’Ilissi ima qinussaasi’

ATAATARPUUP oqaasertai nalunngiligit? Qinnutaavoq najoqqutassaq Jiisusi Kristusip uagutsinnut ilinniartitsissutaa. Qaqqami oqaluutsimini tusaamasaasumi ima oqarpoq: „Taamaattumik ilissi ima qinussaasi.“ (Matthæusi 6:9) Jiisusip qinnut taanna uagutsinnut tunniussarimmagu taaneqartarportaaq Naalakkap qinnutaa, nunamili maani ataatarpuutut ilisimaneqarneruvoq (latiinerisut, paternoster).

Silarsuarmi tamarmi millionillit qinnut ataatarpooq alanngaarsinnaavaat akulikitsumillu, immaqa allaat ullut tamaasa, qinnutigisarlugu. Amerlasuut atuarfinni pisunilu immikkut ittuni atortarpaat. Sooq qinnut taannarpiaq amerlasuunit taama pingaartinneqartigiva?

Cyprian, teologi 200-kkunni inuusoq ima allappoq: „Qinnummik Kristusimit pisatsinnit allamik imaqarnerusoqarpa . . .? Ataatamut qinnummik Ernerup Sallusuissutaasup uagutsinnut tunniussaanit ilumoornerusoqarsinnaava?“ — Johannesi 14:6.

Ilagiit katuullit Ruumalerisut katekisimuusertik malillugu ataatarpooq „kristumiut qinnutaasa pingaarnersaattut“ isigaat. The World Book Encyclopedia-mi qinnut taanna upperisarsioqatigiinni kristumiuunerartuni tamani pingaarutilimmik inissisimasutut akuerineqarpoq, „kristumiutullu uppernermut ersiutit tunngaviusut“ ilaattut taaneqarluni.

Kisianni nassuerutigisariaqarpoq ataatarpoortartorpassuit oqaatsit qanoq isumaqarnerat paasilluarsimanngikkaat. Canadamiut aviisianni Ottawa Citizen-imi ima allassimavoq: „Kristumiutut upperisamik arlaatigut tunuliaqutaqaruit, qularnanngilaq ataatarpooq alanngaarsinnaalersimassagit, immaqali paasiitigalugu arriitsumik ataatarpoornissat sapernartissavat.“

Guutimut qinnutitta nammineq paasinissaat pingaaruteqaqigami? Sooq Jiisusip ataatarpuumik ilinniartippaatigut? Apeqqutit taakku misissoqqissaariartigit.