Silarsuarmut nutaamut naapertuilluartumut aniguinissaq
„Kisianni qanilaartut nuna kingornutissavaat, pilluangaarlutillu inuussapput.“ — TUSSIAAT 37:11.
1, 2. (a) Jehovap ullutsinni aniguisitsiniarnera qanoq ililluni qangali aniguisitsisimaneranit allaanerussava? (b) Silarsuassamut qanoq ittumut Jehovap innuttani aniguisissavai?
JEHOVA Guutiuvoq aniguisitsisoq. Itsaq arlaleriarluni innuttani aniguisissimavai. Aniguisitsinerit tamakku utaqqiisaannaapput, taamanikkummi Jehovap Satanip silarsuaanut tamarmut ataavartumik eqqartuussinngilaq. Ullumikkulli Jehovap qanittukkut kiffani tamaasa inaarutaasumik aniguisilluinnassavai. Taamanikkussamut nunarsuaq tamakkerlugu Satanip aaqqissuussinera suujunnaarsilluinnassavaa kiffanilu silarsuassamut nutaamut naapertuilluartumut isertissallugit. — 2 Pîtruse 2:9; 3:10-13.
2 Jehova ima neriorsuivoq: „Guutiitsoq erniinnaq peeruttussaavoq . . . Kisianni qanilaartut nuna kingornutissavaat, pilluangaarlutillu inuussapput.“ (Tussiaat 37:10, 11) Qanoq sivisuutigisumik? „Iluartut nuna kingornutissavaat najugaqassallutillu tassani naassaanngitsussamut.“ (Tussiaat 37:29; Matîuse 5:5) Tamannali pitinnagu silarsuaq manna annikilliornartussamik aatsaat taama angitigisumik eqqorneqaqqaartariaqarpoq.
’Annikilliornartussaq angisooq’
3. Jesusip qanoq ililluni ’naalliunnartussaq’ oqaatigisimavaa?
3 1914-imi silarsuarmut matumunnga ’ullut kingulliit’ aallartipput. (2 Timûtiuse 3:1-5, 13) Taamanimiilli ukiut 83-it qaangiussimapput naggatissarlu qanillivoq, taava Jesusip siulittuutaatut ima pisoqarumaarpoq: ’Taamaannerani naalliunnartoqangaassavoq silarsuaqaleqqaarneranit mannalu tikillugu naleqanngisaannartumik kingornalu naleqassanngitsumik.’ (Matiuse 24:21) Aap, allaat sorsunnersuup aappaanit, inuit 50 millionit sinnerlugit toqutaanerannit, ajornerussaaq. Silarsuarmut uissuumminartussarsuaq qanilligasuarpoq!
4. Suna pillugu Jehovap ’Babylon Angisooq’ eqqartuutissavaa?
4 ’Annikilliornartussaq’ tassanngaannartumik, ’nalunaaquttap akunnerani ataatsimi’, nalliussaaq. (sarĸúmersitat 18:10) Guutip upperisarsiornernut ilumuunngitsunut tamanut, Biibilimi ’Babylon Angisooq’-mik taaneqartunut eqqartuussutaanik naammassinninnera annikilliornartussap aallarniutigissavaa. (sarĸúmersitat 17:1-6, 15) Babylonitoqqamut ilisarnaat maluginiarnarnerpaaq tassaavoq eqqunngitsumik upperisarsiorneq. Babylon Angisooq ullumikkut atuuttoq tamatumunnga assinguvoq tassaallunilu eqqunngitsumik upperisarsiornerup silarsuarmi tamarmi naalagaaffissua. Taanna atortittartutut ippoq eqqortuusup akerlianik naalakkersuisunut akuersiinnartarami. Taakkua sorsunnerinut tapersersuisarsimavoq illua-tungeriinnut tamanut sakkutoorpassuit pilluaqqusarlugit, inuit uppeqatiminnik toqoraanerannik kinguneqartumik. (Matîuse 26:51, 52; 1 Juánase 4:20, 21) Tapersersuisumi ajortuliortarnerat sumiginnarsimavaa kristumiullu ilumoortut malersorsimallugit. — sarĸúmersitat 18:5, 24.
