Angajoqqaat — meeqqasi sernissorsigik!

NIGERIAMI atuarfimmi niviarsiaqqap kinguaassiuutitigut atoqatigiinnermut tunngasunik niviarsiareqatiminik ’siunnersuineq’ aliikkutarisarsimavaa. Tamalikattutut ilisimaneqarpoq. Naartumik katatsissutissatut siunnersuutaasa ilagisimavaat imigassaq porteri tupamik akulluarlugu. Oqaluttuai, atuakkanik atuagassianillu tiingasulersaarutinik katitigaasut, atuarfimmi amerlasuunit tupigineqartaqaat. Atuartut ilaat kinguaassiuutitigut atoqatigiinnermik misileraasalerput ataaserlu naartulerluni. Naartuni katatsinniarlugu qulaani oqaatigineqartoq imerpaa, akunnerillu marluk qaangiutinngitsut aammik meriartalerpoq. Ullualuit qaangiuttut napparsimmavimmi toquvoq.

Ullumikkut inuusuttorpassuit atoqatigiinneq kisiinnanngajaat oqallisigisarpaat taamaalillutillu ikinngutitik uppiasut ileqqopiloqalersillugit. Inuusuttut eqqortunik sernissortigisinnaasaminnik paasisaqarusullutik kikkunnut saaffiginnikkunik pitsaanerussava? Pitsaassaaq angajoqqaatik Guutimik mianerinnittut ikiortissarsiarisinnaagunikkik, taakkuami „Jehovap ileqqoreqqusai oqaaqqissaarutaalu malillugit“ perorsaanissartik akisussaaffigaat. — Evfisumiut 6:4, NV.

Kinguaassiuutinut tunngasunik paasissutissiineq pillugu Afrikamiut isumaat

Angajoqqaarpassuit kinguaassiuutinut tunngasut meeqqaminnut oqaloqatigiissutigissallugit ajornakusoortittarpaat. Ingammik Afrikami tamanna ajornartorsiutaavoq. Sierra Leonemi ataataq Donaldimik atilik ima oqarsimavoq: „Tamakku angajoqqaat meeqqaminnut oqaloqatigiissutiginngisaannarpaat. Taamaaliorneq Afrikami kulturimut ilaanngilaq.“ Arnaq Nigeriamiu Confidentimik atilik isumaqataalluni oqarpoq: „Angajoqqaakka isumaqarput kinguaassiuutinut tunngasut ammasumik oqaloqatigiissutissaanngitsut. Kulturikkut paquminartuupput.“

Afrikami kulturit ilaanni oqaatsit kinguaassiuutinut tunngasinnaasut, soorlu usuk, anisooq imaluunniit aaqarneq, kanngunartutut isigineqarput. Allaat kristumiup anaanaasup panimminut oqaaseq „tiinganeq“ atoqqusimanngilaa, oqaaserli „kanngunartuliorneq“ atorpagu ajorinagu. Guutilli oqaasiata, Biibilip, kinguaassiuutinut tunngasut ammasumik eqqartorpai. (1 Moses 17:11; 18:11; 30:16, 17; 3 Moses 15:2) Uissuummisitsinissaq illigulersitsinissarluunniit siunertaanngilaq, Guutilli innuttaanik illersuinissaq ilitsersuinissarlu siunertaavoq. — 2 Timûtiuse 3:16.

Nigeriamiup ataatap tamatuminnga nipangiussiinnarnerminut kulturikkut paqumisunnerunngitsoq allaali pissutiginerarpaa: „Kinguaassiuutinut tunngasut meeqqannut oqaloqatigiissutigigukkit kanngunartuliornissaannut pileritsatsissinnaavakka.“ Biibilimilli tunngaveqartumik kinguaassiuutinut tunngasunik naleqquttumik paasissutissiinerup meeqqat atoqateqarnissaannut kajumilersissavai? Soorunami naamik. Akerlianilli pisoqarsinnaavoq: paasisakinneruneq ilutigalugu ajutoornissaq ilimanarnerusinnaavoq. Biibilimi allassimavoq eqqorluartumik ’ilisimassuseq sernissortaasoq’. — Nalunaajaasup oqaasii 7:12.

