Qatanngutigiittut asaqatigiinneq soraarnaveerli!
’Qatanngutigiissutut asaqatigiinneq soraarnaveerli.’ — EPRÎARIT 13:1.
1. Issileruttornerani kissarsuummik qamittuussanngikkuit qanoq iliortariaqarpit, sumillu tamatta akisussaaffeqarpugut?
TAQQAMA issittorsuuvoq, issisiut apparaluttuinnarpoq. Inneq kissarsuummi ikumasoq kisimi illumik kiassaasuuvoq. Uumaannassaguit inneq qamitsaaliortariaqarpat. Pissutsit taamaatsillugit issiaannarumassagaluarpit innerlu qamikkiartortoq aamarsuillu aamaartut arsakuinnanngoriartortut isiginnaaginnarlugit? Soorunami naamik. Qularnanngitsumik qasujuillutit qisuttortuassavat inneq qameqqunagu. Tamatta tamatumunnga assingusumik suliassaqarpugut ’innermut’ pingaarneroqisumut, innermut uummatitsinni ikumasumut, tassa asanninnitsinnut, atatillugu.
2. (a) Sooq oqartoqarsinnaava ulluni kingullerni makkunani asanninneq nillertunngorsimasoq? (b) Asanninneq kristumiunut ilumoortunut qanoq pingaartigaa?
2 Piffissami nunarsuarmi sumi tamaani kristumiuunerartut asanninnerata Jesusip siulittuisimaneratut nillertunngorfigisimasaani inuuvugut. (Matîuse 24:12) Tassani Jesusip innersuussutigaa asanninneq pingaarnerpaaq, tassa Jehova Guutimut taassumalu oqaasianut, Biibilimut, asanninneq. Asanninnerittaaq allatut ittut nillertunngoriartorput. Biibilimi siulittuutigineqarsimavoq ’ullussani kingullerni’ inuppassuit ’asanniuitsuujumaartut’. (2 Timûtiuse 3:1-5) Tamanna ilumooqaaq. Ilaqutariit tassaasariaqaraluarput qimaaffissat asanninnermik naammattumik pigisallit, kisianni allaat ilaqutariit iluanni nakuuserfigeqatigiinneq atornerluinerlu nalinginnaalersimapput, ilaannikkut amiilaarnaannartumik peqqarniitsumik. Silarsuarmi maani ’isseqisumi’ kristumiut peqquneqarsimapput asaqatigiissasut, aap, imminut pilliutigeriaannaalluni asaqatigiinnermik ersersitsissasut allallu soqutigisaat namminneq soqutigisaminnit salliutissagaat. Asanninneq tamanna ima ersaritsigisariaqarpoq kikkunnit tamanit takuneqarsinnaalluni, ilagiimmi kristumiut ilumoortut asanninneq ilisarnaatigisussaavaat. — Juánase 13:34, 35.
3. Qatanngutigiittut asaqatigiinneq qanoq paasisariaqarpa, tamatuminngalu soraarnaveersaartitsineq sumik nassataqarpa?
3 Apustili Paulusip isumassarsisitaalluni peqqussut manna saqqummiussimavaa: ’Qatanngutigiissutut asaqatigiinneq soraarnaveerli.’ (Eprîarit 13:1) Griikerit oqaasiat tassani ’qatanngutigiissutut asaqatigiinnermik’ nutserneqartoq (filadelfiʹa) qinerlerfissiat ilaat naapertussagaanni tassaavoq „qamannga pisumik asanninneq, inussiarnernermik misiginneqataanermillu ersersitsineq, ikiuineq“. Paulusillu suna eqqarsaatigaa oqarami asanninneq tamanna soraarnaveersaartissagipput? Qinerlerfissiami tassani aamma allassimavoq: „Nillertunngunngisaannartariaqarpoq.“ Tassa naammanngilaq qatanngutit asaannassallugit; asanninnerput ersersittariaqarparput. Aammattaaq asanninneq tamanna soraarsinnaveersaartariaqarparput nillertunngunngisaannaqqullugu. Tamanna artornarpa? Aap, Jehovalli anersaavata ikiorsinnaavaatigut qatanngutigiittut asaqatigiinnerup ineriartortinnissaanut ataavartinnissaanullu. Asanninnerup uummatitsinni ikumasup ikumatittuarnissaanut iluaqutigisinnaasavut pingasut maanna sammeriartigik.
