Allat tatigissallugit nangaassuteqarpit?

‘OQALOQATISSAQANNGILANGA. Allat paasinngilaannga. Namminneq ajornartorsiutitik ulapputigisarpaat. Uanga ajornartorsiutikka piffissaqarfigineq ajorpaat.’ Inuppassuit taama misigisarput, taamaattumillu eqqarsaatitik allanut oqaatigissanagit. Aperineqaraangamik qanoq innerlutik oqaatigerusukkaluaqalugu taamaaliunngitsoortarput. Imminnik pillutik ammasumik oqaaseqarsinnaanngillat.

Soorunami ilaat allanit ikiorneqarusunngillat. Amerlasuulli ikiorneqarusukkaluaqaat, kisianni namminneq inuttut eqqarsaatitik, misigissutsitik misilittakkatillu allanut oqaatigissalugit nangaasarput. Illittaaq taama misigivit? Ilumut tatigisinnaasaqanngilatit?

Siooraneq paasiuk

Ullumikkut silarsuaq tatiginninnginnermik ulikkaarpoq. Inuusuttut angajoqqaatik oqaloqatigineq ajorpaat. Angajoqqaat oqaloqatigiinneq ajorput. Ikittuinnaat oqartussaasunut saaffiginnikkumasarput. Ilaasa allat tatigisinnaanagit imigassat, ikiaroornartut ingasattumilluunniit inooriaaseqarneq atortarpaat ajornartorsiutitik anigorniarlugit. — Ussatit 23:29-35; Jesaja 56:12.

Inuit oqartussaassusillit soorlu palasit, nakorsat ilinniartitsisullu tatigineqarpallaarunnaarsimapput, amerlasuut peqquserluttutut kanngunartuliortutullu qulaarneqarsimammata. Assersuutigalugu missingerneqarsimavoq palasit ilaasa 10 procentii kinguaassiuutitigut kanngunartuliornermut akuliussimasut. Inuit taamaattut „tatiginninnermik aseruisut inuit imminnut attaveqarneranni ’kussiortutut’ ’qunnerit’ pilersittarpaat“, atuakkiortoq taama allassimavoq. Tamanna ilagiivinnut qanoq sunniuteqarpa? Tatiginninneq aserorneqarpoq.

Ileqqussatigut aseroriartorneq tamanna aamma ilaqutariittut inuunermi ajornartorsiornermik kinguneqartarpoq, maannalu ilaqutariit ingerlalluanngitsut nalinginnaasorujussuanngorsimapput, qaqutigoortuunatillu. Siornatigut angerlarsimaffiit inuummarissinarfiussimagaluarput. Ullumikkulli amerlasuutigut tassaaginnarput neriartortarfiit ’tankeqarfittut ittut’. Meeraq ilaqutariinni ’asanniuitsuni’ alliartoruni amerlanertigut inersimasutut allat tatigisinnaanngilai. — 2 Timûtiuse 3:3.

Silarsuarmi pissutsit ajorsiartuinnartillugit alianangaartumik atugaqariataarsinnaavugut. Pissutsit tamakkununnga assingusut eqqarsaatigalugit pruffiiti Mika ima allassimavoq: „Ikinngutigisat allaat upperissanngilat.“ (Mika 7:5) Illit pakatsisinneqalaaruit, neriorsulussinnarneqarlutit imaluunniit inuunerit navianartorsiortinneqarsimappat taama misigisinnaavutit. Allanik tatiginninnissat artornartissinnaavat misigissuseerukkiartulerlutit matoqqalersinnaavutit. (Naleqqiuguk Tussiaat 102:1-7.) Immaqa taamaalillutit ingerlaqqissinnaavutit, kisianni ’uummatikkut aliasunnerit’ pissutigalugu inuuninni nuannaarneq piviusoq misigerpiarnagu. (Ussatit 15:13) Imaappoq anersaakkut, misigissutsikkut, isumakkut timikkullu peqqissuussaguit ’talu’ matoqqassutigisat peerneqartariaqarpoq, allallu tatiginissaat ilikkartariaqarpat. Ajornanngila? Aap.

Sooq ’talu’ peerneqartariaqarpa?

