Qanoq ililluni ajornartorsiutit aaqqinneqarsinnaasut eqqissisimasumik

INUIT nakuusertarnerat inuiattulli pisoqaatigingajappoq. Biibilimi oqaatigineqarpoq inuk nakuusertoq siulleq tassaasoq Kain, Abelip angajua inuillu aappariit siulliit ernerat angajulleq. Abelip pilliutaa nammineq pilliutiminit Guutip iluarinerummagu Kain ’ kamalersimavoq ’. Tamanna Kainip qanoq iliuuseqarfigaa? Nukki Abel „saassuppaa toqullugulu“. Tamatuma kingorna Guutimut attaveqarmigut assut ajornartorsiulerpoq. (1 Moses 4:5, 8-12) Kainip Guutimut attaveqarnera nakuusernerup aaqqinngilaa.

Kainip ajornartorsiut aaqqinniarlugu nakuusernera qanoq iliorluta malinnaveersaarsinnaavarput?

Nakuusernermit akaarinninnermut

Biibilimi oqaluttuarineqarpoq angut Stefanusimik, kristumiumik upperisani pillugu toqutaasumik siullermik, toqutsinermik akuersaarpasilluni isiginnaarsimasoq. (apustilit suliait 7:58; 8:1) Angut taanna, Saulus Tarsusimiu, Stefanusip upperisaanut isumaqataanngilaq nakuuserlunillu toqutsineq Stefanusip suliaanik unitsitsissutitut naapertuilluartutut tapersersorlugu. Immaqa Saulus inuunermini sutigut tamatigut nakuusersuunngikkaluarluni ajornartorsiummik aaqqiissutissatut nakuuserneq akuersaarpaa. Stefanusip toqutaanerata kinguninnguagut ’ Saulusip ilagiit nungutinnialersimavai, illunullu isertarluni angutillu arnallu aallaruttarsimallugit parnaarussivimmullu pisillugit.’ — apustilit suliait 8:3.

Biibilimik ilisimatooq Albert Barnes naapertussagaanni oqaatsimi griikerisuumi tassani ’ nungutinniarpai’-mik nutserneqarsimasumi pineqarsinnaavoq nersutit qaasuttut, soorlu liivit amaqqullu, aseruinerat. Barnes ima nassuiaavoq: „Saulus nersutitut qaasuttutut ilagiinnik saassutarinnissimavoq — iliuuseq sakkortoorujussuaq, qinuginneqataanermini ilungersuussissusianik kamanneranillu ersersitsisoq.“ Saulus ’ toqutsiniarluni Naalakkap [Kristusip] ajoqersugaanik qinngarsuingaarami ’ Damaskusimukarsimavoq Kristusip malittaanik suli amerlanernik malersuilluni. Aqqutaani Jesusimit toqumit makititaasimasumit oqaluunneqarpoq, tamannalu Saulusip kristumiunngorneranik kinguneqarpoq. — apustilit suliait 9:1-19.

Saulusip kristumiunngorami inunnut allanut iliorfiginneriaatsini allanngortippaa. Allanngornera ukiut 16-it qaangiunneranni pisukkut takuneqarsinnaavoq. Inuppaaluit Antiokiami ilagiinnut taassuma ilaaffigisaanut tikiupput kristumiullu tassaniittut Mosesip Inatsisaanik maleruaanissaannik kajumissaarlugit. Tamatuma kingunerisaanik ’ mikinngitsumik assortuunneqalerpoq ’. Saulus, taamanikkut Paulusimik taaneqartalersimasoq, aamma assortuuttunut peqataavoq. Nalunanngitsumik assortuunnersuaqarsimavoq. Paulusili nakuusernermut saanngilaq, assortuussutaasullu apustilinut utoqqaanertanullu Jerusalemimi ilagiinniittunut suliassanngortinnissaanik ilagiit aalajangernerannut isumaqataavoq. — apustilit suliait 15:1, 2.

Aamma Jerusalemimi utoqqaanertat ataatsimiinneranni ’ saqitsaattoqarpoq ’. Aatsaat ’ tamarsuarmik nipangermata ’ Paulusip oqaluttuuppai Guutip anersaavata uppertut kipineqanngitsut akornanni naammassisimasai tupinnartut pillugit. Allakkat Illernartut tunngavigalugit oqaloqatigeereerlutik apustilit Jerusalemimilu utoqqaanertat ’ isumaqatigiillutik aalajangerput ’ uppertut kipineqanngitsut pisariaqanngitsumik artukkersorniarnagit kisianni oqaakkumallugit ’ guutipilunnut tunissutit ilangeqqunagit, aammillu ipisumillu nereqqunagit arnaaneqaqqunagillu ’. (apustilit suliait 15:3-29) Paulus allanngorluinnarsimavoq. Nakuuserneq atornagu akerleriissutinik aaqqiiniarnissani ilikkarsimavaa.

