Ilaquttanik isumaginninneq sunik nassataqartoq

’ILISSI angajoqqaat, qitornasi narrutsatseqinasigik, paariniarsigilli perorsarlugit inertertarlugillu Jehovamit.’ (Evfisumiut 6:4) Oqaatsini isumassarsiarititaasuni taakkunani apustilip Paulusip erseqqissumik ersersippaa ilaquttanik isumaginninnissaq ataataasup akisussaaffigigaa.

Ilaqutariinni amerlanerni ataataasoq kisimi meeqqanik isumaginninneq ajorpoq. Nuliata, meeqqat anaanaata, nammagassaq tamanna nuannaarluni peqataaffigisarpaa. Taamaattumik kunngi Salomon allassimavoq: „Ernera, ataatavit oqaaqqissaarutai naalattarniakkit anaanannillu ilinniakkatit puigornagit!“ — Ussatit 1:8.

Timikkut anersaakkullu isumaginninneq

Angajoqqaat meeqqaminnik asannittut piaaralutik meeqqatik tunulliunnavianngilaat. Kristumiut taamaaliorpata assigiinnassavaa upperisamik tunussineq, soorlu Paulus Timoteusimut allakkamini allassimasoq: ’Kisianni kialuunniit ilani annerusumillu inoqutini isumaginngikkunigit, taassuma upperneq soraarussimavaa uppinngitsumit ajornerulluni.’ (1 Timûtiuse 5:8) Kristumiut paasisimavaat meeqqanik ’Jehovamit perorsaallunilu inerterisarneq tassaannaaqqajanngitsoq timikkut isumaginninneq.

Eqqaaginnariaruk Mosesip nunamut neriorsuutigisamut tikileramik Moabip narsartaani uninngaartillutik Israelikkunnik oqaaqqissaarinera. Tassani Guutip inatsisai uteqqippai imatullu unnersuullugit: „Oqaatsikka taakku uummatissinni tarnissinnilu aalajangiutissavasi.“ (5 Moses 11:18) Siusinnerusukkut eqqaasitsissutigisimavaa Jehova asassagaat uummatikkut tarnikkullu iluunngarlutik nukitillu tamakkerlugit pallorfigalugu, nangillunilu: „Oqaatsit taakku peqqussutillu ullumi ilinnut tunniussakka uummammiugiuassavatit.“ (5 Moses 6:5, 6) Angajoqqaanut Israelikkuusunut pingaaruteqarsimavoq Guutip oqaasiisa uummammiuginissaat. Anersaakkut ittunik pingaartitsinermik uummataat ulikkaarpata Israelikkut Mosesip inassutai uku malissallugit ajornartinnavianngilaat: „Qitornannut [Guutip oqaasii] nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ — 5 Moses 6:7; 11:19; naleqqiuguk Matîuse 12:34, 35.

Malugiuk ataataasut oqaatsit tamakkua qitornaminnut ’nangeqqittuartassammatigik eqqartortarlugillu’. Qinerlerfissiami Merriam-Webster’s Collegiate Dictionary-mi oqaaseq „nangeqqittuartassavatit“ ima nassuiarneqarpoq: „Eqqaasitseqattaarnikkut oqaaqqissaareqattaarnikkullu ilinniartitsineq pigiliutititsiniarnerlu“. Angajoqqaat ullut tamaasa — ullaakkut, ualikkut unnukkullu — Guutip oqaasianik eqqartuisarunik meeqqaminnut annertuumik tunniussissapput. Meeqqat angajoqqaamik Guutip inatsisaannut asanninnerat malugigaangamikku namminneq Jehovamut qaninnerulernissaminnik kajumissisinneqartarput. (5 Moses 6:24, 25) Mosesip ataataasut immikkut kajumissaarmagit meeqqatik „angerlarsimatillutik issiasaraangamik“ ilitsersortassagaat soqutiginartuuvoq. Ilinniartitsineq tamanna ilaquttanik isumaginninnermut ilaasimavoq. Ullumikkummi?