5. ’Annikilliornartussaq angisooq’ qanoq aallartissava?
5 ’Annikilliornartussaq’ aallartissaaq naalakkersuisut tassanngaannartumik ’Babylon Angisooq’ saassuppassuk. Taakkua ’uersartoq taanna uumissorumaarpaat suerullugu tamataarullugulu, neqaalu neriumaarpaat, innermillu ikikkarumaarpaat.’ (sarĸúmersitat 17:16) Tamatumani ikinngutigisimasaasa ’qiallugu uppikkumaarpaat’. (sarĸúmersitat 18:9-19) Jehovalli kiffaasa tamanna utaqqisimavaat imalu nillissapput: ’[Jehova unnersiutigineqarli, NV] . . . uersartorsuaq uersarnermigut nunamik aseruisoq eqqartuukkamiuk, kiffamilu aavi assaanit apeqqutigigamigit.’ — sarĸúmersitat 19:1, 2.
Guutip kiffai saassunneqalerput
6, 7. Sooq Jehovap kiffai isumalluarsinnaassappat ’annikilliornartussami angisuumi’ saassunneqalerunik?
6 Eqqunngitsumik upperisarsiorneq suujunnaarsinneqarpat naalakkersuisut Jehovap kiffai saassutissavaat. Satan, siulittuummi ’Gogimik nunami Magogimi najugaqartumik’ taaneqartoq, ima oqarumaarpoq: „Saassutissavara nuna illersoriarfissaqanngitsoq, inui isumakuluuteqarnatik eqqissisimallutillu inuusut.“ Ajugaaffigiuminartillugit ’sakkutoorpassuit ilagalugit . . . nuissatut majortutut . . . nunaat sakkutuunik tamakkissavai’. (Hesekiel 38:2, 10-16) Jehovap innuttaasa nalunngilaat saassussineq tamanna iluatsitsissanngitsoq Jehova tatigigamikku.
7 Farao sakkutoorpassuilu Guutip kiffai Immami Aappalaartumi ajugaaffigilerlugit isummermata Jehovap tupinnartuliornikkut innuttani aniguisippai Egyptenimiullu sakkutoorpassui nungutillugit. (2 Moses 14:26-28) ’Annikilliornartussami’ inuiaqatigiit isumaqalerpata Jehovap innuttai ajugaaffigineqalersut tupinnartuliornikkut akuliuteqqissaaq: „Ullussami issumani . . . kamannera pitoraatitikkumaarpara. Ilungersorninni kamangaarninnilu oqarpunga.“ (Hesekiel 38:18, 19) Taava ’annikilliornartussap angisuup’ sakkortusinerpaaffia nalliussaaq!
8. Piumaartussat suut tupinnartut nalliussappat Jehova ajortunut akuliutsinnagu, sunillu kinguneqartumik?
8 ’Annikilliornartussaq angisooq’ aallartilerpat Jehovalu suli silarsuup matuma sinneranut eqqartuussiniarluni akuliutsinnagu tupinnartumik pisoqassaaq. Malugiuk qanoq sunniuteqassasoq. ’Taavalu inuup ernerata [Kristusip] nalunaaqutaa qilammi takussaassavoq; taavalu nunami naggueqatigiit tamarmik nimaarumaarput, isigiumaarpaallu inuup ernera qilaap nuiaasigut aggersoq pissarsuulluni naalannartorsuullunilu.’ (Matiuse 24:29, 30) „Nalunaaquteqarumaarporlu seqinermi qaammammilu ullorissanilu, . . . inuit ersinermit inuillu najugaannut piumaartussanik ilimasunnermit tumannguppata.’ — Lúkarse 21:25, 26.
