Guuti saqeqatigiuaruk
’Anersaaq najortigalugu saqigitsi, uinngullu pilerissusii naammassinagit.’ — GALÂSIAMIUT 5:16.
1. (a) Enokip nalaani pissutsit qanoq ittuuppat, qanorlu sivisutigisumik taassuma Guuti saqeqatigaa? (b) Noap qanoq sivisutigisumik Guuti saqeqatigaa, qanorlu annertutigisumik akisussaaffeqarsimava?
BIIBILIMI allassimavoq Enok ’Guutip saavani inuusoq’, imaluunniit ’Guuti saqeqatigigaa’. Naak inunnik ajuallannartunik oqaasilinnik soqqusaallutillu ajortuliortunik avatangiiseqaraluarluni 365-inik ukioqarluni toqunissi tikillugu Guuti saqeqatigiuarsimavaa. (1 Moses 5:23, 24; Jûtarse 14, 15) Aammattaaq Noa „Guutip saavani inuuvoq“. Taamaaliorpoq ilaquttani pilersortillugit, silarsuarmit inngilinit pikitsitsisunit taakkualu qitornaanit nakuuserniartunit sunnerneqarneq assortuutigalugu aammalu umiarsuaq angisooq taamani umiarsuarnit tamanit annerusoq sanaatigalugu. Ulersuup kingorna Guuti saqeqatigiuarsimavaa, aamma Babelimi Jehovamut pikitsitsisoqaleqqimmat. Aap, Noap 950-inik ukioqarluni toqunissi tikivillugu Guuti saqeqatigiuarsimavaa. — 1 Moses 6:9; 9:29.
2. ’Guuti saqeqatigalugu’ qanoq paasisariaqarpa?
2 Biibilimi allassimammat angutit upperluartut taakku Guuti ’saqeqatigigaat’ assersuutaasumik isumaqartariaqarpoq. Isumaqarpoq Enok Noalu inuunerminni takutikkaat Guutimut uppissuseqarluarlutik. Jehovap peqqussutaatut iliortarput taassumalu inunnik iliorfiginninneranik ilisimasaqarnertik naapertorlugu inuullutik. (Naleqqiuguk 2 Israelikkut 7:17.) Guutip oqaaserisimasai iliuuserisimasaalu akueriinnarnagit imminnut peqqussutai tamaasa maleruartarpaat — tassa inuttut naammalluinnanngitsutut sapinngisartik tamaat maleruaaniarlutik. Assersuutigalugu Noa „Guutip peqqusineratorluinnaq iliorpoq“. (1 Moses 6:22) Noap peqqussutigineqartut siusinaaruttarsimanngilai maleruanngitsoortarsimanagillu. Jehova Guuti saqeqatigigamiuk qanittumik attaveqarfigaa, ammasumik qinnuigisinnaallugu ilitsersuutaalu pingaartillugit. Illittaaq taamaaliortarpit?
Inooriaaseq nigugassaanngitsoq
3. Guutimut tunniulluinnarsimasunut tamanut suna pingaaruteqarluinnarpa?
3 Allat Guuti saqeqatigalugu inuulersut takullugit nuannersorujussuuvoq. Taakku Jehovap piumasaa maleruarniarlugu allannguuteqaraangamik takutittarpaat Guutimut iluarisaassagaanni pisariaqavissumik uppernermik pigisaqarlutik. (Eprîarit 11:6) Nuannaarutigaarput ukiuni kingullerni tallimani agguaqatigiissillugu ukiumut inuit 320.000-t sinnerlugit Jehovamut tunniulluinnarsimammata imermullu morsullutik kuisissimammata! Taakkununnga, aap, tamatsinnut Guutip saqeqatigiuarnissaa immikkut pingaaruteqarpoq. — Matîuse 24:13; sarĸúmersitat 2:10.
4. Israelikkut Egyptenimit aniguisimasut amerlanersaat suna pillugu nunamut neriorsuutigisamut isinngillat, naak uppissuseqaraluarlutik?
