„Tipaatsuutigiuk inuusunninni nuliarilikkat“

„Tipaatsuutigiuk inuusunninni nuliarilikkat. Ernera, soormi kajungissuseqarfigissaviuk arnaq alla?“ — USSATIT 5:18, 20.

1, 2. Sooq oqartoqarsinnaava uiusup nuliatalu asaqatigiinnerat pilluaqqusaasoq?

ATOQATIGIINNEQ Biibilimi ammasumik eqqartorneqarpoq. Ussatit 5:18, 19-imi ima allassimavoq: „Puilasuutit pilluaqquneqassaaq. Tipaatsuutigiuk inuusunninni nuliarilikkat, kulavak asanartoq, savaasarnaq kusanaffaarik; asanninnera naammatsissutigisaruk, asanninnera angisuumik nuannaarutigiuaruk.“

² Oqaaseq ’puilasuut’ matumani atoqatigiinnermi naammassinermut tunngatinneqarpoq. ’Puilasuutip’ pilluaqquneqarnera ima paasisariaqarpoq aappariit aappariittut asaqatigiinnerat imminnullu nuannareqatigiinnerat Guutimit tunissutaasoq. Taamatulli qanitariilluinnarneq aappariinnerup iluaniinnaq pisussaavoq. Taamaammat kunngi Salomo, ussaterpassuarnik allassimasoq, ima aperivoq: „Ernera, soormi kajungissuseqarfigissaviuk arnaq alla? Sooq arnaq takornartaq pakkutissaviuk?“ — Ussatit 5:20.

3. (a) Aappariippassuarni pissutsit piviusut alianartut suuppat? (b) Guutip allasiorneq qanoq isigaa?

³ Ullormi katiffimmi angut arnarlu pingaartorsiornartumik neriorsuisarput asaqatigiinniarlutik ilumoorfigeqatigiittuarniarlutillu. Taamaattorli allasiorneq pissutigalugu aappariippassuit avittarput. Misissueqqissaartartup misissuilluni apersuinerit 25-t inernerinik misissueqqissaarnini tunngavigalugu paasivaa „arnat uillit 25 procentii angutillu nuliallit 44 procentii aapparinngisaminnik atoqateqarsimasut“. Apustili Paulusi ima allappoq: „Tammaqinasi! Kinguaassiuutitigut inuunerluttut guutipilussiortulluunniit, allasiortut anguteqatiminnoortartulluunniit . . . Guutip naalagaaffia kingornussarsiarissanngilaat.“ (1 Korinthimiut 6:9, 10) Erseqqarilluinnarpoq allasiorneq Guutip isaani ajortuliorujussuarnerusoq, Guutimullu kiffaasut ilumoortut allasiornaveersaartariaqarput. ’Aappariinnerup ataqqineqartuarnissaanut aappariillu siniffiannik minguitsuutitsiuarnissamut’ suna iluaqutigissavarput? — Hebræerit 13:4.

Uummat tatigisassaanngitsoq mianersorfigiuk

4. Aappalik kristumiu ilaatigut suut aqqutigalugit aapparinngisaminut ajuutiginnilluni misigissutsinik piaarinaatsoorluni ineriartortitsilersinnaava?

⁴ Ullutsinni avatangiisini ileqqussatigut ajornerulersimasuni inuppassuit „isaat arnarsiortuartarput [allasiornermik ulikkaarput, NV] qasussanatillu ajortuliornermut“. (2 Petrusi 2:14) Piaaralutik aapparmik saniatigut allamik sammisassarsiortarput. Nunat ilaanni arnarpassuit sulisalersimapput, angutillu arnallu qanimut suleqatigiinnerat pissutigalugu naleqqutinngitsumik allaffimmi sammisaqarniartoqartalersimavoq. Aamma internettimi chattertarfiit atorlugit ittoornerpaanut allaat ajornarunnaarpoq internettikkut qanitarilluinnagaqalernissaq. Aappalippassuit tamakkunannga nakutitaasarput qanoq pisoqalernera sianiginagu.

