Anersaakkut sanngiissutit qanoq ililluni paasineqarsinnaasut qanorlu qaangerneqarsinnaasut
GRIIKERIT UPPERISAAT NAAPERTORLUGU TROJAMUT SORSUNNERMI Akilles Griikerit sorsuttartuisa sapiinnersaraat. Oqaluttualiami oqaluttuarineqarpoq Akilles naalungiarsuusoq arnaata kuummut Styximut misukkaa, taamaalilluni ikilerneqarsinnaajunnaarsillugu, kimmia arnaata tigummiffia kisiat pinnagu. Sapiitsorsuarlu tassuunarpiaq Parisip, Trojap kunngiata Priamosip ernerata, qarsuanik eqqorneqarpoq toqullunilu. Taamanerniilli oqariartaaseq „Akillesip kimmia“ sanngiiffigisamik isumaqartinneqalerpoq.
Kristusip sakkutuuisut kristumiut anersaakkut ittumik sorsunnermut peqataapput. (2 Timûtiuse 2:3) Tamanna pillugu apustili Paulus allappoq: ’Aak uinillu paaniagassarinngilagut, siulersuisulli naalakkersuisullu taarsuullu matuma pissaanilissui anersaallu ajortut qilaap ataani.’ Aap, Satan Diaavulu anersaapiluillu akeraraavut. — Evfisumiut 6:12.
Nalunanngilluinnartumik Jehova Guutimit, allassimaffimmi ataatsimi ’sorsuttartutut pissarsuartut’ taaneqartumit, tapersersorneqanngikkaluarutta naligiinngilluinnartumik nunarsuarmi akiuuttoqassagaluarpoq. (2 Moses 15:3) Anersaakkut sakkutuussutit Paulusip atoqqullugit kajumissaarutigisimasai akeqqatsinnut peqqusersusaartunut illersuutissatut pisimavavut: ’Sakkutuussutit tamaasa Guutip pii atiniarsigik Diaavulup qoqassiniaraangasi aalajaassinnaaqqullusi.’ — Evfisumiut 6:11.
Sakkutuussutit taakkua Jehova Guutimit pisavut pitsaanerpaapput. Anersaakkut saassussinerit suulluunniit sunniuteqarneri millisissinnaavai. Tamanna paasissavarput sakkutuussutit immikkoortui misissorutsigik: Ilumoornerup qiterutaa, iluarnerup saattuaasaa, isikkakkut kamissimalluni iivanngkiiliumik eqqissinartumik, uppernerup eqqornaveeqqutaa, annassutip niaqorornaveeqqutaa panarlu anersaap pia. Sakkutuussutinik pitsaanerusoqarnerpa? Sakkutuussutit taakkua atorlugit kristumiup sakkutuup akeqqap siooranangaarsinnaagaluartup kialuunniit ajugaaffiginissaanut periarfissaqarluarpoq. — Evfisumiut 6:13-17.
Naak anersaakkut sakkutuussutit Jehovameersut pitsaanerpaagaluartut toqqissisimatikkaluaraatigullu, Akillesitut ikilerneqarsinnaanngilluinnartutut isumaqassanngilagut. Anersaakkut ittumik sanngiiffeqarsinnaavugut Akillesitut kimmeqarluta? Terlinganeerilluni saassussinerup inuunerput navianartorsiortissinnaavaa?
Anersaakkut sakkutuussutitit misissukkit
Olympiademi sukuutsernermi marloriarluni ajugaasimasoq peqqilluinnartuusorinarsimasoq sungiusarluni tassanngaannaq uppilluni toquvoq. Tamatuma kingunitsianngua The New York Times eqqarsarnartumik ima paasissutissiivoq: „Ukiumut Amerikamiut 600.000-t uummamminnik unittoortartut affaat siumoortumik malunnaateqartarsimanngillat.“ Imaappoq qanoq peqqitsiginerput qanoq misiginitsigut nalilersinnaanngilarput.
