Jesusip nunarsuarmi ullui kingulliit takorluukkit

UKIUMI 33-mi juutit qaammatisiutaat naapertorlugit nisanip ulluisa arfineq-aapparaat. Takorlooriaruk Romamiut nunasiaanni Judæami pisut isiginnaaritit. Jesusip ajoqersugaasalu Jeriko naggorissorsuaq qimaqqammerpaat, maannalu aqqut qummukajaaq sangujoraartoq pujoralattorlu aqqutigaat. Inuppassuittaaq allat ukiumoortumik poorskisioriartorlutik Jerusalemimukarlutik qummukajaakkut tassuuna ingerlaarrapput. Jesusilli ajoqersugai aqqut ilungersunartoq tamanna pivallaarnagu allarpassuarnik eqqarsaateqarput.

Messias Romamiut naqisimanninnerannit aniguisitsisussaq juutit erinigiuarsimavaat. Ilarpassuisa upperaat Jesus Nazaretimiu tassaasoq Annaassisoq sivisuumik erinigisaasimasoq taanna. Taanna ukiuni pingasuni affarmilu Guutip naalagaaffia pillugu oqaluussisimavoq. Napparsimasunik ajorunnaarsitsisarsimavoq kaattunillu nerisitsisarsimalluni. Aap, inunnut tuppallersaatissamik tunisisarsimavoq. Upperisarsiornikkulli siuttut Jesusip imminnut avoqqaarliutai kamaatigisorujussuuaat toqutaatinnissaalu aalajangiusimalluinnarlugu. Taamaakkaluartorli maanna Jesus aggerpoq, aalajangersimarpalulluni ajoqersukkani malitsigalugit. — Mákorse 10:32.

Seqineq Uuliap Qaqqaanut tarrikkiartortillugu Jesus angalaqatinilu illoqarfeeqqamut Betaniamut pipput, ulluni tulliuttuni arfinilinni tassaniissallutik. Tamaani ikinngutiminnit asasaminnit, Lazarusimit, Mariamit Martamillu tikilluaqquneqarluarput. Kiagulluni angalareersimalluni unnuup nillataarnera iluaqaaq, sivitsunngitsorlu sabbat nisanip arfineq-aappaa aallartissaaq. — Juánase 12:1, 2.

Nisanip qulingiluaa

Sabbatip aqaguani Jerusalemimi ulapputtunnguaqarpoq. Poorskisioriat tuusintilikkuutaat illoqarfimmut tikerareersimapput. Uivernerli ukiup taamaalinerani pisarnermit ingasanneruvoq. Inuppassuit alapernaasersut illoqarfiup aqqusinernisigut amitsutigut illoqarfiup isaaffiisa tungaannut tuaviorlutik ussagartorsuupput. Isaaffitsigullu qerlertoruullutik anillakaakkamik takuleriallaat inuppassuit qiimasoqisut aqqutikkut Betfagemeersukkut Uuliap Qaqqaatigut ammukaasut. (Lúkarse 19:37) Susoqalersoruna?

Takuuk! Jesus Nazaretimiu siutituup piaraanik qimusserluni aggerpoq. Aqqutissaanut inuit atisatik siaartiterpaat. Allat palmit avalequtaannik tigumiarlutik aalateripput nuannaaqalutillu suaartarlutik: ’Uusiannaa, pilluarli Jehovap aqqani tikiuttoq, Israelip kunngia!’ — Juánase 12:12-15.

Ingerlaartut Jerusalemimut qanillilersullu Jesusip illoqarfik isigileramiuk qamuuna assut aalaterneqarpoq. Qissaserpoq, tusaaneqarsinnaavorlu Jerusalemip aserugaanissaa siulittuutigigaa. Kinguninngua naalaffimmut apuukkami inuppassuit ajoqersulerpai inuillu tappiitsut tusiattullu orniguttut ajorunnaarsillugit. — Matîuse 21:14; Lúkarse 19:41-44, 47.

