Naggueqatigiinnik allanik akaarinninnginnermut suna aaqqiissutissaava?

SPANIAMI isikkamik arsaanneq dommerip unitsippaa. Sooq? Pissutigalugu isiginnaartut amerlanerit arsaattut ilaat Camerounimeersoq ima ingasatsigisumik nikanarsarmassuk taanna arsaaffik qimanniarlugu sioorasaarilluni. Ruslandimi Afrikamiunik, Asiamiunik aamma Latinamerikamiunik nakuuserfiginnittarneq nalinginnaalersimavoq; 2004-mi ammip qalipaataa tunngavigalugu nakuuserfiginninneq 55 procentimik qaffariarsimavoq, 2005-imilu nakuusernerit 394-siusimallutik. Tuluit nunaanni misissuinermi peqataasut Asiamiut qernertormiullu pingajorarterutaat isumaqarput naggueqatigiinnik assigiinngisitsineq pissutigalugu suliffitsik annaasimallugu. Assersuutit tamakkua ersersippaat tamanna silarsuarmi nalinginnaaleriartortoq.

Naggueqatigiinnik allanik akaarinninnginnerup ilungersunartui assigiinngisitaartarput ajuallatsitsinermiit imaluunniit eqqarsaqqaarani oqarnermiit, naggueqatigiinnik allanik nungutitsiniaraluarnermut.a Naggueqatigiinnik allanik akaarinninnginnermut suna pissutaava? Akaarinninnginneq qanoq pinngitsoortinneqarsinnaava? Naatsorsuutigineqarsinnaanerluni inuit assigiinngitsunik tunuliaqutallit siunissami eqqissillutik inooqatigiilersinnaanerat? Taakkununnga tunngasut pillugit Biibilimi soqutiginartunik paasissutissaqarpoq.

Naqisimanninneq uumissuinerlu

Biibilimi allassimavoq: „Inuit inuusunnerminniit ajortuinnarmik eqqarsaateqartut.“ (1 Mosesi 8:21) Tamanna tunngavigalugu ilaasa allanik qunutitsineq nuannaraat. Biibilimi nangilluni allassimavoq: „Takuakka qunutitaasut qiasut tuppallersarneqanngitsullu. Ikioriartorneqanngillat qunutitsisaat naalagaammata.“ — Oqaluussisartup oqaasii 4:1, 1990.

Oqaluttuarisaanermi qangarsuaaniilli naggueqatigiinnik allanik uumissuineq Biibilimi takutinneqarpoq. Assersuutigalugu 17 hundredekkunni u.n.s. Egyptenip faraoata Jaaku hebræeriusoq kajumissaarpaa ilaqutarpassuanilu Egyptenimi nunasseqqullugit. Kisianni kingusinnerusukkut farao alla nunasisorpassuarnit taakkunannga ulorianartorsiortinneqartutut misigivoq. Oqaluttuarineqarpoq tamanna qanoq kinguneqarsimanersoq: „Taassuma innuttani oqarfigai: ’Inuiaqatigiit Israelikkut uatsinnit pissaanerulerput amerlanerulerlutillu. Silatusaarluta iliuuseqarfiginiartigit amerliartorpallaaqqunagit. Sorsuttariaqalissaguttami taakku akeqqatsinnut ilannguteratarsinnaapput sorsuffigaluta nunamilu naalaganngorlutik.’ . . . Israelikkut nakkutilliisulerneqarput, taakkualu Israelikkut erloqisillugit pinngitsaalillugit sulisittussaavaat.“ (2 Mosesi 1:9-11) Allaat Egyptenimiut naalakkiipput nukappiaqqat inoorlaat Jaakup kinguaavineersut tamaasa toqoraqqullugit. — 2 Mosesi 1:15, 16.

Suna ajornartorsiummut pissutaava?

Naggueqatigiinnik allanik akaarinninngitsoqartillugu silarsuarmi upperisarsiornerit qaqutiguinnaq akerliliisarput. Ilumoorpoq inuit ataasiakkaat sapiitsuliorlutik naqisimanninnermik akerliliisarsimammata, upperisarsiornerilli ataatsimut isigalugit amerlavallaatigut naqisimannittunut ililiuttarput. USA-mi pissutsit tamakku atuupput, qernertormiunik naqisimanninneq inatsisitigut eqqartuussinertaqanngitsumillu pillaanertigut atortussanngortinneqarmat, 1967-ilu tikivillugu aappariit akusat inatsisitigut inerteqqutaammata. Taamaapportaaq Afrikap kujataani apartheidip nalaani, ikinnerussuteqartut nuimasumik atorfeqarnertik qulakkeerniarlugu ilaatigut assigiinngitsunik amillit aappariinnerat inatsisitigut inerteqqutigimmassuk. Pisimasuni taakkunani marlunni naggueqatigiinnik allanik akaarinninngitsunut tapersersuisuusut ilaat upperluarniartuupput.