Misiginneqataasarit
4. Misiginneqataaneq qanoq paasisariaqarpa?
4 Qatanngutinnut kristumiunut angutinut arnanullu asanninnerulerumaguit siullermik misiginneqatigisinnaasariaqarpatit, inuunerminni misilinneqartarneranni unamminiarnartunillu naapitaqartarneranni misiginneqatiginninnermik ersersitsivigisarlugit. Apustilip Peterip tamanna erseqqissarpaa ima allalluni: ’Tamassi isumaqatigiigitsi ilasseqatigiillusilu qatanngutigiinnillu asannillusi nallittuillusilu qanilaarlusilu.’ (1 Pîtruse 3:8) Griikerit oqaasiat tassani ’ilasseqatigiinneq’-mik (Ny Verden-nutsikkami: „misiginneqataanermik ersersitsineq“-mik) nutserneqartoq isumaqarsinnaavoq alla ’naallioqatigalugu’. Griikerit oqaasiinik ilisimatooq oqaaseq tamanna pillugu ima oqarpoq: „Allat misigissusiinut nammineq misigissutsitulli iserfiginnissinnaassuseq pineqarpoq.“ Tassa misiginneqataanermik ersersitsisinnaassuseq pingaartorujussuuvoq. Jehovamut kiffaasoq utoqqaq aalajaatsoq ilaanni ima oqarsimavoq: „Misiginneqataaneq tassaavoq illit anniaatinnik uanga uummatikkut misigisaqarsinnaanera.“
5. Qanoq ililluta nalunngilarput Jehova misiginneqataasoq?
5 Jehova misiginneqataanermik taama ittumik pigisaqarpa? Ilaana. Assersuutigalugu, taassuma innuttaasa Israelikkut naalliuutaat pillugit ima allassimasoqarpoq: ’Erloqissutaat tamaasa erloqissutigai.’ (Isaja 63:9) Annikilliuutaat Jehovap isiginnaaginnanngilai; innuttani misigeqatigai. Misigissusii qanoq sakkortutiginersut innuttaminut oqaasiisigut Ny Verden-nutsikkami Zakarias 2:12-mi allassimasutigut erserpoq: „Ilissinnik attuisup isima tappiutaa attorpaa.“a Allassimaffik tamanna pillugu Biibilimik nassuiaasartoq ima allappoq: „Isi timip pisataasa paasiuminaannerpaat malussarinnerpaallu ilagaat; isillu tappiutaa — ammaneq qilaap qaamarngata isaaffigisaa takusaqarsinnaalersilluta — isip ilaata malussarinnerpaartaraa tamannalu ilutigalugu pingaarnerpaartaralugu. Jehovap asasaminut isumassuingaassusia tamatumannga eqqornerusumik nassuiarneqarsinnaanngilaq.“
6. Jesus Kristusip misiginneqataanini qanoq ersersittarsimavaa?
6 Aammattaaq Jesus assut misiginneqataajuartarsimavoq. Arlalippassuariarluni allassimasarpoq inuit napparsimasut naalliutsitaasulluunniit ’nalligingaalerai’. (Mákorse 1:41; 6:34) Erseqqissarsimavaalu ajoqersukkani tanitat inussiarnersumik pineqarpata assigiinnaraa nammineq taama pineqarluni. (Matîuse 25:41-46) Taanna ullumikkut qilammi ’palasiuneraarput qajannarsutsitsinnik misiginneqataasinnaasoq’. — Eprîarit 4:15.
7. Qatanngutitta angutip arnalluunniit uumitsaakkaangatigut misiginneqataanermik ersersitsineq qanoq iluaqutigissavarput?
