Jehovap peqatigiissortai ilumoorfiginnilluta kiffartoqatigisigik
„Ilumoorfiginnittutut iliortarputit ilumoorfiginnittumut.“ — 2 SAMUEL 22:26, NV.
1, 2. Qatanngutitta angutit arnallu ilumoorfiginninnerat ilagiinni qanoq ersertarpa?
UNNULLUINNALERSOQ utoqqaanertap kristumiut ataatsimiinneranni oqalugiaatissani piareersarpaa. Uniinnarusussinnaagaluarpoq eqqissisimaarlunilu; tamatumunngali taarsiullugu Biibilimi maligassaalluartunik assersuutinillu, tusarnaartussat uummataannik attuisinnaasunik qiimmassaataasinnaasunillu, ujarlernini ingerlatiinnarpaa. Ullup ataatsimiiffiusussap unnukkuani angajoqqaat qasusimaqisut angerlarsimaannarusussinnaagaluarput qasuersaarlutillu; tamatumunngali taarsiullugu naammagittarlutik meeqqatik ataatsimiigiarnissaminnut pikitippaat ataatsimiigiarlutillu. Ataatsimiinnerup kingorna kristumiorpaaluit utoqqaanertap oqalugiaataa oqallisigaat. Qatanngut arnaq utoqqaanertap taassuma imminut ajuallatsitsinikuunera eqqaassallugu ussernartorsiuleraluarpoq; tamatumunngali taarsiullugu saqqummiussaasa ilaat nuannaarutigalugu eqqartulerpaa. Pineqartut taakkua tamarmik suna assigiissutigaat?
2 Pisuni tamakkunani tamani ilumoorfiginninneq malunnarpoq. Utoqqaanertap Guutip savaatai ilumoorfiginnilluni kiffartuuppai; angajoqqaat ilumoorfiginnillutik ilagiit ataatsimiinnerannut ornigupput; qatanngutip arnap ilumoorfiginnilluni utoqqaanertat tapersersorpai. (Eprîarit 10:24, 25; 13:17; 1 Pîtruse 5:2) Aap, Guutip innuttaasa inuunerminni sutigut tamatigut aalajangiusimavaat Jehovap peqatigiissortai ilumoorfiginnillutik kiffartoqatiginiarlugit.
3. Sooq Jehovap peqatigiissortaanut ilumoorfiginninnissarput taama pingaartigaa?
3 Jehovap silarsuaq ajortunngorsimasoq manna qimerlooraangamiuk ilumoorfiginninneq annikeqisoq takusarpaa. (Mika 7:2) Taamaattumik innuttami ilumoorfiginninnerat takugaangamiuk nuannaartarsimassaqaaq! Aap, illittaaq ilumoorfiginninnerit taassumunnga nuannaarutaasarpoq. Akerlianilli Satanip, aallaqqaataanilli pikitsitsisup, kamaatigisaqaa, sallutuujunini uppernarsartarmagu. (Ussatit 27:11; Juánase 8:44) Ilimagissavat Jehovamut taassumalu nunarsuarmi peqatigiissortaanut ilumoorfiginninnerit Satanip aserorniarsarissagaa. Tamatumani Satanip periaasii sammilaariartigik, paasisinnaaleqqullugu qanoq iliorluta naggatissaq tikillugu ilumoorfiginnittuaannarsinnaasugut. — 2 Korintumiut 2:11.
Naammalluinnanngissutinik isiginninniarpallaarneq ilumoor- figinninnermik aseruisinnaavoq
4. (a) Sooq akisussaassuseqartitaasunut iluaaginnittumik isiginneqqajaanissaq taama ajornanngitsigisarpa? (b) Korap Jehovap peqatigiissortaanut ilumoorfiginninnginnera qanoq ililluni erserpa?
4 Qatanngutip angutip akisussaaffeqalersup kukkuneri ersarinnerulersutut issinnaasarput. Ajornanngitsuararsuusarpoq ’qatanngutip issiutaata’ isornartorsiornissaa ’paakkarut’ nammineq isimiittoq takunagu! (Matîuse 7:1-5) Kukkussutinilli isiginninniaannarneq ilumoorfiginnikkunnaarnermik kinguneqarsinnaavoq. Tamanna paasilluarsinnaanerujumallugu Korap Davidillu assigiinngissutaat eqqarsaatigeriartigu. Kora annertuumik akisussaaffeqarsimavoq, qularnanngitsumillu ukiorpassuarni ilumoorfiginnissimalluni, ataqqinaateqarumatuunngorsimavorli. Illumi, Mosesip Aronillu, oqartussaanerat akerlilersulerpaa. Naak Moses inunnit tamanit anneruniajuinnerpaagaluartoq qularnanngitsumik Korap kukkunersiulersimavaa. Qularnanngitsumillu kukkunernik Mosesimi takusassaqarpoq. Taamaakkaluartorli Mosesip kukkunerisa Korap Jehovap peqatigiissortaanut ilumoorfiginninnginnera eqqortunngortinngilaa. Taamaattumik ilagiit akornannit piiagaavoq. — 4 Moses 12:3; 16:11, 31-33.
