Guutip sumik piumaffigaatigut?
’Guutimik asanninneq tassaavoq inassutai maleruarutsigik, inassutaalu artornanngillat.’ — 1 JUÁNASE 5:3
1, 2. Sooq tupaallannanngila Guuti imminut iluarinartumik pallorfiginnikkusuttunut piumasaqaateqarmat?
„UANGA upperisara ajorinngilara!“ Inuit ilaasa taama oqarfigisarpaatigut. Imatulli aperisussaagaluarput: „Upperisara Guutip ajorinngilaa?“ Aap, Guuti imminut iluarinartumik pallorfiginnikkusuttut eqqortittariaqagaannik piumasaqaateqarpoq. Tamanna tupaallaatigissavarput? Naamik. Takorlooriaruk illoqartutit kusanartorujussuarmik, qanittukkut aningaasarpassuarnik atuillutit iluarsaassimasannik. Kinaluunniit piumasoq illumut tassunga nooqqussagaluarpiuk? Soorunami naamik. Soorunami attartortinniakkat arlaannik piumasaqaateqarfigissavat eqqortittariaqagaanik.
2 Jehovap nunarsuaq inuit najugassaattut pinngortissimavaa. Ungasinngitsukkut, taassuma naalagaaffiata aqutsinerani, nunarsuaq ’iluarsaanneqassaaq’, tassa paratiisinngortinneqassaaq alianaatsoq. Tamanna Jehovap naammassissavaa, taamaattorli tamatuma ajornarunnaarsinniarnera akisoorujussuusimavoq. Tamanna pisinnaaleqqullugu ernituani tunniussimavaa. Taamaattumik soorunami Guuti paratiisimi inuulerusuttunut piumasaqaateqarnissamut pisussaavoq. — Tussiaat 115:16; Matîuse 6:10; Juánase 3:16.
3. Guutip sumik ilimasuffigineraatigut Salomonip qanoq saqqummiuppaa?
3 Sunik piumasaqaateqarnersoq qanoq ililluta paasisinnaavarput? Jehovap uagutsinnik sumik ilimasuffiginninnini kunngi silatooq Salomon isumassarsisillugu saqqummiussimavaa. Salomonip inuunermini suliarisimasarpassuani angusimasarpassuanilu, soorlu pisuussutit, sanaartornerit, nipilersukkat, arnanik asanninneq, eqqarsaatigereerlugit ima nassuerpoq: „Taava oqaaserineqartut tamarmik ataatsimut katinneqarsinnaapput imaalillugit: Guuti mianeruuk inatsisaalu maleruarlugit, tamanna inunni ileqqussaammat.“ — Nalunaajaasup oqaasii 12:13.
’Inassutai artornanngillat’
4-6. (a) Griikerit oqaasiata ’artornartumik’ nutserneqarsimasup suna isumavigaa? (b) Sooq oqarsinnaavugut Guutip inatsisai artornanngitsut?
4 ’Inatsisai maleruakkit.’ Tamanna Jehovap uagutsinnut ilimasuffiginninnerani tunngaviuvoq. Piumasaqaataa ingasappallaarpa? Naamerluinnaq. Apustili Johannesip Guutip inatsisaanut, imaluunniit piumasaqaataanut, tunngatillugu ima isumalluarsaarpaatigut: ’Guutimimmi asanninneq tassaavoq inassutai maleruarutsigik, inassutaalu artornanngillat.’ — 1 Juánase 5:3.
5 Griikerit oqaasiata uani ’artornarpoq’-mik nutserneqarsimasup isumavigaa „oqimaatsoq“. Malikkuminaatsoq eqqortikkuminaatsorluunniit pineqarsimasinnaavoq. Oqaaseq taanna Matîuse 23:4-mi atorneqarpoq ’ersugassanik oqimaatsunik’, inuit inatsisiliaat kinguaariinnillu oqaluttuarsiat ileqqullu allakkanik ilisimasut farisiiarillu inunnut peqqussutaat, taaneqartut pillugit. Qularnanngitsumik apustilip Johannesip utoqqalisup qanoq isumaqaneranik paasitippaatigut. Guutip inatsisaa oqimaatsuunngilaq. Aamma maleruaruminaanngillat. (Naleqqiuguk 5 Moses 30:11) Akerlianilli Guuti asagutsigu piumasaqaataanik maleruaaneq nuannaarutigissavarput. Jehovamut asanninnitsinnik takutitsinissatsinnut periarfissaavoq iluatinnartoq.