Tamanna palasiunernit allakkanillu ilisimasunit arajutsineqanngilaq. Jesusip tupinnartuliai inuppassuillu qiimasunnerat taakkua uumisuutigeqaat. Kamannertik nunusinnaanagu farisiiarit Jesus peqquaat: ’Ajoqersuisoq, ajoqersukkatit inertikkit.’ Jesusip akivai: ’Oqarfigaassi: Uku nipangeraluarpata ujaqqat nillissapput.’ Jesusip naalaffimmit qimagutsinnani tamaani niuffattut malugai. — Lúkarse 19:39, 40; Matîuse 21:15, 16; Mákorse 11:11.

Nisanip qulinga

Jesus siusinaarluni naalaffimmut apuuppoq. Ippassaq Ataataminik, Jehova Guutimik, pallorfiginnittarfiup niuerfittut atornerlunneqarnera kamaammiutigisimaqaa. Taamaattumik ilungersoqaluni naalaffimmi pisiniat tuniniaasullu aniatilerpai. Taava aningaasanik taarsiisitsisartut piumatuut nerrivii tuinillu tuniniaasut issiavii uppikaatippai, oqarlunilu: ’Allassimavoq: „Illuga qinusarfimmik taaneqassavoq,“ ilissili ujajaaffinngortipparsi.’ — Matîuse 21:12, 13.

Jesusip iliuusii tamanillu ajoqersuinera palasiunerit, allakkanik ilisimasut oqartussaasullu iluarinngilluinnarpaat. Toqutaatikkusoqaat! Inuilli Jesusip ajoqersuutaanik uitsatiginninnerat ’tusarumallugulu taassuminnga nipinngaviginninnerat’ taamaaliornissaminnut akimmiffigaat. (Lúkarse 19:47, 48) Unnulermat Jesus malittaalu eqqissillutik pisullutik Betaniamut uterput, tassani qasuersaarluassallutik.

Nisanip aqqarna

Ullaannguuvoq. Jesus ajoqersukkanilu Jerusalemimukarlutik Uuliap Qaqqaatigut ingerlaalereersimapput. Naalaffimmut isiinnavissut palasiunerit utoqqaanerillu Jesus oqqassaaleriikatappaat. Naalaffimmi aningaasanik taarsiisartunut tuniniaasunullu iliuuserisimasai puiorsimanngilluinnarpaat. Ajussusertik ersersillugu aperipput: ’Qanoq ittumik piginnaassuseqarlutit taamaaliorpit? Kialu tamatuminnga piginnaassuseqartippaatit?’ Jesusip akivai: ’Uangattaaq ataatsimik aperissavassi; tamatuminnga oqarfigigussinga uangattaaq oqarfigiumaarpassi qanoq ittumik piginnaassuseqarlunga taamaaliortunga. Johannesip kuissutaa sumit piva, qilammit inunnilluunniit?’ Akerlilersuisut eqqarsaqatigiillutik imminnut oqaluutilerput: ’Qilammit pisimanerarutsigu oqassavoq: „Soormi taava upperinngilisiuk?“ Inunnillu pisimanerarutsigu inuit ersinassapput, tamarmik Johannes pruffiitiusorimmassuk.’ Akissutissaarullutik oqaannarput: ’Naluarput.’ Jesusip eqqissisimarpalulluni akivai: ’Taamaattumik uangattaaq oqarfigissanngilassi qanoq ittumik piginnaassuseqarlunga taamaaliortunga.’ — Matîuse 21:23-27.

Taava akeraasa Jesus arlaannik tigusaassutigisinnaasaanik oqartinniarsarilerpaat. Aperaat: ’Kaasari akileraarutinik tunillugu iluarpa iluanngilaluunniit?’ Jesusip akivai: ’Aningaasannguaq akileraarutissaq takulara.’ Taavalu aperai: ’Kiaana assinga kialu titaqqusai uku?’ Akivaat: ’Kaasarip.’ Kanngutsisillugit kikkut tamarmik tusaasinnaasaannik Jesusip oqarfigai: ’Taamaattumik kaasari tunisiuk kaasarip pissaanik, Guutilu Guutip pissaanik.’ — Matîuse 22:15-22.

