Kiffartuussinissamik immikkut pisinnaatitaaffimmik annerusumik kissaateqarpit?

„JEHOVA kamaassimaqaara,“ Laura oqaluttuarpoq. „Qinujuarsimagaluarpunga aningaasaqarniarnitsinni ajornartorsiutivut aaqqissinnaaqqullugit ikioqqulluta taamaalillunga pioneeriunera ingerlatiinnarsinnaaniassagakku, qinulussinnarsimavungali. Naggataatigut pioneerisut uniinnartariaqarpunga. Nassuerutigisariaqarparattaaq ingerlaannarsinnaasut usorisarakkit.“

Michael, Jehovap Nalunaajaasut ilagiivisa ilaanni ilagiinnut kiffartortuusoq, ilagiinnut nakkutilliisunngornissani kissaatigaa. (1 Timûtiuse 3:1) Ukiut arlallit qaangiummata kissaatigisani piviusunngunngimmat ima narrujuummersimatigaaq suliassamut tamatumunnga tigusinissani kissaatigiunnaarlugu. „Pakatsisinneqaqqinnissara saperpara,“ oqaluttuarpoq.

Tamatumunnga assingusumik misigisaqarnikuuit? Teokratiimi immikkut pisinnaatitaaffik nuannareqisat taamaatittariaqarsimaviuk? Assersuutigalugu pioneerisut kiffartorunnaartariaqarsimavit? Ilagiilluunniit iluanni immikkut pisinnaatitaaffik allat pisimasaat illit kissaatigaajuk? Immaqa qamuuna kissaatigingaaraluarpat Betelimi imaluunniit ajoqersuiartortitatut kiffartuussilernissat, pissutsilli atukkavit pisinnaatinngilaatsit.

„Utaqqivallaarneq tarnikkut anniaataalersarpoq,“ Ussatini taama oqaatigineqarpoq. (Ussatit 13:12) Tamanna ingammik pisinnaavoq pisinnaatitaaffik nammineq kissaatigisaq allamut tunniunneqaraangat. Misigisanik taama ittunik pakatsisinneqartunut, eqqarsaatinik siuneqalersitsisinnaasunik, tuppallersaasinnaasunik neriuuteqalersitsisinnaasunillu Guutip oqaasia imaqarpa? Aap, taamaappoq. Tussiaat 84-imi Jehovamut kiffaasoq kiffartuussinerminut atatillugu kissaatiminik piviusunngortoqarsimanngimmat isumanerluuteqartoq eqqartorneqarpoq.

Levikkuusup pingaartitsinera

Tussiaat 84 Korap ernerisa allassimavaat — tassaapput Levikkuusut Jehovap naalaffiani kiffartortut kiffartuussinermillu immikkut pisinnaatitaaffimminnik pingaartitsilluartuullutik. „Ata ineqarfippit nuanningaassusia, katersaarsuit [Jehovaat!]“ ilaat taama oqarpoq. „Tarniga tumanngusimagaluarpoq kiperiffigalugit [Jehovap] silarliutai, maannali uummatima timimalu torlulaffigaat Guuti uumasoq.“ — Tussiaat 84:2, 3.

Levikkuusup taassuma Jehovap naalaffiani kiffartuunnissaa kissaatigingaaramiuk allaat narsaatit Jerusalemimut aqqutaaniittut taassumunnga kusanartuupput naak immikkut malunnaateqanngikkaluartut. „Qooqqukkut panertukkut ingerlagaangamik taanna puilasoqarfinngortittaraat,“ oqarpoq. (Tussiaat 84:7) Tamanna nalinginnaasumik panertuusaraluartut taassumunnga imeqarluartuupput.

Tussiaasiortoq Levikkuusoq palasiunnginnami naalaffimmi ukiup affaanut sapaatip-akunnera ataasiinnarmi kiffartorsinnaatitaavoq. (1 Israelikkut 24:1-19; 2 Israelikkut 23:8; Lúkarse 1:5, 8, 9) Piffissap sinnerani angerlarsimasarpoq Levikkut illoqarfianni. Taamaattumik ima tussiaasiorpoq: „Allaammi qupalorarsuk najugassarsivoq tulugarnarlu ineqarfissarsilluni piaqqiffissaminik, pilliiviutinni, katersaarsuit [Jehovaat], kunngiga Guutigalu.“ (Tussiaat 84:4) Levikkuusup nuannaarutigissagaluarpaa timmissatut naalaffimmi ittuaannarsinnaasuuguni.

Levikkuusup akulikinnerusumik naalaffimmi kiffartuussisinnaannginnini narrujuummisimassutigisinnaagaluarpaa. Kisianni kiffartuutigisinnaasani nuannaarutigaa, paasivaalu uummammik tamarmiusumik Jehovamik kiffartuussineq iluatinnaateqartoq. Levikkuusup aalajaatsup kiffartuussinermi immikkut pisinnaatitaaffimmini naammagittartuunissaanut suup ikiorsimavaa?