6 Tamatumanili Guutip uagutsinnut piumasaqaataanik ilisimannilluinnarnissarput pisariaqarpoq. Maanna sammeriartigik Guutip piumasaqaataasa ilaat tallimat. Piumasaqaatai tamakku sammitillugit Johannesip oqaasii uku eqqaamakkit: ’Guutip inassutai artornanngillat’.
Guuti ilinniaruk
7. Annannissatsinnut suna aalajangiisuua?
7 Siullermik sammissavarput Guutimik ilinniarnissamik piumasaqaat. Jesusip oqaasii Johannesip iivangkiiliuani, kapitali 17-imi allassimasut takoriartigik. Jesusip inuttut inuunerani unnuk kingulliuvoq. Jesusip unnuup ilarujussua atorlugu apustilini qanittukkut qimattariaqalernissaanut piareersarpai. Taakkua naassaanngitsumik siunissaat Jesusip isumakuluutigaa. Qilammut isigiitigaluni qinnuppai. Versi 3-mi allassimavoq: ’Tassaavorli inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ Aap, aatsaat Guuti Kristusilu ilisarigunikkik annassinnaassapput. Uaguttaaq eqqarsaatigaluta taamaappoq. Annassagutta ilisarsineq tamanna pisariaqarparput.
8. ’Guutimik ilisarsineq’ qanoq isumaqarpa?
8 ’Guutimilli ilisarsineq’ qanorpiaq isumaqarpa? Griikerit oqaasiat ’ilisaraa’-mik nutserneqarsimasoq isumaqarpoq „ilisimalerpaa“, „akueraa“ aamma „paasilluinnarpaa“. Oqariaaseq ’ilisaralugu’ ersersitsivoq ataasiaannarluni ilinniarneq pineqanngitsoq. Tassa Guutimik ilisarsineq qarsupittuunngilaq, tassaallunili taassuminnga ilisarisimannilluinnarneq, paasinninnermik tunngaveqartumik taassumunnga qanimut ikinngutaalerniarneq. Guutimut attaveqartuarneq taanna pillugu ilinniartuarnermik kinguneqassaaq. Ilinniarnerlu naassaanngitsumik ingerlassaaq Jehovami pillugu suna tamaat ilikkanngisaannassavarput. — Rûmamiut 11:33.
9. ’Pinngortitarsuup atuagaani’ Jehova pillugu suna ilikkarsinnaavarput?
9 Qanoq ililluta Guuti ilisarisimalersinnaavarput? Atuakkat marluk tamatumani iluaqutigisinnaavavut. Siulleq ’pinngortitarsuup atuagaanik’ taasinnaavarput. Jehovap pinngortitaasa tamarmik, uumassusillit uumassuseqanngitsullu, kinaassusilittut qanoq ittuuneranik oqaluttuuppaatigut. (Rûmamiut 1:20) Makku takorlooriakkit: Kuussuup ittunnera ataqqinarpaluttoq, anorersuartumi mallit qaartarpaluat, unnukkut allaaqqissumi ulloriarpassuit — tamakkua tamarmik paasitinnginnerpaatigut Jehova tassaasoq Guuti ’pissaaneqangaartoq’? (Jesaja 40:26) Qimmip piaraa pamiuminik kiiseriaqattaartoq, qitsuulluunniit piaraa nuersagassamik pinnguartoq meeqqap nuannaarutigigaa — tamakkua takutinnginnerpaat Jehova ’Guutiusoq pilluartoq’ quinartussanik ujarlersoq. (1 Timûtiuse 1:11) Nerisassat mamartut, narsami naasorpassualimmi tipi naamajuminartoq, pakkalussami qajannartumi qalipaatit kusanaqisut, upernaakkut timmiaaqqat qarlorneri, asasamit asannippaluttumik eqitaarneqarneq — tamakkua tamarmik paasitinnginnerpaatigut Pinngortitsisoq Guutiusoq asannittoq inuunermik nuannaarutiginninnissatsinnik kissaateqartoq? — 1 Juánase 4:8.
