Imminut iluartuutinniarneq mianersorfigiuk!
UKIUNI hundredelinni siullerni farisiiarit inunnit assut ataqqisaasimapput Guutimillu pallorfiginnittutut naapertuilluartutut ilisimaneqarsimallutik. Allakkat Illernartut misissoqqissaartarsimavaat akulikitsumillu qinusarlutik. Aamma inussiarnersuunermikkut ingasaassinianngitsuunermikkullu tusaamasaasimapput. Oqaluttuarisaanermik allaatiginnittartoq juutiusoq Josefus ima allassimavoq: „Farisiiarit asaqatigiittuupput tamanullu saqqumisumik inuunerminni isumaqatigiillutik pinissartik sulissutigisarlugu.“ Taamaattumik tupinnanngilaq naliminni inuiaqatigiit juutit akornanni ataqqineqarnerpaanut ilaasimammata!
Ullumikkulli oqariaaseq „farisiiarerpallanneq“ oqariaatsilluunniit tamatuma assigisai nikaginninniutitut atorneqartarput, isumaqartillugit iluartuusaartoq, imminut iluartuutittoq, „annassimasoq“, upperluarniartoq imaluunniit isigineqarnerinnarmini suliniarluartoq. Farisiiarit tusaamasaalluarnertik qanoruna ilillutik annaasimagaat?
Tassaana Jesus juutit amerlanerit assiginagit farisiiarit qallikkut pissusiannit salloqittagaasimanngitsoq. Taassuma farisiiarit assersuussimavai ’ilivernut marrartikkanut, qaamikkut pinnersuusaaraluarlutik ilumikkut toqusut saarninik mingunnartunillu nalinginnarnik imalissuarnut’. — Matîuse 23:27.
Kikkut tamarmik tutsaanni takisuunik qinukulasaraluarpummi, Jesusilli oqarneratut inunnit takoqquinnarlutik taamaaliortarput. Pallorfiginninnerat pisuusaarnerinnaviuvoq. Unnukkorsiornerni inissat ataqqinarnerit inigiumallaaraat naalaffinnilu sallerni issiajumallaaraat. Taamanikkut juutit atisamikkut nivingataqartussaapput, farisiiarilli malugeqqungaaramik takisoorujussuarnik nivingatalersortarsimapput. Allassimaffinnut toqqorsivitik silittut aarnussatut atukkatik nittarsaatissallugit nuannarilluinnarsimavaat. (Matîuse 6:5; 23:5-8) Naggataatigulli ilumoortuusaassusertik, piumatussusertik pingaarniassusertillu ataqqinaataajarneqaatigaat.
Guutip farisiiarinik ajattuinera Jesusip ima oqaatigaa: ’Taatuuku ilumoortuusaarniartut; Esajasip eqqorluarsimasumik takorluukkersaarutigaasi oqarami: „Inuit ukua qarluminnik ataqqisarpaannga, uummataasali ungasippaannga; asuliinnaq kiffartuuttaraannga, ajoqersuutit inuinnaat inatsisigisaat ajoqersuutigisaramikkik.“’ (Matîuse 15:7-9) Iluassuseq ersersitaat iluamik oqaatigalugu tassaavoq imminut iluartuutinniarneq. Tupinnanngitsumik Jesusip ajoqersukkani ima mianersoqquai: ’Pingaartumik farisiiarit seernarsaatissiaannut tassa ilumoortuusaarniarnermut mianersoritsi.’ (Lúkarse 12:1) Aamma ullumikkut upperisarsiornikkut ilumoortuusaarnermut imminullu iluartuutinniarnermut ’mianersortariaqarpugut’.
Malugisariaqarporli imminut iluartuutinniarneq ullormiit ullormut pileriartuaartanngimmat. Pissuseq tamanna piffissami sivisungaatsiartumi ineriartuaartarpoq. Inuit ilaat allaat namminneq nalullugu farisiiarerpallariartaaseqaleriartuaartarput.
