Katinnerit Guutip inuillu isaanni ataqqinartut
„Kanami . . . katittoqarpoq . . . Jiisusi ajoqersukkanilu katittunut qaaqqusaapput.“ — JOHANNESI 2:1, 2.
1. Jiisusip Kanamiinneranik oqaluttuaq sumik uparuussiva?
JIISUSIP, taassuma arnaata aammalu ajoqersugaasa ilaasa ilisimavaat Guutip kiffaasa akornanni katinnermut ataqqinartumut atatillugu nuannaarneq. Allaat Kristusip katittorsiorneq aalajangersimasoq puiunaatsunngortippaa nuannaarnermullu tapersiilluni ilisimaneqartumik tupinnartulioqqaarnermigut. (Johannesi 2:1-11) Immaqa illittaaq kristumiut aappariittut pilluartutut Jehovamut kiffartorusuttut katinnerannut peqataanerit nuannaarutiginikuuat. Immaqa illit nammineq katinnissat imaluunniit ikinngutivit katinnissaata iluatsilluarnissaanut ikiuinissat qilanaaraat. Katinnerup iluatsilluarnissaanut suna iluaqutaasarpa?
2. Katinneq pillugu paasissutissanik sunik Biibili imaqarpa?
2 Kristumiut paasisimavaat angut arnarlu katinniaraangata Guutip oqaasiani isumassarsiarititaasumi siunnersuutit iluaqutaasorujussuusartut. (2 Timotheusi 3:16, 17) Kristumiut katinnerat qanorpiaq ingerlanneqartassanersoq Biibilimi unnersuussutigineqanngilaq. Aamma katinnermut tunngatillugu ileqqut inatsisitigullu piumasaqaatit sumiiffimmiit sumiiffimmut allanngorartarput piffissallu allanngorarneranni allanngortarlutik. Assersuutigalugu itsaq Israelimi katinnermi aalajangersimasunik malittarisassanik ileqqulersuuteqanngilaq. Katinnermi uissap nuliassani angerlaattarpaa ataatamiluunniit illuanukaattarlugu. (1 Mosesi 24:67; Esaja 61:10; Matthæusi 1:24) Tamarmik takkuanni taamaaliornikkut aappassiariit katittarput. Taamanikkut katinnermi aalajangersimasunik malittarisassanik ileqqulersorneq pisariaqanngilaq, ullumikkut taamaaliorneq nalinginnaagaluartoq.
3. Kanami pisoq suna Jiisusip tapersiiffigaa?
3 Israelikkut iliuuseq tamanna katinnertut akuerisarivaat. Tamatuma kingorna katittorsiortoqarajuttarpoq, soorlu taamaaliortoqarsimasoq iivangkiiliumi Johannesip allagaani kapitali 2-mi allaatigineqartutut. Biibilimik nutsigarpassuarni versi 1-imi allassimavoq ’katittoqartoq’, oqaaserli allassimaqqaarfinni atorneqartoq aamma isumaqarsinnaavoq ’katittorsiortoqartoq’.a (Matthæusi 22:2-10; 25:10; Lukasi 14:8) Oqaluttuami erserpoq juutitut katittorsiornermut Jiisusi najuuttoq tapersiillunilu. Pingaarnerpaajusorli tassaavoq taamani inatsisinut naapertuuttumik katinnermut piumasaqaatit ullumikkut piumasaqaatinit allaanerunerat.
4. Kristumiut ilaat qanoq katinniarlutik aalajangertarpat, aamma sooq?
4 Ullumikkut nunarpassuarni katinniartut inatsisitigut piumasaqaatit aalajangersimasut naammassisariaqarpaat. Aappassiariit kristumiut piumasaqaatinik naammassinnittut qanorluunniit ittumik inatsisinut naapertuuttumik katissinnaapput. Tamanna pisinnaavoq aalajangersimasunik malittarisassanik ileqqulersornermi sivikitsumi pilimanianngitsumilu atorfilimmit imaluunniit qatanngummit utoqqaanertamit, pisortanit tamatumunnga piginnaatitaasumit, aqunneqartumi. Kristumiut ilaat aalajangertarput taamatut katinniarlutik, ilaquttatillu imaluunniit ikinngutitik kristumiut ikittuinnaat pisumut nuannaarfiungaartumut tamatumunnga ilisimannittutut najuuttuinnartulluunniit qaaqqusarlugit. (Jeremia 33:11; Johannesi 3:29) Kristumiut allat nalliuttorsiornersuarmut ilassinninniarluniluunniit aggersaanermut pilersaaruterpassuarnik aningaasartuuterpassuarnillu pisariaqartitsisumut taarsiullugu immaqa ilaquttatik ikinngutitilluunniit qanigisat ikittuinnaat nereqatigiinnermut qaaqqusarpaat. Qanorluunniit uagut nammineq iluarinerusaqaraluarutta ilisimasariaqarparput kristumiut inersimalluartut allat isumaat isummatsinnit allaanerusinnaammata. — Romamiut 14:3, 4.
