Kristumiut siulliit Mosesillu inatsisai

„Inatsisit tassaapput uagutsinnik Kristusimut siulersuillutik perorsaasut.“ — Galatiamiut 3:24, NV.

1, 2. Israelikkut Mosesip inatsisaanik maleruaaqqissaarunik qanoq iluaqutigissavaat?

UKIUMI 1513-imi u.n.s. Jehovap Israelikkut inatsisinik tunivai. Inuiaqatigiit oqarfigai naalappanni pilluaqqussallugit inuuneq nalerisimaarnartoq nuannaarutigisinnaaqqullugu. — 2 Mosesi 19:5, 6.

² Inatsisit taakku, Mosesip inatsisaanik imaluunniit Inatsisinik taaneqartut, ’illernarput iluarlutillu ajunngitsuullutillu’. (Romamiut 7:12) Inussiarnerneq, peqqusersuissuseq, inoqammik asanninneq ileqqorissaartuunerlu siuarsarpaat. (2 Mosesi 23:4, 5; 3 Mosesi 19:14; 5 Mosesi 15:13-15; 22:10, 22) Inatsisini aamma juutit kajumissaarneqarput asaqatigeeqqullugit. (3 Mosesi 19:18) Kisianni juutiunngitsunik Inatsisinik maleruaanngitsunik nuliaqqusaanatilluunniit uineqqusaanngillat ilagisaqaqquneqarnatillu. (5 Mosesi 7:3, 4) Mosesip inatsisai juutit juutiunngitsullu akornanni ’qarmatut avissaarutitut’ ipput Guutillu innuttaanik Guutimik nalusut eqqarsariaasiannit inooriaasiannillu mingutsitsinaveersaartuullutik. — Efesosimiut 2:14, 15; Johannesi 18:28.

3. Inatsisit naammalluinnartumik maleruarneqarsinnaannginnerat eqqarsaatigalugu sumut iluaqutaappat?

³ Juutilli, allaat maleruaalluarniarnerpaat, Guutip inatsisai naammalluinnartumik maleruarsinnaanngilaat. Jehovap piumaffigivallaarpai? Naamik. Inatsisit Israelikkunnut tunniunneqarnerannut pissutaasut ilagaat ’unioqqutitsinerit’ ilisimaneqalernissaat. (Galatiamiut 3:19) Inatsisini juutit paasitinneqarput utertitsisussap saqqummernissaa taakkununnga pisariaqarluinnavissoq. Kiisami takkummat juutit upperlutillu aalajaatsut nuannaarutigaat. Maanna ajortimit toqumillu perloqqusaanerminnit aniguisitaanissaat qanillivoq! — Johannesi 1:29.

4. Inatsisit qanoq ’Kristusimut siulersuillutik perorsaasuuppat’?

⁴ Mosesip inatsisai aaqqiissutaagallartussaannaapput. Uppeqatini kristumiut allaffigalugit, apustili Paulusip inatsisit ’uagutsinnik Kristusimut siulersuillutik perorsaasutut’ allaatigai. (Galatiamiut 3:24, NV) Itsaq perorsaasup meeqqat atuarfimmukaattarpai aasarlugillu. Nammineq ilinniartitsisuunngilaq, meeqqalli ilinniartitsisumukaatiinnartarpai. Taamatut Mosesip inatsisaanit juutit Guutimik mianerinnittut Kristusimut siulersorneqarnissaat siunertaavoq. Jiisusi neriorsuivoq ajoqersukkani ’ullut tamaasa najorniarlugit pissutsit aaqqissuussaanerata naggatissaanut allaat’. (Matthæusi 28:20, NV) Kristumiut ilagiit pilersinneqareermata, ’perorsaasut’ — Inatsisit — siunertaarupput. (Romamiut 10:4; Galatiamiut 3:25) Juutilli kristumiut ilaasa ilumoortoq tamanna pingaarutilik paasiuminaatippaat. Taamaattumik Inatsisit ilaat maleruaannarpaat, allaat Jiisusip makinnerata kingorna. Allat isummaminnik allannguipput, taamaalillutillu uatsinnut ullumikkut inuusunut maligassiuilluarput. Tamanna paasiniariartigu.

