Uummatikkut aalajangersimallutit Jehova ujaruk
INATSISIT pineqaraangata, palasi Israelikkuusoq Ezra, allakkanik illernartunik ilisimannittutut, misissueqqissaartartutut, allaqqiisartutut ilinniartitsutullu maluginiartartuuvoq. Aammattaaq Jehovamut uummammik tamakiisumik kiffartuusinermigut kristumiunut maligassaalluarpoq. Qanoq? Babylonimi najugaqartilluni Guutimut tunniusimanini attattuarsimagamiuk, illoqarfik guutipilunnik anersaapilussiornernillu ulikkaaraluartoq.
Nalaatsornerinnaanngilaq Ezrap Guutimut tunniusimalluarnera. Tamanna ineriartortinniarlugu iliuuseqarsimavoq. „Ezrammi siunertaraa [Jehovap] inatsisai paasiniarluarniarlugit, maleruarniarlugit.“ — Ezra 7:10.
Ullutsinni Jehovap kiffaasa Ezratut kissaatigaat taassuma piumasaanik tamanik iliorniarlutik, naak silarsuarmi pallorfiginninnermut ilumoortumut akeqersimaartumi inuugaluarlutik. Misissoriartigu qanoq ililluta uummatitsinni aalajangersinnaanerluta — tassunga ilaapput eqqarsaatitsinni, isummatsinni, kissaateqarnitsinni pissutiginiakkatsinnilu — ’Jehovap inatsisai paasiniarluarniarlugit maleruarniarlugillu’.
Uummatikkut aalajangerluarsimaneq
Qinerlerfissiaq naapertorlugu „aalajangerneq“ isumaqarpoq ’eqqarsaatigilluareerlugu iliuuseqarnissamut periarfissani assigiinngitsuni qinersineq’. Guutip oqaasianik eqqortumik ilisimasaqalersimagaanni Jehovamullu tunniulluinnarsimagaanni, uummatikkut aalajangersimalluinnarnermut uppernarsaataalluinnarpoq, naatsiiassanillu siaruarterisumik assersuusiami Jesusip eqqartugaani ’issorissumut’ assersuunneqarsinnaalluni. — Matîuse 13:18-23.
Kisianni uummat sianigiuartariaqarpoq minguiarlugulu. Taamaanneranut marlunnik pissutissaqarpoq. Siullermik ajoqutaasunik kajumissuseqalersinnaammat naasupiluit sorlanipallatarnerattut. Ingammik ’ulluni kingullerni’ makkunani taamaappoq Satanip aaqqissuussinerani ’silaannaq’ uinummut tunngasunik eqqarsarnissamut aatsaat taama ajoqutaasunik pissutissaqartigimmat. (2 Timûtiuse 3:1-5; Evfisumiut 2:2) Pissutaasup aappaa issumut tungavoq. Issoq nakkutigineqanngitsoq isumagineqanngitsorlu, panipallattarpoq mangertilluni naggorlulertarlunilu. Issoq eqqarsaatiginagu tummaarineqarujussuarsimaguni, manngertilluinnarsinnaavoq. Assingusumik uummatitsinni assersuutaasumik issoq taamaalisinnaavoq. Paarinerlugaaguni imaluunniit inunnit anersaakkut atugarissaarnitsinnik innimigisaqanngitsunit tummaarineqaruni naggorluttunngorsinnaavoq.
Taamaattumik pingaaruteqartupilussuuvoq Biibilimi oqaaqqissaarutip matuma tamatsinnit malinneqarnissaa: „Paarisassannit tamanit annermik uummatit paariuk inuuneq tassannga aallaaveqarmat.“ — Ussatit 4:23.
Uummatitta ’issortaanik’ pisuunngortitsisinnaasut
Takulaariartigu pissutaasut imaluunniit piginnaanerit uummatitta ’issortaanik’ pisuunngortitsisinnaasut taamaalillunilu anersaakkut peqqissumik ineriartortitsisinnaasut. Soorunami uummaterput assigiinngitsutigut pitsanngortissinnaavarput, kisianni uani piginnaanerit assigiinngitsut arfinillit samminerussavavut: anersaakkut pisariaqartitsinitsinnik nassuerutiginninneq, maniguunneq, ilumoorneq, Guutimik mianerinninneq, upperneq asanninnerlu.
