqallu ineriartortinniartariaqarpaat, qanorlu kinguneqassava?
JESUS KRISTUS siulittuutigineqarsimavoq ’Jehovamik mianerinninneq kajungerissagaa’. (Jesaja 11:3) Mianerinninneq tamanna tassaavoq Guutimik ataqqinningaarneq; Guutimut asanninneq pissutigalugu taassuma iluarinngisaanik iliornissamut mianerinninneq. Angajoqqaat meeqqallu Kristusitut Guutimut mianerinninneq ineriartortittariaqarpaat, taamaalillutik taassumatut kajungerisaqassallutik. Guuti inuunerminni salliutittariaqarpaat inatsisai naalallugit. Soorlu Biibilimi allassimasoq „tassaammat inuup naammassiniagassaa tamarmi“. — Nalunaajaasup oqaasii 12:13, NV.
2. Inatsisit pingaarnerpaartaat sunaava, kikkullu ingammik tamatuminnga peqquneqarpat?
2 Inatsit pingaarnerpaaq, tassa ’Jehova asassagipput uummatikkut iluunngarluta tarnikkullu iluunngarluta nukivullu tamakkerlugit’, ingammik angajoqqaanut oqaatigineqarsimavoq. Tamanna allassimasut nanginneranit paasinarsivoq: „Oqaatsit taakku . . . qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ (5 Moses 6:4-7; Mákorse 12:28-30) Angajoqqaat taamaalillutik peqquneqarput Guuti salliuteqqullugu namminneq asallugu meeqqatillu taamaaliornissaannik ilinniartillugit.
Kristumiunut akisussaaffik
3. Jesusip qanoq takutissimavaa meeqqat soqutigissallugit pingaaruteqartoq?
3 Ilaanni Jesusip takutippaa meeqqanik soqutigisaqarneq qanoq pingaaruteqartigisoq. Nunami kiffartornerata naalernerani inuit meeqqatik taassumunnga aappaat. Ajoqersukkat qularnanngitsumik isumaqaramik Jesus ulapippallaartoq unitsitsiniaalerput. Jesusilli ajoqersukkani ima avoqqaarai: ’Merlertunnguit uannut qaaginnarlit pitsaaleqinasigillu.’ Jesusip allaat meeqqat ’pakkuppai’ taamaalilluni takutillugu meeqqat soqutigineqarnissaat qanoq pingaartigisoq. — Lúkarse 18:15-17; Mákorse 10:13-16.
4. Kikkut peqquneqarpat ’inunnik inuiannit tamaneersunik ajoqersuganngortitseqqullugit’, taamaaliussagunillu qanoq iliortariaqarpat?
4 Jesusip aamma malinnitsini paasitippai meeqqatik kisiisaanngitsoq allattaaq ajoqersussallugit akisussaaffeqartut. Toqunermi makinnermilu kingorna Jesus ’qatanngutinut 500-nit amerlanerusunut’ — ilaatigut angajoqqaajusunut — takutippoq. (1 Korintumiut 15:6) Tamanna qularnanngitsumik Galilæami qaqqami pisimavoq apustilit 11-t najuutsillugit. Tassani Jesusip tamaasa ima peqquai: ’Taamaattumik aallaritsi inunnillu inuiannit tamaneersunik ajoqersuganngortitsigitsi, . . . ajoqersorsigillu ilissinnut peqqusakka tamaasa maleruaqqullugit.’ (Matîuse 28:16-20, NV) Kristumiup kialuunniit peqqussut tamanna sumiginnarsinnaanngilaa! Ataataasut anaanaasullu maleruassagunikku meeqqatik isumagisariaqarpaat aamma allanut oqaluussillutik ajoqersuganngortitsinermut peqataasariaqarlutik.
5. (a) Qanoq ililluta nalunngilarput apustilit amerlanersaat, immaqalu tamarmik, aappaqartut taamaattumillu qitornaqarsimagunartik? (b) Ilaqutariinni ittuusut unnersuussut suna ilumooruttariaqarpaat?
