Biibili — atuagaq asseqanngitsoq

SILARSUARMI atuakkat tunineqarnerpaartaannik eqqortumik taaneqarsimavoq. Biibili atuakkanit allanit tamanit atuarneqarnerpaavoq pingaartinneqarnerpaallunilu. Ulloq manna tikillugu biibilit imaluunniit biibilip ilai 4 milliardinngortillugit oqaatsini 2000-init amerlanerusuni naqiterneqarsimapput.

Biibililli siammarsimaneranit soqutiginaateqarneroqisoq tassaavoq Biibili imminut tassaanerarmat Guutip atuakkiaa. „Allakkat tamarmik Guutip sunniineratigut isumassarsiarititaapput,“ apustili kristumiu Paulus allassimavoq. (2 Timûtiuse 3:16, NV) Tamanna qanoq paasisariaqarpa? Oqaaseq ’Guutimit isumassarsiarititaasoq’ (griikerisooq, the·oʹpneu·stos) eqqortumik isumaqarpoq ’Guutimit anersaarfigineqarpoq’. Oqaaseq alla tamatumunnga assingusoq tassaavoq griikerit oqaasiat pneuʹma, „anersaaq“-mik isumaqartoq. Ima paasisariaqarpoq inuit allattut Guutip anersaavanit illernartumit sunnerneqartut, imaluunniit anersaarfigineqartut, taamaattumillu allagaat eqqortumik taaneqarsinnaapput Guutip oqaasianik, inuit oqaasiannik pinnatik. Aap, Biibilimik misissuisut amerlasuut imminut ataqatigiilluarnera, ilisimatuussutsikkut eqqortuunera, allattut ilumoornerat peqqusersuissusiallu, pingaarnerpaamillu, siulittuutit eqquussimanerat tupaallaatigisimavaat — tamakkua tamarmik Biibilimik atuartartut millionilippassuit atuakkap tamatuma inunnit qutsinnerusumik pilerfeqarneranik qularunnaarsissimavaat.a

Kisianni qanoq sukumiitigisumik Guutip Biibilip allanneqarsimanera aqussimavaa? Ilaat isumaqarput oqaatsini tamaasa toqqaannartumik allanneqartissimagai. Allat oqartarput eqqarsaatit Biibilimi allaatigineqartut, oqaatsit pinnagit, allattunut isumassarsiaritiinnarsimagai. Isumassarsisitaanerli assigiinngitsutigut pisinnaavoq, Guutip ’qasseeriarluni assigiinngitsunik siuaasat pruffiititigut oqaluffigisarmagit’. (Eprîarit 1:1; naleqqiuguk 1 Korintumiut 12:6.) Allaaserisami tulliuttumi misissussavavut inunnut 40-t missaanniittunut Biibilimik allattunut Guutip oqaluffiginneriaaserisimasai assigiinngitsut.

[Quppernerup ataani ilanngussaq]