5. Sooq Davidip Saulimut pikitsitsinissani ussernartorsiorfigisinnaasimagaluarpaa?
5 Akerlianilli David kunngimut Saulimut kiffartortuusoq allatut isiginnittaaseqarsimavoq. Saul kunngiusimagaluarpoq ajunngitsoq, ajortunngorsimavorli. Saulip sinngasup saassusisarneri anigorsinnaajumallugit Davidip uppissuseq, nikallujuissuseq allaallu periataallaqqissuseq pisariaqartippai. Akiniaanissamulli periarfissaqaleraluaramiluunniit David oqarpoq Jehovamik ataqqinninnini pissutigalugu Jehovap tanitaanut ilumuunngitsuliorumanngilluinnarluni. — 1 Samuel 26:11.
6. Naak utoqqaanertat kukkunernik sanngiissutinillu nassaarfigisaraluarlugit qanoq iliunngisaannartariaqarpugut?
6 Akornatsinni siuttuusut ilaat naliliinerliorpat, sakkortuunik oqaaseqarpat nakerisarsiorsorinarpalluunniit naammagittaalliussanerpugut, immaqa ilagiinni anersaamik isornartorsiuerpaluttumik siuarsaalluta? Akerliussutsimik takutitsiniarlutalusooq ataatsimiigianngitsuussaagut? Soorunami naamik! David assigalugu allat kukkussutaat Jehovamut taassumalu peqatigiissortaanut ilumoorfiginnikkunnaarnissamut pissutaatinngisaannassavavut! — Tussiaat 119:165.
7. Naalaffimmi Jerusalemimiittumi pissutsit qanoq ajortunngorsimappat, tamannalu Jesusip qanoq isumaqarfigaa?
7 Inuit ilumoorfiginninnikkut maligassaalluartut annersaat tassaavoq Jesus Kristus, siulittuutaasumik tassaanerarneqartoq ’Jehovamut unneqqarissoq’, imaluunniit Jehovap ilumoorfiginnittoqutaa. (Tussiaat 16:10) Jerusalemimi naalaffimmi atornerluinersuaq immaqa Jesusip ilumoorfiginninnermigut annertuumik misilinneqaatigisimassavaa. Nalunngilaa palasiunertut sulineq pilliuteqartarnerlu nammineq kiffartornerminut pilliutitullu toqunissaminut siumut assersuutaasut, nalunngilaalu inuit tamakkunannga ilinniarfiginninnissaat qanoq pingaarluinnartigisoq. Taamaattumik eqqortumik pilluni kamattorujussuuvoq takugamiuk naalaffik ’ujajaaffinngorsimasoq’. Guutimit pisussaatinneqarluni naalaffik minguiarpaa.a — Matîuse 21:12, 13; Juánase 2:15-17.
8. (a) Jesusip naalaffimmik aaqqissuussamut ilumoorfiginninnini qanoq ililluni ersersippaa? (b) Qanoq ililluta takutissinnaavarput Jehovap peqatigiissortai minguitsut peqatigalugit taassuminnga pallorfiginninnerput pingaartillugu?
8 Jesusilli naalaffimmik aaqqissuussaq ilumoorfiginnilluni tapersersortuarpaa. Meeraanerminiilli naalaffimmi nalliuttorsiornernut peqataasarsimavoq tassanilu ajoqersuisarsimalluni. Allaallu naalaffimmut akileraarummik akileraartarpoq, naak pinngitsoorani taamaaliortussaatitaanngikkaluarluni. (Matîuse 17:24-27) Jesusip uillarneq aningaasanik ’inuutissarsiutissaraluaminik tamanik’ nakkaatitsivimmut ilisisoq nersualaarsimavaa. Tamatuma kingunitsianngua Jehovap naalaffik tamanna ataavartumik ajattorpaa. Tamatumali pinnginnerani Jesusip naalaffik ilumoorfigiuarpaa. (Mákorse 12:41-44; Matîuse 23:38) Ullumikkut Guutip peqatigiissortai itsaq juutit aaqqissuussaanerannit naalaffiannillu pingaarnerujussuupput. Soorunami naammalluinnartuunngillat; tamannalu pissutigalugu ilaanneeriarluni allannguisoqartarpoq. Kisianni peqquserlunnermik sunnersimaneqanngillat, aammalu Jehova Guutip allanik taarsilersaanngilai. Guutip peqatigiissortaani naammalluinnanngissutinik malugisaqaraangatta ajuallassimalinngisaannartariaqarpugut imaluunniit isornartorsiuerpaluttumik ajorinnippaluttumillu pissuseqalinngisaannartariaqarluta. Tamatumunngalu taarsiullugu Jesus Kristusip ilumoorfiginnissusia malittariaqarparput. — 1 Pîtruse 2:21.
