Annernartua tikillugu tunisigit

„QINUSARTUMIK taasinnaavarma, tamanna soqutiginngilara, Jiisusimi sullippara.“ Oqaatsit taakkua naaggaartut palasianit oqaatigineqartut oqaluffeqarfiit aningaasalersorneqarnerat pillugu assortuussutaasartoq ersersilluarpaat. Upperisarsioqatigiit piusut aningaasanik annertungaatsiartunik tapersersorneqarneq kisiat iluaqutigalugu ataannarsinnaasutut isikkoqarput. Akissarsiaqartitsisussaapput, iivangkiiliumik siaruarterinermik aningaasaqarniartussaavoq oqaluffiillu nutaat sananeqartussaapput aserfallatsaaliorneqartussaallutillu. Aningaasat suminngaanniit pissarsiarineqassappat?

Oqaluffippassuarni pissarsiat qulinginik piumasaqartarnikkut.a „Pissarsiat qulinginik tunisisarnikkut nunarsuarmi Guutip naalagaaffini aningaasaqartippaa,“ iivangkilisti Norman Robertson oqarpoq. „Tamanna Guutip aningaasaqarniarnikkut aaqqissuussineraa, taamaalillunilu iivangkiiliup siaruarterneqarnissaa ajornarunnaarsillugu.“ Ilagiit tunisisarnissamik akisussaaffeqarneranik eqqaasissallugit nangaanartoqartinngilaa, erseqqissaatigaluguli: ’Aatsaat akissaqaraanni pissarsiat qulinginik tunisisoqarneq ajorpoq. Naalannikkut taamaaliortoqartarpoq. Qulinginik tunisinngitsoorneq Guutip inatsisaanik unioqqutitsinerulluinnarpoq. Peqquserluttuliorneruvoq.’ — Tithing — God’s Financial Plan.

Amerlanerit paasilluarpaat upperisarsioqatigiit aningaasanik pisariaqartitsimmata. Taamaakkaluartorli, aningaasanik qinnuuloortuarneq eqqissiunnaarutigaat immaqaluunniit ajattorlugu. Teologi Brasiliamiu Inácio Striederip oqaluffiit unnerluutigai „oqaluffeqarfimmi ajornartorsiutitik aaqqinniarlugit“ pissarsiat qulinginik tunisisarnissaq atormassuk, periaaserlu tamanna „kukkusutut ileqqorlunnertullu, aap, guutisiornermik tammarsimanermik” nalilerpaa. Tamatuma kinguneranik, ilaliivoq, „suliffissaaleqisut, uillarnerit, inuit inissiapalaani najugallit akiliinissaminullu inorsartut isumaqarput Guutip qimassimagaatsik, ’oqaluussisartumullu’ akiliingaatsiarnissaminut pisussaallutik allaat ilaquttatik kaatsittariaqarlugit“.

Eqqarsaatigeriaruk: Oqaluffiit pissarsiat qulinginik akiliisitsisartut Biibili malilluinnarpaat? Imaluunniit Guutimik mianerinnittunik ilaat atornerluippat savaatit piiaaffigalugit? Ilumut Guutip piumasaraa, oqartoqartarneratut, ’annernartua tikillugu tunisisoqartassasoq’?

[Quppernerup ataani ilanngussaq]