INTERNETIKKUT ATUAGAATEQARFIK Watchtower
INTERNETIKKUT ATUAGAATEQARFIK
Watchtower
Kalaallisut
  • BIIBILI
  • BIIBILILERSAARUTIT
  • ATAATSIMIINNERIT
  • w98 1/1 qupp. 19-24
  • Inuunermut arpanninni uniinnaqinak!

Immikkoortumi matumani isiginnaagassiaqanngilaq.

Ajoraluartumik isiginnaagassiap aanerani ajutoortoqarpoq.

  • Inuunermut arpanninni uniinnaqinak!
  • Napasuliaq Alapernaarsuiffik — 1998
  • Qulequtaaqqat
  • Tamatumunnga assingusut
  • ’Tusakkavut pingaarnerusumik aalajangiullugit’
  • ’Immissinnik oqaaqqissaartarniaritsi’
  • ’Qasujuissuseqartariaqarpusi’
  • Qasusuisaarsinnaavugut
  • Pinertusaarlutit arpagit
    Napasuliaq Alapernaarsuiffik — 2011
  • Jehova oqaluussissussiuk qasuleqinasilu
    Napasuliaq Alapernaarsuiffik — 1990
  • Allakkat naggatissamut aalajaattuarnissatsinnut iluaqutigisinnaasagut
    Napasuliaq Alapernaarsuiffik (Atuaqqissaarutissaq) – 2024
  • Tusakkatit sianigilluaqqissaarniakkit
    Napasuliaq Alapernaarsuiffik — 2002
Amerlanerusut takukkit
Napasuliaq Alapernaarsuiffik — 1998
w98 1/1 qupp. 19-24

Inuunermut arpanninni uniinnaqinak!

’Nikallujuerluta arpanniarta assoruunnitsinni uatsinnut siunertarititaasumi.’ — EPRÎARIT 12:1.

1, 2. Ulluni kingullerni makkunani pisimasut suut Jehovap kiffaasa pissanganartutut isigaat?

UKIUT inuuffigisavut pissangarnarlutillu imaannaanngitsuupput. Ukiut 80-it sinnerlugit matuma siorna Jesus qilammi Guutip naalagaaffiani kunngitut ivertinneqarpoq. Taamaalinerani ’Naalakkap ullua’ tamannalu ilutigalugu aaqqissuussaanermut matumunnga ’naggatissap nalaa’ aallartipput. (sarĸúmersitat 1:10; Daniel 12:9) Taamanerniilli kristumiut nukinginnarnerujartortumik inuunermut arpanniartariaqarsimapput. Guutip ’qamutaa’ qilammeersoq, qilammi peqatigiissortaanut assersuutaasoq Jehovap siunertai naammassiniarlugit ingerlajuartoq, malinniarlugu taassuma kiffai ilungersortuarsimapput. — Hesekiel 1:4-28; 1 Korintumiut 9:24.

2 Guutip innuttaasa naassaanngitsumik inuunissaq anguniarlugu arpanniartillutik nuannaarneq misigisimavaat? Ilaana! Pissangallutik takusimavaat Jesusip qatanngutaasa sinnerisa katersorneqarnerat, nuannaarutigalugulu paasivaat 144.000-it sinnerisa inaarutaasumik naqissuserneqarnerat naammassilersoq. (sarĸúmersitat 7:3, 4) Aammalu pissangaqaat paasigamikku Jehovap kunnginngortitaata killuutini tigoreersimagaa ’nunamit katersugassat’ katersulerlugit. (sarĸúmersitat 14:15, 16) Katersugassallu amerlaqaat! (Matîuse 9:37) Manna tikillugu inuit 5 millioninit amerlanerusut katersorneqareersimapput — ’amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat’. (sarĸúmersitat 7:9) Naluarput amerlangaartut taakku naggataatigut qanoq amerlatigissanersut, inunnit kisinneqarsinnaanngimmata.

