Atuagaq Guutimit pisoq
„Inuummi piumasaagut pruffiitip oqaaserisaa pinngisaannarpoq, anersaalli illernartup pisimmatik inuit Guutimit oqalupput.“ — 2 PÎTRUSE 1:21.
1, 2. (a) Sooq inuit ilaasa qularaat Biibili ullumikkut inuunermut pingaaruteqartoq? (b) Uppernarsaatit pingasut suut atorlugit takutissinnaavarput Biibili Guutimeersuusoq?
BIIBILI inunnut ukiumut 2000-imut isilersunut pingaaruteqarpa? Ilaat naaggaarumassapput. „Ullumikkut kemiimut tunngasunik ilinniartitsissagaanni [atuagaq] kemiimut ilinniut 1924-imeersoq atorneqarumanavianngilaq — taamanerniimmi kemii pillugu ilikkagaqarsimaqigatta,“ Dr. Eli S. Chesen taama allassimavoq nassuiarniarlugu sooq Biibili pisoqalisimasutut isigigini. Oqaasii tunngavissaqarluarpalussinnaapput. Tassami Biibilip nalaaniilli inuit ilisimatuussuseq, sianissutsikkut peqqissuseq ileqqullu pillugit ilikkagaqarsimaqaat. Taamaattumik ilaat ima eqqarsartarput: ’Atuagaq taama pisoqaatigisoq qanoq ililluni ilisimatuussutsikkut eqqoqqissaanngitsunik imaqanngitsoorsinnaava? Qanoq ililluni ullutsinni inuunermut atoriaannaasunik siunnersuutinik imaqarsinnaava?’
2 Biibilimi tamakkununnga akissutissaqarpoq. Pîtrusip agdlagaisa áipait 1:21-mi paasitinneqarpugut pruffiitit Biibilimik allattut ’anersaap illernartup pisimmatik Guutimit oqaluttut’. Taamaalilluni Biibilip takutippaa atuagaalluni Guutimit pisoq. Qanorli ililluta allat tamatuminnga uppernarsaavigisinnaavavut? Biibilip Guutimit oqaaserineqarneranut uppernarsaatit assigiinngitsut pingasut misissoriartigik: (1) Ilisimatuussutsikkut eqqoqqissaarnera, (2) ullumikkut inuunermut atatillugu najoqqutassianik atortuujuartunik atoriaannaasunillu imaqarnera aamma (3) annikitsualutsigut allaat siulittuutinik eqqorluartunik, oqaluttuarisaanermi pisimasunit uppernarsarneqartunik, imaqarnera.
Atuagaq ilisimatuussutsimut naapertuuttoq
3. Sooq ilisimatuut paasisimasaat Biibilimut akerliunngillat?
3 Biibili tassaanngilaq ilisimatuussutsikkut ilinniut. Taamaakkaluartoq atuagaavoq ilumoortumik imalik, ilumoortorlu atajuartarpoq. (Juánase 17:17) Ilisimatuut paasisimasaat Biibilimut akerliunngillat. Biibilip ilisimatuussutsimut attuumassuteqartut eqqartoraanngamigit itsaq ’ilisimatuussutsikkut’ isumaliutinit kingusinnerusukkut eqqunngitsutut qulaarneqartunit sunnertissimanngivittarpoq. Aap, Biibilimi ilisimatuussutsikkut eqqortut aammalu taamanikkut isummanut nalinginnaanerusunut akerliusut allassimapput. Assersuutigalugu, eqqarsaatigeriartigu Biibilip nakorsaatitigut ilisimatuussutsimut naapertuunnera.
4, 5. (a) Nakorsat itsaq inuusut nappaatit pillugit suna paasisimanngilaat? (b) Sooq Mosesip qularnanngitsumik Egyptenimiut nakorsaasa katsorsariaasii nalunngilai?
