Qanoq aalajangigassanik aalajangiisarsinnaavit Guutip nuannaarutigisaanik?

USA-mi angut aningaaseriviliarsimavoq 25.000 dollars-inik kontomut immikkut isumaqatigiissutitalimmut ilisiniarluni. Kisianni aningaaserivimmi sulisup angut siunnersorsimavaa aningaasaatini piginneqataassutinut inisseqqullugit unnerlugu piginneqataassutinik niueqatigiinnermi sivisunerusoq eqqarsaatigalugu aningaasat naleerutinngisaannartarmata. Angutip siunnersuut malinniarlugu aalajangersimavoq. Sivitsunngitsorli aningaasaliissutai nalikillerujussuarsimapput.

Assersuutip tamatuma takutippaa isumatusaartumik aalajangiinissaq ajornakusoorsinnaasartoq. Inuunitsinnimi qanoq isumatusaartumik aalajangiisarsinnaavugut? Aalajangikkat amerlasuut kingunertusinnaapput — ajunngitsunik ajortunilluunniit — allaallu inuunermik toqumilluunniit kinguneqarsinnaallutik. Isumatusaartumimmi aalajangiisarnissarput qanoq qularinngissinnaavarput?

„Aajuna aqqusineq“

Ullut tamaasa aalajangiisarpugut sunik nerissanerluta, qanoq atisalersussanerluta, sumunngassanerluta ilaalu ilanngullugit. Aalajangigassat pingaaruteqarpasinnginnerusut ilaat ilungersunartunik kinguneqarsinnaapput. Assersuutigalugu sikaritsimik siullerpaamik ikitsiniarluni aalajangerneq pujortartuaannalernermik kinguneqarsinnaavoq. Aalajangigassat pingaaruteqarpasikkaluartulluunniit qanoq kinguneqarsinnaanerat suusupaginngisaannartariaqarparput.

Aalajangigassaqaraangatta sumi siunnersortissarsiorsinnaavugut, pingaaruteqarpasinngikkaluartuttaaq pillugit? Qularnanngitsumik qujarutissaqaarput tatiginartumik siunnersuisoqarpat, ajornakusoortumik aalajangigassaqarnitsinni uagutsinnik ilitsersuisinnaasumik. Taamatut ittumik siunnersuisoqarpoq. Atuagatoqqami ullutsinnuttaaq naleqqulluartumi ima allassimavoq: „Talerpiup saamiulluunniit tungaanut sanguleraangassi siutissi tusaassavaat kingunissinni ima oqartoqartoq: ’Aqqut aana ingerlavigisassarsi.’“ (Esaja 30:21, 1990) Kinaana oqaluttoq? Aamma qanoq qularinngissinnaavarput siunnersuutaa tatiginartuusoq?

Neriorsueqqissaarneq eqqaaneqartoq tamanna Biibilimiippoq. Inuit millionilikkuutaat atuagaq taanna misissorsimavaat paasillugulu Pinngortitsisumit, Jehova Guutimit, isumassarsiarititaasoq. (2 Timotheusi 3:16, 17) Jehovap Pinngortitsisutsitut uagut pilluta suut tamaasa nalunngilai, taamaattumillu siunnersuisutut pitsaanersaalluni. Allaammi siunissamut isigisinnaavoq — taanna ima oqarpoq: „Pileqqaarneranit qanoq pisoqarnissaa nalunaarutigaara, itsaanilli suli pinngitsut oqaatigaakka. Maanna ima oqarpunga: Pilersaarutiga aalajaappoq.“ (Esaja 46:10) Tussiaasiortup Jehovap oqaasianut tatiginninnini ersersissimavaa ima oqarluni: „Oqaatsitit naneruaraakka isikkannut, qaammaqqutigalugillu aqqutinni.“ (Tussiaat 119:105) Kisianni qanoq Jehovap ikiorpaatigut isumannaatsumik umiarsualivissinnissatsinnik silarsuup imarsuisut ittutsigullusooq aalaqisutigoornitsinni? Qanoq aalajangigassanik aalajangiisarsinnaavugut Guutip nuannaarutigisaanik?

Najoqqutassianik Biibilimiittunik maleruaaneq

Jehovap kristumiut najoqqutassianik tunisimavai isumatusaartumik aalajangiisarsinnaaniassammata. Najoqqutassianik Biibilimiittunik ilinniarneq maleruaanerlu, allamiut oqaasiinik ilinniarnermut atuinermullu assinguvoq. Allamiut oqaasiisa ilisimallualernerisigut, tusaaneqarsinnaagajuttarpoq arlaat oqaaseqatigiiliornermigut kukkugaangat oqaaseqatigiit eqqunngitsumik nipeqalertarmata. Immaqa kukkuneq imaaliallaannaq tikkuaruminaassinnaagaluartoq, nalunarneq ajorpoq equngasoqartillugu. Inuunermi najoqqutassat Biibilimeersut ima atsigisumik pigiliussimagaanni malitarilerlugit, taava amerlanertigut malugineqarsinnaasarpoq aalajangigaq aalajangersimasoq kukkusumik aalajangigaagaangat, tassa Guutip najoqqutassiatut aalajangersarsimasaanut akerliugaangat.