Nammineq naammalluinnanngissutivut
9, 10. (a) Pissutsit aaqqissuussaanerata Satanimut atasup qanoq ililluni naammalluinnanngissutivut atorlugit ilumoorfiginnikkunnaarsinniartarpaatigut? (b) Annertuumik unioqqutitsisimagaanni qanoq iliortariaqarpa?
9 Satanip ilumoorfiginnikkunnaarsinniartarpaatiguttaaq naammalluinnanngissutivut atorlugit. Pissutsit aaqqissuussaanerat taassumunnga atasoq sanngiissutitsinnik sunniiniartuuvoq Jehovallu isaani eqqunngitsumik iliornissatsinnik ussiiniartarluni. Ajoraluartumillu ukiut tamaasa tuusintilikkuutaat kanngunartuliornermut nakkaannartarput. Tamannalu ilallugu ilaat marloqiusamik inuusarput, kristumiutut aalajaatsumik ingerlasuusaajutigalutik eqqunngitsumik inooriaaseqarlutik. Atuagassiami Iteritsi!-mi ilanngutassiani „Inuusuttut aperipput“-mik taaguutilinni allaaserisat tamatumunnga tunngasut pillugit arnaq inuusuttoq ima allassimavoq: „Soorlumi tassa uanga inuunera allaaserineqaannartoq.“ Taanna inuusuttunik Jehovamik asanninngitsunik isertortukkut ikinngusersortalersimavoq. Qanoq kingunilimmik? Ima allappoq: „Ajortorujussuarmik ingerlalerpunga, kanngunartuliorpungalu ilungersortumillu oqaanneqartariaqarlunga. Jehovamut attaveqarnera aseroraluarpoq, aammalu angajoqqaama utoqqaanertallu uannik tatiginninnerat annaagaluarpara.“b
10 Arnaq inuusuttoq taanna utoqqaanertanit ikiorneqarpoq ilumoorfiginnillunilu Jehovamut kiffartuleqqilluni. Ajoraluartumilli amerlaqisut ajornerusunik kinguneqartitsisarput, ilaallu ilagiinnut uteqqinngisaannarput. Taamaattumik pitsaaneroqaaq ilumoorfiginnittuaannassalluni silarsuarmilu ajortumi matumani ussernartut naaggaassallugit! Napasuliaq Alapernaarsuiffik-mi Iteritsi!-milu mianersoqqussutit silarsuarmi ikinngusersornermut aliikkutassianullu ajortunut tunngasut tusaaniartakkit. Ilumoorfiginninngitsumik pissusilersulinngisaannarnissat aalajangiusimajuk! Taamaaliulissagaluaruillu, qanoq ittorpiaanerit isertorniaqinagu. (Tussiaat 26:4) Ikiortissarsiorit. Angajoqqaavit kristumiuusut utoqqaanertallu ikiorusussaqaatsit. — Jâko 5:14.
11. Sooq neriuutissaarulluinnartutut imminut isigissalluni kukkunerua, Biibilimilu assersuutissap suup imminut allatut isigilernissatsinnut ikiorsinnaavaatigut?