Akeqqani oqaasissaarutsillugit akerlilerneqarsinnaanngitsunik akioreeramigit maanna Jesus inuppassuit ajoqersukkamilu saavanni oqalulerpoq. Allakkanik ilisimasut farisiiarillu pillugit oqaasii tusarnaariakkit: ’Ilissinnut maleruaqqusaat tamaasa maleruarsigik taamaaliorlusi, suliaalli malissanngilasi. Oqaraluarlutimmi taamaaliortarinngillat.’ Sapeeqaluni taakkununnga eqqanartut taagulerpai, tassaanerarlugillu siulersuisut tappiitsut ilumoortuusaarniallu. ’Taatuuku pulateriaarsuit, pulateriaarsuit piaraat, qanoq ilillusi anniarfimmut [Gehennamut] pisitaanissaq ingalassavisiuk?’ — Matîuse 23:1-33.

Sakkortuumik avoqqaarinninnera tamanna isumaqanngilaq Jesusip inuit allat pissusii ajunngitsut takusinnaanngikkai. Kingusinnerusukkut inuit naalaffiup tunissutinut nakkaatitsivianut aningaasanik nakkaatitsisut isiginnaarpai. Uillarnerup piitsup inuussutissarsiutissani tamaasa — aningaasaarannguit marluk naleqanngingajattut — tunissutinut nakkaatitsivimmut nakkartikkai takullugu killitsinnaqaaq! Tamanna asannittumik pingaartillugu Jesusip erseqqissarpaa uillarnerup tunissutai ’sinnerutitamik ilaannik’ tunissuteqartut tunissutaannit annerusut. Inuup sapinngisaminik iliuusia sunaluunniit Jesusip saamalluni misiginneqataallunilu pingaartilluinnarpaa. — Lúkarse 21:1-4.

Maanna Jesusip naalaffik naggammik qimappaa. Ajoqersukkami ilaasa naalaffiup ’ujaqqanik pitsaanernik erlinnartulianillu pinnersarsimasup’ alutornassusia eqqartulermassuk tupaallaatigisaannik Jesusip pilerpai: ’Ullut nalliukkumaarput, taava ujaqqat qaleriissuerullugit ingutserneqassapput.’ (Lúkarse 21:5, 6) Jesus malillugu illoqarfimmit inugasaaqisumit aniartortillutik apustilit eqqarsaatigaat taamatut oqarami suna pineraa.

Kinguninngua Jesus apustilinilu Uuliap Qaqqaani nipaatsumi eqqissillutik issiarusaalerput. Jerusalemimut naalaffimmullu isikkivik alianaatsoq isiginnaajutigalugu Peterip, Jakobip, Johannesip Adreasillu Jesusip siulittuutaa tupaallannartoq qanoq isumaqarnersoq paaserusulerpaat: ’Oqarfigitigut: Qaqugu tamakku taamaalissappat, sunalu tikiuffissannut silarsuullu matuma naggatissaanut nalunaaqqutaassava?’ — Matîuse 24:3; Mákorse 13:3, 4.

Apeqqutaat akillugu Ajoqersuisorsuaq maluginiarnarluinnartunik siulittuuteqarpoq. Sorsunnerit sakkortuut, nunap sajuttarneri, kaannersuit nappaalanerillu siulittuutigai. Aammattaaq Guutip naalagaaffia pillugu nutaarsiassamik nuannersumik nunarsuaq tamakkerlugu oqaluussissutiginninnissaq siulittuutigaa, imalu mianersoqqusilluni: ’Taamaannerani naalliunnartoqangaassavoq silarsuaqaleqqaarneranit mannalu tikillugu naleqanngisaannartumik kingornaluunniit naleqassanngitsumik.’ — Matîuse 24:7, 14, 21; Lúkarse 21:10, 11.

Jesusip ’tikiuffissaminut nalunaaqqutinik’ assigiinngitsunik taaguinerani apustilit sisamat tusarnaaqqissaarput. ’Eqqumanissap’ pingaaruteqassusia erseqqissarpaa. Soorooq? ’Naalakkassi tikiuffissaa nalugassiuk.’ — Matîuse 24:42; Mákorse 13:33, 35, 37.

Ulloq tamanna Jesusimut apustiliinullu puiunaatsuuvoq. Tassami tigusaannginnermini, killisiorneqannginnermini toqutaannginnerminilu Jesusip tamanut oqaluussinermut naggammik ulloq tamanna atorpaa. Ulloq imaalereermat Betaniamut aqqutaata sinnera Uuliap Qaqqaatigoortoq ingerlavigaat.