5 Allaat apustilit namminneq ilaquttaminnut akisussaaffitsik akisussaaffinnut allanut, soorlu oqaluussinermut Guutillu savaataanik nakkutilliinermut, oqimaaqatigiissartariaqarpaat. (Juánase 21:1-3, 15-17; apustilit suliait 1:8) Taamaappoq taakkua amerlanersaat, immaqalu tamarmik, aappaqarmata. Apustili Paulus ima nassuiaavoq: ’Qatanngummik arnamik nuliaqarluta angalasinnaannginnerpugut apustileqatitsitut Naalakkallu qatanngutaasut Kefasitullu?’ (1 Korintumiut 9:5, Matîuse 8:14) Apustilit ilaat aamma immaqa qitornaqarput. Oqaluttuarisaanermik allattut itsaq inuusimasut, ilaatigut Eusebius, allassimapput Peter qitornaqartoq. Kristumiut siulliit angajoqqaajusut tamarmik Allakkani unnersuussut manna maleruartariaqarsimavaat: ’Kisianni kialuunniit ilani annerusumillu inoqutini isumaginngikkunigit, taassuma upperneq soraarussimavaa uppinngitsumit ajornerulluni.’ — 1 Timûtiuse 5:8.
Akisussaaffik pingaarnerpaaq
6. (a) Kristumiut utoqqaanertat ilaqutallit unamminiarnartoq suna atortariaqarpaat? (b) Utoqqaanertap suna pingaarnerpaamik akisussaaffigaa?
6 Ullumikkut kristumiut utoqqaanertat ilaqutallit apustilit atugaannut assingusumik atugaqarput. Taakkua ilaquttamik anersaakkut timikkullu pisariaqartitaat isumagisariaqarpaat saniatigullu oqaluussineq Guutillu savaataanik nakkutilliineq akisussaafigalugit. Suna pingaarnerua? Vagttårnet, 1964-imi 1. juulimoortumi, ima allassimasoqarpoq: „[Ataataasup] pingaarnerpaamik ilaquttani akisussaaffigai, akisussaaffillu tamanna isumaginngikkuniuk allamik kiffartuuteqarsinnaanngilaq.“
7. Ataataasut kristumiut qanoq ilillutik Guuti salliutissinnaavaat?
7 Taamaattumik ataataasut Guuti salliutittariaqarpaat peqqussut manna maleruarlugu: „Ilissilu ataatat, qitornasi narrutsatseqinasigik, perorsartuarlugilli Jehovap ileqqoreqqusai oqaaqqissaarutaalu malillugit.“ (Evfisumiut 6:4, NV) Akisussaaffik tamanna allanut tunniunneqarsinnaanngilaq, naak immaqa ataataasoq aamma kristumiut ilagiissaanni suliassanik assigiinngitsunik nakkutigisassaqassagaluarpat. Ataataasut qanoq ilillutik akisussaaffitik isumagisinnaavaat — ilaquttatik timikkut, anersaakkut misigissutsikkullu pilersorlugit — ilagiinni assigiinngitsunik nakkutigisassaqaatigalutik?
Annertoqqutissaq pisariaqartoq
8. Utoqqaanertaq nuliaminit qanoq tapersersorneqarsinnaava?
8 Ersarippoq utoqqaanertat ilaqutallit annertoqqusersorneqarnissartik pisariaqartissinnaasaraat. Vagttårnet-imi aatsaat issuarneqartumi eqqartorneqarpoq nuliaasup kristumiup uini annertoqqusersorsinnaagaa. Ima allassimavoq: „Sapinngisamik uimi suliassaminik piareersaasinnaanissaa piuminarsarsinnaavaa, angerlarsimaffimmilu pitsaasumik pilersaarusiorluni aappariit tamarmik iluaqutissaannut piffissap erlinnartup asiutiinnarneqarnissaa pinngitsoortinniarlugu, piffissanngoraangat ilaqutariit nerisinnaaqqullugit, ataatsimiigiarsinnaaqqullugit. . . . Uiminit siulersorneqarluni nuliaasup kristumiup meeqqat Jehovap iluarisaanik iliornissaannut ajoqersorluarsinnaavai.“ (Ussatit 22:6) Aap, nuliaq ’ikiortitut’ pinngortitaavoq, uiatalu silatusaarluni ikiuinera ilassilluassavaa. (1 Moses 2:18) Nuliaminit tapersersorneqaruni ilaquttani ilagiinnilu akisussaaffini tamaasa isumagilluarnerusinnaavai.