4 Nakorsat itsaq inuusut paasilluarsimanngilaat nappaatit qanoq ilillutik tuniluuttartut, nappaatillu pinaveersaartinneqassappata eqqiluisaarnerup pingaaruteqassusia nalullugu. Taamaattumik nakorsaariaasiisa ilarpassui ullumikkut periaaserineqartunut naleqqiullugit ilisimaatsutut ipput. Nakorsaariaaseq pillugu allakkat pisoqaanersaasa ilaat tassaapput Papyrus Ebersimik taaneqartut, Egyptenimiutoqqat nakorsaariaatsimik siunnersuutaannik imaqartut, ukiup 1550-p missaani u.n.s. allanneqarsimasorineqartut. Tassani nappaatinut assigiinngitsunut katsorsaariaatsit 700-t eqqartorneqarput, ilaatigut ’kuukkooriarsuarmit kiitinnermut imaluunniit isikkap inuaani kukikkut anniarnermut’. Nakorsaatit amerlanerit sunniuteqartarsimanngillat, ilaallu navianartorujussuusinnaallutik. Assersuutigalugu, ikip passunneqarneranut ilaatigut inuup anaata assigiinngitsunut allanut akulerunnissaa atornissaalu siunnersuutigineqarput.
5 Egyptenimiut nakorsaariaasiinik allakkat tamakku allanneqarsimapput Biibilip atuagartaasa siulliit, Mosesip inatsisaanik imaqartut, allanneqarnerata nalaani. Moses, ukiumi 1593-imi u.n.s. inunngorsimasoq Egyptenimi alliartorpoq. (2 Moses 2:1-10) Faraokkut inoqutaannut ilaagami ’Egyptenimiut ilisimatuussutaannik tamanik ajoqersorneqarpoq’. (apustilit suliait 7:22) Egyptenimiut ’nakorsaataat’ nalunngilai. (1 Moses 50:1-3) Taakkua katsorsaariaasii sunniuteqanngitsut navianartullu Mosesip allagaanut sunniuteqarpat?
6. Mosesip inatsisaani eqqiluisaarneq pillugu maleruagassat suut ullumikkut nakorsaatitigut ilisimatuut akuerisinnaavaat?
6 Naamik. Akerlianik Mosesip inatsisaani eqqiluisaarneq pillugu maleruagassaqarpoq ullumikkut nakorsaatitigut ilisimatuussutsimit akuerineqartunik. Assersuutigalugu, sakkutuut tammaarfii eqqarsaatigalugit peqqussutigineqarpoq annat tammaarfiup avataani nunamut matoorunneqartassasut. (5 Moses 23:13) Tamatumani pinaveersaartitsinerit ullutsinnuttaaq naleqqulluartut pineqarput. Taamaaliortarnermikkut erngup mingutsinneqarnissaa, dysenteri timminnerillu niviukkat aqqutigalugit tuniluussinnaasut allat pinaveersaartissinnaavaat. Allaat ullumikkut nunani eqqiluisaarfiunngitsuni inuit millionilikkuutaat ukiut tamaasa nappaatit tamakku toqqutigisarpaat.
7. Mosesip inatsisaani nappaatsaaliornermut malittarisassat nappaatinut tuniluuttartunut illersuutaappat?
7 Mosesip inatsisaani nappatsaaliornermut aamma allanik malittarisassaqarpoq inuit nappaatinut tuniluuttartunut illersuutigisaannik. Inuk tuniluuttartumik nappaateqartoq nappaateqarsorineqartorluunniit immikkut inissinneqartarpoq. (3 Moses 13:1-5) Atisat qummuattallu uumasumut (immaqa nappaammit) toqusimasumut attuussimappata atorneqaqqitsinnagit errorneqassapput imaluunniit suujunnaarsinneqassallutik. (3 Moses 11:27, 28, 32, 33) Inuk toqusimasumik attuiguni minguttuutut isigineqassaaq, taamaattumillu minguiassaaq atisani errorlugit uffarlunilu. Ulluni arfineq-marlunni minguttuujussaaq allanullu qanillissanani. — 4 Moses 19:1-13.
8, 9. Sooq oqarsinnaavugut Mosesip inatsisaani nappatsaaliornermut malittarisassat ilisimassusermik aatsaat kingusinnerujussuakkut paasineqartumik ersersitsisut?
