Harmagedoni naggatissaq ajunaarfiusussaq?
HARMAGEDONI! Oqaaseq taanna tusarnikuuiuk? Oqaaseq Biibiliminngaanneersoq silarsuup ilarujussuani ilisimaneqarluarpoq. Inuppassuit tusaraangamikku piuneerussaaneq imaluunniit silarsuup ikuallannera eqqarsaatigisarpaat. Inuiaat siunissaat nuanniitsoq oqaatiginiarneqaraangat atorneqartarpoq. Aliikkutassiani amiilaarnartuliornikkut inuit ’Harmagedoneqarumaarneranik’ takorluuinerat uummaarinnerulersimavoq. Oqaaseq paasiuminaatsunngortinneqarsimavoq paatsoorneqarsimaqalunilu. Harmagedonip suuneranik isummat amerlaqaat, amerlanerilli Biibilimi ajoqersuutinut naapertuutinngillat.
Biibilimi Harmagedoni „silarsuup naggatissaanut“ atassuserneqarmat oqaatsip isumaviata paasilluinnarnissaa pingaaruteqangaarpoq, ilaa? (Matthæusi 24:3) Harmagedonip suuneranik, aamma ilinnut ilaquttannullu qanoq sunniuteqarumaarneranik, apeqqutit Guutip oqaasiani, suup eqqortuuneranik najoqqutassaviusumi, akissutissarsioraanni silatusaarnerussaaq, ilaa?
Taamatut misissuinerup takutissavaa Harmagedoni tassaanngitsoq naggatissaq ajunaarfiusussaq, tassaasorli inunnut silarsuassami nutaami naapertuilluassuseqarfiusumi inoorusuttunut aallaqqaataajumaartoq nuannersoq. Allaaserisaq tulliuttoq atuarukku ilumoortoq Biibilimeersoq pingaarutilik taanna paasilluassavat.
[Qupp. 3-mi ungalusaq/assiliartaq]
HARMAGEDONI SUUSORAAJUK?
• Atomimik ajunaarnersuaq
• Pinngortitami ajunaarnersuaq
• Ulloriarsuup nunarsuarmut apornera
• Guutip ajortunik piuneerutsitsinera