9. Ilagiinni Thessalonikamiittuni kikkut kajumissaarneqarpat allat ikioqqullugit?
9 Kristumiunut utoqqaanertanut nuliaasut kisimiunngitsoq nakkutilliisunik ’Guutip savaataanik’ paarsiitigalutik ilaquttaminnik isumaginnittunik annertoqqusersuisinnaapput. (1 Pîtruse 5:2) Kikkut aamma ikiuussinnaappat? Apustili Paulusip kristumiut Thessalonikamiittut kajumissaarpai ’imminnik misissuisut’ ataqqeqqullugit. Nangillunilu qatanngutit taakku namminneq nakkutilliisuunngikkaluartut ima allaffigai: ’Oqaaqqissaarpassilu, qatanngutivut ukorsii, ileqqorluttut inertertarsigik, nikallortut tuppallersarsigik, sanngiitsut illersorsigik, tamanullu kamajuillusi.’ — 1 Tásalûníkamiut 5:12-14.
10. Qatanngutit tamarmik asannittumik ikioqatigiippata ilagiinnut tamanut qanoq kinguneqartarpa?
10 Ilagiinni qatanngutit asanninneq killissutigalugu nikallortunik tuppallersaasaraangata, sanngiitsunik illersuisaraangata, ileqqorluttunillu inerterisaraangata tamaasalu kamajuillutik iliorfigisaraangatigik nuannertaqaaq! Qatanngutit Thessalonikamiittut malersorneqangaaraluartik sallusuissummik Biibilimeersumik ilassinneqqammersut Paulusip unnersuussutaa maleruarpaat. (apustilit suliait 17:1-9; 1 Tásalûníkamiut 1:6; 2:14; 5:11) Asanninnikkut suleqatigiilluartaramik ilagiinniittut tamarmik nakussatsinneqarlutik ataasiussuseqartinneqarput! Ullumikkuttaaq qatanngutit imminnut tuppallersaqatigiillutillu, tapersersoqatigiillutillu oqaaqqissaaqatigiittarpata utoqqaanertat, amerlanertigut isumagisariaqakkaminnik ilaqutaqartut, paarsisutut akisussaaffii oqilisarneqarnerusarput.
11. (a) ’Qatanngutit’ eqqaaneqarmata sooq isummersinnaavugut aamma qatanngutit arnat pineqartut? (b) Ullumikkut arnap kristumiup inersimalluartup qanoq ililluni arnat inuusunnerusut ikiorsinnaavai?
11 ’Qatanngutit’ Paulusip allaffigisaasa arnat ilagaat? Aap, arnarpassuit uppertunngorsimammata. (apustilit suliait 17:1, 4; 1 Pîtruse 2:17; 5:9) Arnat taakku qanoq ilillutik ikiuisinnaasimappat? Taamanikkut ilagiinni arnaqarsimavoq inuusunnerusunik ’kinguaassiuutitigut illigussutsiminnik’ nunusinnaajunnaartunik imaluunniit nikallorsimasunik. (1 Timûtiuse 5:11-13) Ullumikkut arnat assingusumik ajornartorsiuteqarsinnaapput. Taakkua pingaartumik misiginneqataalluni tusarnaartoq pisariaqartippaat. Amerlanertigut arnaq kristumiu inersimalluartoq pitsaanerpaamik ikiuisinnaavoq. Assersuutigalugu, taassuma arnaq alla ajornartorsiutinik namminerisaasunik, angutip kristumiup tulluartumik iliuuseqarfigisinnaanngisaanik, oqaloqatigisinnaavaa. Ikiuinerup taama ittup naleqassusia pillugu Paulus ima allassimavoq: ’Arnat utoqqaat iluartut . . . ajoqersuilluassapput, arnat inuusuttut silattortinniassavaat uitik asaqqullugit qitornatillu asaqqullugit, piitaajuitsooqqullugit titsiitsooqqullugit, illumi paarsilluaqqullugit, avaaginnittaqqullugit, uitillu naalaqqullugit, Guutip oqaasia mitaatigineqaqqunagu.’ — Títuse 2:3-5.