Jesusip assersuusiaani angutip sianisuup anorersuarsinnaanera ilimagigamiuk qaarsumi illuliorpoq, angulli sianiitsoq sioqqani illuliorpoq ajunaarujussuarlunilu. (Matîuse 7:24-27) Tamatumunnga assingusumik angajoqqaat silatuujusut nalunngilaat meeqqatik silarsuup kinguaassiuutinut tunngasunut ileqquinut killeqanngitsunut sungiussitinniarneqassasut anorersuartut ittumik tatineqarlutik. Taamaattumik meeqqatik aalajaassinnaaqqullugit ilisarsinermik eqqorluartumik immikkoortitsisinnaanermillu ineriartortitsittarpaat.

Arnap Afrikamiup angajoqqaarpassuit meeqqaminnik kinguaassiuutinut tunngasunik oqaloqateqartannginnerannut pissutaasoq alla tikkuarpaa: „Angajoqqaama, Jehovap nalunaajaasuusut, inuusuttuuninni kinguaassiuutinut tunngasunik oqaloqatigineq ajormannga, nammineq meeqqannut oqaloqatigiissutiginissaat eqqarsaatigisimanngilara.“ Ullumikkulli inuusuttut tatineqarnerat ukiut qulit 20-lluunniit matuma siornanit annerujussuuvoq. Tamanna tupaallaatigisariaqanngilarput, Guutimmi oqaasiani allassimavoq ’ullussani kingullerni . . . inuit ajortut salloqittaapiluttullu ajorsiartorumaartut tammartitsisarlutillu tammartitaasarumaartut’. — 2 Timûtiuse 3:1, 13.

Inuusuttorpassuit angajoqqaaminnik oqaloqateqarnissaminnit tunuarsimaarnerata oqaloqateqarsinnaannginnerataluunniit ajornarsiut ajornerulersittarpaat. Allaat soqutaanngitsunut tunngasut pillugit oqaloqatigiilluarsinnaaneq ajorput. 19-inik ukiulik ajuusaarluni oqarpoq: „Angajoqqaakkalu oqaloqatigiissuteqarneq ajorpugut. Ataatagalu oqaloqatigiilluarsinnaanngilagut. Tusarnaarneq ajorpaanga.“

Inuusuttut kinguaassiuutinut tunngasunik apeqquteqarunik kingunipiloqarnissaa aamma siooragisinnaavaat. Niviarsiaraq 16-inik ukiulik ima oqarpoq: „Angajoqqaakka qanoq qisuariassasut nalunnginnakku kinguaassiuutinut tunngasunik oqaloqatiginiarneq ajorpakka. Ungasinngitsukkut angajuma anaanaga kinguaassiuutinut tunngasunik aperaa. Ajornartorsiutaanik ikiornagu sooq aperinersoq pasillilerpaa. Anaanama angajora pillugu apersukulavaanga, ilaannikkut ileqqui pillugit pasillikujuppaluttumik nipeqartarpoq. Anaanama asanninnera annaajumannginnakku ajornartorsiutikka pillugit oqaloqatigineq ajorpara.“

Sooq angajoqqaat kinguaassiuutinut tunngasunik paasissutissiisariaqartut

Meeqqatsinnik kinguaassiuutinut tunngasunik paasissutissiisarnerput eqqortuuginnarani aamma asannittuuvoq. Angajoqqaat meeqqatik kinguaassiuutinut tunngasunik paasissutissittanngippatigik allat taamaaliussapput — ilimagisaannillu siusinnerusumik — Guutillu najoqqutassiaanut naapertuutinngisaannangajattumik. Niviarsiaraq 13-inik ukiulik kanngunartuliorsimavoq atuaqatimi oqaluttuummani massakkut atoqateqanngikkuni kingusinnerusukkut atoqateqaruni anniartorujussuusinnaasoq. „Niviarsiaassutsit qiuutinik qiussavaat,“ atuaqataa oqarsimavoq. Kingusinnerusukkut aperineqarami sooq anaanani tamatuminnga oqaluttuussimannginneraa oqarpoq ’tamakku pillugit’ inersimasut oqaloqatigisarnagit.

Niviarsiaraq Nigeriamiu oqarsimavoq: „Inuit pissusissamisut ittut tamarmik kinguaassiuutitigut atoqateqartarnerarlugit atuaqatima uppilersinniaraluarpaannga. Oqaluttuuppaannga maanna atoqateqartalinngikkuma 21-nik ukioqarleruma arnaassutsinnut ajoqutaangaartumik nappaateqalissasunga. Oqarput nappaassuaq pinngitsoorniarukku katitsinnanga arlalinnik atoqateqartariaqartunga.“

Niviarsiaqqap angajoqqaani attaveqarfigilluarpai, ingerlaannarlu paasivaa atuaqatimi oqaasii angerlarsimaffimmini ilikkakkaminut naapertuutinngitsut. „Pisarnittut atuarfimmi tusakkakka anaanannut oqaluttuaraakka.“ Arnaatalu paasissutissat eqqunngitsut naqqissimavai. — Naleqqiuguk Ussatit 14:15.

