Qinnutitit „pilliutip pujuatut“ ippat?
„Qinnutiga ilinnut anngulli pilliutip pujuatut.“ — TUSSIAAT 141:2.
1, 2. Tipigissaatilliisarneq sumut assersuutaava?
JEHOVA GUUTIP pruffiitini Moses tipigissaatilioqqusimavaa illernartumik Israelimi tupiusaliami atorneqartussamik. Tipigissaatiliornermut najoqqutassaq Guutimeersoq naapertorlugu tipigissut assigiinngitsut sisamat atorneqassapput. (2 Moses 30:34-38) Qularnanngitsumik tipigissorujussuusimassapput.
2 Inatsisit tunngavigalugit Israelikkunnut angeruseq naapertorlugu ullut tamaasa tipigissaatilliineqartassaaq. (2 Moses 30:7, 8) Tipigissaatilliineq immikkut isumaqarpa? Aap, tussiaasiortormi ima erinarsorpoq: „Qinnutiga ilinnut anngulli pilliutip pujuatut, assakkalu isaassimasut unnukkut pilliutitut.“ (Tussiaat 141:2) sarĸúmersitat-ni apustili Johannesip allaatigai Guutip qilammi issiavissaarsuata saani qeqartut puuguttanik guultiusunik tipigissaatinik ulikkaartunik tigumiartut. Allaatigisap isumassarsiarititaasup ima nassuiarpai: ’Tassa iluartut qinnutaat.’ (sarĸúmersitat 5:8) Taamaattumik naamajuminartumik tipigissaatilliineq Jehovap kiffaasa ullukkullu unnuakkullu iluarisaasumik qinnutaannut assersuutaavoq. — 1 Tásalûníkamiut 3:10; Eprîarit 5:7.
3. Suup ikiorsinnaavaatigut ’Guutimut tipigissaatilliinertut ittunik qinunissatsinnut’?
3 Qinnutivut Guutimut akuerisaassappata Jesus Kristusip aqqani qinnuigisariaqarparput. (Juánase 16:23, 24) Qanorli ililluta qinnutivut pitsaanerulersissinnaavavut? Maligassiuisut ilaat Biibilimi allaatigineqartut eqqarsaatigigutsigik qinnutivut Jehovamut tipigissaatilliinertut itsinniarnerannut iluaqutigisinnaassavarput. — Ussatit 15:8.
Upperluni qinuneq
4. Qinnutit Guutimut akuerisaasut qanoq ilillutik uppernermut attuumassuteqarpat?
4 Qinnutivut tipigissaatitut naamajuminartutut Guutimut anngutissappata upperluta qinusariaqarpugut. (Eprîarit 11:6) Inuup anersaakkut napparsimasup kristumiut utoqqaanertat Biibili tunngavigalugu ikiuiniarnerat ilassiguniuk ’upperlutik qinnutaatigut’ napparsimasoq taanna ’annassavoq’, tassa anersaakkut ajorunnaassaaq. (Jâko 5:15) Upperluta qinnutivut Ataatatta qilammiusup iluarisarpai, soorluttaaq qinunikkut Guutip oqaasianik atuaqqissaarnerput iluarisaraa. Tussiaasiortup pitsaasumik isumaqarnini ersersippaa ima erinarsorami: „Peqqussutinnut isaatissavakka assakka ileqqoreqqusatillu eqqarsaatigilluassallugit. Siuneqassusermik ilisimassusermillu tuninnga, peqqussutitit tatigigakkit.“ (Tussiaat 119:48, 66) Uaguttaaq maniguuttumik qinulluta ’assavut isaanniartigik’ Guutillu peqqussutaasa maleruarneratigut uppernerput ersersillugu.
5. Ilisimassummik amigaateqarutta qanoq iliortariaqarpugut?
5 Immaqa misilinneqarnerup aalajangersimasup anigornissaanut ilisimassummik amigaateqarpugut. Imaluunniit Biibilip siulittuutaasa ilaat ullumikkut ilumut eqquukkiartornersoq qulakkiivissimanngilarput. Tamakku anersaakkut eqqissiunnaarutigiumanagit ilisimassummik qinusariaqarpugut. (Galâsiamiut 5:7, 8; Jâko 1:5-8) Soorunami ilimagisinnaanngilarput Guutip maluginiarnartumik akissagaatigut. Qinunikkut ilumoorussinerput takutittariaqarparput Guutip kiffaminut tamanut piumasaqaataasa maleruarneratigut. Atuagassiat Biibililersaarutit ’kiffap ilumoorlunilu silatuup’ pilersittagai ikiortigalugit Biibili atuaqqissaartariaqarparput uppernikkut nakussatsinneqaqqulluta. (Matîuse 24:45-47; Josva 1:7, 8) Aamma Guutip innuttaasa ataatsimiittarneri aalajangersimasumik peqataaffigisarnerisigut ilisimasavut annertusartariaqarpavut. — Eprîarit 10:24, 25.