Kristumiut ajoqersuutaannik pissanganartumik paasinnilerneq

5. Petrusi takorruuisinneqarnermini qanoq peqquneqarpa, aamma sooq uissuummingaarpa?

⁵ Ukiumi 36-mi apustili Petrusi maluginiarnartumik takorruuisinneqarpoq. Takorruuisinneqartilluni nipimit qilammeersumit tusakkaminit peqquneqarpoq timmissanik nersutinillu Inatsisit naapertorlugit minguttuujusunik toqutseriarluni nereqqullugu. Petrusi uissuummingaarpoq! „Illernanngitsunik mingunnartunillu suugaluartunilluunniit“ nerinngisaannarsimavoq. Nipilli oqarfigaa: „Guutip minguitsuuneragai nalinginnaatissanngilatit.“ (Apustilit Suliaat 10:9-15) Inatsisinik uteriilluni aalajangiussinissaminut taarsiullugu Petrusi isummaminik allannguivoq. Tamatumalu kingunerisaanik Guutip siunertaa pillugu asseqanngilluinnartumik paasinnilerpoq.

6, 7. Sooq Petrusi isumaqarpa maanna juutiunngitsunut oqaluussisinnaalerluni, sunalu aamma paasilerpaa?

⁶ Ima pisoqarpoq: Angutit pingasut Petrusip illusimmavianukarput qinnuiginiarlugu juutiunngitsumut kipineqanngitsumut Guutimik mianerinnittumut Korneliusimik atilimmut ilageqqullutik. Petrusip angutit iseqquai illusisillugillu. Takorruukkap qanoq isumaqarnera paasereerpaa, taamaattumillu aqaguani Korneliusikkunnukaqatigai. Tassani Petrusi Jiisusi Kristusi pillugu sukumiisumik nalunaajaavoq, ilaatigut ima oqarluni: „Ilumut paasilerpara Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.“ Korneliusiinnaanngitsoq aammali eqqarlii ikinngutaalu Jiisusimut uppertunngorput, ’oqaatsimillu tusartut tamaasa anersaap illernartup tikippai’. Petrusip paasivaa Jehova iliuuseqartoq, taamaattumillu „peqqusivoq Jiisusi-Kristusip aqqani kuineqaqqullugit“. — Apustilit Suliaat 10:17-48.

⁷ Sooq Petrusip paasisinnaanngorpaa juutiunngitsut Mosesip inatsisaanik maleruaanngitsut maanna Jiisusi Kristusimut ajoqersugaanngorsinnaalersut? Anersaakkut siuneqassuseqarami. Guutip takutissimammagu juutiunngitsut kipineqanngitsut akueralugit anersaaminik kuillugit, Petrusi isummerpoq aamma taakku kuisissinnaanngortut. Petrusip aamma paasisimagunarpaa Guutip piumasarinngikkaa kristumiut juutiunngitsut kuisinniarlutik Mosesip inatsisaanik maleruaanissaat. Illit taamanikkut inuusimasuuguit Petrusitut isummannik allannguinissannut piumassuseqartigisimassagaluarpit?

Ilaasa ’perorsaasoq’ malittuarpaat

8. Petrusip oqaasiinut akerliusumik kristumiut Jerusalemimiittut ilaat kipineqarneq eqqarsaatigalugu qanoq oqarpat?

⁸ Petrusip Korneliusi pulaareeramiuk Jerusalemimukarpoq. Juutiunngitsut kipineqanngitsut „Guutip oqaasia ilassigaat“ ilagiit tassaniittut tusareerpaat, kristumiullu arlallit juutisut tunuliaqutallit tamanna eqqissiunnaarutigaat. (Apustilit Suliaat 11:1-3) Kipineqarnermik pingaartitsisut akuerigaluarpaat juutiunngitsut Jiisusimut ajoqersuganngorsinnaanerat, inuiaqatigiinnilli juutiunngitsuneersut annaanneqassappata, Inatsisinik maleruaasariaqarnerarpaat. Sumiiffiilli ilaanni kristumiut juutiunngitsuinnangajaapput, taakkunanilu kipineqarneq akerleriissutaasimassagunanngilaq. Ukiut 13-it missiliorlugit tamanna akerleriissutaajuarpoq. (1 Korinthimiut 1:10) Tamanna ukiuni hundredelinni siullerni kristumiunut misilinneqaataangaarsimassaaq — ingammik juutiunngitsunut juutit najugaqarfiini najugaqartunut.