Pingaarniassuseq
Pissusilersornerit qanoq ittut ’mianersorfigisariaqarpavut’? Imminut iluartuutinniartoq qinerlerfissiaq Encyclopædia of Religion and Ethics naapertussagaanni amerlanertigut ’kukkunngisaannartutut nipeqarluni oqaluttarpoq kukkunngisaannartutullu isikkoqartarluni’. Imminut iluartuutinniartut aamma usorsitsaapiluttuusarput imminnullu qaffasitserusuttarlutik, taamatorpiarlu farisiiarit pissuseqarsimapput.
Jesusip farisiiarerpalaarneq tamanna ima assersuusiarisimavaa: ’Inuit marluk naalaffimmut majuartut qinujartorlutik, aappaa farisiiariusoq aappaalu ilanngaaserisoq. Farisiiari immikkut qeqarpoq ima qinulluni: „Guutiaa, qutsavigaakkit inuttut allatut innginnama, arsaasutut, iluaatsutut, arnaaneqartutut, uumatulluunniit ilanngaaserisutut. Sapaatit akunneranni marloriarlunga iisinnginniartarpunga, pissarsiamalu tamarmik qulingi tunniuttarlugit.“’ Ilanngaaserisulli maniguulluni kukkunini anngiiaatigai taamaalillunilu nalunarunnaarluni farisiiarimit usorsitsaapiluttumit iluarnerulluni. Assersuusiaq tamanna ’iluartuusoralutik imminnut tatigisunut ilaminnillu asiginnaasunut’ Jesusip saqqummiussimavaa. — Lúkarse 18:9-14.
Piginnaanerit ajunngequtillu inunnguusaasut pissutigalugit inuk naammalluinnanngitsoq allanit ajunnginnerusutut isumaqarfigeqqajaasinnaasarpoq. Kristumiulli isuma taama ittoq tunuartipallattariaqarpaat. Immaqa kristumiu ukiorpassuarni kristumiutut inooriaaseqarsimavoq imaluunniit Guutip oqaasianik ilinniartitsillaqqissuulluni. Immaqaluunniit Kristusimik qilammi naalakkersueqataasussanut tanitanut ilaavoq. Ilaat ilagiinni kristumiuni piffissaq tamaat kiffartortutut, utoqqaanertatut imaluunniit ilagiinni kiffartortutut immikkut pisinnaatitaaffeqarput. Imminulli ima aperisariaqarpoq: ’Jehovap uannut tunissutigisai allanit qutsinnerusutut misigilissutissatut atorukkit Jehovap qanoq isigissavaa?’ Iluarinavianngilluinnarpaa. — Filípimiut 2:3, 4.
Oqartussaassuseq, piginnaanerit immikkulluunniit pisinnaatitaaffiit Guutimit pisimasani pissutigalugit kristumiu pingaarniartutut pissusilersoruni iluamik oqaatigalugu Guuti ataqqinaatissaraluanik arsaarpaa. Kristumiut Biibilimi erseqqissumik oqaanneqarput ’imminnik isumassaq qaangerlugu isumaqarfigissanngitsut’. Imatullu kajumissaarneqarpugut: ’Ataasiusumik isumaliorfigeqatigiigitsi. Inornartut isumaliutigeqinasigik, nikanartulli ilagiumaniarsigik. Sianisuusoreqinasi.’ — Rûmamiut 12:3, 16.
’Eqqartuussinaveeritsi’
Imminut iluartuutinniartoq ujarlerfissiaq Biibilimut tunngasoq naapertussagaanni tassaavoq inuk „inatsisitigut aalajangersakkanik, anersaaq taakkunaniittoq eqarsaatiginagu, malinneqqissaarnini pissutigalugu ileqqussatigut assuarnaatsutut Guutimullu eqqortumik attaveqartutut imminut isigisoq“. Atuakkami allami imminut iluartuutinniartut tassaanerarneqarput „inuit upperisarsiorniartorujussuit piffissartik tamaat atorlugu inunni allani ajussutsimik ujarlertartut“.