5. Sooq kristumiut amerlasuut kissaatigisarpaat katinnerminni oqalugiartoqassasoq, oqalugiaatillu suna tunngavigaa?
5 Katittussat kristumiut amerlanersaasa aalajangertarpaat katinnerminni Biibili tunngavigalugu oqalugiartoqarnissaa.b Akueraat Jehova aappariinnermut aaqqissuussamik pilersitsisuusoq aamma aappariinnertik ingerlalluassappat pilluarnartuullunilu qanoq iliortariaqarnerat pillugu taanna oqaatsimini silatuunik siunnersuuteqartoq. (1 Mosesi 2:22-24; Markusi 10:6-9; Efesosimiut 5:22-33) Aamma katittussat amerlanersaat ilaquttaminnik ikinngutiminnillu kristumiunik pisumik tamatuminnga nuannaarutiginneqateqarusuttarput. Inatsisitigulli piumasaqaatit ingerlatseriaatsillu assigiinngitsorujussuusut aammalu sumiiffimmi ileqqut periaatsillu qanoq isigisariaqarpavut? Allaaserisami matumani sumiiffinni assigiinngitsuni pissutsit sammineqassapput. Taakkua ilaat ilinnut allanarsinnaapput. Najoqqutassialli eqqaaneqartullu allat tamatigut atuuttut Guutip kiffaanut pingaaruteqartut maluginiarsinnaavatit.
Aappariinneq ataqqinartoq tassaavoq aappariinneq inatsisinut naapertuuttoq
6, 7. Katinnerup inatsisinut tunngasortai sooq soqutigisariaqarpavut, aamma qanoq ersersittarparput tamakku pingaartillugit?
6 Eqqaaneqareersutut Jehova aappariinnermut aaqqissuussamik pilersitsisuuvoq. Kisianni naleqqulluinnartutut oqartussaasut nunamiusut katikkumasunut piumasaqaatinik aalajangiisarput. Jiisusi ima oqarpoq: „Kaasari tunisiuk kaasarip piinik Guutilu Guutip piinik.“ (Markusi 12:17) Aamma apustili Paulusi tamatumunnga assingusumik ima allappoq: „Tarnit tamarmik oqartussaasunut qulliunerusunut naalattaalit, oqartussaassuseqanngimmat Guutimit pinngitsumik; oqartussaasut piusut atorfimminnut annerusumik minnerusumilluunniit oqartussaassuseqarfiusunut Guutimit ivertitaapput.“ — Romamiut 13:1, NV; Titusi 3:1.
7 Nunat amerlanersaanni ’kaasarip’ — tassa naalakkersuisoqarfiup — aalajangertarpaa kikkut katissinnaanersut. Taamaammat kristumiut katikkumasut Biibililu naapertorlugu katinnissamut kiffaanngissuseqartut inatsisit nunagisaminni atuuttut peqqissaarluartumik maleruartarpaat. Tamanna ilaqarsinnaavoq allagartap misiliinermut uppernarsaatip tunniunneqarneranik, pisortanit piginnaatitaasumit katitinneqarnermik immaqalu katinnerup nalunaarsorneqarneranik. Kaasari Augustusi ’kisitsisoqarnissaanik’ peqqusimmat Maria Josefilu naalallutik ’allatsiniarlutik’ Betlehemimukarput. — Lukasi 2:1-5.
