Atuartartut apeqqutaat
Matîuse 17:20 naapertorlugu apustilit ’uppinngissusertik’ pissutigalugu nukappiaraq anersaapilummit naalliutsinneqartoq ajorunnaarsissinnaasimanngilaat. Kisianni Mákorse 9:29-mi eqqaaneqarpoq ajorunnaarsitsisinnaassagaanni qinuneq pisariaqartoq. Sooq iivanngkiiliunik oqaluttuani pissutaasut assigiinngitsut taaneqarpat?
Oqaluttuat taakku marluk imminnut akerleriinngillat. Tapertareeqatigiiginnarput. Matîuse 17:14-20 siullermik takoriartigu. Angutip oqaluttuaraa ernini itillittartoq, Ny Verden-nutsigaq naapertorlugu noqartartoq, ajoqersukkallu ajorunnaarsissinnaanngikkaat. Taamaattumik Jesusip nukappiaraq ajorunnaarsippaa anersaapiluk taassumannga anisillugu. Taava ajoqersukkat aperipput sooq ajorunnaarsissinnaasimannginneritsik. Mattæusip allassimasaa naapertorlugu Jesusip akivai: ’Uppinngissusersi pissutigalugu. Ilumut oqarfigaassi: Siinuppip naatsiiassartaatut atsigisumik uppersuseqarussi, qaqqamut uumunnga oqarsinnaassavusi: „Tassannga nutserit uunga;“ nutserumaarpoq taava, ajugaqassanngilasilu.’
Mákorse 9:14-29 qupperiartigu, tassani paasissutissat amerlanerusut takussavavut. Assersuutigalugu Mákorse 9:17-imi allassimavoq pisimasumi matumani noqartarneq anersaapilummik pissuteqartoq. Malugisariaqarpoq Biibilip ilaani allami allassimammat Jesusip noqartartut aamma anersaapiloqartut ajorunnaarsittarsimagai. (Matîuse 4:24) Pisimasorli pineqartoq immikkut ittuuvoq ’anersaap oqalunneq ajortup’, tassa anersaapiluup, noqartittarmagu, nakorsallu Lukasip tamanna uppernarsarpaa. (Lúkarse 9:39; Kulorsamiut 4:14) Malugiuk Mákorse 9:18-imi allassimammat anersaapiluup ’tigullaraangani’. Nukappiaraq anersaapilummit kipisuitsumik naalliutsitaanngilaq ilaannikkuinnarli naalliutsitaasarluni. Ajoqersukkalli ajorunnaarsissinnaasimanngilaat. Aperimmanni sooq taamaannersoq versi 29-mi atuarsinnaasatsitut Jesus akivoq: ’Taamaalisartut anineq ajorluinnarput, kisianni qinunikkut.’
Markusip allassimasaa misissoqqissaaraanni paasinarsissaaq Mattæusip allassimasaanut akerliunngitsoq. Mákorse 9:19-imi kinguaariit taamanikkut inuusut uppinngissusiat Jesusip aliasuutigaa. Versi 23-milu nukappiaqqap angutaanut oqarpoq ’uppertumut ajornartoqanngitsoq’. Tassa Markusip allagaani uppernerup pingaaruteqarnera naqissuserneqarpoq. Versi 29-mi Jesusip qinuneq pillugu qanoq oqarneranik Markusip ilassutaasumik paasissutissiinnarpaatigut, Mattæusip Lukasilluunniit ilanngussimanngisaannik.
Taava qanoq isummissaagut? Apustilit aqqaneq-marluk ajoqersukkallu 70-it pisimasuni allani anersaapilunnik anisitsisimapput. (Mákorse 3:15; 6:13; Lúkarse 10:17) Pisimasumili matumani iluatsitsinngillat. Sooq? Oqaluttuani tamani oqaatigineqartut eqqarsaatigalugit piareersarluarsimagunanngitsut paasinarpoq. Immaqa anersaapiluup qanoq ittuussusia pissutaavoq, anersaapiluit kinaassutsimikkut, soqutigisamikkut piginnaassutsimikkullu assigiinngitsuusinnaammata. Anersaapilummut pineqartumut atatillugu immikkut uppersuseqarluarneq Guutillu ikiuinissaanik qamannga pisumik qinuneq pisariaqarsimavoq. Soorunami Jesus taama ittumik uppersuseqarpoq, Ataataminillu qinnutinik tusartartumit tapersersorneqarluni. (Tussiaat 65:3) Taamaattumik Jesus nukappiaqqamik ajorunnaarsitsisinnaassuseqarpoq anersaapiluk anisillugu, taamaaliorporlu. (wE 1/8 98)