„Pilluarput anersaakkut pisariaqartitsinerminnik miserratiginninngitsut,“ Jesus oqarsimavoq. (Matîuse 5:3, NV) Soorlu timikkut kaannerup eqqaasittaraatigut nerisariaqartugut, anersaakkut pisariaqartitsinitsinnik nassuerutiginninnitta anersaakkut kaatsilissavaatigut. Inuup anersaakkut pisariaqartitsinera pissusissamisoorpoq. Tamatumami inuuneq imaqalersittarpaa siunertaqalersillugulu. Pissutsit aaqqissuussaaneranit matumannga, Satanimit aqunneqartumit, tatineqarnerup imaluunniit nammineq atuaqqissaarnissamut eqiasunnerup kajumiillissisinnaavaa pisariaqartitsineq tamanna eqqarsaatigivallaarunnaartissinnaallugu. Jesusili oqarsimavoq: ’Timiusaannaq inuup inuussutiginngilaa, oqaaserli sunaluunniit Guutip qarnanit anisoq inuussutigisaraa.’ — Matîuse 4:4.
Akuttoqatigiissumik, assigiinngiiaartunik peqqinnartunillu nerisaqarnerup peqqinnerulersittarpaatigut, neriffissallu tullia qanilligaangat nererusussuseqarnerulersittarluta. Aamma taamaappoq anersaamut tunngasuni. Immaqa atuarumatuunerpaanut ilaanngilatit, kisianni Guutip oqaasia ullut tamaasa atuartarukku aammalu akuttoqatigiimmik Biibililersaarutinik atuaqqissaartarneq ileqquliukkukku, paasissavat anersaakkut nererusunnerulerlutit. Biibilimik misissuingajaleraangavit qilanaarinerusalissavat. Taamaattumik nikallujaarpallaaqinak. Anersaakkut peqqissumik nererusussuseqarnerup ineriartortinnissaa ilungersuutigiuk.
Maniguunnerup uummat aqilisittarpaa
Uummatikkut aalajangissagaanni maniguunneq pingaartuuvoq. Piginnaanerup tamatuma ilinniarusunnerulersissavaatigut asannittumillu unnersuunneqarnitsinnut oqaaqqissaarneqarnitsinnullu ilassinnerusunnerulersilluta. Kunngi Josiasip’ maligassaalluarnera eqqarsaatigiuk. Naalakkersuinerata nalaani allakkat Guutip inatsisaanik imallit Israelikkut Moses aqqutigalugu pisimasaat nassaarineqarsimapput. Josiasip Inatsisit oqaasertai tusaramigit paasigamiullu siuaasani pallorfiginninnermit ilumoortumit qanoq nigorsimatigisut, atisani alittorpai Jehovallu saani qialluni. Guutip oqaasia tusaramiuk kunngip uummataa sooq taama sunnerneqartigaa? Oqaluttuarineqarpoq oqaasia tusaramiuk uummammigut ’annilaangaarsimasoq’, Jehovamullu maniguusimalluni. Jehovap Josiasip uummataata maniguunnera killitsiasuuneralu malugaa tamatumunngalu naapertuuttumik pilluaqqullugu. — 2 Kunngit 22:11, 18-20.
Maniguunneq pissutaalluni Jesusip ajoqersugaasa, ’ilinniartitaasimanngitsut ilisimaatsullu’, anersaakkut sallusuissutit paasisinnaasimavaat atorsinnaallugillu ’uinngup piisigut ilisimatuut’ sianisuullu paasinngisaat. (apustilit suliait 4:13; Lúkarse 10:21; 1 Korintumiut 1:26) Taaneqartut kingulliit uummatimikkut aalajangersimanngillat Guutip oqaasianit sunnertikkumallutik, makitanerup uummataat manngertissimagamiuk. Eqqumiippa Jehovap makitaneq uumigimmagu? — Ussatit 8:13; Daniel 5:20.