8. Aappariinneq qanoq sivisutigisumik atasussaava, taamaammallu Jehovap Nalunaajaasui qanoq iliorneq ajorpat?
8 Kristumiut marluk inatsisinut naapertuuttumik akuerisaasumillu katikkunik Guutip isaani avissaartinneqarsinnaanngitsumik ataqatigiilersinneqartarput. Taamaattumik Jehovap Nalunaajaasui katiteqqinneqarneq ajorput, aamma assersuutigalugu katiffissiorlutik ukiunik 25-inngortorsioraangamik 50-inngortorsioraangamilluunniit katinnermi neriorsueqqinneq ajorput. (Matthæusi 5:37) (Katititsinerit pisortanit ingerlanneqartut oqaluffeqarfiit ilaasa akueriumaneq ajorpaat; aappariit palasimit katitinneqanngippata imaluunniit aappariillualersutut nalunaarutigineqanngippata aappariinnerat atuuttuunnginnerartarpaat.) Nunarpassuarni oqartussaasut Jehovap Nalunaajaasuini nakkutilliisoq katititsinissamut piginnaatittarpaat. Taassuma iluarinerussagunarpaa naalagaaffilersaarfimmi katinnermik oqalugiaateqareernerup kingorna aappassiariit katitinnissaat, tamanna ajornanngippat. Naalagaaffilersaarfik tassaavoq pallorfiginnittut ilumoortut najukkaminni katersuuttarfiat, naleqqulluartumillu tassani aappariinnermik aaqqissuussaq Jehovap pilersitaa pillugu oqalugiartoqarsinnaavoq.
9. (a) Katittussat kristumiut pisortanit katitinneqarnissartik sumik malitseqartissinnaavaat? (b) Nakkutilliisut katinnissamut pilersaarusiornermut qanoq akuliunneqarsinnaappat?
9 Nunani allani inatsisitigut piumasaqaataavoq katinnerit pisortaqarfimmi, assersuutigalugu kommunip allaffiani, pisassasut imaluunniit atorfilimmit toqqarneqarsimasumit ingerlanneqartassasut. Amerlanertigut kristumiut aalajangertarpaat iliuutsip inatsisinut naapertuuttup tamatuma saniatigut ulloq taanna imaluunniit aqaguani naalagaaffilersaarfimmi katinnermik oqalugiaateqassasoq. (Guutip, inuit taamatullu ilagiit isaanni aappariiummata katissimasut, katititsinermit pisortanit ingerlanneqartumit, Biibili tunngavigalugu oqalugiartoqarnissaanut, ullut arlallit qaangiussimassanngillat.) Aappassiariit pisortanit katitinneqartussat naalagaaffilersaarfimmi aalajangersimasumi katinnermi oqalugiartoqarnissaa piumasarigunikku ilagiinni kiffartornermut ataatsimiititaliaq qinnuigisariaqarpaat taamaaliornissamut akuersissummik. Nakkutilliisut taakkua aappassiariit tusaamasaalluarnerat naalagaaffilersaarfimmilu ataatsimiinnernut pilersaarutaareersunullu aalajangersimalluinnartunut allanut katinnissaata akornusiinnginnissaa qulakkiissavaat. (1 Korinthimiut 14:33, 40) Aamma aappassiariit naalagaaffilersaarfimmi allanngortitsinissamik kissaatigisinnaasaat nalilersussavaat aalajangissallugulu katinnissaq siumut nalunaarutigineqassanersoq.
10. Aappariit pisortanit katitinneqareersimappata tamanna katinnermi oqalugiaammut qanoq sunniuteqassava?
10 Nakkutilliisup katinnermi oqalugiartup oqalugiaatini nuannaarutaatinniassavaa, anersaakkut ineriartornartuutinniassallugu ataqqinnippaluttuutinniassallugulu. Aappariit tamatuma siornagut pisortanit katitinneqareersimappata oqalugiartup erseqqissumik nalunaarutigissavaa aappariit ’kaasarip’ inatsisaa naapertorlugu katitinneqareersimasut. Pisortani aalajangersimasunik malittarisassanik ileqqulersornermi neriorsoqatigiinneq ilaasimanngippat immaqa aappariit oqalugiaammut atatillugu neriorsoqatigiikkusussapput.c Katititsinermi pisortanit ingerlanneqartumi neriorsoqatigiissimagunik Jehovalli saavani ilagiillu najuutsillugit taamaalioqqikkusullutik ’ataqatigiilersitaareersimanerat’ paasinarsisillugu oqaatsit allanngortinneqalaassapput. — Matthæusi 19:6; 22:21.
