„Qooqqumi Aalajangiiffissami“ eqqartuussut naammassineqassaaq
„Inuiaat aallassapput Josafatip qooruanukarlutik, inuiaat avatangiisigisasi tassani eqqartuunniarakkit.“ — JOEL 4:12.
1. Sooq Joelip katersaarsuit ’qooqqumi aalajangiiffissamiittut’ takuai?
„TUSAASIGIT nilliasorpassuit qooqqumi aalajangiiffissami“! Joelip allagai 4:14-imi taama allassimavoq. Sooq nilliasorpassuit katersorneqarpat? Joel akivoq: „Qanillivormi [Jehovap] ullussaa.“ Tassaavoq Jehovap ullussarsua, kisimi oqartussaassutsiminik qutsissisitsiffissaa inunnillu Kristusip naalagaaffianik pilersinneqartumik akuerinninngitsunik eqqartuussiffissaa. Kiisami ’inngilit sisamat’ sarĸúmersitat kapitali 7-imi eqqaaneqartut ’nunap anoraanik sisamanik’ tigumiarunnaassapput, taavalu ’naalliunnartoqangaassaaq silarsuaqaleqqaarneranit mannalu tikillugu naleqanngisaannartumik kingornalu naleqassanngitsumik.“ — sarĸúmersitat 7:1; Matiuse 24:21.
2. (a) Sooq Jehovap eqqartuussiffissaa tulluartumik „Josafatip qoorua“-nik taaneqarpa? (b) Saassunneqalerami Josafat qanoq eqqortumik qisuariarpa?
2 Joel 4:12-imi eqqartuussiffik tamanna tassaanerarneqarpoq „Josafatip qoorua“. Judakkut oqaluttuarisaaneranni piffissami ilungersornartumi Jehovap kunngip ajunngitsup Josafatip iluaqutissaanut eqqartuussut tamaani naammassisimavaa. Ateq Josafat isumaqarpoq „Jehova eqqartuussisuuvoq“. Taamani pisimasut misissorutsigik paasinerussavarput ullutsinni qanoq pisoqarumaartoq. Biibilimi Israelikkut kinguaariit oqaluttuarisaanerat 2-mi, kapitali 20-mi tamakku oqaluttuarineqarput. Kapitalimi tamatumani versi 1-imi allassimavoq ’Moabikkut Ammonikkullu Meunikkullu ilaat ilagalugit Josafat sorsuffigigaat’. Josafat qanoq iliorpa? Jehovap kiffaasa aalajaatsut ajornartorsiorfinni tamatigut iliortarnerattut iliorpoq. Jehova siunersiorpaa qinnuigalugulu: „[Jehova] Guuterput, tamanna pillugu pillakkit. Sakkutoorpassuit saassussisut akiussallugit uagut naammattumik pissaaneqanngilagut. Naluarput qanoq iliussalluta, isivulli ilinnut sammipput.“ — 2 Israelikkut 20:12.
Jehovap qinnut akivaa
3. Judakkut inuiaqatigiinnit eqqaminniittunit saassunneqalermata Jehovap sumik peqquai?
3 „Judakkut tamarmik [Jehovap] kiinaata saani qeqarput — aamma arnat meeqqallu.“ Jehovap qinnut akivaa. (2 Israelikkut 20:13) Soorlu ullumikkut ’kiffaq ilumoorlunilu silatooq’ atoraa, qinnutinik tusartartup pruffiiti Jahaziel atorlugu akivaa. (Matîuse 24:45) Ima allassimavoq: „Annilaaqinasi, sakkutoorpassuillu taakku ersigeqinasigit ilissi sorsuttussaannginnassi, Guutili sorsuttussaammat. . . . Kisianni tamatumuuna ilissi sorsuttussaassanngilasi . . . uninngaannarumaarpusi isiginnaarlugulu [Jehovap] qanoq ililluni annaatissagaasi. Erseqinasi, sapiissuseeruteqinasilu. Aqagu ornikkisigit! [Jehovap] najorumaarpaasi.“ — 2 Israelikkut 20:15-17.