6. (a) Piffissaq inuuffigisarput Biibilillu siulittuutaasa eqquukkiartornerat eqqarsaatigalugit tamatta suna paasisariaqarparput? (b) Jehovap aqqata illernarsisinneqarnissaata qinnutiginerata saniatigut qanoq iliortariaqarpugut?
6 Ullumikkut kristumiut ilaasa soqutigisat imminut tunngasut atorfeqarnikkullu qaffakkiartorneq ulapputigaat ’naggatissap nalliutingajalernerani’ inuusugut paasisimalluarunnaarsimagunarlugu. (Daniel 12:4) Naleqqulluartumik qinnutigisinnaavarput qatanngutit taakkua Biibilip makkununnga uppernarsaataanut uppernerata uummarissarneqarnissaa: Kristusip najuunnera 1914-imi aallartittoq Jehovamit qilammi kunngitut ivertinneqarami, maannalu akeqqami akornanni naalakkersuilluni. (Tussiaat 110:1, 2; Matîuse 24:3) Tamatta paasisariaqarparput pisussat siulittuutigineqarsimasut, soorlu eqqunngitsumik upperisarsiornerup, ’Babylonip Angisuup’ aserorneqarnissaa, Satanip Gogitut Magogimeersutut Jehovap innuttaanut saassussinissaa, aamma sorsunnissami Harmagedonimi Guutip Ajugaqanngitsup taakku aniguisinniarlugit akuliunnissaa, tassanngaannartumik pisinnaasut piffissallu sivikitsup iluani pisinnaallutik. (sarĸúmersitat 16:14, 16; 18:1-5; Hesekiel 38:18-23) Taamaattumik Guuti qinnuigisariaqarparput ikioqqulluta anersaakkut eqqumajuarsinnaaqqulluta. Tamatta ilungersorluta Jehovap aqqata illernarsisinneqarnissaa, Naalagaaffiata tikiunnissaa, piumasaatalu qilammisut nunamissaaq pinissaa qinnutigisariaqarpavut. Aap, qanortoq uppernermik ersersitsiuarta taamaalilluta takutillugu qinnutivut ilumoorukkivut. (Matîuse 6:9, 10) Neriuutigaarput Jehovamik asannittut tamarmik taassuma naalagaaffia naapertuilluassusialu salliutissagaat naggatissarlu nalliutsinnagu nutaarsiassamik nuannersumik oqaluussinermut sapinngisamik annerpaamik peqataassasut. — Matîuse 6:33; 24:14.
Jehova unnersiutigiuk qutsavigalugulu
7. 1 Israelikkut 29:10-13-imi Davidip qinnutaanik atuarnerit qanoq sunnerneqaatigaajuk?
7 Qinnutivut ’pilliutip pujuatut’ issinnaapput ingammik uummatikkut iluunngarluta Guuti unnersiutigalugulu qutsavigisarutsigu. Kunngi David taama ittumik qinnuteqarpoq nammineq Israelikkullu Jehovap naalaffissaata sananeqarnissaanut atortussanik tunissuteqaramik. David ima qinuvoq: „Unnersiutigineqarna illit [Jehova] siuaasatta Israelip Guutia naassaanngitsumit naassaanngitsumut. [Jehova], illit pigaatit angingaassuseq, pissaaneq, naalannassuseq, ataqqinassuseq qutsinnerussuserlu; tassami qilammiittut nunamiittullu tamaasa pigaatit, [Jehova]. Illit pigaat naalagaaffik, illimmi naalagaanersuullutit suut tamaasa sapigarinngilatit. Pisuussutit ataqqinaallu ilinnit pisuupput, suullu tamaasa illit aalajangertarpatit. Pissaaneqarputit angisuunngortikkumasat pissaaneqalersikkumasallu nukissaanik nakuussusissaanillu tunissallugu. Guuterput, taamaattumik maanna qutsavigiumavatsigit atillu illernartoq unnersiutigalugu.“ — 1 Israelikkut 29:10-13.