’Utertinneqarfissarsi qanillivoq’
9. Suna pillugu Jehovap kiffaasa ’niaqutik makitissinnaassavaat’ tupinnartunik nalliuttoqalerpat?
9 Taamanikkussamut Lúkarse 21:28 eqquutissaaq. Jesus oqarsimavoq: ’Tamakkuli pilerpata aarloritsi, niaqusilu makitissigik, utertinneqarfissarsi qanillimmat.’ Guutip akerai annilaangaassapput paasissagamikkut takusatik tupinnartut Jehovameersuusut. Jehovalli kiffai qiimasussapput nalunnginnamikku utertinneqarnissartik qanillisoq.
10. ’Annikilliornartussap angisuup’ annertunerpaaffia Guutip oqaasiani qanoq allaatigineqarpa?
10 Taava Jehovap Satanip aaqqissuussaanera nungutilluinnassavaa: „Gog sakkutoorpassuilu nappararnermik toqoraataasumik aammillu sialussuarnillu kuisiinnartunik nataqqornanillu ujaraasunik pillassavakka innermillu ikuallassaammillu torarfigitillugit . . . misigissavaallu uanga tassaasunga [Jehova].“ (Hesekiel 38:22, 23) Aap, Satanip aaqqissuussinera peerneqarluinnassaaq. Inuiaqatigiit Guutimik ilisarinnikkumanngitsut tamarmik nungussimassapput. Taamaalilluni ’annikilliornartussaq angisooq’ Harmagedonimik sakkortunerpaaffeqassaaq. — Jeremia 25:31-33; 2 Tásalûníkamiut 1:6-8; sarĸúmersitat 16:14, 16; 19:11-21.
11. Sooq Jehovap kiffai ’annikilliornartussamit angisuumit’ aniguisinneqassappat?
11 Nunarsuaq tamakkerlugu Jehovamik pallorfiginnittut millionilikkuutaat ’annikilliornartussamit angisuumit’ aniguisinneqassapput. Tassaapput ’amerlangaartut inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’. Sooq taama mianernangaartigisumik aniguisinneqassappat? Jehova ’ullukkullu unnuakkullu kiffartuukkamikku’. Silarsuup matuma naggatissaani aniguissapput silarsuassamut nutaamut naapertuilluartumut. (sarĸúmersitat 7:9-15) Taamaalillutik takussavaat Jehovap neriorsuutaata eqquunnera: „[Jehova] neriuffiguuk aqqutigeqqusaalu atuarlugu, taava nunamik kingornussisussanngortikkumaarpaatit, takujumaarpallu guutiitsut piiagaanerat.“ — Tussiaat 37:34.
Silarsuassaq nutaaq
12. Harmagedonimit aniguisut suut qilanaarisinnaassavaat?
12 Tassaajumaarpoq piffissaq pissanganartoq — ajussutsip nungutinneqarnissaa inuiaallu oqaluttuarisaaneranni piffissap alutornangaarnerpaap aallartilernissaa! (sarĸúmersitat 20:1-4) Harmagedonimit aniguisut Jehova qujamasuffigingaassavaat atugartuussutsimut minguitsumut Guutip sanasaanut, silarsuarmut nutaamut isertinneqarlutik nunarsuarmi paratiisinngortinneqartussami! (Lúkarse 23:43) Toqunngisaannassappullu! (Juánase 11:26) Ilumut, taamanikkussamut immikkut tupinnartumik periarfissaqalerumaarput Jehovatut naassaanngitsumik inuusinnaanissaminnik!
