Jehovap ullua qanillivoq
„Manna tusarsiuk utoqqaanertaasusi ilissi, naalaaritsi nunap inui tamassi!“ — JOEL 1:2.
1, 2. Judakkunni pissutsit suut pissutigalugit Jehovap Joel ilungersunartumik siulittuitissimavaa?
„EQQANAQ ullussaq inna! [Jehovap] ullussaa qanillivoq, nalliukkumaarpoq nungutitsineq [Jehovamit] pisoq nassataralugu.“ Kakkaak siooranarpalummat! Guutip pruffiitini Joel aqqutigalugu nalunaarutaa taamaappoq.
2 Oqaatsit tamakku Joel 1:15-imi allassimapput. Judami ukiup 820-p u.n.s. missaani allanneqarsimagunarput. Nuna tamanna qorsooqqissuullunilu naggorissuuvoq, naatitanillu karrinillu naammattorsuarnik peqarluni. Arlaannilli ajorluinnartoqarpoq. Jerusalemimi Judamilu Ba’alisiorneq ingasalluinnalersimavoq, inuillu guutipiluup tamatuma saavani ernguttorsuusarput. (Naleqqiuguk 2 Israelikkut 21:4-6, 11.) Tamanna Jehovap ilaginnaannassanerpaa?
3. Jehova qanoq mianersoqqussiva, inuiaqatigiillu sumut piareersimasariaqarpat?
3 Joelip allagai-ni tamanna akineqarpoq. Jehova Guutip kisimi oqartussaanini qutsissisinniarpaa aqqilu illernartillugu. Ullussarsua qanillisimavoq, ulloq inuiannut ’Josafatip qooruaniittunut’ tamanut eqqartuussutiminik naammassinniffissaa. (Joel 4:12) Jehovamut, Ajugaqanngitsumut, sorsunnissamut piareersartariaqarput. Aamma ullumikkut Jehovap ullussarsua qanillivoq. Taamaattumik Joelip oqaasii siulittuutaasut sammilaariartigik.
Sullernit tikiussortut
4. Pisussat Joelip mianersoqqusilluni siulittuutigisai qanoq maluginiarnartigisussaappat?
4 Pruffiitini aqqutigalugu Jehova ima oqarpoq: „Maanna tusarsiuk utoqqaanertaasusi ilissi, naalaaritsi nunap inui tamassi! Taama ittumik pisoqarsimanerpa inuutillusi siuaasassiluunniit ulluini? Tamanna oqaluttuarissavarsi qitornassinnut, taakkua oqaluttuarissavaat qitornassaminnut, taakkualu qitornassaasa kinguaassaminnut.“ (Joel 1:2, 3) Utoqqaanertat inuiaallu tamarmik naatsorsuutigisinnaasimavaat inuutillutik siuaasatilluunniit inuutillugit pisimanngitsumik pisoqarumaartoq. Pisussaq tamanna ima maluginiarnartigisussaasimavoq allaat kinguaariit pingajuinut oqaluttuarineqartussaasimalluni. Pisussaruna suna pineqartoq? Tamanna paasiniarlugu Joelip nalaaniilluta takorlooriartigu.
5, 6. (a) Perluk Joelimit siulittuutigineqartoq oqaluttuariuk. (b) Kia perluk tamanna pilersissavaa?
5 Taa! Ungasissumi ittuppaluk Joelip tusalerpaa. Qilak taarsivoq, nipilu amiilaarnartoq nipittoraluttuinnarpoq. Pujorsuartut isikkulik appariartulerpoq. Tassaaku sullernit millionilippassuit annertuumik aseruisussat! Maanna Joel 1:4 misissoriartigu. Sullernit tikiussortut tassaaginnanngillat pillertat sulullit. Aap! Aamma pillertarpassuit suloqanngitsut paarmortut kaattut tikiussorput. Anorimit tinginneqarlutik pillertat taakku tassanngaannartumik tikiupput qamutitut sorsuutitut perpalullutik. (Joel 2:5) Nerrersuujugamik millionilipassuit taakku nuna paratiisitut ikkaluartoq naggorissagaanngitsutut isikkoqalersissinnaavaat.