3. Qanoq akornusersorneqartaraluarluta nuannaarnerput atatittuartariaqarparput?

3 Arpannitsinni Satanip orlutinniartarpaatigut imaluunniit arriinnerulersinniartarluta. (sarĸúmersitat 12:17) Ullunilu kingullerni makkunani sorsunnernik, kaannersuarnik, nappaalanersuarnik allanillu artornartunik ilisarnaatilinni arpattuarniarneq imaannaasimanngilaq. (Matîuse 24:3-9; Lúkarse 21:11; 2 Timûtiuse 3:1-5) Taamaattorli arpannerup naanissaa qanilliartortillugu uummatikkut nuannaarpugut. Paulusip kristumioqatiminut kajumissaarutaa maleruarniarparput: ’Naalakkami tipaatsuttuinnaritsi; aammalu oqarpunga tipaatsugitsi.’ — Filípimiut 4:4.

4. Kristumiut Filippimiittut anersaaq qanoq ittoq ersersittarsimavaat?

4 Qularnanngilaq kristumiut Paulusip allaffigisimasai ilumut uppernerminni nuannaarsimasut, Paulusimmi ima allaffigai: ’Qatanngutikka, Naalakkami [tipaatsuttuaannaritsi, NV].’ (Filípimiut 3:1) Ilagiit Filippimiittut tunisiumatuullutillu asannittuusimapput, ilungersuussillutik angorniorlutillu kiffartorlutik. (Filípimiut 1:3-5; 4:10, 14-20) Ukiunili hundredelinni siullerni kristumiut tamakkeratik taamaassimapput. Assersuutigalugu, kristumiut juutiusut ilaat Paulusip Eprîarinut agdlagkat-nik allaffigisai isumakuluutigineqarsinnaasimapput.

’Tusakkavut pingaarnerusumik aalajangiullugit’

5. (a) Kristumiut ilagiissaat pilersinneqarmata kristumiut hebriiariusut qanoq ittuusimappat? (b) Kristumiut hebriiariusut ilaasa ukiup 60-ip missaani u.n.k. pissusiat allaatigiuk.

5 Kristumiut ilagiissaat siulliit ukiumi 33-mi u.n.k. Jerusalemimi juutiinnarnik juutinullu ilasiaasunik ilaasortaqarsimapput. Taakku qanoq ittuusimappat? apustilit suliáinik agdlagkat-ni kapitalit siulliit atuarutsigik paasissavarput taakku, allaat malersorneqangaaraluarlutik, angorniortuullutillu nuannaartuusimasut. (apustilit suliait 2:44-47; 4:32-34; 5:41; 6:7) Ukiulli qulillit arlallit qaangiunneranni pissutsit allanngorsimapput, juutillu kristumiunngorsimasut amerlasuut inuunermut arpannerminni ersarissumik arriinnerulersimapput. Taakku ukiup 60-p u.n.k. missaani pillugit ima allassimasoqarpoq: „Nukillaangallutik qasusimallutilluunniit inuupput, ilimagisaminni neriugisaminnilu pakatsisimallutik, piaaralutik unioqqutitsisarput ulluinnarnilu uppissuseqarpallaarnatik. Kristumiuugaluarput, qaaqqusaanermilli naalannassusianik pingaartitsivallaarnatik.“ Kristumiut tanitaasut qanoq ilillutik taamaattunngorsimappat? Paulusip (ukiup 61-p u.n.k. missaani) hebriiarinut allagaasa ilaat misissorutsigik tamanna paasissavarput. Misissorutsigillu uagut ullumikkut taakkunatut anersaakkut nukillaangasunngornissarput pinngitsoortissinnaavarput.

6. Mosesip inatsisaasa ataanni pallorfiginninneq Jesus Kristusimullu uppernermi pallorfiginninneq sukkut assigiinngissuteqarpat?

