Ilaqutariinnut iluaqutissavik
„Amerikami ilaqutariit ajornartorsiorne- rassallugit eqqortumik oqarnerussaaq. Aappariit avittut, aappariinnerup avataani meerartaartut meeqqanillu aapparmillu pinerliinerit amerlassusiat eqqarsaatigalugit allatut isummertoqarsinnaanngilaq.“
TV-kkut oqaaseqartup Tom Brokawip oqaasii taakku nunanut amerlanernut atorneqarsinnaapput. Ajornartorsiorneq tamanna qanoq kinguneqarpa?
Ilaqutariit amerlasuutigut tassaapput inuiaqatigiit tunngavii. Ilaqutariit ajornartorsioraangata aamma inuiaqatigiit ajornartorsiortarput. Ilaqutariit tassaapputtaaq meeqqat misigissutsikkut timikkullu tapersersorneqarfissaat. Meeqqat inuunermi ilinniagassat siulliit pingaarnerpaallu ilaqutariinni ilikkartarpaat. Ilaqutariit ajornartorsiorpata meeqqat suut ilikkassavaat? Toqqissisimassappat? Inersimasutut qanoq ittunngussappat?
Piffissami ajornartorsiorfiusumi maani ilaqutariinnut iluaqutaasinnaasumik nassaassaqarpa? Aap. Ilaqutariit Guutip pilersitarai. (1 Moses 1:27, 28) Oqaatsiminilu, Biibilimi, pinngitsoorneqarsinnaanngitsunik ilaqutariinnut unnersuussuteqarpoq. (Kulorsamiut 3:18-21) Soorunami inuiaqatigiit ataatsimut allanngortissinnaanngilavut, namminerli ilaqutariinnitsinni Biibilimi unnersuussutit atorsinnaavavut. Inuit taamaaliorsimasut taamaaliornerminnilu angusaqarluarsimasut pillugit oqaluttuutilaarusuppatsigit.
Avinneq pinngitsoortinneqarsinnaavoq
Nunat ilarpassuini aappariit 50 procentii avittarput. Tamanna tassaavoq inuit attaveqatigiinneranni iluatsitsinngitsoorneq annertooq! Tamatumali kingunerisaanik kisimiillutik meeqqaminnik perorsaasariaqalersut nersortarialimmik annertuumik suliaqartarput. Amerlanersaalli isumaqataajumassapput oqarutta aappariit ajornartorsiutiminnik aaqqiisinnaagaangamik imminnullu najuinnarlutik pitsaanerusartoq.
Aappariit Salomonip Qeqertaaniittut aappariinnerat aseroqqajaasimavoq. Uia, nunaqarfimmi naalakkap ernera, nakuusertarpoq amerlasuunillu ileqqupiloqarluni. Nulia inuunermini artorsangaarami allaat imminoriaraluarpoq. Taavali uia Jehovap nalunaajaasui peqatigalugit Biibilimik atuaqqissaartalernissaminut akuersivoq. Paasivaa kialuunniit Guutimut iluarisaajumasup suup eqqunngitsuunera paasiinnarnagu aamma ’ajortoq uumigisariaqaraa’. (tugsiautit 97:10) Tamatumunnga ilaavoq sallunermik, tillinnermik, nakuusernermik imerajuttuunermillu uumiginninneq. Tamanna uummammiuliuppaa sivitsunngitsorlu ileqqupiluni peqqarniiseriartarninilu ajugaaffigalugit. Allanngornera nuliata tupigusuutigeqaa, aappariinnerallu assut ingerlallualerpoq, qujanartumik Guutip oqaasiisa sunniinerat pissutaalluni.
