„Guuti qaninniarsiuk, taava taanna ilissinnut qanillissaaq“
Siornatigut kingornatigullu ’Guutip oqaasia sunniisinnaassuseqarpoq’
TONY inuusuttuaraasoq naapissimagaluarukku, Sydney-imi najugaqarfiit tujorminartut ilaanni naapissimassagaluarpat nukappiaraq sukannersoq peqqarniitsorlu. Ikinngutai inupilunnut ilaasortaapput, saassussillutik tillinniartartunut, akeqqaminnut sorsuuttartunut aallaasersortartunullu peqataasarlutik.
Tony qulinik ukioqarluni pujortartalerpoq, 14-nik ukioqarluni marihuanatortalerpoq inuunerluttuullunilu. 16-nik ukioqarluni heroinimik pinngitsuuisinnaajunnaarsimavoq, tamannalu kokainimik LSD-millu atuisalernermik kinguneqarluni. „Ikiaroorutaasinnaasut suulluunniit atugaraakka,“ oqaluttuarpoq. Aaqqissuulluagaasumik pinerliinianut peqatigiiffinnut tusaamanerlugaasunut marlunnut ikiaroornartunik tuniniaasartunngorpoq, sivitsunngitsorlu Australiap kangiata sineriaani ikiaroornartunik tuniniaasartutut tutsuiginartutut ilisimaneqalerpoq.
Tonyp heroinimik marihuanamillu atornerluinerminut ullormut 1350 koruunit 2700 koruuniillu akornanni atortarpai. Tamannali ilaqutaanut akisunerungaarpoq. Oqaluttuarpoq: „Nuliaralu qasseeriaqaluta timmiarsiummik savimmillu siorasaarneqartarpugut, ikiaroornartut aningaasallu tigummisavut pilerigalugit.“ Tony pingasoriarluni parnaarussivimmeereerami misigaaq inuunini eqqarsaatigilluartariaqarlugu.
Oqaluffiliartarpoq, Guutili, oqartoqartarnerattut, ajortuliortunik naassaanngitsumik anniarfimmi pillaasartoq kajungerivallaanngilaa. Jehovap Nalunaajaasuinik pulaarneqarami tupaallaatigisaminik paasivaa Guuti taamaattuunngitsoq. Tonyp nuannaarutigaa paasigamiuk Guutip ikiuineratigut inuunini aaqqissinnaagini. Tonyp Jiisusip oqaasii killissutigai: ’Guutimut suut tamarmik ajornanngillat.’ (Markusi 10:27) Oqaatsit uku qiimmaallannartut ingammik killitsissutiginerpaavai: „Guuti qaninniarsiuk, taava taanna ilissinnut qanillissaaq.“ — Jaaku 4:8.
Biibilip najoqqutassiai malillugit inuuniarneq Tonymut unamminiarnartorujussuuvoq. Oqarpoq: „Siulliullugu taamaatitara tassaavoq pujortarneq. Tamanna siornatigut iluatsinngisaannarsimavoq, naak arlaleriarlunga unitsinniartaraluarlugu. Jehovap ikiuineratigut ukiuni 15-ini inussiaataaffigisara, ikiaroornartunik atornerluineq, unitsissinnaasimavara. Isumaqanngisaannarsimavunga ileqqut tamakkua taamaatissinnaallugit.“
Biibilimi ajoqersuutigineqanngitsoq — Guuti naassaanngitsumik anniarfimmi pillaasartoq — ersigiunnaarlugu Tony nulianilu nunami paratiisiusumi naassaanngitsumik inuunissamik neriuuteqalerput. (Tussiaat 37:10, 11; Ussatit 2:21) „Guutip najoqqutassiaanut naapertuuttunngorsarniarnera uannut sivisoqaaq,“ nassuerpoq, „Jehovalli ikiuineratigut iluatsippara.“
Ikiaroornartunik atornerluisimasoq kristumiunngorpoq. Nulianilu piumassutsiminnik piffissaq nukitillu, nalunaaquttap akunneri tusindillit, atortarpaat allat Biibilimik ajoqersorlugit. Aamma meeqqatik marluk perorsarluarniarlugit ilungersorput. Allanngornerujussuaq tamanna aatsaat pisinnaavoq pissaaneq Guutip oqaasiani Biibilimiittoq iluaqutigalugu. Ilumoorpoq Paulusi oqarmat ’Guutip oqaasia uumavoq sunniisinnaassuseqarlunilu’. — Hebræerit 4:12.
Tamakkuninnga nuannersunik assersuutissaqaraluartoq inuit ilaat oqartarput Jehovap Nalunaajaasuisa ilaqutariit aserortertaraat inuusuttullu pingaartitaannik naqisimannittartut. Tamanna tunngavissaqanngilluinnarpoq. Tonymik pisimasoq takussutissaalluarpoq.
Amerlasuut Tonytut atornerluinermit navianartumit aniguisoqarsinnaanera misigisimavaat. Qanoq ilillutik? Guuti upperalugu, tassunga oqaasianullu tunaartarinninnikkut, aammalu kristumiut asannittut isumassuisullu ikiuinerisigut. Tonyp nuannaarutigalugu oqaatigaa: „Takuara qanoq meeqqakka Biibilip najoqqutassiaanik sernissorneqartut. Ajoqersuutaata aappariinnerput annaappaa, eqqaamiugullu eqqissillutik sinissinnaalerput taakkununnga siooranarunnaarama.“ (wE 1/15 03)
[Qupp. 9-mi issuagaq]
’Jehovap ikiuineratigut ukiuni 15-ini inussiaataaffigisara, ikiaroornartunik atornerluineq, unitsissinnaasimavara’
[Qupp. 9-mi ungalusaq]
Biibilip najoqqutassiai sunniuteqarput
Ikiaroornartunik atornerluisorpassuit najoqqutassiat arlallit Biibilimeersut atornerluinerminnit ulorianartumit aniguiniarnerminni iluaqutigisimavaat. Guutip oqaasia ilaatigut imaattumik siunnersuuteqarpoq:
„Immitsinnik minguiarniarta, timimi anersaamilu minguk tamaat piiassavarput illernartuullutalu Guutimik mianerinninnermi.” (2 Korinthimiut 7:1) Tassa ikiaroornartutorneq Guutip inatsisaanut akerliuvoq.
„Naalakkamik mianerinninneq ilisimassusermut aallarniutaavoq, Illernartuusumik ilisimanninneq silaqassuseqalersitsisarpoq.“ (Ussatit 9:10) Guutimik mianerinninnerup, Jehova pillugu taassumalu pissutsinut isiginnittaasianik ilisimasaqalernermik tunngavillip, inuppassuit ikiaroornartunik atornerluisuujunnaarsillugit ikiorsimavai.
„[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu. Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ (Ussatit 3:5, 6) Ileqqupiluit nungutinneqarsinnaapput uummat tamakkerlugu Guutimut tatiginninnikkut tassungalu tunaartarinninnikkut.