Jehovap piumasaatut iliorput

Jesus Messiasitut kunngitullu ilassineqarpoq!

UKIUMI 33-mi nisanip 9-ani inuppassuit nipiliorlutik Jerusalemimut iseriartortut juutinik amerlasuunik tupaallatsitsipput. Poorski sioqqullugu illoqarfiliaasoqartarnera nalinginnaagaluarpoq, tikeraalli ukua allaapput. Innuttaasut pingaarnersaat siutituup piaraanik qimusserpoq. Angut tassaavoq Jesus Kristus inuillu annorassatik palmillu avalequtaat sioraanut siaruarterpaat ima nilliaatigalutik: ’[Annaassigit, NV] Davidip ernera, pilluarli [Jehovap] aqqani tikiuttoq; [annaassigit, NV] qutsinnermi.’ Jerusalemimeereersut amerlasuut inuppassuit takuagamikkik ingerlaaqatigiinnut ussagarput. — Matîuse 21:7-9; Juánase 12:12, 13.

Naak maanna ilassineqaraluarluni Jesusip nalunngilaa misilinneqarumaarluni. Ullut tallimat qaangiutiinnartut illoqarfimmi tassani toqutaajumaarpoq! Aap, Jesusip nalunngilaa Jerusalem akeqqat inigisarigaat tamannalu eqqarsaatigalugu illoqarfimmut iseriartornini maluginiarnartunngortissimavaa.

Itsaq siulittuutaasoq eqquuttoq

Ukiumi 518-imi u.n.s. Zakariasip Jesusip Jerusalemimut ajugaasimaarluni iseriartornissaa siulittuutigisimavaa. Allappoq: „Qiimmattarit, Sionip pania, tipaatsullutit torlulagit, Jerusalaap pania, takuat, kunngivit ornippaatit iluarluni, ajugaalluni piitsuullunilu; qimusserfigaa siutitooq, siutitooq piaraq! . . . Inuiaat eqqissivissioqatigiumaarpai; naalagaajumaarpoq immamit immamut, kuussuarmit Eufratimit nunarsuup isuanut!“ — Sakarja 9:9, 10.

Nisanip 9-ani Jesusip Jerusalemimut isernera Biibilimi siulittuutip eqquunneraa. Nalaatsornerinnakkut pinngilaq pilersaarusiorluaqqissaagaavorli. Siusinnerusukkut Jerusalemip eqqaani Jesusip ajoqersukkani marluk ima ajoqersorpai: ’Illorpanngualimmut siunissinniittumut aallaritsi; taava erniinnaq siutitooq naapissavarsi pitussimasoq piaraalu sanianiittoq; pituussaarlugit uannut pisissigik. Qanorlu oqarfigineqaraluarussi oqarumaarpusi: Naalakkap atussavai; taava erniinnaq aallartikkumaarpai.’ (Matîuse 21:1-3) Sooruna Jesus siutituumik qimusserluni Jerusalemiliarniartoq inuppassuillu qisuariarnerat qanoq isumaqarpa?

Kunngiuneq pillugu tusarliussaq

Isigisinnaasat oqaatsinit sunniuteqarnerusarput. Jehovap siulittuutini sakkortusisinniarlugit ilaannikkut pruffiitini iliuuseqartittarpai. (1 Kunngit 11:29-32; Jeremia 27:1-6; Hesekiel 4:1-17) Oqariartuutit sakkortuut taamaattut allaat isiginnittut manngersunerpaanik uummatillit puiugassarinngisaannik sunnertarpaat. Assingusumik Jesus siutituumik qimusserluni Jerusalemimut iseriartornera oqariartuutaavoq sunniinertooq. Qanoq ililluni?

Biibilip nalaani siutitooq siunertamut akimasumut atorneqartarpoq. Assersuutigalugu Salomon kunngitut taninneqassagami ataatami ’siutitoorsuaataanik’, siutituup angutivissap kinguaavanik, qimusserpoq.a (1 Kunngit 1:33-40) Tassa Jesusip siutituumik qimusserluni Jerusalemiliarnera isumaqassaaq kunngitut imminut ilisaritittoq. Inuppassuit taamaaliornerisa oqariartuut sakkortusisippaat. Inuit qularnanngitsumik Galilæamiuunerusut annorassaminnik Jesusip sioraanut siaruarterisut Jehup kunnginngorneranik tamanut nalunaarnermi iliuuseqarnermut eqqaasitsipput. (2 Kunngit 9:13) Jesus ’Davidip erneranik’ taagamikku naalagaasinnaatitaanera erseqqissarpaat. (Lúkarse 1:31-33) Palmit avalequtaannik atuinerisa takutippaat kunngitut oqartussaaneranut naalatsigitittut. — Naleqqiuguk sarĸúmersitat 7:9, 10.

Nisanip 9-ani ingerlaaqatigiit Jerusalemimut isertut ersarissumik nalunaarpaat Jesus tassaasoq Guutip messiasitut kunngitullu toqqagaa. Soorunami Jesusip taamatut ilisaritinnera tamarmik nuannarinngilaat. Ingammik farisiiarit Jesusip kunngitut ataqqineqarnera tulluanngitsorujussuartut isigigaat. ’Ajoqersuisoq,’ piumasaqarput, qularnanngitsumik kamappasillutik, ’ajoqersukkatit inertikkit.’ Jesusip akivai: ’Oqarfigaassi: uku nipangeraluarpata ujaqqat nillissapput.’ (Lúkarse 19:39, 40) Aap, Jesusip oqaluussinerani Guutip naalagaaffia pingaarnersaavoq. Inuit akuersigaluarpata akuersinngikkaluarpataluunniit nakimaalluni oqaluussissutigissavaa.

Ilinniarfissarput

Pruffiitip Zakariasip siulittuineratut Jesus Jerusalemimut iseriartorami sapiissuteqarluartariaqarpoq. Nalunngilaa taamaaliornermini akeqqani kamatsissallugit. Qilaliartinnani malitsiminut Guutip naalagaaffianik nutaarsiassamik nuannersumik oqaluussineq tunniuppaa ’inuillu inuiaqatigiinnit tamaneersut ajoqersuganngorteqqullugit’. (Matîuse 24:14; 28:19, 20, NV) Taamatut sulissagaanni aamma sapiissuseqartariaqarpoq. Tusarliussamik tusarnissaq tamarmik nuannaarutiginngilaat. Ilaasa soqutiginngilaat allalli akerliupput. Naalakkersuisut ilaat oqaluussinermik killilersuipput toqqaannartumilluunniit inerteqquteqarlutik.

Jehovap nalunaajaasuisa suli nalunngilaat Guutip naalagaaffianik pilersinneqareersumik nutaarsiassamik nuannersumik oqaluussisoqartariaqartoq inuit tusaajumagaluarpataluunniit taamaaliornissaminnulluunniit tunuarsimaaraluarpata. (Hesekiel 2:7) Inuunermik annaassisumik tamatuminnga suliaqartillutik Jesusip neriorsuutaanik tuppallersarneqarput: ’Atalu, ullut tamaasa najorpassi silarsuup naggatissaanut allaat.’ — Matîuse 28:20. (wE 1/3 97)

[Quppernerup ataani ilanngussaq]