Nunarsuaq suna pillugu pinngortitaava?
Nunarsuarput alianaatsoq Pinngortitsisumit ilisimasumit, Nunarsuarmik inunnillu siunertaqarfiginnittumit, pinngortinneqarsimava? Apeqqut tamanna tamatta isumaliutigisariaqarparput. Apeqqummut tamatumunnga naammaginartumik akissutissarsigutta paasisinnaalissavarput Nunarsuaq qanoq siunissaqartoq.
ILISIMATUUT Nunarsuarmik avataarsuanillu misissueqqissaarsimasut ilarpassui Pinngortitsisoqarneranut, Guuteqarneranut, takussutissanik nassaarsimapput. Ilisimatuut ilaata oqaasii eqqarsaatigeriakkit.
Professori Paul Davies atuakkiamini The Mind of God-imi ima allappoq: „Avataarsuata torerpasillunilu ataqatigiippasissup aalajaatsumik, aaqqissuussaalluartumik paasiuminaatsumillu katitigaasup piuneranut inatsisit pissutsillu aalajangersimalluinnartut aalajangiisuupput.“
’Nalaatsornikkut pisut’ astrofysikerit, avataarsuani pinngortitanik ilisimatuut, ilisimatuullu allat eqqaasimasaat eqqartoreerlugit professori Davies nangippoq: „[’Nalaatsornikkut pisut’] ataatsimut takussutissaapput inuunerup nalunngisatta timikkut inatsisit pissusiinut misikkarilluinnarneranut pinngoqqaatillu annertussusissaattut, nukimmik imaqassusissaattut il. il. pinngortitap annertussusiliisimanerinut piviusunut atatillugu pissutsinik nalaatsortumik pisimasorinartunik tunngaveqarluinnarneranut. . . . Naammappoq oqassalluni Guuti taarserlugu nammineq attataasannguit kaajallatsiinnarlugit annertussutsit tamakku allanngortissinnaasuugutsigik paasissagaluaripput attataasanik tamakkuninnga allanngortitsinissamut periarfissaasinnaasut tamangajalluinnarmik nunarsuaq avataarsualu inuuffigineqarsinnaajunnaarsissagaluaraat. Arlalitsigut malunnarpoq attataasat assigiinngitsut pinngortitami inuusoqarsinnaanissaanut naleqquteqqissaartumik iluarsineqarsimasut. . . . Pinngortitami pissutsit annikitsunnguugaluamilluunniit allanngornerat uagut inuit avataarsuanik isiginnaarsinnaanitsinnik ajornarsisitsisinnaanerat eqqarsariaammernartorujussuuvoq.“
Inuppassuit isumaqarput paasisat taama ittut paasinarsisikkaat Nunarsuarput avataarsualu Pinngortitsisumit siunertalimmit pinngortinneqarsimasut. Tamanna ilumoorpat paasiniartariaqarparput sooq Nunarsuaq pinngortissimagaa. Aammattaaq suna siunertaralugu pinngortissimaneraa ajornanngippat paasiniartariaqarparput. Tamatumunnga atatillugu eqqumiikuluttumik equngasoqarpoq. Guuteqarneranik upperisaqannginneq siammarsimagaluaqisoq inuppassuit upperaat ilisimasumik Pinngortitsisoqartoq. Kristumiuuneraqatigiit ilagiissaasa amerlanersaanni Guuti ajugaqanngitsoq aamma qilammik nunamillu Pinngortitsisoq eqqartorneqartarpoq. Taamaakkaluartorli upperisarsioqatigiit assigiinngitsut tamakkua Guutip Nunarsuarmik siunertaa qularpasigatik eqqartukulanngilaat.
Biibili qanoq oqarpa?
Silatusaarnerussaaq tamakku pillugit paasissutissanik inuppassuit Pinngortitsisumeerneragaannit aallissalluni. Aallerfissaq tamanna tassaavoq Biibili. Nunarsuup siunissaa pillugu tassani oqaatigineqartut ersarinnerit ilaat Nalunaajaasup oqaasii 1:4-mi allassimavoq: „Kinguaariit peeruttarput, kinguaariillu pilersarput, nunarsuarli kisimi ataannartussaavoq.“ Guutip Nunarsuarmik pinngortitsinermini siunertaa Biibilimi ersarissorujussuarmik nassuiarneqarpoq. Oqaluttuarineqarportaaq tassani inuusoqarsinnaaqqullugu silaannarsuarmi eqqoqqissaartumik sumiiffilerlugu Seqinermullu eqqoqqissaartumik ungasissusilerlugu inississimagaa. Guutip ajugaqanngitsup pruffiiti Esajas ima allannissaanut isumassarsisissimavaa: „Ima oqarpoq [Jehova], qilammik pinngortitsisoq, Guutiusoq, nunarsuarmik ilusiliisoq, pilersitsisoq tunngaviliisorlu soqanngitsussanngornagu, kisianni inoqartussanngorlugu pinngortitsisoq: ’[Jehova] tassa uanga, allamik naami.’“ — Jesaja 45:18.
Inuilli Nunarsuarmi uumassusilinnik tamanik nungutitsisinnaasunik pilersitsiortorsimapput. Ilisimassutsimigulli asseqanngitsukkut Guuti nalunaarsimavoq inuit suli ingasannerusumik iliunnginneranni akuliukkumaarluni. Biibilip atuagartaasa kingullersaanni, sarĸúmersitat-ni, toqqissiallannartumik ima neriorsuuteqarpoq: ’Inuiaqatigiillu kamattunngorput, illillu kamannerit nalliuppoq piffissarlu toqusut eqqartuussallugit akissarsiassarlu tunniussallugu kiffannut pruffiitinut iluartunullu aternillu mianerinnittunut, mikisunut angisuunullu, nunamillu aseruisut aserussallugit.’ — sarĸúmersitat 11:18.
