Guuti ilumoortumik pallorfigiuk
Guutisiornerput Guutip akuerisinnaassappagu, sallusuissummik tunngaveqartariaqarpoq. (Juánase 4:23) Biibili naapertorlugu pallorfiginnittut ilumoortut ’Guutip uumasup ilagiissaanut, ilumoornerup sukaralugulu tunngavigisaanut’ ilaapput. (1 Timûtiuse 3:15) Guutip ilagiissaanut ilaasut Guutip oqaasia upperiinnanngilaat, kisianni maleruartarpaat illersortarlugulu, nunarsuaq tamakkerlugu ilisimaneqalersiitigalugu. — Matîuse 24:14; Rûmamiut 10:9-15.
JEHOVAP NALUNAAJAASUI ullumikkut nunani 200-nit amerlanerusuni Biibilimik ilinniartitsinertik pillugu ilisimaneqarput. Biibili atuartarpaat oqaluussissutigalugulu sallusuissutaasoq, allanneqarsimasullu inuit ilisimaqqissaarniutaat ikiortigalugit allanngortinneq ajorlugit. Nalunngiliuk Jehovap Nalunaajaasuisa suna upperineraat? Amerlasuut tusarnaarnissaannut nangaasarput ajortumik oqallisigineqarnerat pissutigalugu. Kisianni inuit eqqortumik isumallit kajumissaarneqarput namminneq aalajangeqqullugit Jehovap nalunaajaasuisa oqaluussissutigisaat sallusuissutaanersoq imaluunniit naamik. Aalajangigassaq taama pingaaruteqartigisoq tusakkat naapertorlugit aalajangerneqartariaqanngilaq. Amerlasuut namminneq Jehovap nalunaajaasuisa ajoqersuutaannik misissuisimasut annertuumik iluaqutigisimavaat.
Sallusuissummik ilisarsinerup qununeq peersittarpaa
Assersuutitut niviarsiaq Eugeniamik atilik taaneqarsinnaavoq, sukannersumik katuullisut perorsarneqarsimasoq. 1979-imi Mexico paavimit tikeraarneqalermat ataataa aaqqissueqataasimavoq. Nalunngisamini pulaartilluni Eugenia Jehovap nalunaajaasui naapissimavai. Taakkua ikiortigalugit Biibilip qanoq ajoqersuineranik misissuilerpoq. Oqaluttuarpoq: „Aallaqqaammut qunulersimavunga Sallusuissut nanisimavara! Kisianni tamanna isumaqarpoq upperisarisimasaraluakka eqqunngitsuusut. Ilaquttakka, ikinngutikka — inuit asasakka — tamarmik kukkusimapput. Eqqissiveeruppunga. Imminut aperisaqattaalerpunga ilaquttama qanoq paasisimasakka qisuariarfigissaneraat. Piffissaq ingerlatillugu, Jehovap ikiuineratigut piffissamut aalajangiisumut tamatumunnga piareersalerpunga. Ullut ilaanni ilaquttatsinnut ikinngutaasoq teologiimi professoriusoq saaffigaara. Oqarfigaara sallusuissut nassaarerusullugu. Taava akivaanga: ’Sallusuissut ilisimalerusukkukku, Jehovap Nalunaajaasuinukarniarit’“.
Eugeniap annilaangassutaatut pisoqarpoq — angerlarsimaffimminit anisinneqarpoq. Kisianni oqaluussisartut soraaratik anersaakkut ikiortuarpaat. Oqarpoq: „Nakussatsinneqarsimavunga sallusuissummut aalajaassinnaaqqullunga. Takusinnaalerparalu sorsuutigissallugu imminut akilersinnaasoq. Uannut pingaartorujussuusimavoq Jehovap nalunaajaasuinit uummammik pisumik tikilluaqquneqarnera. Kristumiut ilagiissaanni asanninneq malugisimavara. Kisimiilernissamut qunugisara ajugaaffigaara Jehovap peqatigiissortai qanimut attavigineratigut.“
Assersuut alla tassaavoq Sabrina, ilaqutariinni Biibiliminngaanniit eqqarsaatinik eqqartuisartuni peroriartorsimasoq. Allaat ’ilaqutariit upperisarsiornerat’ ineriartortissimavaat. Taassuma upperisarsiornernut assigiinngitsunut ilaasortaasut naapittarsimavai kukkussutaat qulaajarumallugit. Jehovap nalunaajaasuisa Biibilimik atuaqqissaaqatiginninnissamik neqeroorfigimmanni ingerlaannaq akuersivoq periarfissaqarumalluni upperisaata eqqunngitsuuneranik takutitsinissaminut. Oqarpoq: „Ukiup ataatsip missaa atuaqqissaareerlunga, qunugilersimavara ’sallusuissutiga’ annaassasoralugu. Uannut ajornarsimanngilaq upperisarsiornerit siornatigut attavigisarsimasama ajoqersuutaasa eqqunngitsuunerat qulaassallugu, kisianni maannakkut oqitsuinnaanngilaq“.