6 Kristumiut hebriiariusut inuiannit juutiussutsimik pingaartitsivallaartunersuupput. Taakku Inatsisit Jehovap Moses aqqutigalugu tunniussimasai naalalluinnarnerarpaat. Qularnanngitsumik Inatsisit takku juutinit kristumiunngorsimasunit suli pingaartinneqaqaat, immaqa ukiuni hundredelippassuarni tassaasimammata Jehovamut aqqutissatuat, aamma upperisarsiornikkut maluginiarnartumik aaqqissorneqarsimammata, palaseqatigeeqarlutik, pilliuteqartarlutik Jerusalemimilu naalaffeqarlutik silarsuaq tamakkerlugu tusaamasaasumik. Kristumiussuserli taamaanngilaq. Kristumiut anersaakkut ittumik isiginneriaaseqartariaqarput, soorluttaaq Moses taamaassimasoq, ’akissaq [siunissamiittoq] isumagigamiuk’ aamma ’takussaanngitsoq isigalugulusooq iperarnaveersaaramiuk’. (Eprîarit 11:26, 27) Juutit kristumiunngorsimasut amerlasuut anersaakkut isigisinnaassuseqarneq taama ittoq amigaatigaat. Siunnerfeqarluarlutik arpannatik aramarpasillutillusooq ingerlaannarput.

7. Aaqqissuussaaneq manna qimassimagaluarlugu tamanna qanoq inuunermut arpanniarnitsinnut sunniuteqarsinnaava?

7 Ullumikkut pissutsit tamatumunnga assinguppat? Ullumikkut pissutsit taamaavinngikkaluarput. Kisianni kristumiut silarsuarmit usorsitsaartuminngaaneersuupput. Silarsuup periarfissat pissanganartut neqeroorutigisarpai, saniatigullu inuit annertuumik piumasaqarfigalugit. Aamma amerlasuut nunani qularajuttoqarfiusuni namminissarsiortoqarfiusunilu inuupput. Silarsuarmit taama ittumit sunnertikkaluarutta ’uummatitta isai’ taarsisinneqarsinnaapput. (Evfisumiut 1:18) Siunnerfipput takulluarsinnaajunnaarutsigu qanoq ililluta inuunermut arpalluarsinnaassaagut?

8. Ilaatigut sutigut kristumiussuseq Inatsisit ataanni pallorfiginninnermit pitsaanerungaarpa?

8 Kristumiut juutiusut kajumissisinniarlugit Paulusip eqqaasippai kristumiussuseq Mosesip inatsisaanit pitsaanerungaartoq. Ilumoorpoq Jehovap timikkut Israelikkut Inatsisit ataanni innuttarigallaramigit pruffiitit isumassarsisitani aqqutigalugit oqaluffigisarai. Paulusili allappoq maannakkut ’ernermigut oqaluffigigaatigut, taanna tamanik kingornussisussanngortikkaa, taassumuunalu silarsuaq pinngortikkaa.’ (Eprîarit 1:1, 2) Jesus aamma kunnginit Davidimut kingoraartaasunit tamanit, ’peqatigisaminit’, anneruvoq. Allaat inngilinit anneruvoq. — Eprîarit 1:5, 6, 9.

9. Juutit Paulusip nalaani inuusimasut assigalugit sooq Jehovap oqaasii ’tusakkavut pingaarnerusumik aalajangiuttariaqarpavut’?

9 Taamaattumik Paulusip juutit kristumiuusut ima kajumissaarpai: ’Tamanna pillugu tusakkavut pingaarnerusumik aalajangiussavavut, [tammariartuaaqqunata, NV].’ (Eprîarit 2:1) Kristus pillugu ilisimasaqalerneq nuannersorujussuuvoq, kisianni aamma allat pisariaqartinneqarput. Guutip oqaasia aalajangiulluartariaqarpaat innuttaaqatigiinnit juutiusunit avatangiisiminnit sunnertinnaveersaarumallutik. Silarsuup matuma tamatigut sunniiniarnera eqqarsaatigalugu uaguttaaq Jehovap oqaaserisai ’pingaarnerusumik aalajangiuttariaqarpavut’. Taamaaliorsinnaavugut Biibilimik atuaqqissaarneq ileqqorilluarlugu Biibilimillu atuartarnermik pilersaaruteqarluarluta. Soorlu Paulusip hebriiarinut allakkamini kingusinnerusukkut eqqaagaa, ataatsimiigiartarnikkut allanullu upperisatsinnik oqaluussissutiginninnikkut aalajaanneq pisariaqarpoq. (Eprîarit 10:23-25) Taamaattunik suliniartuarnikkut anersaakkut eqqumalluartuarsinnaavugut neriuuterput nuannersoq puigoqqunagu. Isumarput Jehovap eqqarsaataanik immertarutsigu silarsuup matuma uatsinnut iliuuserisinnaasaanit sunilluunniit artorsartinneqassanngilagut ajugaaffigineqassanataluunniit. — Tussiaat 1:1-3; Ussatit 3:1-6.