8. (a) Tussiaatit 148-mit 150-imut atuaraanni ingammik suna uummatikkut killitsinnartuua? (b) Tussiaat 27:4-mi allaatigineqartutut misigigutta qanoq iliortariaqarpugut?
8 Qinnummi tamatumani unnersiutiginninneq qujamasunnerlu kusanartumik ersersinneqarput. Immaqa qinnutivut taama oqaasertarissaartigisanngikkaluarput, kisianni taama ilumoortigisinnaapput. Tussiaatit Biibilimiittut qinnutinik qujaniutinik unnersiutiginnissutinillu ulikkaarput. Assersuutigalugu Tussiaatini 148-mit 150-imut Guuti kusanartumik unnersiutigineqarpoq. Aamma Guutimut qujamasunneq tussiaatini amerlasuuni ersersinneqarpoq. David ima tussiaasiorsimavoq: „Manna kisiat [Jehovamit] qinnutigaara, ataaseq piumaqaara: Ineqarumallunga [Jehovap] illuani inuunera tamaat, misigisinnaajumallugu [Jehovap] alutornassusia, akissutisiffigiumallugulu naalaffiutaani.“ (Tussiaat 27:4) Tamatta qinnutit taamaattut naapertorlugit iliuuseqarta Jehovap ilagiissortaasa sammisartagaannut tamanut aallussilluarluta peqataalluta. (Tussiaat 26:12) Taamaaliorutta ullullu tamaasa Guutip oqaasia eqqarsaatigeqqissaartarutsigu pissutissaqarluassaagut Jehova uummammit pisumik unnersiutigissallugu qutsavigissallugulu.
Maniguullutit Jehovamut ikiortissarsiorit
9. Kunngi Asap suna qinnutigisimavaa, qanorlu kinguneqartumik?
9 Jehova nalunaajaasuisut uummatikkut iluunngarluta kiffartuukkutsigu qularinngissinnaavarput ikioqqulluta qinnutivut tusassagai. (Jesaja 43:10-12) Judakkut kunngiat Asa eqqarsaatigiuk. Ukiuni 41-ni (977-937 u.n.s.) kunngiuffigisaani ukiut qulit siulliit eqqissisimaffiupput. Taavali sakkutuunit 1 millioninit Etiopiamiumit Seramit siulersorneqartunit Judakkut nunaat saassunneqarpoq. Naak taakkunannga ikinnerugaluaqalutik Asa sakkutuuilu sorsukkiartorput. Sorsutsinnatilli Asa qamannga pisumik qinuvoq. Nalunngilaa Jehova aniguisitsisinnaasoq, ikioqqullunilu ima qinuvoq: „Ikiortigut illit tassaagavit tunaarisarput, illillu atikkut uku sakkutoorpassuit pissarsuit sorsuffiginialeratsigit. [Jehova], illit Guutigaatsigit. Takutiguk inoqanngimmat ilinnik sapersisitsisinnaasumik!“ Jehovap atini angisooq pillugu aniguisimmatik Judakkut ajugaarujussuarput. (2 Israelikkut 14:1-15) Misilinneqarnermit Guutip aniguisikkaluarpatigut imaluunniit misilinneqarnitta naammagittarluta atornissaanut nakussatsikkaluarpatigut qularisariaqanngilarput ikioqqulluta qinnutivut tusarai.
10. Ajornartorsiuteqarnitsinni qanoq iliortariaqarnerluta nalugutsigu kunngi Josafatip qinnutaa qanoq iluaqutigisinnaavarput?
