Angajoqqaat, sumik maligassiuivisi?
’Guuti qitornatut asanartutut malinniarsiuk, asannillusilu saqigitsi.’ — EVFISUMIUT 5:1, 2.
1. Jehovap inuit aappariit siulliit qanoq siulersorsimavai?
JEHOVAP ilaqutariit aaqqissuussaanerat pilersissimavaa. Taassuma ilaqutariit siulliit pilersissimammagit aappariillu siulliit kinguaassiorsinnaatillugit, ilaqutariit tamarmik piunertik pissutigalugu qutsavigisariaqarpaat. (Evfisumiut 3:14, 15) Adam Evalu akisussaaffissaannik erseqqissunik paasissutississimavai aammalu akisussaaffiit naammassinissaannik namminneq qanoq iliorsinnaanermut periarfissilluarsimallugit. (1 Moses 1:28, 30; 2:15-22) Adamip Evallu ajortuliornerata kingorna pissutsit ilaqutariit atortariaqagaat artornarnerungaalerput. Taamaattorli Jehovap asannilluni kiffami iluaqutigisinnaasaannik ilitsersuuppai.
2. (a) Jehovap qanoq allakkatigut oqaatsikkullu ilinniartitsinissaq isumagisimavaa? (b) Angajoqqaat imminnut qanoq aperisariaqarpat?
2 Ajoqersuisorsuatsitut Jehovap qanoq iliortariaqarnissatsinnik iliortariaqannginnissatsinnillu allassimasutigut ilitsersuuteqartiinnanngilaatigut. Itsarli maleruaqqusat allanneqarsimasut saniatigut aamma palasit, pruffiitit ilaqutariillu ittuat aqqutigalugit oqaatsikkut ajoqersuisarpoq. Biibilip saniatigut ullumikkut kikkut aqqutigalugit oqaatsikkut ajoqersortarpaatigut? Kristumiut utoqqaanertat angajoqqaallu aqqutigalugit. Illit angajoqqaajuguit ilaquttatit Jehovap aqqutigeqqusaanik ajoqersortarpigit? — Ussatit 6:20-23.
3. Sunniuteqarluartumik ajoqersuineq eqqarsaatigalugu ilaqutariinni qullersaasut qanoq Jehova ilinniarfigisinnaavaat?
3 Ilaqutariit iluanni ajoqersuisarneq taama ittoq qanoq ingerlanneqartariaqarpa? Jehova tamatumani maligassaavoq. Ersarissumik oqaluttuuppaatigut suna ajunngitsoq sunalu ajortuusoq, uteqqiiuartarlunilu. (2 Moses 20:4, 5; 5 Moses 4:23, 24; 5:8, 9; 6:14, 15; Josva 24:19, 20) Eqqarsaatissarsinartunik apeqquteqarfigaatigut. (Job 38:4, 8, 31) Assersuutit inuunermilu maligassat atorlugit misigissutsivut killittarpai uummaterpullu ilusilersorlugu. (1 Moses 15:5; Daniel 3:1-29) Angajoqqaat, meeqqasi ilinniartikkaangassigik taassuma ajoqersueriaasia malinniartarpisiuk?
4. Perorsaatissiineq pillugu suna Jehovamit ilinniarneqarsinnaava, sunalu pillugu perorsaatissiineq taama pingaaruteqartigaa?
4 Jehovap eqqortut eqqarsaatigalugit aalajangiusimalluinnarpai, aammali naammalluinnanngissutsip kingunerisartagai nalunngilai. Taamaattumik pillaatinnani inuit naammalluinnanngitsut ajoqersortarpai arlaleriarlunilu mianersoqqullugit eqqaasillugillu. (1 Moses 19:15, 16; Jeremia 7:23-26) Perorsaatissiigaangami naammattumik ingasaassinanilu taamaaliortarpoq. (Tussiaat 103:10, 11; Jesaja 28:26-29) Uaguttaaq meeqqavut taamaaliorfigigutsigik takutittarparput Jehova ilisaralugu, taamaalillunilu meeqqatta Jehovamik ilisarsinissaat oqinnerulissalluni. — Jeremia 22:16; 1 Juánase 4:8.
