Ernumanartoqaraluaqisoq neriuutissaqarpoq

TAKORLOORIARUK ima misigisaqartutit: Pigisatit tamarmik aserorneqarput, inuussutissarsiutissaqanngilatillu. Meeqqatit — inuuninni nuannaarutivit annersaat — toqupput. Aapparpit pisariaqartitannik tapersersunngilaatit. Peqqiilliorluinnalerputit. Ullut tamaasa naalliuttuarputit.

Taamatut atugaqartuuguit misigisimassagaluarpit inuunissannut pissutissaqarlutit? Imaluunniit neriuutaarulluinnarlutit akiuukkunnaaginnassagaluarpit?

Biibilip nalaani anguteqarsimavoq Jobimik atilimmik taamatut alianartunik atugaqarsimasumik. (Job, kapitali 1 aamma 2) Taanna saperluinnalernermini ima oqarsimavoq: „Inuunera qatsuteqaara.“ Aap, misigisimavoq toquguni pitsaanerussasoq. (Job 10:1; 14:13) Naalliuuteqaraluaqalunili Jobip Guutimut assuarnaassutsi attattuaannarpaa. Taamaattumik Jehovap „Job ukiuni inuuffigisaani kingullerni siornagornit suli annerusumik pilluaatissippaa“. Eqqissillunilu toquvoq „utoqqaalluni ullussanilu naammatsissimallugit“. — Job 42:12, 17.

Jobip assuarnaassutsimigut maligassiaa ukiut ingerlaneranni inunnit amerlasuunit unnersiutigineqartarsimaqaaq. Misilinneqarneri inuttut pissusianut pitsannguutaapput allallu ajunngitsumik iliornissaannut kajumississutaallutik. (Jâko 5:10, 11) Tamanilli pingaarnerpaamik: Jobip assuarnaassusia Jehovap uummataanik nuannaartitseqaaq. (Ussatit 27:11) Taamaalilluni Jobip annikilliuutai Guutimut tunniusimanerup, uppernerup assuarnaassutsillu ajugaarujussuarnerannik taarserneqarput, taassumunnga taassumalu maligassiaanit kajumissisinneqarsimasunut tamanut pilluaqqusaanermik kinguneqartumik.

Misilinneqartaraluarluni neriuuteqarneq

Immaqa Jobip atorsimasaanut assingusunik misilinneqarputit. Immaqa qanimut ikinngutinnik qanigisannilluunniit toqukkut annaasaqarnerit misigissutsikkut artorsaatigaat. Immaqa perulunnartumik nappaateqarnerup nassatarisaanik anniaatit inuunissamut saperluinnalersutut misigilersippaatsit. Immaqa avinniarnerup artornartup kingorna misigaatit inuunerit tamarmi ajalusoorluinnartoq. Immaqa aningaasatigut atugarliorneq pigisannik tamanik annaasaqarninnik kinguneqarpoq. Immaqaluunniit pallorfiginninnermut ilumoortumut akerlilersuisunit peqqarniitsumik pineqarputit. Misilinneqarninnut akiuunnerpit misigilersissinnaavaatit siunissaqanngitsutit. — 1 Pîtruse 1:6.

Nikallorluinnarnissamut taarsiullugu imminut ima aperisinnaavutit: ’Ajornartorsiutinnut suna pissutaava?’ Kikkut tamarmik akiortariaqakkaminnik ajornartorsiuteqarput silarsuarmi Satan Diaavulup pissaaneqarfigisaani inuunerput pissutigalugu. (1 Juánase 5:19) Kristumiutut tamatta Guutip naalagaaffianik tusarliussamik uumissuinermit anersaapiluit siuarsagaannit, allat oqaasiinit asanninngitsunit imaluunniit iliuutsinit amiilaarnartunit guutiitsorpalaartunillu, ulluni ajornakusoortuni makkunani nalinginnaaqisunit, arlaatigut eqqorneqartarpugut. — 2 Timûtiuse 3:1-5.

