’Kristus saqeqatigiuarsiuk’
’Taamaattumik Kristus Jesus Naalagaq pigilerassiuk taassumani saqigitsi.’ — KULORSAMIUT 2:6.
1, 2. (a) Enokip Jehovamut aalajaalluni kiffartorluni inuunera Biibilimi qanoq allaatigineqarpa? (b) Soorlu Kulorsamiut 2:6, 7-imi takutinneqartoq, Jehovap qanoq ikiorpaatigut imminik saqeqateqaqqulluta?
NUKAPPIARANNGUAQ ataataminik saqeqateqartoq isiginnaarnikuuiuk? Nukappiaqqap ataatani sukkut tamatigut ilaarpaa, kiinaatigullu alutorsarnera takuneqarsinnaavoq. Ataataasup ernini ikiuutigalugu nammineq asanninnini tulluusimaarutiginninninilu ersersittarpai. Jehovap tamannarpiaq assersuutitut atorpaa imminut aalajaallutik kiffaasut inuunerat takutinniarlugu. Assersuutigalugu Guutip oqaasiani allassimavoq Enok angut aalajaatsoq ’Guutip saavani inuusoq’. — 1 Moses 5:24, 6:9.
2 Soorlu ataatap isumassuisup erninnguani saqeqatigalugulu ikiorniartaraa, Jehovap pitsaanerpaamik ikiortarpaatigut. Ernitui nunamut aallartissimavaa. Jesus Kristus nunarsuarmi inuutilluni sutigut tamatigut Ataatani qilammiusoq ilaarluinnartarpaa. (Juánase 14:9, 10; Eprîarit 1:3) Taamaattumik Guuti saqeqatigissagutsigu Jesus saqeqatigisariaqarparputtaaq. Apustili Paulus ima allassimavoq: ’Taamaattumik Kristus Jesus Naalagaq pigilerassiuk taassumani saqigitsi, taanna manngoqarfigalugu taassumanilu ineriartortinneqarlusi uppernikkullu aalajangerlusi, soorlu ajoqersorneqartusi, qujasarnikkut alliartorlusi.’ — Kulorsamiut 2:6, 7.
3. Kulorsamiut 2:6, 7 naapertorlugu sooq oqarsinnaavugut Kristus saqeqatigissagaanni kuisinneq naammanngitsoq?
3 Kristus saqeqatigerusukkamikku tumaalu naammalluinnartut malikkusukkamikkik Biibilimik atuaqqissaartartut ilumoortut kuisittarput. (Lúkarse 3:21; Eprîarit 10:7-9) 1997-imiinnaq silarsuaq tamakkerlugu 375.000-t sinnerlugit pingaaruteqartumik alloriarsimapput kuisillutillu — ullut tamaasa 1000-init amerlanerullutik. Amerliartorneq tamanna tupinnaqaaq! Paulusilli Kulorsamiut 2:6, 7-imi allassimasaasa takutippaat Kristus saqeqatigissagaanni kuisinneq naammanngitsoq. Griikerit oqaasiata ’saqigitsi’-mik, imaluunniit Ny Verden nutsigaq naapertorlugu ’saqiuaritsi’-mik, nutserneqartup takutippaa iliuuseqartuarneq pineqartoq. Nangilluni Paulusip eqqaavaa Kristus saqeqatigissagaanni assigiinngitsunik sisamanik iliuuseqartariaqartoq: Kristus manngoqarfigisariaqarpoq, taassumani ineriartortariaqarluni, uppernikkut aalajangertariaqarluni qujasarnikkullu alliartortariaqarluni. Tamakku tamaasa misissoriartigik paasiniarlugu Kristusimi saqiuarnitsinni qanoq iluaqutigisinnaagivut.
’Kristus manngoqarfigaajuk’?
4. ’Kristus manngoqarfigissagipput’ qanoq paasisariaqarpa?