13. Jesusip ajorunnaarsitsisarsimanini nunarsuarmi aallartitani qanoq ililluni nangissavaa?
13 Jesusip, Jehovamit qilammi kunngitut ivertinneqarsimasup, nakkutigissavai pilluaqqussutit aniguisut nuannaarutigisassaat. Nunarsuarmi inuugallarami tusiattut tappiitsullu ajorunnaarsittarpai ’inuillu nappaataat nalinginnaat ajuutaallu nalinginnaat katsorsarlugit’. (Matiuse 9:35; 15:30, 31) Silarsuassami nutaami nunarsuaq tamakkerlugu tamatumunnga assingusumik ajorunnaarsitsissaaq. Guuti sinnerlugu neriorsuut manna eqquutitissavaa: ’Qulliit tamaasa isaannit aallarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ (sarĸúmersitat 21:4) Taamanikkussaq nakorsat iliveqarfilerisullu pisariaarutissapput! — Jesaja 25:8; 33:24.
14. Jehovap kiffai toqusimasut qanoq ilillutik aniguissappat?
14 Guutip kiffai aalajaatsut toqusimasut aamma aniguissapput. Silarsuassami nutaami taakku ilivermit aniguisinneqassapput. Jehovap neriorsoqqissaarpaatigut: ’Toqusut makikkumaarmata, iluartullu iluaatsullu.’ (apustilit suliait 24:15) Qularnanngitsumik ’iluartut’ siullermik makissapput paratiisip ineriartortinnissaanut peqataassallutik. Itsarli aalajaallutik toqusimasut makippata misilittagaat tusarnaassallugit Harmagedonimit aniguisunut pissanganassaqaaq! — Juánase 5:28, 29.
15. Silarsuassami nutaami pissutsit qanoq ittuujumaartut nassuiakkit.
15 Taamanikkussaq inuusut tamarmik tussiaasiortup Jehova pillugu oqaaserisimasaa namminneq misigissavaat: „Assatit ammartarpatit pinngortitallu tamaasa ajunngitsuutinnik qaarsillartittarlugit.“ (Tussiaat 145:16) Kaattoqaqqissanngilaq: Nunarsuarmi pinngortitat oqimaaqatigiilluinnassapput inerititaqarluassallutillu. (Tussiaat 72:16) Angerlarsimaffeqanngitsoqassanngilaq: „Tamarmik eqqissillutik inuussapput viinnequtaatimik orpiutimillu figenillit ataanni kimilluunniit annilaartinneqaratik.“ (Jesaja 65:21, 22; Mika 4:4) Ersinartoqaqqissanngilaq: Sorsunnerit, nakuusernerit pinerluttuliornerillu soraarsinneqassapput. (Tussiaat 46:9, 10; Ussatit 2:22) „Maannali nunamiut tamarmik eqqissipput unerillutillu, tipaatsunnermillu nipitik anippaat.“ — Jesaja 14:7.
16. Suna pillugu silarsuassami nutaami naapertuilluarneq atugaangaassava?
16 Silarsuassami nutaami Satanip sunniiniaaneri tamarmik peerneqarsimassapput. Akerlianik ’inuit najugaanni nunallit iluartuliornissaq ilikkartassavaat’. (Jesaja 26:9; 54:13) Ukiut ingerlanerini anersaakkut peqqinnartumik ajoqersorneqarnerup kingunerissavaa ’nuna tamakkerlugu [Jehovamik] ilisarsineq soorlu ermit matoqqagaat immap naqqa.’ (Jesaja 11:9) Inuiaat tamarmik ineriartornartumik eqqarsartarlutillu iliuuseqartuassapput. (Filípimiut 4:8) Takorlooriakkit nunarsuaq tamakkerlugu inuiaqatigiit pinerluttuliortoqanngitsut, namminissarsiortoqanngitsut sinngasoqanngitsullu — inuiannit tamaneersut qatanngutigiit tamarmik Guutip anersaavata inerititaanik pissusillit. Aap, maannakkut allaat amerlangaartut pissutsit tamakku ineriartortittarpaat. — Galâsiamiut 5:22, 23.
Sooq Jehova taama sivisutigisumik utaqqisimasoq?