„Angerlarsimatillutit issiasaraangavit“

„Oqitsuinnaanngilaq,“ Janet kristumiu sisamanut anaanaasoq nassuiaavoq.a „Nikallujuissuseqartariaqarpoq,“ uia Paul isumaqataavoq. Jehovap nalunaajaasuisut allatulli minnerpaamik sapaatip-akunneranut ataasiarlutik meeqqaminnik Biibilimik atuaqqissaaqateqarniartarput. „Ataasinngornerit unnui tamaasa atorniartarpavut ilaqutariilluta piffissami aalajangersimasumi Biibilimik atuaqqissaaqatigiinnissamut,“ Paul nassuiaavoq, nassuerporli: „Kisianni tamanna iluatsittuaannarneq ajorpoq.“ Utoqqaanertatut qinikkatut ilaannikkut nukinginnartunik suliassinneqartarpoq. Meeraat marluk angajulliit piffissaq tamaat oqaluussisartuupput. Taakkua unnuit oqaluussinermut piffissatsialattut isigaat. Tamanna pissutigalugu ilaqutariit atuaqqissaaqatigiittarnertik tamanna naapertorlugu aaqqissimavaat. „Ilaatigooriarluta unnukkut nereqatigeereernerup kinguninngua atuaqqissaaqatigiittarpugut,“ Paul oqaluttuarpoq.

Angajoqqaat ilaqutariit atuaqqissaaqatigiittarnerat piffissami aalajangersimaqqissaartumi pitittanngikkaluarlugu akuttoqatigiissumik pisarnissaa isumagisarpaat. Paniusoq Clare oqarpoq: „Piffissaq atuaqqissaaqatigiiffissarput allanngortittariaqaraangat ataatap nillataartitsiviup matuanut piffisamik nutaamik nalunaarut nivinngartarpaa, taamaalilluta tamatta qaqugu pissanersoq paasiniassagatsigu.“

Ilaqutariit aalajangersimasumik Biibilimik atuaqqissaaqatigiikkaraangata meeqqat uummammiugisaminnik ajornartorsiutigisinnaasaminnillu saqqummiussinissaannut periarfissinneqartarput. Atuaqqisaaqatigiinneq qeratavallaartumik ingerlanngippat, tassa meeqqat atuakkami atuaqatigiissutigisami apeqqutit atuaannavillugit akisanngippata, pitsaanerussaaq. „Ilaqutariittut atuaqqissaaqatigiittarnerput oqallittarfigaarput,“ Martin marlunnik ernilik nassuiaavoq. „Sapaatip-akunneranut ataasiarluni katersuuttaraanni Biibilimut tunngasumik eqqartugaqarniarluni paasinarsisarpoq qanoq ilaqutariit anersaakkut ingerlanersut,“ oqaluttuarpoq. „Eqqartuinermi assigiinngitsorpassuarnik saqqummiussisoqartarpoq. Atuarfimmi susoqarnersoq paasinarsisarpoq, allalu soqutiginarneq, meeqqat qanoq isummiussaqariartuaarnersut nalunarunnaartarpoq.“ Martinip nulia Sandra isumaqataavoq. Sandra aamma misigisimavoq ilaqutariittut atuaqqissaaqatigiittarnertik pissarsiaqarfigisaqalugu. „Uima atuaqqissaaqatigiinnitsinnik aqutsinermini apeqqutaanut ernima akissutigisartagaat tusarnaarlugit ilinniarfigisaqaakka,“ oqaluttuarpoq. Tamatuma kingorna Sandra akissutigineqarsimasut tunngavigalugit oqaaseqalaartarpoq, nukappiaqqanut iluaqutaasinnaasunik. Atuaqqissaaqatigiinneq pissarsiffiginerusarpaa nammineq pimoorullugu peqataagaangami. Aap, ilaqutariittut atuaqqqissaaqatigiittarnerup angajoqqaat meeqqamik eqqarsartariaasiinut malinnaalluartissinnaavai. — Ussatit 16:23; 20:5.

Naleqqussaasarit nikallujuillutillu.

Ilaqutariit atuaqqissaaqatigiinnissaannut piffissanngorpat imaassinnaavoq meeraq ataaseq eqqummaarissoq soqutiginnillunilu aappaalu oqaaqqissaarneqartariaqartoq atuaqqissaaqatigiinneq pissarsiaqarfigissaguniuk malinnaalluarniartariaqartoq. Anaanaasoq kristumiu oqarpoq: „Ilaqutariittut inuuneq taamaappoq! Angajoqqaatummi qanoq iliortariaqarluta nalunngilarput. Nikallujuilluni atuaqqissaaqatigiinneq ingerlattaraanni Jehova pitsaasunik angusaqarnissamut ikiuissaaq.“