Allat tatigigaanni uummammut isumakuluuteqartumut ilorraallannartuuvoq. Hannah taama misigisimavoq. Pitsaasumik aappaqarpoq toqqissisimasumillu angerlarsimaffeqarluni, taamaattoq isumatsassimasorujussuuvoq. ’Naalliungaaraluarluni’, taamaattoq silatusaarluni ’Jehovamut qinuvoq’ ima ilungersortigaluni nipaqanngikkaluarluni qarna aalasimalluni. Aap, Jehova tatigaa. Kingorna Jehovap palasianut Elimut uummatini ammarpaa. Sumik kingunilimmik? „[Hannah] qimaguppoq, nerivorlu isikkualu aliasuppalukkunnaarluni.“ — 1 Samuel 1:1-18.

Kulturini amerlanerni tatigisaqarnerup iluaqutaassusia ilisimaneqarpoq. Assersuutigalugu iluaqutaasorujussuusinnaavoq isummat misilittakkallu inunnik assingusunik misilittagalinnik oqaloqatigiissutigineqaraangata. Misissuisut ima isummersimapput: „Misigissutsikkut kiserliorneq nappaammik kinguneqartarpoq — oqaloqateqartariaqarpugut isumakkut peqqittuassagutta.“ Ilisimatuut misissuinerisa amerliartuinnartut uppernarsarpaat ussat isumassarsiarititaasoq manna ilumoortoq: „Inuk inoqatiminit immikkoorniartuusoq nammineq piumasani malillugu iliortarpoq, saqitsaassisarpoq allat eqqortuusorisaat soqutiginagit.“ — Ussatit 18:1.

Allanut ammanngikkuit taakkua qanoq ilillutik ikiorsinnaassavaatsit? Jehovap uummatit atuarsinnaavai, kisianni ilaquttavit ikinngutivillu illit uummammiugisatit ammanngikkukkit atuarsinnaanngilaat. (1 Israelikkut 28:9) Guutip inatsisaanut unioqqutitsisimaneq ajornartorsiutaappat isertuussinerup pissutsit ajornerulersiinnassavai. — Ussatit 28:13.

Aap, allanut isumakuluutinik eqqartuineq iluaqutaanerusarpoq pakatsisinneqaratarsinnaanissamut naleqqiullugu. Soorunami innimigisavut allanut kikkunnulluunniit saqqummiuttariaqanngilavut. (Naleqqiukkit Eqqartuussisut 16:18; Jeremia 9:4; Lúkarse 21:16.) „Inuk ikinnguteqaraluarluni ajutoorsinnaasarpoq,“ Ussatit 18.24-mi allassimavoq, ussalli ima nangippoq: „Ikinngutaasoqartarporli qatanngummit tatiginarnerusunik.“ Ikinngut taamaattoq sumi nanisinnaaviuk?

Ilaquttatit tatigikkit

Ajornartorsiuteqaruit aappat angajoqqaatilluunniit tamatuminnga oqaloqatigisimavigit? „Ajornartorsiutit ilarpassui eqqarsaatigalugit sukumiisumik oqaloqatigiissutigineqarnerat naammattarpoq,“ siunnersuisartoq misilittagalik taama oqarsimavoq. (Ussatit 27:9) Uiusut kristumiut ’nuliaminnik immissut asannittut’, nuliaasut ’uiminnut naalattut’ angajoqqaallu ’qitornatik Jehovamit perorsarlugit inertertarlugillu’ akisussaaffimminnik Guutimeersumik ilumoorussisut tamarmik misiginneqataallutik tusarnaarnissartik ikiuiniarlutillu siunnersuinissartik ilungersuutigissavaat. (Evfisumiut 5:22, 33; 6:4) Jesus timikkut ittumik nuliaqanngikkaluarluni meeraqanngikkaluarlunilu taamaattoq tamatumani maligassaalluarsimavoq! — Mákorse 10:13-16; Evfisumiut 5:25-27.