17. Sooq Jehova ajussutsip peerneqarnissaanik taama sivisutigisumik utaqqisimava?
17 Kisianni sooq Jehova ajussutsip peerneqarnissaanik innuttamilu silarsuassamut nutaamut aniguisinneqarnissaannik taama sivisutigisumik utaqqisimava? Eqqarsaatigissavat suut naammassineqaqqaartariaqartut. Pingaarnerpaamik Jehovap oqartussaassusia, eqqortumik naalagaanera, qutsissisinneqartariaqarpoq. Piffissaq naammattoq qaangiussimammat erseqqissilluinnarpoq inuit taassuma oqartussaassusianut atanatik naalakkersuinerat ajunaarutaasumik kinguneqarsimasoq. (Jeremia 10:23) Taamaattumik Jehova pissutissaqarluarpoq inuit naalakkersuinerisa Naalagaaffimminik qilammiusumik Kristusip ataaniittumik taarsernissaanut. — Daniel 2:44; Matîuse 6:9, 10.
18. Abrahamip kinguaavisa qanga Kana’anikkut nunaat kingornussinnaasimavaat?
18 Ukiuni hundredelippassuarni tamakkunani pisimasut Abrahamip nalaani pisimasunut assingupput. Jehovap Abraham oqarfigaa kinguaassaasa Kana’anip nunaa kingornukkumaaraat — aatsaalli ukiut 400-t qaangiutereerpata „Amorikkut ajortuliornerat suli naammatsinngimmat“. (1 Moses 12:1-5; 15:13-16) Naggueqatigiit pissaaneqarnerusut Amonikkut maani eqqaaneqarmata Kana’animiut tamarmik pineqannguatsiarput. Aatsaat ukiut 400-t qaangiummata Jehovap innuttani Kana’nip nunaanut ajugaanissaannut periarfissaqalersippai. Ukiut taakkua ingerlaneranni inuiaqatigiit Kana’anikkut namminersorsinnaatitaapput. Sumik kinguneqartumik?
19, 20. Kana’anikkut innuttaaqatigiit qanoq ittut ineriartortissimavaat?
19 Atuakkami Bible Handbook-mi Henry H. Halleyip eqqaavaa Megiddomi itsarnisarsiortut guutipiluup Ba’alip nuliaanut, guutipilummut arnamut Ashtorethimut, naalaffiutitaasimasoq nassaarisimagaat. Ima allassimavoq: „Naalaffiup tamatuma eqqannguani iliveqarfeqarpoq, tassanilu qummuattat amerlasuut, meeraaqqanik toqusimasunik naalaffimmi pilliutigineqarsimasunik imallit, nanineqarsimapput . . . Ba’alip Ashtorethillu pruffiitii meeraqqanik toqoraasuusimapput.“ „Allamik amiilaarnartumik ileqqoqartarsimapput ’tunngaviliinermi pilliummik’ taaneqartumik. Illu sananeqaraangat meeraq pilliutigineqartarpoq timaalu illumut qarmaanneqartarluni.“
20 Halley ima oqaaseqarpoq: „Ba’al, Ashtoreth Kana’anikkullu guutigititaat allat guutisiorfigineqartarput ingasattumik nuannaterulunnikkut; naalaffiutaat ileqqorluutinik ulikkaarput. . . . Kana’anikkut kanngunartuliungaarlutik pallorfiginnittarput, . . . kingornalu meeqqatik angajulliliat guutigisaminnut taakkununnga pilliutigisarpaat. Kana’anikkut nunaat tassaalersimavoq nuna Sodomatut Gomorratullu ittoq. . . . Atugartuussuseq taama maajunnartigisoq naakkittaatsigisorlu piujuaariartariaqarpa? . . . Itsarnisarsiortut Kana’anikkut illoqarfikuinik assaasut eqqarsaatigisarpaat sooq Guutip siusinnerusukkut suujunnaarsissimannginnerai.“ — Naleqqiuguk 1 Kunngit 21:25, 26.