5. Tusarnaarneq pillugu angajoqqaat Jehova sumik ilinniarfigisinnaavaat?
5 Tupinnartumik Jehovap Ataatatut asannittutut qilammiusutut tusarnaartarpaatigut. Peqqussuteqaannarneq ajorpoq. Kajumissaarpaatigut uummammiugisavut imminut saqqummiuttaqqullugit. (Tussiaat 62:9) Eqqarsaativut misigissutsivullu eqqorpallaanngitsuusimappata qilammit nipituumik naveerneq ajorpaatigut. Kamagittarluni ajoqersortarpaatigut. Taamaattumik Paulusip siunnersuutaa naleqqulluartuuvoq: ’Guuti qitornatut asanartutut malinniarsiuk.’ (Evfisumiut 4:31-5:1) Jehovap angajoqqaat meeqqanik ajoqersuisarneranni maligassilluarpai! Ajoqersuinera uummatitsinnut killinnaqaaq aqqutigeqqusaanilu ingerlanissatsinnut kajumissisitsilluni.
Maligassiuilluarneq sunniuteqarpoq
6. Angajoqqaat isumaqarfiginninnerat maligassiaallu meeqqanut qanoq sunniuteqartarpat?
6 Oqaasiinnakkut ilitsersuutaannaanngitsut aammali angajoqqaat maligassiaat meeqqanut sunniuteqartarpoq. Angajoqqaat iluarigunikku iluarinngikkunikkuluunniit meeqqaminnit ilaarniarneqartarput. Angajoqqaat tusaraangamikku oqaaserisimasaminnik meeqqat oqaaseqartuttaaq nuannarisinnaavaat — tupassutigisinnaalluguluunniit. Angajoqqaat anersaakkut ittunik pingaartitsinerat iliuusaasigut isumaasigullu takuneqarsinnaappata tamanna meeqqanut sunniuteqarluassaaq. — Ussatit 20:7.
7. Jefta qanoq panimminut maligassaalluarsimava, tamannalu qanoq kinguneqarpa?
7 Angajoqqaat maligassiuinerisa pingaaruteqassusia Biibilimi erseqqissarneqarpoq. Jefta, Jehovamit Israelikkut Ammonikkunnut ajugaaneranni siulersuisutut atorneqartoq, aamma ataataavoq. Ammonikkut kunngianut akissuteqarnermigut takutippaa Jehovap Israelikkunnut qanoq iliuuseqarsimaneranik oqaluttuat Jeftap atuartarsimagai. Oqaluttuanit tamakkunannga issuaasimavoq, Jehovalu upperilluinnarinni takutillugu. Qularnanngitsumik taassuma maligassiaa sunnerneqaatigalugu paniata upperneq imminullu tunniusimaneq ineriartortissimavai inuunini naallugu arnatut katissimanngitsutut Jehovamut tunniulluinnarluni kiffartorumalluni akuersigami. — Eqqartuussisut 11:14-27, 34-40; naleqqiuguk Josva 1:8.
8. (a) Samuelip angajoqqaavi qanoq ilillutik isumaqarfiginninnermikkut maligassaalluarsimappat? (b) Tamanna Samuelip qanoq iluaqutigaa?
8 Samuel meeraagallarami maligassaalluarpoq, inuuninilu naallugu pruffiititut Guutimut aalajaalluni. Meeqqatit taassumatut ilinissaat kissaatigissagaluarpiuk? Taava Samuelip angajoqqaavisa, Elkanap Hannallu maligassiaat misissoqqissaariartigik. Naak inoqutiminni pissutsit pitsaavallaanngikkaluartut ukiut tamaasa Siloliartarput illernartuummut pallorfiginnikkiartorlutik. (1 Samuel 1:3-8; 21) Malugeriaruk Hanna qinugami qanoq ilungersorluinnartigisoq. (1 Samuel 1:9-13) Malugiuttaaq marluullutik Guutimut neriorsuutiminnik naammassinninnissaminnik pingaartitsinerat. (1 Samuel 1:22-28) Qularnanngivissumik maligassiuilluarnerat pissutigalugu Samuelip nammineq eqqortuliortuaannartutut pissuseqarnissani ineriartortissinnaasimavaa — allaat inuit ilagisani Jehovamut kiffartortuuneraraluarlutik taassuma aqqutigeqqusaanik ataqqinninngikkaangata. Kingusinnerusukkut Jehovap Samuel pruffiitimisut akisussaaffeqalersippaa. — 1 Samuel 2:11, 12; 3:1-21.