Ajornartorsiulli aalajangersimasoq ilaqutariit namminneq iluarsisinnaanngikkunikku? Kristumiut ilagiissaanni kisimiinneq ajorpugut. ’Kina sanngiitsoq sanngiitsunnguutiginnginnerpara?’ apustili Paulus taama oqarsimavoq. (2 Korintumiut 11:29) Imalu kajumissaarivoq: ’Nanertortigisassinnik ersoqatigiigitsi.’ (Galâsiamiut 6:2; Rûmamiut 15:1) Anersaakkut qatanngutitta akornanni qularnanngitsumik arlallit nanisinnaavavut ussatip allaatigineqarneratut ittut: ’Eqqarliusoq erniusimavoq annikilliornermi ikiortissaalluni.’ — Ussatit 17:17.

Ilagiinniittut tatigikkit

Nunarsuaq tamakkerlugu Jehovap nalunaajaasuisa ilagiissaanni 80.000-init amerlanerusuni angutit maniguuttut ’tipaatsussutsitsinnik suleqatigiittut’ kiffartorput. (2 Korintumiut 1:24) Tassaapput utoqqaanertat. Esajasip ima allaatigai: „Tamarmik assigissavaat anorersuarmut oqquiffik sialussuarmullu oqqiffik, inoqajuitsumi kuunnguit kuuttut, nunami imissaaleqisumi qaarsorsuup alanngortaa.“ Utoqqaanertat taamaaliornissartik ilungersuutigisarpaat. — Jesaja 32:2; 50:4; 1 Tásalûníkamiut 5:14.

’Anersaamit illernartumit ivertinneqartinnatik’ utoqqaanertat piumasaqaatit Biibilimiittut angusariaqarpaat. Tamanna nalunnginnakku taakkununnga tatiginninnerit nakussatsinneqassaaq. (apustilit suliait 20:28; 1 Timûtiuse 3:2-7; Títuse 1:5-9) Utoqqaanertamut oqaloqatigiissutigisat allanut oqaatigineqarnavianngillat. Tatiginarnertuuneq taassumunnga piumasaqaataavoq. — Naleqqiukkit 2 Moses 18:21; Nehemja 7:2.

Ilagiit utoqqaanertaasa ’tarnisi piggattarpaat aperineqarunik akisussaallutik’. (Eprîarit 13:17) Angutit taakku tatigissallugit killinneqannginnerpit? Soorunami utoqqaanertat tamarmik assigiimmik pisinnaassuseqanngillat. Ilaat allanit saaffigiuminarnerusinnaapput, inussiarnernerusinnaallutik paasinninnerusinnaallutilluunniit. (2 Korintumiut 12:15; 1 Tásalûníkamiut 2:7, 8, 11) Sooq utoqqaanertaq illit saaffigiuminartitat tatigissanngiliuk?

Angutit taakku atorfilittut akilerneqarneq ajorput. Tassaapput illit ikiorneqarnissannut ’inunnik tunissutit’ Jehovamit tunniunneqartut. (Evfisumiut 4:8, 11-13; Galâsiamiut 6:1) Qanoq ilillutik? Biibili atorluarlugu tamatumannga pissaaneq ineriartornartoq illit atukkannut atussavaat. (Tussiaat 107:20; Ussatit 12:18; Eprîarit 4:12, 13) Qinoqatigalutillu qinnussavaatsit. (Filípimiut 1:9; Jâko 5:13-18) Siunnersuisut asannittut taamaattut ikiuineratigut isumakulunneq qaangerneqarsinnaavoq isumakkullu eqqissineq pilerseqqinneqarsinnaalluni.

Qanoq ililluni allanut tatiginnittumik attaveqarneq ineriartortinneqarsinnaasoq

Ikioqquneq, siunersiuineq tusarnaartussarsiornerluunniit tassaanngillat sanngiissutsimut ajorsarnermullu ersiutit. Piviusorsiorluta akuerisariaqarparput naammalluinnanngitsuulluta kialuunniillu akissutit tamaasa ilisimanngikkai. Ilumoorpoq siunnersuisut tatigisallu pitsaanerpaartaat tassaasoq Ataatarput qilammiusoq, Jehova Guuti. Tussiaasiortoq isumaqatigaarput, taanna allassimammat: „Jehova, nakuussutiga, eqqortinnaveeqqutiga, taanna uummatima tunaaraa. Ikiorneqarama qiimmattarpoq uummatiga.“ (Tussiaat 28:7) Qinunikkut nangaassuteqarata tamatigut ’uummammiugisavut tamaasa taassumunnga saqqummiussinnaavavut’ tusarneqarnissarput isumagineqarnissarpullu tatigalugit. — Tussiaat 62:8, 9; 1 Pîtruse 5:7.