4. Jehovap akeqqat unammillerannut innuttami qanoq iliuuseqarnissaat piumasaraa?
4 Kisianni kunngi Josafatip innuttaasalu iliuuseqaratik tupinnartuliornikkut aniguisitaanissartik utaqqiinnassanngilaat. Jehovap akeqqat unammillernerannut iliuuseqarnissaat piumasaraa. Ullaakkut kunngip Judakkullu tamarmik, aamma arnat meeqqallu uppersusertik takutippaat makiaarlutik sakkutoorpassuit saassussilersut ornikkamikkik. Ornitsillugit kunngip inuit Jehovameersunik unnersuuppai kajumissaarlugillu oqarluni: „[Jehova] Guutersi tatigisiuk, taava atasinnaajumaarpusi. Pruffiitii upperisigit, taava iluatsitsissaasi.“ (2 Israelikkut 20:20) Jehova upperisariaqarpaat! Pruffiitii upperisariaqarpaat! Taamaaliorunik iluatsitsissapput. Ullumikkuttaaq uagut Jehovamut kiffartornermi suliniuteqartuartilluta qularinngisaannartariaqarparput uppernikkut ajugaatissagaatigut!
5. Jehovap nalunaajaasui ullumikkut qanoq Jehova unnersiutigalugu iliuuseqartarpat?
5 Judakkut Josafatip nalaani inuusut assigalugit uaguttaaq Jehova unnersiutigisariaqarparput, „nallittuinera atammat naassaanngitsumut“. Qanoq ililluta unnersiutigisinnaavarput? Guutip naalagaaffia nakimanata oqaluussissutigalugu. Soorlu Judakkut taamani ’unnersiutiginnillutik tussialersimasut’ uaguttaaq uppersuserput iliuutsikkut takutittarparput. (2 Israelikkut 20: 21, 22) Aap, Jehova akeqqaminut iliuuseqarnissamut piareersartillugu upperneq piviusoq ersersittuartigu! Naak sivisuumik utaqqisimagaluarluta uppernikkut suliniuteqarluta aalajaattuarnissarput aalajangiusimasariaqarparput, soorluttaaq ullumikkut Jehovap kiffai aalajaatsut nunani artornartunik atugaqarfiusuni taamaattartut. Nunat ilaanni malersugaaneq, nakuuserfigineqarneq, kaanneq, aningaasatigullu annertuumik ajornartorsiutit atortariaqaraluarlugit Guutip kiffai aalajaatsut maluginiarnartumik amerliartorput, soorlu Jehovas Vidners Årbog 1998-imi oqaluttuarineqartoq.
Jehovap innuttani aniguisissavai
6. Ullumikkut uppissuseqarluarnerup qanoq aalajaannissatsinnut ikiortarpaatigut?
6 Inuiaqatigiit guutiitsut Judakkut eqqaanniittut Guutip innuttai nungutinniarsarisimavaat, Israelikkulli maligassaalluartumik uppersuseqarlutik akiuusimapput Jehova unnersiutigalugu. Ullumikkut tamatumunnga assingusumik uppersuserput takutissallugu periarfissaqartarpugut. Inuunitsinni Jehovamik unnersiutiginninneq pingaartikkutsigu anersaakkut sakkutuussutivut pitsaanerulersissinnaavavut Satanip qoqassiiniarneri assortorsinnaallugit. (Evfisumiut 6:11) Uppersuseqarluarutta aliikkusersuutit ajoqutaasut, nunap piinik pingaartitsivallaarneq aammalu soqutigisaqannginneq silarsuup toqulersup avatitsinniittup ilisarnaatigisai nakkaannarfigisariaqanngilavut. Uppernerup ajugaaffigineqarsinnaanngitsup tamatuma ikiussavaatigut ’kiffaq ilumoorlunilu silatooq’ ilagalugu aalajaalluta kiffartornissatsinnut, piffissaq eqqorlugu anersaakkut nerisassanik pilersorneqarluartilluta. — Matîuse 24:45.