Afrika-kujallermi arnap Jehovamut nalunaajaasuusup tusarsimavaa sulisitsisumi uiatalu avinnissartik eqqarsaatigigaat. Nalunaajaasup naalakkani Guutip aappariinnermik isiginnittaasia pillugu oqaloqatigaa atuagarlu Ilaqutariittut pilluarneq isertugaateqarpoq-mik taaguutilik takutillugu. Atuakkami tassani, Jehovap Nalunaajaasuisa naqitigaanni, Biibilimi najoqqutassiat aappariinnermut tunngasut sammineqarput, ingammik erseqqissarneqarluni aappariit ajornartorsiutiminnik aaqqiiniarnerminni qanoq Biibili iluaqutigisinnaagaat. Sulisitsisuata uiatalu marluullutik atuagaq atuarpaat Biibilimilu unnersuussutit tassani saqqummiunneqartut ilumoorlutik malinniarsaralugit. Tamatuma kingunerisaanik aalajangerput avinniarnatik — Biibilimi najoqqutassianik atuinermikkut aamma taakkua aappariinnertik annaappaat.
Upperisaqaqatigiinnginneq
Aappariimmi upperisaqaqatigiinngitsut? Kristumiut Biibilimi piviusorsiortumik siunnersorneqarput ’kisianni Naalakkami’ katinnissamik. (1 Korintumiut 7:39) Ilaannikkulli aappaasoq allamik upperisaqalertarpoq. Tamanna avinnermik kinguneqartariaqarpa? Naamerluinnaq.
Arnaq Botswanamiu qanittukkut Jehovamut nalunaajaasunngortoq aperineqarsimavoq nutaamik upperisaqalernini qanoq allannguutigisimaneraa. Apeqqummut tamatumunnga uini akeqqusimavaa, taannalu ima oqarsimavoq: „Nuliara Jehovamut nalunaajaasunngoramili arlalippassuartigut pitsaasumik allanngortoq takusinnaavara. Maanna siornatigut pigisimanngisaminik nipaatsumik silatuumillu nakuussuseqarpoq. Pujortarunnaarnissaminut, uanga suli ajugaaffigisinnaanngisannut, nakuussuseqalerlunilu aalajangersimassuseqalerpoq. Nuliara meeqqannut uannullu, allanullumi, asanninnerulerlunilu tunniusimanerulerpoq. Akaarinninnerulerpoq, ingammik meeqqanut. Kiffartortarpoq, allat inuunerminnik pitsaanerulersitsinissaannik ikiorniarlugit. Uangattaaq ajunngitsup tungaanut allannguuteqarpunga. Isumaqarpunga tamanna nuliama maligassiuilluarneranik pissuteqarluinnartoq.“ Biibilimi najoqqutassiat aappariinnut taakkununnga ajunngitsumik sunniuteqarsimaqaat! Nalunaajaasuunngitsorpassuittaaq allat aappartik Nalunaajaasuusoq pillugu assingusunik oqaaseqarsimapput.
Ataataasup akisussaaffini sumiginnaraangagit
Ataataasup meeraasalu attaveqatigiinnerat ilaqutariinnik nukittuunik pilersitsinissamut aqqutissaavoq. Apustili Paulus ima unnersuussisimavoq: ’Ilissi [ataataasusi, NV], qitornasi narrutsatseqinasigik, paariniarsigilli perorsarlugit inertertarlugillu Jehovamit.’ (Evfisumiut 6:4) Tupinnanngitsumik atuagassiami The Wilson Quarterly-mi allaaserisami inuttut ajornartorsiuterpassuarnut ataataasut pisussaaffimminnik naammassinninngitsut pisuutinneqarput. Allaaserisami allassimavoq: „Meeqqat ataatartik najornagu inuusut 1960-ip 1990-illu akornanni marloriaatertik sinnerlugu amerleriarsimapput . . . Ataataassutsip kinguariarnera inuiaqatigiit Amerikamiut ajornartorsiutaasa aserornarnerpaat ilarpassuinut pissutaavoq.“
Tamanna ima paasisariaqarpa meeqqat ataataminnit najorneqanngitsut pinngitsooratik ingerlanerliulissasut? Naamik. Tussiaasiortoq itsaq inuusimasoq ima oqarsimavoq: „Ataatama anaanamalu qimakkaluarpannga [Jehovap] ilasiarissavaanga.“ (Tussiaat 27:10) Tamatuma ilumoornera Thailandimi nukappiaqqap qulingiluanik ukiullip paasisimavaa. Naalungiarsuulluni anaanani annaasimavaa, ataataatalu piumannginnamiuk anaanaminut tunniussimavaa. Piumaneqanngitsutut asaneqanngitsutullu misigigami nukappiaraq naalasseriitsunngorpoq meerapalaatullu ilisimaneqalerluni. Allaat aanani qunusiarisarpaa. Jehovap nalunaajaasuisa ilaasa marluk piffissaq tamaat oqaluussisartuusut malugaat nukappiaraq tamaani naalagaaffilersaarfiup silataaniikkajuttoq, ullullu ilaanni angerlarsimaffimminnut pulaarsarpaat.