11. Nunat ilaanni katititsinerit qanoq ingerlanneqartarpat, tamannalu katinnermi oqalugiaammut qanoq sunniuteqassava?
11 Nunat ilaanni aalajangersimasunik malittarisassanik ileqqulersuuteqarnissaq inatsisitigut piumasaqaatitaqanngilaq, atorfilimmilluunniit peqataaffigineqaraluarpat. Aappassiariit immersugassaq immersoreerlugu atsiugaq atorfilimmut tunniukkunikku katissimasutut isigineqalertarput, taavalu allagartaq katinnermut uppernarsaat suliarineqartarluni. Aappassiariit ulloq allanneqarsimasoq aallarnerfigalugu uiusutut nuliaasutullu isigineqalertarput. Soorlu assersuummi eqqaaneqareersumi immaqa aappassiariit kissaatigissavaat nalunaarsuinerup kinguninnguatigut qatanngut angut inersimalluartoq Biibili tunngavigalugu naalagaaffilersaarfimmi oqalugiassasoq. Oqalugiartup najuuttunut nalunaarutigissavaa nalunaarsuineq siusinnerusukkut pisimasoq pissutigalugu aappariit katereersimasut. Katinnermi neriorsoqatigiikkusuppata, immikkoortoq 10-mi immikkoortumullu tamatumunnga quppernerup ataani ilanngussami nassuiarneqartutut pissaaq. Naalagaaffilersaarfimmi najuuttut katernaat nuannaaqatigissavaat siunnersuutillu Guutip oqaasianeersut iluaqutigalugit. — Erinarsugassiat Pingaarnersaat 3:11.
Sumiiffimmi ileqquusut malillugit katinneq — imaluunniit katititsineq pisortanit ingerlanneqartoq
12. Oqariartaaseq ’sumiiffimmi ileqquusut malillugit katinneq’ atorneqaraangat suna pineqartarpa, taamatullu katinnerup kingorna aappariit qanoq iliortarnissaat inassutiginarpa?
12 Nunat ilaanni tassani ileqquusut malillugit katinneq nalinginnaavoq, assersuutigalugu naggueqatigiit ileqqulersuutaat malillugit. Uani pineqanngilaq inuit marluk inooqatigiiginnarnerat imaluunniit katissimanatik inooqatigiinnerat ilaatigut akuerineqartoq tamakkiisumilli atuuttumik inatsisinullu naapertuuttumik katissimanerunngitsoq.d Naagga, pineqartoq tassaavoq naggueqatigiit imaluunniit sumiiffimmi tamatumani najugallit ileqqulersuutaat nalinginnaasumik akuerisaasut naapertorlugit katinneq. Tamatumunnga ilaasinnaavoq nuliassamut akiliuteqarneq, taamaaliornikkut aappassiariit inatsisinut naapertuuttumik Biibililu naapertorlugu katittarput. Ileqquusut malillugit aappariinnerit taamaattut oqartussaasut tamakkiisumik atuuttutut, inatsisinut naapertuuttutut isumaqatigiissutitullu unioqqutinneqartussaanngitsutut akueraat. Katinnerup nalunaarsorneqarsinnaanera nalinginnaavoq, immaqalu aappariit allagartaq katinnerminnut uppernarsaataasoq pisinnaavaat. Nalunaarsorneqarneq aappariinnut, nuliaasumulluunniit taanna uillaruni, qitornaqarpatalu aamma taakkununnga, isumannaallisaataasinnaavoq. Ilagiit kajumissaassavaat taamatut katittut tamaasa katinnertik piaarnerpaamik nalunaarsoqqullugu. Soqutiginarpoq Mosesip inatsisaasa atuunnerisa nalaani katittarnerit qitornartaartarnerillu nalunaarsorneqartarsimagunarmata. — Matthæusi 1:1-16.
13. Aappassiariit sumiiffimmi ileqquusut malillugit katitinneqareerpata katinnermi oqalugiaammut atatillugu suna eqqaamaneqartariaqarpa?
13 Aappassiariit sumiiffimmi ileqquusut malillugit katinnermi inatsisinut naapertuuttumik katittut aappariinngortarput katissimasut. Eqqaaneqareersutut imaassinnaavoq kristumiut inatsisinut naapertuuttumik taamatut katittut naalagaaffilersaarfimmi katinnermi oqalugiartoqarnissaa katinnermilu neriorsueqatigiinnissartik kissaatigigaat. Taamaattoqartillugu oqalugiartup eqqaassavaa aappariit ’kaasarip’ inatsisai naapertorlugit katitinneqareersimasut. Ataasiinnarmik katititsisoqartarpoq, pisumi tamatumani sumiiffimmi ileqquusut malillugit katinneq inatsisinut naapertuuttoq, Biibililu tunngavigalugu ataasiinnarmik oqalugiaateqartarluni. Katinnerup kingorna piaarnerpaamik, ajornanngippat ulloq taanna, oqalugiaatigineqarnissaa kristumiut aappariinnerisa inuiaqatigiinni ataqqinartutut isigineqarnissaannut iluaqutaasarpoq.