5, 6. Arnaq kristumiu qanoq ililluni navianartorsiulerpa, tamannalu qanoq ilinniutigisinnaavarput?

⁵ Misissoriartigu arnaq kristumiu Marymik taasinnaasarput qanoq navianartorsiulersimanersoq kinguaassiuutitigut inuunerlungajavilluni. Taassuma uiata, Jehovamut nalunaajaasuunngitsup, ilaquttani tunniusimaffigerpianngilai. Mary oqaluttuarpoq ukiualuit qaangiuttut uimi suleqataasa ilaat naapissimallugu. Angut inussiarnerlunilu pissuserissaartuuvoq, allaallu kingusinnerusukkut taanna Maryp upperisaanik soqutiginninnerarpoq. „Pitsaasupilussuuvoq, uinnit allaanerulluinnarluni,“ oqaluttuarpoq. Sivitsunngitsoq Mary uiatalu suleqataa ajuutigiilerput. Mary ima tunngavilersuivoq: „Allasiunngilanga, aamma angut taanna Biibilimik soqutiginnippoq. Immaqa ikiorsinnaavara.“

⁶ Ajuutiginninnini allasiornermik suli kinguneqanngitsoq Mary silattuaqivoq. (Galatiamiut 5:19-21; Efesosimiut 4:19) Nalunngeqatiginnissutaa sunniutilerpoq, pissutsillu aaqqippai. Maryp misigisai ’uummatip tatigisassaanngitsuuneranut’ takussutissaapput. (Jeremia 17:9) Biibilimi ima oqaaqqissaarneqarpugut: „Paarisassannit tamanit annermik uummatit paariuk.“ (Ussatit 4:23) Qanoq ililluta taamaaliorsinnaavugut?

„Silatuup perlussaq takusinnaasarpaa qimarnguffissarsiortarlunilu“

7. Aappariittut ajornartorsiuteqartumik ikiuissagaanni Biibilimi siunnersuutigineqartup suup malinnissaa illersuutaassava?

⁷ Paulusi ima allappoq: „Kinaluunniit patajaatsuusorisoq mianersorli orloqqunani.“ (1 Korinthimiut 10:12) Aamma Ussatit 22:3-mi ima allassimavoq: „Silatuup perlussaq takusinnaasarpaa qimarnguffissarsiortarlunilu.“ Sapiiserpallaarlutit ima eqqarsarnak: „Ajortumik uannut pisoqarnavianngilaq,“ silatusaassaatit pissutsit qanoq ilillutik ajornartorsiuteqalersitsisinnaanerat eqqarsaatigigukku. Assersuutigalugu arnaaguit angummik angutaaguillu arnamik aappariittut ajornartorsiutilimmik ikinngutinnaaqalernaveersaarit. (Ussatit 11:14) Ikinngutaasup taanna oqarfigisariaqarpaa aappariittut ajornartorsiutitik aappanilu oqaloqatigiissutigippatigit pitsaanerussasoq, imaluunniit kristumiumut inersimalluartumut arnaaguni arnamut angutaaguniluunniit angummut aappariinnerminnik atatitsiinnarusuttumut imaluunniit utoqqaanertanut oqaloqatiginnissutigippagit. (Titusi 2:3, 4) Jehovap Nalunaajaasuisa ilagiivini utoqqaanertat navianarsinnaasunik nigorsimanninneq eqqarsaatigalugu maligassaalluarput. Utoqqaanertaq qatanngummik arnamik kristumiumik allat ilisimasassarinngisaat pillugit oqaloqatiginnittariaqaleraangami allanit takuneqarsinnaasumiillutik oqaloqatiginnittarpoq — soorlu naalagaaffilersaarfimmi.