6 Qullugissattaaq — pakkalussat qillaalaallu piaraat — tikiussussapput. Qullugiarpassuit kaattut naasut orpiillu pilutaat tamaviisa nerisinnaavaat nunap naasui tamaasa nungulluinnangajallugit. Amiakkuisalu amerlanersaat pillertat neriumaarpaat. Pillertallu nungunngisaat saaluallaat sukkasuumik ingerlasartut nerissavaat. Kisianni Joel 2:11-imi malugissavarput Guutip pillertarpassuit taakku ’sakkutuuminik nakooqisunik’ taammagit. Tassamiuna Guutip pillertarpassuit nunamik aseruisussat kaannersuaqartitsisussallu takkutitinniarai. Pillertat atorlugit perlutitsineq tamanna qaqugu pissava? ’Jehovap ullussarsuata’ siuninnguagut.
„Qaatunniaritsi putumasusi!“
7. (a) Judakkut upperisarsiornikkut siuttui qanoq ittuusimappat? (b) Ullumikkut kristumiuuneraqatigiit siuttui qanoq ilillutik Judakkut upperisarsiornikkut siuttuinut assinguppat?
7 Inuit tusaamasaanerluttut, Judakkunni upperisarsiornikkut siuttut, immikkut ima oqarfigineqarput: „Qaatunniaritsi putumasusi qiallusilu; viinnimik imertartusi kappialassaasi imigassaraluarsi viinnissat isserat maangaannartoq qillugalugu.“ (Joel 1:5) Judami anersaakkut imerajuttut oqarfigineqarput ’qaatussasut’. Oqaluttuarisaanermi pisimasoq pineqaannanngilaq. Ullumikkuttaaq, Jehovap ullussarsuata nalliutilernerani, kristumiuunerartut palasii ’viinnissat isserannik’ assersuutaasumik ima putumatigipput Qutsinnerussaartup kajumissaarutaa tamanna sianigerpiarnaguluunniit. Jehovap ullussarsuata siooranartup putumanerminnit qaatutsippatik tupaallaatissaqassaqaat!
8, 9. (a) Pillertat tamakkualu perlussiortitsinerata kinguneri Joelip qanoq allaatigai? (b) Ullumikkut pillertat kikkunnut assersuutaappat?
8 Sakkutoorpassuit pillertat qimerluulaariartigik. „Inuiaammi uanga nunannut saassussiartorput, pissarsuit kisissaanngitsut; kigutaat løvep kigutaasut ipput løvesullu arnavissatut alleroqarput. Viinnequtaatikka asiutippaat orpiutikkalu figenillit aserorlugit. Ameraarulluinnarpaat avalequtaat qaqortunngortillugit. Kappialagitsi soorlu niviarsiaq aliasuummik atisilluni uineqqaatissaraluaminik upputiginnittoq.“ — Joel 1:6-8.
9 Tamanna tassaannaava ’inuiaat’ pillertatut ilillutik Judamut isaasut pillugit siulittuut? Naamik, suli imaqarneruvoq. Joel 1:6-imi aamma sarĸúmersitat 9:7-imi Guutip innuttai pillertatut eqqaaneqarput. Ullumikkut pillertat Jehovap sakkutuui tassaapput tanitat, taakkulu maanna 5.600.000-init Jesusip ’savaatimisut allatut’ taasimasaanit suleqatigineqalersimapput. (Juánase 10:16) Amerlangaartunut Jehovamik pallorfiginnittunut taakkununnga ilaanerput nuannaarutiginnginnerparput?
