Nersualaarineq imaluunniit qujanarniarneq?
IMA oqarfigineqarputit: „Nutsatit kusanangaaramik!“ Ilumoorluni imaluunniit qujanarniaannarluni taamatut oqarnerpa? „Atisatit tulluaringaarakkit!“ Ilumoorluni imaluunniit qujanarniaannarluni taamatut oqarnerpa? „Aatsaat taama mamartigisumik nerivunga!“ Ilumoorluni imaluunniit qujanarniaannarluni taamatut oqarnerpa? Taamatut nersualaarneqaraangatta immaqa eqqarsartarpugut ilumoornersoq imaluunniit iluareqqusaaginnarluni taamatut oqaannarnersoq.
Qanoq ililluta paasisinnaavarput inuk nersualaarisoq ilumoornersoq imaluunniit asuli oqaannarnersoq? Tamanna pisariaqarami? Oqaasii ilumoortutut akueriinnassannginnerpavut nuannaarutigalugillu? Uagummi allanut nersualaarigaangatta? Allanik nersualaarisarnitsinni pissutiginiakkavut isumaliutigeqqissaarnikuuavut? Tamakkua isumaliutigeqqissaarutsigik ilisimassuseqarnissatsinnut Jehova Guutimullu unnersiutissaasumik oqqatta atornissaanut iluaqutigissavarput.
Nersualaarineq qujanarniarnerlu
Nersualaarineq Webster’s Dictionary-mi nassuiarneqarluni tassaanerarneqarpoq akuersaarnermik ilaliinermillu ersersitsineq, aammagooq isumaqarsinnaalluni ataqqinartitsineq imaluunniit unnersiutiginninneq. Soorunami isumai kingulliit marluk Jehova Guutimik unnersiutiginninnermut taamaallaat atorneqarsinnaapput. Tamanna pallorfiginninnerup ilumoortup ilagaa pingaartoq, soorlu tussiaasiortoq isumassarsisitaasoq ima oqarsimasoq: „Iluaqaaq Guuterput erinalersorfigissallugu, pissusissamisoorpoq erinalimmik unnersiutigissallugu.“ „Anerneqartut tamarmik [Jehova] erinalimmik unnersiutigissavaat!“ — Tussiaat 147:1; 150:6.
Tamannali isumaqanngilaq inuit nersorneqarsinnaanngitsut. Taamaaliortoqarsinnaavoq ilaliinikkut, akuersaarinninnikkut imaluunniit qiimmaallannartunik oqaaseqarnikkut. Jesusip assersuusiaasa ilaanni naalakkap kiffani ima oqarfigaa: ’Qujanaq kiffaasutit ajunngitsoq ilumoortorlu.’ — Matîuse 25:21.
Akerlianilli qujanarniarneq nassuiarneqarluni tassaanerarneqarpoq ilumuunngitsumik ingasattajaartumillu nersualaarineq, taamaaliortorlu namminissarsiortumik pissutiginiagaqarajuppoq. Pisuusaartumik imaluunniit ingasaallugu nersualaarisup iluaritinnissani timikkullu iluanaarniarfiginninnissani imaluunniit nersualaakkaminik imminut pisussaaffeqartutut misigilersitsinissani siunertarisarpaa. Taamaattumik ingasaallugu nersualaarisut namminissarsiortumik pissutiginiagaqartarput. Jûtarse 16-imi oqaatigineqartutut taamaaliortut ’oqqartullutillu pisarput inuit iluaqutissarsiffiginiakkatik nersortuusaarlugit’.
Biibili qanoq oqarpa?
Inoqatinik nersualaarineq pillugu Biibili qanoq oqarpa? Tamatumani Jehovap maligassiuussimavaatigut. Biibilimi oqaatigineqarpoq Jehovap piumasaatut iliorutta nersorneqassasugut. Apustili Paulus oqarsimavoq ’kialuunniit immikkut nersornaatissani Guutimit piumaaraa’. Peterip oqaatigaa ’uppersuserput misiligaalluartoq nersornaatigilersinnaagipput’. Jehovap inunnik nersorinnittarnerata paasitippaatigut allanik ilumoorluni nersualaarineq ajunngitsuusoq, asannittuliornerulluni iluaqutaallunilu, puiorneqartariaqanngitsorlu. — 1 Korintumiut 4:5; 1 Pîtruse 1:7.
Biibili naapertussagaanni nersualaartiffigisinnaasavut allat tassaapput oqartussaasut. Taakkua pissuserissaarnerput malugalugu ilumoorlutik nersualaarsinnaavaatigut. ’Ajunngitsuliorit; taava taakkua [oqartussaasut] nersussavaatsit,’ Biibilimi allassimavoq. (Rûmamiut 13:3) Aammattaaq inunnit allanit siunertapiloqanngitsunit ilumoortumik nersualaarneqarsinnaavugut. Ussatit 27:2-mi isumassarsiarititaasumik ima allassimasoqarpoq: „Allap nersorlisit, illit imminut pinnak, illiunngitsoq taamaaliorli, illit nammineq qarlutit pinnatik.“ Tassuuna erserpoq inunnit nersualaarneqarnermik akuerinninneq eqqortuusoq.