Assersuutitut takorlooriartigu angut inuusuttoq aalajangersimasumik isikkulimmik nujaleritinniarluni aalajangertussaq. Biibilimi nujaleriteriaatsit aalajangersimasut assuarineqanngillat, kisiannili tamatumani naleqaqisunik najoqqutassiaqarluni. Paulusi ima siunnersuisimavoq pitsaasumik: „Piumasaraara arnat isornaatsunik perroorniutaanngitsunillu atisaqassasut, nutsat eqqumiikajaamik kusassagaasut, kuultit sapanngallu atisalluunniit akisuut pinnagit, ajunngitsuliornerilli arnanut Guutimik mianerinninnerminnik nassuerutiginnittunut naleqquttut pinnersaatigalugit.“ (1 Timotheusi 2:9, 10) Paulusip allaaserivai arnat, angutinuttaarli najoqqutassiaq atuuppoq. Najoqqutassiaq qanoq paasisariaqarpa? Tassa isikkorput ’perroorniutaanngitsumik’ (ingasaassinianngitsumik) aammalu isummamik peqqissumik ersersitsisassasoq. Taamaattumik angut inuusuttoq taanna imminut aperisariaqarpoq: ’Nujaleriteriaaseq taanna kristumiumut naleqquttuulluni ingasaassinianngippasippa?’

Aammattaaq versimi uani Jaakup allagaaniittumi najoqqutassiaq inuusuttunut pingaarutilimmik ilinniutaasinnaannginnerpa? „Allasiortuususi, nalugassiuk silarsuarmut ikinngutaaneq tassaasoq Guutimik akerartuineq? Silarsuarmut ikinngutaajumasoq Guutimut akeranngortarpoq.“ (Jaaku 4:4) Kristumiut silarsuarmut Guutimut akeraasumut ikinngutaanermik eqqarsaat maajugaat. Angutip inuusuttup taassuma nujaleriteriaaseq ikinngutiminit nuannaartorisaasoq toqqaruniuk, taava allanit Guutimut ikinngutaasorineqassanerpa, imaluunniit silarsuarmut ikinngutaasorineqassanerluni? Najoqqutassiat tamakku assingusullu Biibilimeersut iluaqutigalugit isumatusaartumik aalajangiisinnaavoq. Aap, Guutip innersuussutai eqqortumik aalajangiinissatsinnut iluaqutigaavut. Aamma tamakku tunngavigalugit aalajangiisarneq sungiussimagutsigu, ajornannginnerutissavarput isumatusaartumik isummiussisarnissarput kingunerlunngitsumik.

Guutip oqaasiani najoqqutassiarpassuaqarpoq. Immaqa pissutsit atugarpiavut sammineqanngikkaluarput; kisianni inuit Guutip innersuussutaanut naalassimasut pillugit allallu taassuma mianersoqqussutaanik sumiginnaasimasut pillugit atuarsinnaavugut. (1 Mosesi 4:6, 7, 13-16; 5 Mosesi 30:15-20; 1 Korinthimiut 10:11) Oqaluttuat tamakku atuaraangatsigit eqqarsaatigeqqissaarlugulu sooq taakkua iliuusii taama kinguneqartarsimanersut, taava paasisinnaassavavut Jehovap innersuussutai, taassuma nuannaarutigisaanik aalajangiisarnissatsinnut iluaqutigisavut.

Assersuutigeriartigu Jiisusip apustili Petrusillu oqaloqatigiillatsiarnerat. Naalaffimmut akileraarutinik katersuisartut Petrusi aperisimavaat: „Ajoqersuisorsi naalaffimmut akileraarneq ajorami?“ Petrusi akisimavoq: „Soorunami akileraartarpoq!“ Tamatuma kinguninngua Jiisusip Petrusi aperisimavaa: „Nunarsuarmi kunngit ilanngaatinik akileraarutinillu kikkunnit pisarpat? Innuttaminnit [Qitornaminnilluunniit, 1900/1961] allamiunilluunniit?“ Petrusi akimmat: „Allamiunit,“ Jiisusip oqarfigisimavaa: „Taava tassa innuttai [qitornaat, 1900/1961] akiliisussaanngillat. Mamiatsatsitseqqunatali tasersuup sinaanut nallukkiartorit, aalisagarlu kiisisoq siulleq amuaruk; aatsartikkukkulu statéri ataaseq nanissavat. Taanna tigullugu taakkununnga tunniuguk, uannit ilinnillu.“ (Matthæusi 17:24-27) Oqaluttuami tamatumani sunik Jehovameersunik najoqqutassiaqarpa?