’Immissinnik oqaaqqissaartarniaritsi’

10. (a) Jehovap oqaasii pingaarnerusumik aalajangiutinngikkutsigik qanoq pisoqarsinnaava? (b) Qanoq ililluta ’immitsinnik oqaaqqissaarsinnaavugut’?

10 Anersaakkut ittut aalajangiutinngitsoorutsigik immaqa Guutip neriorsuutai piviusuunngitsutut isigilissavavut. Ukiuni hundredelinni siullerni kristumiut ilagiissaanniittut tamarmik tanitaannaagallarmata apustilillu ilaat suli inuugallarmata ilaat taamaassimapput. Paulusip hebriiarit ima mianersoqquai: ’Misissoritsi, qatanngutikka, ajortumik uppinngitsumillu uummateqartoqaqqunasi Guutimut uumasumut naalakkunnaarsumik; kisianni ullut tamaasa immissinnik oqaaqqissaartarniaritsi ullumeertoqarallartillugu, ilassinnik ajortip salloqittaaneragut manngertitoqaqqunasi.’ (Eprîarit 3:12, 13) Paulus oqarmat ’misissoritsi’ takutippaa mianersortariaqartugut. Navianartoqarpoq! Uummatitsinni uppernermik amigaateqarneq — ’ajortimik’ taaneqartoq — ineriartulersoorsinnaavoq, Guutimillu ungasilliartulersoorsinnaavugut, qanilliartornagu. (Jâko 4:8) Paulusip eqqaasippaatigut ’immitsinnik oqaaqqissaartaqqulluta’. Qatanngutitta akornanni asaqatigiinneq pisariaqartipparput. „Inuk inoqatiminit immikkoorniartuusoq nammineq piumasani malillugu iliortarpoq, saqitsaassisarpoq allat eqqortuusorisaat soqutiginagit.“ (Ussatit 18:1) Peqatigiinneq taama ittoq pisariaqartikkatsigu ilagiit ataatsimiinnerinut ataatsimeersuarnernullu najuuttariaqartarpugut.

11, 12. Sooq kristumiut ajoqersuutaannik tunngaviunerusunik ilisimasaqarneq naammagissanngilarput?

11 Allakkamini Paulus nangilluni ima naleqaqisumik unnersuussuteqarpoq: ’Qangalimi ajoqersuisunngorunnarsissagaluarlusi Guutip oqaasiisa ilinniaqqaariaqartortaannik kingumut ajoqersoriaqalerpusi immummillu pisariaqalerlusi, nerisassaq mattusooq sapilerassiuk. . . . Inersimasulli nerisassamik mattusuumik pisariaqarput, tassa misigisaqartarnermit sungiusagaasunik sianissutillit ajunngitsorlu ajortorlu immikkoorsusiisigut ilisarisinnaallugit.’ (Eprîarit 5:12-14) Ersarippoq kristumiut juutiusut ilaat paasinninnikkut siumukanngitsoorsimasut. Inatsisinik kipineqarnermillu qaammarsaaneq akuerissallugu nangaassuteqarsimagunarput. (apustilit suliait 15:27-29; Galâsiamiut 2:11-14; 6:12, 13) Ilaasa immaqa suli ileqqutoqqat, soorlu sabbatisiorneq ullormillu saammaannartitsivimmik ukiumoortumik nalliuttorsiutiginninneq, pingaartippaat. — Kulorsamiut 2:16, 17; Eprîarit 9:1-14.