Angajoqqaat meeqqatik pisariaqartunik paasissutississinnaavaat. Kinguaassiuutinut tunngasut pillugit Guutip isiginnittaasiatut meeqqat isiginnittaaseqalersissinnaavaat ulorianartorsiorsinnaanermullu piareersarlugit, atornerluerusuttunillu inoqartoq paasitillugit. Aammattaaq kinguaassiuutitigut tunillaattartunik nappaateqalernerup kissaatiginngisamillu naartulernerup kingunerisaanik aliasuuteqarnernut illersuutigissavaat. Taamatut ilisimasaqarnerup imminut ataqqinerulersiinnassanngilai aammattaarli allanit ataqqineqarnerulersissavai. Kukkusunik takorluugaqarneq isumakuluuteqarnerlu pinngitsuussavaat. Atoqatigiinnermut isuma peqqinnartoq ajunngitsorlu siuarsarneqartarpoq, kingusinnerusukkut katissappata pilluarnissamut ilasaataasussaq. Guutimit akuerisaajuarnissaannut iluaqutaassaaq; meeqqallu angajoqqaamik asannittumik isumassuisarnerat paasiartortillugu angajoqqaatik ataqqinerulissavaat asanerulerlugillu.

Attaveqatigiilluarneq

Angajoqqaat siunnersuutitik meeqqamik pisariaqartitaannut naleqqussassappatigik attaveqatigiinneqartariaqarpoq. Angajoqqaat meeqqatik qanoq isumaqartut sumillu uummammioqartut naluppassuk siunnersuutit isumatusaartuugaluilluunniit iluaqutaavallaarnavianngillat. Assigiinnassavaa nakorsap napparsimasup nappaataa paasilluarnagu nakorsaatissaanik tunippagu. Siunnersuisuulluassagunik angajoqqaat meeqqatik qanoq eqqarsarnersut qanorlu misiginersut nalunngittariaqarpaat. Meeqqat qanoq tatineqarnersut sunillu ajornartorsiuteqarnersut apeqqutillu suut isumakuluutigineraat nalunngittariaqarpaat. Meeqqanut tusarnaaqqissaarnissaq pingaartuuvoq, ’tusarasuartuulluni oqalukkumaarnertuullunilu’. — Jâko 1:19; Ussatit 12:18; Nalunaajaasup oqaasii 7:8.

Angajoqqaat piffissaq, qasusuinneq sukataarnerlu pisariaqartippaat meeqqaminnut qanittumik attaveqarneq ineriartortissagunikku pigiinnassagunikkulu, attaveqatigiinneq meeqqat misigissutsiminnik ilorlerpaanik oqaluttuarnissaannik kajumilersitsisoq. Angajoqqaat meeqqallu qanimut taama attaveqaraangata nuannertaqaaq! Afrikap kitaani ataataq tallimanik meeralik ima oqarpoq: „Ataatagaannga ikinngutinnaaralungalu. Meeqqakkalu suut tamaasa oqaloqatigiissutigisarpavut, aamma kinguaassiuutinut tunngasut. Allaat niviarsiaqqat allanut oqaatigiumanngisaminnik oqaluttuuttarpaannga. Ajornartorsiutaat oqaloqatigiissutigissallugit piffissaqartarpugut. Nuannaarutigisaminnik aamma aveqatigisarpaannga.“

Paniisa ilaat, Bola, oqarpoq: „Ataatannut isertugaqarneq ajorpunga. Qajassuussisuuvoq paasinnittuullunilu. Mitaatigineq ajorpaatigut sukannerfigisarnatalu, kukkugaangattaluunniit naamik. Kamaammernani pisimasoq paasiniartarpaa qanorlu iliortariaqaraluarnersugut takutillugu. Inuusuttunut atuagaq ilaqutariinnullu atuagaq innersuussutigigajuppai.“a

Angajoqqaat meeqqatik kinguaassiuutinut tunngasut pillugit sapinngisamik siusinnerpaamik oqaloqatigisariaqarpaat. Taamaalilluni inuusuttuunerup ukiuini artornarajuttuni oqaloqatigiittuarnissaq tunngavilerneqassaaq. Meeqqat mikisuuneranni aallartinngikkaanni oqaloqatigiinnerit taamaattut kingusinnerusukkut aallartinnissaat artornarnerujussuussaaq. Ajornanngilarli. Anaanaq tallimanik meeralik oqarpoq: „Eqqartorniarlugit imminut pinngitsaalisarpunga nammineq meeqqamaluunniit peqqusiileqigiunnaarnissaata tungaanut.“ Navianartoqarsinnaanera eqqarsaatigalugu kinguaassiuutinut tunngasut pillugit meeqqat oqaloqatiginissaannut ilungersornerit tamarmik imminut akilersinnaapput.

