Najoqqutassianik paasinninneq — inersimassutsimut takussutissaq
AJORTUT ikinngutigalugit ileqqut ajunngitsut aserortarput. Inuk siaruartikkani naapertorlugit katersuiumaarpoq. (1 Korintumiut 15:33; Galâsiamiut 6:7) Oqaaseqatigiit taakku marluk piviusumik assersuutaasumilluunniit paasillugit ilumoortumut tunngaviusumut, najoqqutassiamut, assersuutissaapput, tamarmillu immikkut inatsisinut tunngavissiipput. Inatsisit piffissami aalajangersimasumik sivisussusilimmi pissutsinulluunniit aalajangersimasunut atuuttussiaasinnaapput. Akerlianilli najoqqutassiat tamatigoortuupput atuuttuaannartussiaasinnaallutillu. Taamaattumik Guutip oqaasiani kajumissaarneqarpugut najoqqutassiat tunngavigalugit eqqarsartarnissatsinnik.
Webster’s Third New International Dictionary-p nassuiaataa naapertussagaanni najoqqutassiaq tassaavoq „ilumoortoq tamanut tunngasoq imaluunniit tunngaviusoq; inatsit tamatigut atuuttoq imaluunniit tunngaviusoq, isuma pingaarnerusoq inatsisinut allanut tunngaviusoq imaluunniit inatsisinut allanut nagguiusoq“. Assersuutigalugu inatsisitut taaneqarsinnaavoq meeqqamut ima oqaraanni: „Kissarsuut attussanngilat.“ Inersimasumut ima oqaannarnissaq naammassaaq: „Kissarsuut kissarpoq.“ Malugiuk kingulleq tamatigoornerummat. Iliuusissanulli aalajangiisuusinnaammat (soorlu iffiornermut, nerisassiornermut kissarsuummilluunniit qamitsinermut) oqartoqarsinnaavoq najoqqutassiaasoq.
Inuunermi najoqqutassiat pingaarnerpaat anersaamut tunngasuupput. Guutimik pallorfiginninnitsinni siulersorpaatigut pilluarnitsinnullu aalajangiisuullutik. Inuit ilaasa najoqqutassianik eqqarsaatiginneqqissaarnissartik nakerineq ajorpaat. Aalajangiissagaangamik maleruagassamik, ’inatsimmik’, malinniinnarnissartik ajornannginnerutittarpaat. Tamannali silatusaannginneruvoq Biibilillu nalaani angutit aalajaatsut maligassiaannut akerliulluni. — Rûmamiut 15:4.
Kiffat aalajaatsut Guutip najoqqutassiaanit siulersortittut
Inunni naammalluinnanngitsuni siullersaalluni Abel najoqqutassianik Guutimik mianerinnittunik maleruaasimavoq. Qularnanngitsumik ’kinguaassamik’ neriorsuut eqqarsaatigeqqissaartarsimavaa immaqalu paasisimallugu ajortimit aniguisinneqarnissaq aammik kuisinertalimmik pilliuteqartoqarneranik nassataqartariaqassasoq. (1 Moses 3:15) Taamaattumik ’savaatimi pernaataasa ilaanik, pualasoortaanillu’ pilliisarpoq. Oqaatsip kingulliup ersersippaa Abelip pimi pitsaanersaannik Jehova tunisarsimagaa, aali ukiut 2000-init amerlanerusut qaangiummata aatsaat Guuti sunik imminut pilliisarnissamut atatillugu sukumiisunik ilitsersuussuteqartoq. Abel Guutimik mianerinnittoq najoqqutassiat Guutimik mianerinnittut malillugit iliuuseqartoq, akerlianik Kain pisussaaffiinnartut isigalugu pilliuteqarpoq. Isuma pigisaa iluarinanngilaq, pilliutaalu ersersitsipput najoqqutassianit uummammigut siulersortinngitsoq. — 1 Môrsase 4:3-5.
Aammattaaq Noa najoqqutassianik maleruaasuusimavoq. Biibilimi oqaluttuarineqarpoq Guutip Noa erseqqissumik peqqugaa umiarsuliussasoq, oqaatigineqanngilarli oqaluussinissaanik peqquneqarsimasoq; taamaakkaluartorli Noa ’iluarnermik oqaluussisutut’ taaneqarpoq. Sooq? (2 Pîtruse 2:5) Qularnanngitsumik oqaluussinissaanik Guutip peqqusimassavaa, kisianni aamma najoqqutassianik paasinninnerata tullerminillu asanninnerata oqaluussinissaanut killissimavaa. Ullumikkut pissutsit Noap nalaanisut immata taassuma maligassiaata pitsaasup isumallu taassuma pigisimasaata ilaarnissaannut pissutissaqarluarpugut.