9. Sooq kipineqarnerup akerleriissutaanerata aalajangiiffigineqarnissaa pingaaruteqarluinnarpa?

⁹ Ukiumi 49-mi pissutsit najummassimanarnerulerput kristumiut Jerusalemimeersut ilaat Antiokiamut Syriamiittumut, Paulusip oqaluussiffigisaanut, tikimmata. Taakku ilinniartitsilerput juutiunngitsut kristumiut upperisaannut ilannguttut Inatsisinik maleruaasariaqartut kipineqartariaqartullu. Mikinngitsumillu isumaqatigiinngissutaalerpoq oqallissutaalerlunilu kristumiut taakkua Paulusillu Barnabasillu akornanni. Apeqqut tamanna aalajangiiffigineqanngippat kristumiut ilaat, juutiugunik juutiunngikkunilluunniit, tunussinngitsoorsinnaanngillat. Taamaattumik aalajangerneqarpoq Paulusi allallu Jerusalemimukassasut kristumiullu siulersuisoqatigiivi qinnuigalugit apeqqut inaarutaasumik aalajangiiffigeqqullugu. — Apustilit Suliaat 15:1, 2, 24.

Ammasumik oqallinneq tamatumalu kingorna isumaqatigiinneq!

10. Siulersuisoqatigiit suut eqqarsaatigaat juutiunngitsut qanoq inissisimaffeqalernissaannik aalajangiitinnatik?

¹⁰ Tamanna pillugu ataatsimiittoqarnerani kipineqartarneq aalajangiusimaniarlugu ilaat oqarsimagunarput, allat akerliusut. Aalajangiinermili misigissutsit pingaarnerpaatinneqanngillat. Oqallisereeqalutik apustilit Petrusip Paulusillu oqaluttuaraat kipineqanngitsut akornanni Jehovap nalunaaqqutiliarisimasai. Nassuiarpaat Guutip juutiunngitsunut kipineqanngitsunut anersaaq illernartoq kuisimagaa. Ima aperippullusooq: ’Ilagiit kristumiut Guutip akuerisaanik itigartitsisinnaatitaappaat?’ Tamatuma kingorna ajoqersugaq Jaaku allassimaffimmik atuagaqarpoq Jehovap tamatumani piumasaata sunaaneranik najuuttunik tamanik paasititsisumik. — Apustilit Suliaat 15:4-17.

11. Siulersuisoqatigiit aalajangernerannut suna sunniuteqanngila, qanorlu takuneqarsinnaava Jehovap siulersuisoqatigiit aalajangernerat pilluaqqugaa?

¹¹ Maanna tamarmik pissangallutik siulersuisoqatigiit aalajangernissaat utaqqivaat. Juutisut tunuliaqutaqarnertik pissutigalugu kipineqartarneq aalajangiutissanerpaat? Naamik. Angutit taakku upperlutillu aalajaatsut aalajangiussimavaat Allakkat Guutillu anersaavata illernartup siulersuinera malinniarlugit. Nalunaajaatit tassunga tunngasut tamaasa tusareerlugit siulersuisoqatigiit isumaqatigiipput kristumiut juutiunngitsut kipineqarnissaat Mosesillu inatsisaanik maleruaanissaat pisariaqanngitsut. Qatanngutit aalajangernerat tusaramikku nuannaarutigaat, ilagiillu ’ullut tamaasa amerliartorput’. Kristumiut siunnersuut paasiuminartoq tamanna Guutimeersoq maleruaramikku, Allakkanik tunngaveqarluartoq akissut pilluaqquneqaatigaat. (Apustilit Suliaat 15:19-23, 28, 29; 16:1-5) Pingaarutilimmilli suli apeqqutissaqarpoq akineqartariaqartumik.

