Guutip ikinngutigaatit? — Qinnutikkut suna ersertarpa?
INUNNIK marlunnik oqaloqatigiittunik nalaatsornikkut tusarnaarnikuit? Taamaappat qularnanngitsumik sivitsunngitsoq paasivat qanoq ittumik imminnut attaveqartut — qanigisariinnersut imminnulluunniit takornarnersut, ilisarisimasariiginnarnersut imaluunniit qanimut ikinngutigiilluartuunersut. Tamatumunnga assingusumik qinusarnitsigut paasineqarsinnaavoq qanoq ittumik Guutimut attaveqarnersugut.
Biibilimi erseqqissarneqarpoq Guuti ’tamatsinnit ungasinngikkaluaqisoq’. (apustilit suliait 17:27) Taassuma kajumissaarpaatigut ilisarisimalerniaqqulluni. Allaammi taassumunnga ikinngutaalersinnaavugut. (Tussiaat 34:9; Jâko 2:23) Taassumunnga qanittuararsuarmik attaveqalersinnaavugut! (Tussiaat 25:14) Guutimut attaveqarnerput uagut inuit naammalluinnanngitsut pigilersinnaasatta naleqarnerpaartaraat. Ikinngutigiinnerpullu Jehovap pingaartittorujussuuaa. Tamanna ersarippoq, taassumunngami ikinngutaanitsinnut tunngaviuvoq ernituanut, uagut pilluta inuunerminik pilliuteqarsimasumut, uppernerput. — Kulorsamiut 1:19, 20.
Taamaattumik qinusarnitsinni Jehovamut asanningaarnerput taassumunngalu qujamasunnerput ersertariaqarput. Taamaakkaluartorli ilaannikkut misigineq ajorpit qinunerit ataqqinnippalukkaluarluni qamanngavik pisutut inngitsoq? Tamanna qaqutigoortuunngilaq. Tamanna qanoq ililluni iluarsineqarsinnaava? Jehova Guutimut ikinngutaanerup nukittorsarneratigut.
Qinusarneq piffissaqarfigiuk
Ikinngutigiinneq nukittorsarneqarlunilu ineriartortinneqassappat piffissaq pisariaqarpoq. Immaqa ulluinnarni inuppaaluit ilassillugillu oqaloqatigisarpatit — sanilitit, suleqatitit, bussimik ingerlatitsisut pisiniartitsisullu. Tamannali isumaqanngilaq inuit naapittakkatit tamakku ikinngutigigitit. Ikinngutigiinneq ineriartortarpoq inuit marluk oqaloqatigiilluartaleraangata, soqutaarpianngitsut kisiisa pinnagit aammali misigissutsitik uummammiutillu ilanngullugit eqqartortaleraangatigik.
Taamatuttaaq qinusarnerup Jehovamut qanillinissatsinnut ikiortarpaatigut. Tamatumunngali piffissaq naammattoq atortariaqarpoq; nerilernermi qujapallaannarnermit annerusoq pisariaqarpoq. Jehova oqaloqatigisarnerujartortillugu misigissutsitit, pissutiginiakkatit iliuutsitillu paasisinnaanerujartussavatit. Ajornartorsiutinut aaqqikkuminaatsunut aaqqiissutissat takkukkiartuaartarput Guutip anersaavata najoqqutassiat taassuma oqaasianiittut eqqaasiortuleraangagit. (Tussiaat 143:10; Juánase 14:26) Qinutillutillu Jehova piviusuunerujartussaaq, taassumalu ilinnik asannittumik soqutiginninnera isumassuineralu paasiartussavatit.
Ingammik tamanna paasinerulissavat qinnutitit akineqarpata. Tassami Jehova ’qinnutigisavut sianigisavullu tamaasa akimungaarlugit pissaanini uatsinni sunniisoq missiliorlugu annerungaartumik iliorsinnaavoq’. (Evfisumiut 3:20) Tamanna isumaqanngilaq Guuti illit iluaqutissannut tupinnartuliussasoq. Kisianni oqaatsini, inussiap aalajaallunilu silatuup atuagassialiai qatanngutillu angutit arnallu asannittut aqqutigalugit pisariaqartunik siunnersorlutillu unnersuussinnaavaatit. Imaluunniit ussernartup akiornissaanut pisariaqartumik nakussatsissinnaavaatit. (Matîuse 24:45; 2 Timûtiuse 4:17) Misigisat taama ittut uummativut Ikinngutitsinnut qilammiusumut qujamasunnermik ulikkaartarpaat!
Taamaattumik qinunissamut piffisaqartariaqarpoq. Ulluni ulapaarfioqisuni makkunani piffissaqarniarneq ajornakusoortaraluaqaaq. Inummilli soqutiginnilluinnaraangatta piffissaqarfiginiartarparput. Malugiuk tussiaasiortoq qanoq imminut oqartoq: „Soorlu tuttu kuunnut imilinnut kajungertoq, taamatut kajungeraakkit Guuti. Tarniga kajungerpoq Guutimut, Guutimut uumasumut. Qaqugumitaava Guutip kiinaa takusinnaassavara?“ (Tussiaat 42:2, 3) Guutimik oqaloqateqarnissat taamatut kajungeritigaajuk? Taamaappat piffissaqarfiginiartarniaruk! — Naleqqiuguk Evfisumiut 5:16.