Farisiiarit taamatorpiaq pissuseqarsimapput. Inuit maleruagassiaannik Guutip inatsisaanit najoqqutassiaanillu pingaarnerutitsisutut ilisimaneqaleriartuaarsimapput. (Matîuse 23:23; Lúkarse 11:41-44) Imminnut allanut eqqartuussisunngortipput namminnerlu maleruagassiaminnik imminut iluartuutinniarpalaartunik eqqortitsinngitsut tamarluinnaasa eqqartuuteqqajaasarlugit. Pingaarniarnerat ingasattumillu imminnut angisuutinnerat inunnut allanut aalajangeerusussusiannik sakkortusaavoq. Jesus sapileramikku kamattorujussuupput toqunniarlugulu isumalioqatigiipilullutik. — Juánase 11:47-53.
Inuit eqqartuussiniaannartut, allanik kukkunersuiinnartut imaluunniit isornartorsiuiniaannartut avatiminniittunullu tamanut alapernaaseqqissaaginnartut ilagiumaneqarpallaarneq ajorput. Iluamik oqaatigalugu ilagiinni kristumiuni nammineq isummamik namminerlu maleruagassianik allanut pinngitsaaliilluni pigiliutititsiniartoqaqqusaanngilaq. (Rûmamiut 14:10-13) Kristumiut isumakkut aalajaatsut nalunngilaat inuunermi aalajangigassat ilarpassui inuup nammineq aalajangigassarigai. Ingammik piumasaqarpallaaqqajaasartut imaluunniit pitsaaqqissaartumiinnaq iliorniartartut allanik eqqartuussinaveersaartariaqarput.
Ilumoorpoq ilagiit kristumiut Jehovap nunarsuarmi peqatigiissortaasa aaqqiagiissumik ingerlalluarsinnaanissaannut ilasaataasussanik najoqqutassiornissaminnut piginnaassuseqartitaammata. (Eprîarit 13:17) Ilaasali najoqqutassat tamakku equtissimavaat namminnerluunniit maleruagassiaminnik ilasimallugit. Sumiiffiit ilaanni teokratiimik atuarfimmi qatanngutit angutit habiteqaqqusaasimapput saqqummiussinerminnilu jakkertik attaseqqasussaallugu. Unnersuussummik tamatuminnga maleruaanngitsoortoq saqqummiusseqqusaajunnaartarpoq. Taamatut sukannersumik maleruagassiornermut taarsiullugu pitsaanerussannginnerpa, Guutillu oqaasiata anersaavanut naapertuulluni, inussiarnersumik inuttut unnersuussinissaq? — Jâko 3:17.
Aamma imminut iluartuutinniartoq isumaqalersitsiniarsinnaavoq annikilliornartut kristumiumut tuttartut anersaakkut sanngiinneranik pissuteqartut. Angutit imminnut iluartuutinniartut, Elifaz, Bildad Zofarilu, taamatorluinnaq Job pillugu eqqarsarsimapput. Pissutsit tamakkiisumik ilisimasaqarfiginagit Job ajortuliorsimanerarlugu pasilleramikku pingaarniartumik iliorput. Jobip misilinneqarnerinik kukkusumik naliliinerat pillugu Jehovap perorsaatissippai. — Takuuk Jobimik allakkat, kapitalit 4, 5, 8, 11, 18, 20.
Ilungersuussineq paasinerlutaq
Imminut iluartuutinniarneq ilungersuussinerlu imminnut atagajuttarput. Apustili Paulus juutit upperisarsiortut pillugit oqarsimavoq ’Guuti ilungersuutigigaat, siuneqarluaratilli. Iluarnermi Guuti pia ilisarinnginnamikku, iluarnerli namminneq pigisartik atortinniaramikku iluarneq Guutip pia naalanngiinnarpaat’. (Rûmamiut 10:2, 3) Paulus nammineq farisiiariugallarami immikkut ittumik ilungersuussisuusimavoq, ilungersuussissusiali paasinerluineruvoq Guutip iluassusianut naapertuutinngimmani. — Galâsiamiut 1:13, 14; Filípimiut 3:6.