10, 11. (a) ’Pinngortitasuup atuagaani’ Jehova siunertaalu pillugit suna ilikkarsinnaanngilarput? (b) Apeqqutit suut Biibiliinnarmi akineqarsinnaappat?
10 ’Pinngortitarsuulli atuagaani’ Jehova pillugu ilikkarsinnaasavut killeqarput. Assersuutigalugu, Guuti qanoq ateqarpa? Sooq nunarsuaq pinngortissimavaa inullu tassunga inissillugu? Sooq ajussuseq akueraa? Siunissami qanoq pisoqassava? Apeqqutinut taama ittunut akissutissat atuakkami allami Guuti pillugu ilinniarfigisinnaasatsinni akissutissaqarpoq, tassa Biibilimi. Biibilimi Jehova imminut saqqummersippoq, ilaatigut atini saqqummersillugu, kiisalu qanoq ittuussusia siunertaalu — paasissutissat allami nassaarisinnaanngisavut — tassani paasisinnaavavut. — 2 Moses 34:6, 7; Tussiaat 83:19; Amos 3:7.
11 Allattaaq ilisarisariaqakkavut pillugit Jehovap Biibilimi paasissutissippaatigut. Assersuutigalugu ilinniarparput Jesus Kristus kinaanersoq Jehovallu siunertaasa naammassineqarnissaanni sumi inissisimaffeqarnersoq. (apustilit suliait 4:12) Satan Diaavulumi kinaava? Qanoq iliorluni inunnik tammartitsiniaasarpa? Qanoq iliorluta taassumannga tammartitaanaveersaarsinnaavugut? (1 Pîtruse 5:8) Apeqqutinut tamakkununnga akissutissat inuunermut annassutaasinnaasut taamaallaat Biibilimi nassaassaapput.
12. Guuti siunertaalu pillugit ilinniarneq sooq artornanngila?
12 Guutimik siunertaanillu ilinniarneq tamanna artornarpa? Naamerluinnaq. Eqqaamaviuk qanoq misigalutit taamani paasigakku Guuti Jehovamik ateqartoq, naalagaaffiata Paratiisi nunarsuarmi pilerseqqikkumaaraa, ernini asasani ajortitsinnut utertitsissutitut akiliutigisimagaa, sallusuissutsillu erlinnartut allarpassuit ilikkaqqaarakkit? Misiginngilatit soorlumi tassa ilisimasaqanngissutsip ulia isinnit peerneqartoq aatsaallu takusaqarluarsinnaalerlutit? Guutimik ilisarsineq oqimaatsuunngilaq, kisianni nuannaarnartuuvoq. — Tussiaat 1:1-3; 119:97.
Guutip maleruaqqusai eqqortittariaqarpavut
13, 14. (a) Guuti ilisarinerujartortillugu sunik allannguisariaqarpugut? (b) Iliuutsit minguttuut suut ingalassimassagivut Guutip piumasaraa?
13 Guuti ilikkarnerujartortillugu erniinnaq paasiartulissavarput inuunitsinni arlaannik allannguisariaqarluta. Tamatuma piumasaqaatip aappaanut ingerlateqqippaatigut: Eqqortumik ileqqoqarnissamut Guutip maleruaqqusai eqqortittariaqarpavut sallusuissummillu taasaa akuerisariaqarlugu. Sallusuissut suua? Ilumut iliuutsivut upperisarpullu Guutimut pingaaruteqaramik? Inuit amerlanersaat taamatut isumaqanngillat. Ilagiit tuluit naalagaaffimmut atasut 1995-imi nalunaarusiaanni siunnersuutigineqarpoq katissimanani najugaqatigiinneq ajortuliatut isigineqassanngitsoq. „Oqariaaseq ’inuunerlunneq’ eqqartuusserpalaarpallaarpoq ineriartorsaataananilu,“ biskoppi taama oqarsimavoq.