Anersaakkut peqqissusitsinni aamma taamaappoq. Biibilimi siunnersuutit ilaat imaappoq: ’Kinaluunniit qeqartuusorisoq mianersorli orloqqunani.’ (1 Korintumiut 10:12) Anersaakkut sakkutuussutitsinnit pitsaanerusoqanngilaq, sanngiillisinnaappulli. Ajortilittut inunngorsimanerput pissutaalluni, ajortulioqqajaanitta naammalluinnanngitsuunittalu Guutip piumasaatut iliorniarluta aalajangersimanerput atorunnaarseriaannaavaa. (Tussiaat 51:7) Ajunngitsumik siunertaqaraluarluta uummatitta tatigisassaanngitsup napitinnartunik eqqarsartitsinermigut utoqqatsissutissarsiornermigullu sanngiissutitsinnik takunninngitsoortissinnaavaatigut sunalu tamarmi ajunngitsutut isikkoqartilerlugu. — Jeremia 17:9; Rûmamiut 7:21-23.
Aammattaaq silarsuarmi inuuffigisatsinni suna eqqortuunersoq sunalu eqqunngitsuunersoq ersarinngikkajupput mumingagajullutillu. Taamttumik inuup nammineq suna eqqortuunersoq sunalu eqqunngitsuunersoq aalajangerniartarpaa. Taamatut eqqarsartaaseqarneq ussassaarutinit, aliikkutassianit tusagassiuutinillu alliartortinneqartarpoq. Nalunanngilaq mianersortariaqartugut, isuma taamaattoq eqqarsartaatsitsinnut sunniisissanngikkutsigu anersaakkullu sakkutuussutivut putoqalersissanngikkutsigik.
Biibilimi siunnersuutip malinneratigut ulorianartorsiutsaalisinnaavugut: ’Immissinnik misiligitsi upperlusi pisarnersusi; immissinnik misilinniaritsi.’ (2 Korintumiut 13:5) Taamaaliorutta sanngiissutit akeqqatsinnit takuneqartinnagit saassussitinnagillu takusinnaassavavut aaqqissiinnaallugillu. Qanorli ililluta sakkutuussutit misilissinnaavavut? Immitsinnik misissorutta malunnaatit suut eqqumaffiginiassavavut?
Malunnaatit ilisimakkit
Anersaakkut sanngiissuteqarsinnaanermut malunnaat nalinginnaasoq tassaavoq nammineq atuaqqissaartarnermik ileqqunik qasukkaaneq. Ilaasa nalunngilaat atuaqqissaarnerusariaqarlutik aallarteriarsinnaanatilli. Ullumikkut inuunermi ulapputeqarfiujuartumi atuaqqissaartarneq pingaaruteqartoq sumiginnarneqariaannaavoq. Ajorneruvorli isumaqaraanni periarfissaqarfinni atuagassiat Biibililersaarutit atuarsinnaagaanni kristumiullu ataatsimmiinnerisa ilaannut najuuttaraanni ingerlalluarluni.
Taamaaliorneq imminut salloqittarneruvoq. Assigiinnarpaa isumaqaraanni ingilluni iluamik nerinissamut piffissaqarani tamatigulli tamaana tamulupallalaaginnartarluni. Immaqa tamaaliorneq perlilernanngilaq, qaquguluunniilli tamanna peqqiilliuutigineqalersinnaavoq. Akuttoqatigiissumik anersaakkut nerisanngikkutta, anersaakkut sakkutuussutigut sanngiillipallassinnaapput. Taamaappallu Satanip toqunartumik saassussineranut nakkarsinnaavugut silarsuup isumaqatissarsiorneranit isumaanillu sunniiffiginiarneqartuaratta.
Anersaakkut sanngiitsuunerup malunnaataa alla tassaavoq anersaakkut sorsuttartutut sillimasariaqarnermik qasukkaaneq. Eqqissisimaffiutillugu sakkutooq sorsuffimmi navianartorsiornermisulli ilimasupilunneq ajorpoq, isumaqartinneqarsinnaavorlu sorsunnissamut piareersimasariaqarani. Sorsuuteriataassagaluaruni piareersimanissaa ilimananngilaq. Anersaakkut sillimaniarneq aamma taamaappoq. Qasukkaagaluarutta saassunneqarutta piareersimanngitsoorsinnaavugut.