Guuti pillugu oqaluttuuppaat — Taanna Ataatatut meeqqaminut asannittuusoq. Aammattaaq nunarsuarmi paratiisi Guutip inunnut aalajaatsunut neriorsuutigisaa pillugu oqaluttuuppaat. (sarĸúmersitat 21:3, 4) Tamakku tamaasa nukappiaqqap qiimmaallaatigeqai, ullullu tamaasa pulaartalerpoq suli ilikkagaqarusulluni. Nalunaajaasut nukappiaraq paasitippaat ilumut Guuti Ataatagilerusukkuniuk nukappiarapalaatut pissuseqarunnaartariaqartoq. Tamanna Paulusip Romamiunut oqaasiinut naapertuuppoq: ’Ajornanngippat sapinngisassinnik inuit tamaasa eqqissiveqatiginiarsigik.’ (Rûmamiut 12:18) Aammattaaq aanani ajunngitsumik pisariaqarpaa. (1 Timûtiuse 5:1, 2) Sivitsunngitsoq Biibilimi najoqqutassiat atulerpai — qularnanngitsumik aananilu ilaqutariittut inuunerata pitsannguutigeqisaanik. (Galâsiamiut 5:22, 23) Nukappiaqqap allanngornera saniliisa tupigusuutigingaaramikku namminneq meeqqamik Jehovap nalunaajaasui ilagalugit Biibilimik atuaqqissaartalernissaat kissaatigilerpaat!
Anersaaq eqqissinartoq
Apustili Paulus Kolossamiunut ima allassimavoq: ’Tamakkua tamarmik qaasigut atiniarsiuk asanninneq; tamanna iluarluinnassutsip nimeraa. Eqqissinerlu Kristusip pia uummatissinni ilitsersuigili.’ (Kulorsamiut 3:14, 15) Anersaaq eqqissinartoq uummammillu pisumik asaqatigiinneq pinngitsooratik ilaqutariinnik ataasiussuseqalersitsisarput. Ilaqutariinnilu avissaartuunneq sivisuumik atuussimasoq aaqqissinnaavaat. Rukiap, Albaniami najugallip, ilaqutariinni isumaqatigiinnginneq pissutigalugu aqqalussani ukiut 17-it sinnerlugit oqaloqatigisimanngilaa. Jehovap nalunaajaasui ilagalugit Biibili atuaqqissaaleramiuk paasivaa Guutimut kiffaasut tamarmik kikkunnik tamanik eqqisseqateqarnissaannik inanneqartut. ’Eqqissinissaq kajungeralugulu noqqaassutigiliuk.’ — 1 Pîtruse 3:11.
Rukiap paasivaa aqqalussani eqqisseqatiginiartariaqarlugu. Unnuaq tamaat qinuvoq, aqaguanilu uummatini kassussuataartoq aqqalussami najugaanukarpoq. Rukiap soraluaata matu ammarpaa tupaallappasillunilu aperaluni: „Tamaani suit?“ Rukia eqqissisimalluni oqarpoq aqqalussani takorusullugu, eqqisseqatigerusukkamiuk. Soorooq? Tamanna Guutip piumasarigaa paasisimagamiuk. Aqqaluaa akuersaarpoq, eqqisseqatigiinnerallu eqitaarnermik nuannaarnerullu pianik qullilinermik malunnaateqarpoq — ilaqutariit eqqisseqatigiipput Biibilimik najoqqutassiat maleruarneqarmata.