Assersuutigalugu, ullaakkut makiaartalersinnaavutit qinunissannut piffissaqarumallutit. (Tussiaat 119:147) Ilaannikkut unnuakkut sinissaaruttarpit? Taamaappat tussiaasiortutut iliorlutit tamanna isumakuluutivit Guutimut saqqummiunnissaannut periarfissatut atortarsinnaavat. (Tussiaat 63:7) Immaqaluunniit ullormut arlaleriarlutit naatsunnguakkuutaanik qinunissamut periarfissaqarputit. Tussiaasiortoq Guutimut ima oqarsimavoq: „Ilinnut torlulasarpunga ulloq naallugu.“ — Tussiaat 86:3.
Qinusarnerit pitsanngorsaruk
Aammattaaq ilaannikkut pisarnermit sivisunerusumik qinusarneq iluaqutigissavat. Immaqa naatsumik qinunermi soqutaavallaanngitsut eqqartoqqajaanartarput. Sivisunerusumilli qamanngalu pisumik qinuguit eqqarsaatitit uummammiutillu oqaatigiuminartinnerussavatit. Jesus ilaanni unnuaq naavillugu qinusimavoq. (Lúkarse 6:12) Tuaviupiluttumik pisanngikkuit qularnanngivissumik qamannga pinerusumik imaqarnerusumillu qinusassaatit.
Tamannali isumaqanngilaq immikkut ittunik uummammioqanngikkaanni suulluanngitsut qinunermi eqqartuinnarneqarsinnaasut; aamma isumaqarluanngitsunik uteqattaarisariaqanngilagut. Jesus ima mianersoqqusisimavoq: ’Qinusaraangassi oqaatsisi Guutimik nalusutut amerlanaassanngilasi, taakku amerlasuunik oqaaseqaraangamik tusarneqassasorisarmata. Taamaattumik taakkunatut iliussanngilasi, Ataatassi ajorsaatisi ilisimammagit qinnuiginngikkallartilluni.’ — Matîuse 6:7, 8.
Qinunnginnitsinni suut eqqartussanerlugit eqqarsaatigeqqaartarutsigu qinnutivut imaqarnerulissapput. Qinunitsinni eqqaasinnaasavut amerlaqaat — kiffartornitsinni nuannaarutivut, sanngiissutivut kukkussutivullu, pakatsissutivut, aningaasatigut isumakuluutivut, suliffitsinni atuarfimmiluunniit tatineqarnivut, ilaquttatta ajunngitsumik ingerlanissaat ilagiillu ilaaffigisatta anersaakkut ingerlalluarnissaat, ilaannaat taassagaanni.
Ilaannikkut qinutillutit eqqarsaatitit allamut saaqqajaasarpat? Taava eqqarsarluartarnissat sulissutiginiarsariniaruk. Jehova ’qinnutitta maluginissaannut’ piumassuseqarpoq. (Tussiaat 17:1) Uaguttaaq qinnutitta eqqumaffigilluartarnissaat ilungersuutigisariaqannginnerparput? Aap, ’anersaap pii kajungerisariaqarpavut’, eqqarsaativullu allamut sangoqqajaatippallaarnaveersaartarlugit. — Rûmamiut 8:5.
Aammattaaq Jehovamut saaffiginneriaaserput pingaaruteqarpoq. Naak imminut ikinngutitut isigeqqugaluartoq puiunngisaannartariaqarparput tassaammat qilammi nunamilu Naalagaanerpaaq. sarĸúmersitat kapitaliisa sisamaanni tallimaannilu eqqartorneqartut ataqqinarpalungaartut atuarlugillu eqqarsaatigeqqissaarniartigik. Tassani allaatigineqarpoq qinunikkut saaffigisartakkatta angingaassusianik Johannesip takorruuisitaanera. ’Issiavissaarsuarmi issiasumut’ sassarsinnaanerput taassumanngalu ilassineqarsinnaanerput immikkut pisinnaatitaaffiulluinnarpoq! Taamaattumik asuleerpaluttumik innimiippaluttumillu nipeqarluta saaffiginngisaannartariaqarparput. Ilungersuutigiuartariaqarparput ’qanitta oqaasiisa uummatittalu eqqarsaataasa Jehovami iluarinarnissaat’. — Tussiaat 19:15.
Erseqqissartariaqarporli oqallorissaarnitsigut Jehova ajasoortinnaviannginnatsigu. Ataqqinnippalulluta qamannga pisumik qinnutivut iluarisarpai, qanorluunnit pilimarpasinngitsigisumik oqaatigigaluaraangatsigik. — Tussiaat 62:9.