12 Taamaattumik Paulus ima allassimavoq: ’Taamaattumik Kristusimik ajoqersuutaasut aallaqqaataat qaangiinnarlugit inersimassummut ingerlaniarta.’ (Eprîarit 6:1) Marathonimik arpattartup nerisartakkani sianigilluaraangamigit isorartuukkut qasunartukkut arpannissaminut qasujaassuseqarnerusarpoq. Tamatumunnga assingusumik kristumiup inuussutissani anersaakkut ittut — ’ajoqersuutit aallaqqaataat’ kisiisa pinnagit — sianigilluarunigit arpaffissaq naallugu arpannissaminut periarfissaqarnerussaaq. (Naleqqiuguk 2 Timûtiuse 4:7.) Tassa sallusuissutip ’silissusia, takissusia, itissusia kingissusialu’ soqutigalugit sammisariaqarpai, taamaalilluni inersimalluarnissamut siumukarluni. — Evfisumiut 3:18.

’Qasujuissuseqartariaqarpusi’

13. Kristumiut hebriiariusut siornatigut uppissusertik qanoq takutissimavaat?

13 Ukiumi 33-mi u.n.k. piinsip ulluata kinguninnguagut kristumiut juutiusut ingasattumik malersorneqaraluarlutik aalajaattuarsimapput. (apustilit suliait 8:1) Imaassinnaavoq Paulusip tamanna eqqarsaatigigaa ima allakkami: ’Ullulli qaangiuttut eqqaaniarsigik, taamani qaammarsagaalereerlusi naalliullusi sorsungaarneq ilalaarlusi atorassiuk.’ (Eprîarit 10:32) Qasusuillutik aalajaannerata Guutimut asanninnerat takutippaa taannalu pillugu nakimaatsumik oqalussinnaatillugit. (1 Juánase 4:17) Paulusip kajumissaarpai siooranngissusertik taamaateqqunagu uppernermik amigaateqarnermit. Ima oqarfigai: ’Ilalaarnermi ilissinnut atoriaqarpoq, Guutip peqqusaa naammassisimallugu unnersuutigisaq pigileqqullusiuk; qilannguamimmi aggersussaq aggerumaarpoq mulussananilu.’ — Eprîarit 10:35-37.

14. Naak ukiorpassuarni Jehova kiffartorfigisimagaluarlugu piviusut suut qasusuittuarnissatsinnut ikiorsinnaavaatigut?

14 Uagummi ullumikkut inuusugut? Amerlanerusugut sallusuissut ilikkaqqaaratsigu ilungersuussivugut. Sulili ilungersuussinerpugut? Imaluunniit ’asannissuserput siulleq soraarussimavarput’? (sarĸúmersitat 2:4) Ilungersuussinerput nillertunngorsimava, immaqalu Harmagedon utaqqikatallugu pakatsisimavugut? Eqqarsaatigeriaruk. Sallusuissut suli siornatigutut naleqartigaaq. Jesus suli Kunngigaarput qilammi. Sulilu nunarsuarmi paratiisiusumi naassaanngitsumik inuuneq neriugaarput, Jehovalu suli attaveqarfigaarput. Puigoqinagulu: ’Aggersussaq aggerumaarpoq mulussananilu.’