Meeqqap qanoq utoqqaatiginera apeqqutaalluni qanoq sivisutigisumik eqqarsarsinnaanera allanngorarsinnaasarpoq. Angajoqqaat paasinnittut tamanna najoqqutarisassavaat. Michael, tallimanik arfinilinniit 20-it sinnerlugit tungaanut ukiulinnik meeralik, oqarpoq: „Nukarliit siulliullugit akissutinik akisinissaannut periarfissittarsigit. Taava tamatuma kingorna angajullernut akissutit itisilertinneqarsinnaapput piareersarsimasaannillu assigiinngitsunik saqqummiussitillugit.“ Taamaalillutik angajoqqaat meeqqaminnik ilinniartitsinerminni siuneqassutsimik atuippata meeqqat allanik ataqqinninnissaminnik ilinniartinneqassapput. „Ernitta ilaat ilikkajasuuvoq,“ Martin oqaluttuarpoq, „kisianni aappaa paasitinnissaanut ikiortariaqartaqaaq. Atuaqqissaaqatigiinneq naammagittarsinnaanissamut anersaallu inerititaanik allanik ineriartortitsiniarnissamut periarfissatsialaavoq. — Galâsiamiut 5:22, 23; Filípimiut 2:4.

Meeqqat assigiinngitsunik piginnaassuseqarnerat inerissimanerallu malillugu atuaqqissaaqatigiinnerup ingerlannissaa piareersimaffigisariaqarpoq. Simonip Markillu, maannakkut inuusuttuaraasut, mikinerugallaramik, atuagaq Inuk inuit inuusimasut pingaarnerpaartaat angajoqqaatillu atuaqatigiissutigigaangamikku nuannarisarsimavaat. „Ataatap isiginnaartitsissutinik assigiinngitsunik takutitsisittarpaatigut,“ eqqaamasalikkersaarput. Ataataata eqqaamavaa qanoq paarngortariaqarsimalluni Samariamiu nallittuisoq pillugu assersuut nukappiaqqallu isiginnaartitsissusiarigamikku. (Lúkarse 10:30-35) „Piviusorpalaarlunilu nuanneqaaq.“

Meerarpassuit atuaqqissaaqatigiinnerup assigiiginnavimmik ingerlariaaseqarnera akerlerigajuttarpaat. Tamanna pillugu atuaqqissaaqatigiittarneq unitsiinnarneqassava? Naamerluinnaq. „Inuusuttuaqqat sianiissusermik pigisaqarput,“ Ussatit 22:15-mi allassimasoqarpoq. Anaanap kisermaap misigisarsimavaa pinerit tamaasa arlaannit akornusersorneqarnikkut atuaqqissaaqatigiinnerup unitsinneqaqattaartarnera, taamaammallu isumaliulersimavoq nammineq ingerlatsinerlussimalluni. Kisianni nikallujuissimavoq. Ullumikkut meeraasa anaanartik ataqqisorujussuuaat. Nikallujuilluni atuaqqissaaqatigiittarnermik ingerlatsiinnartarsimanermigut asanninnermik isumaginnikkumatussutsimillu takutitsisimanera pingaartippaat.

Nukappiaqqanut niviarsiaqqanullu „iliarsunnut“ ikiuut

Kristumiut utoqqaanertat tassaasariaqarput ’Guutip savaataanik paarsisut’. (1 Pîtruse 5:2, 3) Taakkua ilagiinni ilaqutariinnut pulaartarnerminni angajoqqaanik kristumiunik akisussaaffimminnik ajunngitsumik ingerlatsisunik nersualaarinissaminnut periarfissaqartarput. Ilaquariinni kisimiilluni pilersuiffiusuni ataataasup anaanaasulluunniit meeqqat ilinniartinnissaat akisussaaffigaa.

Kristumiut utoqqaanertat silatusaarlutik akerleriissutaasinnaasut pinngitsoortinniassavaat aappaqanngitsullu akisussaaffiinut akuliunnatik. Naak qatanngutit angutit marluk anaanaq kisermaaq kristumiu pulaarsinnaagaluarlugu ilaqutariit atuaqqissaaqatigiittarfiat ataqqisariaqarpaat. Ilaanneeriarluni ineriartornartuusinnaavoq pitsaasuullunilu utoqqaanertap ataataq anaanarluunniit kisermaaq meeraalu ilaqutariinni atuaqatigiinnissaminnut qaaqqusinnaappagit. Puigunngisaannassavarpulli Jehova tassaammat Ataatarput qilammiusoq. Qularnanngitsumik Jehovap anaanaq kisermaaq meeqqaminik atuaqqissaaqatiginnittarnerani ikorfartorlugulu ikiorumassavaa.