10. Pillertat perlussiortitsinerat Judakkut nunaannut qanoq sunniuteqarsimava?
10 Joel 1:9-12-imi allaatigineqarput pillertat perlussiortitsinerata sunniutaasa ilaat. Sullernit ujameriappassuit tulleriiaatiinnartut nuna suerulluinnarpaat. Palasit ilumuunngitsut karrinik, viinnimik uuliamillu amigaateqalerput taamaattumillu suliartik ingerlassinnaajunnaarlugu. Allaat issoq aliasuppoq, pillertammi karreerussimavaat, orpiillu naatitaqartartut naatitaqartarunnaarput. Viinnequtit toqusimammata Ba’alisiortut viinninngersut aammattaaq anersaakkut imerajuttuusut viinnissaarupput.
„Kappialagitsi, ilissi palasit“
11, 12. (a) Ullumikkut kikkut Guutimut palasiunerarpat? (b) Kristumiuuneraqatigiit upperisarsiornikkut siuttui qanoq ullutsinni ’pillertat’ perlussiortitsinerannit eqqorneqarsimappat?
11 Guuti palasinut namminiinnaq isummaminnik atuiumasunut qanoq oqartoq tusariassagit: „Aliasuutinik atisigitsi kappialallusilu, ilissi palasit, nimaaritsi ilissi pilliivimmi kiffartuuteqartusi.“ (Joel 1:13) Joelip siulittuutaata pingaannginnerusumik eqquunnerani palasit Levikkut pilliivimmi kiffartortuupput. Inaarutaasumilli eqquunnerani kikkut pineqarpat? Ullumikkut kristumiuunerartut palasii Guutip pilliiviani kiffartornissamut oqartussaassuseq tigusimavaat, taassumunnga kiffaanerarlutik ’palasiunerarlutillu’. Ullumikkulli Guutip nalitsinni pillertaatai siumut ingerlarsortillugit qanoq pisoqartarpa?
12 Kristumiuunerartut ’palasii’ kamattaqaat Jehovap innuttai sulisut takugaangamikkik Guutillu eqqartuussinissaanik mianersoqqusisut tusaraangamikkik. Guutip naalagaaffianik tusarliussap aseruisumik sunniutai kamaatigingaaraangamikkik imminnut sakissamikkut tilluartarput. ’Savaatitik’ qimagussortut nilliaatigisarpaallusooq. Ivigartorfissaatitik aserorneqarmata unnuaq naallugu simissiamik puunik atisillutik isertitassaraluatik aliasuutigissavaat. Sivitsunngitsoq aamma suliffitsik annaassavaat. Guutimmi kajumissaarpai unnuaq naallugu aliasussasut suujunnaarsitaaffissartik qanillimmat.
13. Kristumiuuneraqatigiit ataatsitut isigalugit Jehovap mianersoqqussutaa ajunngitsumik qisuariarfigissavaat?
13 Joel 1:14 naapertorlugu allamik neriuutissaqanngillat allamik isumataanngikkunik ’Jehovamillu torlorfiginnilinngikkunik’. Ilimagisinnaanerparput kristumiuuneraqatigiit palasii tamarmik Jehovamut saakkumaartut? Soorunami naamik! Taakku ilaasa ataasiakkaat Jehovap mianersoqqussutaa qisuariarfigissavaat. Kisianni upperisarsiornikkut siuttut ilaasortaallu anersaakkut kaattuassapput. Pruffiiti Amos ima siulittuisimavoq: „Ullut nalliukkumaarput, oqarpoq Guuti [Jehova], taava kaannersuaq nunannut nalliutitikkumaarpara — imaanngitsoq iffiamik nererusunneq, imaanngitsoq imermik imerusunneq, tassaasorli [Jehovap] oqaasia tusarusullugu noqqaaneq.“ (Amos 8:11) Tamatumunnga akerliusumik anersaakkut nerersuarneq Jehovap asannittumik ’inussiaq aalajaallunilu silatooq’ aqqutigalugu pilersitaa qujamasuutiginnginnerparput? — Matîuse 24:45-47.
