Jehovap piumasaatut iliorput

Jobip assuarnaassutsi akissarsissutigigaa

JOB angut misiginneqatiginnittuusimavoq, uillarnernut, iliarsunnut artorsaatilinnullu illersuisuulluni. (Job 29:12-17; 31:16-21) Tassanngaannartumilli ajoqisumik eqqorneqarpoq perlunnik qulangerneqarluni pisuussutini, meeqqani peqqissutsilu annaallugit. Angut taanna assuarnaatsoq naqisimaneqartunut nukittoqutaallunilu ikorfartuutaasimasoq aalajaatsorlu ajoraluartumik annikilliulerami annerusumik ikiorneqanngilaq. Allaat nuliata oqarfigaa: „Guuti perloqquinnaruk, toquinnaruit pitsaanerummat.“ ’Ikinngutaasalu’ Elifazip, Bildadip Zofarillu tuppallersanngilaat. Akerlianik isummersuilerput Job ajortuliorsimanerarlugu anniaatinilu nammineerluni pisuussutigigai. — Job 2:9; 4:7, 8; 8:5, 6; 11:13-15.

Job misilinneqaraluaqaluni aalajaattuarpoq. Tamanna pissutigalugu Jehovap Job naggataatigut nallittorpaa pilluaatissillugulu. Pisimasup tamatuma takutippaa Guutip kiffai tamarmik assuarnaattuarunik aamma akissarsisinneqarumaartut.

Pinngitsuutinneqarneq qaqeqqinnerlu

Siullermik Jehovap Elifaz, Bildad Zofarilu perorsaatissaannik ilisimatippai. Elifaz, qularnanngitsumik angajulliusoq oqarfigaa: „Illit ikinngutitillu marluk assut kamaappassi kiffattut Jobitut iliornasi eqqortumik oqaluuserinnginnassinga. Ussigit arfineq-marluk savallu angutivissat arfineq-marluk nassarlugit kiffara Job ornissiuk taakkulu ikikkagassatut pilliutigalugit ilissinnut saammaannarsissutissatut. Taava kiffama Jobip qinnutissavaasi.“ (Job 42:7, 8) Eqqarsaatigeriaruk tamanna qanoq angutinut pingasunut taakkununnga qanoq kinguneqartoq!

Jehova Elifazimit, Bildadimit Zofarimillu pilliummik angisuumik piumasaqarpoq immaqa ajortuliaata ingasassusia takutinniarlugu. Aap, piaaralutik piaarinatilluunniit, Jehova mitaatigisimavaat oqarlutik ’kiffani tatigisinnaanngikkai’ aamma Job aalajaappat aalajaanngikkaluarpalluunniit tamanna soqutaanngitsoq. Elifaz allaat oqarpoq Job Guutip isaani ’qillaalaanilluunniit’ naleqannginnerusoq! (Job 4:18, 19; 22:2, 3) Tupinnanngitsumik Jehova oqarpoq: ’Eqqortumik uannik oqaluuserinninngilasi.’

Tamakkuinnaanngillalli. Elifaz, Bildad Zofarilu aamma Jobimut ajortuliorput oqaluttuukkamikku ajornartorsiutigilikkani nammineq pilersitarigai. Tunngavissaqanngitsumik pisuutitsinerat misiginneqataanngilluinnarnerallu Jobip annikilliuutigalugulu isumatsaatigaa, tamannalu pillugu nillerpoq: „Qanoq sivisutigisumik naalliutsinniarpisinnga oqaatsinillu aserorterlunga?“ (Job 10:1; 19:2) Takorlooriaruk angutit pingasut taakkua kanngusunnerat Job isigitillugu namminneq ajortuliornertik pillugu pilliuteqartariaqaramik.