Jesusip nalimini palasit assiginagit inuit najoqqutassiat tunngavigalugit eqqarsarnissaannik ilinniartittarsimavai. Qaqqami oqaluusaa tamatumunnga assersuutissaalluarpoq. Oqaluusaani isumaasoq tamarmi tassaavoq najoqqutassianit siulersortittariaqarneq. (Matîuse, kapitalit 5-7) Jesus tamatuminnga ilinniartitsisinnaasimavoq, Abelitut Noatullu Guuti qanimut ilisarisimagamiuk. Nukappiaraatillunili ilumoortoq tunngaviusoq manna ataqqilluinnarsimavaa: ’Inuup iffiaannaq inuussutiginngilaa, oqaaserli sunaluunniit Guutip qarnanit anisoq inuussutigisarpaa.’ (5 Moses 8:3; Lúkarse 2:41-47) Aap, Guutip najoqqutassiai malillugit inuussagaanni Jehova taassumalu siunertai ilisimasariaqarput, taassumalu iluarisai iluarinngisaalu ilisimasariaqarlugit. Guuti taassumalu piumasaa pillugit najoqqutassiat taama ittut inuunitsinni aqutsileraangamik ’uumassusilittut’ oqaatigineqarsinnaalersarput. — Jeremia 22:16; Eprîarit 4:12.
Najoqqutassiat uummallu
Inatsit piumanngikkaluarluni naalanneqarsinnaavoq, immaqa pillarneqarnissaq siooragiinnarlugu. Akerlianilli najoqqutassiat malillugit iliuuseqaraanni taamatut isumaqarnissaq ilimananngilaq. Najoqqutassiamik paasinnittumut pissusissamisoorluinnartarpoq najoqqutassiaq tamanna naapertorlugu iliornissaq. Josef, Abelitut Noatullu inatsisit tunngavigalugit angeruseq pilersinneqanngikkallarmat inuusimasoq, assersuutigeriartigu. Potifarip nuliata anguseriffiginiaraluarmani ima oqarsimavoq: „Qanoq taama kanngunartigisumik iliussaanga Guutimut ajortuliorlunga?“ Aap, Josefip najoqqutassiaq, angut arnarlu tassaasut ’uinik ataaseq’, nalunngilaa. — 1 Moses 2:24; 39:9.
Ullumikkut silarsuaq najoqqutassianik naapertuilluartunik pigisaqanngilaq. Inuppassuit piumatoqalutik isumartik nakuusernermik kanngunartuliornermillu immertarpaat. Ulorianartua tassaavoq kristumiut, immaqa isertorluinnartukkut, filmini, videoni atuakkaniluunniit ’nerisassanik peqqinnanngitsunik’ silamiutulli pisalernissaminnut ussernartorsiulersinnaanerat. Nersualaagassaasarpugut Josefitut ajortunut tamanut nigorsimanissamut najoqqutassiaq malikkaangatsigu, eqqaamallugu Guutip imminut ilumoorfiginnittut kisiisa ’annikilliornartumi angisuumi’ aniguisissagai. (Matîuse 24:21) Aap, pingaarnerpaamik kisimiitilluta, allanit isigineqartinnata, iliuutsivut kinaassusivitsinnik ersersitsisarput. — Tussiaat 11:4; Ussatit 15:3.
Biibilimi najoqqutassianit siulersorneqartikkutta unioqqutitsilaarfissaasinnaasunik Guutip inatsisaani ujarlerniarnavianngilagut. Inatsimmillu aalajangersimasumik unioqqutitsinngikkaluarluta qanoq ’sinerpartertigisinnaanerluta’ misileraajumanavianngilagut. Eqqarsariaaseq taama ittoq imminut salloqittarneruvoq naggataatigullu uagutsinnut ajoqutaaginnartussaavoq.
Najoqqutassiaq inatsisip tunuliaqutarisaa
Ilumoorpoq inatsiseqarmat kristumiunut atuuttunik. Inatsisit tamakkua uagutsinnik sernissuisuupput, najoqqutassiarpassuarnillu pingaartunik tunngaveqarput. Najoqqutassiat inatsisinut nagguiusut soqutiginngikkutsigik inatsisinut tamakkununnga asanninnerput nillertikkiartussaaq. Itsaq inuianni Israelikkunni pisimasut tamatumunnga takussutissaapput.
Guutip Israelikkut Inatsisinik Qulinik tunisimavai, inatsisillu taakkua siullersaanni guutinik allanik Jehovaanngitsunik pallorfiginninnissaq inerteqqutigineqarpoq. Tamanna tassaavoq inatsit ilumoortumik tunngaviusumik (najoqqutassiamik) tunngaveqartoq, tassa Jehovap tamanik pinngortitsisuuneranik. (2 Moses 20:3-5) Israelikkulli najoqqutassiaq tamanna malippaat? Jehova nammineq ima akivoq: ’[Israelikkut] orpimmut oqartarput: „Ataatagaakkit,“ ujaqqamullu: „Illit erniaraarma.“ Massami tunortik uannut sammisippaat kiinartik pinnagu.’ (Jeremia 2:27) Tamanna sianiitsuliornerullunilu najoqqutaqanngilluinnarneruvoq! Jehovallu uummataanut aliasuutaasimassaqaaq! — Tussiaat 78:40, 41; Jesaja 63:9, 10.
