Jehovap piumasaatut iliorput

Samariamiu tulliulluartoq

JESUSIP nalaani juutit juutiunngitsullu akornanni saqqumisumik uumissoqatigiinneqarsimavoq. Allaat piffissap ingerlanerani juutit Misjna-annut inatsimmik ilanngussisoqarsimavoq arnat Israelikkuusut juutiunngitsumik ernisussioqqusaajunnaarsillugit, taamaaliornermikkut Guutimik nalusoq inunngortiinnassammassuk. — Abodah Zarah 2:1.

Upperisarsiornerup inuiaqatigiissutsillu tungaasigut Samariamiut inuiannit allanit juutinut qaninnerupput. Taamaakkaluartoq taakkua aamma ajattugaapput. ’Samariamiut juutini soqutigineqartanngillat,’ apustili Johannes allappoq. (Juánase 4:9) Talmud naapertorlugu „iffiamineq Samariamiumit pisaq puulukip neqaanit minguttuuneruvoq“. Allaat juutit ilaasa oqaaseq „Samariamiu“ asissuiniutitut kanngunarsaaniutitullu atortarsimavaat. — Juánase 8:48.

Tamanna eqqarsaatigalugu Jesusip angummut juutit inatsisaannik ilisimasalimmut oqaasii ilinniutissaalluarput. Angut Jesusimut saaffiginnippoq aperalunilu: ’Ajoqersuisoq, qanoq iliussaanga inuuneq naassaanngitsoq kingornussariumallugu?’ Jesus akissummini Mosesip inatsisaanut innersuussivoq, tassani peqqussutigineqarpoq ’Jehova uummatikkut, tarnikkut, nukinnik isummamillu tamakkiisumik asassagaat tullertillu immissut asallugu’. Taava inatsisinik ilisimasup Jesus aperaa: ’Kinami tulleraara?’ (Lúkarse 10:25-29; 3 Moses 19:18; 5 Moses 6:5) Farisiiarit naapertorlugit oqaaseq „tulleq“ juutit maligassarsiaannik maleruaasunuinnaq tunngavoq. Taakkua nunani allamiut Samariamiulluunniit tullermissut isiginngilluinnarsimavaat. Inatsisinik ilisimasalik apersuisoq isumaqarsimaguni isuma tamanna Jesusip tapersersussagaa, tupaallassimassaaq.

Samariamiu nallittuisoq

Jesusip angutip apeqqutaa assersuusiorluni akivaa.a ’Inuk Jerusalemimit Jerikomut samunnarpoq,’ oqarpoq. Jerusalemimiit Jerikomut 23 kilometerit missaanni isorartutigaaq. Illoqarfiit marluk taakku akornanni aqqusineq sangujoraaqaaq sinaanilu ujarassuaqartiterluni, ujajaanianut qamaffissaqqilluni, saassussiffissaqqilluni qimaariataarfigillunilu. Jesusip assersuusiaani angalasoq ’piiaasut qaninngarpaat; taakkua mattarlugulu unatarpaat aallarlutillu toqungajattoq qimallugu’. — Lúkarse 10:30.

Jesus nangippoq: ’Taamaalisilluguli palasiusoq tasamunnarpoq aqqut tamanna aqqutigalugu; taassumalu takugamiuk qaangiinnarpaa. Taamattaaq Levikkuusoq tassunga pigami ornillugu takugamiuk qaangiinnarpaa.’ (Lúkarse 10:31, 32) Palasi Levikkuusorlu inatsisinik ilinniartitsisuupput taamaattumillu aamma tullermik asanninnissamik inatsimmik ilinniartitsisuullutik. (3 Moses 10:8-11; 5 Moses 33:1, 10) Taakkua angalasumik aqqunarsimasumik ikiuisussatut inunnit allanit tamanit misigisimanerpaasariaqaraluarput.

Jesus ingerlaqqippoq: ’Samariamiulli ingerlatilluni taassumunnga pisup takuaa.’ Samariamiu eqqaaneqarmat qularnanngitsumik inatsisinik ilisimasoq alapernaannerulerpoq. Inuiaqatigiit taakkua ajortumik isigineqarnerat Jesusip tapersissavaa? Naaggarluinnaq. Samariamiup angalasoq aqqunarneqarsimasoq takugamiuk ’nalligilerpaa’. Jesus oqarpoq: ’Ornillugulu ikii mattuserpai, uuliamillu viinnimillu kuillugit, nersutaatiminullu qaqitillugu akunnittarfimmut pisippaa paaqqillugulu. Aqaguanilu aningaasannguit marluk tiguai akunnittarfiup inuanut tunniullugit oqarfigalugulu: paaqqiniaruk, annermillu atortitaqaruit kingumut uteruma akilerumaarpakkit.’ — Lúkarse 10:33-35.

Maanna Jesusip inatsisinik ilisimasoq ima aperaa: ’Qanoq taava isumaqarpit: taakkua pingasut ilaat sorleq taassuma piiaasut qaninngagaata tulleraa?’ Inatsisinik ilisimasup nalunngilaa akissutissaa tassaasoq ’Samariamiup’, taamali oqassalluni saperpoq. Ima akiinnarpoq: ’Nallittortini.’ Taava Jesusip oqarfigaa: ’Illittaaq taamaalioriartorit.’ — Lúkarse 10:36, 37.

Sumik ilinniarfigisinnaavarput?

Angut Jesusimut taama aperisoq ’imminik iluartuutinniarluni’ taamaaliorpoq. (Lúkarse 10:29) Immaqa isumaqarsimavoq Mosesip inatsisai annikitsualuttai ilanngullugit maleruaramigit Jesusip nersussagaani. Angutilli imminut angisuutittup ussatip Biibilimeersup ilikkarnissaa pisariaqartippaa: „Inuk assuarnaatsutut imminut isumaqarfigisinnaasarpoq, [Jehovalli] inuit uummataat misilittarpai.“ — Ussatit 21:2.

Jesusip assersuusiaata takutippaa inuup assuarnaatsup Guutip inatsisai maleruaannarnagit aammattaarli pissusiisigut malinniartariaqaraa. (Evfisumiut 5:1) Soorlu Biibilimi allassimavoq: ’Inuup kinaassusia Guutip pinngilaa.’ (apustilit suliait 10:34) Tamatumani Guuti malipparput? Jesusip assersuusiaata takutippaa inuiaassutsikkut, kulturikkut upperisarsiornikkullu assigiinngissutit uniffiginagit tullerput asasariaqaripput. Kristumiut ’tamanut ajunngitsulioqqullugit’ — innuttaaqatigiinni inissisimaffigeqatigisat, naggueqatigisat nunaqqatigisalluunniit uppeqatilluunniit kisiisa pinnagit — peqquneqarput. — Galâsiamiut 6:10.

Jehovap nalunaajaasuisa Biibilip oqaaqqissaarutai malinniaqqissaartuuaat. Assersuutigalugu ajunaarnersuaqaraangat Jehovap nalunaajaasoqataasaannaanngitsoq, aammattaarli allat, nalunaajaasut ikiuinerat iluaqutigisarpaat.b Aammattaaq allat Biibilimik ilisarsinerutinniarlugit nalunaaquttap-akunneri milliardit sinnerlugit ataatsimut atorsimavaat. Naalagaaffik pillugu tusarliussamik inuit tamaasa tusarlerniarsaraat, Guutimmi ’inuit tamaasa annaqquai sallusuissummillu ilisarsileqqullugit’. — 1 Timûtiuse 2:4; apustilit suliait 10:35. (wE 1/7 98)

[Quppernerup ataani ilanngussat]