Taamaalisoorsimanerluta qanoq ililluta paasisinnaavarput? Qanorpiaq ingerlanitsinnik qulaajaasinnaasunik aperinitsigut paasisinnaavarput: Aliikkutassianik ujartuinittulli oqaluussinermut peqataarusutsigaanga? Pisiniarfilerinertulli tv-milluunniit isiginnaarnertulli ataatsimiinnernut piareersarusutsigaanga? Kristumiunngorama tunutama arlaannik sammisaqarusuppunga? Allat ilorrisimaartumik inuunerat usoraara? Apeqqutaapput itisuumik imminut misilinnartut, anersaakkulli sakkutuussutitta sanngiissuteqarsinnaaneranik paasitissinnaavaatigut.
Sakkutuussuterput anersaakkut ittuummat Guutip anersaavata inuunitsinni sunniinera pingaaruteqarpoq. Taamaannersoq Guutip anersaavata inerititai inuunitsinni periaatsitigut tamani takuneqarsinnaapput. Iluarinngisatsinnik allat iliuuseqaraangata oqaaseqaraangataluunniit uumitsajavugut ajuallajallutaluunniit? Unnersuussutit akueriuminaatsippagut? Iluarinnginneqartuartutut misigivugut? Allat misigisaat angusaalluunniit sinngagisarpavut? Allat isumaqatigiuminaatsippakka, ingammik naligisavut? Inuunerput anersaap inerititaanik ulikkaarnersoq uinngulluunniit suliai malunnanngitsumik sunniisimanersut ilumoortumik immitsinnut misissornitta isivut uisissavai. — Galâsiamiut 5:22-26; Evfisumiut 4:22-27.
Anersaakkut sanngiissutit qanoq ajugaaffigineqarsinnaasut
Anersaakkut sanngiissuteqarluni nassuerutiginninneq pisariaqartunik allannguinernit allaanerulluinnarpoq. Ajoraluartumik amerlasuut ajornartorsiut utoqqatsissutissarsiortarpaat, sumiginnartarpaat suunngitsutulluunniit isigalugu miserratigaluguluunniit. Sakkutuussutinik amigaateqarneq sakkoqarnani sorsukkiartornertulli ulorianartigaaq. Taamaalilluni Satanimit saassutsittoqariaannanngortarpoq. Taamaaliornata kukkunerit paasisavut tamaasa iluarsiniartariaqarpavut. Qanoq ililluta taamaaliorsinnaavugut? — Rûmamiut 8:13; Jâko 1:22-25.
Anersaakkut sorsunneq ilaatigut kristumiup isumaanik uummataanillu aqutsiniarneq pillugu akerleriinneruvoq, taamaattumik misigissutsivut pitsaanerpaamik sianigisariaqarpavut. Eqqaamajuk anersaakkut sakkutuussutinut ilaammat ’iluarneq [naapertuilluarneq] saattuaasaralugu’, uummatitsinnik illersuisoq, ’annassullu niaqorornaveerutigalugu’, isumatsinnik illersuisoq. Sakkutuussutit immikkoortuinik taakkuninnga sungiusarluarsimalluni atuilluarneq ajugaanissatsinnut ajorsarnissatsinnulluuniit aalajangiisuuvoq. — Evfisumiut 6:14-17; Ussatit 4:23; Rûmamiut 12:2.
’Iluarnerup saattuaasaa’ inissilluarsimassappat, naapertuilluarneq asanerlutigu eqqunngitsuliornerlu uumiginerlutigu qulakkeersimajuartariaqarparput. (Tussiaat 45:8; 97:10; Amos 5:15) Silarsuaq malillugu najoqqutassiat malinnerat qasukkarsimavarput? Piviusuusunik filmimiluunniit atuagassiatigulluunniit siornatigut uissuummissutigisarsimasagut ippigisarsimasagulluunniit nuannarilersimavavut? Naapertuilluarnermut asanninitta erseqqarissaaffigissavaatigut silarsuarmi kiffaanngissuseqarluni siuarsimasumillu inooriaaseqarnertut ussassaarutigineqartoq tassaavoq tamalikattumik kinguaassiuutitigut atoqateqartarneq kukkusumillu isumaqarneq. — Rûmamiut 13:13, 14; Títuse 2:12.