Nisanip aqqaneq-aappaa 13-ialu

Nisanip aqqaneq-aappaani Jesus ajoqersukkani ilagalugit eqqissisimaarpoq. Nalunngilaa upperisarsiornikkut siuttut toqutaatikkusuttorujussuugaanni, aqagulu unnukkut poorskisiornissaminut sumilluunniit akornuserneqarnissani kissaatiginngilaa. (Mákorse 14:1, 2) Aqaguani, nisanip 13-iani, inuit poorskisiornissaminnut naggammik piareersarlutik ulappupput. Ualikkut siusissukkut Jesusip Peter Johannesilu aallartippai Jerusalemimi illumi inimi qullermi poorskisiornissamut piareersariartortillugit. (Mákorse 14:12-16; Lúkarse 22:8) Seqineq tarrinngitsiartoq malinnaallutik Jesus apustilillu sinneri naggammik poorskisiorfissaminnut apuupput.

Nisanip 14-ani seqineq tarrereersoq

Jerusalem taarsilersorlu qaammat Uuliap Qaqqaa qulaallugu nuivoq. Inimi angisuumi pisatsersorsimasumi Jesus apustilillu aqqaneq-marluk nerriviup piareersarsimasup sanianut issaasimapput. ’Qilanaaqaanga savaaqqamik poorskisiutissamik matuminnga anniartinnanga nereqatigiumallusi,’ Jesusip ilani oqarfigai. (Lúkarse 22:14, 15) Kinguningaatsiarileraa apustilit tupaallaatigisaannik Jesus nikuippoq atisanilu qalliit peerlugit. Allarummik baaliamillu imermik imalimmik tiguseriarluni apustilit isigaat asalerpai. Tassa maniguulluni kiffartuussinermik ilinniagassaq puiunaatsoq! — Juánase 13:2-15.

Jesusilli nalunngilaa angutit taakkua ilaata, Judas Iskariotip, upperisarsiornikkut siuttunut killuutigissamaaraani. Tupinnanngitsumik tamanna aliasuutigeqaa. ’Ilassi pisikkumaarpaanga,’ Jesus oqarpoq. Tamanna apustilit assut aliatsaatigaat. (Matîuse 26:21, 22) Poorski nalliuttorsiutigereeramikku Jesus Judasimut oqarpoq: ’Pinasuarit.’ — Juánase 13:27.

Judas anereermat Jesusip toqunissaminik eqqaaniaalluni unnukkorsiorneq aallarnerpaa. Iffiaq seernarsaateqanngitsoq tiguaa qinullunilu, taavalu aggorpaa apustiliminullu aqqanilinnut nereqqullugu oqarluni: ’Tassa timiga pillusi tunniunneqartoq; taamaaliortaritsi eqqaallunga.’ Taava ermuseq viinnimik aappaluttumik imalik tiguaa. Qujareerami ermuseq taakkununnga ingerlaartippaa taassuminnga imeqqullugit, oqarlunilu: ’Tassaammat aaga, angerutsip pia, amerlasuut pillugit kuisoq ajortit isumakkeerneqaatissaannik.’ — Lúkarse 22:19, 20; Matîuse 26:26-28.

Unnummi pingaartumi tamatumani Jesusip apustilini aalajaatsut sorpassuarnik naleqaqisunik ilinniartippai, ilaatigut qatanngutigiittut asaqatigiinnerup pingaaruteqassusianik. (Juánase 13:34, 35) Aamma neriorsoqqissaarpai ’illersuisumik’, imaluunniit ikiuisumik, tassa anersaamik illernartumik, tuniumaarlugit. Anersaap illernartup tamatuma Jesusip ajoqersuussutaanik tamanik eqqaasittassavai. (Juánase 14:26) Unnunnerusukkut Jesusip ilungersorluni imminnik qinnussinera tusarlugu apustilit qiimmaallassimassaqaat. (îvangkîlio Juánasip agdlagâ, kapitali 17) Unnersiutiginnissutinik erinarsoreeramik Jesus malillugu inimit qullermit anipput sila unnulluni nillertereersimasoq.