Juutit kristumiut qanoq pissappat?

12. Apeqqut suna suli aalajangiiffigineqanngila?

¹² Siulersuisoqatigiit erseqqissumik paasititsipput kristumiut juutiunngitsut kipineqartariaqanngitsut. Juutimmi kristumiut? Siulersuisoqatigiit aalajangerneranni tamanna akineqanngilaq.

13. Annaanneqassagaanni Mosesip inatsisaasa maleruarneqartariaqarnerannik isuma sooq kukkunerua?

¹³ Juutit kristumiut ilaasa ’inatsisinik ilungersuutiginnittut’ qitornatik nukappiaqqat suli kipineqartittarpaat, allatiguttaaq Mosesip inatsisaanik maleruaasarput. (Apustilit Suliaat 21:20) Ilaat allaat isumaqarput juutit kristumiut Inatsisit maleruartussaagaat annaanneqarumallutik. Tamatumuunali kukkulluinnarput. Assersuutigalugu kristumiu qanoq uumasumik pilliuteqarsinnaava ajortiminik isumakkeerfigineqarumalluni? Jiisusip pilliutaa pissutigalugu pilliutit taamaattut pisariaarussimapput. Juutimmi juutiunngitsunik ilagisaqarnaveersaarnissaat pillugu Inatsisini piumasarineqartoq? Kristumiunut iivangkiiliumik oqaluussisartunut aallussilluartunut ajornakusoorsimassaqaaq killiliinerit taamaattut maleruarnissaat, juutiunngitsunik Jiisusip peqqussutaanik tamanik ajoqersuinissamik peqqussut maleruarniaatigalugu. (Matthæusi 28:19, 20; Apustilit Suliaat 1:8; 10:28)a Siulersuisoqatigiit ataatsimiinnerisa ilaanni apeqqutip tamatuma aalajangiiffigineqarneranik allassimasoqanngilaq. Kisianni ilagiit kristumiut ikiorneqanngitsoornavianngilaq.

14. Paulusip allagaani isumassarsiarititaasuni Inatsisit eqqarsaatigalugit qanoq siunnersuuteqarpa?

¹⁴ Siunnersuut siulersuisoqatigiinnit allakkatigut siunnersuutaanngilaq, apustililli allagaanni isumassarsiarititaasuni arlalinniippoq. Assersuutigalugu apustili Paulusip juutit juutiunngitsullu Romami najugaqartut kimittuunik allaffigai. Allakkamini nassuiaappai juutiviusoq ’tassaasoq qamuuna juutiusoq, kipineqartorlu tassa uummatimigut kipineqartoq, anersaakkut’. (Romamiut 2:28, 29) Allakkaminilu taakkunani Paulusi assersuusiorpoq uppernarsarniarlugu kristumiut Inatsisinik maleruaasussaajunnaartut. Tunngavilersuilluni allappoq arnaq angutinik marlunnik ataatsikkut ueqarsinnaanngitsoq. Uinili toquppat kateqqinnissaminut kiffaanngissuseqarpoq. Nangilluni assersuut taanna atorpaa paasitinniarlugu kristumiut tanitat Mosesip inatsisaanik maleruaasussaatitaasinnaanngitsut Kristusimit pigineqaatigalutik. Allatut oqaatigalugu, inatsisit eqqarsaatigalugit toqusariaqarput Kristusi ataasioqatigilersinnaaqqullugu. — Romamiut 7:1-5.

Paasinnikkumaataarput

15, 16. Juutit kristumiut ilaat Inatsisit eqqarsaatigalugit sooq paasinninngillat, aamma sooq tamanna anersaakkut eqqumajuarnissap pisariaqarneranut assersuutissaalluarpa?