’Annassummik niaqoroornaveeqquserneq’ aamma isumaqarpoq siunissami pilluaqqussutissanik takorluuilluarsinnaaneq silarsuullu alutornassusianik kusanassusianillu tammartitaannginneq. (Eprîarit 12:2, 3; 1 Juánase 2:16) Taamatut siumut isigisinnaassuseqarluta soqutigisat anersaakkut ittut timip piisigut periarfissanit namminerisamillu iluaqutigisinnaasanit salliutikkuminarnerupput. (Matîuse 6:33) Sakkutuussutip immikkoortua tamanna aamma eqqortumik inissisimanersoq qulakkeerniarlugu ilumoortumik imminut ima aperisariaqarpugut: Inuuninni suna anguniarpara? Anersaakkut immikkut ittunik anguniagaqarpunga? Piviusunngortinniarlugit iliuuseqartarpunga? Kristumiut tanitat sinnerinut ’amerlangaartunulluunniit’ ilaagaluarutta Paulus malittariaqarparput ima oqarsimasoq: ’Imminik pillunga isumaqanngilanga tigoreeriga; ataaserli pivara: tununniittut puiorlugit siuninniittullu isattorlugit tikisassaq arpanniarpara.’ — sarĸúmersitat 7:9; Filípimiut 3:13, 14.
Anersaakkut sakkutuussutit allaaserisani naggaserlugit Paulus ima kajumissaarivoq: ’Torlulasaraangassi qinusaraangassilu tamatigut anersaakkut qinuttuinnaritsi, eqqumaniarlusilu tamannarpiaq pissutigalugu, tamatigut qasusuillusi iluartullu tamaasa qinnullugit.’ (Evfisumiut 6:18) Tamatuma takutippaa anersaakkut sanngiilliornaveersaarniarluni sanngiissutilluunniit qaangerniarlugit marlunnik alloriarfissaqartoq: Guutimut ajunngitsumik attaveqarnermik ineriartortitsisariaqarpugut kristumioqatitsinnullu qaninnerulerluta.
Jehovamut saaffiginninneq ileqqoralugu ’torlulasarutta’ (ajortuliatsinnik nassuerutiginnilluta, isumakkerfigeqqulluta qinulluta, siulersoqqulluta, pilluaqqussutaanut qujalluta uummatitsinnillu unnersiutigalugu); taamaaliortaruttalu ’tamatigut’ (kikkut tamarmik takkuanni, peqatigiittuni, namminerisami qinorusuummernermilu), Jehovamut qanimut attaveqalissaagut. Tamanna illersuutigisinnaasatta pitsaanersaaraat. — Rûmamiut 8:31; Jâko 4:7, 8.
Aammattaaq ’iluartut tamaasa’, kristumioqativut, qinnuteqqullugit kajumissaarneqarpugut. Nunani ungasissuni anersaakkut qatanngutivut malersorneqartut allatigulluunniit misilinneqartut qinnutitsinnut ilaasariaqarput. Kristumiummi ulluinnarni suleqatigisartakkavut ilagisartakkavullu? Taakkua aamma qinnunnissaat eqqortuuvoq, soorlu Jesusip ajoqersukkani qinnuttarai. (Juánase 17:9; Jâko 5:16) Qinnutit taamaattut ataasiussuseqalersissavaatigut ’ajortullu’ saassussinerata akiornissaanut nukissaqalersilluta. — 2 Tásalûníkamiut 3:1-3.
Kiisalu apustili Peterip asannittumik kajumissaarutaa uummammiuliuttariaqarparput: ’Suut tamarmik naggatissaat qallilerpoq. Taamaattumik piitaauillusilu qinusarnermut peqqissaarniaritsi. Tamanilli annerusumik asaqatigiigitsi ilungersorlusi asanninnerup ajorterpassuit matoortarmagit.’ (1 Pîtruse 4:7, 8) Inuit, nammineq allallu, naammalluinnanngitsuuneri uummammut isumamullu ajoqutaalersillugit sunniisinnissaat allaalluunniit naakkiuffiginissaat ajornanngitsuararsuuvoq. Sanngiissuterput tamanna Satanip nalunngilluinnarpaa. Imaattunik peqqusersusaarutinik oqariartuuteqarpoq: Avissaartitsigit naalagaaffigalugillu. Avissaartuutsitsiniarsarivoq. Taamaattumik asanninnermik qamannga pisumik, ajortulianik taamaattunik matusisumik, ersersitsiniapallattassaagut, ’Diaavululu inissaqartinnaveerlugu’. — Evfisumiut 4:25-27.