12. Ilagiit tamarmik kikkut siulersuinerannut naalatsigitittariaqarpat?
12 Ilagiinni qatanngutit arnat maniguuttut uitik utoqqaanertallu tapersersorluaraangamikkik pilluaqqussutaasaqaat. (1 Timûtiuse 2:11, 12; Eprîarit 13:17) Ingammik utoqqaanertat ilaqutariinni akisussaaffillit iluaqutigissavaat tamarmik asanninnikkut ikioqatigiippata nakkutilliisunullu naalatsigitillutik. — 1 Pîtruse 5:1, 2.
Ilissi angajoqqaat, suna salliutippisiuk?
13. Ataataasut ilarpassuisa qanoq ilillutik ilaquttatik sumiginnartarpaat?
13 Ukiualuit matuma siorna isiginnaartitsisartoq tusaamasaasoq ima oqarpoq: „Takusimavakka angutit niuertarfissuarnik sulisunik hundredelikkuutaanik iluatsitsillutik aqutsissinnaasut; pissutsit suulluunniit tamaasa sapinngilaat, niuernerup silarsuaani allat qanoq perorsassallugit nersussallugillu nalunngilluarpaat. Aqunneqartussalli pingaarnerpaartaat tassa ilaqutariit, tassani iluatsitsisanngillat.“ Sooq? Imaannginnerpa niuerneq soqutigisallu allat salliutikkamikkik Guutillu unnersuussutai sumiginnarlugit? Guutip oqaasii imaapput: ’Oqaatsit taakku ilinnut tunniussakka qitornannut nangeqqittuartassavatit.’ Ullut tamaasa taamaaliortariaqarput. Angajoqqaat piffissaminnik tunisissapput ingammillu meeqqatik asangaarlugit soqutigisariaqarlugit. — 5 Moses 6:6-9.
14. (a) Angajoqqaat qanoq ilillutik meeqqatik isumagisariaqarpaat? (b) Meeqqanik eqqortumik ajoqersuineq sunik nassataqarpa?
14 Biibilip eqqaasippaatigut meeqqat tassaasut Jehovap tunissutai. (Tussiaat 127:3) Meeqqatit Guutip pigisaatut, tunissutitut ilinnut paareqqusatut, isumagisarpigit? Meeraq eqitaarukku taamaalillutillu asannittumik isumagigukku soqutigalugulu qularnanngitsumik ajunngitsumik qisuariassaaq. (Mákorse 10:16) ’Inuusuttorli ingerlavissaanik ajoqersussagukku’ eqitaarnissaa kuninnissaalu naammanngillat. Meeraq inuunermi nakkarfissanik ingalassimanninnissaanut iluaqutissaminik ilisimassuseqalersinnaassaguni aamma asannittumik perorsaatissinneqartarneq pisariaqartippaa. Angajoqqaat meerartik ilumut asagunikku ’sukannersumik perorsartariaqarpaat’. — Ussatit 13:1, 24; 22:6.
15. Angajoqqaat meeqqaminnik perorsaanerata pingaaruteqassusia sumit takuneqarsinnaava?
15 Angajoqqaat meeqqaminnik perorsaatissiisarnissaata naveersisarnissaatalu pisariaqassusia erseqqissarneqarpoq arnap atuarfimmi siunnersuisartup meeqqat allaffimminut isertartut ima allaatigimmagit: „Naakkinaqaat, nikallungallutik paatsiveqaratillu. Qanoq innertik oqaluttuarigaangamikku qiasarput. Amerlanerit, aap ilimagisatsinnit amerlaneroqisut, imminorniarsimagaluarput — soorunami pilluanngillat, allanit isumagineqannginnamik, paatsiveerusimaarlutik inuusuttuugaluarlutik nammineq akisussaaffik tigummisariaqaramikku, saperlutilli.“ Imalu nangippoq: „Inuusuttut suut tamaasa namminneq aalajangissagaangamikkik annilaangasaqaat.“ Immaqa meeqqat perorsaatissinneqaraangamik iluarisanngikkaluarpaat, kisianni angajoqqaaminnit ilitsersuutit killiliissutillu ilumut pingaartittarpaat. Angajoqqaamik ima soqutigitigigaangatik allaat killiliiffigisarlutik meeqqat nuannarisarpaat. „Oqilisaataaqaaq,“ inuusuttuaraq taama ittunik angajoqqaalik oqarpoq.