Naammagittartuunissaq ilinniaruk

„Silarliutinni ulloq ataaseq ajunnginneruvoq allanit tusindiliusunit.“ Levikkuusoq taamatut oqarpoq. „Guutima illuata alloriusaani nalassaguma iluarnerutippara guutiitsut toqqini ineqarnermit.“ (Tussiaat 84:11) Paasivaa ulloq ataasiinnarluunniit Jehovap illuaniinnissaq immikkut pisinnaatitaaffiusoq nalissaqanngitsoq. Levikkuusorlu naalaffimmi ullormik ataasiinnaanngitsumik kiffartuussisinnaatitaavoq. Immikkut pisinnaatitaaffik tamanna nalerisimaarutigeqigamiuk nuannaarnermik erinarsorpoq.

Uagummi? Pilluaqqussutisiavut takusinnaavavut imaluunniit Jehovamut kiffartornitsinni misilittavut puigoqqajaasarpavut? Kiffaminit asaneqarami Jehovap immikkut pisinnaatitaaffinnik pisussaaffinnillu assigiinngitsorpassuarnik tunisimavai. Akisussaaffiit artornarnerusut ilaat tassaapput nakkutilliineq paarsisuunerlu, ajoqersuineq piffissarlu tamaat atorlugu kiffartuusseriaatsit assigiinngitsut. Jehovamut pallorfiginninnermut atatillugu aamma allarpassuarnik naleqangaartunik pisinnaatitaaffeqarpoq.

Assersuutigalugu kristumiut oqaluussinerat eqqarsaatigeriaruk. Apustili Paulusip nutaarsiassamik nuannersumik oqaluussissutiginninneq immikkut pisinnaatitaaffittut ’[erlinnartumut] puuguttamiittumut marraasumiittumut’ assersuuppaa. (2 Korintumiut 4:7) Kiffartuussineq erlinnartuutitut naleqangaartutut isigaajuk? Jesus Kristus Naalagaaffimmik oqaluussinermi siuttuusoq taamaliorpoq uatsinnullu maligassiuilluni. (Matîuse 4:17) ’Tamanna pillugu tamatuminnga kiffartuutigisaqaratta . . . nikallunngilagut,’ Paulus oqarpoq. — 2 Korintumiut 4:1.

Aammattaaq kristumiut ataatsimiittarneri anersaakkut aaqqissuussinerupput suusupagisariaqanngisavut. Ataatsimiinnerni pingaaruteqartunik ajoqersorneqartarpugut nuannaarutigisinnaallugulu ataatsimooqatigiinneq pinngitsoorneqarsinnaanngitsoq. Tassanissaaq uppernerput neriugisarpullu tamanut ersersissinnaavarput akuttunngitsumik oqaaseqartarnitsigut saqqummiussanullu allatut peqataasarnitsigut. (Eprîarit 10:23-25) Aap, ataatsimiinnerit ilumut pingaartittariaqarpavut!

Michaelip, aallaqqaataani eqqaaneqartup, tamakku tamaasa pingaartippai. Kisianni utoqqaanertatut kiffartorsinnaannginnini pakatsissutigigamiuk pingaartitsivallaarunnaarpoq. Pilluaqqussutit tamakku pingaarteqqileramigit isumakkut aalajaatsunngoqqippoq Jehovalu naammagittarluni utaqqisinnaalerlugu.

Pisinnaatitaaffiit aalajangersimasut pisimanngikkutsigik tamanna naammagiinnartariaqarparput tussiaasiortutullu eqqarsaatigisariaqarlugu Jehovamit qanoq pilluaqquneqarsimanerluta.a Pilluaqquneqarsimanngitsutut misigigutta eqqarsaatigeqqissaaqqittariaqarparput Jehovalu qinnuigalugu ikioqqulluta pisinnaatitaaffivut takusinnaaleqqullugit, paasiumallugu qanoq pilluaqquneraatigut ataqqinaatigisaanillu qanoq atorneraatigut. — Ussatit 10:22.

Paasisariaqarparputtaaq immikkut pisinnaatitaaffiit pissagaanni, soorlu nakkutilliisuussagaanni, aalajangersimasumik piukkunnaateqarnissaq. (1 Timûtiuse 3:1-7; Títuse 1:5-9) Immitsinnik misissortariaqarpugut paasiniarlugu assigiinngitsutigut siumukartariaqarnersugut, taavalu siumukarnissarput sulissutigilluarlugu. — 1 Timûtiuse 4:12-15.

Nikalloqinak

Pisinnaatitaaffik aalajangersimasoq pisinnaanngikkutsigu ima paasisariaqanngilaq Jehovap taama pisinnaatitaaffillit asanerugai imaluunniit ajunngitsumik erliguukkaatigut. Usorunnermit isumaqassanngilagut allat pisassarinngisaraluaminnik pisinnaatitaaffilerneqartut inunnit nakerisarsiortunit Jehovap siulersuineratigut toqqarneqaratik. Taama eqqarsaateqartuarutta sinngalersinnaavugut isumaqatigiikkunnaarsinnaallutalu imaluunniit allaat sallusuissummik taamaatitsisinnaalluta. — 1 Korintumiut 3:3; Jâko 3:14-16.