15. Jesusitut kristumiut ilaasa qanoq ilillutik ingasattumik malersorneqarneq nikallujuillutik atorsimavaat?

15 Taamaattumik Paulusip oqaasii Eprîarit 12:1, 2-mi allassimasut tulluartorujussuupput: ’Uaguttaaq oqilaaqutaasut tamaasa ajortilu uatsinnik ninniortitseqqajaaginnartoq iperartigik, nikallujuerlutalu arpanniarta assoruunnitsinni uatsinnut siunertarititaasumi, uppernermillu aallarniisoq inerititsisorlu Jesus aarlorfigisigu; taassuma tipaatsuutissaq imminut saqqangiussaq pillugu ilalaarluni [nappagaq nalliutsitsivik, NV] atorpaa, mitaatigineqarnini soqutiginagu, ingissimavorlu Guutip issiavissaarsuata talerpiata tungaanut.’ Ulluni makkunani kingullerni Guutip kiffaasa artornartorpassuit atortariaqarsimavaat. Jesus naalliulluni toqunini tikillugu aalajaattuarsimasoq assigalugu, qatanngutitta ilaasa ingasattumik malersugaaneq — tigusanut inissiarsuit, naalliutsitaaneq, pinngitsaalisaalluni arneriffigineqarneq allaallu toqutaaneq — aalajaallutik misigisimavaat. (1 Pîtruse 2:21) Taakkua assuarnaassusiat eqqarsaatigalugu uummatikkut killinneqangaannginnerpugut?

16, 17. (a) Kristumiut amerlanersaasa uppernerminnut unamminiarnartut suut atortariaqartarpaat? (b) Suna eqqaamagutsigu inuunermut arpattuarnissatsinnut iluaqutigissavarput?

16 Amerlanersatsinnut Paulusip oqaasii tulliuttut tunngapput: ’Sulimi ajortimut assoruunnissinni aak tikillugu assortuinngilasi.’ (Eprîarit 12:4) Taamaattoq aaqqissuussaanermi matumani sallusuissummik maleruaaniarneq oqitsuunngilaq. Ilaasa suliffimminni atuarfimmiluunniit ’ajortuliortunit assortorneqartarneq’ nikallussutigisarpaat, mitaatigineqartaramik imaluunniit ajortuliornissamik usserniarneqartaramik. (Epr. 12:3) Usserniarneqarnerit pissutigalugit ilaasa Guutip najoqqutassiaanik qutsissunik maleruaaniarnertik aalajangiukkunnaarsimavaat. (Eprîarit 13:4, 5) Amerlanngitsut tunussisut toqunartumik sunniiniarnerannut tusarnaarsimasut anersaakkut aalajaatsuunertik annaasimavaat. (Eprîarit 13:9) Allat nuannaarnertik katassimavaat inuttut assigiinngissutit pissutigalugit. Kristumiut ilaat aamma aliikkutassiat sukisaarsaatillu sammivallaaramikkik anersaakkut nukeerussimapput. Amerlanersavullu pissutsit aaqqissuussaaneranni matumani inuunermi ajornartorsiutinit tatineqartarput.

17 Soorunami atortariaqakkat tamakku pissutigalugit ’aak tikillugu assortuisariaqarsimanngilagut’. Ilaannikkullu ajornartorsiutivut nammineq kukkusumik aalajangersimanitsinnik pissuteqartarput. Tamakkuli tamarmik uppernitsinnut atatillugu unamminiarnartuupput. Taamaattumik Jesusip qasusuissutsikkut naammalluinnartumik maligassiaa eqqaamajuartariaqarparput. Neriuutitta qanoq nuannertigissusia qanortoq puigunngisaannartigu. Jehovap ’ujarlersini akilerumaarai’ qularilinngisaannartigutoq. (Eprîarit 11:6) Taamaaliorutta inuunermut arpattuarnissatsinnut anersaakkut nukissaqassaagut.

Qasusuisaarsinnaavugut

18, 19. Oqaluttuarisaanermut atatillugu pisimasut suut takutippaat kristumiut hebriiariusut Paulusip isumassarsisitaalluni unnersuussutai maleruarsimagaat?

18 Kristumiut juutiusut Paulusip allagai qanoq qisuariarfigaat? Ukiut arfinillit Eprîarinut agdlagkat allanneqarnerata kingorna Judæami sorsuttoqalerpoq. Ukiumi 66-imi u.n.k. Romamiut sakkutuuisa Jerusalem unguaat, taamaalillutik Jesusip siulittuutaa eqquutillugu: ’Jerusalemili sorsuttorpassuit ilugaat takulerussiuk, taava ilisimassavarsi nungutitaaffissaa qanillisoq.’ (Lúkarse 21:20) Kristumiulli taamani Jerusalemimiittut iluaqutissaannut Jesus nangilluni oqarpoq: ’Taava Judæamiittut qaqqanut qimaalit, Jerusalemillu iluaniittut tassannga anilit, nunaannarmiittullu tassunga isernaveerlit.’ (Lúkarse 21:21) Taamaalilluni Romamiunut sorsunneq misilinneqarneruvoq: Kristumiut juutiusut Jerusalem, juutit upperisaannut qitiusoq naalaffialu alutornangaartoq, qimassanerpaat?