Qujanarniarfiginnillunili nersualaarineq imaluunniit nersualaarneqarneq eqqarsaatigalugu taamaanngilaq. Sooruna qujanarniarneq Jehovap isaani taama iluanngitsigisoq? Siullermik, pisuusaarnerummat, Jehovallu pisuusaarneq iluarinngilaa. (Naleqqiuguk Ussatit 23:6, 7.) Aappassaanik, sallunerummat. Inuit Guutip iluarinngisaanik pissusillit pillugit tussiaasiortoq ima allassimavoq: „Oqaluffigisarput sallumik imminnut qarlunik tatigisassaanngitsunik uummammillu marloqiusumik. [Jehovap] nungutissavai qarlut peqqusersiortut tamaasa.“ — Tussiaat 12:3, 4.
Kiisalu qujanarniarneq asanninngitsuliorneruvoq namminissarsiornermillu pissuteqarluni. Ilumuunngitsumik oqaluttut eqqartoreeramigit Davidip ima oqartarnerarpai: „Oqarput nakuussutigaarput, qarluvut illersortigaavut. Kina naalagarissagatsigu?“ Namminissarsiortut taama ittut Jehovap tassaanerarpai ’inukuluusunik qunutitsisut’. Oqqatik qujanarniartut atortarpaat allanut nakussatsissutissamuunngitsoq, kisianni taakkununnga ajoqutissamut. — Tussiaat 12:5, 6.
Qujanarniarneq napitiffissaavoq
„Tulliminut qujanarniartup ivertittarpai napiaaniutit taassumunnga naakkiuffissat.“ Kunngi Salomon ilumooqisumik taama oqarsimavoq. (Ussatit 29:5) Farisiiarit qujanarniarnermikkut Jesusimut napitiffissarsiorniarsimagaluarput ima oqarlutik: ’Ajoqersuisoq, ilisimavatsigit ilumoortutit Guutillu aqqutigeqqusaa ilumoorlutit ajoqersuutigigit inummillu naalanniagaqarnak, inuup kinaassusia soqutiginnginnakku.’ Taamatut oqarfigineqarluni tulluunnarsimassagaluaqaaq! Oqaasiinilli tusarnersaakkanit Jesus nakutitaanngilaq. Nalunngilaa ajoqersuutini ilumoortoq upperinngikkaat kaasarimulli akileraartarneq pillugu oqaatsikkut nakkarfissarsiorniarsarigaanni. — Matîuse 22:15-22.
Ukiuni hundredelinni siullerni kunngiusimasoq Herodes Jesusimit allaanerulluinnarsimavoq. Taanna ilaanni illoqarfimmi Cæsareami oqalugiareermat inuit ima suaartarfigisimavaat: ’Tamassa inuunngitsup Guutiusup nipaa!’ Taamatut ingasattumik nersorinninnerat pillugu naveernagit Herodesip akueriinnarpaa. Jehovap inngilia akuliukkasuarmat quperlut Herodes saassuppaat toquneranik kinguneqartumik. — apustilit suliait 12:21-23.
Kristumiu inersimalluartoq qujanarniarnermik eqqumaffiginnittariaqarpoq. Ilagiinni utoqqaanertat ingammik eqqartuussisutut aalajangiiffigisassaminnit nersualaarneqarpallaaraangamik mianersortariaqarput, soorlu utoqqaanertaqatiminnut naleqqiunneqarlutik inussiarnernerunerarneqarlutillu paasinninnerunerarneqaraangamik.
Qujanarniarnerup navianaataa alla Biibilimi erseqqissumik eqqaaneqarpoq angutip inuusuttup arnamit allasiorniartumit kanngunartuliornissamut usserniarneqartup oqaluttuarineqarneratigut. (Ussatit 7:5, 21) Mianersoqqussut tamanna ullumikkumut naleqquteqaaq. Ukiut tamaasa ilagiinnut kristumiunut ilaasortaajunnaarsinneqartut ilarpassui kanngunartuliorneq pissutigalugu anisitaasarput. Taamatut ingasattumik ajortuliorneq qujanarniarfigineqarnermik aallaaveqarsimasinnaanerpa? Inuit nersualaarneqarnissartik ajunngitsumillu oqaatigineqarnissartik kissaatigeqimmassuk qujanarniartup oqaasiisa tusarnersut kristumiup eqqunngitsuliunnginnissamik aalajangiusimanninnera sanngiillisikkiartuaalersinnaavaa. Qujanarniarneq mianersorfiginngikkaanni ajortorujussuarmik kinguneqarsinnaavoq.