8 Nappatsaaliornermut malittarisassat tamakku ilisimassusermik aatsaat kingusinnerujussuakkut paasineqartumik ersersitsipput. Ullumikkut nakorsaatitigut ilisimatuut qanoq ililluni nappaatit tuniluuttarnerat pinaveersaartinneqarsinnaanerallu pillugit amerlasuunik ilinniarsimapput. Assersuutigalugu, 1800-kkunni nakorsaariaatsikkut siuariarnerit pissutigalugit nappaatit tuniluunnissaraluat eqqiluisaarnikkut pinaveersaartinneqarsinnaanerulerpoq. Tamanna tupinnartumik kinguneqarpoq, tuniluunnerit toqujaarpallaartullu ikilerujussuarmata. Ukiumi 1900-mi Europami USA-milu ukiut inuit inuuffigisartagaat agguaqatigiissillugit 50-init ikinnerupput. Tamatuma kingorna sivisunerusumik inuusoqartalerpoq nakorsaatitigut ilisimatuussutsikkut siumukarneq pissutigiinnarnagu aammali eqqiluisaarneq inuunermilu atugarisat pitsanngoriartornerat pissutigalugit.
9 Nakorsaatitigut ilisimatuut nappaatit qanoq ilillutik tuniluuttarnerannik paasisaqarnerat ukiunik tuusintilikkuutaanik sioqqullugu Biibilimi nappatsaaliornermut tunngasunik silatuunik malittarisassaqareerpoq. Tupinnanngilaq Moses oqarsinnaasimammat nalimini Israelikkut ukiut 70-it 80-illu akornanni inuusartut. (Tussiaat 90:10) Mosesip qanoq ililluni nappatsaaliornermut malittarisassat tamakku nalunngissinnaasimavai? Biibilimi nassuiarneqarpoq: Inatsisit ’peqqussutigineqarput inngilitigut’. (Galâsiamiut 3:19) Ilumut, Biibili tassaanngilaq atuagaq inuit ilisimassusiannik imalik, tassaallunili atuagaq Guutimit pisoq.
Atuagaq ullumikkut inuunermut atoriaannaasoq
10. Naak Biibili ukiut 2000-ingajaat matuma siorna allanneqarsimagaluarluni siunnersuutai qanoq oqaatigineqartariaqarpat?
10 Atuakkat siunnersuutinik imallit erniinnaq pisoqalillutillu allanngortiterneqartarput imaluunniit allanik taarserneqartarlutik. Biibilili tamatumani immikkut ittuuvoq. „Inatsisitit allanngujuitsuupput,“ Tussiaat 93:5-imi taama allassimavoq. Naak ukiut 2000-ingajaat matuma siorna allanneqarsimagaluarluni Biibili suli atoriaannaavoq. Qanorluunniit ammikkut qalipaateqaraluarutta nunamilu sumiluunniit najugaqaraluarutta atorluarsinnaavarput. Biibilip unnersuussutaasa ’allanngujuitsut’ atortuujuartut ilaat misissoriartigik.
11. Ukiut qulillit arlallit matuma siorna angajoqqaarpassuit meeqqanik perorsaatissiineq eqqarsaatigalugu qanoq isumaqalersinneqarpat?
11 Ukiut qulillit arlallit matuma siorna angajoqqaarpassuit — meeqqanik perorsaanermik „isumassarsiat nutaat“ pissutigalugit — isumaqalerput „inerteqquteqarnissaq inerteqqutaasoq“. Annilaanngatigaat meeqqat killilersorneqarunik ajoquserneqassasoralugit tarnimikkullu ikilerneqassasoralugit. Meeqqanik perorsaanermut tunngasunik siunnersuisartut ajunngitsumik siunertaqarlutik inassutigaat angajoqqaat meeqqaminnik taamaallaat qajassuussilluinnartumik naveersisassasut. Maannakkulli immikkut ilisimasallit taakkorpiaat ’angajoqqaat kajumissaartarpaat sukannernerulernissaannut perorsaatissiinermilu aalajangersimanerulernissaannut,’ The New York Times-imi taama allassimavoq.
12. Griikerit oqaasiat ’perorsarpaa’-mik nutserneqartoq qanoq isumaqarpa, sunalu pillugu meeqqat taama perorsaatissinneqartariaqarpat?