19 Suna pissutigisimanerlugu Romamiut tassanngaannaq tunualerput. Qularnanngitsumik juutit upperisarsiortut isumaqarsimapput tamanna Guutip illoqarfimminnik illernartuusorisaminnik illersuineranut uppernarsaataasoq. Kristumiummi? Oqaluttuarineqarpoq taakku qimaasut. Taava ukiumi 70-imi u.n.k. Romamiut uterput Jerusalemilu nungutilluinnaarlugu inuppassuit toqunerannik kinguneqartumik. ’Jehovap ullua’ Joelimit siulittuutigineqarsimasoq Jerusalemimut eqquuppoq. Kristumiulli ilumoortut tamaaniikkunnaarsimapput. ’Annaanneqarsimapput’. — Joel 3:3-5; apustilit suliait 2:16-21.

20. Nalunnginnatsigu ’Jehovap ullua’ qanillisoq qanoq iliornissatsinnut kajumissaarneqarpugut?

20 Ullumikkut nalunngilarput ’Jehovap ullua’ annerusoq erniinnaq pissutsit aaqqissuussaanerannut matumunnga piumaartoq. (Joel 4:12-14) Naluarput qaqugorpiaq pissanersoq. Guutilli oqaasiata neriorsoqqissaarpaatigut pinngitsoorani piumaartoq! Jehova oqarsimavoq ’eqquutinngitsuussanngitsoq’! (Habakkuk 2:3; 2 Pîtruse 3:9, 10) Taamaattumik ’tusakkavut pingaarnerusumik aalajangiunniartigik’. Uppernermik amigaateqarneq, ’ajorti uatsinnik ninniortitseqqajaaginnartoq’, pinngitsoortinniartigu. Naggatissaq qaqugu nalliutissanersoq tikivillugu aalajaattuarniarta. Eqqaamajuk Jehovap qilammi peqatigiissortai qamutitut ittut ingerlajuarmata. Naammassisassatik naammassissavaat. Taamaattumik tamatta inuunermut arpattuarniarta uniinnarnaveersaarluta! (wE 1/1 98)

Eqqaamaviuk?

□ Paulusip Filippimiunut kajumissaarutaa suna maleruarutsigu inuunermut arpanniarnitsinni iluaqutigissavarput?

□ Qanoq ililluta silaarsuup matuma allamut saatitsiniarneri assortorsinnaavavut?

□ Qanoq ililluta arpanniarnitsinni qasusuinnissatsinnut ikioqatigiissinnaavugut?

□ Suut ilaatigut kristumiu arriinnerulersissinnaavaat?

□ Jesusip maligassiaata qanoq qasusuinnissatsinnut ikiorsinnaavaatigut?

[Qupp. 22, 23-mi assiliartat]

Kristumiu inuunermut arpanniarnermini silarsuup matuma neqeroorutaanit allamut saatinneqanngisaannassaaq

[Qupp. 24-mi assiliartaq]

Jehovap ’qamutaa’ qilammiusoq taassuma siunertaanik sumilluunniit naammassinninngitsoortinneqarsinnaanngilaq

    Kalaallisut (1985-2025)
    Aniffissaq
    Iserfissaq
    • Kalaallisut
    • Ingerlateqqiguk
    • Inissiissutit
    • Copyright © 2025 Watch Tower Bible and Tract Society of Pennsylvania
    • Atuinermut piumasaqaatit
    • Paasissutissanik atueriaaseq
    • Nammineq inissitassat
    • JW.ORG
    • Iserfissaq
    Ingerlateqqiguk