Naggueqatigiinnik allanik akaarinninnginnermut pissutiviusoq Biibilimi qulaarneqarpoq. Tassani nassuiarneqarpoq sooq naggueqatigiit ilaat allanik naqisimannittarnersut, tassanimi ima allassimavoq: „Asanninngitsup Guuti ilisimanngilaa, Guutimi tassaavoq asanninneq. Ima oqartoq: ’Guuti asavara’ qatanngunnili uumigalugu, taanna sallutuujuvoq; qatanngunnimi takusimasani asanngikkuniuk Guuti takusimanngisani asasinnaanngilaa.“ (1 Johannesi 4:8, 20) Oqaaseqatigini taakkunani ersersinneqarpoq naggueqatigiinnik allanik akaarinninnginnermut pissutiviusoq. Inuit akaarinninngitsuupput — upperisarsiortuuneraraluarunik upperisarsiortuuneranngikkaluarunilluunniit — Guuti asannginnamikku ilisimannginnamikkuluunniit.

Guuti pillugu ilisimasaqarneq — inuit eqqisseqatigiinnerannut tunngavik

Guuti pillugu ilisimasaqarneq taassuminngalu asanninneq qanoq ilillutik eqqissilluni inooqatigiinnermut iluaqutaasinnaagamik? Paasissutissaruna suna Guutip oqaasianiittoq inunnik allaanerorpasissunik ajoquseerusussuseerutsitsisartoq? Inuit tamarmik Jehova ataatagigaat Biibilimi erseqqissumik ima allassimavoq: „Taamaattoq uagut ataasiinnaq Guutigaarput, tassa Ataataq. Suut tamarmik taassumannga pipput.“ (1 Korinthimiut 8:6) Nangillunilu ima allassimavoq: „Inummit ataatsimit pinngortippai inuiaat tamaasa.“ (Apustilit Suliaat 17:26) Tassa imaappoq inuit tamarmik ilaqutariiusut.

Naggueqatigiit tamarmik Guutimit inuunermik tunineqarsimanertik tulluusimaarutigisinnaavaat, tamarmilli oqaluttuassartaat alianartuuvoq. Biibilimik allattoq Paulusi ima allappoq: „Inukkut ataasiinnakkut ajorti silarsuarmut tikiuttoq.“ Tassa imaappoq ’tamarmik ajortuliortut Guutimit naalannassuseq pigiunnaarlugu’. (Romamiut 3:23; 5:12) Jehova Guutip assigiinngisitaarneq nuannaraa — pinngortitaani marlunnik assigeeqqissaartoqanngilaq. Kisianni naggueqatigiit arlaannik allanit pitsaanerusutut misiginissamut pissutissaqartitsinngilaq. Isuma nalinginnaasoq manna, tassa naggueqatigisat naggueqatigiinnit allanit pitsaanerusut, Biibilimi allassimasunut naapertuutinngilaq. Paasissutissat tamakku Guutimeersut naggueqatigiikkuutaat peqatigiilluarnerulissutigaat.

Guutip inuiannik tamanik isumassuinera

Inuit ilaasa eqqarsaatigisimavaat Guutip Israelikkunnik pingaarnerutitsinermigut taakkuninngalu inuiaqatigiinnut allanut akuliutinnginnissaannik ilinniartitsinermigut naggueqatigiinnik allanik paqumigisaqartarneq siuarsarsimaneraa. (2 Mosesi 34:12) Itsaq Guutip inuiaqatigiit Israelikkut immikkut pigisassamisut toqqarpai siuaasaata Aaperaap uppernera maluginiarnartoq pissutigalugu. Itsaq Israelikkut Guuti siulersortigaat. Taanna nunami naalakkersuisuusussanik toqqaavoq taakkulu inatsisinik tunillugit. Israelikkut aaqqissuussamik tamatuminnga akuerinnittuartillugit inuit allat takusinnaavaat Guutimit aqunneqarnerup kinguneri inuit aqutsinerisa kingunerinit allaanerulluinnartut. Aamma Jehovap itsaq Israelikkut ilinniartippai inuit Guutimut attaveqarlualerseqqinnissaannut pilliuteqarnissap pisariaqassusianik. Jehovap Israelikkunnut immikkut ittumik attaveqarnera taamaalilluni inuiaqatigiinnut tamanut iluaqutaalerpoq. Aaperaamut oqaasianut tamanna naleqquppoq: „Illillu kinguaassakkut nunarsuarmi inuiaat tamarmik pilluaqqunarsissapput, naalakkamma.“ — 1 Mosesi 22:18.