Kristumiuttaaq inatsisinik Guutip tunisimavai. Assersuutigalugu, kristumiut guutipilussiorneq, kinguaassiuutitigut kanngunartuliorneq aammillu atornerluineq nigorsimasussaavaat. (apustilit suliait 15:28, 29) Inatsisit tamakku eqqarsaatigigaangatsigik najoqqutassiat tunngavigisaat paasisarpavut, tassa Guuti tamakkiisumik tunniusimaffigisussaagipput, aappatsinnut ilumuussasugut Jehovalu tassaasoq Inuunermik Tunisiserput. (1 Moses 2:24; 2 Moses 20:5; Tussiaat 36:10) Najoqqutassiat peqqussutit tamakkua tunngavigisaat paasilluarutsigik pingaartilluinnarlugillu, paasissavarput uagutsinnut ajunnginnerpaamik siunertaqartut. (Jesaja 48:17) Uagutsinnut ’Guutip inatsisai artornanngillat’. — 1 Juánase 5:3.
Israelikkut Guutip inassutaanik tunussilluinnartarsimasut, illua’tungaani Jesusip nalaani ’inatsisilerituut’ akerlerluinnaatigut ingasaassiniartuusimapput. Maleruagassiarpassuaqarlutillu ileqqorpassuaqarsimapput Guutimik pallorfiginninnermik artornarsisitsisunik najoqqutassianillu Guutimeersunik matusisunik. (Matîuse 23:2, NEB) Tamanna kinguneqarsimavoq inuit nikallornerannik, neriuutaarunnerannik ilumoortuusaarniarnermullu nakkaannerannik. (Matîuse 15:3-9) Maleruagassiaasa ilarpassui misigittaalluinnarsimapput. Ilaanni Jesusip angut toqungasumik assalik ajorunnaarsilerlugu farisiiarit najuuttut aperisimavai sabbatimi ajunngitsuliornissaq akuerisaanersoq. Akinngivinnerat naaggaarujussuarnertut nipeqarpoq, Jesusillu aliasuutigai ’uummataat manngertorsuummata’. (Mákorse 3:1-6) Farisiiarit sabbatimi uumasuutertik ikilersimappat suliarisarpaat aningaasanik naleqarmat, angummilli arnamilluunniit aatsaat ikiuisinnaapput inuunera navianartorsiorluinnarpat. Maleruagassiat inatsisillu annikitsualuttaat inunnit piliaasut sammingaaramikkik uniaaluit assilissami ujameriattut assigalugit assiliaq tamaat, tassa Guutip najoqqutassiai, takusinnaanngilaat. — Matîuse 23:23, 24.
Allaat meeqqat Biibilimi najoqqutassianik paasinnikkaangamik Jehova ataqqinartissinnaasarpaat. Assersuutigalugu, Rebeccap 13-inik ukiullip ilinniartitsisuata atuartitani ilaanni aperisimavai kina arlaat immeraaterusussanersoq. Amerlanerit taamaaliorumasimanngillat. Aningaasanoornissamulli periarfissat assigiinngitsut taagoreermagit tamarmik, Rebecca kisimi pinnani, nassuerput arlaatigut immeraaterusussinnaallutik. Taava ilinniartitsisup Rebecca aperaa eqquiniummik akikitsunnguamik pisiumassanersoq aningaasat siunertamut ajunngitsumut atorneqassasuuppata. Naaggaaqqippoq, Biibililu tunngavigalugu nassuiaalluni taamaaliorneq aamma immeraannerusoq. Taava ilinniartitsisua atuartitaminut tamanut oqarpoq: ’Isumaga naapertorlugu Rebecca kisimi „najoqqutassiatut“ taasannik maleruaavoq.’ Aap, Rebecca ima akiinnarsinnaagaluarpoq: „Upperisannut akerliuvoq,“ kisianni itinerusumik eqqarsarpoq. Tunngavilimmik nassuiarsinnaavaa immeraanneq kukkunerusoq nassuiarlugulu sooq nammineq aningaasanoorusunnani.
Maligassat soorlu Abelip, Noap, Josefip Jesusillu takutippaatigut sianissutsitsinnik eqqarsarsinnaassutsitsinnillu atuinerput Guutimik pallorfiginninnitsinni qanoq ililluta iluaqutigisinnaagipput. (Ussatit 2:11; Rûmamiut 12:1) Kristumiut utoqqaanertat ajunngitsumik iliussapput ’Guutip savaataanik paarsinerminni’ Jesus ilaartassagunikku. (1 Pîtruse 5:2) Guutip najoqqutassiaanik asannittut Jehovap kisimi oqartussaassusiata ataani ilorrisimaartarnerannut Jesus assersuutissaavoq kusanartoq. — Jesaja 65:14. (wE 15/10 97)