Ilagisartakkat ajortut
„Ullumikkut meeqqat agguaqatigiissillugu nalunaaquttap-akunnerini arfineq-marlunni TV-mik isiginnaartarput. Meeqqat atuarfiannik naammassinninnerminni toqutsinerit 8000-init amerlanerusut nakuusernerillu 100.000-it takoreersimassavaat.“ Atuakkami The 7 Habits of Highly Effective Families-imi (Ilaqutariinni ingerlalluartuni ileqqut arfineq-marluk) taama allassimasoqarpoq. Tamanna meeqqamut qanoq sunniuteqartarpa? Tamanna „immikkut ilisimasallit“ akunnerminni assigiinngitsunik isumaqarfigaat, Biibilimili ajortunik ilagisartagaqarneq sakkortuumik mianersoqqussutigineqarpoq. Soorlu tassani ima allassimasoqarpoq: „Silaatsup ikinngutaa ajortumeertussaasarpoq.“ (Ussatit 13:20) Aamma allassimavoq: ’Ajortut ikinngutigalugit ileqqut ajunngitsut aserortarput.’ (1 Korintumiut 15:33) Ilaqutariittut inuunerput ingerlallualersinnaavoq najoqqutassiaq tamanna silatusaarluta ilumoortutut isigilerutsigu, ilagisartakkat imaluunniit TV-kkut isiginnaartakkat eqqarsaatigalugit.
Anaanaq Luxembourgimiu Jehovap nalunaajaasuisa ilaat ilagalugu Biibilimik atuaqqissaartarpoq. Ullut ilaanni taassuma Nalunaajaasoq oqaluttuuppaa panini marluk, aappaa arfineq-marlunnik aappaalu arfineq-pingasunik ukiullit, unnukkut assut assortuullutillu kamaateqqajaasartut. Nalunaajaasoq aperivoq niviarsiaqqat unnukkut sulerisarnersut. Anaanaq oqaluttuarpoq nammineq igaffimmi eqqiaanermini niviarsiaqqat TV-mik isiginnaartartut. Sunik isiginnaartartut? „Titartakkanik,“ anaanaq akivoq. Pulaartuni oqariarmat isiginnaagassiat tamakku nakuusernertaqarajuttut, niviarsiaqqat anaanaat neriorsuivoq sunik isiginnaarnersut alapernaasissallugu.
Aqaguinnartoq anaanaq oqarpoq titartakkat panimmi isiginnaagaat assut annilaarutisigimallugit. Isiginnaagaasagooq ilagaat uumasorujuit silaannarsuarmeersut kamaqalutik aqqusaakkaminnik tamanik aserorterisut. Panini nassuiaappai Jehovap nakuuserneq uumigigaa peqqarniisertunillu tamakkuninnga isiginnaaraangatta iluarineq ajoraa. (Tussiaat 11:5) Niviarsiaqqat Jehovap iluarisaanik iliorusukkamik TV-mik isiginnaarnatik titartaaqquneqaramik akuersipput. Sivitsunngitsoq kamaateqqajaasarnerat qaangiuppoq, ilaqutariinnilu anersaaq pitsaanerulerpoq.
Biibilimi najoqqutassianik maleruaanikkut ilaqutariittut inuunerup pitsaanerulersinnaaneranut assersuutissaminiinnannguit saqqummiutereerpavut. Biibilimi unnersuussutit pissutsinut sunulluunniit atuupput. Unnersuussutit tutsuiginartuupput ajunngitsumillu kimittuumik sunniisarlutik. (Eprîarit 4:12) Inuit Biibilimik atuaqqissaaleraangamik tassanilu allassimasunik ilumoorlutik maleruaaniarsarileraangamik inuttut pissuserinnerulertarput, ilaqutariittullu inuunerat nukittuunngortarpoq kukkuluttornerillu pinngitsoortinneqartarlutik. Allaat ilaqutariinni ataasiinnaq Guutip unnersuussutaanik maleruaaleraangat pissutsit pitsanngortarput. Ilumut Guutip oqaasii inuunermi sutigut tamatigut tussiaasiortutut ima allassimasutut isigisariaqarpavut: „Oqaatsisit naneruaraakka isikkannut, qaammaqqutigalugillu aqqutinni.“ — Tussiaat 119:105. (wE 1/1 99)
[Qupp. 5-mi assiliartaq]
Biibilimi najoqqutassianik atuinikkut ilaqutariinni ajornartorsiutit aaqqinneqartarput