10 Ajornartorsiut aalajangersimasoq qanoq iliuuseqarfigissallugu nalugutsigu, tatigisinnaavarput Jehovap ikioqqulluta qinnutivut tusassagai. Tamanna erseqqissarneqarpoq Judakkut kunngiata Josafatip nalaani. Taanna ukioq 936 u.n.s. aallarnerfigalugu ukiuni 25-ni kunngiuvoq. Moabikkut, Ammonikkut Seirillu qaqqalittaaneersut Judakkut saassunnialermatigik, Josafat ima qinuvoq: „[Jehova] Guuterput, tamanna pillugu pillakkit. Sakkutoorpassuit saassussisut akiussallugit uagut naammattumik pissaaneqanngilagut. Naluarput qanoq iliussalluta, isivulli ilinnut sammipput.“ Maniguulluni qinnut tamanna Jehovap akivaa, Judakkut iluaqutissaannik sorsulluni akerarpassuit paatsiveerutsillugit taakkua imminnut toqoraannerannik kinguneqartumik. Tamanna pissutigalugu inuiaqatigiit eqqaanniittut annilaartinneqarput, Judakkullu eqqissillutik inuulerput. (2 Israelikkut 20:1-30) Uagut ajornartorsiorluinnarfitsinni ilisimassummik amigaateqaraangatta Josafatitut ima qinusinnaavugut: ’Naluarput qanoq iliussalluta, isivulli ilinnut sammipput, Jehova.’ Anersaap illernartup sunnersinnaavaatigut Biibilimit allassimaffinnik ajornartorsiutip aaqqinneqarnissaanut iluaqutaasinnaasunik eqqaasilluta, imaluunniit inuit takorloorsimanngisaannik Guutip ikiorsinnaavaatigut. — Rûmamiut 8:26, 27.
11. Nehemiasip Jerusalemip qarmai eqqarsaatigalugit iliorsimanera qinusarneq pillugu qanoq ilinniutigisinnaavarput?
11 Guutimit ikiorneqarumalluta immaqa kipisuitsumik qinusariaqarpugut. Nehemias ulluni arlalinni aliasullunilu, qiallunilu iisinnginniarlunilu qinujuarsimavoq Jerusalemip qarmai aserorsimasut Judakkullu artornartunik atugaqarnerat pillugit. (Nehemja 1:1-11) Ersarippoq qinnutai tipigissaatilliinertut Guutimut anngussimasut. Ullut ilaanni Persiamiut kunngiata Artaxerxesip Nehemias nikallungasoq aperaa: „Suna kissaatigaajuk?“ Nehemias ima oqaluttuarpoq: „Taava qilaap Guutianut qinuvunga.“ Naatsumik nipaatsumillu qinnutaa akineqarpoq, Nehemiasip kissaatini pivaa Jerusalemiliarsinnaanngorlunilu qarmai aserorsimasut iluarsaakkiartorlugit. — Nehemja 2:1-8.
Qinuneq Jesusimit ilinniaruk
12. Nammineq oqaatsitit atorlugit Jesusip qinnutaani najoqqutassaasumi pingaarnerit qanoq oqaatigisinnaavigit?
12 Qinnutit Biibilimi allanneqarsimasut tamaasa eqqarsaatigalugit pingaartumik ’Ataatarpooq’ Jesusip qinnutaa tipigissaatilliinertut ippoq. îvangkîlio Lúkarsip agdlagâ-ni ima allassimasoqarpoq: ’[Jesusip] ajoqersugaasa ilaata oqarfigaa: „Naalagaq, ajoqersortigut qanoq qinussasugut, soorluttaaq Johannesip ajoqersukkani ajoqersorai.“ Taava oqarfigai: „Qinusaraangassi ima oqartassaasi: ’Ataataq, aqqit illernarsili; naalagaaffiit tikiulli; inuutissatsinnik ullut tamaasa tunisigut; ajortitsinnillu isumakkeerfigitigut, uaguttaaq akiitsortivut tamaasa isumakeerfigigatsigik; ussernartumullu pisinnata.’“’ (Lúkarse 11:1-4; Matîuse 6:9-13) Qinnut tamanna, uteqattaagassaanngitsoq qinunerli pillugu ilitsersuutaasoq, misissoqqissaariartigu.
13. ’Ataataq, aqqit illernarsili’ qanoq paasisariaqarpa?
13 ’Ataataq, aqqit illernarsili.’ Jehovap kiffaasa tunniulluinnarsimasut immikkut pisinnaatitaaffigalugu Jehova Ataataminnik taasinnaavaat. Meeqqat qanorluunniit oqaasissaqaraluarunik nangaanatik ataataminnut naakkinnittumut saaffiginnittut assigalugit akuttunngitsumik ataqqinnilluta Guuti qinnuigisariaqarparput. (Tussiaat 103:13, 14) Qinnutitta ersersittariaqarpaat Jehovap aqqata illernarsisinneqarnissaa pingaartikkipput, mitaatigineqarsimanermillu minguiarneqarnissaa erinigalugu. Kissaatigaarput Jehovap aqqa qutsissisinneqassasoq immikkullu ittutut illernartutullu isigineqassasoq. — Tussiaat 5:12; 63:4, 5; 148:12, 13; Hesekiel 38:23.