14. Pillertat perlussiortitsinerat sumut kalerrisaarinerua?
14 Pillertat atorlugit perlussiortitsineq taamanikkut ullumikkullu kalerrisaarineruvoq. Sumut kalerrisaarutaanera Joelip toqqaannartumik eqqaavaa, ima allakkami: „Eqqanaq ullussaq inna! [Jehovap] ullussaa qanillivoq, nalliukkumaarpoq nungutitsineq [Jehovamit] pisoq nassataralugu.“ (Joel 1:15) Ullumikkut Guutip sakkutuuisa pillertat nunarsuarmi sumi tamaani angalaarnerat nalunaatsumik takutitsivoq Jehovap ullussarsua siooranaqisoq qanillisoq. Ulloq naatsorsuiffissaq Guutip guutiitsunut eqqartuussutiminik naammassinniffissaa kisimilu naalagaasup ajugaaffissaa tamanna, Jehovamik uummammit pisumik illersuisut qilanaarisinnaavaat.
15. Nunap alianartumik atugaqarnera eqqarsaatigalugu Guutip mianersoqqussutaanik ilassinnittut qanoq qisuariassappat?
15 Soorlu Joel 1:16-20-mi takutinneqartoq itsaq Judakkut akornanni nerisassaaleqineqarpoq. Nuannaarnertaaq amigaataavoq. Karriisiviit imaqanngillat aserorneqarsimallutillu. Pillertat nunap naasui peersimammatigik ussigit inissaasuallutik angalaarput savaatillu mangiarfissaarukkamik nungujartorput. Ilumut ajunaarnersuaq! Pissutsini tamakkunani Joel qanoq ippa? Versi 19 naapertorlugu ima oqarpoq: „[Jehova], illit torlorfigaakkit.“ Ullumikkuttaaq inuppassuit mianersoqqussutit Guutimeersut qisuariarfigalugit uppernikkut Jehova Guuti torlorfigisarpaat.
’Nalliutilerpoq Jehovap ullussaa’
16. Sooq „nunap inui“ uullusissappat?
16 Guuti ima peqqusisoq tusarnaariartigu: „Sulluartaassuarmik qarlortaritsi Sionimi, sorsoqqusissummik nilliagitsi qaqqanni illernartumi! Nunap inui tamarmik uullusissapput.“ (Joel 2:1) Sooq uullusissappat? Tamanna siulittuummi ima akineqarpoq: „Nalliutilermat [Jehovap] ullussaa. Ullussaq taartorsuaq qanillivoq, ullussaq nuiarsuarnik taarnersuarmillu nassataqartoq.“ (Joel 2:1, 2) Aap, Jehovap ullussarsua qanillilluinnarpoq!
17. Judakkut taakkualu nunaat pillertat perlussiortitsinerannit qanoq sunnerneqarsimappat?
17 Takorlooriaruk pruffiitip takorruugaa qanoq sunniuteqartoq pillertat naakkittaaqalutik nuna Edenip naatsiiviatut ittoq puilasuitsunngortimmassuk. Pillertarpassuit ujameriattut ima allaatigineqarput: „Sorsukkiartortut takullugit soorlu tassa hestit, hestit angutivissat pangalluttut, pavani qaqqat kaarfini pissigarpalukkaangata perpalunnerat qamutit ikkulunnerattut ittarpoq; ilami soorlu nutaraaluttut ikualanerit ivikkanik panertunik nungutitsisut, soorlu sakkutoorpassuit sorsukkiartortut. Inuiaat uulluserput taakku pillugit, kiinaat tamarmik sinngorullerput.“ (Joel 2:4-6) Joelip nalaani pillertat atorlugit perlussiortitsinermi Ba’alisiortut annikilliuutaat allipput, siooranermillu kiinaat sinngorullerput.
18, 19. Ullumikkut Guutip innuttaasa sulinerat qanoq pillertat perlussiortitsinerannut assingua?