11 Naammalluinnanngissutitta allatiguttaaq ulorianartorsiortissinnaavaatigut. Ilumoorfiginninngitsumik iliuuseqartut ilaasa Jehovap iluarisaanik iliorniarsarinertik unitsilluinnartarpaat. Eqqaamajuk David ajortorujussuarnik ajortuliorsimammat. Taamaakkaluartorli toqunerata kingunerujussuatigut Jehovap kiffatut aalajaatsutut eqqaasimavaa. (Eprîarit 11:32; 12:1) Sooq? Jehovap iluarisaanik iliorniarsarinini unitsinngimmagu. Ussatit 24:16-imi allassimavoq: „Iluartoq arfineq-marloriarluni orlusinnaasaraluarpoq nikueqqittarlunili.“ Sanngiissut akiugarput pissutigalugu annertunngitsumik ajortuliortooraluarutta — aap, ajortuliortooqattaaraluaruttaluunniit — Jehovap isaani iluartuujuassaagut ’nikueqqittuaannarutta’, tassa ilumoorluta peqqissimigutta ilumoorfiginnillutalu Jehovamut kiffartornerput ingerlatiinnarutsigu. — Naleqqiuguk Korintumiunut agdlagkat áipait 2:7.
Ilumoorfiginninnginneq peqqusersooq mianersorfigiuk
12. Farisiiarit sukannersumik inatsisinik maleruaasitsiniarnersuat qanoq ililluni ilumoorfiginnikkunnaarnerannik kinguneqarpa?
12 Ilumoorfiginninnginneq peqqusersuumik aamma saqqumisinnaavoq. Allaammi ilumoorfiginninnertut isikkoqarsinnaavoq. Jesusip nalaani farisiiarit qularnanngitsumik ilumoorfiginnilluinnartutut imminnut isigipput.c Kisianni ilumoorfiginninnerup inuillu maleruagassiaannik pinngitsuuinnani maleruaaniarnerup akornanni assigiinngissut takusinnaanngilaat, uteriitsuullutillu eqqartuussiumatoorujussuugamik. (Naleqqiuguk Nalunaajaasup oqaasii 7:16.) Taamaalillutilli inunnut kiffartuussassaraluaminnut, inatsisit ilinniartitsissutiginerakkamik anersaavannut Jehovamullu namminermut ilumoorfiginninngillat. Akerlianilli Jesus Inatsisit, asanninnermik tunngaveqartut, anersaavannut ilumoorfiginnippoq. Taamaattumik inunnut ineriartornartumik kajumissinartumillu pissuseqartarpoq taamaalillunilu Messiasimik siulittuutit eqquutsillugit. — Jesaja 42:3; 50:4; 61:1, 2.
13. (a) Kristumiut angajoqqaat qanoq ilillutik ilumoorfiginninnginnermik ersersitsisinnaappat? (b) Sooq angajoqqaat meeqqanik perorsaanerminni sukannerpallaarnaveersaartariaqarpat, isornartorsiuigajunnatillu nuanniitsumik isumaqarnaveersaartariaqarpat?
13 Kristumiut akisussaaffilerneqarsimasut tamatumunnga atatillugu Jesusip maligassiaa malissagunikku iluaqutigissavaat. Assersuutigalugu, angajoqqaat ilumoorfiginnittut nalunngilaat meeqqatik perorsaatissittariaqartassallugit. (Ussatit 13:24) Taamaakkaluartorli meeqqamik kamassaartannginnissaat qulakkeerniartarpaat sukannerpallaamik kamannerminniluunniit perorsaatissinnaveersaartarnerisigut imaluunniit isornartorsiortuarnaveersaartarnerisigut. Meeqqat nikallorlutillu upperisamit ilumoortumit nigorsinnaapput misigigunik angajoqqaamik iluarisaannik iliorsinnaanngilluinnarlutik, imaluunniit angajoqqaamik Guutimik pallorfiginneriaasiat taakkuninnga ajortumik isiginnittaaseqalersitsisimasoq isornartorsiuiniaannartunngortitsisimallunilu. — Kulorsamiut 3:21.
14. Kristumiut paarsisut qanoq ersersissinnaavaat paarsaminnut ilumoorfiginnillutik?
14 Aammattaaq kristumiut utoqqaanertat nakkutilliisullu angalasartut ’savaatit’ ajornartorsiutaannik navianartorsiorfigisaannillu eqqumaffiginnittarput. ’Paarsisutut’ ilumoorfiginnittutut pisariaqaraangat unnersuussisarput, taamaaliunnginnerminnili qulakkeerniaqqaartarpaat ilisimasariaqakkatik tamaasa paasisimanerlugit, oqaatsitillu Biibilimik Peqatigiiffiullu atuagassiaataanik peqqissaartumik tunngaveqartinniartarpaat. (Tussiaat 119:105; Ussatit 18:13) Nalunngilaattaaq ’savat’ ineriartortinneqarnissamik anersaakkullu nerisinneqarnissamik ilimasuffigigaatik. Taamaattumik nakkutilliisut Jesus Kristus, ’paarsisoq ajunngitsoq’, ilaarniartarpaat. Ilumoorfiginnillutik sapaatit-akunnerini tamani kristumiut ataatsimiinnerini ’savanik’ kiffartuussisarput. Nikallornartumik pinnatik, kisianni ineriartornartumik oqalunniartarput, ’savat’ uppernikkut nakussatsinneqaqqullugit. — Matîuse 20:28; Evfisumiut 4:11, 12; Eprîarit 13:20, 21.