7 Jesusip ’qajannarsutsitsinnik misiginneqataasinnaanera’ eqqarsaatigalugu tuppallernaqaaq, ilaa? Taamaattumik kissaatigaarput allanut misiginneqataanissarput. Soorunami ajornannginneerarsuuvoq allat ’qajannarsusii’, imaluunniit sanngiissusii, isiginiassallugit. (Matîuse 7:3-5) Tullianilli qatanngutip angutip arnalluunniit uumitsatsippatit misileriaruk takorloorniarsaralugu illit taassumatulli atugaqartutit, taassumatut tunuliaqutaqarlutit, taassumatut inuttut pissuseqarlutit taassumatullu kukkuneqarlutit akiortariaqakkannik. Qularinngiliuk taava taassumatulli kukkussallutit, immaqaluunniit allaat ajornerusunik? Allat ingasattumik ilimasuffiginissaannut taarsiullugu misiginneqataasuusariaqarpugut, taamaakkuttami Jehovatut, ’pujualaannaanitsinnik eqqaamannittutut’, ingasaassiniartuunnginnissatsinnut iluaqutigissavarput. (Tussiaat 103:14; Jâko 3:17) Piginnaanitta killeqarnera nalunngilaa sapikkatsinnillu ilimasuffiginngisaannarluta. (Naleqqiuguk Kunnginik allakkat siulliuit 19:5-7.) Taamaattumik allat taamatut misiginneqatiginiartigik.
8. Qatannguterput angut arnarluunniit atoruminaatsorsiulerpat qanoq qisuariartariaqarpugut?
8 Paulus allassimavoq ilagiit timitut assigiinngitsunik isumaqatigiillutik suleqatigiittariaqartunik avatilittut ittut. Ilaatigut ima allappoq: ’Avat ataaseq anniaraangat avateqataasa tamarmik anniaqatigisaraat.’ (1 Korintumiut 12:12-26) Arlaannik misilinneqartut naallioqatigisinnaasariaqarpavut imaluunniit misiginneqatigisinnaasariaqarpavut. Tamatumani utoqqaanertat siuttuupput. Paulus ima allassimavoq: ’Kina sanngiitsoq sanngiitsunnguutiginnginnerpara? Kina mamiatsattoq kissalissutiginnginnerpara?’ (2 Korintumiut 11:29) Utoqqaanertat nakkutilliisullu angalasartut tamatumani Paulus ilaartarpaat. Oqalugiaraangamik, paarsisutut suligaangamik kiisalu eqqartuussisutut suliaqaraangamik misiginneqataaniarsarisarput. Paulus ima siunnersuisimavoq: ’Qiasut qiaqatigisigik.’ (Rûmamiut 12:15) ’Savat’ malugisinnaagaangamikku utoqqaanertat ilumut misiginneqatigigaatik, piginnaanermik killeqarnerannik paasinnittut, atortariaqakkatillu paasilluinnaraat taava siunnersuutaannik, unnersuussutaannik perorsaatissiissutaannillu ilassinninnissartik oqinnerutittarpaat. Ataatsimiinnernut najuunnissartik aalajangiusimanerusarpaat, qularinagu tassani ’tarniminnut qasuerfissarsiumaarlutik’. — Matîuse 11:29.
Pingaartitsinermik ersersitsisarit
9. Jehovap qanoq ililluni ersersittarpaa ajunngequtivut pingaartillugit?
9 Qatanngutigiittut asaqatigiinnermik ikummarissaasinnaasoq alla tassaavoq pingaartitsineq. Allat pingaartissinnaassagutsigik pissusii ajunngitsut isiginiarnerusariaqarpavut iliuusiilu pingaartillugit. Taamaaliorutta Jehova ilaassavarput. (Evfisumiut 5:1) Ullut tamaasa ajortuliaararpassuatsinnik taassuma isumakkeerfigisarpaatigut. Allaammi annertuumik ajortulioraangatta isumakkeerfigisarpaatigut ilumoorluta allamik isumataarutta. Ajortuliatsinnillu isumakkeerfigereeraangamisigut ajortuliavut puiortarpai. (Hesekiel 33:14-16) Tussiaasiortoq ima aperisimavoq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ (Tussiaat 130:3) Jehovap imminut kiffartornitsinni iliuutsivut ajunngitsut isiginiarnerusarpai. — Eprîarit 6:10.
10. (a) Sooq aappariit pingaarteqatigiikkunnaarunik navianartorsiulissappat? (b) Aapparmik pingaartitsiunnaalerluni malugigaanni qanoq iliortariaqarpa?