18 Pillertat qasujaatsut aaqqissuulluagaasullu taakku suulluunniit unitsissinnaasimanngilai. „Sakkutoorpassuit taakku pissarsuartut arpapput“ allaallu qarmat qarsullugit pitoraallutik. Naak orlutitaasoqartaraluartoq „siumukaannarput unitsitassaanatik“. (Joel 2:7, 8) Siulittuut takorlooruminartoq tamanna nalitsinni Guutip sakkutuuinut assersuutaasumik pillertanut siumut assersuutaavoq. Ullumikkuttaaq pillertat Jehovap sakkutuui siumuinnaq ingerlapput. Allaat upperisarsiornikkut akerlilersuinerit ’qarmarsuartut’ ittut ersilissutiginngilaat. Aalajangiusimanninnertik sakkukillisartanngilaat, Guutimulli assuarnaassusertik attattuarlugu. Jehovap nalunaajaasui Tysklandimi nazistit nalaanni ’Heil Hitler!’-reerumannginnertik pillugu toqutaasimasut assigalugit toqutaariataarsinnaanertik piareersimaffigaat.
19 Guutip ullumikkut sakkutuui pillertat kristumiuunerartut ’illoqarfianni’ sukumiisumik nalunaajaasimapput. (Joel 2:9) Aamma silarsuarmi tamarmi nalunaajaasimapput. Akornutissanik sunilluunniit qaangiiuartarput angerlarsimaffinnullu millionilikkuutaanut ornigullutik, aqqusinerni oqarasuaatikkullu sumilluunniit inuit naapitassaatillugit Jehovap tusarliussaa oqaluussissutigisarlugu. Atuagassianik milliardilikkuutaanik siaruarterisimapput sulilu amerlanerungaartunik siaruarteriuassallutik, tassami ammasumik illumiillu illumut kipissanatik oqaluussiuaramik. — apustilit suliait 20:20, 21.
20. Ullumikkut ’pillertat’ kikkunnit ikiorneqarpat, qanorlu kinguneqartumik?
20 Joel 2:10-mi erserpoq pillertarpassuit ujameriattut putsutut seqinermik, qaammammik ullorissanillu matusilluinnarsinnaasutut ittut. (Naleqqiuguk Jesaja 60:8.) Qularutigineqarsinnaanerpa sakkutoorpassuarnut taakkununnga kina tunuliaqutaanersoq? Pillertat nipiliuleruttortut oqaatsit Joel 2:11-imi allassimasut tutsiupput: „[Jehovap] nipini anippaa sakkutoorpassuani siulersorlugit; sakkutuuisami amerlaqisut nakooqisullu peqqussutai naammassivaat. Angeqaaq [Jehovap] ullua siooranaqalunilu, kina ataniarsinnaanerpa?“ Aap, ullumikkut ullussarsuani sioqqullugu Jehova Guutip pillertat sakkutoorpassuani aallartissimavai.
’Jehova mullussinngilaq’
21. ’Jehovap ullussaa tillittutut nalliuppat’ qanoq pisoqassava?
21 Apustilip Peterip Joelitut Jehovap ullussarsua eqqartorsimavaa. Ima allappoq: ’Jehovap ullussaa tillittutut nalliukkumaarpoq; nalliuppallu qilaat perpaluttorsuarmik nungukkumaarput, pinngoqqaartullu ikuallallutik aakkumaarput, nunalu tassanilu suliarisaasut ikikkarumaarput.’ (2 Pîtruse 3:10) Satan Diaavulumit sunnersimaneqarlutik naalakkersuisut ’qilattut’ ittut ’nunamut’, tassa inunnut Guutimit avissaarsimasunut, naalakkersuipput. (Evfisumiut 6:12; 1 Juánase 5:19) Qilaat assersuutaasut nunalu assersuutaasoq Jehovap ullussarsuani Guutip kamannerani ikualasumi aniguinavianngillat. Kiisalu erserpoq qilaat nunalu eqqartorneqartut taarserneqarumaartut ’qilassanik nutaanik nunassamillu nutaamik iluarsuseqarfissanik’. — 2 Pîtruse 3:13.
22, 23. (a) Jehovap naammagittarluni kamajuinnera qanoq qisuariarfigisariaqarparput? (b) Jehovap ullussaa qanillimmat qanoq qisuariartariaqarpugut?