15. Ukiuni hundredelinni siullerni qanoq ilumoorfiginninnermik kukkusumik ersersitsisoqarsimava?
15 Ilumoorfiginninnginneq peqqusersooq alla tassaavoq kukkusumut ilumoorfiginninneq. Biibilimit isigalugu ilumoorfiginninnermik piviusumik ersersitsissagutta Jehova Guutimut ilumoorfiginninnerput tamanit sallerpaasariaqarpoq. Ukiuni hundredelinni siullerni juutit ilarpassuisa Mosesip inatsisai juutillu aaqqissuussaanerat uteriillutik aalajangiusimaniinnarsimavaat. Anersaakkulli Israelikkut timikkut Israelikkunnut pikitsitsisunut taarsiullugit pilluaqqunissaannut Jehovap piffissaa nalliussimavoq. Amerlanngitsuinnaat Jehovamut ilumoorfiginnittuarput allanngornermullu annertuumut maleruullutik. Allaat kristumiut ilumoortut akornanni judaisteqarsimavoq Mosesip inatsisaani ’ilinniaqqaagassanut kimeqanngitsunut amigartunullu’, Kristusikkut eqquussimasunut, uterusulluinnartunik. — Galâsiamiut 4:9; 5:6-12; Filípimiut 3:2, 3.
16. Jehovap kiffai ilumoorfiginnittut Biibili pillugu annerusumik paasisaqartoqaraangat qanoq qisuariartarpat?
16 Tamatuma akerlianik nalitsinni Jehovap innuttai allannguineqaraangat ilumoorfiginninnermik ersersitsisarsimapput. Qaamaneq sallusuissummut saqqummersinneqartumut seqertinneqartoq alliartortillugu allannguisoqartarpoq. (Ussatit 4:18) Ungasinngitsukkut ’inussiap aalajaallunilu silatuup’ oqaatsip ’eqqarleriit’-p, ilaatigut Matîuse 24:34-mi atorneqartup, qanoq paasisariaqarneranik, aammalu „savat“ „savaasallu“ Matîuse 25:31-46-mi (NV) eqqartorneqartut qaqugu eqqartuunneqarnissaannik kiisalu sakkutuujunissamut taarsiullugu kiffartuussinerit ilaannik qanoq isiginninnissatsinnik paasisaqarnerulersippaatigut. (Matîuse 24:45) Jehovap nalunaajaasuisa ilarpassuisa tamakkua pillugit paasinninnitoqqat uteriillutik aalajangiusimaniinnarniartuuppatigik qaamanermullu alliartortumut malinnaajumanngitsuuppata qularnanngitsumik tunussisut nuannaapiluutigissagaluarpaat. Taamatulli pisoqarsimanngilaq. Sooq? Jehovap kiffai ilumoorfiginnittuarmata.
17. Ikinngutit qanigisallu qanoq ilillutik ilumoorfiginninnitsigut misilissinnaasarpaatigut?
17 Immaqa ilumoorfiginninnerput ilaatigooriarluni sakkortuumik misilinneqartarpoq. Ikinnguterput asasarput qanigisarpulluunniit Biibilimi maleruaqqusanik unioqqutitsippat kimut annerpaamik ilumoorfiginninnissarput immaqa nalornissutigissavarput. Soorunami ilaquttatsinnut ilumoorfiginninnissarput kissaatigisarparput. Ilaquttatsinnulli ilumoorfiginninnerput Jehovamut ilumoorfiginninnitsinnit sallinngortinngisaannassavarput. (Naleqqiuguk Samuelimik allakkat siulliit 23:16-18.) Unioqqutitsisoq ikiorniassanngilarput ajortuliaata annertuup toqqortorneratigut imaluunniit utoqqaanertat ’qanilaarlutik iluarsisitsiniaallutik’ taakkuninnga ikiuiniaraluartut akerlilersorlugit unioqqutitsisup illersorniarsarineratigut. (Galâsiamiut 6:1) Taamaaliorneq iluamik oqaatigalugu Jehovamut, taassuma peqatigiissortaanut unioqqutitsisumullu ilumoorfiginninnginneruvoq. Unioqqutitsisoq perorsaatissinneqarnermik pisariaqartitaanik ilassinninnaveersaartikkaanni assigiinnarpaa Jehovap asanninnera taassumunnga anngunnaveersaartillugu. (Eprîarit 12:5-7) Eqqaamassavarputtaaq ’asannittup patitsineri ilumoornermik pissuteqartarmata’. (ússatit 27:6) Toqqaannartumik asannittumillu unnersuunneqarnini Guutip oqaasianik tunngaveqartoq immaqa unioqqutitsisup makitassutsimigut ajuallaatigisinnaavaa, ungasinnerusorli eqqarsaatigalugu inuuneranik annaassisinnaavoq.