Nakuuseriartarnermik akiuineq

Kingusinnerusukkut Paulus ima oqaaqqissaarivoq: ’ Naalakkamut kiffaasoq assuarisassarsiorajussanngilaq, tamanulli inussiarnersuussavoq ajoqersuineq sapinngitsuulluni ilalaarsinnaallunilu naalliukkuni; oqaatseriitsullu qanilaarluni ajoqersorniassavai.’ (2 Timûtiuse 2:24, 25) Timoteusilu, nakkutilliisoq inuusuttoq, Paulusip kajumissaarsimavaa pissutsit ajornakusoortut eqqisissimasumik iliuuseqarfigisassagai. Paulus piviusorsiorpoq. Nalunngilaa allaat kristumiut kissaammersinnaasut. (apustilit suliait 15:37-41) Taamaattumik pissutissaqarluarluni ima kajumissaarivoq: ’ Kamatsillusi ajortulinnginniaritsi; seqineq tarrisinaveersiuk narrutsassimanissinni.’ (Evfisumiut 4:26) Kamarujussuarnaveersaarneq misigissutsinik taama ittunik aaqqiiniassutissaavoq eqqortoq. Qanorli ililluni tamanna ajornanngila?

Kamannermik nunusiniarneq ajornakusoortaqaaq. „Ajussuseq ullumikkut nuannaartorisaavoq,“ dr. Deborah Prothrow-Stith, Harvardip peqqinnissamik ilisimatusarfiani atorfilik, taama oqarpoq. „Iluamik oqassagaanni pissutsit inussiarnersut — isumaqatigiinniarneq, isummatigut qanillattoqatigiinneq, misiginneqataaneq isumakkeerfiginninnerlu — sanngiissutsimut ersiutitut isigineqarajupput.“ Pissutsilli tamakku nakuussutsimut ersiutaapput, nakuuserusuummertarnitsinnillu nununninniarnitsinni pisariaqarput.

Paulusip kristumiunngorami isummakkut assigiinngissutit ajunnginnerusumik periaaseqarluni iliuuseqarfiginissaat Biibili ikiortigalugu ilikkarpaa. Juutiussutsimik ilinniarsimasuugami Paulusip Allakkat Hebriiarisuut ilisimasaqarfigilluarpai. Taamaattumik allassimaffiit soorlu makku ilisimasimassavai: „Nakuusersoq sinngageqinagu iluatsitsisarnera pillugu, tumai atuallanniaqinagit.“ „Silatusaarneq iluaqusiinerusarpoq sorsullaqqissuunermit; imminut naalakkersinnaaneq pingaarneruvoq illoqarfimmik tiguaanermit.“ „Illoqarfittut aserukkatut qarmaajakkatut ippoq angut imminut naalakkersinnaassuseqanngitsoq.“ (Ussatit 3:31; 16:32; 25:28) Allassimaffiilli tamakku Paulusip kristumiunngornini sioqqullugu kristumiunut nakuusernaveersaassutigisimanngilai. (Galâsiamiut 1:13, 14) Kristumiunngoreernerminili sumit killinneqarluni akerleriissutit kissaammernartut aaqqinniarlugit nakuuserneq atorunnaarlugu silatusaartumik iliuuseqartalerpa?

Paulusip nammineq tamatuminnga tikkuuppaatigut ima oqarami: ’ Malinniarsinga soorlu uangattaaq Kristus malinniariga.’ (1 Korintumiut 11:1) Jesus Kristusip pilluni iliuuserisimasai assut pingaartippai. (1 Timûtiuse 1:13, 14) Paulusip Kristus malilersimavaa. Nalunngilaa inuiaat ajortillit pillugit Jesus qanoq naalliussimatigisoq. (Eprîarit 2:18; 5:8-10) Paulusip uppernarsarsinnaasimavaa Esajasip Messias pillugu siulittuutaa manna Jesusikkut eqquussimasoq: „Naalliutsitaanini nipaalluni atorpaa qarni ammarnagu, savaaqqatut toqukkiartorneqartutut, savatut kissagaatilluni nilliallanngitsutut qarluallanngilaq.“ (Jesaja 53:7) Apustililu Peter ima allassimavoq: ’ Taanna [Jesus] oqagaagami oqarninngilaq, anniarami sioorasaarinngilaq, eqqartuussilluartumulli peqquaa.’ — 1 Pîtruse 2:23, 24.

Jesus Kristusip pissutsinik ilungersornartunik iliuuseqarfiginneriaasianik pingaartitsinini Paulusip allanngornissaminut killinneqaatigaa. Uppeqatini ima oqaaqqissaarsimavai: ’ Immissinnut unnerluutissaqaraluarussi kamageqatigiillusi isumakkeerfigeqatigiigitsi; soorlu Kristusip isumakkeerfigigaasi, taamattaaq ilissi pigitsi.’ (Kulorsamiut 3:13) Nakuusernaveersaarnissap paasinissaannaa naammanngilaq. Jehovap Jesus Kristusillu uagutsinnut iliuuserisimasaannik pingaartitsineq nakuuseriartarnernik qaangiiniarnissamut piumassuseqalersitsisinnaavoq.