9. (a) Timoteus angerlarsimaffimmini qanoq sunnerneqarluarsimava? (b) Timoteus inuttut qanoq ittunngorsimava?
9 Ernerpit Timoteusitut ilinissaa kissaatigaajuk, taanna inuusuttuulluni apustili Paulusimut suleqataalersoq? Timoteusip ataataa uppertuunngikkaluarpoq, anaanaali aanaalu marluullutik anersaakkut ittunik pingaartitsinermikkut maligassaalluarput. Taamaalillutik Timoteus kristumiutut inuunissamut tunngavissaqarluartippaat. Paasitinneqarpugut anaanaa, Eunike, aanaalu Lois ’uppernikkut peqqusersuitsuusut’. Ilumoortuusaarniarnatik kristumiutut inuupput; upperneq nassuerutigisartik naapertorlugu inuullutik, Timoteusilu taamaannissaanik ilinniartillugu. Timoteusip takutippaa tatigineqarsinnaalluni allallu iluaqutissaannik ilumoorluni soqutiginnilluni. — 2 Timûtiuse 1:5; Filípimiut 2:20-22.
10. (a) Angerlarsimaffiup avataani sunit meeqqavut sunnerneqarsinnaappat? (b) Meeqqavut oqaatsikkut isumakkulluunniit tamakkuninnga sunnerneqarsimasut malugigutsigu qanoq qisuariartariaqarpugut?
10 Meeqqavut angerlarsimaffimminniinnaq sunnerneqarneq ajorput. Aamma atuarfimmi atuaqatiminnit, ilinniartitsisuminnit meeqqat inuusuttullu isumaannik sunniiniartussanit, inunnit isumaqartunit kikkut tamarmik inuiaqatigiit naggueqatigiilluunniit ileqqorisartagaat maleruartariaqaraat, timersortartunit nersorneqartunit, inunnillu nuimasunit nutaarsiassani sammineqartartunit sunnerneqartarput. Aamma meeqqat millionilikkuutaat sorsunnerni naakkittaatsuliornernik misigisaqarsimapput. Tupigusuutigisariaqarparput sunnerneqarnerit tamakku meeqqatta oqaasiini isumaanniluunniit malunniutissappata? Taama pisoqaraangat qanoq qisuariartarpugut? Avoqqaarinerisigut sukannersumilluunniit oqaaqqissaarnerisigut ajornartorsiutit aaqqinneqarsinnaappat? Meeqqavut ingerlaannaq oqaaqqissaarnagit pitsaanerussaaq imminut aperigutta: ’Jehovap uatsinnut iliuuseqartarnerata ikiorsinnaavaatigut ajornartorsiutip tamatuma aaqqinnissaanut?’ — Naleqqiuguk Rûmamiut 2:4.
11. Angajoqqaat kukkussuteqarpata tamanna qanoq meeqqat isumaannut sunniuteqarsinnaava?
11 Soorunami angajoqqaat naammalluinnanngitsut tamatigut eqqortumik iliorsinnaanngillat. Ilaannikkut kukkusarput. Meeqqat tamanna paasigunikku angajoqqaatik ataqqiunnaassanerpaat? Taamaassinnaavoq, ingammik angajoqqaat kukkunitik miserratigalugit oqartussaassusertik ingasattumik ilungersuutigippassuk. Allaanerulluinnartumilli kinguneqarsinnaavoq angajoqqaat maniguullutik kukkunitik ammasumik nassuerutigippatigik. Taamaaliorlutik meeqqaminnut maligassiuilluassapput, taakku aamma taamaaliornissaminnut ilinniarnissartik pisariaqartippaat. — Jâko 4:6.
Maligassiuinerit meeqqat ilinniutigisinnaasaat
12, 13. (a) Meeqqat asanninneq pillugu suna ilikkartariaqarpaat, qanorlu ilillutik sunniuteqarluartumik tamatuminnga ilinniarsinnaappat? (b) Sooq meeqqat allanut asanninnermik takutitsinermik ilikkarnissaat pingaaruteqarpa?