10 Ingammik ilaqutariit iluanni tamanna malissallugu pingaartuuvoq. Angajoqqaat pingaarteqatigiinnertik ersersittarpassuk pissuseq taama ittoq ilaqutariinni atuutissaaq. Ukiuni makkunani aappariit imaaliallaannaq avittarput, aapparisaq pingaartinneqarneq ajorluni, naammalluinnanngissutit ingasattajaarunneqartarlutik ajunngequtillu suusupagineqartarlutik. Taamatut ajortumik isiginnittaaseqarnerup aappariinneq aseroriartortittarpaa tassaalersittarlugulu nammagaq oqimaatsoq. Paasinarsippat aappannik pingaartitsiunnaalersutit, taava imminut ima apereriarit: ’Ilumut aappara ajunngitsunik pissuseqanngilluinnarpa?’ Sooq taassumunnga asannilersimanerit katissimanerillu eqqarsaatigiuk. Inuup immikkorluinnaq ittup taassuma asanissaanut pissutissat tamakku tamarmik ilumut nungussimappat? Soorunami naamik. Taamaattumik aapparpit ajunngitsortaanik pingaartitsiniarlutit ilungersorlutit iliuuseqarit, pingaartitsinerillu oqaatigisaruk. — Ussatit 31:28.
11. Aappariit asaqatigiinnertik ilumoortuusaarnermik ilaqassanngippat suut pinaveersaartittariaqarpaat?
11 Pingaartitsinertaaq iluaqutigalugu aappariit asaqatigiinnertik ilumoortuusaarnermut illersorsinnaavaat. (Naleqqiguk Korintumiunut agdlagkat áipait 6:6; Pîtrusip agdlagai sujugdlît 1:22.) Asanninneq taama ittoq piviusumik pingaartitsilluni pigineqarpat angerlarsimaffimmi pinerliiniartoqartarnavianngilaq imaluunniit ajuallannartunik nikanarsaasunilluunniit oqaaseqartoqartarnaviarani. Ullut arlerlugit inussiarnersumik imminnut oqarfiginngivillutik aappariit imminnut alanganngisaannartariaqarput, timikkullu nakuuserneq atunngisaannartariaqarpaat. (Evfisumiut 5:28, 29) Aappariit pingaarteqatigiittut ataqqeqatigiittarput. Taamaattarput allat akornanniinnerminniinnaanngitsoq, kisianni qaqugukkulluunniit Jehovamit isigineqarnerminni tamani, tassa tamatigut. — Ussatit 5:21.
12. Sooq angajoqqaat meeqqamik pissusiinik ajunngitsunik pingaartitsinertik oqaatigisariaqarpaat?
12 Meeqqattaaq pingaartinneqarlutik misiginissartik pisariaqartippaat. Imaanngitsoq angajoqqaat meeqqatik suninngui tamaasa ingasattumik nersualaartassagaat, pissusiili naammassisaallu ajunngitsut pillugit nersualaartariaqarpaat. Jehova nammineq maligassiuisimavoq Jesusimik iluarinninnini oqaatigisimagamiuk. (Mákorse 1:11) Jesus assersuusiami ilaanni imminut assersuutigivoq Naalakkamut ’kiffanik ajunngitsunik ilumoortunillu’ nersualaarisumut naak taakkununnga suliassiissutigineqartut assigiinngikkaluartut, taamaattumillu naammassisaat assigiinngikkaluartut. (Matîuse 25:20-23; naleqqiuguk Matîuse 13:23.) Taamatuttaaq angajoqqaat silatuut meeqqatik tamaasa immikkut pissusii, piginnaaneri naammassisaallu ajunngitsut pillugit nersualaartarpaat. Taamaattorli meeqqamik naammassisaat pingaartorsiutigivallaarnaveersaartarpaat meeqqatik misigileqqunagit tamatigorluinnaq angusaqarluartariaqarlutik. Angajoqqaat kissaatiginngilaat meeqqat peroriartorneranni kamassaartarnissaat imaluunniit nikallortinnissaat. — Evfisumiut 6:4; Kulorsamiut 3:21.
13. Ilagiinniittunik ataasiakkaanik pingaartitsinermik ersersitsisarnikkut kikkut siuttuuppat?
13 Ilagiinni kristumiuni utoqqaanertat nakkutilliisullu angalasartut Guutip ’savaataaniittunik’ ataasiakkaanik pingaartitsinermik ersersitsisarneq eqqarsaatigalugu siuttuupput. Tamanna taakkununnga oqitsuunngilaq, tassami aamma akisussaaffigaat naapertuilluartumik perorsaatissiisarnissaq, unioqqutitsisut ajunngitsumik ingerlaleqqinnissaannik saamallutik ikiornissaat pisariaqarpallu ilungersortumik unnersuussinissaq. Qanoq ilillutik eqqortumik oqimaaqatigiissaarisinnaappat? — Galâsiamiut 6:1; 2 Timûtiuse 3:16.