Arlaannik alianartumik eqqorneqarsimaguit eqqorneqarnerit ’piffissamik nalaatsornermillu’ pissuteqarsinnaavoq. (Nalunaajaasup oqaasii 9:11, NV) Inuunermilu arlaatigut ajutoorneq inuup naammalluinnanngissusianik kingornussaasumik pissuteqarsinnaavoq. (Rûmamiut 5:12) Allaat annertuumik ajortuliorsimagaluarlutit allamik isumataarsimaguit anersaakkullu ikiortissarsiorsimaguit misigisariaqanngilatit Guutip qimassimagaatit. (Tussiaat 103:10-14; Jâko 5:13-15) Guutip tamatta immikkut ilumoorluni soqutigaatigut. (1 Pîtruse 5:6, 7) Qularinngilluinnarsinnaavat ’Jehovap qanimmagit neriuutaarussimasut, annaattarlugillu sapiissuseerutitaasimasut’. (Tussiaat 34:19) Misilinneqarnerit qanorluunniit ingasatsigigaluarpat anigornissaanut pisariaqartumik Jehovap ilisimassuseqartissinnaavaatit. (Jâko 1:5-8) Eqqaamajuaannaruk Jehovap ikit tamaasa mamitissinnaammagit. Guutimut iluarisaaguit suulluunniit akornusersinnaanngilaatit inuunermik akissarsiassap pissarsiarinissaanut. — Rûmamiut 8:38, 39.

Misilinneqarnerit inummut iluaqutaasinnaappat?

Imatut ussateqarpoq: „Nuissat qulaanni qilak allaaqqittuaannarpoq.“ Allatut oqaatigalugu, qanorluunniit ajornartorsiortigigaluaraanni neriunnissamut pissutissamik nassaartoqartuaannarpoq. Guutip oqaasiani allassimasut tamarmik allanneqarsimapput ’nerioqqulluta’. (Rûmamiut 15:4) Qanorluunniit atugarlioraluaruit Biibilimi neriorsuutit najoqqutassiallu nuannaalerseqqillutillu neriuutissaqalerseqqissinnaavaatsit.

Biibilimi takutinneqarpoq pilluaqqusaanernut naassaanngitsunut Guutimik asannittunut pissamaartitaasunut naleqqiullugu ’naalliunnartoq sivikitsoq artornanngitsorlu’. (2 Korintumiut 4:16-18) Oqaatigineqarportaaq inuttut pissutsit Guutip pissusiinut assingusut annikilliornerni ineriartortinneqartartut tusaamasaanermit timikkullu pisuussutinit naleqarnerujussuusut. (1 Juánase 2:15-17) Aap, naalliunnartut inummut iluaqutaalersinnaapput. (Eprîarit 5:8) Ilami naalliunnerup nalaani ilikkarsimasat atoraanni pilluaqqusaanernik ilimaginngisaraluanik nassataqarsinnaapput.

Assersuutigalugu, artornartumik misilinneqarnerpit inoqatinnut inussiarnernerulersillutillu paasinninnerulersissinnaavaatit. Immaqa paasilissavat siornatigut inuttut pissuseqarsimagaluarlutit allanut iluarinanngitsumik imaluunniit anersaakkut siumukarnissaraluannik akornusiisumik. Immaqa imminut sorsuartut isigisimagaluarputit. Taava annikilliuleravit paasilerpat qanoq sanngiitsigalutit qanorlu allat pisariaqartitsigalugit. Misilinneqarnerit taamatut ilinniutigisimagukku pisariaqartunillu allannguiguit, misilinneqarnerit ilinnut iluaqutissanngorsimassaaq.

Siornatigut kamassarissuunerit pissutigalugu allat ilagiuminaatsittarpaatsit? Inuttut pissutsit tamanna immaqa allaat peqqissutsinnut ajoqutaasimavoq. (Ussatit 14:29, 30) Maannakkulli pissutsit allanngorluinnarsimapput Guutip anersaavata imminut naalakkersinnaalernissannik ikiuinissaa tunaarigakku. — Galâsiamiut 5:22, 23.