12 Angajoqqaat meeqqatik naleqarluartunik amerlasuunik ilinniartissinnaavaat ajoqersornerisigut maligassiorluaatigalugit. Assersuutit ilaat taariartigik.
13 Namminissarsiunngitsumik asanninneq qanoq ersersinneqartartoq: Ilinniarneqartussat pingaarnerpaartaasa ilaat maligassiuilluarnikkut erseqqissarneqartoq tassaavoq asanninnerup pingaaruteqarnera. ’Uagut asannippugut [Guutip] asaqqaarmatigut.’ (1 Juánase 4:19) Taanna asanninnermut pilerfiuvoq, asanninnikkullu maligassaalluarnerpaalluni. Asanninneq tamanna najoqqutassanik tunngaveqartoq, agaʹpe, Biibilimi 100-t sinnerlugit eqqaaneqarpoq. Kristumiut ilumoortut pissuseq tamanna ilisarnaatigissavaat. (Juánase 13:35) Asanninneq taama ittoq Guutimut, Jesus Kristusimut aamma inoqatitsinnut ersersittariaqarparput — aamma inunnut iluarinngisatsinnut. (Matîuse 5:44, 45; 1 Juánase 5:3) Aatsaat asanninneq tamanna uummammiugigutsigu inuunitsinnilu ersaritsikkutsigu sunniuteqarluartumik meeqqavut tamatuminnga ilinniartissinnaavavut. Iliuutsit oqaatsinit sunniuteqarnerusarput. Ilaqutariit iluanni meeqqat asanninneq pissutsillu allat tamatumunnga assingusut, soorlu tunniusimaneq, takusinnaasariaqarpaat malugisinnaasariaqarlugulu. Angajoqqaanit pissutsit taakku ersersinneqanngikkaangata meeqqat timikkut, isumakkut misigissutsikkullu ineriartornissaat akornuserneqartarpoq. Meeqqat aamma takusinnaasariaqarpaat qanoq asanninneq tunniusimanerlu kristumioqatinut eqqarlerinngisanut eqqortumik ersersinneqartartut. — Rûmamiut 12:10; 1 Pîtruse 3:8.
14. (a) Meeqqat sulilluarneq nalerisimaarnartoq qanoq ilillutik ilikkarsinnaavaat? (b) Ilissi ilaquttassinni qanoq taamaaliorsinnaavisi?
14 Sulinermut isiginnittaaseq eqqortoq: Sulineq inuunermut ilaavoq pingaaruteqartoq. Inuk imminut ataqqinnissaguni sulilluartuunissaq ilinniartariaqarpaa. (Nalunaajaasup oqaasii 2:24; 2 Tásalûníkamiut 3:10) Meeraq sulisinneqartoq iluamik ilitsersorneqanngikkuni, kingornatigullu naammassinnilluannginnini pissutigalugu avoqqaarineqarluni, suliaminik naammassinnilluarnermik ilikkagaqarsinnaanissaa ilimanarpallaanngilaq. Meeqqalli angajoqqaatik peqatigalugit sulisarlutik ilinniartinneqarunik naleqquttumillu nersorneqarunik, ilimagisinnaavarput nalerisimaarnartumik sulisinnaanissaq ilinniassagaat. Angajoqqaat maligassaalluarlutillu nassuiaasarunik, meeqqat suliassap naammassinissaata saniatigut aamma ajornartorsiutit qanoq qaangerneqarsinnaasut, naammassinissaa tikillugu suliuarneq aamma eqqarsarneq aalajangersinnaanerlu ilinniarsinnaavaat. Taamaalillutik paasissavaat Jehovattaaq sulisoq, sulilluartartoq Jesusillu Ataatani ilaartaraa. (1 Moses 1:31; Ussatit 8:27-31; Juánase 5:17) Ilaqutariit nunalerisuuppata imaluunniit suliffiuteqarpata ilaquttat ilaat immaqa suleqatigiissinnaapput. Immaqaluunniit anaanaasup ernini paniniluunniit nerisassiornermik erruinermillu ilinniartissinnaavaa. Ataataasup sulinngiffimmini pilersaarutigisinnaavaa angerlarsimaffimmi suliassat meeqqani peqatigalugit suliariniarlugit. Iluaqutaasorujussuuvoq angajoqqaat suliassat naammassinissaat kisiat pinnagu aammali meeqqatik inuunermi pisariaqartitaannik ilinniartinnissaat pilersornissaat eqqarsaatigigunikku.