12 Biibilimili meeqqanik perorsaaneq pillugu erseqqissunik silatusaartunillu unnersuussuteqartuarsimavoq. Ukiut 2000-ngajaat matuma siorna tassani allassimavoq: ’Ilissi angajoqqaat, qitornasi narrutsatseqinasigik, paariniarsigilli perorsarlugit inertertarlugillu Naalakkamit.’ (Evfisumiut 6:4) Griikerit oqaasiat ’perorsarpaa’-mik nutserneqartoq isumaqarpoq „perorsaatissiineq, ilinniartitsineq, unnersuussineq“. Biibilimi allassimavoq angajoqqaat taamatut perorsaatissiigaangamik unnersuussigaangamilluunniit meeqqaminnut asanninnertik takutittaraat. (Ussatit 13:24) Meeqqat ileqqussatigut najoqqutassaqarnertik aamma suna ajunngitsuunersoq sunalu ajortuunersoq pillugit ersarissumik killissaqartitaanertik iluarisarpaat. Perorsaatissinneqarunik toqqissisimanerussapput; nalussanngilaat angajoqqaamik soqutigigaatik inuttullu qanoq ineriartornertik eqqumaffigigaat. — Naleqqiuguk Ussatit 4:10-13.
13. (a) Perorsaatissiineq eqqarsaatigalugu angajoqqaat Biibilimi sumik mianersoqquneqarpat? (b) Perorsaatissiineq qanoq ittoq Biibilimi pingaartinneqarpa?
13 Biibilimi angajoqqaat perorsaatissiineq eqqarsaatigalugu mianersoqquneqarputtaaq. Angajoqqaat oqartussaanerat peqqarniitsumik atorneqanngisaannassaaq. (Ussatit 22:15) Meeraq kinaluunniit naakkittaatsumik pillarneqartariaqanngilaq. Ilaqutariit Biibili naapertorlugu inuussagunik nakuuserfiginnissinnaanngillat. (Tussiaat 11:5) Aamma misigissutsikkut peqqarniitsuliorneq — oqaatsit sukannersut, isornartorsiuiuarneq mitallernerlu meeqqamut nikallornartorujussuusinnaasut — atorneqartariaqanngivipput. (Naleqqiuguk Ussatit 12:18.) Angajoqqaat Biibilimi ima mianersoqquneqarput: „Angajoqqaat ukorsii, qitornasi naveertuaannaqinasigik nikallorluinnarteqinavasi.“ (Kulorsamiut 3:21, Phillips) Biibilimi malittarisassat pitsaaliisinnaasut pingaartinneqarnerusarput. 5 Moses 11:19-imi angajoqqaat kajumissaarneqarput ulluinnarni qasukkarsimanartunik iliuuseqarnerminni meeqqaminnut ileqqussatigut ajoqersuisaqqullugit. Meeqqanik perorsaanermut siunnersuutit paasinartut silatusaartullu Biibilip nalaanisut suli ullutsinni atorsinnaapput.
14, 15. (a) Sooq Biibilip imai tassaaginnanngillat unnersuussutit pitsaasut? (b) Ajoqersuutit Biibilimiittut suut ikiortigalugit angutit arnallu naggueqatigiinnit inuiaqatigiinnillu assigiinngitsuneersut imminnut naligiissutut isiginnissinnaappat?
14 Biibilip imai tassaaginnanngillat unnersuussutit pitsaasut. Aamma uummammut killinnartuupput. Eprîarinut allakkat 4:12-imi ima atuarpugut: ’Guutimmi oqaasia uumavoq killinnartorsuullunilu pananillu illuttut kiinalinnit tamanit ipinnerulluni pulallunilu tarnerlu anersaarlu, naggussallu paqqillu avissaartissinnaallugit, uummatillu eqqarsaatai isumaalu killisiorsinnaallugit.’ Misissoriartigu Biibilip oqariartuutaa qanoq kajumissinartigisinnaasoq.