4 Mosesip nalaani ilaqutariit Israelikkuusut uppissuseqartariaqarput Egyptenimi qaangiiffissiussagamik illumillu matserfiinut aak tarnutissallugu. (2 Moses 12:1-28) Kisianni Immami Aappalaartup killingani takugamikku Faraop sakkutoorpassuinit unguneqalerlutik amerlasuut uppernertik annaavaat. (2 Moses 14:9-12) Tussiaat 106:12-imi oqaluttuarineqarpoq immap naqqagut panertukkut isumannaatsumut anngukkamik Egyptenimiullu sakkutoorpassui immap ulugukkai takugamikkik ’[Jehovap] oqaasii uppereqqileraat’. Tamatumali kinguninngua inoqajuitsumiitillutik Israelikkut imeq, nerisassat siulersorneqarnertillu maalaarutigilerpaat. Alapernaarsuiartortitat nunamit neriorsuutigisamit utersimasut ilaat qulit isumalluanngitsumik nalunaaruteqarmata Israelikkut ersilerput. Soorlu Tussiaat 106:24-mi allassimasoq maanna ’Guutip oqaasii tatiginngilaat’. Egyptenimut uterusunnerupput. (4 Moses 14:1-4) Aatsaat Guutip pissaaneranik immikkut ittumik takusaqaraangamik uppersinnaasarput. Guuti saqeqatiguarsimanngilaat. Taamaattumik Israelikkut taakkua nuna neriorsuutigisaq iserfiginngilaat. — Tussiaat 95:10, 11.
5. Guutimik saqeqatigiinneq eqqarsaatigalugu Korintumiunut agdlagkat áipait 13:5 aamma Ussatit 3:5, 6 qanoq ilinniutigisinnaavavut?
5 Biibilimi ima kajumissaarneqarpugut: ’Immissinnik misiligitsi upperlusi pisarnersusi; immissinnik misilinniaritsi.’ (2 Korintumiut 13:5) ’Upperluni pisarneq’ tassaavoq kristumiut ajoqersuutaannik tamanik maleruaaneq. Inuunerput naallugu Guuti saqeqatigiuassagutsigu taamaaliortariaqarpugut. Guuti saqeqatigissagutsigu uppissuseqartariaqarpugut taannalu tatigilluinnarlugu. (Ussatit 3:5, 6) Taamaaliunngikkutta nakutitsiniuterpassuarnit nakkarfissiarpassuarnillu pisaritissinnaavugut. Soorlu suut?
Imminut tatigivallaarnerup nakutitsisarnera ingalassimajuk
6. Kanngunartuliorneq allasiornerlu pillugit kristumiut tamarmik sumik ilisimasaqarpat, ajortuliornerillu tamakku qanoq isigisarpaat?
6 Biibilimik atuaqqissaartarsimasut Jehovamullu tunniulluinnarsimallutillu kuisissimasut tamarmik nalunngilaat Guutip oqaasiani kanngunartuliorneq allasiornerlu assuarineqartut. (1 Tásalûníkamiut 4:1-3; Eprîarit 13:4) Inassutip tamatuma ilumoornera akueraat maleruarusullugulu. Taamaattorli kanngunartuliorneq Satanip sakkutigisaasa sunniuteqarnerpaasa ilagaat. Sooq taamaappa?
7. Suna pillugu Moabip narsartaani angutit Israelikkuusut piaaralutik eqqunngitsuliorsimappat?
7 Kanngunartuliortut immaqa pilersaarutigisimanngikkaluarpaat. Moabip narsartaani Israelikkut immaqa taamaassimapput. Angutit Israelikkuusut inoqajuitsumi inuunermik qatsussisimasut qularnanngitsumik arnat Moabikkuusut Midjanikkuusullu inussiarnersutut inoroorsartutullu isigisimavaat. Inuilli Jehovasiortuunatik Ba’alisiortuusut, inuit arnanik inuusuttunik (aamma ilaqutariinnit nuimasuuneersunik) aapparinngisaminnik atoqateqartartunik akuerinnittut, qaaqqusinerat Israelikkuusut akuerimmassuk qanoq pisoqarpa? Angutit Israelikkuusut inuit taakkua ilagisaleramikkik eqqunngitsuliornissaminnut usserniarneqarput, inuunertillu akigisariaqarsimavaat. — 4 Moses 22:1; 25:1-15; 31:16; sarĸúmersitat 2:14.
8. Ullumikkut suup kristumiu kanngunartuliornissamut ussersinnaavaa?
8 Suna pissutigalugu ullumikkut ilaat tamatumunnga assingusumik napitittarpat? Kanngunartuliornerup qanoq ajortiginera nalunagu naammanngilaq. Aamma paasisariaqarparput imminut tatigivallaarneq qanoq navianartigisoq, eqqunngitsuliornissamut usserniarneqarnermi sianissuseerutsinneqarumanngikkaanni. — Ussatit 7:6-9; 21, 22; 14:16.
