Jehovap piumasaatut iliorput

Arnap silatuup ajunaartoqarnissaq akornuserpaa

ARNAQ silatooq uialu inupiluk — tassa Abigajil Nabalilu. Abigajil „silassorissuuvoq pinnersuullunilu“. (1 Samuel 25:3) Aappariit imminnut tulluarpallaanngitsut taakkua akornanni pisimasut pissutigalugit atii Biibilimi oqaluttuarineqartuni eqqaamajuminartuupput. Takoriartigu.

Ikiuineq taamaattussaannartut isigineqartoq

Ukiuni 1000-kkunni u.n.s. pisimavoq. David Israelikkut kunngissaattut tanitaasimagaluarpoq, naalakkersuinanili qimaasariaqarpoq. Kunngi Saulip aalajangiusimalluinnarpaa David toqussallugu. Taamaattumik David qimaasutut inuusariaqarpoq. Angutit 600-it missaat ilagalugit Paranip inoqajuitsuani, Judap kujataata tungaaniittumi, Sinajip inoqajuitsuata tungaanut sammisumi toqqorpoq. — 1 Samuel 23:13; 25:1.

Tassaniitsillutik angutip Nabalimik atillip savanik paarsisui naammattoorpaat. Nabal Kalebikkuuvoq pisoorsuullunilu, 3000-inik savaateqarluni 1000-inillu savaasaateqarluni. Karmelimi, illoqarfimmi Hebronip kujataaniittumi, immaqa Paranimit 40 kilometerisut ungasitsigisumiittumi, savaatini kissartippai.a Davidip angutitaasalu Nabalip savanik paarsisui ikiorpaat savaatit tillinnianit inoqajuitsumiittartunit illersorlugit. — 1 Samuel 25:14-16.

Taamaalinerani Karmelimi savanik kissaaneq aallartereersimavoq. Tamanna nalliuttorsiorfiusarpoq, soorluttaaq nunaatillit katersuiffik nalliuttorsiorfigisaraat. Aamma tunisiumatuussutsimut piffissaavoq, savaatillit sulisutik akilertarmatigik. Taamaattumik David innimiilliunngilaq angutit qulit Karmelimut aallartikkamigit Nabal nerisassanik qinnuigeqqullugu savanik paarsisuisa ikiorneqarsimanerannut taartissatut. — 1 Samuel 25:4-9.

Nabalili tunisiumatoorpalaanngeqisumik qisuariarpoq. „Daavi taanna kinaagami?“ massuarujuppoq. David angutaalu tassaanerarlugit inussiat qimaasimasut ima aperivoq: „Iffiaatikka [imissaatigalu, NV] aammalu nersutaatikka kissaasinnut pisassaritillugit toqutakka inunnut sumit pisuuneri nalusannut tunniutissanerpakka?“ Davidip tamanna tusaramiuk angutitani oqarfigai: „Tamassi panasi qitissinnut ivertissigit.“ Angutit 400-it missaat sorsunnissamut piareersalerput. — 1 Samuel 25:10-13.

Abigajilip silatussusia

Abigajilip, Nabalip nuliata, paasivaa Nabal kusanaatsumik oqaaseqarsimasoq. Immaqa aamma siornatigut iliuuseqartareersimavoq Nabal pisuulluni eqqissiviilliortoqalernerani. Abigajil iliuuseqarasuarpoq. Nabal oqarfiginagu tunissutissat katersorpai — ilaatigut savat tallimat nerisassarpassuillu — inoqajuitsumukarlunilu David ornillugu. — 1 Samuel 25:18-20.

Abigajilip David takuleramiuk nunamut pallorpoq. „Nabal taanna inupiluusoq soqutigissanngilat, naalagara,“ taama qinnuigaa. „Pajugutikka kiffannut ilagisannut tunniunneqarlit, naalagara.“ Nangillunilu oqarpoq: „Taava [Nabalip iliorsimanera pissutigalugu] pinerluuteqanngitsut aavannik asuliinnaq kuisisimanermik imminullu akiniussimanermik ileratsaatissaqassanngilatit.“ Abigajilip David peqqissimissutigisinnaasaminik iliornissaanut mianersoqquaa. — 1 Samuel 25:23-31.

Davidip Abigajil tusarnaarpaa. „Qujanaq silatusaallaqqissuugavit; illimmi qujanarsigit ullumi aammik kuisinissaraluara imminullu akiniunnissaraluara pinngitsoortikkakkit,“ taama oqarfigaa. „Tuaviinnaq ornissimanngikkaluarumma aqagu qaalernissaanut Nabalip angutitai ataatsimilluunniit amiakkoqartitaassanngikkaluarput.“ — 1 Samuel 25:32-34.

Uagut ilinniutigisinnaavarput

Oqaluttuap Biibilimeersup tamatuma takutippaa arnat Guutimut tunniusimasut pisariaqaraangat iliuuseqarnissaat eqqunngitsuliornerunngitsoq. Abigajil uimi, Nabalip, kissaatigisaanut akerliusumik iliorpoq, Biibilimili iliornera avoqqaarineqanngilaq. Akerlianik arnatut silatuutut sianissuseqarluartutullu nersorneqarpoq. Pissutsini najummassimanartuni iliuuseqarami Abigajilip inuppassuit annaappai.

Amerlanertigut nuliaasoq Guutimut tunniusimalluni uiminut naalatsigitittariaqarpoq, najoqqutassialli naapertuilluartut pineqaraangata uini isumaqatiginngissinnaavaa. Soorunami ’anersaaq piuaatsoq sallaatsorlu’ pigisariniartariaqarpaa, akerliuniarnermillu, pingaarniarnermit pikitsitsiniarnermillu iliuuseqarnani. (1 Pîtruse 3:4) Nuliaasoq Guutimut tunniusimasoq silatusaanngitsumik imaluunniit Biibilip najoqqutassiaanut akerliusumik iliornissaminut pinngitsaalineqarusunngilaq. Aap, Abigajil pillugu oqaluttuap takutilluarpaa Biibilip, inuit ilaasa oqartarnerigaluattut, arnat inussiatut inissisimaffeqartinngikkai.

Aamma imminut naalakkersinnaaneq eqqarsaatigalugu oqaluttuaq ilinniutigisinnaavarput. Ilaannikkut Davidip pissuseq tamanna ersersilluartarpaa. Assersuutigalugu, kunngi Saul akiniaajumatooq toqukkumanngilaa, taamaaliornissaminut periarfissaqaraluarluni taamaaliorunilu eqqissisinnaassagaluarluni. (1 Samuel 24:2-7) Tamatumunnga akerliusumik, Nabalip mitallerluni itigartimmani, David nununani akiniaalerpoq. Tamanna kristumiunut mianersoqqussutaavoq, taakku ’ajortumik iliortoq ajortumik akilinnginnissaanut’ kajumissaarneqarmata. Tamatigut Paulusip siunnersuutaa maleruartariaqarpaat: ’Ajornanngippat sapinngisassinnik inuit tamaasa eqqissiveqatiginiarsigik. Nammineq akiniaaqinasi, asasakka, kamannerli assaarsiuk.’ — Rûmamiut 12:17-19. (wE 1/7 97)

[Quppernerup ataani ilanngussaq]

[Qupp. 9-mi assiliartaq]

Abigajilip David pajuppaa