Ilumoorneq Guutimillu mianerinninneq
Pruffiiti Jeremiasip allaatigaa ’uummat tamanit annerusumik tatigisassaanngitsuusoq. Katsorsagassaanngitsoq. Kiammi inuup uummammiugisai ilisimasinnaavai.’ (Jeremia 17:9) Tatigisassaannginneq tamanna assigiinngitsutigut ersertarpoq, assersuutigalugu eqqunngitsuliorsimagaangatta kingornatigullu utoqqatsissutissarsioraangatta. Aamma takuneqarsinnaavoq sualuttumik ileqqorlunneq nassuiaatissarsioraangatsigu. Ilumuussutsip ikiorsinnaavaatigut uummatip tatigisassaanngitsup akiornissaanut sanngiissutitta takusinnaalernerisigut siumukarniassagatta. Tussiaasiortup qinugami ilumuussuseq taama ittoq takutissimavaa: „Misilinnga [Jehova], misissunnga, misissuiffigikkit uummatiga tartukkalu.“ Ersarippoq tussiaasiortoq uummammigut aalajangersimasoq minguiarneqassalluni aammalu Jehovamit misilinneqassalluni naak pissusini kusanaatsut nassuerutigisariaqaraluarlugit kingornalu akiortariaqaraluarlugit. — Tussiaat 17:3; 26:2.
Guutimik mianerinninneq, ’ajortumik uumiginninnermik’ ilaqartoq, minguiaanermut tamatumunnga iluaqutaangaarpoq. (Ussatit 8:13) Jehovap tunniusimanera ajunngissusialu ilumoortoq pingaartiitigalugu, Jehova mianerigaanni, puiunngisaannarneqassaaq imminut naalanngitsunik pillaasinnaasoq, allaat toqumik. Jehova paasititsivoq imminut mianerinnittut aamma naalakkumaaraanni, Israelimut oqarami: „Qanortoq taama ittunik uummateqartuaannarilit mianeralunga peqqussutikkalu tamaasa maleruarlugit inuunertik tamaat! Taava taakku qitornatillu inuunerminni tamatigut ajunngitsunik atugaqassapput.“ — 5 Moses 5:29.
Ersarippoq Guutimik mianerinninnerup siunertarinngikkaa annilaangalluta Guutimut naalatsigitissasugut, kisianni Ataatatta asannittup naalannissaanut kajumissaarineq siunertarigaa nalunngilarput uummammigut ajunnginnerpaamik kissaakkaatigut. Guutimik mianerinninneq ineriartornartuuvoq nuannaarnarlunilu, tamannalu Jesus Kristusip ersarissumik takutissimavaa. — Jesaja 11:3; Lúkarse 12:5.
Uummatikkut aalajangerluinnarsimagaanni, uppernermi pisuujunarpoq
Uummatip sakkortuumik uppertup nalunngilaa Jehovap oqaatsini aqqutigalugu sumilluunniit qinnuigigaluarpatigut imaluunniit piumaffigigaluarpatigut, eqqortuusoq uagutsinnullu pitsaanerpaasoq. (Jesaja 48:17, 18) Taamatut uummatillip Ussatit 3:5, 6-mi kajumissaarutip maleruarneratigut nalerisimaangaarneq nuannaangaarnerlu misigissavaa: „[Jehova] tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Uummatip uppinngitsup Jehova tatiginngitsooqajaasarpaa, ingammik pilliuteqartariaqarnermini, assersuutigalugu Naalagaaffiup soqutigisaanik salliutitsiniarnermini inuuniarnermini pisariillisitsiniarnermini. (Matîuse 6:33) Taamaattumik Jehova pissutissaqarluarluni uummat uppinngitsoq ’ajortumik’ taavaa. — Eprîarit 3:12.