9. Biibilimi mianersoqqussutit suut kanngunartuliornissamut illersorsinnaavaatigut?
9 Guutip oqaasiani toqqaannartumik mianersoqquneqarpugut isumaqaqqunata ima nukittuutigisugut ajortunik ilagisaqartarnikkut ileqqorluttunngorsinnaanngitsugut, assersuutigalugu tv-mi aallakaatitatigut kanngunartuliortunik imalinnit atuagassiatigulluunniit tiingasulerisutinit sunnertissinnaanata. (1 Korintumiut 10:11, 12; 15:33) Allaat pissutsini naleqqulluarpallaanngitsuni uppeqatitsinnik ilaqarneq annertuumik ajornartorsiutinik nassataqarsinnaavoq. Angutit arnallu imminnut kajungissusiat sakkortoorujussuuvoq. Taamaattumik Jehovap peqatigiissortaasa asannittumik mianersoqqusarpaatigut angutaagutta arnamik arnaaguttalu angummik aapparinngisatsinnik eqqarlerinngisatsinnilluunniit kisimeeqateqaqqunata. Guuti saqeqatigiumallugu imminnut tatigivallaarnaveertariaqarpugut Jehovallu mianersoqqussutai maleruartariaqarlugit. — Tussiaat 85:9.
Inunnik ersinermit qunutitaaqinak
10. Inunnik ersigisaqarneq qanoq napiaaniutinngortarpa?
10 Ussatit 29:25-mi navianartoq alla eqqaaneqarpoq: „Inunnik qunugisaqarneq napiaaniutinngortarpoq.“ Napitinniutit ilaat nigaqarput uumasup qungasiatigut niuatigulluunniit sukattartumik naakkiussutissamik. (Job 18:8-11) Tamatumunnga assingusumik inunnik ersigisaqaraanni nakimaatsumik oqalunneq Guutillu iluarisaanik iliorneq nangaassutigineqarsinnaalervoq. Allanut iluarisaajumaneq nalinginnaavoq, kristumiullu allat isumaat sumiginnarnianngilaat. Oqimaaqatigiissaarinissaq pisariaqarpoq. Inuit allat qisuariarnerat isumakuluutigalugu Guutip inerteqqutigisaanik iliorutta imaluunniit Guutip oqaasiani peqqussutigineqartunik iliunngitsoorutta napitissimassaagut.
11. (a) Inunnik ersigisaqarneq qanoq pinngitsoortinneqarsinnaava? (b) Jehovap qanoq ililluni kiffani inunnik ersinermut akiuillutik ilungersuussisut ikiorsimavai?
11 Nammineq inuttut pissutsitta napiarniutinut tamakkununnga illersorsinnaanngilaatigut, ’Jehovamilli tunaarinninnerup’ illersussavaatigut. (Ussatit 29:25b) Jehova tunaarigaanni allaat inuk ittoorajuttuugaluaq qunusuissinnaallunilu aalajaassinnaavoq. Satanip pissutsinik aaqqissuussineranit tatineqartuartilluta inunnik ersigisaqarneq mianersuutigisariaqarparput. Pruffiiti Elias qunusuilluni kiffartorsimavoq, Jesabelilli toqukkumalluni sioorasaarmani ersilluni qimaavoq. (1 Kunngit 19:2-18) Tatineqarami Peterip qunulluni Jesus Kristus nalunerarlugu miserratigaa, ukiullu arlallit tamatuma kingorna qunulluni uppernermut akerliusumik iliuuseqarpoq. (Mákorse 14:66-71; Galâsiamiut 2:11, 12) Eliasilli Peterillu anersaakkut ikiorneqarnissartik akueraat, Jehovalu tunaaralugu iluarisaallutik kiffartorfigaat.
12. Ullumikkut maligassiat suut takutippaat ilaasa inunnik ersigisaqarneq ajugaaffigisimagaat Guutillu iluarisaanik iliortuarlutik?