¹⁵ Paulusip Inatsisit pillugit oqaasii akerlilerneqarsinnaanngillat. Soormiuna juutit kristumiut ilaasa paasiuminaatsikkaat? Ilaatigut anersaakkut siuneqassuseqannginnamik. Assersuutigalugu anersaakkut inuussutissat tamuasarissat pigiliutinngilaat. (Hebræerit 5:11-14) Aamma kristumiut ataatsimiinnerini uppeqatitik peqatiginiarlugit aalajangersimasumik takkunneq ajorput. (Hebræerit 10:23-25) Ilaasa paasinninnginnerannut pissutaasoq alla unaasinnaavoq Inatsisit pissusiviat. Tassami Inatsisit takussaasut, malugineqarsinnaasut attorneqarsinnaasullu, soorlu naalaffik palasillu, pingaartippaat. Anersaakkut ittunik pingaartitsivallaanngitsut kristumiussutsimi ajoqersuutit itisuut, piviusunik takussaanngitsunik qitiutitsisut, akuererinissaannit Inatsisit akueriuminarnerutingaarpaat. — 2 Korinthimiut 4:18.

¹⁶ Paulusip Galatiamiunut allagaani kristumiunik imminnut taasut ilaasa Inatsisinik maleruaarusulluinnarnerannut pissutaasoq alla eqqartorneqarpoq. Nassuiarpaa taakku ataqqineqarusuttuusut, upperisamut nalinginnaasumut ilaasutut akuerineqarusuttuusut. Inuiaqatigiinnit allaanerorusunngillat, taamaattumillu allat assiginiarlugit suut tamangajaasa akuerusuppaat. Guutimit akuerineqarnissaminnit inunnit akuerisaalernissartik soqutigineruaat. — Galatiamiut 6:12.

17. Qanga paasinarsilluinnarpa Inatsisinik maleruaaneq qanoq isigineqartariaqarnersoq?

¹⁷ Kristumiut siuneqassusillit allakkanillu Paulusip allallu Guutimit isumassarsisitaallutik allagaannik misissueqqissaarsimasut Inatsisit eqqarsaatigalugit eqqortumik isumaqalersimapput. Aatsaalli ukiumi 70-imi juutit kristumiut tamakkerlutik Mosesip inatsisaanik eqqortumik isiginnilernerat paasinarsivoq. Ukiormi taanna Guutip Jerusalemip, naalaffiup palasillu allattorsimaffiisa aserorneqarnerat akueraa. Tamatuma Inatsisit tamaasa kikkunnilluunniit maleruarneqarsinnaajunnaarsilluinnarpai.

Ullumikkut qanoq ilinniarfigisinnaavarput?

18, 19. (a) Anersaakkut peqqissuujuassagutta isiginnittaaseq qanoq ittoq ineriartortittariaqarparput, qanorlu isiginnittaaseqarnaveersaartariaqarpugut? (b) Qatanngutit angutit akisussaasut unnersuussutaasa malinnissaat eqqarsaatigalugit Paulusip maligassiaa qanoq ilinniarfigisinnaavarput? (Takuuk ungalusaq qupp. 30-miittoq.)

¹⁸ Itsaq pisimasut tamakku misissoreerlugit imminut immaqa ima aperivutit: ’Taamanikkut inuusimasuuguma, Guutip piumasaata paasinarsiartornerani qanormita qisuariarsimassagaluarpunga? Uteriillunga isumaga aalajangiusimalluinnarsimassagaluarnerpara? Naammagittarlungaluunniit eqqortumik paasinnittoqarnissaa utaqqisimassagaluarnerpara? Eqqortumilli paasinnittoqarpat paasinninneq nutaaq uummatikkut iluunngarlunga tapersersorsimassagaluarnerpara?’