8. Suliffimmi suna mianersuutigineqartariaqarpa?

⁸ Suliffimmi allamilu asannilersuussutaasinnaasut mianersorfigikkit. Assersuutigalugu arnaagaanni angummik angutaagaannilu arnamik qanimut suleqateqarluni qaangiuttoorluni sulineq, ajortumik iliornissamut ussernartorsiulernermik kinguneqarsinnaavoq. Ueqaravit imaluunniit nuliaqaravit oqaloriaatsikkut pissusilersornikkullu paasitittariaqarpat qaninniarneqarumanngilluinnarlutit. Guutimut tunniusimanermik noqqaassutiginnittuugavit, qaninniagaqarujoornikkut peqqusaarpaluttumilluunniit atisalersoriaaseqarnikkut naleqqutinngitsumik malugineqarnissat soorunalimi kissaatiginngilat. (1 Timotheusi 4:8; 6:11; 1 Petrusi 3:3, 4) Aappavit meeqqavillu assinginik suliffinniititaqarnerit ilinnut allanullu eqqaasitsissutaassapput illit ilaquttannik pingaarnerpaatitsininnik. Aapparinngisannut ajuutigeqqusaanngisaannarnissat — aapparinngisavilluunniit ilinnik ajuutiginnilluni soqutiginninneranik iluarinniinnanngisaannarnissat — aalajangiusimajuk. — Jobi 31:1.

’Nuliat asasat peqatigalugu inuulluarniarit’

9. Qanoq pisoqariartuaarnerata allamik sammisaqarnissaq kajungernarsisissinnaavaa?

⁹ Uummapput paarissagutsigu navianarsinnaasut nigorsimanissaat naammanngilaq. Angut arnarluunniit aapparinngisaminik pilerigisaqarpat, tamanna aappariit aapparmik pisariaqartitaanik eqqumaffiginninnginnerannut ersiutaasinnaavoq. Imaassinnaavoq nuliaasoq sumiginnarneqartuartoq, imaluunniit uiusoq isornartorsiorneqartuartoq. Taava inummik allamik soqutiginarnerusoqaleriataarsinnaavoq — immaqa suliffimmi imaluunniit allaat ilagiinni kristumiuni — aapparisap pissuserinngisarpiaanik pissuseqarpasissumik. Erininarsinngitsoq taanna pilerinarsisinnaavoq allamillu aappartaarnissamut ussernartorsiorsuataartoqalersinnaalluni. Taamatut malunnanngingajattumik pisoqariartuaartarnera Biibilimi allassimasup matuma ilumoorneranut uppernarsaataavoq: „Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu.“ — Jaaku 1:14.

10. Uiusut nuliaasullu qanoq ilillutik attaveqaqatigiinnerminnik nakussatsitsisinnaappat?

¹⁰ Uiusut nuliaasullu asaqatigiinnerminnik nakussatsitsinissartik sulissutigisariaqarpaat, pisariaqartitatik matussuserniarlugit aappariinnerup avataani ujaasinatik — tunniusimaffigineqarnissamik, ikinngutigiinnissamik ilungersunartorsiornermiluunniit tapersersorneqarnissamik pisariaqartitsinerugaluarpat. Pingaarnerpaamik, immissinnut piffissaqarfigisaritsi, aamma immissinnut ungakkiugitsi. Suna asannilersoorutigisimanerlugu eqqarsaatigiuk. Katikkavit katitannut misigissuseqangaarnittut misigissuseqalerniarsarigit. Marluullusi misigisimasasi nuannersut eqqarsaatigikkit. Qinunikkut Jehovamut ikioqqugit. Tussiaasiortup Daavip Jehova ima qinnuigaa: „Uummammik minguitsumik pinngortitsiviginnga, Guuti, aammaarlutit anersaamik aalajaatsumik tuninnga.“ (Tussiaat 51:12) Aalajangiusimajuk „arnaq [nuliat, NV] [imaluunniit uiit] asasat peqatigalugu [inuulluarnissat] ulluni . . . tamani seqernup ataani Guutimit ilinnut inuuffigisassarititaasuni“. — Oqaluussisartup oqaasii 9:9.