14, 15. (a) Ilungersortumik unnersuussineq eqqarsaatigalugu Paulus qanoq oqimaaqatigiissaarisarsimava? (b) Kristumiut nakkutilliisut eqqunngitsumik naqqiinerup aamma nersualaarisarnerullu akornanni qanoq oqimaaqatigiissaariniarsinnaappat? Assersuusiorit.
14 Paulusip maligassiaa iluaqutissaalluarpoq. Taanna ilinniartitsillaqqissuusimavoq, utoqqaanertaalluarluni paarsisuulluarlunilu. Ilagiit annertuunik ajornartorsiuteqartut ikiortariaqartarsimavai, pisariaqaraangallu ilungersortumik unnersuussinissani ersissutigisarsimanngilaa. (2 Korintumiut 7:8-11) Paulusip kiffartorsimanera qimerlooraanni paasineqarsinnaavoq naveersigajuttuusimanngitsoq, aatsaallu pisariaqaraangat ilalernaraangallu naveersisarsimasoq. Taamaalilluni takutippaa Guutimeersumik ilisimassuseqarluni.
15 Utoqqaanertap ilagiinni kiffartornera nipilersugassiamut assersuukkaanni naveersineq ilungersortumillu oqaassineq nipimut ataatsimut erinnamut tamarmut naapertuuttumut assersuunneqarsinnaavoq. Nipi tamannattaaq aalajangersimasumik inissaqarpoq. (Lúkarse 17:3; 2 Timûtiuse 4:2) Tusaqqooriarulli erinaq nipimik tamatuminnga ataasiinnarmik uteqattaarneqartuartumik imalik. Sivitsunngitsoq tusarniillissaaq. Taamaattumik utoqqaanertat tamatigoortumik ilinniartitsiniartarput, assigiiginnavimmik periaaseqaratik. Ilinniartitsinerminni ajornartorsiutaannaavissuarnik eqqartuineq ajorput. Nipi tamatigut tutsiutsittagaat isumalluarpaluttuuvoq. Jesus Kristus ilaarlugu utoqqaanertat asannittut pingaarnerpaamik nersualaarinissartik eqqarsaatigisarpaat, isornartorsiugassaminnik nassaarnissartik pinnagu. Kristumioqatimik ilungersorlutik suliniarnerat pingaartippaat. Qularinngilaat ataasiakkaat Jehovamut kiffartornerminni annerusutigut sapinngisaminnik iliuuseqartartut. Taamatullu isumaqarnertik utoqqaanertat oqaatigisarpaat. — Naleqqiuguk Tásalûníkamiunut agdlagkat áipait 3:4.
16. Paulusip misiginneqataasuunera kristumioqatiminillu pingaartitsinera qanoq sunniuteqarsimava?
16 Kristumiut Paulusip kiffartuussai qularnanngitsumik misigisimapput taassuma pingaartikkaatik misiginneqatigigaatillu. Tamanna qanoq ililluta nalunngilarput? Paulusimut qanoq misigissuseqarfiginninnerat nalunngilarput. Annertuumik oqartussaassuseqaraluartoq qunuginngilaat. Paulus ilassiortuuvoq, taakkualu asavaat. Sumiiffimmit aalajangersimasumit aallalermat utoqqaanertat ’qungasiagut eqissimavaat kunillugulu’. (apustilit suliait 20:17, 37) Utoqqaanertat kristumiullu allat tamarmik Paulusip maligassiaa qujamasuutigisinnaavaat, maligassiaq ilatsinnik pingaartitsinermik ersersitsisarnitsigut malissinnaasarput.
Ilumoorfiginnillutit tunniusimanermik ersersitsisarit
17. Ilagiinni asanninnermik ersersitsisarneq qanoq ajunngitsumik sunniuteqartarpa?
17 Inussiarnersumik iliuuseqarneq qatanngutigiittut asaqatigiinnermik ’ikummarissaasaqaaq’. Jesusip oqarsimaneratut ’tunisineq tigusinermit pilluarnarneruvoq’. (apustilit suliait 20:35) Allat anersaakkut timikkulluunniit ittunik tunigaangatsigik imaluunniit piffissarput nukivullu taakkununnga atoraangatsigik taakkununnga uagutsinnullu nuannaarutaasarpoq. Asanninnermik ersersitsinerit taamaattut tuniluuttarputtaaq. Ilagiinni asanninnermik ersersitsisoqaraangat allat aamma taamaaliornissaminnut kajumissisarput. Sivitsunngitsoq qatanngutigiittut asaqatigiinneq atuullualersarpoq. — Lúkarse 6:38.