Qooroq Kidron aqqusaarlugu Jesus apustiliilu ornigannaaminnut naatsiivimmut Getsemanemukarput. (Juánase 18:1, 2) Tamaani apustilini niguumilaarlugit Jesus qinujartorpoq. Ilungersorluni Guutimut ikioqqulluni qinunermini misigissutsikkut annikilliortorujussuuvoq. (Lúkarse 22:44) Iluatsitsinngitsuussagaluaruni Ataatami asannittup qilammiusup mitannarsisinneqarnissaa eqqarsaatigissalluguluunniit saperpaa.

Jesus qinusimatsiaannartoq Judas Iskariot tikiuppoq inuppassuit panalisarlutillu unataasisarlutillu ikumatitalisartut ilagalugit. ’Pilluarna, ajoqersuisoq!’ Judas oqarpoq Jesusilu sallaatsumik kunillugu. Taamaaliornera Jesusimik tigusarinnittussanut nalunaaqutaavoq. Una soriallartoq Peterip panani siluguppaa palasiunerullu kiffaata siutaa katatsillugu panarlugu. ’Panat inaanut mangunniaruk, pannamik tigusisut nungullutik pannamik toqunneqassammata,’ Jesusip oqarfigaa angutillu siutaa ajorunnaarsillugu. — Matîuse 26:47-52.

Suut tamarmik sukkasoorujussuarmik pipput! Jesus tigusaavoq qilersorneqarlunilu. Sioorallutik paatsiveerullutillu apustilit Jesus qimappaat qimaallutillu. Jesus palasiunerusimasumut Annasimukaanneqarpoq. Tassanngaanniit maannakkut palasiunerusumut Kajfasimukaanneqarpoq killisiorniarlugu. Ullaaralaannguakkut Sanhedrinimut ilaasortat Jesus Guutimik mitallersutut unnerluutigaat. Taava Kajfasip Jesus Romamiut nunamut naalagaatitaannut Pontius Pilatusimukaatsippaa. Taassumalu Galilæap naalagaanut Herodes Antipasimukaatsippaa. Taassuma kiffaasalu Jesus mitaatigaat, Pilatusimullu utertillugu. Jesus pisuutitaassutissaanik Pilatusip nassaarfiginngilaa, juutilli upperisarsiornikkut siuttuisa Pilatus pinngitsaalivaat Jesus toqumut pillagaateqqullugu. Oqaatsikkut timikkullu ingasaqisumik pinerlineqareermat Jesus Golgatamukaanneqarpoq, tassanilu naakkittaaqisumik qisummut paagunneqarluni naallioqaluni toquneranik kinguneqartumik. — Mákorse 14:50–15:39; Lúkarse 23:4-25.

Jesusip toqunera taassuma inooqqinngisaannarneranik kinguneqartuuppat oqaluttuarisaanermi pisimasut alianarnerpaartarissagaluarpaat. Qujanartumilli taamatut pisoqanngilaq. Ukiumi 33-mi nisanip 16-iani ajoqersugaasa paasileramikku Jesus toqusunit makissimasoq, tupigusoqaat. Inuit 500-nit amerlanerusut Jesusip toqusunit makissimanera uppernarsivaat. Makititaaneranillu ullut 40-t qaangiuttut ajoqersugai aalajaatsut arlallit Jesusip qilaliarneranik takunnipput. — apustilit suliait 1:9-11; 1 Korintumiut 15:3-8.

Jesusip inuunera illillu

Tamanna ilinnik, ilami tamatsinnik, qanoq attuiva? Takuat, Jesusip kiffartornera, toqunera makititaaneralu Jehova Guutimik qutsissisitsivoq taassumalu siunertaata nuanningaartup naammassineqarnissaanut aalajangiisuusussaalluni. (Kulorsamiut 1:18-20) Tamakkua tamarmik uatsinnut pingaaruteqartorujussuupput, Jesusimmi pilliutaa tunngavigalugu ajortitsinnik isumakkeerfigineqarsinnaavugut taamaalillutalu Jehova Guutimut attaveqalersinnaalluta. — Juánase 14:6; 1 Juánase 2:1, 2.