15. Meeqqat uppernerat qanoq nakussatsinneqarsinnaava? Assersuummik taasaqarit.
15 Assortorneqaraluarluni uppernermik aalajaanneq: Upperneq aamma kristumiut inuunerannut ilaavoq pingaarutilik. Ilaqutariittut atuaqqissaaqatigiinnermi angajoqqaat meeqqaamik uppernerup suuneranik paasinninnissaannut ikiorsinnaavaat. Meeqqat ilinniarsinnaavaattaaq uppernissamut patsisissarpassuaqartoq, tamatumalu uppernermik uummammioqarnerat alliartortissinnaavaa. Meeqqanilli maluginiarneqarnerpaasartoq tassa angajoqqaatik sualuttumik misilinneqarnermi uppernikkut aalajaatsut takullugit. Panamami Biibilimik atuaqqissaartoq uiminit sioorasaarneqarpoq Jehovamut kiffartorunnaanngikkuni illuminnit anisinneqassasoq. Taamaattorli sapaatip-akunneri tamaasa meeqqani mikisut sisamat peqatigalugit aalajangersimasumik 16 kilometerit pisuttarpai 30 kilometerillu bussimut ilaasarluni Naalagaaffilersaarfimmut qaninnerpaamut ornigunniarluni. Maligassiaanit kajumissaarneqarlutik ilaqutaasa ilaat 20-t sinnerlugit sallusuissut pigiliussimavaat.
Ullut tamaasa Biibilimik atuarnikkut maligassaalluarneq
16. Sooq ilaqutariittut ullut tamaasa Biibilimik atuaqatigiittariaqarpat?
16 Ilaqutariit ileqqorilersinnaasaasa pitsaanerpaat ilaat — angajoqqaat iluaqutigisinnaasaat meeqqallu malinniarsinnaasaat — tassaavoq aalajangersimasumik Biibilimik atuartarneq. Quppernerit qassit atuarneqarsimanersut pingaarnerpaanngilaq. Qanorli akulikitsigisumik qanorlu ililluni naammassineqarnersoq pingaaruteqarnerungaarpoq. Meeqqanut Biibilimik atuaanerup saniatigut atuakkamik Biibilimit atuaatikka-mik kassettinut immiussat tusarnaarneqarsinnaapput. Ullut tamaasa Guutip oqaasia atuartarutsigu Guutip eqqarsaatai salliutittuarsinnaavavut. Inuttut nammineerluta ilaqutariittullu Biibilimik atuartarutta ilaqutariit tamarmik Jehovap aqqutigeqqusaani ingerlanissaannut ikiuutaassaaq. Taamaaliornissamut kajumissaarneqarpugut siorna ataatsimeersuarnermi „Guutip inuunermut aqqutigeqqusaa“-mik qulequtalimmi isiginnaagassiami „Ilaqutariit — ullut tamaasa Biibilimik atuarneq inooriaatsissinnut ilaatissiuk!-mi. — Tussiaat 1:1-3.
17. Ilaqutariittut Biibilimik atuarneq allassimaffinnillu alanngaarniarneq qanoq ilillutik Evfisumiut 6:4-mi siunnersuutigineqartup maleruarnissaanut iluaqutaava?