Maannakkut anersaakkut nukittuujugit
Nutsat tukattut qilernerusarluunniit equngasoq paasigaanni qanoq iliortoqartarpa? Qularnanngitsumik ingerlaannaq iliuuseqartoqartarpoq. Ikinnerpaartaannaat isikkuminnik soqutiginninnavianngillat iliuuseqarnaviaratillu. Anersaakkulli sanngiissutit pineqaraangata taamatulli pilertortartigisa. Isikkutsigut pikataarpasikkutta isikkorlunneqarsinnaavugut, anersaakkulli peqqissaanngikkutta Jehovamit iluarisaajunnaarsinnaavugut. — 1 Samuel 16:7.
Anersaakkut sanngiissutaasinnaasut tamaasa qaangerniarnissaannut pisariaqartitavut Jehovap asannilluni tunniussimavai. Kristumiut ataatsimiinneri, atuagassiat Biibililersaarutit uppeqatillu inersimalluartut isumassuilluartullu aqqutigalugit qanoq iliornissatinnik eqqaasittuarpaatigut. Siunnersuutit akuerisinnaanerlugik piviusunngortillugillu nammineq aalajangigassaraarput. Taamaaliornermi ilungersorneq imminullu naalakkersinnaassuseq pisariaqarput. Apustili Paulusip ammasumik allassimanera eqqaamajuk: ’Uanga arpappunga maangaannaq pinnanga; tilluivunga silaannarmut pinnanga; kisianni timiga artorsartippara kiffaasutut ilillugu, allanut oqaluussisartunga nammineq angiluttoqqunanga.’ — 1 Korintumiut 9:26, 27.
Eqqumagit anersaakkullu Akillesip kimmiatut ittumik ineriartortitsinngisaannarit. Anersaakkut sanngiissutigisinnaasavut nassuerutiginiarlugit ajugaaffiginiarlugillu tamatta immikkut maniguulluta qunusuillutalu pisariaqartunik iliuuseqarta. (wE 15/4 99)
[Qupp. 26-mi issuagaq]
’Immissinnik misiligitsi upperlusi pisarnersusi; immissinnik misilinniaritsi.’ — 2 Korintumiut 13:5.
[Qupp. 28-mi issuagaq]
’Qinusarnermut peqqissaarniaritsi. Tamanilli annerusumik asaqatigiigitsi ilungersorlusi asanninnerup ajorterpassuit matoortarmagit.’ — 1 Pîtruse 4:7, 8.
[Qupp. 27-mi ungalusaq/assiliartaq]
Imminut aperigit . . .
◆ Pisiniarfilerinissattulli tv-milluunniit isiginnaarusuttarnittulli ataatsimiinnernut piareersarusutsigaanga?
◆ Allat ilorrisimaartumik inuunerat usoraara?
◆ Nuannarinngisannik allat iliuuseqaraangata oqaaseqaraangataluunniit uumitsaatigisarpakka ajuallallungaluunniit?
◆ Siunnersorneqarneq ilassiuminaatsittarpara? Allanit iluarinnginneqartutut misigiuarpunga?
◆ Allat isumaqatigiuminaatsippakka?
◆ Silarsuaq malillugu najoqqukka appartissimavakka?
◆ Anersaakkut ittunik immikkut anguniagaqarpunga?
◆ Anersaakkut anguniakkakka piviusunngortinniarlugit qanoq iliuuseqartarpunga?
[Qupp. 25-mi suminngaanneernera]
Akilles: Atuakkamiit Great Men and Famous Women-miit; Romamiut sakkutuui quppernermilu 28-mi assit: Historic Costume in Pictures/Dover Publications, Inc., New York