Tamanna ajornanngila?

Angut Japanimiu tamatuminnga assut atorfissaqartitsisimavoq. Taassuma ataataa sakkutuujusimasoq puffajasuusorlu nakuusertarsimavoq ilaqutariinnik naalagarsiortitsilluni. Nakuuserfigineqartarami anaananilu naalliuttoq isigisaramiuk angut taanna nakuuserniartalersimavoq. Samurait savissui marluk assigiinngitsunik takissusillit nassatarisarpai ajornartorsiuleraangami inunnilluunniit sioorasaariniaraangami atortakkani.

Nuliani Biibilimik atuaqqissaartalermat ilumoorutinngikkaluarlugu ilaaqquffigaa. Naqitaaraq nâlagauvfik pivdlugo nalunaerut nuánersoĸ mánaa atuartillugu angut allanngoriartulerpoq. Sooq? „’ Jesus Kristus’-imik aamma ’ Utertitsissut’-mik qulequtallit atuaratsigik kanngutseqaanga,“ angut oqaluttuarpoq. „Naak namminissarsiortuugaluarlunga ilakkuminartitannut inussiarnisaarumasarpunga. Kammalaatikka nuannaartissallugit nuannarisarpara, aatsaalli nammineq inuuninnut sunniuteqassanngikkaangat. Paasilerparali Guutip ernera, Jesus, inuiaat, ilaatigut inuit uattut ittut, pillugit inuunermi iperarnissaanut piumassuseqarsimasoq. Tupigusungaarama anaattamik anaaneqarsimasutut soriarsinnaajunnaartutut misigaanga.“

Angutip kammalaatigisimasani ilagisarunnaarpai sivitsunngitsorlu Jehovap Nalunaajaasuisa ilagiivini Teokratiimik Atuarfimmut ilanngulluni. Atuarfimmi tassani inunnik allanik Biibilimik ilinniartitsinissaq ilinniarneqartarpoq. Angutip ilinniartitaanini tamanna assorsuaq iluaqutigaa, imalu oqaluttuarpoq: „Inuusuttuugallarama misigissutsikka inunnut allanut oqaatigisinnaaneq ajorakkit sioorasaarisarlungalu nakuusernermut saaginnartarpunga. Eqqarsaatima inunnut allanut oqaluttuarinissaat ilikkariartortillugu nakuusernermut saanngikkaluarlunga oqaloqateqarsinnaaleriartorpunga.“

Angutip taassuma Paulusitut Kristusip inooriaasia malilersimavaa? Uppernera misilinneqarpoq ikinngutigisimasaata qatanngutigiinnissamik neriorsoqatigisimasaata kristumiunngoqqunagu unitsinniarsarilermagu. „Ikinngutaata“ tilluppaa Guutialu, Jehova, mitallerpaluttumik eqqartorlugu. Angut nakuuserajuttuusimasoq imminut naalakkersimaarpoq neriorsuutigisimasamilu eqqortinnginnera utoqqatsissutigalugu. ’ Qatanngutaata ’ pakatsisimalluni qimaannarpaa.

Angut puffajasuusimasoq nakuuserajuttuusimasorlu taanna nakuuserniartarnermi ajugaaffigineratigut anersaakkut qatanngutitaartorpoq angutinik arnanillu Guutimik tullerminnillu asanninnermikkut ataasiussuseqartunik. (Kulorsamiut 3:14) Ullumikkut, kristumiutut tunniulluinnarnerminit ukiut 20-nit amerlanerusut qaangiunneranni, angut Jehovap nalunaajaasuini nakkutilliisuuvoq angalasartoq. Taassumunnga nuanneqaaq Biibilimit inunnut allanut takutissinnaagamiuk inuit nersutitut qaasuttutut pissuseqarsimagaluartut isumaqatigiinngissutinik nakuuserneq atunngikkaluarlugu aaqqiiniarnissartik nammineq iliorsimanermisulli ilikkarsinnaagaat! Biibilimilu siulittuutip matuma eqquunnissarsuata nuannerunangaartup inunnut innersuussutigisinnaanera immikkut pisinnaatitaanertut isigaa: „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ — Jesaja 11:9.

Apustili Paulusitut angutitullu nakuuserajuttuusimasutut taassumatut illittaaq pissutsit puffaqqajaanartut ajornartorsiutillu eqqissisimasumik aaqqinnissaat ilikkarsinnaavat. Jehovap nalunaajaasuisa najukkanniittut tamatuminnga assut ikiorusuppaatsit. (wE 1/11 98)

[Quppernerup ataani ilanngussaq]

[Qupp. 5-mi issuagaq]

Paulus piviusorsiorpoq. Nalunngilaa allaat kristumiut kissaammersinnaasut.

[Qupp. 7-mi assiliartaq]

Guutip uagutsinnut iliuuserisimasaanik pingaartitsineq eqqisseqatigiinnermik pilersitsisarpoq