11. Ilisimasaqarneq, ilisimassuseq siuneqassuserlu aappariittut ataqatigiinnermik nakussatsitsinermut tunngatillugu qanoq pingaaruteqarpat?

¹¹ Aappariittut ataqatigiinnermik nakussatsitsinissamut tunngatillugu eqqaamasariaqartoq tassaavoq ilisimasaqarnerup, ilisimassutsip siuneqassutsillu pingaaruteqassusiat. Ussatit 24:3, 4-mi ima allassimavoq: „Ilisimassuseq atorlugu illu sananeqartarpoq, silaqassuseq atorlugu tunngavilerneqartarpoq. Ilisimasaqarnikkut init ulikkaartarput pinik tamalaanik akisuunik kusanartunillu.“ Inoqutigiinni pilluartuni ’pinut akisuunut’ ilaapput pissuserineqartussat soorlu asanninneq, ilumoorfiginninneq, Guutimik mianerinninneq uppernerlu. Pissuserineqartussat taakku ineriartortissinnaajumallugit Guuti pillugu ilisimasaqarnissaq pisariaqarpoq. Taamaattumik aappariit eqiasuillutik Biibili atuaqqissaartariaqarpaat. Ilisimassuseq silaqassuserlu, imaluunniit siuneqassuserlu, qanoq pingaaruteqartigippat? Ulluinnarni ajornartorsiutit ajunngitsumik iliuuseqarfigissagaanni ilisimassuseqarnissaq, tassa ilisimasanik Biibilimeersunik atuisinnaanissaq, pisariaqarpoq. Aamma inuup siuneqassuseqartup aapparmi eqqarsaatai misigissusiilu paasisinnaavai. (Ussatit 20:5) Jehova Salomo aqqutigalugu ima oqarpoq: „Ernera, ilisimassuseq pigisara naalaarniaruk siutitillu manillugit siuneqarnermut uanga pigisannut.“ — Ussatit 5:1.

’Ajornartorsiuteqaleraangat’

12. Aappariit ajornartorsiuteqalertarnerat sooq tupinnanngila?

¹² Aappareeqanngilaq naammalluinnartunik. Biibilimi allaat allassimavoq uiusut nuliaasullu ’inuunerminni ajornartorsiorumaartut’. (1 Korinthimiut 7:28) Isumakuluutit, nappaatit, akerlilersorneqarneq allallu aappariinnermik artukkiisinnaapput. Ajornartorsiuteqaleraangalli aappariittut ilumoorfigeqatigiikkassi Jehovamik nuannaartitsiniartut aaqqiissutissarsiortariaqarpusi.

13. Uiusoq nuliaasorlu tamarmik immikkut suut eqqarsaatigalugit imminut misissorsinnaappat?

¹³ Aappariimmi imminnut ajortumik pisarnerat pissutaalluni aappariinneq najummassimanarpat? Ajornartorsiut aaqqinniarlugu iliuuseqarnissaq pisariaqarpoq. Assersuutigalugu imaassinnaavoq inussiarniitsumik oqaluuteriaaseq aappariinnermi atorneqaleriartuaarsimasoq. (Ussatit 12:18) Allaaserisap matuma siuliani eqqaaneqartutut tamanna kingunerlussinnaavoq. Biibilimi imaattumik ussateqarpoq: „Inoqajuitsumi najugaqarneq pitsaaneruvoq arnamik kamajasumik saqitsaassiumatuumillu peqateqarnermit.“ (Ussatit 21:19) Aappariinnermi taama ittumi nuliaaguit, taava imminut ima aperigit: ’Isumaloriallaqqissuunera pissutigalugu uima ilagiuminaatsippaanga?’ Uiusut Biibilimi ima saaffigineqarput: „Nuliasi asassavasi, peqqarniisaarfigeqinasigillu.“ (Kolossemiut 3:19) Uiuguit imminut ima aperigit: ’Nuliama allamit tuppallersarneqarlunilu isumassorneqarnissaminut ussernartorsiulissutigisaanik inussiarniippaluttumik pissuseqarpunga?’ Soorunalimi kinguaassiuutitigut inuunerlunnissamut patsisissaqanngilaq. Taamali alianartigisumik pisoqarsinnaanera pissutissaalluarpoq ajornartorsiutaalersut ammasumik oqaluuserinissaannut.