7. Jehovap nalunaajaasuisa saassunneqartarnitik qanoq qisuariarfigisarpaat?
7 Uppersutsitta Biibilimik tunngaveqartup illersussavaatigut uumissuisunit, kiffatut ajortutut Matîuse 24:48-51-imi eqqaaneqartutut isumaqarfiginnittunit, saassunneqaraangatta. Ullumikkut tunussisut amerlasuut maluginiarnartumik siulittuut tamanna eqquutittarpaat, nunani assigiinngitsuni sallullutik sunniiniarlutik allaallu inuit nuimasumik atorfillit ilagalugit. Taamaattumik naleqqulluarpoq Jehovap Nalunaajaasui Filípimiut 1:7-imi, Ny Verden nutsigaq naapertorlugu, eqqaaneqartoq malillugu nutaarsiassaq nuannersoq inatsisitigut aalajangersarniarlugu illersorniarlugulu iliuuseqartarmata. Assersuutigalugu 1996-imi septembarip 26-ani Strasbourgimi Europami inuit pisinnaatitaaffii pillugit eqqartuussisut qulingiluat isumaqatigiillutik aalajangerput Jehovap Nalunaajaasui tassaasut ’upperisarsiortut tusaamaneqartut’ taamaattumillu eqqarsarsinnaanermut, nalunngeqatiginnissutsimut upperisarsiornermullu kiffaanngissuseqassasut upperisartillu allanut oqaluussissutigisinnaallugu. Guutip tunussisut ima isigisarpai: ’Taakkununnga eqquuppoq sallunngitsumik ussatigisaq imaattoq: „Qimmip meriaani kingumut saattaraa“, imaattorlu: „Puuluki ipiiarsimasoq attakorsuit maralluinut niuaataraaq.“’ — 2 Pîtruse 2:22.
8. Josafatip nalaani Jehovap qanoq ililluni innuttami akeraat eqqartuuppai?
8 Josafatip nalaani Jehovap innuttaminut ajoqusiiniartunut eqqartuussut naammassisimavaa: „[Jehovap] Ammonikkut Moabikkullu Seirillu qaqqalittaaneersut Judakkut ilaannut terlinganeerisussanut saassutitippai ajugaaffigitillugillu. Siullermik Ammonikkut Moabikkullu sakkutuuisa paatsiveerullutik iligisatik Seirip qaqqalittaaneersut saassuppaat nungutilluinnarlugillu, taakkulu suujunnaarsereeramikkit imminnut nungutipput.“ (2 Israelikkut 20:22, 23) Judakkut sumiiffik tamanna Berakap qooruanik taaguserpaat, oqaaserlu Beraka isumaqarpoq „pilluaqqussut“. Ullumikkuttaaq Jehovap akeqqaminut eqqartuussutini naammassippagu innuttaanut pilluaqqussutaassaaq.
9, 10. Kikkut Jehovap eqqartuussutaanit eqqorneqartariaqarpat?
9 Ullutsinnili kikkut Jehovap eqqartuussutaanit eqqorneqassappat? Tamanna paasiniarlugu Joelip siulittuutaa qupperiartigu. Joel 4:3-mi eqqaaneqarpoq Guutip innuttaanut akeqqat ’nukappiaraq tunigaat arnamik atortittartumik pissarsiniarlutik, niviarsiararlu akigalugu viinnimik pissarsiniarlutik’. Aap, Guutip innuttai naleqanngitsutut isigaat. Meeraq atortittartumut imaluunniit kandemut viinnimik imalimmut akiliutaasartumit naleqannginnerusutut isigaat. Tamannalu pillugu Guutip akisussaatissavai.