12 Ullumikkuttaaq Jehovap kiffaasa amerlasuut ilikkarsimavaat ersinerup napiarniutaa ingalassimassallugu. Guyanami nalunaajaasoq inuusuttuaraq ima oqaluttuarpoq: „Atuarfimmi ilagisartakkanit tatineqarneq assortorniassagaanni ilungersortariaqarpoq.“ Nangillunili oqarpoq: „Jehovamut uppernerma taamaaliornissannut nakussatsittarpaanga.“ Upperisaa pissutigalugu ilinniartitsisuata atuartut tamarmik saanni illaruaatissanngortimmani nipaatsumik Jehova qinnuigaa. Kingusinnerusukkut ilinniartitsisoq kisimeeqatigalugu pissuserissumik nalunaajaaffigaa. Beninimi illoqarfigisaminut tikeraarluni angutip inuusuttup Jehovap piumasaqaataanik ilinnialersimasup aalajangerpaa guutipiluup assinga ataatami sanasimasaa iginniarlugu. Inuusuttup nalunngilaa guutipiluk uumassuseqanngitsoq siooraginngilaa, aammali nalunngilaa taamaalioruni illoqarfimmioqatimi kamallutik toqussinnaagaanni. Jehova qinnuigaa, unnuakkullu orpippassuarnukarpoq guutipilullu aserorlugu. (Naleqqiuguk Eqqartuussisut 6:27-31.) Dominikanske Republikimi arnap Jehova kiffartorfigilermagu, uiata qinigassippaa nammineq Jehovaluunniit qineqqullugu avinniarlugulu sioorasaarlugu. Qunulluni upperisani taamaatippaa? Ima akivoq: „Allasioraluaruma kanngusussaanga. Kisianni Jehova Guuti kiffartorfigigakku kanngusuutiginngilara!“ Jehova saqeqatiguarpaa, kingusinnerusukkullu uia aamma Jehovap piumasaanik iliulerpoq. Ataatarput qilammiusoq Jehova tatigilluinnarutsigu uaguttaaq inunnik ersigisaqarata Jehovap iluarisaanik iliortuarsinnaavugut.
Siunnersorneqarneq suusupageqinagu
13. Timûtiusimut agdlagkat sujugdlît 6:9-mi napiarniut suna tikkuarneqarpa?
13 Napiarniutit ilaat uumasunik nalaatsoornikkut sanioqquttunik pisaqartarput, allalli naratsat atorlugit piniagassat ussassaartarpaat. Pisuussutit inuppassuarnut taama sunniuteqartarput. (Matîuse 13:22) 1 Timûtiuse 6:8, 9-mi kajumissaarneqarpugut nerisassanik atisassanillu naammaginneqqulluta. Taava nangilluni mianersoqqussuteqarpoq: ’Pisuunngorumasulli usserneqarlutillu napititaasarput silaqanngitsorpallattunillu ajoqutaasunillu pilerigisarpassuaqalersarlutik; tamakkua inuit aserornermut tammarnermullu kiviartortittarpaat.’
14. (a) Suna pillugu ilaasa ’nerisassanik atisassanillu naammattaqqussut’ susuupagisinnaavaat? (b) Pisuussutit eqqunngitsumik nalilerutsigik qanoq ililluta Timûtiusimut agdlagkat sujugdlît 6:9-mi mianersoqqussut susuupagisinnaavavut? (c) ’Isinut pilerinartut’ qanoq ilillutik napiarniutinut tappiilliortissinnaavaatigut?
14 Inuppassuit taamaalillutik napititaasarput mianersoqqussut eqqumaffiginnginnamikku. Sooq? Biibilimi unnersuussutigineqartutut ’nerisassaqarneq atisassaqarnerlu’ naammaginagit pingaarniartuullutik pisuunerusutut inoriaaseqarusunnerpat? Biibilimi mianersoqqussut susuupaginerpaat isumaqarlutik inuit pisorsuit kisimik pineqartut? Biibili naapertorlugu pisuunngorumaneq tassaavoq nerisassanik atisassanillu naammaginninnginneq. (Naleqqiuguk Eprîarit 13:5.) Pallorfiginninnerup ilumoortup soqutigisai ’isinut pilerinartunit’ tunulliutsinneqarnerpat — tassa anersaakkut ittut pilliutigineqarpat takusanik pigisaqarusunnermit? (1 Juánase 2:15-17; Haggaj 1:2-8) Biibilimi siunnersuutigineqartut qulakkeerlugit maleruaraanni Guutilu saqeqatiguaraanni taassumunnga kiffartorneq inuunermini salliutittaraanni pilluarnarnerungaarpoq!
Inuunerup isumakuluutai qanoq ilillutik anigorneqarsinnaasut
15. Suna pillugu paasinarpa Jehovap kiffai amerlasuut isumakuluuteqartut, taakkualu napiarniut suna eqqumaffigisariaqarpaat?
15 Inuunerup pisariaqartitaanik isumakuluuteqarneq pisuunngorumanermit nalinginnaaneruvoq. Jehovap kiffai amerlasuut pigisaqarpallaarnatik inuusariaqarput. Ulloq naallugu suleruloortariaqarput atisassat, inigisassaq nerisassallu pisariaqavissuinnaat pisinnaajumallugit. Allat, namminneq ilaqutariilluunniit iluanni, nappaatit utoqqalinerlu atortariaqarpaat. Pissutsit taamaattut anersaakkut ittunik tunulliutsitsisinnaapput. — Matîuse 13:22.