Apeqqutit atorlugit Jiisusip Petrusi tunngavilersuitillugu paasitissimavaa Jiisusi Guutip ernerimmagu akileraartussaatitaanngitsoq. Tamanna Petrusip eqqarsaatigisimanngilaa, kisianni Jiisusip inussiarnersumik ikiorsimavaa paasinninnissaanut. Allat eqqunngitsuliorfigippatigut, Jiisusi ilaarlugu aalajangersinnaavugut sakkortuumik naveerumanagit imaluunniit suaasaarartortikkumanagit, misiginneqatiginnittumilli pillugit.

Taamaalilluni Petrusip paasisimavaa Naalaffimmut akileraarutinik akileraarnermut pissutaasoq tassaasoq allat mamiatsatsinnginnissaat. Najoqqutassiaq alla ilinniutigisinnaasarput tassaavoq allat nalunngeqatiginnissutaannik innimiginninnissaq pisinnaatitaaffimmik aalajangiusimanninnermit pingaarnerusoq.

Allat nalunngeqatiginnissutaannut ataqqinnittumik aalajangigassanik aalajangiiniarnitsinnut suna kajumississutigisinnaavarput? Tullitsinnut asanninnerput. Jiisusip oqaasii malillugit, Jehovamik iluunngarluta asanninnissatsinnik inassut kisimi, tullitsinnut asanninnissatsinnik inassummit pingaaruteqarneruvoq. (Matthæusi 22:39) Kisiannimi silarsuarmi namminissarsiorfiusumi inuuvugut, aammalu ajortulioqqajaanitta namminissarsiornerput siuarsartarpaa. Taamaattumik tullerput uagutsitut asassagutsigu ’isummatsigut nutaanngortariaqarpugut’. — Romamiut 12:2.

Amerlasuut taamaaliorsimapput, taamaattumillu aalajangigassanik pingaarutilinnik pingaaruteqannginnerusunillu aalajangiiniaraangamik inoqatitik eqqarsaatigisarpaat. Paulusi ima allappoq: „Qatanngutit, ilissi inussiaajunnaarnermut qaaqqusaavusi. Kisianni inussiaajunnaarsitaaneq atoqinasiuk uinimmut patsisiginiagassatut, asannillusili kiffartorfigeqatigiigitsi.“ (Galatiamiut 5:13) Qanoq taamaaliorsinnaavugut? Eqqarsaatigeriaruk arnaq inuusuttoq Biibilimik ilinniartitsiumalluni illoqarfimmut nunaannarmiittumut nuuttoq. Tikitamini inuit oqaloqatiginerujartortillugit paasilersimavaa atisalersoriaatsini, illorpassuaqarfimmi ingasaassinianngippasikkaluartoq, tikitamini oqallisaalersimasoq. Atisalersoriaasia perroorniutaanngikkaluarpoq, taamaattoq aalajangersimavoq maluginiarnannginnerusumik atisalersoriaaseqalerumalluni, „Guutip oqaasia mitannarsisitaaqqunagu“. — Titusi 2:5.

Illit aalajangigassanik assingusunik aalajangiisimassasuuguit qanoq iliorsimassagaluarpit? Qularinngissinnaavarput Jehovap nuannaarutigisaraa aalajangikkavut asannilluni allat nalunngeqatiginnissutaata innimigineranut ersiutaagaangata.

Siunissaq ungasinnerusoq eqqarsaatigisaruk

Aalajangigassanik aalajangiiniarnitsinni, Biibilimi najoqqutassiat allallu nalunngeqatiginnissutaasa innimiginissaata saniatigut aamma suna eqqarsaatigisariaqarparput? Aqqut kristumiut ingerlavigisaat nerukeqaaq maniillunilu, killilersuutilli Guutip nammineq aalajangersarsimasaasa iluanni qanoq iliornissamut taassuma kiffaanngissuseqangaartippaatigut. (Matthæusi 7:13, 14) Eqqarsaatigisariaqarparput aalajangikkavut piffissaq ungasinnerusoq eqqarsaatigalugu anersaakkut, tarnikkut (sianissutsikkut), misigissutsikkut timikkullu qanoq sunnerneqaatigiumaarnerivut.