Meeqqat sernissorneqartut pilluartullu

Meeqqat angajoqqaatik asannittumik ilisarsinermik illersuutigisaminnik tunisisut pingaartippaat. Afrikami Jehovap nalunaajaasuisa ilaasa oqaaserisimasaat tulliuttut eqqarsaatigeriakkit:

Mojisola 24-nik ukiulik oqarpoq: „Anaanaga qujamasuffigiuaannassavara. Kinguaassiuutinut tunngasunik pisariaqartunik piffissaq eqqorlugu paasitissimavaanga. Tamakku pillugit oqaloqatigigaanganga peqqusiileqigisarsimavara, maannali paasisimavara kingusinnerusukkut qanoq iluaqutigisimatigalugit.“

Iniobong nangippoq: „Anaanama kinguaassiuutinut tunngasunik pisariaqartunik paasissutissiisarsimanera kingumut eqqarsaatigigaangakku nuannaartarpunga. Inersimasunngorninni iluaqutigisimavara. Aalajangiulluinnarsimavara nammineq meerassannut taamaaliorniarlunga.“

Kunle 19-inik ukiulik oqarpoq: „Silamiut arnartaasa uannut qaninniarnerannut akiuunnissannut angajoqqaama ikiorsimavaannga. Ilinniartissimanngikkaluarpannga ussernartumut nakkaannarsimassagaluarpunga. Uannut iliuuserisimasaannut qujamasuttuaannassaanga.“

Christiana oqarpoq: „Anaanagalu kinguaassiuutinut tunngasunik oqaloqatigiittarsimanerput iluaqutigisimaqaara. Nappaatinut toqussutaasartunut kissaatiginngisamillu naartunermut illersorneqarsimavunga qatanngutinnullu minnerusunut maligassaalluarsimallunga. Inunnillu ataqqisaalersimavunga; angutillu katikkumaagassama aamma ataqqisinnaassavaanga. Pingaarnerusumilli: Jehovamut ajunngitsumik attaveqarpunga inatsisai maleruarakkit.“

Bola siusinnerusukkut eqqaaneqartoq oqarpoq: „Atuaqateqarsimavunga oqartumik katinnissamik pisussaaffilernani atoqatigiinneq nuannaarutissaasoq. Atoqatigiinneq aliikkutatut isigaa. Naartuleramili atuarninilu taamaatittariaqaleramiuk nuannaarpallaanngilaq. Ataataalluartumik ilinniartitsisoqarsimanngikkaluaruma immaqa taassumatut issagaluarpunga atuagarliungaarlungalu.“

Silarsuarmi tiinganermik pingaartitsiffioqisumi angajoqqaat kristumiut meeqqatik ’annattussanngornissamut ilisimassuseqalersikkunikkik’ nalissaqanngitsumik iluaqutigissavaat. (2 Timûtiuse 3:15) Ilinniartitsissutaat Biibilimik tunngaveqartut meeraasa ujammisut akisuutut pinnersaatigissavaat Guutillu isaani kusanaatigalugit. (Ussatit 1:8, 9) Meeqqat toqqissisimassapput angajoqqaallu nalerisimaangaassallutik. Ataataq meeqqaminut attaveqatigiinnermik ammatitsiniartuaannartoq ima oqarpoq: „Isumakkut eqqissineq pigaarput. Qularutiginngilarput meeqqatta Jehovamut qanoq iliorunik iluarisaanissartik nalunngikkaat; takornartap kialuunniit tammartinnavianngilai. Ilaqutariinnut ajoqutaasumik iliunnginnissaat tatigaarput. Jehova qutsavigaara meeqqatta pakatsisissimanngimmatigut.“ (wE 15/2 98)

[Quppernerup ataani ilanngussaq]

[Qupp. 10-mi assiliartaq]

Inuusuttut kristumiut Biibilimik tunngavilimmik angajoqqaaminnik ilinniartinneqarsimasut inuusuttut allat oqaluttuaat eqqunngitsut assortorsinnaavaat