Immaqa allatulli ilinnik ajortuliorfiginnissimasunut naakkinnittuliornissat ajornakusoortittarsimavat. Illilli naakkinnittuliorfigineqarnissannik pisariaqartitsingaarfinni qularnanngitsumik allat kukkuneri naammaginiarnerulersimavatit. Asannittumik misiginneqatigineqarlutillu soqutigineqarlutillu naakkinnittuliorfigineqarnerpit qularnanngitsumik paasitissimavaatit aamma illit inoqatitit ajortuliorsimasut peqqissimisulli taamatut pissuseqarfigisariaqaritit. Atugarliornerpit kingunerisaanik pissutsitit iluarinanngitsut iluarsiniarsimagukkit taava misilinneqarnerit taamaalillutit iluaqutigisimassavat. Paasisimassavat ’naakkinnittoq siooranani eqqartuutitikkiartortartoq’. — Jâko 2:13; Matîuse 5:7.

Taavami ilagiinnit kristumiunit perorsaatissinneqarsimaguit tamatumalu kingunerisaanik kiffartuutitit immikkut pisinnaatitaaffiusut allanillu ataqqineqarnerit annaasimallugit? Nikallussanngilatit. Unioqqutitsisut ilungersortumik oqaanneqartarput ilagiit minguitsuujuaqqullugit, aammali unioqqutitsisut anersaakkut ingerlallualeqqissinnaaqqullugit. Nassuerutigisariaqarpoq ’perorsaammik pineqarneq atortillugu nuannertarinngimmat, qiimanaatsuullunili; kingornali eqqissinartumik iluarnissamik tassuuna sungiusagaasut pissaannik kingunissaqararaaq’. (Eprîarit 12:11) Naak perorsaatissinneqarneq patitserujussuarnertut misinnarsinnaagaluartoq, iliuuserisimasaminik maniguulluni peqqissimissutiginnittoq neriuutissaarulluinnartanngilaq. Itsaq Israelitoqqami kunngi David ajortuliani pillugit sukannersumik perorsaatissinneqarsimavoq, allamilli isumataarnermik ersersitsisimalluni, kingornalu uppernini asseqanngitsoq pillugu nersualaarneqarpoq. — 2 Samuel 12:7-12; Tussiaat 32:5; Eprîarit 11:32-34.

Misilinneqarnerit inuunermik isiginnittaatsinnut tamarmut sunniuteqarsinnaapput. Immaqa siornatigut inuuninni pingaarnertut anguniagarisimagaluarpatit timikkut pisuussutinik katersuinissat qaffakkiartornissallu, silarsuarmi matumani ataqqisaalerumallutit nuimasumillu inissisimaffeqalerumallutit. Taavali immaqa aningaasatigut atugarliulernerpit imaluunniit pigisannik annaasaqarnerpit kingunerisaanik pingaarnernik pingaarnerutitaqalersimavutit. (Naleqqiuguk Filípimiunut agdlagkat 1:10.) Maannalu paasilersimavat anersaakkut pisuussutit Guutimullu kiffartornermi illernartumi anguniagassat kisimik pilluarnermik piviusumik nalerisimaarnermillu ataavartumik pilersitsisinnaasut.

Jehova tunaariuk

Jehovamut illernartumik kiffartornerit kristumiut upperisaannik akerlilersuisunit qinugisaanermik atuagarliortitaanermillu nassataqarsinnaavoq. Immaqa naqisimaneqartutut misigaatit, misilinneqarnerilli tamanna aamma ajunngitsumik kinguneqarsinnaavoq, tassa uppernerpit nukittunerulerneranik. Nikallujuinnerittaaq qinugisaasunut allanut kajumissaataallunilu nakussatsissutaasinnaavoq. Pissuserissaarninnik isiginnittut Guutimik unnersiutiginnilernissaminnut kajumissisinneqarsinnaapput. Allaat akerlilersortitit tamatuma kingunerisaanik kanngutsissinnaapput pissuserissaarnerillu ataqqilerlugu. — 1 Pîtruse 2:12; 3:16.