Qanormi taava inuusuttuaraq anersaap piinik soqutigisaqarpat, angajoqqaavili anersaakkut isumaginissaanut soqutigisaqarpiarnatik soqutiginninngilluinnarlutilluunniit? Jehovap kiffai aalajaatsut nikallortariaqanngillat. Tussiaasiortoq allappoq: „Sanngiitsoq tunaarlerpoq ilinnut, tassaagavit iliarsorortut ikiortaat.“ (Tussiaat 10:14) Ilagiit utoqqaanertaat asannillutik sapinngisaminnik iliuuseqarniarumassapput angajoqqaat meeqqaminnik isumaginnillualersikkumallugit. Ilaqutariit oqaloqatigiittariaqarnerannik siunnersuuteqarsinnaapput, namminnerlu peqataanissaminnik neqeroorlutik ilaqutariillu atuaqqissaaqatigiittalernissaannut qanoq iliortoqarsinnaaneranik siunnersuuteqarlutik Soorunami Biibili malillugu angajoqqaat akisussaaffigisaat utoqqaanertat tiguniassanngilaat.

Meeqqat upperisamik ilassinninngitsunik angajoqqaallit annertuumik tapersersorneqartariaqarput. Angajoqqaavisa akuerippatigik nammineq ilaqutariittut atuaqqissaaqatigiinnissamut qaaqqussallugit iluaqutaasinnaavoq. Robert, maannakkut nammineq ilaqutalik, angajoqqaani ilagalugit pingasuinnarnik ukioqarluni kristumiut ataatsimiittarnerinut najuuttarsimavoq. Ataatsimiinnernit nuannersunik eqqaamasaqarpoq, aamma tamatuma kingorna angajoqqaani ataatsimiinnernut aggissaaraluarmata. Qulinik ukioqarluni nukappiaqqamik Jehovamut nalunaajaasuusunik ilaqutalimmik naapitsisimavoq, nukappiaqqallu ataatsimiinnernut ilagisalersimavaa. Nukappiaqqap angajoqqaavisa nuannaarlutik Robert anersaakkut iliarsuusoq sulummik ataannut pisissimavaat, kingornalu Biibilimik atuaqqissaaqatigisalerlugu. Taamatut asannittumik isumaginnilluarnerisigut siuariariartorluarpoq, maannalu ilagiinni utoqqaanertatut kiffartornini nuannaarutigaa.

Meeqqat anersaakkut siuariartornerminni angajoqqaaminnit akornusersorneqaraluarunilluunniit kisimiinngillat. Jehova tassaajuassaaq taakkua Ataataat qilammiusoq aalajaatsoq. Tussiaat 68:6-mi oqaatigineqarpoq: „Iliarsuit ataataat . . . tassa Guuti ineqarfimmini illernartumi ittoq.“ Nukappiaqqat niviarsiaqqallu anersaakkut iliarsuusut nalunngilaat qinunikkut Jehovamut saassinnaallutik, taassumalu tapersersussagaatik. (Tussiaat 55:23; 146:9) Jehovap peqatigiissortaasa anaanarpalaartut pisussaaffitik eqiasuillutik naammassisarpaat anersaakkut pilersuillutik atuagassiatigut ataatsimiittarnikkullu nunarsuaq tamakkerlugu ilagiinni 85.000-init amerlanerusuni sassaalliutaasartunik. Ataatatta Jehovap peqatigiissortaasalu anaanarpalaartut anersaakkut ikiuiuneratigut allaat „iliarsuit“ Biibilimik atuaqqissaartarnermikkut nuannaarutissaqarsinnaapput.

Angajoqqaat kristumiut aalajangersimasumik meeqqaminnik atuaqqissaaqateqartartut nersualaarneqartariaqarput. Angajoqqaat kisermaat meeqqaminnik Jehovap aqqutigeqqusaanik ilinniartitsiuartut, ilungersuutitik pillugit immikkut soqutigineqarlutillu nersorneqartariaqarput. (Ussatit 22:6) Meeqqanik anersaakkut iliarsuusunik isumaginnittut tamarmik nalunngilaat Ataatatta qilammiusup Jehovap tamanna iluarigaa. Ilaqutariit anersaakkut pisariaqartitaannik isumaginninneq akisussaaffimmik annertuumik nassataqarpoq. Taamaakkaluartoq ’ajunngitsuliorta arajussinata nalliuppat katersuiumaarattattaaq qasunngikkutta’. — Galâsiamiut 6:9. (wE 1/6 98)

[Quppernerup ataani ilanngussaq]

[Qupp. 23-mi assiliartaq]

Ilaqutariit atuaqqissaaqatigiittarnerat meeqqat soqutigisaminnik saqqummiussinissaannut periarfissaalluartarpoq

[Qupp. 20-mi suminngaanneernera]

Harper’s