Kisianni Jobip taakkua kanngunarsagaanerat tipaatsuutigisinnaanngilaa. Akerlianik Jehovap peqquaa unnerluussisini qinnutissagai. Jobilu ilioqquneqarnermisut iliorpoq, taamaaliorninilu pilluaqqusaassutigalugu. Siullermik Jehovap nappaatinit ajorluinnartunit aniguisippaa. Taava Jobip qatanngutai angutit arnallu ilisarisimasaalu tuppallersaajartorput „tamarmillu immikkut tunivaat aningaasanik assammiunillu kuultiusunik“.a Aammattaaq Jobip „pigisarilerpai savat 14.000-it, qatigattuut 6.000-it, ussigit illugiit 1.000-it siutituullu arnavissat 1.000-it“.b Piffissap ingerlanerani Job pilluaqquneqarpoq arfineq-marlunnik erneqalerami, pingasunik paneqalerami, aamma inuunermini kinguaani kinguaariit sisamat angumerigamigit. — Job 42:10-17.

Ilinniutigisinnaasavut

Job ullumikkut Guutip kiffaanut maligassiuilluarpoq. Taanna „assuarnaatsuullunilu peqqusersuitsuugami“, Jehovap tulluusimaarluni taasinnaasimavaa ’kiffara’. (Job 1:8; 42:7, 8) Tamanna isumaqanngilaq Job naammalluinnartuusoq. Misilinneqarnermi nalaani Job kukkulluni isumaqalersimagaluarpoq nammineq ajunaarnerminut Guuti pisuusoq. Allaat Guutip inunnut iliuusai isornartorsiortarsimavai. (Job 27:2; 30:20, 21) Imminut iluartuutippoq Guuti iluartuutinnagu. (Job 32:2) Kisianni Jobip Pinngortitsisorsuaq tunukkusunngilaa, Guutimillu naveerneqarnini makitajuilluni akueralugu. „Uanga oqaluuserisimavakka paasinngisakka“, imminut nassuerutigaaq. „Taamaattumik oqaaserisimasaraluakka tamaasa utertippakka peqqissimineralu takutillugu issumi arsanilu issiallunga.“ — Job 42:3, 6.

Uaguttaaq misilinneqarnitsinni eqqarsalersoorsinnaavugut, oqalulersoorsinnaalluta iliulersoorsinnaallutaluunniit ippinnartumik. (Naleqqiuguk Nalunaajaasup oqaasii 7:7.) Guutimulli iluunngarluta asannissuseqarutta pikitsitsiffiginavianngilarput imaluunniit ajorusuuteqarfigalugu uagut inuunermik unamminiarnartumik misigisaqarutta. Assuarnaassuserput attattuarniaannartigu piffissallu ingerlanerani pilluaqqusaanernik katersilluta. Tussiaasiortoq Jehova pillugu oqarpoq: „Unneqqarissutut iliortarputit unneqqarissumut.“ — Tussiaat 18:26.

Job peqqisseqqinngikkallarmat Jehovap piumaffigisimavaa ajortuliorfiginnitsini qinnutissagai. Tamanna ilinniutigisinnaavarput. Jehovap piumasaraa ajortuliorfiginnitsivut isumakkeerfigeqqaassagivut nammineq ajortuliatsinnik isumakkeerfigissappatigut. (Matîuse 6:12; Evfisumiut 4:32) Allat isumakkeerfiginissaat ajornartikkutsigu naak taamaaliornissamut pissutissaqarluaraluarluta, taava Jehovamit nallittorneqarnissarput naatsorsuutigisinnaassavarput? — Matîuse 18:21-35.

Tamatta ilaatigooriarluta oqimaatsorsiortarpugut. (2 Timûtiuse 3:12) Jobitulli assuarnaatsuujuarsinnaavugut taamaalillutalu angisuumik akissarsilluta. Jakob allappoq: ’Ata, ilalaartut pilluarneraraavut; Jobip ilalaarsusianik tusarsimavusi, Jehovallu aniguiffigititaa ilisimavarsi, Jehova nallittuillunilu isumassuinertoqimmat.’ — Jâko 5:11. (wE 1/5 98)

[Quppernerup ataani ilanngussat]