Qinugineqarnerup nikallujuilluni atornissaanut ilumoorfiginninnitta ikiortarpaatigut
18, 19. (a) Akabip Nabot sumik piumaffigaa, aamma sooq Nabot piumanngila? (b) Nabotip ilumoorfiginninnera iluaqutaava? Nassuiaruk.
18 Ilaatigut Satanip ilumoorfiginninnerput toqqaannartumik saassuttarpaa. Assersuutigalugu Nabotimut atatillugu taamaaliorsimavoq. Naatsiivini viinnequtilik kunngip Akabip pisiariniarsarilermagu Nabot ima oqarsimavoq: „Siuaasannit kingornussama ilinnut tunniunneqarnissaa qanortoq [Jehovamit] ajornartinneqarili!“ (1 Kunngit 21:3) Nabot uteriinngilaq, ilumoorfiginnillunili. Israelikkuusup kingornussaminik allanngortinneqarsinnaanngitsumik tunisinissaa Mosesip inatsisaani inerteqqutigineqarpoq. (3 Moses 25:23-28) Nabotip qularnanngitsumik nalunngilluaraluarpaa kunngip ajortup taassuma toqutaatissinnaagaani, Akabimmi nuliani, Jesabel, Jehovap pruffiitiisa ilarpassuinik toqutsinissaanik akuerereersimavaa. Taamaakkaluartorli Nabot aalajaattuarpoq. — 1 Kunngit 18:4.
19 Ilumoorfiginninnermik attassiinnarniarneq ilaannikkut akeqartarpoq. Jesabelip „inupiluit“ ikiortigalugit Nabot eqqunngitsumik unnerluutigaa eqqartuussaatillugulu. Tamatuma kingunerisaanik taanna ernerilu toqutaapput. (1 Kunngit 21:7-16; 2 Kunngit 9:26) Tamanna isumaqarpa Nabotip ilumoorfiginninnera iluaqutaanngitsoq? Naamik! Nabot ilumoorfiginnittorpassuit Jehovap eqqaamasaani suli ’inuusut’, toqusullu makititaanissaat utaqqillugu ilivermiittut, ilagaat. — Lúkarse 20:38; apustilit suliait 24:15.
20. Neriuutitta qanoq ililluni ilumoorfiginnittuarnissatsinnik ikiorsinnaavaatigut?
20 Toqusut makititaanissaannik neriorsuut ullumikkut Jehovamut ilumoorfiginnittunuttaaq tuppallernartuuvoq. Nalunngilarput maani silarsuarmi ilumoorfiginninnerput uagutsinnut akisoorujussuusinnaasoq. Jesus Kristusip ilumoorfiginninnini inuunermik akilersimavaa, oqarsimavorlu ajoqersukkani allaanerusumik pineqarnavianngitsut. (Juánase 15:20) Siunissamulli neriuutini napassutigisimavaa, soorlu uagut siunissamut neriuutitta napatittaraatigut. (Eprîarit 12:2) Neriuutip tamatuma qinugineqarnerni qanorluunniit ittuni ilumoorfiginninnitsinnik attassiinnartittarpaatigut.