4 Siullermik Paulusip eqqaavaa ’Kristus manngoqarfigisariaqaripput’. (Naleqqiuguk Matîuse 13:20, 21.) Inuup qanoq ililluni ’Kristus manngoqarfigilersinnaavaa’? Imaappoq: naasup manngui takuneqarsinnaanngikkaluarput pingaaruteqarluinnarlutilli — naasoq aalajaallisittarpaat inuussutissalersorlugulu. Tamatumunnga assingusumik Kristusip maligassiaata ajoqersuutaasalu takussaanngikkaluartumik sunnertarpaatigut isumatsinni uummatitsinnilu sorlaqalerlutik. Taavalu anersaakkut inuussutissalersortarlutalu nakussatsittarpaatigut. Eqqarsariaaserput, iliuutsivut aalajangernivullu tamakkunannga siulersorneqarpata inuunitta Jehovamut tunniulluinnarnissaanut killinneqassaagut. — 1 Pîtruse 2:21.
5. Qanoq ililluta inuussutissat anersaakkut ittut ’kajungerilersinnaavavut’?
5 Jesusip ilisarsineq Guutimeersoq pingaartittorujussuuaa. Allaat nerisassanut assersuuppaa. (Matîuse 4:4) Taamaattumik qaqqami oqaluutsimini Allakkat Hebriiarisuut ilaannit assigiinngitsunit arfineq-pingasunit 21-riarluni issuaavoq. Jesus malinniassagutsigu apustili Peterip kajumissaarutaa malillugu ’inoorlaannguatut’ inuussutissat anersaakkut ittut ’kajungerisariaqarpavut’. (1 Pîtruse 2:2) Inoorlaannguaq kaaleraangami tamatuminnga nalunaatsumik ersersitsisarpoq. Maanna inuussutissat anersaakkut ittut taama kajungeritiginngikkutsigik Peterip kajumissaarpaatigut tamakkuninnga noqqaassuteqarneq ineriartorteqqullugu. Qanoq ililluta taamaaliorsinnaavugut? Najoqqutassiaq Tussiaat 34:9-miittoq iluaqutigisinnaavarput: „Misigisiuk takusiullu [Jehova] avaaginnittuusoq.“ Aalajangersimasumik Jehovap oqaasia, Biibili, ’misigisarutsigu’ imaluunniit ’oqattaartarutsigu’, immaqa ullut tamaasa atuartarlugu, misigissavarput anersaakkut nakussassaataallunilu iluaqutaasoq. Tamatumunngalu kajungersuserput alliartulissaaq.
6. Sooq pingaaruteqarpa atuarsimasavut eqqarsaatigeqqissaartassallugit?
6 Nerereeraangatta nerisavut aqajaqqutsinni uunneqarluartariaqartarput. Tamatumunnga assingusumik atuarsimasavut eqqarsaatigeqqissaartariaqarpavut. (Tussiaat 77:12, 13) Assersuutigalugu atuakkami Inuk inuit inuusimasut pingaarnerpaartaat-mi atuartilluta kapitalit tamaasa iluaqutiginerussavavut imminut ima aperisarutta: ’Oqaluttuami tamatumani Kristusip pissusiisa ilaat suut erseqqissarneqarpat, qanorlu ilillunga nammineq inuuninni ilaarsinnaavakka?’ Taama eqqarsartarutta ilinniarsimasavut maleruarsinnaassavavut. Aalajangigassaqaraangatta imminut aperisinnaavugut Jesus qanoq iliorsimassagaluarnersoq uagusittut atugaqartuuguni. Ilikkakkatsinnut naapertuuttumik aalajangerutta takutissavarput ilumut Kristus manngoqarfigigipput.
7. Inuussutissat anersaakkut ittut ’mattusuut’ qanoq isigisariaqarpavut?
7 Paulusip aamma ’mattusuunik’ nereqquaatigut, tassa Guutip oqaasiani ilumoortunik itinerusunik misissueqqulluta. (Eprîarit 5:14) Taamaaliussagutta Biibilip naallugu atuarnissaa anguniagareqqaarsinnaavarput. Aamma aalajangersimasut pillugit atuaqqissaarsinnaavugut, soorlu Kristusip pilliutaa utertitsissutaasoq, Jehovap innuttaminut angerusii assigiinngitsut imaluunniit Biibilimi siulittuutit ilaat. Atuagassaaterpassuaqarpugut Biibililersaarutaasunik inuussutissanik mattusuunik pigiliussiniarnitsinni iluaqutigisinnaasatsinnik. Taama ilinniarneq sumik siunertaqarpa? Kakkanniutissaqalernissarput siunertaanngilaq, Jehovamulli asanninnitta alliartortinnissaa taassumunngalu qanilliartornissarput. (1 Korintumiut 8:1; Jâko 4:8) Kajumilluta ilinniartarutta ilikkakkavut nammineq maleruarlugit allallu iluaqutissaannut atortarlugit Kristus ilaassavarput. Taamaalilluta taanna manngoqarfigillualissavarput.