Jehovamut uppernerput assigiinngittorpassuartigut ersertarpoq, aamma nammineq angerlarsimaffitsinni iliuuserisartakkatsinni. Galâsiamiut 6:7-mi najoqqutassiaq assersuutigeriartigu: ’Tammaqinasi, Guuti mitaatigeqqunngilaq, inuk siaruartikkani naapertorlugit katersuiumaarmat.’ Najoqqutassiamut tamatumunnga uppernerput, filminik isiginnaartakkatsigut, atuakkanik atuartakkatsigut, qinunitsigut aammalu nammineq Biibilimik atuaqqissaarnermi qanoq peqqissaartiginitsigut ersissaaq. Guutip oqaasiani allassimasut akueriniarlugit maleruarniarlugillu uummatikkut aalajangerluinnarniaraanni upperneq sakkortooq ’anersaamut siaruarterititsisoq’, pingaarutilerujussuuvoq. — Galâsiamiut 6:8.
Asanninneq — pissuseq annerpaaq
Asanninneq tassaavoq pissuseq sunit tamanit allanit uummatitta ’issortaanik’ Jehovap oqaasianik paasinniatitsisoq. Uppernermut neriunnermullu sanilliullugu apustili Paulusip asanninneq pissusertut ’annertut’ allaatigisimavaa. (1 Korintumiut 13:13) Uummat Guutimut asanninnermik ulikkaartoq Guutip naalanneratigut nuannaagaassaaq nalerisimaangaarlunilu; Guutip piumasaqaatai uumitsaatanngilai. Apustili Johannes oqarpoq: ’Guutimimmi asanninneq tassaavoq inassutai maleruarutsigik, inassutaalu artornanngillat.’ (1 Juánase 5:3) Jesus tamatumunnga assingusumik oqarsimavoq: ’Uannik asannittup oqaatsikka maleruassavai, Ataatamalu asassavaa.’ (Juánase 14:23) Malugiuk asanninneq taama ittoq akineqartarmat. Jehova qamannga pisumik asannippoq imminut asannillutik kajungilersimasunut.
Jehovap nalunngilaa naammalluinnanngitsuusugut, ilaatigullu tassunga ajortuliortarluta. Ungasillinngilaatigulli. Jehovap kiffamini isigisartagaa tassaavoq ’uummatimikkut iluunngarlutik’, uummammik ’kajumittumik’ imminut kiffartornersut. (1 Israelikkut 28:9) Soorunami Jehovap nalunngilaa uummatitsinni anersaap inerititaqarniarluta pissusit ajunngitsut ineriartortinnerinut piffissaq nukiillu atortariaqarivut. (Galâsiamiut 5:22, 23) Tamanna pissutigalugu kamagittarpoq, ’nalunnginnamiuk qanoq pinngortitaasugut, eqqaamallugulu pujualaannaasugut’. (Tussiaat 103:14) Jesusip takutippaa taamatut aamma isiginnittaaseqarluni. Ajoqersukkami kukkussutaat sualuttumik naqqissortanngilai, kisianni kamagittarluni ikiortarpai qiimmassartarlugillu. Jehovap Jesusillu asanninnerat, nallittuinerat kamagittarnerallu taakkununnga asanninnerulissutigissanngilavut? — Lúkarse 7:47; 2 Pîtruse 3:9.
Ilaannikkut ileqqut naasupiluttut ittut sorlanilluarsimasut sorlai ilanngullugit nusukkuminaatsikkukkit, iluanngitsumilluunniit, uteriitsumik naalasseriitsumillu pissuseqaruit qaangeruminaatsitannik nikalloqinak. Siumukarnissat sulissutigiinnarniaruk ’qasusuillutit qinnutigalugit’ Jehovallu anersaavanik piumallutit akulikitsumik torlulaatigalutit. (Rûmamiut 12:12) Ezrap maligassiuinerata malinnissaanut Jehovap ikiuiumatunerata iluatsitsisissavaatit ’[Jehovap] inatsisai paasiniarluarniarlugit maleruarniarlugillu’ uummatikkut aalajangerluinnarnissannut. (wE 1/3 2000)
[Qupp. 30-mi assiliartaq]
Allaat Babylonimi Ezra Guutimut tunniusimajuarpoq
[Suminngaanneernera]
Garo Nalbandian