14. Ima qinugaangatta: ’Naalagaaffiit tikiulli’ qanoq isumaqarpa?
14 ’Naalagaaffiit tikiulli.’ Naalagaaffik tamanna tassaavoq Jehovap naalakkersuinera ernerata Jesusip taassumalu naalakkersueqataasa, ’Qutsinnerussaartup illernartortaasa’, naalagaaffiat Messiasikkoortoq qilammiittoq aqqutigalugu. (Daniel 7:13, 14, 18, 27; sarĸúmersitat 20:6) Naalagaaffik tamanna qanittukkut ’tikiutissaaq’, tassa akulitiussalluni nunarsuarmi Guutip kisimi oqartussaaneranut assortuisut tamaasa piissallugit. (Daniel 2:44) Taava Guutip piumasaa qilammisut nunarsuarmi pissaaq. (Matîuse 6:10) Qilammi nunarsuarmilu kisimi Oqartussaasumik ilumoorlutik kiffaasut tamarmik tamanna nuannaarutigingaassavaat.
15. ’Inuutissatsinnik ullut tamaasa tunineqaqqulluni’ qinuneq qanoq paasisariaqarpa?
15 ’Inuutissatsinnik ullut tamaasa tunisigut.’ ’Ullut tamaasa’, imaluunniit Ny Verden-Oversættelsen naapertorlugu ’ullormut’, inuutissatsinnik Jehova qinnuigigutsigu isumaqanngilaq sinnilimmik qinusugut, ullormulli pisariaqartitatsinnik qinusugut. Tatigaarput Guutip pisariaqartitatsinnik isumagissagaatigut, periarfissavut naleqquttut atorlugit nerisassanik pisariaqartitanillu allanik pissarsiuutigaluta. (2 Tásalûníkamiut 3:7-10) Soorunami Pilersuisorput qilammiusoq qutsavigisariaqarparput taassuma asanninnerata, ilisimassusiata pissaaneratalu pisariaqartitatta matunissaannik periarfissimmatigut. — apustilit suliait 14:15-17.
16. Qanoq ililluta Jehovamit isumakkeerfigineqarsinnaavugut?
16 ’Ajortitsinnillu isumakkeerfigitigut, uaguttaaq akiitsortivut tamaasa isumakeerfigigatsigik.’ Naammalluinnanngitsuullutalu ajortiliugatta Jehovap najoqqutassiai naammalluinnartut maleqqissaarsinnaanngilavut. Taamaattumik Jesusip utertitsissutitut pilliutaa tunngavigalugu isumakkeerfigineqarnissatsinnik qinnuigisariaqarparput. Kissaatigigutsiguli ’qinnutitsinnik tusartartup’ pilliutip tamatuma nalinga iluaqutissatsinnut atussagaa, allamik isumataarnissatsinnut perorsaatissinneqarnermillu ilassinninnissatsinnut piumassuseqartariaqarpugut. (Tussiaat 65:3; Rûmamiut 5:8; 6:23; Eprîarit 12:4-11) Aamma Jehovamit isumakkeerfigineqarnissarput ilimagisinnaavarput aatsaat nammineq ’akiitsortivut’, tassa uagutsinnut ajortuliorsimasut, ’isumakkeerfigigutsigik’. — Matîuse 6:12, 14, 15.
17. Oqaatsit ’ussernartumut pisinnata’ qanoq isumaqarpat?
17 ’Ussernartumullu pisinnata.’ Biibilimi ilaannikkut Jehovap akuerisimasai iliuuserisimasaatut oqaatigineqartarput. (Rut 1:20, 21) Guutip ajortuliornissamut usserneq ajorpaatigut. (Jâko 1:13) Ajortuliornissamut ussernartorsiornerit Diaavulumit, uinitsinnit ajortiliusumit imaluunniit silarsuarmit inuuffigisatsinnit pisarput. Satanip, Ussiisup, Guutimut ajortuliortinniarsaraatigut. (Matîuse 4:3; 1 Tásalûníkamiut 3:5) Taamaattumik ima qinugaangatta: ’Ussernartumut pisinnata’, Guuti qinnuigisarparput taassumunnga naalannginnissamut usserniarneqarutta nakkaannannginnissatsinnik. Taassuma unnersuussinnaavaatigut ussernartumut nakkaannaqqunata Satanimillu ’ajortoq’-mik taaneqartumit tammartinneqaqqunata. — Matîuse 6:13; 1 Korintumiut 10:13.