Annikilliorfimmi tuppallersarneqarneq paasineqarnerlu
Ikiorneqarnissatsinnik tuppallersarneqarnissatsinnillu atorfissaqartitsigaangatta qanimut ikinngutitsinnut annertoqqusersuillunilu misiginneqataasinnaasumut saaffiginnittarpugut. Ikinngummilli allamik Jehovatulli attaveqarfigiuminartigisoqanngilaq. Taanna ’isumannaatsumik ikiuisigaarput annikilliornartuni tamani’. (Tussiaat 46:2) Guutip ’tamanik tuppallersaasuugami’ atortariaqakkavut allanit tamanit paasinerusarpai. (2 Korintumiut 1:3, 4; Tussiaat 5:2; 31:8) Annertuumillu annikilliortunut piviusumik misiginneqataassuseqarpoq. (Jesaja 63:9; Lúkarse 1:77, 78) Jehova ikinngutitut paasinnittutut isigigutsigu misigissutsitta ilorlerpaat nanertigisimassutittalu oqaatiginissaat ajornakusoortinnavianngilarput. Taamaalilluta nammineerluta misigisarparput qanoq Jehovap ’tuppallersaanera nuannaalersitsisartoq’. — Tussiaat 94:18, 19.
Immaqa ilaannikkooriarluta Guutimut palligunnissatsinnut qinngaqqunnartutut misigisarpugut arlaannik kukkussuteqarsimanerput pissutigalugu. Qanorli qisuariassavit qanimut ikinngutivit ilaata eqqunngitsuliorfigisimappatit isumakkeerfigeqqullunilu qinnuigalutit? Ikinngutit tuppallersarlugulu eqqissisassannginnerpiuk? Taava ilimagissannginnerparput aamma Jehova taamaaliussasoq? Ikinngutimi ilai inuttut naammalluinnanngissutsimik kingunerisaanik ajortuliortut isumakkeerfigingaartarpai. (Tussiaat 86:5; 103:3, 8-11) Tamanna nalunnginnatsigu ajortuliatta taassumunnga anngiiaatiginissaannut tunuarsimaassanngilagut; qularinngissinnaavarput asannillunilu naakkinnittuusoq. (Tussiaat 51:19) Kukkuluttorsimanerput pissutigalugu nikallungagutta oqaatsit Juánasip agdlagai sujugdlît 3:19, 20-mi allassimasut tuppallersaatigisinnaavavut: ’Tamatumanngalu nalujunnaassaagut sallusuissummit pisugut, taavalu uummativut taassuma saani tuppallersarsinnaavavut, uummatitta pillagassaatikkaluarpatigut Guuti uummatitsinnit annerummat suullu tamaasa ilisimallugit.’
Imaanngilarli aatsaat annertuumik annikilliuleraangatta Guutip asannittumik isumassuinera malugisinnaagipput. Anersaakkut misigissutsikkullu atugarissaarnissatsinnut attuumassuteqartut tamaasa Jehovap soqutigai. Isumaqanngisaannartariaqarpugut misigissutsivut, eqqarsaativut isumakuluutivullu ima suunngitsigigamik taassumunnga qinunitsinni eqqaasariaqanngitsut. (Filípimiut 4:6) Qanimummi ikinngutivut ilagigaangatsigik inuunitsinni naapitavut pingaartorsuit kisiisa eqqartortarnerpavut? Aamma pingaannginnerusut eqqartortannginnerpavut? Inuunitsinni sumulluunniit attuumassuteqartut Jehovamut eqqartornissaannut nangaasariaqanngilagut, qularinagu ’isumassussagaatigut’. — 1 Pîtruse 5:7.
Imminuinnaavik oqaluuserisaraanni ikinngutigiinneq qularnanngitsumik sivisuumik atanavianngilaq. Qinnutivuttaaq uagutsinnuinnaq tunngasariaqanngillat. Jehovamik asanninnerput taassumalu soqutigisaanik eqqarsaatiginninnerput eqqaasariaqarpavuttaaq. (Matîuse 6:9, 10) Qinuneq Guutimut ikioqqulluni qinunissamut taamaallaat periarfissaanngilaq, aamma taassumunnga qujanissamut unnersiutiginninnissamullu periarfissaavoq. (Tussiaat 34:2; 95:2) Nammineq aalajangersimasumik atuaqqissaartarutta Jehova taassumalu aqqutigeqqusai ilikkarnerulissavavut. (Juánase 17:3) Qularnanngitsumik iluaqutigissaqaat Tussiaatit atuassallugit, maluginiarlugulu qanoq kiffat aalajaatsut Jehovamut qinusarsimasut.
Jehovamik ikinnguteqarneq erlinnartorujussuuvoq. Tamatuminnga pingaartitsinerput ersersittarniartigu inuppalaarnerusumik qamanngalu pinerusumik qinusarnitsigut. Taava pilluarneq tussiaasiortup ima oqaatigisaa misigissavarput: ’Pilluarpoq qinikkat palliguteqqusat.’ — tugsiautit 65:5. (wE 1/7 97)