Takorlooriaruk aalajangersimasumik suliffittaarniarlutit. Suliffik ileqqorluutitaqanngilaq assuarnaateqarnanilu. Ataatsimiinnerit ataatsimeersuarnerillu najuuffigisarsinnaassavatit. Naatsorsuutigisannillu akissarsiaqarnerusussaallutit. Sulisitsisoq ilittut ittorpiamik amigaateqarpoq piginnaanivillu tamakkiisumik atornissaannut periarfissikkumallutit. Tamatuma saniatigut illit suliffik taamaattoq nuannaraat. Neqeroorutip taamaattup tigujumannginnissaanut arlaannaannilluunniit pissutissaqarpa? Siumummi nalunngikkukku immaqa suliat tiguartisimaffigivallaalersinnaallugu? Oqarfigineqarputit qaangiuttoortarnissamut pinngitsaalineqarnaviarnak. Kisiannili piumassanerpit pisariaqanngikkaluamik nukippassuit piffissarujussuarlu atussallugit suliassaq aalajangersimasoq naammassiumallugu? Pissutsini taamaattuni qaangiuttuukulalersinnaavit? Tamanna pissutigalugu ilaquttatit aammalu piffissap ingerlanerani anersaakkut sammisassat sumiginnanngilluinnagassatit qimakattulersinnaavigit?

Tamatumunnga atatillugu eqqarsaatigeriaruk Jim suliffini pillugu assut sunniuteqartumik qanoq aalajangersimanersoq. Qasusuilluni sulerulussimavoq suliffimminilu qaffassarluni. Piffissap ingerlanerani kangiani immikkoortortaqarfimmut pisortanngorsimavoq, USA-mi immikkoortortaqarfimmi akisussaasutut qullerpaatut aqutsisunngorsimalluni aammalu Europami immikkoortortaqarfimmi siulersuisunut ilaasortanngorsimalluni. Kisianni Japanimi aningaasarsiorneq ingerlanerliulermat paasilersimavaa aningaasaatininniarneq sunniuteqarsinnaalerniarnerlu qanoq imaqanngitsigisut. Aningaasat assorooqaluni katersorsimasai tassuuguinnaq nungussimapput, misigaalu inuunini siunertaqarpianngitsoq. Imminut aperisimavoq: ’Ukiut qulit qaangiuppata qanoq inuussaanga?’ Taava paasilersimavaa nammineq inuunerminit, nuliami meeqqamilu inuuneri isumaqarnerusumik siunertaqartut. Ukiut ingerlanerini Jehovamut nalunaajaasunngorsimapput. Jim taakkunatut pilluarluni siunertaqartumillu inoorusulersimavoq, taamaattumillu Biibilimik atuaqqissaartalersimalluni.

Sivitsunngitsoq paasilersimavaa kristumiutut siunertaqarluartumik inuunissaminut inooriaatsini akornutaasoq. Aasiap, USA-p Europallu akornanni angalaannavissimavoq, taamaattumillu Biibilimik atuaqqissaartarnissaminut uppeqatiminillu ilaqartarnissaminut piffissaasuasimalluni. Imminut aperisariaqarsimavoq: ’Ukiuni 50-ini inuusimanittut inuujuaannarniarpunga, imaluunniit allamik inooriaaseqalerusuppunga?’ Qinunikkut eqqarsaatigilluariarlugu siunissaq ungasinnerusoq eqqarsaatigalugu qanoq kinguneqarsinnaanersoq, aalajangersimavoq suliffini tamaasa qimakkumallugit ataasiinnaq kiserngorullugu, anersaamut tunngasut piffissaqarfigillualerumallugit. (1 Timotheusi 6:6-8) Taamatut aalajangernini pissutigalugu nuannaarnerulersimavoq kristumiutut sammisassanik ulapputeqarsinnaanngorami.

Aalajangikkatit pingaarutillit pingaaruteqannginnerusullu tamarmik assut pingaaruteqarput. Ullumi arlaannik aalajangiinerit kingunertusinnaavoq — immaqalu allaat siunissami inuunermik toqumilluunniit kinguneqarsinnaalluni. Isumatusaartumik aalajangiisarsinnaavutit najoqqutassiat Biibilimiittut malittarukkit, allat nalunngeqatiginnissutaannik innimiginnittaruit siunissarlu ungasinnerusoq eqqarsaatigalugu qanoq kinguneqarsinnaanersut eqqarsaatigisarukkit. Aalajangiisarit Guutip nuannaarutigisaanik. (wE 4/15 06)

[Qupp. 8-mi assiliartaq]

Aalajangigassat pingaaruteqarpasinnginnerusut ilungersunartunik kinguneqarsinnaapput

[Qupp. 9-mi assiliartaq]

Najoqqutassiat Biibilimiittut isumatusaartumik aalajangiiniarnerminut qanoq iluaqutigisinnaavai?

[Qupp. 10-mi assiliartaq]

Jiisusip Petrusi qajassuartumik oqaluffigaa