14 Tassa imaappa ’inuunerlunneq’ ajortuliaajunnaartoq? Jehovap tamatuminnga qanoq isiginninnera paatsuugassaanngitsumik oqaasiani, Biibilimi, oqaatigineqarpoq: ’Nuliariinneq tamani kanngunaakkili, nuliariillu innarfiat minguikkili; uersaasulli arnaanillillu Guutip eqqartuukkumaarpai.’ (Eprîarit 13:4) ’Katissimanani atoqatigiinneq immaqa naalagiartartunit palasinillu nutaalerisunit ajortuliatut isigineqanngikkaluarpoq, Guutilli isaani ajortuliaavoq ingasattoq. Aamma taamaappoq allasiorneq, qanigisamik atoqateqarneq arnaqatinoorneq anguteqatinoornerlu. (3 Moses 18:6; 1 Korintumiut 6:9, 10) Guutip piumasaraa taamatut iliornerit mingunnartutut isigisani ingalassimassagivut.
15. Allanut qanoq ileqqoqarnerput qanorlu upperisaqarnerput Guutip piumasaqaataanik qanoq sunnerneqarpa?
15 Ajortuliatulli Guutip isigisaanik ingalassimaneq naammanngilaq. Allanut qanoq ileqqoqarneq aamma Guutip piumasaqaataanut attuumassuteqarpoq. Ilaqutariinni uiusup nuliaasullu imminnut asanissaat ataqqinissaallu Guutip naatsorsuutigaa. Piumasaraa angajoqqaat meeqqamik nunap piisigut, anersaakkut misigissutsikkullu pisariaqartitaat matussagaat. Aammattaaq kissaatigaa meeqqat angajoqqaaminnut naalassasut. (Ussatit 22:6; Kulorsamiut 3:18-21) Upperisarpummi? Aap, tassani Jehova Guutip kissaatigaa ajoqersuut ileqqullu upperisarsiornermit eqqunngitsumit aallaaveqartut peqataaffigissanngikkivut. — 5 Moses 18:9-13; 2 Korintumiut 6:14-17.
16. Eqqortumik ileqqoqarnermut Guutip najoqqutassiai maleruassallugit sallusuissutaanillu akuersineq sooq artornannginnersoq nassuiaruk.
16 Eqqortumik ileqqoqarnermut najoqqutassiaanik maleruaaneq sallusuissutaanillu akuersineq artornarpa? Pitsaaqutai eqqarsaatigalugit naamik — aappariit uiusoq nuliaasorlu imminnut asasut tatigisullu, aappariit allasiorneq pissutigalugu avittut pinnagit; meeqqat angajoqqaaminnit asaneqartutut kissaatigineqartutullu misigisut, ilaqutariit meerartaat asanninnermik amigaateqartut isumagineqanngitsutut kissaatigineqanngitsutullu misigisut pinnagit; ilerasuuteqannginneq peqqinnerlu makkua pinnagit pisuusutut misigineq AIDS-imillu kinguaassiuutitigulluunniit atoqatigiinnikkut tunillaattartunik allanik nappaateqarnermit timikkut perulunneq. Nuannaarluta inuusinnaanerput Jehovap piumasaqaataasa arlaannaatigulluunniit ajoqusinngilaa. — 5 Moses 10:12,13.
Inuunermut aammullu ataqqinninnermik ersersitsisarit
17. Inuuneq aallu Jehovap qanoq isigai?
17 Inuunerit Guutip maleruaqqusaanut naapertuunnerujartortillugu paasilissavat inuunerit qanoq erlinnartigisoq. Guutip piumasaqaataasa pingajuat maanna sammeriartigu: Inuunermut aammullu ataqqinninnermik ersersitsisariaqarpugut. Inuuneq Jehovap isaani illernartuuvoq. Taamaattussaavoq, taannami inuunerup pilerfigaa. (Tussiaat 36:10) Aap, allaat meeqqap suli inunngorsimanngitsup inuunera Jehovap isaani illernartuuvoq. (2 Moses 21:22, 23) Aak inuunermut sinniisuuvoq, taamaattumillu aamma aak Jehovap isaani illernartuuvoq. (3 Moses 17:14) Jehovap immisut inuunermut aammullu isiginninnissatsinnik ilimaginninnera tupaallaatigisariaqanngilarput.