Aammattaaq juutit Guutip oqaasianik illernartumik tunineqarnertik Missiarsillu inunngorfigisassaasut inuiaqatigiiunertik immikkut pisinnaatitaaffigilerpaat. Tamannali aamma inuiaqatigiinnut tamanut iluaqutaassaaq. Allakkani Hebræerisuuni, juutinut tunniunneqartuni, piffissaq naggueqatigiit tamarmik pilluaqqusaangaarfissaat takorlooruminartumik ima allaatigineqarpoq: „Inuiappassuit tassunga ingerlaassapput oqassallutillu: ’Qaa, majuarta [Jehovap] qaqqaanut, Jaakup Guutiata illuanut; aqqutigeqqusaminik ajoqersussavaatigut’ . . . Inuiaat panamik imminnut silugutissaassapput sorsunnissamullu sungiusarunnaassallutik. Tamarmik eqqissillutik inuussapput viinnequtaatimik figenequtaatimillu ataanni kimilluunniit peersinneqarnatik.“ — Mika 4:2-4.

Jiisusi Kristusi nammineq juutinut oqaluussivoq, aammali ima oqarpoq: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:14) Inuiaqatigiit kikkulluunniit nutaarsiassaq nuannersoq tusanngitsuussanngilaat. Taamaattumik kinaassusersiorani naggueqatigiinnik tamanik isumassuinermigut Jehova naammalluinnartumik maligassiuivoq. ’Guuti kinaassusersiortuunngilaq, tassaavorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.’ — Apustilit Suliaat 10:34, 35.

Inatsisini Guutip itsaq inuiaqatigiinnut Israelikkunnut tunniussaani erserpoq taanna inuiaqatigiinnik tamanik isumassuisuusoq. Malugiuk inatsisini Israelikkuunngitsunik Israelimi najugalinnik akaarinninneq piumasarineqaannanngitsoq, imami allassimasoqarpoq: „Takornartamik nunassinni akornassinni najugaqartoqarpat taanna iluaqutiginiassanngilarsi atornerlullugu. Nunaqqatissitut iliorfigisassavat ilittullu asassallugu. Ilissimi nammineq Egyptenimi takornartaasimavusi.“ (3 Mosesi 19:34) Guutip inatsisimini amerlasuuni Israelikkut nunasisunut inussiarnersuunissaat peqqussutigaa. Taamaattumik Boazip, Jiisusip siuaasaata, arnaq takornartaq ajorsaatilik karrit kaavequtaannik katersisoq takugamiuk narsaatiminilu katersuisut arnap taassuma katersorsinnaasaanik karrit kaavequtaannik naammattunik qimatsinissaat qulakkeeramiuk Guutimit ilikkakkani malillugit iliorpoq. — Ruthi 2:1, 10, 16.

Jiisusi qanoq ilinniarfigisinnaaneripput

Jiisusip Guuti pillugu ilisimasaqarneq inunnit allanit tamanit annerungaartumik saqqummersippaa. Taassuma ajoqersukkani paasitippai inunnik allaanerusunik isumassuissasut. Ilaanni arnaq Samariamiu oqaluutilerpaa. Samariamiut naggueqatigiiupput juutinit amerlasuunit nikagineqartut, taamaattumik arnaq uissuummivoq. Oqaloqatigiitsillutik Jiisusip arnaq inussiarnersumik paasitippaa qanoq ililluni inuunermik naassaanngitsumik pisinnaanersoq. — Johannesi 4:7-14.