22 Ullumikkut uppernikkut misilinneqarnerpassuavut aammalu allamut saasaasinnaasorpassuit pissutigalugit piffissap ilungersornassusia puioriartulersoorsinnaavarput. Pillertalli assersuutaasut siumut ingerlajuarsinnarput, inuppassuillu Guutip naalagaaffianik tusarliussamut ajunngitsumik qisuariartarput. Guuti piffissamik tamatumunnga atugassamik aalajangiisimavoq, taassumali naammagittassusia mullussinermut paarlaatissanngilarput. ’Jehovap unnersuutigisani mullutinngilaa, soorlu qassiit mullussisorigaat, kamajuillunili pivaasi tammarsimasoqaqqusinnginnami, tamaasali allamik isumataaqqullugit.’ — 2 Pîtruse 3:9.
23 Jehovap ullussarsuanut utaqqinitsinni apustili Peterip oqaasii Pîtrusip agdlagaisa áipait 3:11, 12-imi allassimasut uummammiuginiartigik: ’Tamakku tamarmik taama nungukkumaarmata, soorunami iluartumik ileqqoqarlusi mianerinnittariaqarpusi. Guutip ullussaata nalliuffissaa ilimagalugu qilanaaralugulu, qilaat taava ikumallutik aakkumaarmata pinngoqqaartullu ikuallallutik uukkumaarmata.’ Iliuutsit ileqqullu tassani eqqaaneqartut nassatarissavaat Jehovap sakkutuuinut pillertanut ingiaqataajuarnissarput naggatissap nalliutinnginnerani Guutip naalagaaffianik oqaluussissutiginninnermut isumaqarluartumik peqataanitsigut. — Mákorse 13:10.
24, 25. (a) Jehovap sakkutuui pillertat suleqatigisinnaallugit immikkut pisinnaatitaaffeqarnerput qanoq isigisariaqarparput? (b) Joel qanoq tulluartumik aperiva?
24 Guutip sakkutuuisa pillertat qunusuitsut taakkua nunarsuaq tamakkissavaat Jehovallu ullussarsua nalliutsinnagu unissanatik. Pillertanik ujameriappassuarnik unitsitassaanngitsunik taama ittunik nassaassaqarnera immini Jehovap ulluata qanillineranut uppernarsaatissaavoq malugisarialik. Jehovap ullussarsuata siooranartup nalliutilernerani pitoraannermi kingullermi Guutip tanitaanut pillertanut taakkualu suleqataannut kiffartoqataasinnaanerput nuannaarutiginnginnerparput?
25 Ilumut ulloq angingaartoq pineqarpoq. Taamaattumik tupinnanngilaq Joel 2:11-imi ima apeqquteqarmat: „Kina ataniarsinnaanerpa?“ Tamanna apeqqutillu allarpassuit allaaserisani marlunni tulliuttuni sammissavavut. (wE 1/5 98)
Nassuiarsinnaaviuk?
□ Sooq Jehova Judakkunni sullinernik perlussiortitsisitsinissamik mianersoqqusisimava?
□ Ullumikkut Joelip siulittuutaata eqquunnerani Jehovap pillertaatai kikkuuppat?
□ Pillertat perlussiortitsinerat kristumiuuneraqatigiit siuttuisa qanoq qisuariarfigisarpaat, taakkualu ilaat qanoq aniguisinnaassappat?
□ Ukiuni 1900-kkunni makkunani pillertat perlussiortitsinerat qanoq annertutigisimava, qanorlu sivisutigisumik atassava?
[Qupp. 10-mi assiliartaq]
Sullernit perlussiortitsinerat pisussanut ajornerusunut kalerrisaarutaavoq
[Qupp. 10-mi suminngaanneernera]
Orpik pilutaajarneqarsimasoq: FAO photo/G. Singh
[Qupp. 12-imi assiliartaq]
Jehova Guutip ullumikkut assersuutaasumik pillertat perlussiortitsisippai
[Qupp. 9-mi suminngaanneernera]
Pillertaq: FAO photo/G. Tortoli; pillertarpassuit: FAO photo/Desert Locust Survey