21. Jehovap kiffani ilumoorfiginnittut qanoq neriorsoqqissaarpai?
21 Ullumikkut Guutip kiffaasa ilaat ikittuinnaat ilumoorfiginninnermikkut toqqaannartumik saassunneqartarput. Naggatissalli nalliutinnginnerani Guutip innuttaanik qinuginninneq annertuseriaannaavoq. Ilumoorfiginnittuarnissarput qanoq ililluta qulakkeersinnaavarput? Maannangaaq ilumoorfiginninnitsigut. Jehovap annertuumik suliassissimavaatigut, tassa naalagaaffini pillugu inunnut allanut oqaluussillutalu ilinniartitsissasugut. Suliami tamatumani ilumoorfiginnilluta nikallujuinniarta. (1 Korintumiut 15:58) Inuit naammalluinnanngissutaat Jehovap peqatigiissortaanut ilumoorfiginninnitsinnik aserussutaatinnaveersaarutsigik, ilumoorfiginninnginnernullu peqqusersuunerusunut mianersorutta, soorlu kukkusumik inunnut allanut ilumoorfiginninnermut, ilumoorfiginninnitta suli annerusumik misilinneqariataarnissaanut piareersimanerussaagut. Qanorluunniit pisoqassagaluarpat qularinngissinnaavarput Jehova kiffaminut ilumoorfiginnittunut ilumoorfiginnittuassasoq. (2 Samuel 22:26) Aap, ilumoorfiginnitsini paariuassavai. — Tussiaat 97:10, NV. (wE 1/8 97)
[Quppernerup ataani ilanngussat]
a Iluanaarniarneq taama ittoq saassukkamiuk Jesus assut sapiiserpoq. Oqaluttuarisaanermik ilisimatooq naapertussagaanni naalaffimmut akileraarut juutit aningaasatoqaannik immikkut ittumik akilerneqartartussaasimavoq. Taamaattumik avataaneersut naalaffiliartut akileraarummik akiliiniartut aningaasaatitik aggorteqqaartariaqartarsimavaat. Aningaasanik aggortitsisartut aggortitsiniartunut akiliisitsisinnaatitaapput, taamaalillutillu aningaasarpassuarnik iluanaaruteqartarlutik.
b Takukkit Vågn op!, 22. decembari 1993-imoortoq; 8. januaari 1994-imoortoq; aamma 22. januaari 1994-imoortoq.
c Taakkua qatanngutigiissusiat aallaaveqarpoq chassidiminik, ukiunik hundredenik marlussunnik siusinnerusukkut pilersimasunik griikerillu sunniinerata akiornissaanik siunertaqartunik. Chassidim hebriiarit oqaaseraat, isumaqartoq „ilumoorfiginnittut“ imaluunniit „upperluartut“. Immaqa taakkua isumaqarput allassimaffiit Jehovap ’ilumoorfiginnittoqutaanik’ eqqartuisut immikkut ittumik imminnut tunngasuusut. (Tussiaat 50:5, NV) Taakku farisiiarillu tassaapput Inatsisit oqaasertaannik imminnut illersuisunngortittut ingasattajaarniartut.
Apeqqutit uteqqiissutissat
□ Qanoq ililluta allat naammalluinnanngissutaat ilumoorfiginnikkunnaassutiginaveersaarsinnaavavut?
□ Uagut nammineq naammalluinnanngissutivut qanoq ilillutik ilumoorfiginnikkunnaarnitsinnik kinguneqartoorsinnaappat?
□ Kukkusumik ilumoorfiginninnermik ersersitseqqajaanissaq qanoq pinngitsoortissinnaavarput?
□ Qinugineqarnitsinni ilumoorfiginnittuarnissatsinnut suna iluaqutigisinnaavarput?
[Qupp. 8-mi ungalusaq]
Ilumoorfiginnilluni Betelimi kiffartorneq
’Tamatigut ippinnanngitsumik nalinginnanngitsumillu ilioritsi,’ apustili Paulus taama allassimavoq. (1 Korintumiut 14:40) Paulusip nalunngilaa ilagiit ingerlalluassappata ’nalinginnanngitsumik’, tassa torersumik, aaqqissuussaasumillu pinissaq pisariaqartoq. Ullumikkuttaaq utoqqaanertat assigiinngitsunik aaqqissuussisariaqartarput. Ilagiinnut ilaasortaasut paasitinneqartariaqarput atuakkamik atuaqqissaartartoqatigiinnut sorlernut ilaassanersut, katersuunnissanik aaqqissuussisoqartariaqarpoq oqaluussiartortarfiillu peqqissaartumik angalaarfigineqartariaqarput. Aaqqissuussat taamaattut ilumoorfiginninnitsigut misilinneqaatigisinnaavavut. Aaqqissuussat Guutimit isumassarsisitaanikkut pilersitaasut pineqanngillat, utoqqaanertallu kissaatigisanik tamanik naammassinnissinnaanngillat.