16. Jehovap qanoq ililluni inuunermut tunngatillugu tatineqarnerup atornissaanut ikiortarpaatigut?
16 Jehovap asannilluni paasitippaatigut Messiasip naalakkersuinerata ataani aniguisinneqassasugut. (Tussiaat 72:1-4, 16; Jesaja 25:7, 8) Inuunerup matuma tatisinerup akiornissaanut nakussatsittarpaatigut pingaarnersiuilluta tulleriiaarinissatsinnik siunnersorluta. (Matîuse 4:4; 6:25-34) Siornatigut kiffaminut ikiuisimaneranik oqaluttuat siunissamut neriuutissaqartippaatigut. (Jeremia 37:21; Jâko 5:11) Nakussatsinneqarpugut qulakkeersinnaagatsigu qanorluunniit pisoqassagaluarpat Jehovap kiffani ilumoortut asajuassagai. (Rûmamiut 8:35-39) Jehovamik tunaarinnittut neriorsuut manna tatigilluinnarsinnaavaat: ’Iperassanngilakkit qimassanatillu.’ — Eprîarit 13:5.
17. Maligassiat suut takutippaat ajornakusoortoqaraluarluni Guuti saqeqatigineqartuarsinnaasoq?
17 Taama qularunnaarsinneqaramik kristumiut Guuti saqeqatiguarsinnaavaat silamiutut isiginneriaaseqaratik. Nunani amerlasuuni piitsut akornanni isumaqartoqarpoq ilaquttat isumaginiarlugit pigisaqarnerusunit tillikkaanni tillinnerunngitsoq. Upperlutilli saqisut taamaaliorumanngillat. Guutimut iluarisaaneq pingaartinneruaat tatigalugulu taassuma peqqusersuissusertik akilerumaaraa. (Ussatit 30:8, 9; 1 Korintumiut 10:13; Eprîarit 13:18) Indiami uillarnerup misigisimavaa eqiasuissutsimigut isumassarsillaqqinnermigullu iluatsitsisinnaalluni. Pissutsit atortariaqakkani isumatsassutiginagit tatigaa Guutip naalagaaffia naapertuilluassusialu piniaqqaarunigit ernerminik imminillu isumaginninniarluni ilungersuussinini Jehovap pilluaqqussagaa. (Matîuse 6:33, 34) Nunarsuaq tamakkerlugu inuit tuusintilikkuutaat takutittarpaat artornartunik atugaqaraluarlutik Jehova ’qimarravigalugulu pallittaalisaralugu’. (Tussiaat 91:2) Aamma illit pillutit taama oqartoqarsinnaava?
18. Qanoq ililluta Satanip silarsuaani napiarniutit ingalassimasinnaavavut?
18 Pissutsinik aaqqissuussaanermi matumani inuutilluta napiarniuteqartuassaaq ingalassimasariaqakkatsinnik. (1 Juánase 5:19) Biibilimi tamakkuninnga mianersoqquneqarpugut paasitinneqarlutalu qanoq ililluta ingalassinnaanerivut. Jehova asagutsigu peqqinnartumillu mianerigutsigu napiarniutit tamakku pinngitsoortissinnaavavut. ’Anersaaq najortigalugu inuugutta’ silamiutut isiginnittaaseqalertariaqanngilagut. (Galâsiamiut 5:16-25) Jehovamut attaveqarnerput allanit tamanit pingaarnerutikkutsigu immikkut pisinnaatitaaffeqassaagut naassaanngitsumik taanna saqeqatigisinnaallugu taassumunngalu tatiginnittumik attaveqartuarluta. — Tussiaat 25:14. (wE 15/1 98)
Qanoq akissavigit?
□ Sooq imminut tatigivallaarneq napiarniutaava?
□ Suup inunnik ersigisaqarnermut illersorsinnaavaatigut?
□ Suut pissutigalugit pisuunngorumanerup navianassusianik mianersoqqussutit sumiginnaalersinnaavugut?
□ Qanoq ililluta inuunermut tunngatillugu isumakuluutit napiarniutaanngitsoortissinnaavavut?
[Qupp. 16, 17-imi assiliartaq]
Amerlasuut inuunertik naallugu Guuti saqeqatigiuarsimavaat