14. Pisortanit katitinneqarnissamut aammattaaq sumiiffimmi ileqquusut malillugit katinnissamut periarfissaqarpat kristumiut qanoq iliorsinnaappat?
14 Nunat ilaanni sumiiffimmi ileqquusut malillugit katinnerit tamakkiisumik atuuttutut akuerineqarfigisaanni aamma pisortanit katitinneqarnissamut periarfissaqartarpoq. Katititsineq pisortanit ingerlanneqartoq nalinginnaasumik atorfilimmit aqunneqartarpoq, aamma immaqa aappassiariit katinnermi neriorsoqatigiittarput katinnermullu uppernarsaammik atsiortarlutik. Aappassiariit kristumiut ilaasa katinneq tamanna, ileqquusut malillugit katinnermit piumanerusarpaat. Aalajangersimasunik malittarisassanik ileqqulersornerit taakkua marluk tamaasa malinnissaat pisariaqanngilaq, tamarmik immikkut inatsisitigut atuuttuummata. Aamma tamatumani atuuppoq katinnermi oqalugiaat katinnermilu neriorsoqatigiinneq pillugu immikkoortumi 9-mi 10-milu allassimasoq. Pingaarnerpaajusoq tassaavoq aappassiariit Guutip inuillu isaanni ataqqinartumik katittarnerat. — Lukasi 20:25; 1 Petrusi 2:13, 14.
Aappariinnersi ataqqinnartuutittuarsiuk
15, 16. Ataqqinninneq katinnermi aappariinnermilu qanoq ersersinneqartarpa?
15 Perserit kunngiisa ilaat aappariinnermi ajornartorsiuteqalermat siunnersorti qaffasissoq Memukanimik atilik siunnersuivoq ’arnat tamarmik uiminnik ataqqinnilerumaarnerannik’ kinguneqarsinnaasumik. (Esteri 1:20) Kristumiut aappariinnerini kunngit peqqussutaat pisariaqartinneqanngillat, nuliaasummi uitik ataqqerusummatigit. Aammattaaq uiusut nuliatik ataqqerusuppaat nersorusullugillu. (Ussatit 31:11, 30; 1 Petrusi 3:7) Imaanngilaq aappariit imminnut ataqqeqatigiinnerat aatsaat ukiut arlallit qaangiunnerini ersertariaqartoq. Ataqqeqatigiinnerat aallaqqaataaniilli, aap ullormiit katiffimminniilli ersertariaqarpoq.
16 Tamatumunnga tunngatillugu ataqqinninnermik ersersitsisussat tassaaginnanngillat uiusoq nuliaasorlu. Utoqqaanertaq kristumiu katinnermi oqalugiartuusoq oqalugiarnermigut ataqqinninnermik ersersitsisariaqarpoq. Oqalugiaat katittunut sammisuussaaq. Oqalugiartup katittut ataqqinninnermik ersersitsivigissavai quiasaarutinik inuillu ussataannik ilumoorunanngitsunik atuinnginnermigut. Aamma ima qanigisarpalaartigilissanngilaq katittut tusarnaartullu peqqusiileqilersillugit. Asannittuuniassaarli ineriartornartuuniarlunilu aappariinnermik Pilersitsisumik taassumalu nalissaqanngitsunik siunnersuutaanik erseqqissaanermigut. Aap, utoqqaanertap katinnermi oqalugiaataa ataqqinartoq aappariinnerup Jehova Guutimut ataqqinaataanissaanut iluaqutaassaaq.
17. Sooq kristumiut oqartussaasut katinnermut atatillugu inatsisaat soqutigisarpaat?
17 Misissuinermi maluginiarsimassagunarpat katinnerup aappariinnerullu inatsisinut tunngasortaat amerlasinnaasut. Tamakkua ilaat immaqa illit najukkanni atuutinngillat. Tamattali ilisimasariaqarparput Jehovap Nalunaajaasuini katinnerit inatsisinut sumiiffimmi tamatumani atuuttunut, ’kaasarip’ piumasaqaataanut, ataqqinninnermik ersersitsinerup qanoq pingaaruteqartiginera. (Lukasi 20:25) Paulusip ima kajumissaarpaatigut: „Ilissinnit pisassaqartut tamaasa pisassaannik tunisigit: akileraarutinik pisussaq akileraarutinik, ilanngaatinik pisussaq ilanngaatinik, . . . ataqqineqartussarlu ataqqinninnermik.“ (Romamiut 13:7) Aap, pissusissamisuuginnarpoq kristumiut ullormiit katiffimminniilli aaqqissuussaq Guutip suli atuutitikkallagaa ataqqigaat.