Isumaqarpit ilagiinni kristumiuni aaqqissuussat ilaannut ilumoorfiginninnissaq ilaannikkut ajornakusoorsinnaasoq? Taamaappat immaqa iluaqutigissavat Betelimi aaqqissuussat qimerluussallugit. Taaguut Betel hebriiarisuujuvoq isumaqarlunilu „Guutip illua“. Napasuliaq Alapernaarsuiffiup immikkoortortaqarfii tamarmik qullersaqarfillu USA-miittoq taamatut taagorneqarput.d Betelini najugaqartut nammineq kajumissutsiminnik sulisut Jehovamik mianerinninnermik ataqqinninnermillu ersersitsinissartik kissaatigisarpaat. Tamatumanilu suleqataasut tamarmik ilumoorfiginninnissaat pisariaqarpoq.
Betelimut pulaartut tamaani torissuseq ipiissuserlu nersualaarajuppaat. Sulisut suliartik torersumik nuannaarlutillu ingerlattarpaat; oqaatsimikkut, pissusilersoriaatsimikkut qallikkullu takutittarpaat tassaallutik kristumiut inersimalluartut nalunngeqatiginnissutsimit Biibilimit ajoqersorneqarsimasumit siulersortittut. Betelimi najugaqartut tamarmik Guutip oqaasiani maleruaqqusat ilumoorfiginnillutik maleruarpaat.
Siulersuisoqatigiit Betelimi najugaqartunut pigititaminnik atuagassiaaraliorsimapput taaguutilimmik Om at bo sammen i enhed (Ataasiussuseqarluni najugaqatigiinneq pillugu). Maleruagassanik najugaqatigiit taama amerlatigisut suleqatigiilluarsinnaanissaannut iluaqutaasussanik atuagassiaaraq imaqarpoq. (Tussiaat 133:1) Assersuutigalugu, ineqarnermut, piffissanut nerisarfiusunut, eqqiluisaarnermut, atisanut, pissusilersornermut assigisaannullu tunngasunik ilitsersuussutitaqarpoq. Betelimi najugaqartut ilitsersuussutit tamakku ilumoorfiginnillutik malittarpaat, immaqa aamma allaat namminneq allatut periaaseqarnissartik kissaatigigaluaraangamikkuluunniit. Atuagassiaaqqap imarisai ileqqoreqqusarpassuartut aalajangersagarpassuartullu inuppalaanngitsutut isiginngilaat, najoqqutassatulli iluaqutaasutut eqqissinermut ataasiussusermullu siuarsaataasutut isigalugit. Betelimi nakkutilliisut najoqqutassat tamakku, Biibilimi najoqqutassianik tunngaveqartut, ilumoorfiginnillutik tapersersorluartarpaat, ajunngitsumillu atortarlugit Betelimiut ineriartortikkumallugit kiffartuutiminnillu illernartumik suliarinninnissaannut kajumissisikkumallugit.
d Betelit naqiterivittallit, allaffittallit angerlarsimaffittallillu ataatsimut tassaanngillat Guutip anersaakkut naalaffia imaluunniit illua. Guutip anersaakkut naalaffia tassaavoq taassuminnga pallorfiginninneq minguitsoq. (Mika 4:1) Tamanna nunarsuarmi maani illulianit killilerneqarsinnaanngilaq.
[Qupp. 9-mi ungalusaq]
Ilumoorfiginnittoq inatsisinillu maleruaaqqissaarniaq
1916-imi atuakkami qinerlerfissiami Encyclopædia of Religion and Ethics-imi allassimavoq ’ilumoorfiginnittup inatsisinillu maleruaaqqissaarniap akornanni assigiinngissut qaqugukkulluunniit sumiluunniit malugineqarsinnaajuaannarsimasoq’. Atuakkami nassuiarneqarpoq: „Inatsisinik maleruaaqqissaarniaq oqarfigineqarnini malillugu iliortarpoq, malittarisassanillu unioqqutitsissanani; oqaatsinut allassimasunut aalajaattuartarpoq. Aamma ilumoorfiginnittoq taamaaliortarpoq . . . taannali suli annerusumik iliuuseqartarpoq. Suliassani tarnikkut iluunngarluni suliarisarpaa, isiginnittaasialu suliaanit ilusilersorneqartarpoq siunertaasup anersaavanut naapertuuttunngortillugu.“ Atuakkami tassani aamma allassimavoq: „Ilumoorfiginnittuuneq inatsisinut naalattuunermit annerujussuarmik ilaqarpoq. . . . Ilumoorfiginnittup inatsisinut naalattumit assigiinngissutaa tassaavoq uummammigut isumamigullu iluunngarluni pisarami . . . Piaaraluni ajortuliorniarneq ajorpoq, naammassinngitsuugaqarnikkut ajortuliorniassanani imaluunniit ilisimasaqannginneq pissutigalugu ajortuliorniassanani.“