¹⁹ Soorunami qulakkeersinnaanngilarput taamanikkut inuusimasuugutta qanoq qisuariarsimassagaluarnerluta. Imminulli ima aperisinnaavugut: ’Ullumikkut Biibilimik eqqornerusumik paasinnittoqaraangat qanoq qisuariartarpunga?’ (Matthæusi 24:45) ’Siunnersuutit Biibilimeersut maleruarniartarpakka inatsisit oqaasertaannik maleruaaginnarnanga, aammali inatsisit anersaavat malillugu?’ (1 Korinthimiut 14:20) ’Naammagittarlunga Jehova utaqqisarpara apeqqutit aalajangersimasut ingerlaannaq paasitinneqanngikkaangata?’ ’Qimagukkiartulissanngikkutta’, pingaaruteqarpoq anersaakkut inuussutissat maannakkut pisinnaasavut atorluassallugit. (Hebræerit 2:1) Jehovap oqaatsimigut, anersaamigut nunarsuarmilu peqatigiissortamigut siunnersoraangatigut tusarnaaqqissaartartigu. Taamaaliorutta inuunermik pilluarnartumik nalerisimaarnartumik ataavartumillu Jehovap pilluaqqussavaatigut. (wE 3/15 03)

[Quppernerup ataani ilanngussat]

Uteqqiinermi apeqqutit

• Qanoq ilillutik Mosesip inatsisai ’Kristusimut siulersuillutik perorsaasuuppat’?

• Petrusip kipineqarnermillu pingaartitsisut sallusuissummik paasinninnerup allanngortinneqarneranik assigiinngitsumik qisuariarfiginninnerat qanoq nassuiassaviuk?

• Jehovap ullumikkut sallusuissummik paasisitseriaasia pillugu sumik ilikkagaqarpit?

[Qupp. 30-mi ungalusaq/​assiliartaq]

Paulusip ilumoorfiginninnermigut misilinneqarnermini maniguunnera

Ajoqersuiartortitatut iluatsittumik angalareerluni Paulusi ukiumi 56-imi Jerusalemimut tikippoq. Tassani uppernermigut misilinneqarpoq. Ilagiit tusarsimavaat Mosesip inatsisai atorunnaartut ajoqersuutigigaa. Utoqqaanertat Jerusalemimiittut isumakuluutigaat juutit kristumiunngorlaat Paulusip Inatsisit pillugit ammasumik oqaasiinit mamiatsatsinneqarnissaat aamma immaqa kristumiunik Jehovap aaqqissuussineranik ataqqinninnginneraalernissaat. Ilagiinni juutit kristumiut sisamat neriorsuisimapput, immaqa nasiræeritut neriorsuillutik, naalaffiliartariaqarpullu neriorsuummut atatillugu piumasaqaatit naammassiniarlugit.

Utoqqaanertat maanna Paulusi qinnuigaat angutit sisamat taakku naalaffimmukaqatigeqqullugit, aningaasartuutaannillu akiliuteqqullugit. Paulusi minnerpaamik allakkamini marlunni tunngavilersuuteqarsimavoq annaanneqarnissamut Inatsisinik maleruaanissaq pisariaqanngitsoq. Allalli nalunngeqatiginnissutaat eqqarsaatigai. Tamatuma siorna allappoq: „Inatsisit ataanniittunut inatsisit ataanniittutut ilerpunga . . . inatsisit ataanniittut ilataariumallugit.“ (1 Korinthimiut 9:20-23) Taamaattorli Biibilimi najoqqutassiat pingaarutillit pineqaraangata Paulusi eqqortuusup akerlianut akuersiinnanngisaannarpoq, misigisimagunarporli utoqqaanertat qinnutaat naapertorlugu iliuuseqarsinnaalluni. (Apustilit Suliaat 21:15-26) Taamaalioramili eqqunngitsuliunngilaq, neriorsuisarnermik aaqqissuussineq Biibilimut akerliunngimmat. Aamma naalaffik minguitsumik pallorfiginninnermut atorneqartarsimavoq, guutipilussiornermuunngitsoq. Taamaattumik ilaasa mamiatsannissaannut pisuujumanani Paulusi qinnuigineqarnermisut iliorpoq. (1 Korinthimiut 8:13) Paulusi taamaaliorsinnaagami qularnanngitsumik maniguutingaartariaqarsimassaaq, tamannalu taassuminnga pingaartitsinerulissutigissavarput.

[Qupp. 28, 29-mi assiliartaq]

Ukiuni arlalinni kristumiorpassuit Mosesip inatsisaanik assigiinngitsunik isumaqarfiginnittarsimapput