’Kristusimi ineriartortinneqarpit’?
8. ’Kristusimi ineriartorneq’ qanoq paasisariaqarpa?
8 Kristusimik saqeqateqarneq eqqarsaatigalugu Paulus naasumik assersuuteqareerami allamik assersuusiorpoq — illuliorneq assersuusiaralugu. Illumik sananeq eqqarsaatigigaanni tunngaviliorneq piinnarnagu aammali illup suleruloornikkut naammasiartornera eqqarsaatigineqartarpoq. Tamatumunnga assingusumik uaguttaaq ilungersortariaqarpugut Kristusip pissuserisaanik ileqqorisaanillu ineriartortitsiumalluta. Ilungersornerit taamaattut maluginiarneqanngitsoorneq ajorput, soorlu Paulusip Timoteus allaffigisimagaa: ’Alliartussutsit tamanut malunnarsisiguk.’ (1 Timûtiuse 4:15; Matîuse 5:16) Kristumiutut suliniutit suut uatsinnut ineriartuutaasinnaappat?
9. (a) Kiffartornitsinni Kristus ilaarnerujumallugu sunik atoriaannaasunik anguniagassaqarsinnaavugut? (b) Qanoq nalunngissinnaavarput Jehovap kissaatigigaa kiffartornerput nuannaarutigissagipput?
9 Jesusip nutaarsiassamik nuannersumik oqaluussissutiginneqqullutalu ajoqersueqquaatigut. (Matîuse 24:14; 28:19, 20) Naammalluinnartumik maligassippaatigut, nakimaalluni sunniuteqarluartumillu nalunaajaasarluni. Soorunami taassumatut pitsaatigisumik angusaqarsinnaanavianngilagut. Taamaattorli apustilip Peterip ima kajumissaarpaatigut: ’Naalagaq Kristus uummatissinni illernartissiuk, piareertuinnarlusi kikkunnulluunniit neriuutigisaq ilissinniittoq pillugu ilissinnik nassueqqusisunut illersuutissaqarniarlusi, kisianni piuaallusi mianerinnillusilu.’ (1 Pîtruse 3:15) Naak ’imminnut illersornissamut piareersimajuartutut’ misiginngikkaluarlutit nikallortariaqanngilatit. Naleqquttumik anguniagassaqarit, taamaalillutit ornigassaq qanilliartorsinnaavat. Piareersarluartaruit oqaluussinermi saqqummiusseriaatsit allanngorartissinnaavat immaqalu allassimaffiit ataaseq marlulluunniit atorsinnaallugit. Biibililersaarutinik amerlanerusunik agguaassinissat, pulaqqiinerunissat Biibilimilluunniit atuaqqissaaqateqalernissat anguniagarisinnaavatit. Amerlassuseq — soorlu nalunaaquttap akunneri, agguaassat imaluunniit atuaqqissaaqatit qassiunersut — pingaarnerunngilaq, kisianni kiffartornermi pitsaassuseq pingaarneruvoq. Naleqquttunik anguniagaqarutta anguniarlugillu iliuuseqartarutta kiffartornermi immitsinnut tunniunneq nuannaarutigisinnaavarput. Tamanna Jehovap kissaatigaa — ’tipaatsulluta’ kiffartorfigissagitsinni. — Tussiaat 100:2; naleqqiuguk 2 Korintumiut 9:7.
10. Kristumiutut ilaatigut sunik suliassaqarpugut, tamakkulu qanoq iluaqutigisinnaavavut?
10 Aamma ilagiinni sulissutissat Kristusimi ineriartortissinnaavaatigut. Pingaarnersaat tassaavoq asaqatigiinneq, kristumiut ilumoortut pingaartumik ilisarnaatigisaat. (Juánase 13:34, 35) Biibilimik atuaqqissaaqatigineqartilluta ilatta amerlasuut pissusissamisoortumik ilinniartitsisortik ikinngutigillualersimavaat. Taamaattorli maanna Paulusip unnersuussutaa malillugu ’neruttorsinnaanerpugut’ ilagiinniittut allat ilisarisimanerulerlugit? (2 Korintumiut 6:13) Utoqqaanertattaaq asanninnerput pingaartitsinerpullu pisariaqartippaat. Suleqatigigutsigik, siunersiortarlugit Biibililu tunngavigalugu siunnersuutaat ilassisarlugit sulinerat oqinnerungaalersissavarput. (Eprîarit 13:17) Tamanna ilutigalugu Kristusimi ineriartortinneqarnerussaagut.