Laura aallaqqaataani eqqaaneqartoq taamaatissimanngilaq. Piffissap ingerlanerani kamannini usorunninilu aqussinnaalerpai. Arlaleriarluni Laurap Jehova qinnuigisarpaa ikioqqulluni pioneeriusinnaannginnini eqqortumik qisuariarfigiumallugu. Ilagiinni piukkunnaatilinnik ikiortissarsiorpoq misigivorlu qularutigiunnaarlugu Guutip asagaani. „Jehovap isumakkut eqqissisippaanga,“ taama oqarpoq. „Uigalu maannakkorpiaq pioneeriusinnaanngikkaluarluta taamaattoq pioneeriusimanerput nuannaarutigaarput misigisimasavullu nakussatsissutigisarlugit. Ernerpullu inersimasoq pioneeritut kiffartornerani ikiortarparput.“ Maanna Laura naammagittaqqilerami pioneerit allat ’tipaatsuttut tipaatsoqatigisinnaavai’. — Rûmamiut 12:15.

Piviusorsiortumik anguniagaqarit

Maannakkut kiffartuussinermi pisinnaatitaaffitsinnik naammagittarneq ima paasisariaqanngilaq teokratiimut tunngasumik anguniagaqarunnaartugut. Qilammi inuunissamut makinnissaq eqqarsaatigalugu Paulus allassimavoq ’siunerminiittut isattorlugit’. Aamma allassimavoq: ’Killigisarput naapertorlugu toraagaq ataaseq ornillugu ingerlaannarta.’ (Filípimiut 3:13-16) Teokratiimut tunngasumik anguniagaqarutta siunitsinniittut isattorsinnaavavut. Piviusorsiortumilli anguniagaqartariaqarpugut.

Anguniakkat piviusorsiortut ingasaginartuunatillu anguneqarsinnaasarput. (Filípimiut 4:5) Imali isumaqanngilaq ukiuni arlalinni ilungersorluni anguniagarisaq piviusorsiortuunngitsoq. Siunissami ungasinnerusumi anguniagaq anguneqarsinnaavoq siunissami qaninnerusumi arlalinnik anguniagaqarnikkut. Taakku anersaakkut siumukarnitsinnut tikkuutaasinnaapput. Piffissap ingerlanerani anguniakkatsinnik angusigutta nalerisimaarneq pakatsineq pinnagu misigissavarput.

Oqimaaqatigiisitsineq

Atukkavulli killeqarnivullu pissutigalugit akuerisariaqarparput pisinnaatitaaffiit ilaat aalajangersimasut immaqa pisinnaanngisaannassagatsigik. Taamaattunik anguniagaqarutta pakatsiinnassaagut. Immaqa anguniakkat taamaattut taamaatikkallarsinnaavavut. Taamaaliorluarsinnaavugut Guuti qinnuigigutsigu inuunermi naammagittarnissatsinnut ikioqqulluta Jehovallu piumasaanik iliorneq aallukkutsigu. Pisinnaatitaaffinnik anguniagaqaraangatta Jehovap ataqqinaatissaanut taamaaliortariaqarpugut namminerlu nersorneqarniaannarnata. (Tussiaat 16:5, 6; Matîuse 6:33) Biibilimi tamatumunnga naleqqulluartumik allassimasoqarpoq: „Suliarisassatit tamaasa Jehovap assaanut tunniutikkit, taava pilersaarutitit iluatsikkumaarput.“ — Ussatit 16:3.

Tussiaat 84 atuaraangatsigu takusinnaavarput tussiaasiortup kiffartornermi pisinnaatitaaffini taama isigisimagai, Jehovallu pilluaqqungaarpaa. Ullumikkuttaaq Jehovap innuttaasa tussiaat tamanna iluaqutigeqaat.

Jehova tatigalugu qinunikkullu qanittumik attaveqarfigalugu pisinnaatitaaffinnik nutaanik perusullutit pisinnaatitaaffigeriikkannillu naammaginnillutit oqimaaqatigiissumik isumaqarsinnaavutit. Pisinnaatitaaffeqarnerorusussutsivit maannakkut iliuuserisinnaasannik pingaartitsinermik Jehovamillu naassaanngitsumik kiffartuussisinnaanermik nuannaarnermik arsaanngisaannarlisit. Jehova tatigiuk, tamatumami pillualersissavaatit, soorlu Levikkuusup oqaatigisimagaa: „Katersaarsuit [Jehovaat], pilluarpoq inuk tatiginnittoq ilinnik!“ — Tussiaat 84:13. (wE 15/3 97)

[Quppernerup ataani ilanngussaq]

[Qupp. 25-mi assiliartat]

Anguniakkanni Guutip piumasaanik iliorneq pingaarnerutittaruk