Nunarsuarmik, silaannarsualiartartup ’ujaqqamik erlinnartumik’ taasimasaanik, pinngortitsinerminut aallaqqaammulli siunertani Jehovap qulaarpaa. Guutip siunertaraa Nunarsuaq tamarmi paratiisinngussasoq toqqissisimanartoq, angutinik arnanillu eqqisseqatigiillutik ataasioqatigiillutillu inuusunik najugaqarineqartoq. Siunertaraa inuit aappariit siulliit meeqqiussasut Nunarsuaq ulikkaariartuaarlugu. Aappariit taakkua nuannaarutigisaannik Jehova Nunarsuarmi paratiiseeralioreersimavoq. Ukiut ingerlaneranni ilaqutariit amerliartuinnartillugit Edenip naatsiivia Mosesimik allakkat siulliit 1:28-p eqquunnissaata tungaanut alliartuaassaaq: „Guutillu pilluaqquai oqarfigalugit: „Kinguaassiorlusi amerliartoritsi nuna tamakkerlugu ilissinnullu naalatsigitillugu.’“
Pissutsit avaanngunartut Nunarsuup inuisalu ullumikkut atugaat isumaqarpat Guutip Nunarsuarmik aallaqqaammulli siunertaa maangaannarsimasoq? Imaluunniit inuit namminissarsiussusiat pissutigalugu isummani allanngortillugu aalajangersimava Nunarsuup aserorluinnarneqarnissaa akueriinnassallugu aallaqqaataaniillu aallartiinnassalluni? Naamik, taamaattoqannginnera qularinngissinnaavarput. Biibilimi oqaatigineqarpoq Jehovap siunertai suugaluartulluunniit pinngitsooratik naggataatigut piviusunngorumaartut. Qanorluunniit aalajangeraluarpat kialuunniit imaluunniit pisup naatsorsuutiginngisap suulluunniit pilersaarutaa akornusersinnaanngilaa. Taassumami ima neriorsorpaatigut: „Taama ippoq oqaasera qaninnit anisoq: Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.“ — Jesaja 55:11.
Guutip siunertaa allanngunngilaq
Adamip Evallu tunussinerata Edenillu naatsiivianit anisitaanerata kingorna paasinarsivoq Guutip nunarsuarmik paratiisiusumik siunertaata naammassineqarnissaani taakkua ilaassanngitsut. Taamani Jehova paasititsivoq taakkua kinguaavisa ilaasa aallaqqaammulli inassutini maleruarumaaraat. Tamanna sivisuumik, aap, ukiuni hundredelippassuarni, ingerlassaaq. Adamili Evalu naammalluinnartuujuaannarsimagaluarpata inuuginnarlutillu Guutip aallaqqaammulli siunertaata naammassineqarnissaanut piffissaq qanoq sivisutigisoq ingerlasimassagaluarnersoq pillugu paasissutissaqanngilaq. Qularutissaanngilarli Jesus Kristusip ukiuni tuusintini naalakkersuinerata naalernerani — maannamit ukiut tuusintit sinnilaarlugit qaangiuppata — Nunarsuarmi tamarmi pissutsit paratiiserpalaartut Edenip naatsiiviani atuussimasut assingi atuukkumaartut, taamanikkussamullu Nunarsuaq inuit aappariit siulliit kinguaavinik eqqisseqatigiillutillu pilluartunik inoqassasoq. Jehovap siunertaminik uniuinngisaannarluni eqquutititsiuaannarnera inaarutaasumik uppernarsarneqassaaq!
Siulittuutit pissanganartut Guutip kiffaminik isumassarsisitsilluni itsarli allatsissimasai taamanikkussamut tupinnangaartumik eqquutissapput, ilaatigut siulittuut Jesaja 11:6-9-miittoq: „Amaqqup najussavaa savaaraq, milakulaallu savaasaaraq aqupeqatigissavaa. Ussiup piaraa løvellu piaraa mangiaqatigiissapput, nukappiarannguullu paariumaarpai. Ussik arnaviaq nanorlu ikinngutigiissapput, piaraat aqupisimaqatigiissapput, løverlu ivigartorumaarpoq ussittut. Naalungiaq pinnguassaaq pulateriaarsuup inaata killingani, milussaartullu assani isatsikkumaarpaa pulateriaarsuup toqunartullip piaqqiffianut. Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“
Peqqiilliorneq, nappaatit toqussutaasut allaallu toqu qanganngussapput. Biibilip atuagartaani oqaatigineqartutut ersaritsigisumik allatut oqartoqarsinnaagunanngilaq: ’Takussagissi Guutip ineqarfia inunniittoq, taakkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ — sarĸúmersitat 21:3, 4.
Taamaattumik isumalluaannarsinnaavugut: nunarsuarput alianaatsoq ataannassaaq. Qanortoq pissutsit aaqqissuussaanerata ajortup matuma suujunnaarsinneqarnerani tamatumalu Nunarsuarmut ajoqusiisarnerata kipitinneqarnerani aniguineq immikkut pisinnaatitaaffigigisigu. Silarsuaq nutaaq minguitsoq Guutip pilersitassaa ungasigunnaarpoq. Asasatta ilarpassui tupinnartuliornikkut toqusunit makititaassapput. (Juánase 5:28, 29) Aap, Nunarsuaq ataannartussanngorlugu pinngortinneqarsimavoq, uagullu tassaniittuaannarsinnaavugut nuannaarutigalugulu. (wE 15/6 98)