21. Silarsuup matuma pineqarnissaa qanoq ililluni Kana’anikkut pineqarsimanerannut assingussava?
21 Amorikkut ajortuliortarnerat ’naammatsippoq’. Jehova nungutissallugit pissutissaqarluarpoq. Ullumikkuttaaq taamaappoq. Silarsuaq manna nakuusernermik, kanngunartuliornermik Guutillu inatsisaanik narruginninnermik ulikkaarpoq. Kana’anikkunni meeqqanik pilliisarneq annilaarnartikkutsigu inuusuttut millionilikkuutaat silarsuup matuma sorsunnerini pilliutigineqartut qanoq isumaqarfigissavavut? Soorunami Jehova pissutissaqarluarpoq aaqqissuussaaneq ajortoq manna nungutissallugu.
Allattaaq anguneqarpoq
22. Jehova ullumikkut kamagittarsimammat suna anguneqarsimava?
22 Jehovap ulluni kingullerni makkunani kamagittarnera aamma allamik pissutissaqarpoq. Amerlangaartut maanna 5 millioninit amerlanerusut katersorneqarnissaannut ajoqersorneqarnissaannullu piffissaqartitsivoq. Jehovap siulersuineratigut peqatigiiffittut siumukarluartutut aaqqissorneqarsimapput. Angutit, arnat meeqqallu ilinniartinneqartarput allanut sallusuissummik Biibilimeersumik ajoqersuisinnaatillugit. Ataatsimiikkaangamik aamma naqitikkat Biibililersaarutit atornerisigut Guutip aqqutigeqqusai asanartut ilikkartarpaat. (Juánase 13:34, 35; Kulorsamiut 3:14; Eprîarit 10:24, 25) Saniatigut sanaartornermut, elektronikkimut, naqiterinermut allanullu tunngasunik piginnaanerit ineriartortittarpaat ’nutaarsiassamik nuannersumik’ oqaluussissutiginninneq siuarsarniarlugu. (Matîuse 24:14, NV) Qularnanngitsumik ilikkakkat tamakku sanaartorsinnaanerlu silarsuassami nutaami pisariaqartinneqassapput.
23. Sooq ullumikkut inuuneq immikkut pisinnaatitaaffiua?
23 Aap, ullumikkut Jehovap kiffani piareersarpai ’annikilliornartussamit angisuumit’ silarsuassamut nutaamut aniguinissaannut. Taamanikkussamut Satan, taassuma ajortumik silarsuaa, nappaatit, aliasunnerit toqulu peerneqarluinnarsimassapput. Qiimmatsangaarlutik nuannaarlutillu Guutip innuttai paratiisiliussapput, ullullu tamaasa ’pilluangaarlutik inuussapput’. Immikkut pisinnaatitaaffeqarpugut ulluni pingaartuni makkunani inuugatta, Jehova ilisaralugu kiffartorfigisinnaallugulu, nalunnginnatsigu qanittukkut ’niaquvut makitissinnaallugit, utertinneqarfissarput qanillimmat’. — Lúkarse 21:28; Tussiaat 146:5. (wE 1/4 97)
Uteqqiinissamut apeqqutit
□ ’Annikilliornartussaq angisooq’ sunaava, qanorlu ililluni aallartissava?
□ Sooq Gogip Jehovap kiffaanut saassussinissaa iluatsitsissanngila?
□ ’Annikilliornartussaq angisooq’ qanoq ililluni naassava?
□ Pilluaqqussutissat nuanningaartut suut silarsuassami nutaami atuutissappat?
□ Suna pillugu Jehovap aaqqissuussaaneq manna akuliuffigissallugu taama sivisutigisumik utaqqisimava?
[Qupp. 16-imi assiliartaq]
Nunarsuaq tamaat paratiisinngortinneqarumaarpoq