Sabrinap qununini pissutigalugu Jehovap nalunaajaasui attaveqarfigiunnaarpai. Tamatumali kingorna anersaakkut imaqannginneq misigisimavaa. Aalajangerpoq atuaqqissaartarnini nangeqqinniarlugu, naggataatigullu nassuerutigisariaqarsimavaa sallusuissut nassaarisimallugu. Sabrina ima siumukarsimatigaaq kissaatigilerlugu ilinniakkami allanut oqaatiginissaat. Allaat aperisimavoq oqaluussisartut allat illumiit illumut oqaluussineranni ilagiumallugit. Sabrina nassuiaavoq: „Jehovap nalunaajaasui peqatigalugit oqaluussinermut peqataalersinnanga aperineqarsimavunga: ’Uummatikkut iluunngarlutit kissaatigiviuk Jehovamut nalunaajaasunngorusullutit?’ ’Naamik!’ akivunga. Qunoqqilerpunga“. Ataatsimiinnerit tamaasa najuuffigisarneri ingerlatiinnareerlugu aamma Guutip innuttaasa Biibilimi najoqqutassiat maleruaraat takoreerlugu, Sabrinap kiisami paasilerpaa ilumut sallusuissut nassaarisimallugu. Kuisippoq maannakkullu piffissaq tamaat oqaluussisartuulluni.
Assigiinngissut sooq taama annertutigaa?
Immaqa ilaat aperiumassapput: ’Sooruna Jehovap Nalunaajaasuisa upperisarsiortullu allat ajoqersuutaat taama assigiinngitsigisut?’ Jehovap nalunaajaasuisa upperisaat qimerloorukkit paasissavat tassaasut kristumiuusut ilumoortut peqqissaarluartumik Biibilimik atuaqqissaartartut. Nammineq Biibiliutit atorlugu allassimaffiit qulaani innersuussutigineqartut quppertakkit. Ajoqersuutigisaasa ilaat tassani takusinnaavatit.
Jehovap Nalunaajaasuisa upperisaasa misissorneratigut qanorlu Biibilimi ajoqersuutigineqartoq malikkaat takusinnaaneratigut, paasisinnaavat kiffaanngissuseq sallusuissutip nassatarisaa. (Juánase 17:17) Sallusuissut qunugisariaqanngilaq. Eqqaamajuk Jesusip neriorsuutaa: ’Sallusuissut ilisarissavarsi, sallusuissutillu inussiaajunnaarsissavaasi.’ — Juánase 8:32. (wE 1/10 98)
[Qupp. 27-mi ungalusaq]
JEHOVAP NALUNAAJAASUISA AJOQERSUUTIGISAASA ILAAT
◯ Jehova tassaavoq Guuti ajugaqanngitsoq. Biibilip allassimaqqaarfiini aqqa 7000-nit amerlanerusunik atorneqarsimavoq. — Tussiaat 83:19.
◯ Jesus Kristus tassaavoq Guutip ernera, nunarsuarmut pisimasoq inuit pillugit inuunini pilliutiginiarlugu. (Juánase 3:16, 17) Jehovap Nalunaajaasuisa Jesus Kristusip ajoqersuutaa iivangkiiliuni nassaassaasoq malippaat.
◯ Taaguut Jehovap Nalunaajaasui Jesaja 43:10-mi tunngaveqarpoq, allassimagami: „Nalunaajaasigaassi, taama oqarpoq Jehova.“ (NV)
◯ Ataatarpuumi naalagaaffik qinnutigineqartartoq tassaavoq qilammi naalakkersuineq ungasinngitsukkut naalliunnartunik anniaatinillu nunarsuarmi atuuttunik soraarsilluinnartitsisussaq aamma paratiisimik Biibilimi neriorsuutigineqartumik atulersitsisussaq. — Jesaja 9:6, 7; Daniel 2:44; Matîuse 6:9, 10; sarĸúmersitat 21: 3, 4.
◯Kikkut tamarmik Guutip peqqusaanik iliortut Guutip naalagaaffiata pilluaqqussutissartai naassaanngitsumik iluaqutigisinnaavaat. — Juánase 17:3; 1 Juánase 2:17.
◯Kristumiut Biibili malittariaqarpaat. Unneqqarissuulluarniatariaqarput, ileqqorissuuniartariaqarlutik tullerminnillu asannittuuniartariaqarlutik. — Matîuse 22:39; Juánase 13:35; 1 Korintumiut 6:9, 10.
[Qupp. 26-mi assiliartaq]
Nunani 200-nit amerlanerusuni Jehovap Nalunaajaasuisa sallusuissut Biibiliminngaanneersoq inunnut oqaluussissutigisarpaat