15 Ullumikkut inuit naggueqatigiissutsikkut inuiaqatigiissutsikkullu avissaartuussimapput. Silarsuaq tamakkerlugu inuppassuit pisuussuteqanngitsut avissaartuunnerit tamakku pissutigalugit sorsunnerni toqutaasarsimapput. Akerlianilli ajoqersuutit Biibilimiittut angutit arnallu naggueqatigiinnit inuiaqatigiinnillu assigiinngitsuneersut ikiorpaat imminnut naligiissutut isigilersillugit. Assersuutigalugu apustilit suliait 17:26-mi allassimavoq Guutip ’inooqatigiissorpassuit tamaasa aammit ataatsimit naggueqartikkai’. Imaappoq, ataasiinnarmik naggueqatigeeqarpoq — inuit! Biibilimi kajumissaarneqarpugut ’Guuti malinniaqqullugu’, taanna pillugu allassimammat: ’Inuup kinaassusia Guutip pinngilaa, kisianni inuiaqatigiinni tamani kinaluunniit mianerinnitsini iluarnermillu sulisoq nuannarigaa.’ (Evfisumiut 5:1; apustilit suliait 10:34, 35) Biibilimik ilumoorussisut tassanilu ajoqersuutigineqartunik maleruaaniarsarisut tamatuminnga ilisimanninnerup ataasiussuseqartittarpai. Inuup ilorpiaanut, uummataanut, sunniuteqartarpoq, inunnik avissaartuutsitsisut inuit pilersissimasaat peerlugit. Ullumikkut silarsuatsinni ilumut taama pisoqarsinnaava?
16. Misigisimasamik oqaluttuarit takutinniarlugu Jehovap nalunaajaasui tassaasut nunarsuaq tamakkerlugu qatanngutigiit ilumoortut.
16 Aap! Jehovap nalunaajaasuisa nunarsuaq tamakkerlugu qatanngutigiinnertik tusaamasaassutigaat, taakkua akornanni inuit naggueqatigiinnit eqqisseqatigiissimanngikkaluartuneersut tamarmik ataasiussuseqarput. Assersuutigalugu Rwandami naggueqatigiit imminnut sorsuummata Jehovap nalunaajaasuisa qatanngutitik angutit arnallu kristumioqatitik naggueqatiginngisatik illersortarpaat, taamaalillutik inuunertik navianartorsiortillugu. Nalunaajaasut ilaata hutukkuusup ilaqutariit arfiniliusut tutsikkut ilageeqatigisani angerlarsimaffimmini toqqortissimavai. Ajoraluartumik ilaqutariit tutsikkut nanineqarput toqunneqarlutillu. Qatanngut hutuusoq ilaqutaalu toqutsisunit persarineqaleramik Tanzaniamut qimaasariaqarput. Misigisat arlallit taamaattut nalunaarutigineqarsimapput. Nalunaajaasut miserratiginngilaat ataasiussuseqarneq taama ittoq Biibilip oqariartuutaata inuup uummataanut sunniuteqarneratigut aatsaat anguneqarsinnaasoq. Silarsuarmi uumissuinermik ulikkaartumi Biibilip inuit ataasiussuseqartissinnaammagit erserpoq atuagaasoq ilumut Guutimit pisoq.
Atuagaq siulittuutinik ilumoortunik imalik
17. Biibilimi siulittuutit qanoq ilillutik inuit siulittuutaannit allaanerulluinnarpat?
17 ’Pruffiitip oqaaserisaa allakkaniittoq imminit nassuiaatissaqarnavianngilaq,’ Pîtrusip agdlagaisa áipait 1:20-mi allassimavoq. Pruffiitit Biibilimik allattut silarsuarmi ineriartorneq naapertorlugu siunissaq takorloorsimanngilaat namminnerlu isumartik malillugu naatsorsuutigisimanagu. Aamma piumaartussat pillugit ersernerluttunik assigiinngitsunik nassuiarneqarsinnaasunik siulittuisarsimanngillat. Assersuutigalugu, misissoriartigu Biibilimi siulittuut aalajangersimasoq ersarilluinnartoq taamanikkullu inuusut nalinginnaasumik ilimagisinnaasaannut akerliulluinnartoq.
18. Suna pillugu itsaq Babylonimiut toqqissisimasutut misigisimagunarpat, Esajasili Babylon pillugu sumik siulittuisimava?