Aamma Samariamiumik tullerminik asannittumik assersuusiorluni Jiisusip inuit naggueqatigiinnut allanut ilaasut qanoq pissusilersorfigineqarnissaat ilinniartitsissutigaa. Angutip taassuma juuteq piiaasunit saassunneqarsimalluni ikiligaasimaqisoq takulerpaa. Samariamiu eqqarsarsimasinnaagaluarpoq: ’Sooq juuteq ikiussavara? Juutit naggueqatikka narrugaat.’ Kisianni Jiisusip Samariamiup takornartanut isiginnittaasia allaalluinnartumik saqqummiuppaa. Angalasut allat angut ikiligaasimasoq qaangiinnarpaat, kisianni Samariamiup „nalligitsaappaa“ nalinginnaasumillu annerusumik ikiorlugu. Jiisusip assersuusiaq taanna naggaserlugu oqarpoq Guutimit iluarisaajumasut tamarmik aamma taamaaliortariaqartut. — Lukasi 10:30-37.

Apustilip Paulusip Guutimit iluarisaajumasut ilinniartippai inuttut pissuserisaminnik allanngortitsisariaqarnerannik Guutillu inunnik pinneriaasianik ilaarsisariaqarnerannik. Paulusi ima allappoq: „Inutoqaq iperarsimavarsi [peerniarsiuk, NV] iliuusai ilanngullugit, atisimallugulu [atiniarsiullu, NV] nutaaq, nutarterneqartoq pinngortitsisini assigilerlugu, ilisarsinissaq siunertaralugu. Tamatumani apeqqutaanngilaq grækeriuneq juutiunerluunniit, kipineqarneq kipineqannginnerluunniit, barbariuneq, skytiuneq . . . Tamakkuali tamarmik qaavatigut atiniarsiuk asanninneq, tassaammat naammalluinnassutsip qilerutaa.“ — Kolossemiut 3:9-14.

Guutimik ilisimasaqarneq inummik allanngortitsisinnaava?

Ilumut Jehova Guutimik ilisimasaqarneq inuit inunnut allanik nagguilinnut isiginnittaasiannik allanngortitsisinnaava? Assersuummik taasaqariarta. Arnap Asiamiup Canadamut nunasisup assigiinngisitsinermik nalaataqarnini pakatsissutigaa. Jehovap Nalunaajaasuinut atassuteqalerpoq, taakkualu Biibilimik atuaqqissaaqatigilerpaat. Taanna kingusinnerusukkut pingaartitsinini ersersinniarlugu ima allappoq: ’Ilissi [Jehovap Nalunaajaasui] uannut ajunngeqalusilu inussiarneqaasi. Paasigakku qaqortumik amilinnit allanit allaanerulluinnartusi, eqqarsaatigilersimavara sooq. Tamanna sivisuumik eqqarsaatigisimavara, naggataatigullu isummerpunga ilissi Guutip nalunaajaasigisimassagaasi. Biibilimi allassimasut ilumoorsimassapput. Ataatsimiinnissinni takuakka qaqortumik, qernertumik, kajortumik sungaartumillu amilippassuit assigiimmik qalipaatilinnik — imaluunniit eqqornerusumik oqaatigalugu qalipaateqanngitsunik — uummatillit qatanngutigiinnertik pissutigalugu. Maanna paasivara kia taamaalisissimagaasi. Tassa ilissi Guutissi.’

Guutip oqaasiani siulittuutigineqarsimavoq piffissaq nalliukkumaartoq ’[Jehovamik] ilisimasaqarnerup nunamik tamakkiiumaarfissaa’. (Esaja 11:9) Allaat maannakkut inuit amerlangaartut millioninik arlalinnik amerlassusillit „inuiaqatigiinnit naggueqatigiinnillu inuiannillu immikkullu oqaasilinnit“ pisut Biibilimi siulittuutigineqartutut pallorfiginninnermi ilumoortumi ataasiussuseqalersimapput. (Saqqummersitat 7:9) Jehovap siunertaata eqquunneratut silarsuaq tamakkerlugu inuiaqatigiit uumissuinerup asanninnermik taarserneqarumaarfissaa qilanaaraat. Jehovap siunertani Aaperaamut ima oqaatigaa: „Illit kinguaassakkut nunarsuarmi eqqarleriit tamarmik pilluaqqunarsissapput.“ — Apustilit Suliaat 3:25. (wE 7/1 07)

[Quppernerup ataani ilanngussaq]

[Qupp. 4-mi assiliartaq]

Guutip inatsisimini Israelikkut ilinniartippai nunasisunik asanninnissaannik

[Qupp. 5-mi assiliartaq]

Samariamiumik tullerminik asannittumik assersuusiaq qanoq ilinniarfigisinnaavarput?

[Qupp. 6-mi assiliartaq]

Guuti naggueqatigiit arlaannik allanit pitsaanerusutut misiginissamut pissutissaqartitsinngilaq