Allaat inunnut toqusimasunut tamanna pingaaruteqarpoq. Jesusip toqusunit makititaanera taakkua nunarsuarmi paratiisiusumi Guutip neriorsuutigisimasaani toqusunit makinnissaannut periarfissiivoq. (Lúkarse 23:39-43; 1 Korintumiut 15:20-22) Tamakku paasisaqarfiginerorusukkukkit kajumissaarpatsigit apriilip 11-ani 1998-imi, Jehovap Nalunaajaasuisa naalagaaffilersaartarfianni, Jesusip toquneranik eqqaaniaanermut orniguteqqullutit. (wE 15/3 98)

[Qupp. 6-mi ungalusaq]

’Ujajaaffinngortipparsi’

JESUS pissutissaqarluarpoq oqarnissaminut niuertut piumatuut Guutip naalaffia ’ujajaaffinngortissimagaat’. (Matîuse 21:12, 13) Juutit juutinullu ilanngussimasut naalaffimmut akileraarummik akiliinialeraangamik akiliutissatik aningaasanut tamaani atorneqartunut taarserteqqaartariaqartarsimavaat. Atuakkiamini The Life and Times of Jesus the Messiah-mi Alfred Edersheim nassuiaavoq aningaasanik taarsiisitsisartut poorskisiornissaq qaammammik ataatsimik sioqqullugu, qaammatip adarip 15-iani, sumi tamaani taarsiisitsisarnertik aallartittaraat. Adarip 25-a aallarnerfigalugu Jerusalemimi naalaffimmut pisarsimapput juuterpassuit juutinullu ilanngussimasorpassuit takkussortut iluanaarniarfiginiarlugit. Aningaasanik taarsiisitsisartut assut iluanaaruteqartarsimapput, aningaasat taarserneqartut tamaviisa akitsuusertarsimagamikkik. Jesusip ujajaasuunerarpai akiitsuusiuttagaat qutsingaarmata piitsut aningaasaataannik tillittutut oqaatigineqarsinnaammata.

Ilaat uumasunik pilliutissaminnik nassarsinnaasarsimanngillat. Pilliutissaminnillu nassartut tamarmik pilliutiginiagaat naalaffimmi nakkutilliisumit misissorneqaqqaartarput — akiliillutik. Uumasut ungasissumit aggiutereerlugit akueriumaneqannginnissaat pinngitsoorniarlugu amerlasuut tamatumunnga taarsiullugu uumasumik Levikkunnit, naalaffimmi tuniniaasunit peqquserluttunit, „akuerisaasumik“ pisisarput. „Naasorissaasut piitsut ilarpassui tamaani suutaarunneqartarput,“ immikkut ilisimasalik taama oqarsimavoq.

Palasiunerup Annasip ilaqutaasalu naalaffimmi niuernikkut soqutigisaqarsimanerannut takussutissaqarpoq. Juutit ajoqersuisuisa allagaataanni „Annasip ernerisa [naalaffimmi] tuniniaavii“ allaatigineqarput. Naalaffimmi aningaasanik taarsiisitsisarnermikkut uumasunillu tuniniaasarnermikkut iluanaarutigisartakkatik ilaqutariit isertitaqarfigisartagaasa pingaarnerit ilagaat. Immikkut ilisimasallit ilaat oqarpoq Jesusip tuniniaasunik aniatitsinera ’ataqqisaanerannuinnaanngitsoq kisianni aamma kaasarfiinut saassussinerusoq’. Sunaluunniilli tamatumunnga pissutaagaluarpat, akeraasa toqutaatikkusuttorujussuusimavaat! — Lúkarse 19:45-48.

[Qupp. 4-mi nalunaarsugaq]

Jesusip inuttut inuunerata ullui kingulliit

Nisani ukioq 33 Pisut Inuit pingaarnerpaartaat*

Arfininngorneq Sabbat (Ataasinngorneq 6. apriili 1998) 101, imm. 4

16 Sapaat Jesus makititaavoq 128

* Kisitsisit atuakkami Inuk inuit inuusimasut pingaarnerpaartaat-ni kapitalinut innersuussutaapput. Jesusip sulinerata naggataatungaa pillugu paasissutissat allassimaffinnut innersuussutitallit nassaassaapput atuakkami „Hele Skriften er inspireret af Gud og gavnlig“-mi, quppernermi 290-imi. Atuakkanik pineqartunik naqiterisuuvoq Watchtower Bible and Tract Society of New York, Inc.