18. Inuunermut aammullu Jehovap isiginnittaasia uagutsinnut qanoq piumasaqarpa?
18 Inuunermut aammullu ataqqinninnermik ersersitsineq uagutsinnut qanoq piumasaqarpa? Pissanganartorsiorniaannarluta inuunerput navianartorsiortissanngilarput. Navialinaveersaartuuvugut, taamaattumillu biilivut inigisavullu isumannaatsuutinniartarlugit. (5 Moses 22:8) Nuannaarnissaq piinnarlugu tupamik atuisuunngilagut, ikiaroorneq ajorluta nakorsaatillu ikiaroorniutigissanagit. (2 Korintumiut 7:1) Guutillu ’aammik nereqqusinnginnera’ naalakkatsigu allat aavat uagut timitsinnut qanorluunniit ilillugu pisikkumanngilarput. (apustilit suliait 15:28, 29;) Inuuneq asavarput, ullumikkulli inuunerput Guutip inatsisaanut naalannginnitsigut, taamaalillutalu naassaanngitsumik inuusinnaanerigaluatta navianartorsiortinneratigut, annaanniarumanngilarput. — Matîuse 16:25.
19. Inuunermut aammullu ataqqinninnermik ersersitsinerput qanoq uagutsinnut iluaqutaanersoq nassuiaruk.
19 Inuunermik aammillu illernartutut pinninnerput artornarpa? Naamerluinnaq. Eqqarsaatigilluariaruk. Pujortartarnermik pissuteqartumik puakkut kræftinnginneq artornarpa? Isumamut timimullu ulorianartunik pinngitsuuisinnaajunnaarsimannginneq artornartuua? AIDS-imik, hepatitisimik nappaammilluunniit allamik aakkut tunillaattartumik tunillatsinnginneq artornarpa? Nalunanngeqaaq ileqqunik iliuutsinillu taama ittunik ingalassimanninnerput uagutsinnut iluaqutaasoq. — Jesaja 48:17.
20. Inuunermut Guutip isiginnittaasiatut isiginninneq ilaqutariinnut qanoq iluaqutaasimava?
20 Jehovamut nalunaajaasoq arnaq qaammatit sisamassaat qiteqqullugu naartulluni unnuit ilaanni aaqalerpoq tuaviortumillu napparsimmavimmut unitsinneqarpoq. Nakorsamit misissorneqareerluni tusaavaa napparsimasunik paarsisut ilaannut oqartoq naartuersittariaqartoq. Arnalli meeqqap inunngorsimanngitsup inuuneranik Jehovap isiginnittaasia nalunnginnamiuk malartitassaanani naartuersinnissani itigartippaa nakorsamullu oqarluni: „Meeraq inuuppat, inuutiinnarli!“ Kingumut suli aaqartarpoq, qaammatialuilli qaangiuttut inortumik meerartaarpoq, nukappiararli peqqissoq, maanna 17-inik ukioqarpoq. Oqaluttuarpoq: „Oqaluttuassartaa tamaat ernitta tusarpaa, oqarporlu eqqaavimmut iginneqarsimannginnini nuannaarutigalugu. Nalunngilaa ullumikkut inuunerminut pissutituaasoq Jehovamut kiffartornerput.“ Inuunermut Guutip isiginnittaasiatut isiginnittaaseqarneq ilaqutariinnut taakkununnga artornanngilluinnarpoq.
Jehovap innuttai peqatigalugit kiffartorfigiuk
21, 22. (a) Kikkut peqatigalugit kiffartorfigissagitsinni Jehovap ilimagaa? (b) Qanoq ililluni Guutip innuttai ilisarineqarsinnaappat?
21 Inuunerput Guutip maleruaqqusaanut naapertuuttunngorsarniarlugu pisariaqartunik allannguiniarnitsinni kisimiinngilagut. Jehova nunarsuarmi maani innuttaqarpoq, ilimagaalu innuttani taakku peqatigalugit kiffartorfigissagitsinni. Taamaalilluta piumasaqaatit sisamaat tikipparput: Peqatigiissortai anersaaminik siulersugai taakku peqatigalugit kiffartorfigisariaqarparput.