16. (a) Meeqqat ilaat kristumiutut perorsarneqaraluarlutik qanoq iliortarpat? (b) Sooq isummersinnaanngilagut meeqqat uteriitsut angajoqqaaminnit eqqortumik perorsarneqarsimanngitsut?
16 Imaassinnaavorli meeqqat angajoqqaaminnit asaneqaraluarlutik pitsaasumillu perorsarneqaraluarlutik taamaattoq angajoqqaat ajoqersuinerannik itigartitsisut, tammalersut soorlu ernermik tammarsimasumik Jesusip assersuusiaani. (Lúkarse 15:11-16) Imali paasisariaqanngilaq angajoqqaat Ussatit 22:6-imi peqqussutigineqartutut meeqqaminnik perorsaasimanngitsut. Allassimammat ’inuusuttoq ingerlavissaanik ajoqersorneqassasoq, taava utoqqaliguni tamanna nigussanngikkaa’, najoqqutassaavoq tamanut atuuttoq. Soorluli erneq tammarsimasoq iliorsimasoq, ilaat ajoraluartumik angajoqqaaminnut naalakkumanngillat. — Ussatit 30:17.
17. Angajoqqaat uteriitsunik meerallit immaqa suna tuppalliutigisinnaavaat?
17 Ataataq uteriitsumik ernilik ima oqarsimavoq: „Tamatigut uummataa anguniartarpara. Naluara qanoq iliussallunga, suut tamaasa misilereerakkit, iluatsitsinangali.“ Neriuppugut meeqqat uteriitsut taakku asannittumik perorsarneqarsimanertik eqqaamalerumaaraat uterumaarlutillu, ernerup tammarsimasup iliorneratut. Meeqqalli ilaat pikitsitsisarput, assersuutigalugulu angajoqqaamik aliasuutigisaannik kanngunartuliortarput. Immaqa angajoqqaat tuppalliutigisinnaavaat paasissallugu ajoqersuisut pingaarnerpaartaata nammineq misigisimammagu ajoqersukkami ilaata, Judas Iskariotip, sivisuumik ajoqersorneqarsimagaluarluni killuutigimmani. Jehovallu qularnanngitsumik aliasuutigisimavaa nammineq eqqunngitsuliorsimanani ernermi anersaajusut ilaat pikitsitsimmat unnersuussininilu sumiginnarlugu. — Lúkarse 22:47, 48; sarĸúmersitat 12:9.
Ilissi meeqqat — kia iluarisaanik iliussavisi?
18. Meeqqat qanoq takutissinnaavaat Guuti salliutillugu?
18 Jehovap meeqqat inuusuttullu ima kajumissaarpai: ’Ilissi meeqqat, angajoqqaasi naalassigik Naalakkami.’ (Evfisumiut 6:1) Taamaaliorlutik inuusuttut Guuti salliutissinnaavaat. Sianiitsulioqinak! „Sianiitsup ataatami oqaaqqissaarutai asiginnartarpai,“ Biibilimi allassimavoq. Anneruniaqinak isumaqarlutit perorsarneqartariaqarnak. Inoqarpoq ’minguitsutut imminnut isigisunik — uffali minguiarsimanatik’. (Ussatit 15:5; 30:12) Taamaattumik Guutip unnersuussutai maleruarniakkit kajumissaarneqaravit angajoqqaavit inassutaat perorsaanerallu ’naalattaqqullugit’, ’ilasseqqullugit’, ’puigoqqunagit’, ’tusaaqqullugit’ ’asiginnaqqunagillu’. — Ussatit 1:8; 2:1; 3:1; 4:1; 6:20.
19. (a) Meeqqat Jehovamut naalannissaminnut sunik pissutissaqarluarpat? (b) Inuusuttut qanoq takutissinnaavaat Guutip imminnut iliuuserisimasaanik qujamasullutik?