10 Anersaakkut ittumik atortittartut taamatulli assuarnartigaat, pillarneqanngitsoornavianngillallu. (sarĸúmersitat 17:3-6) Palaseqatigiit naalakkersuisunut qujanarniartarput imminnut pisuunngorsarniarlutik. Ingammik palaseqatigiit tunussisullu assuarnaqaat naalakkersuisut sunnerniartaramikkik Jehovap nalunaajaasuinik malersueqqullugit sulinerat unitsinniarlugu, soorlu ungasinngitsukkut Europap kangiani upperisarsiornikkut siuttut ilaat perulluliortitsillutik taamaaliorsimasut. Jehova oqarsimavoq ajortuliortut taamaattut iliuuseqarfiginiarlugit. — Joel 4:4-8.
„Sorsunnissaq illernartoq nalunaarutigiuk“
11. Jehovap qanoq ililluni akeqqani sorsunnissamut unammillerpai?
11 Nangilluni Jehovap innuttani kajumissaarpai inuiaqatigiinnut unammilleqqullugit: „Sorsunnissaq illernartoq nalunaarutigalugu inuiannut suaarutigisiuk manna: Pissarsuit itersarsigit! Sakkutuut tamarmik saassussilit!“ (Joel 4:9, 10a) Tassaavoq sorsoriaaseq immikkut ittoq — naapertuilluartumik sorsunneq. Jehovap nalunaajaasuisa ilumoortut anersaakkut sakkugisatik tatigalugit sallunerit akisarpaat, ilumuunngitsut sallusuissummik akiortarlugit. (1 Korintumiut 10:4; Evfisumiut 6:17) Ungasinngitsukkut ’Guutip ajugaqanngitsup ullussarsuani sorsunnissaq’-mik taaneqartoq Guutip illernarsissavaa. Tamatumuuna Guutip kisimi oqartussaassusianut akeraasut tamarmik nunarsuarmit peerneqarluinnarneqassapput. Innuttaasa nunarsuarmiittut namminneq sorsunnissaq peqataaffigissanngilaat. Piviusumik assersuutaasumillu ’panatik saffiorsimavaat assallatserummut saviliaralugit, qalugiusatillu saviliaralugit viinnequtilerissutit’. (Jesaja 2:4) Jehovap inuiaqatigiit tamatumunnga akerliusumik ilioqquai: „Assallatserutisi saffiorsigit pananngorlugit, saviutisilu viinnequtilerissutit qalugiusanngortillugit.“ (Joel 4:10) Tassa inuiaqatigiit kajumissaarneqarput sakkussiaatitik tamaasa atoqqullugit. Inuiaqatigiilli ajugaasinnaanngillat, Jehova ajugaassammat!
12, 13. (a) Naak sorsunneq nillertoq soraarsimasutut nalunaarutigineqaraluartoq inuiaqatigiit amerlasuut qanoq ilillutik takutittarpaat suli sorsukkumatuujullutik? (b) Inuiaqatigiit sumut piareersimanngillat?
12 1990-ikkut aallartinneranni inuiaqatigiit nalunaarutigaat sorsunneq nillertoq soraarsimasoq. Naalagaaffiilli Peqatigiit anguniagartik angusimavaat? Naamik. Burundimi, Congomi, Irakimi, Liberiami, Rwandami, Somaliami Jugoslaviaasimasumilu pisimasut suut takutippaat? Jeremia 6:14-imi allassimasutut oqartarput: „’Eqqissineqarpoq, eqqissineqarpoq’, uffa eqqissineqanngitsoq!“
13 Nunat FN-imut ilaasortat suli sakkussianik atortorissaaqisunik sanasarput. Ilaat suli atomitortunik toqqortaqarput. Allat kemii bakterialluunniit atorlugit sakkussaliortarput inunnik amerlasuunik toqutsissutaasinnaasunik. Jehovap inuiaqatigiit taakku Harmagedonimut katertortillugit ima oqaaseqarluni unammillerpai: „Parsangasoq allaat oqassaaq: ’Pissarsuuvunga!’ Qaanasuaritsi inuiaat tamaginni ittusi, tamaginnit katersoritsi pissarsuartasi.“ Taava Ny Verden nutsigaq naapertorlugu Joel nangippoq: „Illit pissarsuartatit katersukkit, Jehova!“ — Joel 4:10, 11.