18. Oqaaseq „ilumoorluni asanninneq“, ilaatigut Mika 6:8-mi atorneqartoq, qanoq paasisariaqarpa?
18 Jehovap innuttani Israelikkut ilungersorluni kajumissaarsimavai tunniusimaqatigiinnermik ersersitsisarnissaannik. Mika 6:8-mi ima allassimasoqarpoq: „Illit inuk, [Jehovap] ilisimatereerpaatit suna ajunngitsuusoq, nalunngereerpat suut ilinnit piumasarigai: Iluartumik iliuussasutit, ilumoortumik asannissasutit, makitajuillutillu Guutit peqatigalugu inuussasutit.“ „Ilumoortumik asanninneq“ qanoq paasisariaqarpa? Oqaaseq hebriiarisooq tassani „ilumoortumik asanninneq“-mik nutserneqartoq (chæʹsædh) qallunaatuunngortitani tuluttuunngortitanilu arlalinni „naakkinninneq“-mik nutserneqarsimavoq. Qinerlerfissiaq Biibilimut tunngasoq The Soncino Books of the Bible naapertussagaanni oqaatsimi tamatumani „pineqaannanngilaq . . . oqaaseq timitaqanngitsoq naakkinninneq. ’Naakkinninneq suliakkut ersersitaq’ pineqarpoq, nammineerluni asannittumik isumassuineq, piitsunuinnaanngitsoq naalliuttunuinnaanngitsorlu, inoqatinulli tamanut.“ Taamaattumik aamma Biibilimik nassuiaasartoq alla oqarpoq chæʹsædh isumaqartoq „asanninneq suliakkut ersersitaq“.
19. (a) Ilagiinniittunut asanninnermik ersersitsiniarluta sutigut siulliulluta iliuuseqarsinnaavugut? (b) Qatanngutigiittut asaqatigiinneq illit qanoq misigisimaviuk?
19 Qatanngutigiittut asaqatigiinnerput isumaliutersuutaannaanngilaq eqqarsaataannaananiluunniit. Timitaqarluinnarpoq. Taamaattumik qatanngutinnut angutinut arnanullu iliuuseqarfiginninnissamut periarfissat arajutsinaveersaartakkit. Jesusitut iliortarit. Taanna inuit ikioqqullutik aggernissaat utaqqiinnarnagu siulliulluni amerlasuutigut iliuuseqartarsimavoq. (Lúkarse 7:12-16) Ingammik ikiortariallit eqqumaffigisakkit. Utoqqarnik sanngiitsunilluunniit pulaarneqarnissaminnik pisiniunneqarnissaminnilluunniit pisariaqartitsisoqarpa? ’Iliarsoqarpa’ sammineqarnissaminnik pisariaqartitsisunik? Nikallungasoqarpa tusarnaarneqarnissaminnik tuppallersarneqarnissaminnilluunniit pisariaqartitsisunik? Periarfissavut naapertorlugit allat taamatut inussiarnersumik iliorfigisarniartigik. (Job 29:12; 1 Tásalûníkamiut 5:14; Jâko 1:27) Puiussanngilarput ilagiinni inunnik naammalluinnanngitsunik ilaasortaqartuni asanninnerup malunnaataasa pingaarnerit ilaat tassaammat isumakkeerfiginnikkumassuseq; allat isorisassartaqaraluarpataluunniit iluaaginnippaluttumik pissuseqarfigissannginnatsigik. (Kulorsamiut 3:13) Isumakkeerfiginneriaannaagutta ilagiinni avissaartuunnerit, puttarsisaqarnerit assortuunnerillu, annoraaminertut masattutut qatanngutigiittut asaqatigiinnitta ikumarnanik qamitsisinnaasut, pinaveersaartissavavut.