18 Ukiuni 600-kkunni u.n.s. illoqarfik Babylon Babylonimiut naalagaaffissuanni illoqarfiit pingaarnersaraat ajugaaffigineqarsinnaarpasinngitsoq. Illoqarfiup kuussuup Eufratip sinai illugiit tamaasa siammarfigisimavai, kuussuullu erngi ikerasaliarpassuillu pallittaalisatut ipput. Illoqarfik qarmarsuarnik iluleriinnik alapernaarsuiffinnik napasuliarpassualinnik illersuuteqarpoq. Tupinnanngilaq Babylonimiut isumannaatsutut misigimmata. Kisianni ukiuni 700-kkunni u.n.s., Babylonip pissaaneqarnerpaaffia sioqqullugu, pruffiiti Esajas ima siulittuivoq: „Babylon . . . Guutip Sodomamik Gomorramillu piuneerussineratut pineqassaaq. Najugarineerutivissaaq illuliorfigineqarnani kinguaariikkuutaani; Arabiamiut tuperfigissanngilaat, savanik paarsisut tammaarfigissanngilaat.“ (Jesaja 13:19, 20) Malugiuk Babylonip piuneerussaanissaata saniatigut aamma siulittuutigineqarmat inuerutissasoq. Sapiitsumik siulittuutaavoq! Esajas taama allassimava illoqarfikoq Babylon inuerussimasoq takoreerlugu? Oqaluttuarisaaneq naaggaarpoq!
19. Sooq ukiumi 539-mi u.n.s. oktobarip ulluisa tallimaanni Esajasip siulittuutaa tamakkiisumik eqquutinngikkallarsimava?
19 Ukiumi 539-mi u.n.s. oktobarip ulluisa tallimaanni Babylon Mediamiut Persiamiullu sakkutuuinit Kyros Angisuumit siulersorneqartunit ajugaaffigineqarpoq. Kisianni Esajasip siulittuutaa taamani suli tamakkiisumik eqquutinngikkallarpoq. Kyrosimit ajugaaffigineqarnermi kingorna Babylon — illoqarfittut siornagornit pingaaruteqarpallaarunnaaraluarluni — ukiuni hundredelippassuarni inoqarpoq. Biibilimik allakkat imusat Immap Uumaatsup nunataaneersut Jesajap allagaanik imaqartut ukiuni 100-kkunni u.n.s. allanneqarnerata nalaani Parthiamiut Babylonimi naalakkersuipput, taamanilu illoqarfik tamanna pillugu inuiaqatigiit eqqaaniittut sorsuuttarput. Oqaluttuarisaanermik allattup Josefusip juutiusup eqqaavaa ukiuni hundredelinni siullerni u.n.s. ’juuterpassuit’ tassani najugaqartut. The Cambridge Ancient History naapertorlugu niuertut Palmyrameersut Babylonimi niuerneq pitsaalluartoq pilersippaat ukiumi 24-mi u.n.k. Taamaattumik ukiuni hundredelinni siullerni u.n.k. allaat Babylon suli inuerussimanngilaq; taamaattoq Jesajasip allagai tamatuma siunerujussuatigut allanneqareersimapput. — 1 Pîtruse 5:13.
20. Babylonip naggataatigut ’illukuinnanngorsimaneranut’ sumik uppernarsaatissaqarpa?
20 Babylonip inuerunnera Esajasip angumerinngilaa. Siulittuutigineqartutulli Babylon naggataatigut ’illukuinnanngorsimavoq’. (Jeremia 51:37) Hebriiarit oqaasiinik ilisimatooq Hieronymus (ukiuni 300-kkunni inuusoq) naapertorlugu Babylon taamani tassaalersimavoq ’uumasunik nujuartanik assigiinngitsunik tamanik’ piniariartarfik. Babylon ulloq manna tikillugu inoqanngilaq. Immaqa takornariat takornariarfissaattut sananeqaqqissinnaagaluarpoq, kisianni ’kinguaavi kingulissaalu’ qangali nungoreersimapput. — Jesaja 14:22.
21. Sooq pruffiitit aalajaatsut siunissaq eqqoqqissaartumik siulittuutigisinnaavaat?
21 Pruffiiti Esajas erseqqinngitsumik piumaartussanullu assigiinngitsunut tamanut naleqquttunngortinneqarsinnaasunik siulittuisimanngilaq. Aamma pereersut siulittuutaasuusaartillugit allaatigisimanngilai. Esajas ilumoortumik siulittuivoq. Aamma Biibilimi siulittuutinik allattut allat ilumoortumik allassimapput. Inuit taakku qanoq ilillutik inuit allat sapigaannik iliorsinnaappat — siunissaq eqqorluartumik siulittuutigalugu? Akissut imaappoq: Siulittuutaat inuit oqaaserinngilaat, Guutilli siulittuisartup Jehovap, ’qangarsuarli nalunaarutiginnittup qanoq pisoqarnissaanik’, oqaaserai. — Jesaja 46:10.