17 Ilaqutariittut Biibilimik atuarneq apustili Paulusip kristumiunut Efesusimiittunut isumassarsisitaalluni kajumissaarutaanut matumunnga naapertuulluarpoq: ’Ilissi angajoqqaat, qitornasi narrutsatseqinasigik, paariniarsigilli perorsarlugit inertertarlugillu Jehovamit.’ (Evfisumiut 6:4) Qanoq paasisariaqarpa ’inertertarlugit’ Jehovamit perorsaaneq? Ny Verden-Oversættelsen malillugu ’oqaaqqissaarinerup’ isumavigaa ’isumassarsisitsineq’. Taamaattumik ataataasut kristumiut kajumissaarneqarput Jehova Guutip isumaanik meeqqatik tuneqqullugit — Guutip eqqarsaataanik ilisimasaqalernissaannut ikiorlugit. Tamatumunnga atatillugu ikiuutaasinnaavoq meeqqat allassimaffinnik pingaartunik alanngaarsinnaalernissaannut kajumissaaraanni. Anguniagaq tassaavoq meeqqat Jehovap eqqarsaataanit siulersorneqarnermik ilikkartinnissaat kissaatitik iliuusitillu Guutip najoqqutassiaanut naapertuuttunngortikkiartuaartillugit angajoqqaatik ilagigunikkik ilaginngikkunikkilluunniit apeqqutaatinnagu. Taamatut eqqarsariaaseqarnermut Biibili tunngaviuvoq. — 5 Moses 6:6, 7.
18. Biibili atuaraangatsigu suna pisariaqarsinnaava (a) paasilluarnissaanut? (b) siunnersuutip imarisaata iluaqutiginissaanut? (c) Jehovap siunertaanik paasitinneqarnitsinnut qisuariassagutta? (d) inuit isumaat iliuusaallu pillugit eqqaaneqartut iluaqutigissagutsigik?
18 Biibili inuunitsinnut sunniuteqassappat soorunami oqaasii paasisariaqarpavut. Imaassinnaavoq amerlasuut allassimaffiit ilaat arlaleriarlutik atuartariaqaraat. Oqaatigisat aalajangersimasut paasilluarniarlugit oqaatsit ilaat ordbogimi imaluunniit qinerlerfissiami Indsigt i Den Hellige Skrift-imi qupperneqarsinnaapput. Allassimaffiit siunnersuutinik imaluunniit peqqussutinik imaqarpata, ulluinnarni qanoq maleruarneqartariaqarnerat oqaloqatigiissutigissallugu piffissaqartariaqarpusi. Ima aperisinnaavutit: ’Unnersuussut tamanna maleruarutsigu qanoq iluaqutigissavarput?’ (Jesaja 48:17, 18) Allassimaffiup Jehovap siunertaanut tunngasumik paasitippatigut aperisinnaavutit: ’Tamanna qanoq inuunitsinnut tunngassuteqarpa?’ Allassimaffiit inuit isumaannik iliuusiinillu oqaluttuarpata ima aperisinnaavutit: ’Inuunermi ajornartorsiutit suut atortariaqarpaat? Qanoq iliuuseqarfigaat? Taakkua maligassiaat qanoq iluaqutigisinnaavarput?’ Tamatigut Biibilimi oqaluttuarineqartut ullumikkut inuunitsinnut pingaaruteqarnerata oqaloqatigiissutiginissaanut piffissaqartariaqarpugut. — Rûmamiut 15:4; 1 Korintumiut 10:11.
19. Angajoqqaat Guutimik malinnittut meeqqaminnut qanoq iluaqutaappat?
19 Taama ajunngitsumik iliuuseqarnitsigut Guutip eqqarsaatai isumatsinni uummatitsinnilu puiukkiutissavavut! Taamalu ’Guuti qitornatut asanartutut malinniarnissaanut’ ikiorneqassaagut. (Evfisumiut 5:1) Peqatigitillugulu meeqqatta malinniarsinnaassaannik maligassiuilluassaagut. (wE 1/7 99)
Eqqaamavigit?
◻ Angajoqqaat Jehovap maligassiaa qanoq ilinniarfigisinnaavaat?
◻ Sooq meeqqat ilitsersorneqarnerat angajoqqaat maligassiuilluarnerannik malitseqartariaqarpa?
◻ Ilinniagassat suut pitsaanerpaamik angajoqqaat maligassiaannit ilinniarneqarsinnaappat?
◻ Qanoq ililluta ilaqutariittut Biibilimik atuarnissamut siunnersuutit tamakkiisumik iluaqutigisinnaavavut?
[Qupp. 12-imi assiliartaq]
Amerlasuut ilaqutariittut ullut tamaasa Biibilimik atuarneq nuannaarutigisarpaat