20. Qanoq ililluta imminut misissortuaannarsinnaavugut?
20 Tamatta qatanngutigiittut asaqatigiinnerup ikumarnata uummatitsinni ikumatittuarnissaanik aalajangiusimanninnerput inuuginnassagutta pingaarluinnarpoq. Imminut misissortuarniarta. Allanut misiginneqataasuuvugut? Taakkuninnga pingaartitsinerput ersersittarparput? Inussiarnisaarfigisarpavut? Taamaaliortuartilluta qanorluunniit silarsuaq ’issitsigileraluarpat’ misigittaatsigileraluarpallu asanninnerup ikumarngata qatanngutigiissuserput kiassartuassavaa. Massakkut naassaanngitsumullu ’qatanngutigiissutut asaqatigiinneq soraarnaveerli’! — Eprîarit 13:1. (wE 1/8 97)
[Quppernerup ataani ilanngussaq]
a Biibilimi kalaallisuunngortitami pisoqqami oqaatsinullu allanut nutsikkani allani tamanna nutserneqarsimavoq ima nipeqalersillugu Guutip innuttaanik attuisup Guutip isaa pinnagu Israelilli imaluunniit allaat attuisup nammineq isini attoraa. Kukkunermut tamatumunnga pissutaavoq ukiuni akullerni allakkanik ilisimatuut allassimaffimmik allanngortitsisimanerat, kukkullutik isumaqaramik allassimaffiit Guutimik ataqqinninngippaluttut taamaalillutik kusassarlugit. Taamaaliornermikkulli Jehovap kiffaminut misiginneqataassusia matoorpaat.
Apeqqutit uteqqiissutissat
□ Qatanngutigiittut asaqatigiinneq sunaava, aamma sooq soraarnaveersaartittariaqarparput?
□ Naakkinninneq qatanngutigiittut asaqatigiinnitta ataannartinnissaanut qanoq iluaqutigissavarput?
□ Qatanngutigiittut asaqatigiinnermut atatillugu pingaartitsineq qanoq pingaaruteqarpa?
□ Allanut inussiarnersuuneq ilagiinni kristumiuni qatanngutigiittut asaqatigiinnerup ingerlalluarneranut qanoq ililluni pissutaasarpa?
[Qupp. 15-imi ungalusaq]
Asanninneq iliuutsikkut ersertoq
Ukiualuit matuma siorna angut Jehovap nalunaajaasui peqatigalugit Biibilimik atuaqqissaartartoq qatanngutigiittut asaqatigiinneq eqqarsaatigalugu qulakujussimavoq. Nalunngilaa Jesus ima oqarsimasoq: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Ilumulli taamaattoqarnera upperiuminaatsippaa. Ullulli ilaanni kristumiutut asanninneq iliuutsikkut ersertoq takuaa.
Angut assakaasulimmik issiavilik ungasissumut angalavoq. Betlehemimi Israelimiittumi Jehovap Nalunaajaasuisa ataatsimiinnerisa ilaannut najuuppoq. Tassani Jehovap nalunaajaasuata Arabiamiup qatanngut angut aamma takornariatut tikeraartoq kimigiiserfigaa imminni ilaquttanilu unnuissasut, Biibilimillu atuaqqissaartartoq aamma taakkunani unnueqquneqarpoq. Innannginnerminni Biibilimik atuaqqissaaqatigineqartartup pulaarfini aperaa aqaguani ullaakkut seqineq nuisoq isiginnaarniarlugu aneerasaartarfimmi issiaarsinnaasoraluni. Pulaartitsisuatali itigarterujussuarpaa. Suna tamatumunnga pissutaanersoq aqaguani qatanngutip Arabiamiup nassuiarpaa. Oqalutsilerluni nassuiaavoq juutisut tunuliaqutalimmik pulaartoqarnini (Biibilimik atuaqqissaaqatigineqartartoq juutisut tunuliaqutarami) sanilimi paasisuugunikku ilaquttanilu angerlarsimaffinni ikuallassagaluaraatik. Taava Biibilimik atuaqqissaaqatigineqartartup tupaqaluni aperaa: „Soormi taamatut sapiiserpit?“ Isaasigut isigiitigalugu oqalutsilernanilu qatanngut angut Arabiamiu oqaannarpoq: „Juánase 13:35.“
Biibilimik atuaqqissaaqatigineqartartup qatanngutinut asanninneq taama ittoq misigigamiuk killitseqaaq, sivitsunngitsorlu kuisippoq.
[Qupp. 17-imi assiliartaq]
Paulusip ammasuunerata ilassiortuutippaa asaneqaatigisaanik