11. Kuisinneq piviusorsiortumik qanoq isigisariaqarparput?
11 Kuisinneq inuunermi pisut persuarsiornartut ilagaat! Taamaattoq ilimagisinnaanngilarput inuunitta sinnera tamatumunnga assingusumik persuarsiornartuaannassasoq. Kristusimi ineriartortinneqassagutta ’toraagaq ataaseq ornillugu ingerlaannartariaqarpugut’. (Filípimiut 3:16) Tassaasariaqanngilarli inooriaaseq assigiiaaginnavik qatsunnartoq. Tassaavoq aalajangersimasumik ingerlaannarneq — anersaakkut ittunik ileqqut pitsaasut ineriartortillugit aalajangiullugillu, ullut tamaasa ukiullu tamaasa. Eqqaamajuk ’naggatissamut aalajangersoq annakkumaartoq’. — Matiuse 24:13.
Illit ’uppernikkut aalajangerpit’?
12. ’Uppernikkut aalajangerneq’ qanoq paasisariaqarpa?
12 Kristusimik saqeqateqarneq eqqartoramiuk Paulusip pingajussaattut kajumissaarpaatigut ’uppernikkut aalajangeqqulluta’. Nutsikkat ilaanni allassimavoq ’upperneq eqqarsaatigalugu aalajangersarneqassasugut’, griikerit oqaasiat Paulusip atugaa isumaqarsinnaammat „aalajangersarneqarpoq, uppernarsarneqarpoq, inatsisillu naapertorlugit atorunnaarsitaasinnaanngilaq“. Ilisarsinerujartortilluta paasinerujartussavarput Jehova Guutimut uppernerput tunngaveqarluartoq imaluunniit ’inatsisitigut aalajangersarneqartoq’. Tamanna uppernikkut aalajaannerulernitsinnik kinguneqassaaq. Satanip silarsuaata sunnissalluta artornerujartussavaatigut. Soorlu Paulusip kajumissaaraatigut ’inersimasummut ingerlassaagut’. (Eprîarit 6:1) Inersimalluarneq aalajaassuserlu ataqatigiipput.
13, 14. (a) Ukiuni hundredelinni siullerni kristumiut Kolossamiittut uppernikkut aalajaakkunnaarnissaannut sumik ulorianartoqarpa? (b) Isumaliutersuutit suut Paulusip isumakuluutigai?
13 Ukiuni hundredelinni siullerni kristumiut Kolossamiittut aalajaakkunnaarnissaat aarlerinartoqarpoq. Paulus ima mianersoqqusivoq: ’Misissoritsi ilisimaqqissaarniutitigut salloqittaatitigullu piunngitsutigut piiarneqaqqunasi, inunnit maligassarsiat ilinniaqqaagassallu silap pii malillugit pisarmata Kristusilu malinnagu.’ (Kulorsamiut 2:8) Paulusip kissaatiginngilaa Kolossamiut ’[Guutip] ernerata asasaata naalagaaffianut nuutsinneqarsimasut’ anersaakkut pilluaqquneqartutut inissisimaffiannit peerneqassasut. (Kulorsamiut 1:13) Suut peersitaassutigisinnaagamikkik? Paulusip ’ilisimaqqissaarniutit’ eqqaavai. Oqaaseq tamanna Biibilimi taamaallaat tassani atorneqarpoq. Paulusip griikeritoqqat isumaliutersortartut, soorlu Platon Sokratesilu, eqqarsaatigai? Naak taakku kristumiunut ilumoortunut navianaateqarsinnaagaluartut, oqaatsimi ’ilisimaqqissaarniut’-mi allattaaq pineqarsinnaapput. Tassaasinnaapput immikkooqatigiit isumaliutersortartullu assigiinngitsorpassuit — allaat inuit upperisarsiortut. Assersuutigalugu juutit ilaasa ukiuni hundredelinni siullerni inuusut, soorlu Josefusip Filonillu, upperisarsiornertik ’isumaliutersuummik’ taavaat — immaqa allanut kajungernarnerutinniarlugu.