22. Sooq sapinngisatsinnik iliuuseqartariaqarpugut inuit ilumoorusuttut kajumissaarniarlugit namminneq Biibilimik misissuinissaannut?
22 Biibili misissorneqartariaqarpa? Uagut nalunngilarput misissorneqartariaqartoq. Inuppassuilli tamanna naluaat. Biibili atuarsimanagu isummerfigisimavaat. Professorimi allaaserisap siulianiittup aallaqqaataani eqqaaneqartoq? Biibilimik atuaqqissaaqatigiinnissamik neqeroorut akueraa, Biibililu misissoqqissaareeramiuk paasivaa Guutip oqaaserigaa. Jehovap nalunaajaasuatut kuisippoq, maannalu utoqqaanertatut kiffartorluni! Inuit ilumoorusuttut kajumissaarniartigik namminneq Biibilimik misissuinisaannut isummernissaannullu. Qularinngilarput Biibili ilumoorlutik misissorunikku paasissagaat tassaasoq atuagaq immikkut ittoq, inunnut tamanut atuagaq! (wE 1/4 98)
Nassuiarsinaavigit?
□ Qanoq ilillutit Mosesip inatsisai atorlugit takutissinnaaviuk Biibili inunnit pisimanngitsoq?
□ Najoqqutassiat atortuujuartut suut Biibilimeersut ullumikkut inuunermut atoriaannaappat?
□ Sooq Jesaja 13:19, 20-mi siulittuut piviusunngoreersimanermi kingorna allanneqarsimasinnaanngila?
□ Inuit ilumoorusuttut qanoq iliornissaannut kajumissaartariaqarpavut, aamma sooq?
[Qupp. 20-imi ungalusaq]
Uppernarsarneqarsinnaanngitsummi?
Biibilimi allassimasut ilaat tigussaasut ikiortigalugit uppernarsarneqarsinnaanngillat. Assersuutigalugu eqqaaneqarpoq takussaanngitsunik anersaaqartoq, tamannalu ilisimatuussutsikkut uppernarsarneqarsinnaanngilaq — eqqunnginnerarneqarsinnaananiluunniit. Imali paasisariaqarpa Biibili ilisimatuussutsimut akerliusoq?
Ullorissanik ujarassiuup apeqqut tamanna eqqarsaatigisariaqalersimavaa ukiualuit matuma siorna Jehovap nalunaajaasui ilagalugit Biibili atuaqqissaartaleramiuk. „Miserratigisinnaanngilara Biibili akuerissallugu artornarteqqaarsimagiga Biibilimi allassimasut ilaat ilisimatuussutsikkut uppernarsaatississinnaannginnakkit,“ oqaluttuarpoq. Angutip peqqusersuitsup taassuma Biibilimik atuaqqissaarnini ingerlatiinnarpaa naggataatigullu qulariunnaarlugu takussutissat takutikkaat Guutip oqaaserigaa. „Tamatuma kingorna Biibilimi paasissutissat tamavimmik uppernarsarneqarnissaat piumasariunnaarpara,“ taama nassuiaavoq. „Inuup ilisimatuussutsikkut eqqarsartartup Biibili anersaakkut tunngasutigut misissoqqissaarumasariaqarpaa, taamaaliorumanngikkuni sallusuissut akuerinavianngilaa. Ilimagisinnaanngilarput Biibilimi allassimasut tamaviisa ilisimatuussutsip uppernarsarsinnaassagai. Allassimasoq aalajangersimasoq uppernarsarneqarsinnaanngikkallaraluarluni ima paasisariaqanngilaq ilumoorsinnaanngitsoq. Pingaaruteqarneruvoq misissorneqarsinnaasut tamarmik takutimmassuk Biibili eqqorluartuusoq.“
[Qupp. 18-imi assiliartaq]
Mosesip eqqiluisaarneq pillugu malittarisassat aatsaat kingusinnerujussuakkut paasineqartut allattorsimavai