22 Qanorli ililluni Guutip innuttai aaqqissuussaasut ilisarineqarsinnaappat? Biibilimi najoqqutassiat naapertorlugit piviusumik asaqatigiipput, Biibilimik ataqqinnilluinnartuupput, Guutip aqqanik ataqqinartitsisuupput, Guutip naalagaaffianik oqaluussissutiginnipput silarsuarmillu ajortumit matumannga immikkoorput. (Matîuse 6:9; 24:14; Juánase 13:34, 35; 17:16, 17) Upperisarsiornikkut peqatigiit kristumiuussutsimut ilumoortumut tamakkuninnga tamanik ilisarnaatillit ataasiinnaat nunarsuarmi nassaassaapput — tassa Jehovap Nalunaajaasui!
23, 24. Assersuutip suup takutippaa peqatigiiffia peqatigalugu Jehovamut kiffartorneq artornanngitsoq?
23 Innuttai aaqqissuussaasut peqatigalugit Jehovamut kiffartorneq artornarpa? Naaggaluunniit. Kristumiunit angutinit arnanillu nunarsuaq tamakkerlugu ilaqutariissuarnit asaneqarlunilu tapersersorneqarneq immikkut pisinnaatitaaffissuuvoq erlinnartoq. (1 Pîtruse 2:17) Takorlooriaruk umiarsuup umiunerani annanniarlutit ilungersorlutit immami puttaannarniarsarisutit. Saperluinnalersutut misigileruttortutit annanniummiittunit ikioriartorneqarputit. Aap, allanik annattoqarsimavoq. Annanniummut ikereeravit immamiittunik allanik annaassiartuutigalusi nunap tungaanukarnissinni paarlakaajaallusi ipuppusi.
24 Uagut pissutsinik tamatumunnga assingusunik atugaqannginnerpugut? Silarsuup ajortup matuma ’imaanit’ navianartumit annaanneqarluta Jehovap nunarsuarmi peqatigiissortaanut annanniutitut ittumut qaqinneqarsimavugullusooq. Umiatsiami annanniummi isumaqatigiilluta kiffartorpugut ’ipoqatigiilluta’, silarsuassap nutaap naapertuilluassuseqarfiusup ’sineriaata’ tungaanut ipulluta. Aqqutaani inuunerup artornartuinit qasulersinneqassagutta qujamasussaqaagut ikinngutitsinnit ilumoortunit kristumiunit ikiorneqarlutalu tuppallersarneqassagutta. — Ussatit 17:17.
25. (a) Silarsuup matuma ajortup suli ’imaaniittunut’ sumik akisussaaffeqarpugut? (b) Guutip piumasaqaataa sorleq ilanngutassiami tullermi sammineqassava?
25 Inuimmi eqqortumik eqqarsartut suli ’immamiittut’? Jehovap peqatigiissortaanut isernissaannik ikiornissaat akisussaaffigaarput. (1 Timûtiuse 2:3, 4) Guutip piumasaqaataanik ilinniarnissaminnut ikiorneqartariaqarput. Taamaalillutalu Guutip piumasaqaataasa tallimassaat kingullersaallu tikipparput: Guutip naalagaaffianik oqaluussissutiginnittuusariaqarpugut ilumoorfiginnittut. Tamatuma suna nassatarineraa ilanngutassiami tullermi sammissisavarput. (wE 15/1 97)
Apeqqutit uteqqiissutit
□ Sooq Guutip inatsisai artornanngillat?
□ Qanoq ililluta Guuti ilinniarsinnaavarput?
□ Eqqortumik ileqqoqarnermut Guutip najoqqutassiaanik maleruaaneq sallusuissutaanillu akuersineq sooq artornanngillat?
□ Inuunermut aammullu Guutip isiginittaasia uagutsinnut sumik piumasaqarpa?
□ Kikkut peqatigalugit kiffartorfigissagitsinni Guutip ilimagaa, qanorlu ililluta ilisarisinnaavavut?
[Qupp. 16-imi assiliartaq]
Biibilip ’pinngortitarsuullu atuagaata’ Jehova pillugu ilinniartippaatigut
[Suminngaanneernerat]
Kuukooriarsuaq Australian International Public Relations-imit akuerineqarluni assiliussaq; allaq: Safari-Zoo, Ramat-Gan, Tel Aviv