14 Isumaliutersuutit Paulusip isumakuluutigisaasa ilaat immaqa upperisarsiornermut tunngapput. Kolossamiunut allakkamini kapitalimi matumani nangilluni ima eqqarsartartut saaffigai: ’Tamanna attussanngilat, tamanna oqummissanngilat, tamanna satsissanngilat’, taamaalilluni Mosesip inatsisaasa ilaat Kristusip toqunerani atorunnaarsitaasimasut innersuussutigalugit. (Rûmamiut 10:4) Tamanna Guutimillu nalusut isumaliutersuutaat ilagiit anersaavannut ulorianartuupput. (Kulorsamiut 2:20-22) Paulusip isumaliutersuutit ’ilinniaqqaakkanut silap piinut’ ilaasut mianersoqqussutigai. Ajoqersuutit taamaattut inuinnarnik aallaaveqarput.
15. Qanoq ililluta eqqarsariaatsinit Biibilimut akerliusunit ullumikkut nalinginnaasunit sunnertinnissarput pinngitsoortissinnaavarput?
15 Inuit eqqarsaataat isumaliutaallu Guutip oqaasianik tunngaveqarluanngitsut kristumiut uppernikkut aalajaannerannut navianarsinnaapput. Ullumikkut navianaatit taamaattut eqqumaffigisariaqarpavut. Apustili Johannes ima kajumissaarivoq: ’Asanartusi ukorsii, anersaat suulluunniit uppereqinasigik, kisianni anersaat Guutimit pisimanersut misilissigik, pruffiitioqqusersummi amerlasuut silarsuarmut aallarput.’ (1 Juánase 4:1) Taamaattumik atuaqativit ilaata isumaqalersinniarpatit Biibilip ileqqoreqqusai malillugit inuuneq itsangavallaartoq, imaluunniit sanilivit ilaata nunap piinik pingaartitsivallaartutut eqqarsariaaseqalersinniarpatit, suleqativilluunniit ilaata kimigiiserfigippatit nalunngeqatiginnissutsivit Biibili tunngavigalugu ajoqersorneqarsimasup akerlianik iliuuseqaqqullutit, imaluunniit allaat uppeqativit ilaata ilagiinniittut allat ajortumik isornartorsiuisumillu eqqartorpagit, taakkua oqaaserisaat akueriinnassanngilatit. Guutip oqaasianut naapertuutinngitsut avissaartitertakkit. Taamaaliortarutta Kristus saqeqatigalugu uppernikkut aalajaannerput atatiinnassavarput.
’Qujasarnikkut alliartorneq’
16. Kristusimik saqeqateqarnermut atatillugu sammineqartut sisamassaat sunaava, imminullu qanoq aperisariaqarpugut?
16 Kristus saqeqatigissagaanni sisamassaatut Paulusip eqqaavaa ’qujasarnikkut alliartortariaqartoq’. (Kulorsamiut 2:7) Oqaaseq ’alliartorneq’ toqqaannartumik nutserlugu ’qarsutsineq’-mik isumaqartoq, kuussuarmik qarsutsisumik eqqaasitsivoq. Tamatuma takutippaa kristumiutut qujasarneq ileqqoriuartariaqaripput. Tamatta imminut aperisariaqarpugut: „Qujamasuttuuvunga?“
17. (a) Sooq oqarsinnaavugut tamatta allaat ajornartorsiungaarfinni qujamasunnermut pissutissaqarluartugut? (b) Jehovap tunissutaasa ilaat suut illit pingaartumik qujamasuutigaagit?