Jehovap innuttani illersussavai
14. Jehovap ’pissarsuartai’ kikkuuppat?
14 Jehovap pissarsuartai kikkuuppat? Biibilimi Guuti 280-eriarluni Katersaarsuit Jehovaat-mik taaneqarpoq. (2 Kunngit 3:14) Taakku tassaapput katersaarsuit qilammiittut anersaajusut Jehovap peqqussutaanik iliornissamut piareersimasut. Aramæerit pruffiiti Elisa iluatsitsinatik tigusariniarsarimmassuk Jehovap Elisap kiffaata isai ammarpai takusinnaaqqullugu sooq pruffiiti tiguneqarsinnaanngitsoq: „Qaqqaq hestinik innerusunik qamutinillu innerusunik ulikkaarpoq.“ (2 Kunngit 6:17) Jesusip Ataatani qinnuigisinnaasimagaluarpaa inngilinik aqqaneq-marlunnik legionilinnit amerlanerusunik aallartitseqqullugu. (Matîuse 26:53) sarĸúmersitat-ni allaatigineqarpoq qanoq Jesus Harmagedonimi eqqartuussut naammassiniarlugu aallarumaartoq: ’Katersat qilammiusut malippaat qimuttuarsuit qaqortut qaani issiallutik ilupaassiarissumillu qaqortumik minguitsumik atisaqarlutik. Qarnanillu pana ipittorsuaq anivoq, tamatuminnga inuiaqatigiit panassagai; paarissavaalu saviusumik ilitsersuuteqarluni; viinnimullu tunguiaaffik Guutip ajugaqanngitsup kamannerata katsungaatsup pianut atortoq taassuma tummassavaa.’ (sarĸúmersitat 19:14, 15) Viinnimut tunguiaaffik tamanna tassaanerarneqarpoq tunguiaaffissuaq Guutip kamannerata pia. — sarĸúmersitat 14:17-20.
15. Jehovap inuiaqatigiinnut sorsunnissaa Joelip qanoq allaatigaa?
15 Jehovap qanoq ililluni nammineq pissarsuartani katersussavai? Ima allassimavoq: „Inuiaat aallassapput Josafatip qooruanukarlutik, inuiaat avatangiisigisasi tassani eqqartuunniarakkit. Killuutit tiguniarsigit katersugassat inerimmata; viinnissanik tunguiaajartoritsi tunguiaaffik ulikkaarmat. Tunguusiviit utsersulerput inuiaat ajussusiat angeqimmat. Tusaasigit nilliasorpassuit qooqqumi aalajangiiffissami! Qanillivormi [Jehovap] ullussaa qooqqumi aalajangiiffissami. Seqineq qaammallu taarsissapput ullorissallu qaamassuseerullutik. [Jehova] løvesut uiannisaarumaarpoq Sionimit, nipini anissavaa Jerusalaamit qilak nunalu sajutsillugit.“ — Joel 4:12-16.
16. Kikkut Jehovap eqqartuussinissaanit eqqorneqartut ilagissavaat?
16 Ateq Josafat isumaqarpoq „Jehova eqqartuussisuuvoq“, Guutittalu Jehovap kisimi oqartussaassutsi qutsissisissavaa eqqartuussullu naammassissallugu. Siulittuummi eqqartuunneqartussat inuppassuartut eqqaaneqarput, nilliasorpassuartut qooqqumi aalajangiiffissami. Inoqarpat eqqunngitsumik upperisarsiornermik siuarsaasunik inuppassuit takkua akornanniissapput. Aamma Tussiaat 2-mi eqqartorneqartut inuiaat, nunami kunngit naalagaanerillu taakkununnga ilaassapput. Tassaapput inuit silarsuup matuma aaqqissuussaaneranik ajortunngorsimasumik pingaartitsisut Jehova mianerinagu kiffartorfigiumanagulu. Ernerup isigai kunikkumanngilaat. (Tussiaat 2:1, 2, 11, 12) Tassa Jesus Jehovap kunnginngortitaatut akueriumanngilaat. Inuppassuit taakku nungutitaajumaartussat aamma ilagissavaat kunngip naalannartitaasup savaasatut nalunaarutigisassai. (Matîuse 25:33, 41) Jehovap piffissanngorpat Jerusalemimit qilammiittumit nipini anippagu kunngeqataa, ’kunngit kunngiat’ aallassaaq eqqartuussullu naammassissallugu. Taamanikkussaq qilak nunalu ilumut sajussapput! Kisianni neriorsoqqissaarneqarpugut ’Jehova innuttaasa qimarnguigissagaat, Israelikkullu taanna sernissortigissagaat’. — Joel 4:16.