Qinnutivut naapertorlugit iliuuseqartariaqarpugut
18. Qanoq ililluta aappariittut ilaqutariittullu pilluarluni inuunissamik qinnutivut naapertorlugit iliuuseqarsinnaavugut?
18 Jesusip qinnutaani najoqqutassaasumi assigiinngitsut pingaaruteqartut eqqaaneqarput, soqutigisatsinnilli tamanik qinusinnaavugut. Immaqa aappariittut pilluarluta inuunissaq imaluunniit minguitsuulluta aappanissinnaajumalluta imminut naalakkersinnaanissaq pillugu qinuvugut. Taamaappalli aamma qinnutivut naapertorlugit iliuuseqartariaqarpugut atuagassiallu aliikkutassiallu kanngunartunik imallit ingalassimasariaqarlugit. Aamma aalajangiusimasariaqarparput ’Naalakkamiinnaq’ aappaninnissarput. (1 Korintumiut 7:39; 5 Moses 7:3, 4) Katissimasut pilluarnissamik qinnutitik naapertorlugit inuusariaqarput Guutip unnersuussutaasa maleruarneratigut. Meeraqaruttalu taakkua Jehovamut ilumoorlutik kiffanngornissaannik qinusarneq naammanngilaq. Sapinngisamik iliuuseqartariaqarpugut Guutip sallusuissutaa isumaannut pigiliutsinniarlugu Biibilimik atuaqqissaartarnikkut ilagalugillu aalajaalluta kristumiut ataatsimiittarnerinut najuuttarnikkut. — 5 Moses 6:5-9; 31:12; Ussatit 22:6.
19. Oqaluussisarnitsinnut tunngatillugu Jehova arlaannik qinnuigigutsigu qanoq iliortariaqarpugut?
19 Immaqa oqaluussinermi angusaqarluarnissarput qinnutigaarput. Taamaappat qinnutit tamakku naapertorlugit iliuuseqartariaqarpugut oqaluussinermut siunertaqarluartumik peqataasarnitsigut. Allat inuunerup aqqutaagut ingerlalernissaannik ikiorumallugit qinnuteqarutta eqqortumik allattuisariaqarpugut pilersaarutivullu allanngortissinnaasariaqarlugit Biibilimik atuaqqissaaqateqalernissamut piffissaqarumalluta. Pioneeritut kiffartulerusukkutta qinnutivut naapertorlugit iliuuseqartariaqarpugut oqaluussinermi suliniuteqarnerulernitsigut pioneerillu suleqatigisarnerisigut. Taamaalilluta takutissinnaavarput qinnutivut naapertorlugit iliuuseqarluta.
20. Allaaserisami tulliuttumi suna misissussavarput?
20 Jehova ilumoorluta kiffartuukkutsigu qularinngissinnaavarput qinnutivut akissagai piumasaa naapertorlugu qinugutta. (1 Juánase 5:14, 15) Qinnutit Biibilimi allanneqarsimasut ilaannik misissuineq iluaqutaaqaaq. Allaaserisami tulliuttumi misissussavavut Biibilimi unnersuussutit allat ’Jehovamut tipigissaalliinertut ittunik qinusut’ iluaqutigisinnaasaat. (wE 15/1 99)
Uteqqiinissamut apeqqutit
□ Sooq upperluta qinusariaqarpugut?
□ Qujaneq unnersiutiginninnerlu qinunitsinni qanoq inissisimassappat?
□ Sooq tatiginnilluinnarluta Jehova ikioqqulluta qinnuigisinnaavarput?
□ Qinnummi najoqqutassaasumi pingaarnerusut ilaat eqqaakkit.
□ Qanoq ililluta qinnutivut naapertorlugit iliuuseqarsinnaavugut?
[Qupp. 12-imi assiliartaq]
Kunngi Josafatitut uaguttaaq ilaannikkut ima qinusariaqalersinnaavugut: ’Naluarput qanoq iliussalluta, isivulli ilinnut sammipput, Jehova’
[Qupp. 13-imi assiliartaq]
Jesusip qinnutaa najoqqutassaasoq naapertorlugu qinusarpit?