Qanorli ilillutit utoqqaanertat allallu ilagiinniittut tatigissallugit ilikkarsinnaaviuk? Siullermik imminut qiviarit. Isumakuluutitit tunngavissaqarpat? Allat pissutiginiagaat pasivigit? (1 Korintumiut 13:4, 7) Misigissutsikkut annersinneqarnissat pinngitsoortinneqarsinnaava? Aap. Qanoq ililluni? Allat inuttut pissuseqarnerat anersaakkut ittut eqqarsaatigalugit maluginiakkit sungiullugillu. Ilagiit ataatsimiittarnerini oqaloqatigisakkit. Illumiit-illumut oqaluusseqatigisakkit. Tatigineqarneq ataqqineqarnertulli iliuuseqarnikkut pissarsiarineqartariaqarpoq. Taamaattumik naammagittartariaqarputit. Assersuutigalugu, anersaakkut savanik paarsisoq ilisarineruleriartortillugu tatiginerulissavat. Isumakuluutitit annikitsukkuutaarlugit saqqummiuttakkit. Naleqqulluartumik, inussiarnersumik qajasuartumillu qisuariarpat amerlanerusunik saqqummiussisinnaavutit.

Jehovamik pallorfiginneqatitta, ingammik utoqqaanertat, ilungersorlutik Guutip pitsaasunik pissuserisai namminneq allanut attaveqarnerminni atorniarsarisarpaat. (Matîuse 5:48) Tamanna ilagiinni tatigineqarnermik kinguneqartarpoq. Utoqqaanertaq sivisuumik kiffartorsimasoq ima oqarpoq: „Qatanngutit una paasisariaqarpaat: Inuk qanorluunniit iliorsimagaluarpat utoqqaanertap kristumiutut asajunnaassanngilaa. Immaqa iliuuserisimasaa nuannarinngikkaluarlugu, taamaattoq suli qatanngunni asallugu ikiorusussavaa.“

Taamaattumik aalajangersimasumik ajornartorsiutilik kisimiittariaqanngilaq. ’Anersaakkut piukkunnaatilik’ nanertuutigisannik ikiuisinnaasoq oqaloqatigiuk. (Galâsiamiut 6:1, NV) Eqqaamajuk ’isumakuluuteqarnerup inuk artorsaatissittaraa’, kisianni „tungusunnitsuutitut kusertutut ipput inussiarnersumik oqaatsit tarnimut tungusunnitsut timimullu peqqissaataasut“. — Ussatit 12:25; 16:24. (wE 1/3 97)

[Qupp. 26-mi ungalusaq]

Eqqarleq, ikinngut imaluunniit anersaakkut qatanngut ajornartorsiummik ikioqqusoq kristumiumut kimulluunniit saaffiginnissinnaavoq. Nalunngiliuk qanoq ilillutit ikiuisinnaasutit?

Siunnersuisoq pitsaasoq

saaffigiuminarpoq: Matîuse 11:28, 29; 1 Pîtruse 1:22; 5:2, 3

pissutsinik tulluartunik qinersissaaq: Mákorse 9:33-37

ajornartorsiutinik paasinnikkusuppoq: Lúkarse 8:18; Jâko 1:19

ingasappallaartumik qisuariassanngilaq: Kulorsamiut 3:12-14

missigissutsit annernartut eqqarsaatigalugit tapersersuissaaq: 1 Tásalûníkamiut 5:14; 1 Pîtruse 3:8

nammineq killeqarnerminik akuerinnittussaaq: Galâsiamiut 6:3; 1 Pîtruse 5:5

siunnersuutinik atorluarsinnaasunik eqqartuissaaq: Tussiaat 19:8-10; Ussatit 24:26

allanut ingerlatitseqqissanngilaq: Ussatit 10:19; 25:9