Taamaattumik Biibilimi ima naleqquttumik oqaassuteqarpoq: „Taamaattumik iluassuseqarneq ilisimassuseqarnerlu ingasaanniassanngilatit. Soormi imminut aserorniinnassavit?“ (Nalunaajaasup oqaasii 7:16) Immaqa ilagiinniittut ilaat peqqissaartorujussuuvoq, peqqissaassusiali ilungersuussissusialu imminut iluartuutinniarninnguukkiartuaarsinnaavoq. Upperisarsiornikkut ilungersuussissuseq Jehovap iluassusianit pinnani inuup ilisimassusianit aqunneqaruni allanut ajoqutaariaannaassaaq. Qanoq ililluni?
Ilaat allanik anersaakkut ikiuiniarnermik ulapputeqangaaramik namminneq ilaquttamik pisariaqartitaannik sumiginnaasoorsinnaapput. Aammalu angajoqqaat ingasattumik ilungersuussiniartut meeqqatik sapigaannik piumaffigeqqajaasinnaasarpaat. (Evfisumiut 6:4; Kulorsamiut 3:21) Meeqqat ilaat angajoqqaamik piumasaannit annertuallaartunit artorsinneqartut marloqiusamik inuulersinnaapput. Angajoqqaat ingasaassinianngitsut ilaqutariit piginnaassusiisa killeqarnerat eqqarsaatigisarpaat naleqquttunillu allanngortiterisarlutik. — Naleqqiuguk 1 Moses 33:12-14.
Ingasattumik ilungersuussiniarneq aamma qajassuussinermik, misiginneqataanermik saamanermillu, pissutsinik inunnut allanut attaveqarnermi pingaarluinnartuusunik, annaasaqartitsisinnaavoq. Naalagaaffiup soqutigisaanik siuarsaaniarnermini kristumiup ilungersuussisup allat misigissutsikkut ajuallatsittoorsinnaavai. Paulus ima oqarpoq: ’Pruffiitisut oqalussinnaagaluarumaluunniit, anngigisallu tamaasa ilisarsissutillu tamaasa ilisimagaluarukkit, uppernerlu tamaat pigigaluarukku qaqqarsuit nutsersinnaallugit allaat, asannissuseqarnangali, taava suunngeqqajaqaanga. Pikkalu tamaasa tunniukkaluarukkit, timigalu ikikkartikkaluarukku, asannissuseqarnangali, taava iluaqutiginngeqqajaqaara.’ — 1 Korintumiut 13:2, 3.
Maniguuttut Guutip iluarai
Imminut iluartuutinniartunngoriataarsinnaanermik navianaatip, pissutsip tamatuma uagutsinni ineriartulinnginnerani, miserratiginnginnissaa uagutsinnut kristumiunut pingaartorujussuuvoq. Pingaakujuttutut pissuseqarnaveersaartariaqarpugut, ilungersuussineq piviunngitsoq inuit ilisimassusiannit tunngaveqartoq ingalassimasariaqarparput allanillu eqqartuussinaveersaartariaqarluta.
Farisiiarerpaluttumik pissuseqarnaveersaarluta ’mianersorniarnitsinni’ pingaartorujussuuvoq nammineq ajortilippallariartarnivut eqqarsaatigissallugit, allat imminut iluartuutinnerarlugit unnerlutiginissaannut taarsiullugu. Ilumoorpoq Jesusip farisiiarit eqqartuussimagai ’pulateriaarsuillu piaraannik’ taasimallugit, naassaanngitsumik suujunnaarsinneqartussatut. Jesusilli inuit uummataat takusinnaavai. Uagut taamaaliorsinnaanngilagut. — Matîuse 23:33.
Uagut iluassuserput pinnagu Guutip iluassusia ujartorniartigu. (Matîuse 6:33) Aatsaat taamaaliorutta Jehovamit iluarisaasinnaavugut. Biibilimimi allassimavoq: ’Tamassi ilissinnut nikanartinnermik assuuseritsi, anneruniartut Guutip akerartormagit, nikanartittulli saammaattarlugit.’ — 1 Pîtruse 5:5. (wD 15/10 95)