18. Katinnernut amerlasuunut tunngasutilik suna soqutigisariaqarparput, sumilu tamanna pillugu paasissutissarsisinnaavugut?
18 Amerlasuutigut kristumiunik katittoqarnerata kingorna katerisimaartoqartarpoq, assersuutigalugu katittorsiornikkut imaluunniit ilassinninnikkut. Eqqaamasatsittut Jiisusi katittorsiornermut peqataasimavoq. Katerisimaartoqassatillugu kissaatigisarparput taamaaliorneq Guutimut ataqqinaataassasoq allaniillu katernaat ilagiillu kristumiut iluarinartinneqassasut. Biibilimi siunnersuutit suut iluaqutigisinnaavavut? Allaaserisami tulliuttumi tamanna sammineqassaaq.e
[Quppernerup ataani ilanngussat]
a Oqaaseq taanna aamma nalliuttorsiornermut katittorsiornermuunngitsoq atorneqarsinnaavoq. — Esteri 9:22, Septuaginta.
b Jehovap Nalunaajaasuini katinnermi oqalugiaat, oqalugiaammut najoqqutaq „Aappariinneq Guutip isaani ataqqinartoq“-mik qulequtalik naapertorlugu suliarineqartarpoq, minutsinillu 30-nik sivisussuseqartarluni. Sammineqartut tassaapput Biibili tunngavigalugu siunnersuutit pitsaasut atuakkami Ilaqutariittut pilluarneq isertugaateqarpoq-mi aammalu Jehovap Nalunaajaasuisa atuagaataanni atuagassiaataannilu allani sammineqartut. Oqalugiaatip imarisai katittussanut katinnermullu najuuttunut tamanut iluaqutaassapput.
c Inatsisitigut allamik piumasaqaateqanngippat katinnermi neriorsoqatigiinneq Guutimut ataqqinaataasoq una atorneqassaaq. Uissaq apeqqummut uunga angissaaq: „Illit [uissap aqqi tamarmik] Jehova Guutip saavani maanilu najuuttut ilisimannittoralugit [nuliassap aqqi tamarmik] aapparilerusuppiuk, neriorsuillutillu marluullusi inuutillusi, imaluunniit aappariinnermik aaqqissuussineq Guutimit atuutitinneqarallartillugu, asajumallugu sernissorumallugulu Guutip uiusunut inatsisai Allakkani Illernartuni allassimasut naapertorlugit“ Nuliassaq apeqqummut uunga angissaaq: „Illit [nuliassap aqqi tamarmik] Jehova Guutip saavani maanilu najuuttut ilisimannittoralugit [uissap aqqi tamarmik] aapparilerusuppiuk, neriorsuillutillu marluullusi inuutillusi, imaluunniit aappariinnermik aaqqissuussineq Guutimit atuutitinneqarallartillugu, asajumallugu ataqqiumallugulu Guutip nuliaasunut inatsisai Allakkani Illernartuni allassimasut naapertorlugit?“
d Vagttårnet 15. novembari 1962-imoortumi qupp. 527-28-mi katissimanani inooqatigiinneq sammineqarpoq.
e Aamma takuuk Vagttårnet 15. oktobari 2006-imoortumi qupp. 28-mi allaaserisaq ima qulequtalik: „Gør bryllupsdagen til en værdig og glædelig begivenhed“.
Eqqaamavigit?
• Sooq katinnerup inatsisitigut anersaakkullu tunngasortai soqutigisariaqarpavut?
• Kristumiut marluk pisortanit katitinneqartussat suna aalajangersinnaavaat katinnerup kingorna piaarnerpaamik pissasoq?
• Sooq naalagaaffilersaarfimmi katinnermi oqalugiaateqartarpa?
[Qupp. 23-mi assiliartaq]
Itsaq Israelimi katinnermi uissap nuliassani angerlaattarpaa ataatamiluunniit illuanukaattarlugu
[Qupp. 26-mi assiliartaq]
Katernaat kristumiut sumiiffimmi ileqquusut malillugit katissimasut kissaatigisinnaasarpaat naalagaaffilersaarfimmi katinnermi oqalugiaateqartoqassasoq