19 Jehova naalassallugu pissutissaqarluarpusi. Taassuma asavaasi inatsisinilu, ilaatigut meeqqat angajoqqaaminnut naalannissaannik peqqussut, illersorniarlusi pilluarnartumillu inuuneqalersinnaaqqullusi tunniussimavai. (Jesaja 48:17) Erninittaaq inuunerminik pilliuteqartissimavaa ilissi ajortimit toqumillu annaanniarlusi inuunerlu naassaanngitsoq angusinnaaqqullugu. (Juánase 3:16) Tamanna qujamasuutigaajuk? Qilamminngaanniit Guutip uummatit misissortarpaa paasiniarlugu asanerit illillu pillutit iliuuserisimasani pingaartinneritit. (Tussiaat 14:2) Satanittaaq isigaatit, Guutilu mitaatigalugu illit Guutimut naalakkumannginerarlutit. Guuti naalanngikkaangakku Satan nuannaartittarpat Jehovalu ’ajuallatsillugu’. (Tussiaat 78:40, 41) Jehovap ilungersortumik ima kajumissaarpaatit: „Ernera, silatuujuniarit taamalu uummatiga nuannaartillugu [naalallutit], mitallersikka uannut akisinnaaqqullugit.“ (Ussatit 27:11) Aap, una apeqqutaavoq: Kina nuannaartissaviuk, Satan imaluunniit Jehova?
20. Niviarsiaraq ilaannikkut annilaangagaluarluni qanoq ililluni Jehovamik kiffartornissaminut qunusuissuseqalertarsimava?
20 Satanip taassumalu silarsuaata ilinnut tatisinerat pissutigalugu Guutip piumasaanik iliornissaq artornartarpoq. Taamaannera annilaarnarsinnaavoq. Niviarsiaraq ima oqarsimavoq: „Ersineq qiianertut ippoq. Iliuuseqarfigineqarsinnaavoq.“ Ima nassuiaavoq: „Qiiaguit tuluujulersinnaavutit. Suli qiiaguit tuluujuleqqissinnaavutit. Taamalu iliuuseqaqqissinnaavutit qiiajunnaarserlutit. Ersitilluni Jehovamut qinuneq qiiatilluni tuluujulernermut assersuunneqarsinnaavoq. Qinoreerlunga suli ersiguma, qinoqqissaanga, taamaalioqqissallungalu ersiunnaarserlunga. Sunniuteqarluarpoq. Tamanna ajornartorsiutissaraluannut illersuutigisarsimavara.“
21. Jehova inuunitsinni salliutikkutsigu taassuma qanoq ikiussavaatigut?
21 Ilumut Guuti inuunitsinni salliutinniarutsigu ikiussavaatigut. Nakussatsissavaatigut inngilini aqqutigalugit pisariaqaraangat ikiortarluta, soorluttaaq ernini ikiortarsimagini. (Matîuse 18:10; Lúkarse 22:43) Angajoqqaat meeqqallu kaammattorniarpavut qunusuinnissaannik. Kristusitut Guutimik mianerinnikkussi nuannaarnermik kinguneqassaaq. (Jesaja 11:3) Aap, „Guuti mianeruuk inatsisaalu maleruarlugit, tamanna inunni ileqqussaammat“. — Nalunaajaasup oqaasii 12:13. (wE 1/10 95)
Akisinnaavigit?
□ Jesusip ajoqersugai ukiuni hundredelinni siullerni inuusut akisussaaffitik naammassiniarlugit qanoq oqimaaqatigiissumik iliortariaqarsimappat?
□ Angajoqqaat kristumiut suna akisussaaffigaat?
□ Kristumiunut utoqqaanertanut ilaqutalinnut suut ikiuutaasinnaappat?
□ Ilagiinni qatanngutit arnat qanoq ilillutik pingaartumik ikiuisinnaappat?
□ Meeqqat unnersuussutit suut maleruartariaqarpaat?
[Qupp. 16-mi assiliartaq]
Amerlanertigut arnap kristumiup inersimalluartup arnaq inuusunnerusoq pisariaqartumik ikiorsinnaavaa
[Qupp. 18-mi assiliartaq]
Angajoqqaat uteriitsunik meerallit Biibilimit sumik tuppallersaatissaqarsinnaappat?