17 Aap, tamatta ullut tamaasa pissutissaqarluartarpugut Jehova qutsavigingaassallugu. Allaat ajornartorsiungaarfinni ilorraallannartoqarsinnaasarpoq. Misiginneqataasumik ikinnguteqarsinnaavugut. Asasamit tuppallersaasumik eqittaarneqarsinnaavugut. Immaqa unnuami sinilluaratta inuummarissisimavugut. Nerisassat mamartut qaarsillarnartut. Timmissap qarlorpalunnera, meeqqap illarnera, qilak allaaqqissoq, anorsaalaannguaq — immaqa ullup ataatsip ingerlanerani tamakku tamaasa misigisarpavut. Tunissutit taamaattut immaqa taamaattussaannartutut isigisinnaavavut. Tamakkuli tamaasa qujamasuutigisariaqannginnerpavut? Tamarmik Jehovameersuupput, ’tunissutit tamarmik ajunngitsut tunniussallu tamarmik naammalluartut’ taassumannga pimmata. (Jâko 1:17) Aamma tamakkunannga annerungaartunik tunisimavaatigut — assersuutigalugu inuunermik. (Tussiaat 36:10) Saniatigut naassaanngitsumik inuunissamik periarfissaqartippaatigut. Tunissut tamanna pilersinniarlugu Jehova pitsaanerpaamik pilliuteqarsimavoq ernitui, imminut ’nuannaarutaasoq’, nunarsuarmut aallartikkamiuk. — Ussatit 8:30; Juánase 3:16.
18. Qanoq ililluta Jehovamut qujamasunnerput takutissinnaavarput?
18 Taamaattumik tussiaasiortup oqaasii uku ilumoorput: „Iluallaaraaq qutsavigalugu [Jehova].“ (Tussiaat 92:2) Tamatumunnga assingusumik Paulusip kristumiut Thessalonikamiittut ima eqqaasippai: ’Suut tamaasa qujassutiginiarsigik.’ (1 Tásalûníkamiut 5:18; Evfisumiut 5:20; Kulorsamiut 3:15) Tamatta aalajangersinnaavugut qujamasunnerulerniarluta. Guuti qinnuigigaangatsigu pisariaqartitaannavut eqqartortariaqanngilavut. Soorunami naleqquttumik qinnuteqarsinnaavugut. Takorlooriarulli ikinnguteqaruit aatsaat ilinnit kissaateqaraangami ilinnik oqaloqatiginninniartartumik! Jehovamut qinunikkut saaffiginnissinnaavugut taamaallaat qutsaviginiarlugu unnersiutiginiarlugulu. Silarsuaq manna qujasuitsoq isigigaangamiuk qinnutit taamaattut nuannaarutigisassaqai! Qinnutillu taamaattut nammineq iluaqutigisinnaavavut inuunermi isumalluarnarnerusunut samminerunissatsinnut, eqqaasissinnaavaatigullu qanoq pilluaqquneqartigaluta.
19. Paulusip Kulorsamiut 2:6, 7-imi oqaasiisa qanoq takutippaat tamatta Kristusip saqeqatiginerani siumukartuarsinnaasugut?
19 Tupinnannginnerpa Guutip oqaasiani versi ataasiinnaq unnersuussutinik silatuunik qanoq imaqartigisinnaasoq? Tamatta Paulusip Kristusimik saqeqateqarneq eqqarsaatigalugu unnersuussutaa maleruartariaqarparput. Aap, aalajangerniarta ’Kristus manngoqarfigiumallugu’, ’taassumani ineriartortinneqarumalluta’, ’uppernikkut aalajangerniarluta’ kiisalu ’qujasarnikkut alliartuinnarniarluta’. Unnersuussutit tamakku ingammik kuiserlaat iluaqutigissavaat. Tamattali taamaaliortariaqarpugut. Eqqarsaatigiuk naasup sorlaa issup iluani tannerujartuinnartartoq, illulu sananeqartilluni qanoq portunerujartuinnartartoq. Kristus soraajuitsumik saqeqatigisinnaavarput. Periarfissaqarluarpugut alliartuinnarnissatsinnut. Jehovap taamaaliorniarnitsinni ikiussavaatigut pilluaqqullutalu, imminik ernerminillu asasaminik naassaanngitsumik saqeqateqarnissarput kissaatigigamiuk. (wE 1/6 98)
Qanoq akissavigit?
□ Kristusimik saqeqatiginninneq qanoq paasisariaqarpa?
□ ’Kristus manngoqarfigalugu’ qanoq paasisariaqarpa?
□ Qanoq ililluta ’Kristusimi ineriartorsinnaavugut’?
□ Sooq ’uppernikkut aalajangerneq’ pingaaruteqarluinnarpa?
□ ’Qujasarnikkut alliartornissatsinnut’ sunik pissutissaqarluarpugut?
[Qupp. 10-mi assiliartaq]
Orpiup sorlai takuneqarsinnaanngikkaluarput, orpimmilli inuussutissalersuillutillu aalajaallisitsisarput