Qujanarniarneq akioruk
Qujanarniarfiginninneq qujanarniarfigineqartup imminut nuannarissusianik nersoqqutussusianillu nakussassaasarpoq. Imminut ingasattumik nalilittut isigilersittarpaa, arlaatigut allanit pingaarnerusutut. Isumaliutersortartup François de La Rochefoucauldip qujanarniarneq assersuussimavaa aningaasanut salloqittaatinut ’nersoqqutussuseq nassaassaanngikkaluarpat atorneqarnavianngikkaluartunut’. Taamaattumik tamatumunnga imminut illersussagaanni apustilip Paulusip oqaaqqissaarutaa piviusorsiortoq maleruartariaqarpoq: ’Nungullusi oqarfigaassi immissinnik isumassaq qaangerlugu isumaqarfigeqqunasi, kisianni immissinnik annerunianngitsumik upperneq Guutip kimulluunniit agguutigititaa missiliorlugu isumaqarfigeqqullusi.’ — Rûmamiut 12:3.
Inuk inunnguutsiminik oqaatsinik tusarnersunik tusarusunneroqqajaasarpoq, annerusutigulli pisariaqartinnerpaasarput tassaavoq Biibili tunngavigalugu unnersuunneqarneq perorsaatissinneqarnerlu. (Ussatit 16:25) Kunngi Akab iluarisaannarminik tusarusuttarsimavoq; allaat kiffaasa pruffiiti Mika qinnuigisimavaat taassuma ’iluatsitsinissaanik taakkunatut [Akabip pruffiitiisut qujanarniartutut] siulittuuteqaqqullugu’. (1 Kunngit 22:13) Akabip ilumoortoq tusarniarsimasuuguniuk killormoorninilu unitsillugu, sorsunneq Israelikkut ajorsarfigisaat namminerlu toqunini pinngitsoortissimasinnaassagaluarpai. Anersaakkut ingerlalluassagutta inuit uagutsinnik nuannerneraajuartut uagutsinnullu tusarnersunik qujanarniarpaluttunillu oqaaseqartuartut pinnagit, kristumiut utoqqaanertat toqqakkat, sallusuissummiittuaannarnissatsinnut ikiuukkusuttut, aalajangersimarpaluttumik asannittumilli unnersuussutaat qisuariarfigipallattarniartigik! — Naleqqiuguk Timûtiusimut agdlagkat áipait 4:3.
Kristumiut qanorluunniit qujanarnianngisaannassapput. Elihu aalajaatsoq assigalugu aalajangersimarpaluttumik ima oqarumapput: „Illersuinangalu assortuinianngilanga, inuup kinaassusia apeqqutaatikkumanngilara qujanarniartuunnginnama. Qujanarniartuugaluaruma pinngortitsisima erniinnaq peerutitissagaluarpaanga.“ — Job 32:21, 22; 1 Tásalûníkamiut 2:5, 6.
Pissutissaqavissumik nersualaarineq
Ussammi isumassarsiarititaasumi erserpoq nersualaarneqarneq misilinneqaatitut atorsinnaasoq: ’Soorlu aatsitassaliut ittoq siilvimut, soorlulu aatsitsivik ittoq guultimut, taamaassavoq angut nersortimi qarnanut.’ (ússatit 27:21) Aap, nersualaarneqarneq allanit pingaarnerusutut misigilersitsisinnaavoq pingaarnialersitsisinnaallunilu, inummut nakkassutaasumik. Aappaatigulli inuup naammassisimasani tamaasa nersorneqaatigisanilu pillugit Jehovamut annertuumik akiitsugaqarnini nassuerutigiguniuk imminut angisuutinnginnini maniguussutsinilu ersersissavai.
Iliuuseq angusarluunniit pitsaasoq pillugu nersualaarineq nersualaarisumut nersualaarneqartumullu ineriartuutaasarpoq. Asannittumik ilumoortumillu pingaarteqatigiinnermik pilersitsisarpoq. Ajunngitsunik anguniagaqarnissamut kajumissaataasarpoq. Meeqqat pissutissaqavissumik nersualaarneqartarnertik ilungersornerullutik suliniarnissaminnut kajumississutigisarpaat. Najoqqutassiat maleruagassamissut naatsorsuutigisaasut maleruaatigalugit inuttut pissutsimikkut ilusilersorneqarnissaminnut iluaqutigisarpaat.
Taamaattumik qujanarniarneq qujanarniarfigineqarnerlu ingalassimaniartigik. Nersualaarneqaraangatta maniguuttumik tamanna ilassisartigu. Kiisalu tukkortuullutalu ilumoorluta nersualaarisarniarta — pallorfiginninnitsinni Jehovamik unnersiutiginnittarnitsigut ilumoorlutalu allanut tapersersuinitsinnik pingaartitsinitsinnillu ersersitsisarnitsigut, eqqaamallugu „oqaasissat piffissaasigut anillugit“ ajunngittaqimmat! — Ussatit 15:23. (wE 1/2 98)