14, 15. Sooq aapparinngisamut tuppallersaatissarsiorneq aappariittut ajornartorsiutinut aaqqiissutaanngila?

¹⁴ Aapparinngisamik sammisaqarnermik tuppallersaateqarniarneq aappariittut ajornartorsiutinut aaqqiissutissaanngilaq. Taamatut attaveqarfigisaqarneq sumik kinguneqarsinnaagami? Allamik pitsaanerusumillu aappartaarnermik? Inuit ilaat taama isumaqarsinnaapput. Ima oqartarput: ’Inummi taanna aappaasup pissuserisassarpiaanik uanga pisariaqartitannik pissuseqarpoq.’ Taamatulli eqqarsarneq kukkulluinnarpoq, aapparminimmi qimatsiumasoq — imaluunniit illit aapparnik qimatseqqullutit kajumissaarisoq — kinaluunniit aappariinnerup illernassusianik ataqqinninngilluinnarpoq. Tamatuma aappariinnermik pitsaanerusumik kinguneqarnissaa ilimagineqarsinnaanngilaq.

¹⁵ Maryp, allaaserisap matuma aallaqqaataani eqqaaneqartup, taamatut ingerlaannaruni qanoq pisoqassagaluarnersoq eqqarsaatigeqqissaarpaa; ilaatigut nammineq allaluunniit Guutimit iluarisaajunnaarsinnaavoq. (Galatiamiut 6:7) Ima oqarpoq: „Uima suleqataanut misigissutsikka paasiniaqqissaalerakkit paasilerpara sallusuissummik ilinniarnissaanut periarfissaarutsikkiartuinnarlugu. Ajortuliorneq akuliunneqartunut tamanut ajortumik sunniuteqassallunilu allanut naakkiuffissiissaaq!“ — 2 Korinthimiut 6:3.

Kajumississutaanerpaaq

16. Ileqqussatigut minguttuunerup kingunipiluisa ilaat suuppat?

¹⁶ Biibilimi ima mianersoqqussuteqarpoq: „Arnap takornartap qarluinit tungusunnitsuut kusertaraluarpoq qarnanilu qilaava uuliamiit quasarnerugaluarluni, naggataatigulli narrujuummisimalersarpoq naasutut sungarnitsutut, ipitsigilersarluni panatut illuttut kiinalittut.“ (Ussatit 5:3, 4) Ileqqussatigut minguttuunerup kingunerisartagai annernartuullutillu toqussutaasinnaapput. Taakku ilagaat ilerasunneq, kinguaassiuutitigut tunillaattartumik nappaateqalerneq aappallu ilumuunngitsuliorfigineqartup misigissutsikkut annikilliornera. Tamanna pissutissaalluarpoq allasiornermik kinguneqarsinnaasumik iliuuseqarnaveersaarnissamut.