Jehovamik tunaarinninneq qinugisaaninni neriuutaarutinnginnissannut iluaqutigissavat. Taassuma oqaasiani erseqqissumik takutinneqarpoq annikilliuutitit atoruminarsisinneqassasut. Taamaakkaluartorli immaqa kissaatigisattut pilertortigisumik taamaalineqarnavianngillat. Oqilisaanneqannginninni ’arajussinak ajunngitsuliortuartariaqarputit’. (2 Tásalûníkamiut 3:13) Misilinneqarnitit nammassinnaajumallugit iluaqutigisinnaasannik periusissarsiortuarit. Neriuutaarulluinnartutut misigiguit „nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa“. (Tussiaat 55:23) Imminut nalliginersuarmik sapiliinnarnak eqqarsaatigisariaqarpat Jehovamik ilisarisimanninneq, taassuma innuttaanut ilaaneq inuunermillu naassaanngitsumik neriugisaqarneq qanoq immikkut pisinnaatitaaffiulluinnartigisut. — Juánase 3:16, 36.

Inuunermi pingaarnerpaaq eqqarsaatinniitittuaannaruk. Ullut tamaasa qinunikkut Jehovamut saaffiginnittarit nikallunnginnissannut nakussatseqqullutit. (Filípimiut 4:6, 7, 13) Atugarliorninnut pisuusunut akiniaanissannik eqqarsaateqarnaveersaartarit. Atukkatit tamaasa Jehovap assaanut tunniuttakkit. (Rûmamiut 12:19) Inuttut pissutsikkut iluarsiartornissat kristumiutullu pissutsinik ineriartortitsinissat ilungersuutigiuaannaruk. (2 Pîtruse 1:5-8) Allat ilinnik isumassuinerannik, aamma utoqqaanertat anersaakkut pisariaqartitatit matussutissinniarlugit asannittumik ikiuinerannik, qujamasuutiginninnerit ersersittaruk. (Eprîarit 13:7, 17) Guutimut aalajaagit, ajugaasup akissarsiassaa siunnerfigiuaannaruk qularinagu allaat toqup immikkut pisinnaatitaaffimmik tamatuminnga arsaarsinnaanngikkaatit. — Juánase 5:28, 29; 17:3.

Massakkut annertuumik aliasuuteqaruit imaluunniit misilinneqaruit ’uummatikkut iluunngarlutit Jehova tunaarisariaqarpat’. Aliasuutitit atugarliuutitillu nuannaarnersuannguukkiartussapput. (Ussatit 3:5, 6; Juánase 16:20) Aliasunneq pilluarnermik taarserneqassaaq Guutip Jobimik pilluaqqusisimanermisut pilluaqqusaatippatit. Massakkut misilinneqarnitit akissarsiassannut naleqqiullugit suunngillat. (Naleqqiuguk Rûmamiunut agdlagkat 8:18.) Nikallujuittuarnerit allanut qiimmassaataassaaq, aammalu kristumiutut pissutsit kusanartut ’inuttaamut’ ilaasut ineriartortinnissaannut iluaqutigissavat. (Evfisumiut 4:23, 24; Kulorsamiut 3:10, 12-14) Apustilip Peterip siunnersuutaata silatuup maleruarneratigut sapiissuseqarit: ’Guutip peqqusaanik anniartut taassumunnga Pinngortitsisumut ilumoortumut tarnitik peqqussavaat ajunngitsuliorlutik.’ — 1 Pîtruse 4:19. (wE 15/5 97)

[Qupp. 30-mi assiliartaq]

Jehova tunaariuk uummatikkut iluunngarlutit

[Qupp. 31-mi assiliartaq]

Jobitut iliorit. Neriuutaarutinngisaannarit