17, 18. Kikkut annikilliornartussamit angisuumit aniguissappat, pissutsillu qanoq ittut misigiumaarpaat?
17 sarĸúmersitat 7:9-17-imi eqqaaneqarput ’amerlangaartut’, eqqaaneqarporlu taakku annikilliornartussamit angisuumit pissasut Jesusip aavata kuisap utertitsissutitut nalinga akuerigamikku. Amerlangaartut taakku Jehovap ullussaani illersorneqassapput qooqqumi aalajangiiffissami nilliasorpassuit Joelip siulittuutaani eqqaaneqartut eqqartuunneqarpata. Joelip aniguisimasut ima oqarfigai: „Misigissavarsi uanga [Jehova] Guutersi qaqqanni illernartumi Sionimi ineqartunga.“ — Joel 4:17a.
18 Siulittuummi nangilluni allassimavoq Jerusalem qilammiittoq illernartunngussasoq, takornartallu tassunga iseqqinngisaannassasut. (Joel 4:17b) Qilammi nunarsuarmilu qilammiup naalagaaffiata pigisaani takornartaqassanngilaq, tamarmik pallorfiginninnermi minguitsumi ataasiussuseqassagamik.
19. Guutip innuttaasa ullumikkut atugaat paratiiserpalaartut Joelip qanoq allaatigai?
19 Maannakkut allaat Jehovap innuttai nunarsuarmi tamarmi eqqisseqatigiipput. Ataasiussuseqarluarlutik nunani 230-nit amerlanerusuni oqaatsinilu 300-t missaanni taassuma eqqartuussutai oqaluussissutigaat. Tamanna Joelimit kusanartumik allaatigineqarpoq: „Ullussami issumani qaqqat paarnat isserannik kuserumaarput, qattornillu immummik kuussapput, Judallu kuui tamarmik imermik kuugaassapput.“ (Joel 4:18) Aap, Jehovap kiffani nunarsuarmiittut nuannaarnermik, siumukarnermik sallusuissummillu pilluaqqujuassavai. Jehovap kisimi oqartussaanera qooqqumi aalajangiiffimmi qutsissisinneqassaaq, nuannaarnerlu atuutingaassaaq, Guutip innuttani utertinneqarsimasut naassaanngitsumik najortuassammagit. — sarĸúmersitat 21:3, 4. (wE 1/5 98)
Eqqaamavigit?
□ Josafatip nalaani Jehovap innuttani qanoq aniguisissimavai?
□ Kikkut ’qooqqumi aalajangiiffissami’ suujunnaarsinneqassasut Jehovap aalajangersimavaa?
□ Jehovap ’pissarsuartai’ kikkuuppat, naggataarutaasumillu sorsunnissami qanoq iliussappat?
□ Pallorfiginnittut ilumoortut pilluaqqusaanerit suut misigisarpaat?
[Qupp. 22-mi assiliartaq]
Judakkut ima oqarfigineqarsimapput: ’Annilaaqinasi, ilissi sorsuttussaannginnasi, Guutili sorsuttussaammat’
[Qupp. 24-mi assiliartaq]
Jehovap akeqqani kajumissaarpai ’assallatserutitik pananngorlugit saffioqqullugit’
[Qupp. 25-mi assiliartaq]
Biibilimi takutinneqarpoq amerlangaartut annikilliornartussamit angisuumit aniguiumaartut