17. Aappariinnermi ilumoorfigeqatigiittuarnissamut suna pissutissaalluarnerpaava?

¹⁷ Allasiornerup eqqunngitsuuneranut tunngaviusoq tassaavoq Jehovap, aappariinnermik Pilersitsisuusup atoqatigiissinnaalersitsisullu, tamatuminnga assuarinninnera. Taanna pruffiiti Malaki aqqutigalugu ima oqarpoq: „Maanna eqqartuukkiartulerpassi. Piaartumik sassarumaarpunga ilisimannittutut unnerluutigissallugit . . . allasiortut.“ (Malaki 3:5) Jehovap takusinnaasai pillugit Ussatit 5:21-mi ima allassimavoq: „[Jehovap] isigisarpai angutip aqqutai, aqqusininngui malittareqqissaarpai.“ Aap, „suut tamarmik isaanut uleersimallutillu saqqumipput. Taannaavorlu iliornivut pillugit akisussaaffigisassarput“. (Hebræerit 4:13) Taamaattumik aappariinnermi ilumoorfigeqatigiittuarnissamut kajumississutaanerpaaq tassaavoq kinguaassiuutitigut minguttuujunerup suulluunniit Jehovamut attaveqarnitsinnut ajoqutaajumaarneranik ilisimaarinninneq — qanorluunniit isertortigaluni sammisaqaraluaraanni, imaluunniit timikkut inooqatigiinnikkullu kinguneri qanorluunniit soqutaanngippasitsigigaluarpata.

18, 19. Josefip Potifarip nulianut tunngatillugu misigisaa qanoq ilinniarfigisinnaavarput?

¹⁸ Josefimik, ataataanerpaap Jaakup erneranik, oqaluttuami erserpoq Guutimut attaveqarluartuarumaneq kajumississutaangaartartoq. Josefi Potifarimit, Faraop kunngikkormiuisa ilaannit, nuannarineqalerpoq taassumalu illuani nuimasumik inissisimaffeqalerluni. Josefi „kusanartuuvoq inugissuullunilu“, tamannalu Potifarip nuliata malugaa. Taassuma Josefi ullut tamaasa kanngunartuliortinniarsarisaraluarpaa, tamannalu ilungersuutigisaraluaraa iluatsinngilaq. Suna pissutigalugu Josefip taassuma qaninniarnera akiorpaa? Biibilimi ima allassimavoq: „Josefi pinaaserpoq oqarfigalugulu: . . . ’[Naalakkama] . . . sumilluunniit erliguutinngilaanga; illit kisivit attoqqunngilaatit; nuliarigamisit. Qanoq taama kanngunartigisumik iliussaanga [ajortigisumik iliorsinnaavunga, NV] Guutimut ajortuliorlunga?’“ — 1 Mosesi 39:1-12.

¹⁹ Josefi aappaqanngitsoq ileqqussatigut minguittuarpoq angutip allap nulianik sammisaqarumannginnami. Ussatit 15:15-imi angutit nuliallit ima oqarfigineqarput: „Imigariniaruk imeq nammineq imiisiviliaativit imaa, imeq illit nammineq puilasuutinnit kuuttoq.“ Aamma mianersuutigineqartariaqarpoq piaarinaatsoornikkut aapparinngisamik asannilersoorfiginnilluni sammisaqalinnginnissaq. Aappariinnissinni asanninneq nakussatsinniarlugu iliuuseqarit, aamma sunaluunniit ajornartorsiutigilissagaluarussiuk tamanna aaqqinniarlugu ilungersorit. ’Inuusunninni nuliarilikkavit [imaluunniit uigilikkavit] tipaatsuutiginissaa’ aalajangiusimajuk. — Ussatit 5:18. (wE 9/15 06)

Suna ilikkarpiuk?

• Qanoq ililluni kristumiu piaarinaatsoornikkut allamik sammisaqalersinnaava?

• Aapparinngisamik asannilersoorluni sammisaqalinnginnissamut suut iluaqutaasinnaappat?

• Aappariit ajornartorsiuteqaraangamik qanoq iliortariaqarpat?

• Aappariittut ilumoorfigeqatigiittuarnissamut suna kajumississutaanerpaava?

[Qupp. 28-mi assiliartaq]

Ajoraluartumik suliffik naleqqutinngitsumik allaffimmi sammisaqarniarfiulersinnaavoq

[Qupp. 30-mi assiliartaq]

’Ilisimasaqarnikkut init ulikkaartarput pinik kusanartunik’